ନୂଆଦିଲ୍ଲୀ: ମଙ୍ଗଳବାର ବି ରିୟା ଚକ୍ରବର୍ତ୍ତୀ ହେବେ ଜେରା । ଲଗାତାର ପଞ୍ଚମ ଦିନ ପାଇଁ ରିୟାଙ୍କୁ ଜେରା କରିବ ସିବିଆଇ । ଗତ ୪ ଦିନ ମଧ୍ୟରେ ରିୟା ଦୀର୍ଘ ୩୫ ଘଣ୍ଟା ଧରି ମାରାଥନ୍ ଜେରାର ସମ୍ମୁଖୀନ ହୋଇସାରିଛନ୍ତି । ଆଜି ମଙ୍ଗଳବାର ପଞ୍ଚମ ଦିନରେ ମଧ୍ୟ ସେ ସିବିଆଇ ଜେରାର ସମ୍ମୁଖୀନ ହେବେ । ୩୫ ଘଣ୍ଟା ଜେରା ମଧ୍ୟରେ ସିବିଆଇ ରିୟାଙ୍କୁ ଅନେକ ପ୍ରଶ୍ନ କରିଛି । ସୁଶାନ୍ତଙ୍କ ସହ ସମ୍ପର୍କ, ସୁଶାନ୍ତଙ୍କ ପରିବାର ସହ ସମ୍ପର୍କ, ଗ୍ରଗ୍ସ କନେକସନ୍, ୟୁରୋପ ଟ୍ରିପ୍ ଓ ଆର୍ଥିକ କାରବାର ନେଇ ଲଗାତାର ଚାରି ଦିନ ଧରି ଜେରା କରିଛି ସିବିଆଇ ଟିମ୍ ।
ତେବେ ସିବିଆଇର ଅନେକ ପ୍ରଶ୍ନରୁ ରିୟା ବର୍ତ୍ତିବା ପାଇଁ ଚେଷ୍ଟା କରୁଥିବାବେଳେ ଡ୍ରଗ୍ସ କାରବାର ନେଇ ପ୍ରଶ୍ନରେ ରିୟା ବିରକ୍ତି ପ୍ରକାଶ କରିଛନ୍ତି । ଯାହାକି ରିୟାଙ୍କ ଡ୍ରଗ୍ସ କନେକସନ ବିଷୟରେ ଆହୁରି ସନ୍ଦେହକୁ ଘନିଭୂତ କରିଛି । ସେପଟେ ବାନ୍ଦ୍ରା ରେଷ୍ଟୁରାଣ୍ଟ ଡାଇରେକ୍ଟର କୃଣାଲ ଜାନି ଓ ରିୟାଙ୍କ ମଧ୍ୟରେ ହ୍ୱାଟସ୍ଆପ୍ ଚାଟ୍ ଏବେ ସାମ୍ନାକୁ ଆସିଛି ।
ଯେଉଁଥିରେ କୃଣାଲ ଜାନି ଓ ରିୟା ଚକ୍ରବର୍ତ୍ତୀ, ହସିସ୍ ଓ ଡୁବିଜ୍ଙ୍କ ବିଷୟରେ କଥାବର୍ତ୍ତା ହେଉଥିବାର ଜଣାପଡିଛି । ଏଥିସହ ଏହି ଗ୍ରୁପରେ ରିୟା ଓ ସାମୁଏଲସଙ୍କ ମଧ୍ୟରେ ଡ୍ରଗ୍ସ କାରବାର ବାବଦରେ ମଧ୍ୟ ଆଲୋଚନା ହେଉଥିବାର ଜଣାପଡିଛି । ଏହାକୁ ଆଧାର କରି କୃଣାଳକୁ ଇଡି ୬ ଘଣ୍ଟା ଜେରା କରିଛି । ତେବେ ଏହି ହ୍ୱାଟସ୍ଆପ୍ ଚାଟ୍ ଡ୍ରଗ୍ସ କନେକସନ୍ ନେଇ ସନ୍ଦେହ ସୃଷ୍ଟି କରୁଥିବା ବେଳେ ଏବାବଦରେ ସିବିଆଇ ଆଜି ରିୟାଙ୍କୁ ପଚରାଉଚରା କରିପାରେ ବୋଲି ଜଣାପଡିଛି । ଅନ୍ୟପଟେ ଇଡି ପୁଣି ଥରେ ଗୌରବ ଆରିୟାଙ୍କୁ ସମନ ନୋଟିସ୍ ଜାରି କରିଛି । ମଙ୍ଗଳବାର ପୁଣି ଥରେ ପ୍ରବର୍ତ୍ତନ ନିର୍ଦ୍ଦେଶାଳୟ ଗୌରବକୁ ଡ୍ରଗ୍ସ କନେକସନ ଓ ଟଙ୍କା ନେଣଦେଣ ବିଷୟରେ ଜେରା କରିବ ।
