ବାଲେଶ୍ୱର: ବାଲେଶ୍ୱର ଜିଲାରୁ ପ୍ଲାଜମା ସଂଗ୍ରହ ପାଇଁ ଆହ୍ୱାନ ଦେଇଛନ୍ତି ମନ୍ତ୍ରୀ ପ୍ରତାପ ଜେନା । କରୋନା ରୋଗୀଙ୍କ ପାଇଁ ଏବେ ପ୍ଲାଜମା ରାମବାଣ ସାବ୍ୟସ୍ତ ହୋଇଛି । ସେଥିପାଇଁ ଏବେ ପ୍ଲାଜମା ଥେରାପି ଉପରେ ଅଧିକ ଗୁରୁତ୍ୱ ଦେଇଛନ୍ତି ରାଜ୍ୟ ସରକାର । ସମସ୍ତଙ୍କୁ ପ୍ଲାଜମା ଦାନ କରିବାକୁ ମଧ୍ୟ ସରକାର ଅନୁରୋଧ କରିଛନ୍ତି । ସୋମବାର ମନ୍ତ୍ରୀ ପ୍ରତାପ ଜେନା ବାଲେଶ୍ୱର ଜିଲା ଗସ୍ତ କରି ସ୍ଥିତି ସମିକ୍ଷା କରିଛନ୍ତି । ଏହା ସହ ଜିଲାରୁ ପିଜିଟିଭ୍‌ରେ ଆକ୍ରାନ୍ତ ହୋଇ ସୁସ୍ଥ ହୋଇଥିବା ରୋଗୀଙ୍କୁ ପ୍ଲାଜମା ଦାନ କରିବା ପାଇଁ ଉତ୍ସାହିତ କରିବାକୁ ଜିଲାରେ ସମସ୍ତ ବିଧାୟକଙ୍କ ସହିତ ଜିଲା ପ୍ରଶାସନକୁ ପରାମର୍ଶ ଦେଇଛନ୍ତି ।

ଏଥିସହିତ ଜଣେ ରୋଗୀଙ୍କ ପ୍ଲାଜମାରେ ଦୁଇଜଣ ଗୁରୁତର ଆକ୍ରାନ୍ତ ସୁସ୍ଥ ହୋଇ ପାରୁଥିବା ମନ୍ତ୍ରୀ ପ୍ରତାପ ଜେନା ପ୍ରକାଶ କରିଛନ୍ତି । ସେମାନଙ୍କୁ ଉତ୍ସାହିତକରି ପ୍ଲାଜମା ବ୍ୟାଙ୍କରେ ପ୍ଲାଜମା ଦାନ କରିବାକୁ ଲୋକ ପ୍ରତିନିଧିଙ୍କ ଠାରୁ ଆରମ୍ଭକରି ପଶାସନିକ ଅଧିକାରୀମାନେ ଯତ୍ନବାନ ହେବାକୁ ଆହ୍ୱାନ ଦେଇଛନ୍ତି । ସେହିପରି ବାଲେଶ୍ୱର ସହରରେ ୨ କୋଟି ଟଙ୍କା ବ୍ୟୟରେ ସ୍ମାର୍ଟ ପାର୍କ ଓ ଶ୍ମଶାନ ନିର୍ମାଣ କରାଯିବା ସହିତ ୪ଟି ରାସ୍ତାରେ ୩ କିଲୋମିଟର ପର୍ଯ୍ୟନ୍ତ ନୂତନ ଭାବେ ଆଲୋକି କରଣ, ଆସନ୍ତା ନଭେମ୍ବର ମାସ ଶେଷ ସୁଦ୍ଧା ସମସ୍ତ ଘରକୁ ପାନୀୟ ଜଳ ଯୋଗାଣ, ରାସ୍ତା ମରାମତି କରାଯିବାକୁ ବିଭାଗ ତରଫରୁ ପଦକ୍ଷେପ ଗ୍ରହଣ କରାଯାଇଥିବା ମନ୍ତ୍ରୀ ପ୍ରକାଶ କରିଛନ୍ତି ।

ବରଗଡ଼: ପୁଣି ଶୁଭିଛି କିଚିରି ମିଚିରି ଶବ୍ଦ । କଂକ୍ରିଟ ଜଙ୍ଗଲରେ ହଜିଯାଇଥିବା କୁନି ବନ୍ଧୁର ଆଜି ଲେଉଠାଣି ହୋଇଛି । ଉଦାସିଆ ମନ ଆଜି ପୁଣି ତାଙ୍କ ସ୍ୱର ଶୁଣି ତାଜା ହୋଇଛି । ହଜିଥିବା କୁନି ବନ୍ଧୁ ଉଡ଼ିଆସିି ପୁଣି ଘର ଆଗରେ ବସୁଛି । କାହିଁ କେଉଁ କାଳରୁ ମଣିଷ ସହ ସଂପର୍କ ତାର । ପରିବାରର ସଦସ୍ୟ ପରି ସେ । ତାର ସ୍ଥାନ ଘରର ଆଗରେ ଥିବା ଚାଳିଆର ଫାଙ୍କ କି ଆଜବେଷ୍ଟ ତଳେ କୁନି କୁଡ଼ିଆ । ଘରର ଆଗରେ ରହୁଥିବାରୁ ନାଁ ତାର ଘରଚଟିଆ । ବଦଳୁଛି ସମୟ, ଆଉ ନାହିଁ ସେଇ ଚାଳଛପର ଘର କି ବଡ଼ବଡ଼ ତାଳଗଛ । ଚାରିଆଡେ କଂକ୍ରିଟର ଜଙ୍ଗଲ । ତେବେ ଏହାରି ଭିତରେ ଲୋପ ପାଇଗଲେଣି ଅନେକ ପ୍ରଜାତିର ପ୍ରାଣୀ । ସେଥିମଧ୍ୟରୁ ଘର ଚଟିଆ ହେଉଛି ଅନ୍ୟତମ ।

କିନ୍ତୁ କରୋନା ମହାମାରୀ ପ୍ରକୃତି ଓ ପରିବେଶ ପାଇଁ ସାଜିଛି ବରଦାନ । ଦୀର୍ଘ ମାସ ଧରି ଲାଗିରହିଥିବା ଲକଡାଉନ ଯୋଗୁଁ ଅସଂଖ୍ୟ ଯାନବାହାନ ଓ କଳକାରଖାନା ବନ୍ଦ ହୋଇପଡିଥିଲା । ସେଥିପାଇଁ ଜଳ ଓ ବାୟୁ ପ୍ରଦୂଷଣ ବହୁତ କମ ହୋଇଯାଇଛି । ଯାହାଫଳରେ ବହୁ ବର୍ଷ ପରେ ଶୁଣିବାକୁ ମିଳିଛି କିଚିରିମିଚିରି ଶବ୍ଦ । ବିଲୁପ୍ତ ପ୍ରାୟ ଘର ଚଟିଆଙ୍କୁ ଆଜି ପୁଣି ଥରେ ଦେଖିବାକୁ ମିଳିଛି । ମାତ୍ରାଧିକ ନହେଲେ ମଧ୍ୟ ଅଳ୍ପ ସଂଖ୍ୟକ ଘର ଚଟିଆ ବରଗଡ ଜିଲ୍ଲା ଗ୍ରାମାଞ୍ଚଳରେ ଦେଖିବାକୁ ମିଳିଛନ୍ତି । ଯାହାକୁ ଦେଖି ପରିବେଶ ପ୍ରେମୀଙ୍କ ମଧ୍ୟରେ ଖୁଶିର ଲହରୀ ଖେଳିଯାଇଛି । ତାଙ୍କରି କିଚିରି ମିଚିରି ସ୍ଵରରେ ପରିବେଶ ହୋଇଉଠୁଥିଲା ଚଳଚଞ୍ଚଳ ।

ଆଜି କିନ୍ତୁ ମଣିଷ ଜୀବନର ପରିବର୍ତ୍ତନ ଯୋଗୁଁ ମଣିଷ ଠାରୁ ଦୂରେଇ ଯାଇଛନ୍ତି ଏହି ଘରଚଟିଆ । ଚାଷବାସରେ ଅଧିକ ମାତ୍ରାରେ କୀଟନାଶକ ବ୍ୟବହାର କାରଣରୁ କୀଟ ଓ ପୋକ ଅଭାବ ହେବାରୁ ଖାଦ୍ୟ ମିଳିଲା ନାହିଁ ଘରଚଟିଆକୁ । ଅନ୍ୟପଟେ  ଚାଳ ଘରରୁ ପକ୍କା ଘର ପରିବର୍ତ୍ତନ  ।  ଅତ୍ୟଧିକ ଯାନବାହାନ ଚଳାଚଳ ଏବଂ ମୋବାଇଲ ଟାୱାର ର କୁପ୍ରଭାବ ସହିତ ବିଭିନ୍ନ କଳ କାରଖାନାରୁ ନିର୍ଗତ ଧୂଆଁ ଯୋଗୁଁ ଯେଉଁଥିପାଇଁ ଆଗପରି ଆଉ ଘରଚଟିଆ ଦେଖିବାକୁ ମିଳୁନାହାନ୍ତି । ହୁଏତ ମଣିଷର ଆଧୁନିକତା କୁ ନାପସନ୍ଦ କରି ମଣିଷ ଠାରୁ ନିଜକୁ ଦୂରେଇ ନେଇଛନ୍ତି ଏହି ଘର ଚଟିଆ ହଜାର ହଜାର ପ୍ରଥମେ ସହରାଞ୍ଚଳରେ ଉଭାନ ହେବା ପରେ ଧୀରେ ଧୀରେ ଗ୍ରାମାଞ୍ଚଳ ମାନଙ୍କରୁ ମଧ୍ୟ ସଂପୂର୍ଣ୍ଣ ଉଭାନ ହୋଇଯାଇଥିଲେ  ।

ଭୁବନେଶ୍ୱର: ରାଜଧାନୀ ଭୁବନେଶ୍ୱରରେ କରୋନା ସଂକ୍ରମଣ ଦିନକୁ ଦିନ ବଢ଼ିବାରେ ଲାଗିଛି । ସୋମବାର ରାଜଧାନୀରୁ ୮୯ଟି କରୋନା ସଂକ୍ରମିତ ଚିହ୍ନଟ ହୋଇଛନ୍ତି । କ୍ୱାରେଣ୍ଟାଇନ କେନ୍ଦ୍ରରୁ ୬୫ ଜଣ ଚିହ୍ନଟ ହୋଇଥିବା ବେଳେ ୨୪ ଜଣଙ୍କର ରହିଛି ଲୋକାଲ କଣ୍ଟାକ୍ଟ । ନୂଆ ସଂକ୍ରମଣ ଚିହ୍ନଟ ହେବା ସହ ଭୁବନେଶ୍ୱରରେ ମୋଟ କରୋନା ସଂଖ୍ୟା ରହିଛି ୩୦୬୮ । ତେବେ ଆଜି ସୁସ୍ଥ ସଂଖ୍ୟା ୧୭୯୮ରେ ପହଞ୍ଚିଛି । ସେହିଭଳି କରୋନାରେ ୧୮ ଜଣଙ୍କର ମୃତ୍ୟୁ ହୋଇଥିବା ବେଳେ ୧୨୫୦ ଜଣ ଏବେ ସକ୍ରିୟ ରହିଛନ୍ତି ।

ସେପଟେ କଟକରୁ ମଧ୍ୟ ୮୭ ଜଣ ନୂଆ କରୋନା ସଂକ୍ରମିତ ଚିହ୍ନଟ ହୋଇଛନ୍ତି । ୭୬ ଜଣ ହୋମ କ୍ୱାରେଣ୍ଟାଇନରେ ରହିଥିବା ବେଳେ ୨ ଜଣ ପେଡ଼ କ୍ୱାରେଣ୍ଟାଇନ ଏବଂ ୧ ଆନୁଷ୍ଠାନିକ କ୍ୱାରେଣ୍ଟାଇନରେ ରହିଛନ୍ତି । ୮୭ ଜଣଙ୍କ ମଧ୍ୟରୁ ୮ ଜଣଙ୍କର ରହିଛି ଲୋକାଲ କଣ୍ଟାକ୍ଟ । କଟକରେ ଏବେ ପର୍ଯ୍ୟନ୍ତ ମୋଟ ୧୦୯୧ କରୋନା ସଂକ୍ରମିତ ଚିହ୍ନଟ ହୋଇଛନ୍ତି । ୫୮୦ ଜଣ ସୁସ୍ଥ ହୋଇଥିବା ବେଳେ ୫୦୧ ଏପର୍ଯ୍ୟନ୍ତ ସକ୍ରିୟ ରହିଛନ୍ତି । ୧୦ ଜଣଙ୍କର ମୃତ୍ୟୁ ହୋଇଛି ।

ଶନିବାରରେ ୧୩୮୪ ଜଣ ସଂକ୍ରମିତ ଚିହ୍ନଟ ହୋଇଛନ୍ତି । ପୂର୍ବରୁ ଶତାଧିକ କରୋନା ପଜିଟିଭ୍ ଚିହ୍ନଟ ହେଉଥିବା ବେଳେ ଏବେ ଦିନକରୋ ହଜାରରୁ ଅଧିକ କରୋନା ସଂକ୍ରମିତ ଚିହ୍ନଟ ହେଉଛନ୍ତି । ଯଦିଓ ପୂର୍ବରୁ ସ୍ଥାନୀୟ ସଂକ୍ରମଣ କମ ରହୁଥିଲା କିନ୍ତୁ ଏବେ ବଢୁଥିବା ସ୍ଥାନୀୟ ସଂକ୍ରମଣ ଚିନ୍ତା ବଢାଇଛି । ଗତ ୨୪ ଘଣ୍ଟାରେ ଚିହ୍ନଟ ହୋଇଛନ୍ତି ୧୩୮୪ ଜଣ ସଂକ୍ରମିତ । ଏଥିମଧ୍ୟରୁ ୮୭୩ ଟି କେସ୍ କ୍ୱାରେଣ୍ଟାଇନ ସେଣ୍ଟରରୁ ଚିହ୍ନଟ ହୋଇଥିବା ବେଳେ ଅବଶିଷ୍ଟ ୫୧୧ ଟି ମାମଲା ସ୍ଥାନୀୟ ସଂକ୍ରମଣ ବୋଲି ଜଣାପଡ଼ିଛି । ଏନେଇ ସୂଚନା ଦେଇଛି ସୂଚନା ଓ ଲୋକ ସମ୍ପର୍କ ବିଭାଗ ।