କରୋନା ବେଳେ ଡାଲି ଓ ତୈଳବୀଜ ଚାଷୀଙ୍କୁ ସହାୟକ ହେଲେ ସରକାର, ୧୩ ଜିଲ୍ଲାରୁ କିଣିଲେ ୬୦ କୋଟିର ତୈଳବୀଜ…..
ଭୁବନେଶ୍ୱର : କୋଭିଡ-୧୯ ସ୍ଥିତିରେ ରାଜ୍ୟର ଚାଷୀମାନଙ୍କ ଠାରୁ ମୂଲ୍ୟ ସହାୟକ ଯୋଜନାରେ ଡାଲି ଓ ତୈଳବୀଜ ସଂଗହ କରିବାକୁ ରାଜ୍ୟ ସରକାର ପ୍ରାଥମିକତା ପ୍ରଦାନ କରିଛନ୍ତି । ଚଳିତ ବର୍ଷ ଗତବର୍ଷ ତୁଳନାରେ ପ୍ରାୟ ଦଶକୋଟି ଟଙ୍କାର ଅଧିକ ଡାଲି ଓ ତୈଳବୀଜ ସଂଗ୍ରହ କରାଯାଇଛି । ସାରା ରାଜ୍ୟରେ କୋଭିଡ-୧୯ ସ୍ଥିତିରେ ମାର୍ଗଦର୍ଶିକା ଓ ସାମାଜିକ ଦୂରତ୍ୱ ବଜାୟ ରଖି ଏବଂ ସଂପୃକ୍ତ ଅଧିକାରୀଙ୍କ ସହିତ ସ୍ଥିତିର ନିୟମିତ ସମୀକ୍ଷା କରି ଗତବର୍ଷ ତୁଳନାରେ ଅଧିକ ଡାଲି ଓ ତୈଳବୀଜ ସଂଗ୍ରହ କରାଯାଇପାରିଛି ବୋଲି ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ, ସମବାୟ ମନ୍ତ୍ରୀ ରଣେନ୍ଦ୍ର ପ୍ରତାପ ସ୍ୱାଇଁ ପ୍ରକାଶ କରିଛନ୍ତି ।
ରାଜ୍ୟରେ କୋଭିଡ୍-୧୯ ସ୍ଥିତିକୁ ଆଖିରେ ରଖି, ଗତବର୍ଷ ତୁଳନାରେ ୨୦ ପ୍ରତିଶତ ବା ୧୦ କୋଟି ଟଙ୍କାରୁ ଉର୍ଦ୍ଧ୍ବ ମୁଲ୍ୟରୁ ଅଧିକ ଡାଲି ଓ ତୈଳବୀଜ ସଂଗ୍ରହ କରାଯାଇଛି।@CMO_Odisha @Food_Odisha @Coop_Odisha
— Ranendra Pratap Swain (@rajaaswain) August 10, 2020
ଗତବର୍ଷ ମୋଟ ୫୦ କୋଟିରୁ ଉର୍ଦ୍ଧ୍ୱ ମୂଲ୍ୟ ଟଙ୍କାର ଡାଲି ଓ ତୈଳବୀଜ ଚାଷୀମାନଙ୍କ ଠାରୁ ମୂଲ୍ୟ ସହାୟକ ଯୋଜନାରେ ସଂଗ୍ରହ କରାଯାଇଥିବାବେଳେ ଚଳିତ ବର୍ଷ ୬୦ କୋଟିରୁ ଉର୍ଦ୍ଧ୍ୱ ଟଙ୍କା ସଂଗ୍ରହ କରାଯାଇଛି । ଏଥି ମଧ୍ୟରେ ୬୯୯୫.୩୮୨ ମେଟ୍ରିକ ଟନ ମୁଗ, ୨୦୧୧.୩୩୫ ମେଟ୍ରିକ ଟନ ଚିନାବାଦାମ ଏବଂ ୧୨୧.୦୭୯ ମେଟ୍ରିକ ଟନ ସୂର୍ଯ୍ୟମୁଖୀ ମଂଜି ଅନ୍ତର୍ଭୁକ୍ତ ରହିଛି । ଗତବର୍ଷ ସମୁଦାୟ ୭୫୯୩.୨୮୦ ମେଟ୍ରିକ ଟନ ଡାଲି ଓ ତୈଳବୀଜ ସଂଗ୍ରହ କରାଯାଇଥିବାବେଳେ ୨୦୧୯-୨୦ ରବି ଋତୁରେ ୯୧୨୭.୭୯୬ ମେଟ୍ରିକ ଟନ ସଂଗ୍ରହ କରାଯାଇଛି । ଗତବର୍ଷ ତୁଳନାରେ ଚଳିତ ବର୍ଷ ୨୦ ପ୍ରତିଶତ ଅଧିକ ଡାଲି ଓ ତୈଳବୀଜ ସଂଗ୍ରହ କରାଯାଇଛି ।
ଏଥିସହିତ ରାଜ୍ୟ ସରକାରଙ୍କ ମାର୍ଗଦର୍ଶିକା ଓ ସାମାଜିକ ଦୂରତ୍ୱ ବଜାୟ ରଖି ଏବଂ ସଂପୃକ୍ତ ଅଧିକାରୀଙ୍କ ସହିତ ସ୍ଥିତିର ନିୟମିତ ସମୀକ୍ଷା କରି, ଏହି କାର୍ଯ୍ୟ କରାଯାଉଛି।@CMO_Odisha @Food_Odisha @Coop_Odisha
— Ranendra Pratap Swain (@rajaaswain) August 10, 2020
ସୂଚନାଯୋଗ୍ୟ ଯେ, ଚଳିତ ବର୍ଷ ସମବାୟ ବିଭାଗ ପକ୍ଷରୁ ମାର୍କଫେଡ ଦ୍ୱାରା ରାଜ୍ୟର ଗତବର୍ଷ ୮ଟି ଜିଲ୍ଲା ତୁଳନାରେ ଚଳିତ ବର୍ଷ ୧୩ଟି ଜିଲ୍ଲାରୁ ବିଭିନ୍ନ ପ୍ୟାକେଜ ଜରିଆରେ ସର୍ବନିମ୍ନ ସହାୟକ ମୂଲ୍ୟରେ ଚାଷୀମାନଙ୍କ ଠାରୁ ମୁଗ, ଚିନାବାଦାମ ଓ ସୂର୍ଯ୍ୟମୁଖୀ ମଂଜି ସଂଗ୍ରହ କରାଯାଇଛି । ଏଥି ମଧ୍ୟରେ ଯାଜପୁର ଜିଲ୍ଲାରୁ ମୋଟ ୨୫ କୋଟିରୁ ଉର୍ଦ୍ଧ୍ୱ ଟଙ୍କାର ଡାଲି ଓ ତୈଳବୀଜ ସଂଗ୍ରହ କରାଯାଇଥିବାବେଳେ ମାଲକାନଗିରି ଜିଲ୍ଲାରୁ ୯ କୋଟିରୁ ଉର୍ଦ୍ଧ୍ୱ, ଜଗତସିଂହପୁର ଜିଲ୍ଲାରୁ ୮ କୋଟିରୁ ଉର୍ଦ୍ଧ୍ୱ ଏବଂ ପୁରୀ ଜିଲ୍ଲାରୁ ୬ କୋଟିରୁ ଉର୍ଦ୍ଧ୍ୱ ଟଙ୍କାର ଡାଲି ଓ ତୈଳବୀଜ ସଂଗ୍ରହ କରାଯାଇଛି ।
Coronavirus : କରୋନାକୁ ରୋକିବାର ନୂଆ ଉପାୟ,ଆସିବ ଟୁ ଇନ୍ ୱାନ୍ -ଟିକା ଓ ଚିକିତ୍ସା !
ନ୍ୟୁୟର୍କ: ଗୋଟିଏ ପଟେ ଯେତେବେଳେ ବୈଜ୍ଞାନିକ ମାନେ କରୋନା ଟିକା ବିକଶିତ କରିବା ପାଇଁ ସମୟ ବିରୋଧରେ ଯୁଦ୍ଧ ଲଢୁଛନ୍ତି ଅନ୍ୟପକ୍ଷରେ କରୋନାର ନୂଆ ଜେନେରେସନ୍ ଚିକିତ୍ସା ଖୋଜା ଯାଇଥିବା ଦାବି ହେଉଛି । ଏହା ଲୋକଙ୍କୁ ସଂକ୍ରମଣରୁ ବଂଚାଇବା ସହ ସେମାନଙ୍କ ଜୀବନ ମଧ୍ୟ ରକ୍ଷା କରିବ । ଯଦି ମାନବ ପରୀକ୍ଷଣ ସଫଳ ରୁହେ ତେବେ ଆସନ୍ତା ବର୍ଷ ଆରମ୍ଭରେ ବଜାରକୁ ଏହି ଟିକା ଯୁକ୍ତ ଔଷଧ ବଜାରକୁ ଆସିଯିବ । ଏହାର ବ୍ୟବହାର ଦ୍ୱାରା ଲୋକ ବିନା ସୋସିଆଲ ଡିଷ୍ଟାନ୍ସିଂର ବାହାର ବୁଲି ପାରିବେ ।
ଏମିତି ହେବେ ‘ଚିକିତ୍ସା’
ଏହି Sars-Block ଥେରାପିକୁ ଆମେରିକାରେ ବିକଶିତ କରାଯାଉଛି । ଏଥିରେ ବ୍ରିଟିଶ ନିବେଶକ ଅର୍ଥ ଲଗାଇଛନ୍ତି । ଏହାକୁ କରୋନା ଭାଇରସ ଆଧାରିତ ସିନ୍ଥେଟିକ୍ ପ୍ରୋଟିନ୍ ସିକ୍ୱେନ୍ସ ଦ୍ୱାରା ତିଆରି କରାଯାଇଛି । ଏହା ଏକ କର୍କ ଭଳି କାମ କରିଥାଏ । ଏହା ଭାଇରସକୁ ଶରିରର ଭାଇରସ ରିସେପ୍ଟର ସେଲ୍ସ (ACE-2)ରେ ପ୍ରବେଶ କରିବାରୁ କେବଳ ରୋକିନଥାଏ,ଏହା ମଧ୍ୟ ତାକୁ ଚିହ୍ନି ଶରିରର ଇମ୍ୟୁନ୍ ସିଷ୍ଟମକୁ ଭାଇରସ ସହ ଲଢିବା ପାଇଁ ପ୍ରସ୍ତୁତ କରିଥାଏ ।
୯୫-୧୦୦ ପ୍ରତିଶତ ସକ୍ଷମ
କାର୍ଲିଫର୍ଣ୍ଣିଆ ବିଶ୍ୱବିଦ୍ୟାଳୟର ବିଶେଷଜ୍ଞ ଏହା ଉପରେ ଅଧ୍ୟୟନ କରୁଛନ୍ତି । ଏହା ଫଳାଫଳ ଶୁକ୍ରବାର ଦିନ୍ ପ୍ରିପ୍ରିଣ୍ଟ୍ ଜର୍ଣ୍ଣାଲ ବାୟୋଆର୍କାଇଭରେ ପ୍ରକାଶିତ ହୋଇଥିଲା । ଏହା ୯୫ରୁ ୧୦୦ ପ୍ରତିଶତ ଭାଇରସକୁ ଶରିରରେ ପ୍ରବେଶରୁ ଅଟକାଇଥାଏ ବୋଲି କୁହାଯାଉଛି । ଏହାସହ ଏଭଳି ଭ୍ୟାକ୍ସିନର ଆବଶ୍ୟକତା ମଧ୍ୟ ରହିବ ନାହିଁ ଯାହାକୁ ବାରମ୍ବାର ନେବାକୁ ପଡିବ ଓ ଯାହା କେବଳ କୋଭିଡ୍-୧୯ର ଗମ୍ଭୀରତକୁ ଶେଷ କରିଥାଏ ।
ଋଷ ଭ୍ୟାକ୍ସିନ ପ୍ରସ୍ତୁତ
ବିଶ୍ୱର ପ୍ରଥମ କରୋନା ଭ୍ୟାକ୍ସିନ୍ ଋଷରେ ଅଗଷ୍ଟ ୧୨ ତାରିଖ ଦିନ ଲଂଚ୍ ହେବ । ଋଷ ସ୍ୱାସ୍ଥ୍ୟ ମନ୍ତ୍ରଣାଳୟ ଏନେଇ ସୂଚନା ଦେଇଛି । କିନ୍ତୁ ଦୁନିଆର ଅନେକ ବିଶେଷଜ୍ଞ ଋଷ ଭ୍ୟାକ୍ସିନକୁ ସନ୍ଦେହ ଦୃଷ୍ଟିରେ ଦେଖୁଛନ୍ତି । ବିଶ୍ୱ ସ୍ୱାସ୍ଥ୍ୟ ସଂଗଠନ ଅନୁସାରେ ଋଷ ଭ୍ୟାକ୍ସିନ୍ ନେଇ କୌଣସି ଡାଟା ସଂଗଠନକୁ ଦେଇ ନାହିଁ ।
ରାଜଧାନୀ ପଢ଼ିବାକୁ ଆସିଥିଲେ, ଏବେ ଓ୍ୱେଲଡିଂ ଦୋକାନରେ କାମ କରି ପେଟ ପୋଷୁଛନ୍ତି………
ଭୁବନେଶ୍ୱର: କରୋନା ବେଳେ ଆର୍ଥିକ ସମସ୍ୟା ଯେମିତି ପିଛା ଛାଡ଼ୁନି । ଧନୀ-ଗରିବ ସମସ୍ତେ ଅବାଧ୍ୟ କରୋନା କବଳରେ ଅଳ୍ପେ ବହୁତେ ଛନ୍ଦି ହୋଇଛନ୍ତି । କିଏ କରୋନା କଷଣରେ ଧରାଶୟୀ ହୋଇଛି ତ କିଏ ଖୋଜିଛି ନୂଆ ରାହା । କରୋନା କାଳରେ ନିଜ ଫାଇଟିଂ ସ୍ପିରିଟ ଦେଖାଇଛନ୍ତି ଭୁବନେଶ୍ୱରର ତିନିଜଣ ଝିଅ । ସଟଡାଉନ୍ ଓ ଲକଡାଉନ୍ ଗୋଲକ ଧନ୍ଦାରେ ଛନ୍ଦି ହୋଇ ଏଇ ତିନିଜଣ ଫସି ଯାଇଥିଲେ ଭୁବନେଶ୍ୱରରେ । ଏମାନେ ହେଲେ ରୀନା, ଝରଣା ଓ ସୁମିତ୍ରା । ପରିବାରର ଆର୍ଥିକ ସ୍ଥିତି ଦୟନୀୟ ଥିବା ସତ୍ତ୍ୱେ ମଧ୍ୟ ଏମାନେ ଭୁବନେଶ୍ୱରେ ରହି ପାଠ ପଢନ୍ତି । ସମାଜରେ ପରିଚୟ ଖୋଜିବା ସହ ଦି ପଇସା ରୋଜଗାର କରି ନିଜ ଗୋଡ଼ରେ ନିଜେ ଠିଆ ହେବା ପ୍ରୟାସରେ ରାଜଧାନୀକୁ ଟାଣି ହୋଇ ଆସିଥିଲେ ତିନି ହେଁ ।
ହେଲେ କରୋନା ସଂକ୍ରମଣ ବଢିବା ପରେ ରାଜ୍ୟରେ କଟକଣା ଲାଗୁ ହେବା ହୋଇଛି । ସ୍କୁଲ କଲେଜ୍ ବନ୍ଦ ହେଲା । ଏମାନେ ଘରକୁ ଯିବାକୁ ଚାହିଁ ମଧ୍ୟ ଯାଇପାରି ନଥିଲେ । ପାଖରେ ଟଙ୍କା କ୍ରମଶଃ ସରିବା ଆରମ୍ଭ ହୋଇଥିଲା । ଘରର ସ୍ଥିତିକୁ ତିନି ଜଣ ଭଲ ଭାବେ ଜାଣନ୍ତି । ବିବଷ ପରିବାର ଉପରେ ଆହୁରି ବୋଝ ସାଜିବାକୁ ଉଚିତ୍ ମଣିନଥିଲେ ଏମାନେ । ରାଜଧାନୀ ଯେମିତି ପାଖକୁ ଟାଣି ଆଣିଛି ସେମିତି ପେଟକୁ ମୁଠେ ଫୁଟା ଚାଉଳ ବି ଦେବ । ହାତ ଗୋଡ଼ ଥିବା ଯାଏଁ ପେଟ ଅପୋଷା ରହିବନି । ଏକଥା କହିଛନ୍ତି ଝରଣା । କିଛି ଦିନ ଯାଏଁ ଭୁବନେଶ୍ୱରରେ ବିଭିନ୍ନ ସ୍ଥାନରେ ଏଇ ତିନି ଜଣ କାମ ଖୋଜିଥିଲେ ।
ଶେଷରେ ଭୁବନେଶ୍ୱରର ବିଡିଏ ନିକଟସ୍ଥ ଏକ ଓ୍ୱେଲଡ଼ିଂ ଦୋକାନରେ ତିନିଜଣଙ୍କୁ କାମ ମିଳିଛି । ନୂଆ କାମ ଆଉ ନୂଆ ଆହ୍ୱାନ । ହେଲେ କାମରେ ରଖିବା ପୂର୍ବରୁ ମାଲିକ କୁନ୍ଥୁକୁନ୍ଥୁ ହେଉଥିଲେ ମାତ୍ର ଏମାନଙ୍କ ମନୋବଳ ଆଗରେ ସେ ମଧ୍ୟ ହାର ମାନିଲେ । ଏବେ କିନ୍ତୁ ମାଲିକ ଏମାନଙ୍କ କାମରେ ସନ୍ତୁଷ୍ଟ । ଭଲ କାମ କରୁଛନ୍ତି ଓ ପାଖାପାଖି ସବୁ କାମ ଶିଖିଲେଣି । ଲକଡାଉନରେ ପରିବାର ଉପରେ ନିର୍ଭରଶୀଳ ନହୋଇ ଆତ୍ମନର୍ଭରଶୀଳ ହୋଇଥିବା ଏହି ତିନି ଝିଅ ଏବେ ନିଜ କାମ ଓ ପାରିବାପଣିଆକୁ ନେଇ ଗର୍ବ କରୁଛନ୍ତି ।
IPL ସ୍ପନସର ଦୌଡରେ ବାବା ରାମଦେବଙ୍କ ପତଞ୍ଜଳି
ଆଇପିଏଲରେ vivoକୁ ହଟାଇ ଦେବା ପରେ ଲିଗ୍ ପାଇଁ ନୂଆ ପ୍ରାୟୋଜକଙ୍କ ସ୍ଥାନ ଖାଲି ଅଛି । ଏହି ମଧ୍ୟରେ ଯୋଗ ଗୁରୁ ବାବା ରାମଦେବଙ୍କ କମ୍ପାନୀ ପତଞ୍ଜଳି, ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ) ସିଜନ ୧୩ର ଟାଇଟଲ ସ୍ପନ୍ସରସିପ ପାଇଁ ନିଲାମ ଡାକିବା ପାଇଁ ବିଚାର କରୁଛନ୍ତି। ଅବଶ୍ୟ ଏହାକୁ ନେଇ ବିସିସିଆଇ କୌଣସି ବୟାନ ଦେଇନାହିଁ । ଏହି ପ୍ରସଙ୍ଗକୁ ବିଚାର କରୁଥିବା କହିଛନ୍ତି ପତଞ୍ଜଳି ମୁଖପାତ୍ର ଏସ.କେ ତିଜାରାଓ୍ୱାଲା । ଏହା ସହିତ ସେ କହିଛନ୍ତିଯେ ଏକ ଭାରତୀୟ ବ୍ରାଣ୍ଡକୁ ଗ୍ଲାବାଲ କରିବା ପାଇଁ ଏହା ଏକ ଉପଯୁକ୍ତ ମଂଚ । ଏହାକୁ ନେବେ କିମ୍ବା ନେବେ ନାହିଁ ତାହା କହିହେବ ନାହିଁ, କିନ୍ତୁ ଏହାକୁ ନେଇ ଏକ ଶେଷ ଆଲୋଚନା କରାଯିବ ।
ଆଇପିଏଲ ୨୦୨୦ ପାଇଁ ବିସିସିଆଇ ନୂଆ ଟାଇଟଲ ସ୍ପନ୍ସର ଖୋଜୁଛନ୍ତି ଏବଂ ନିକଟରେ ଏହାର ଟେଣ୍ଡର ଜାରି କରି ପାରନ୍ତି । ଭିବୋର ଯିବା ପରେ ଜିଓ,ଆମାଜନ୍,ଟାଟା ଗ୍ରୁପ,ଡ୍ରିମ ୧୧ ଏବଂ ବେୟୋଜୁସ ନିଜର ଉତ୍ସାହ ଦେଖାଇ ସାରିଛନ୍ତି । ବିଶେଷଜ୍ଞଙ୍କ କହିବା ଅନୁସାରେ ଭିବୋ ସ୍ଥାନରେ ଟାଇଟଲ ହାସଲ କରିବା ପାଇଁ ଭିବୋର ମୂଲ୍ୟ ୪୪୦ କୋଟିରୁ କମ୍ ନିଲାମ ଡାମିବାକୁ ପଡ଼ିବ । ଭିବୋ ୨୦୧୮ରୁ ୨୦୨୨ ପର୍ୟ୍ୟନ୍ତ ୨୧୯୦ କୋଟି ଟଙ୍କାରେ ଆଇପିଏଲ ଟାଇଟଲ ପ୍ରାୟୋଜକ ଅଧିକାର ହାସଲ କରିଥିଲେ । ଆସନ୍ତାବର୍ଷ ମୁଖ୍ୟ ପ୍ରାୟୋଜନ ଭାବରେ ଫେରି ପାରନ୍ତି ।
Sushant Singh Rajput Case: ଭିକ୍ଟିମ୍ କାର୍ଡ ଖେଳିଲେ ରିୟା… ମିଡିଆ ଟ୍ରାଏଲକୁ ସୁପ୍ରିମକୋର୍ଟରେ ବିରୋଧ
ମୁମ୍ବାଇ: ଅଭିନେତା ସୁଶାନ୍ତ ସିଂହ ରାଜପୁତଙ୍କ ମୃତ୍ୟୁ ମାମଲାରେ ଛନ୍ଦି ହୋଇଥିବା ଅଭିନେତ୍ରୀ ରିୟା ଚକ୍ରବର୍ତ୍ତୀ ମିଡିଆ ଟ୍ରାୟଲକୁ ନେଇ ଅଭିଯୋଗ କରିଛନ୍ତି । ରିୟା ଚକ୍ରବର୍ତ୍ତୀ ସୁପ୍ରିମ କୋର୍ଟର ଦ୍ୱାରସ୍ଥ ହୋଇ କହିଛନ୍ତି ଯେ, ସୁଶାନ୍ତଙ୍କ ମୃତ୍ୟୁ ନେଇ ଗଣମାଧ୍ୟମ ମତେ ଦୋଷୀ କରିସାରିଛି ।
ରିୟା ନିଜ ନିବେଦନରେ କହିଛନ୍ତି ଯେ, ଗଣମାଧ୍ୟମ ଏହି ଖବରକୁ ଲଗାତାର ଭାବେ ପ୍ରସାରଣ କରିବା ଦ୍ୱାରା ସେ ମାନସିକ ରୂପରେ ଆହତ ହୋଇଛନ୍ତି ଏବଂ ତାଙ୍କ ଗୋପନୀୟତାକୁ ଉଲ୍ଲଂଘନ କରାଯାଇଛି ।
‘ ଆରୋପ ଲଗାଇବା ପୂର୍ବରୁ ହିଁ ଦୋଷୀ ସାବ୍ୟସ୍ତ ହୋଇଗଲି ’
ଅଭିନେତ୍ରୀ ରିୟା କହିଛନ୍ତି ଯେ, ଏହି ପ୍ରସଙ୍ଗ ଗଣମାଧ୍ୟମରେ ଅତ୍ୟଧିକ ମାତ୍ରାରେ ଦେଖାଯାଇଛି । ଏହି ମାମଲାରେ ଗଣମାଧ୍ୟମ ସାକ୍ଷୀଙ୍କୁ ଜେରା କରିବା ସହ ତାଙ୍କ ସହ ଯୁକ୍ତି କରିଛି । ଆବେଦନରେ ସୁପ୍ରିମକୋର୍ଟଙ୍କୁ କୁହାଯାଇଛି ଯେ, ସୁଶାନ୍ତ ସିଂ ରାଜପୁତଙ୍କ ମୃତ୍ୟୁ ମାମଲାରେ କୌଣସି ଅଭିଯୋଗ ଆସିବା ପୂର୍ବରୁ ଗଣମାଧ୍ୟମ ରିୟା ଚକ୍ରବର୍ତ୍ତୀଙ୍କୁ ଦାଷୀ ବୋଲି କହିଛି ।
ରିୟା ନିଜ ନିବେଦନରେ ସିବିଆଇ ଯାଞ୍ଚକୁ ବି ବିରୋଧ କରିଛନ୍ତି । ବିହାର ଏହି ମାମଲାକୁ ମୁମ୍ବାଇ ଟ୍ରାନ୍ସଫର ନକରି ପାଟନା ଟ୍ରାନ୍ସଫର କରିବା ଭୁଲ । ସିବିଆଇକୁ କେସ୍ ଟ୍ରାନ୍ସଫର କରିବାର ନିୟମ ରହିଛି ବୋଲି ସେ ଯୁକ୍ତି କରିଛନ୍ତି ।
ଅନ୍ୟ ଦୁଇ କଳାକାର ଆତ୍ମହତ୍ୟା ବିଷୟରେ କୌଣସି ଯାଞ୍ଚ ନାହିଁ –
ରିୟା ଚକ୍ରବର୍ତ୍ତୀ ତାଙ୍କ ଆଫିଡେଭିଟ୍ରେ କହିଛନ୍ତି ଯେ ଗତ ୩୦ ଦିନ ମଧ୍ୟରେ ଦୁଇ ଅଭିନେତା ଆଶୁତୋଷ ଭାକରେ ଏବଂ ସମୀର ଶର୍ମା ମଧ୍ୟ ଆତ୍ମହତ୍ୟା କରିଛନ୍ତି କିନ୍ତୁ ଗଣମାଧ୍ୟମ ତାଙ୍କୁ ନେଇ କୌଣସି ଖବର ଦେଖାଇ ନାହିଁ । ଆଗାମୀ ଦିନରେ ନିର୍ବାଚନ ଥିବାରୁ ସୁଶାନ୍ତ ସିଂଙ୍କ ଦୁଃଖଦ ଘଟଣାରେ ତଦନ୍ତ ଚାଲିଛି ବୋଲି ରିୟା ତାଙ୍କ ଆଫିଡେଭିଟ୍ରେ କହିଛନ୍ତି ।
ଏହି ମାମଲାରେ ଚାଲିଥିବା ଗଣମାଧ୍ୟମ ଶୁଣାଣି ବନ୍ଦ କରିବାକୁ ଦାବି ସମ୍ପର୍କରେ ରିୟା କହିଛନ୍ତି ଯେ, 2G ସ୍କାମ ଏବଂ ଆରୁଷି ମାମଲାରେ ମିଡିଆ ଟ୍ରାଏଲରେ ଦୋଷୀ ସାବ୍ୟସ୍ତ କରାଯାଇଛି କିନ୍ତୁ କୋର୍ଟରେ ସେମାନଙ୍କୁ ମୁକ୍ତ କରାଯାଇଛି । ସୁପ୍ରିମକୋର୍ଟ ମଧ୍ୟ ଏହି ବିଷୟ ଉପରେ ବିଚାର କରିବା ଉଚିତ୍ ।
ଦିନର ଆଲୋକ ଦେଖିପାରିବନି CBI ଏବଂ ED ଯାଞ୍ଚ
ଅଭିନେତ୍ରୀ ରିୟା ଚକ୍ରବର୍ତ୍ତୀ କହିଛନ୍ତି ଯେ ବିହାର ପୋଲିସର ଏହି ଘଟଣାର ତଦନ୍ତ କରିବାର ଅଧିକାର ନାହିଁ । ରିୟାଙ୍କ ଓକିଲ କହିଛନ୍ତି ଯେ, ହଜାର ହଜାର କୋଟିର ଯାଞ୍ଚ କରୁଥିବା ଇଡି ଏବଂ ସିବିଆଇ ତଦନ୍ତ କଦାପି ଦିନର ଆଲୋକ ଦେଖିପାରିବେ ନାହିଁ । ତେବେ ରିୟା କହିଛନ୍ତି ଯେ ଯଦି ସୁଶାନ୍ତ ସିଂ ରାଜପୁତଙ୍କ ମୃତ୍ୟୁ ଘଟଣାରେ ସୁପ୍ରିମକୋର୍ଟ ସିବିଆଇ ତଦନ୍ତ କରିବାକୁ ନିର୍ଦ୍ଦେଶ ଦିଅନ୍ତି, ତା’ହେଲେ ତାଙ୍କର କୌଣସି ଆପତ୍ତି ରହିବ ନାହିଁ।
ଡ୍ରାଗନ ବିରୋଧରେ ଚକ୍ରବ୍ୟୁହ: ଏକାଠି ହେବେ ଭାରତ, ଋଷ ଓ ଜାପାନ
ନୂଆଦିଲ୍ଲୀ: ଲଦାଖରେ ବାସ୍ତବିକ ନିୟନ୍ତ୍ରଣ ରେଖା(ଏଲଏସି)ରେ ଚୀନ ସହ ଉତ୍ତେଜନା ଲାଗି ରହିଥିବା ବେଳେ ଭାରତ କୂଟନୈତିକ ମୋର୍ଚ୍ଚାରେ ଚୀନକୁ ଘେରିବା ପାଇଁ ଉଦ୍ୟମ ଆରମ୍ଭ କରିଛି । ଋଷ ସହ ମିଶି ଭାରତ ଏକ ତ୍ରୀପାକ୍ଷିକ ମେଣ୍ଟ କରିବାକୁ ଯାଉଛି । ଯେଉଁଥିରେ ଜାପାନକୁ ମଧ୍ୟ ସାମିଲ କରିବା ପାଇଁ ଭାରତ ଉଦ୍ୟମ କରୁଛି ।
ଚୀନକୁ ଘେରିବା ପାଇଁ ରଣନୀତି !
ଗତ କିଛି ବର୍ଷ ମଧ୍ୟରେ ଚୀନ ଓ ଋଷ ମଧ୍ୟରେ ସଂପର୍କ ବୃଦ୍ଧି ପାଇଛି । କିନ୍ତୁ ଭାରତ ସହ ଋଷର ସଂପର୍କ ଅଧିକ ମଜବୁତ । ଋଷ ଓ ଭାରତ ପରସ୍ପରକୁ ଭରସାଯୋଗ୍ୟ ମିତ୍ର ଭାବେ ଗ୍ରହଣ କରନ୍ତି । ଗତ ସପ୍ତାହରେ ଭାରତ ଓ ଋଷ ମଧ୍ୟରେ ପ୍ରଶାନ୍ତ ମହାସାଗର କ୍ଷେତ୍ରରେ ଜାପାନକୁ ସାଙ୍ଗରେ ନେଇ ଏକ ତ୍ରିପକ୍ଷୀୟ ମେଣ୍ଟ ଗଠନ ଉପରେ ଆଲୋଚନା ହୋଇଥିଲା । ଭାରତ ମାନେ ଯେ, ଇଣ୍ଡୋ ପେସିଫିକ୍ ଅଂଚଳ ମୁକ୍ତ ଓ ସମସ୍ତଙ୍କ ପାଇଁ ଉନ୍ମୁକ୍ତ ।
ଋଷର ଚିନ୍ତାକୁ ଦୂରକଲା ଭାରତ
ଭାରତ ଏହି ମେଣ୍ଟକୁ ନେଇ ଋଷର କିଛି ଚିନ୍ତାକୁ ଦୂର କରିଛି । ନୂଆଦିଲ୍ଲୀର ଆଶା ଯେ, ଋଷ ଏହି ମେଣ୍ଟରେ ସାମିଲ ହେବ । ବିଦେଶ ସଚିବ ହର୍ଷ ଶ୍ରୁଙ୍ଗଲା ଅଗଷ୍ଟ ୪ ତାରିଖ ଦିନ ଋଷ ଉପ ବୈଦେଶିକ ଇଗୋର ମୋରଗୁୋଭଙ୍କ ସହ ଏହି ମେଣ୍ଟ କେମିତି ହେବ ଓ ଏହାର ଲକ୍ଷ୍ୟ କ’ଣ ହେବ ତାକୁ ନେଇ ଆଲୋଚନା କରିଥଲେ ।
ଚୀନ ବିରୋଧରେ ଋଷ ମେଣ୍ଟ କରିବ କି ?
ଋଷ ଓ ଚୀନ ମଧ୍ୟରେ ଏବେ ଭଲ ସଂପର୍କ ଅଛି । କିନ୍ତୁ ଭାରତ ସହ ଋଷର ସଂପର୍କ ଯେମିତି ମଜବୁତ ଚୀନ ସହ ସଂପର୍କ ସେତିକି ଶକ୍ତ ନୁହେଁ । ଏହାର ଐତିହାସିକ କାରଣ ମଧ୍ୟ ରହିଛି । ସୋଭିଏତ ସଂଘ ସମୟରେ ଚୀନରେ କମ୍ୟୁନିଷ୍ଟ ସରକାର ଥିଲେ ମଧ୍ୟ ଦୁଇ ଦେଶଙ୍କ ମଧ୍ୟରେ ସଂପର୍କ ତିକ୍ତ ହୋଇ ପଡିଥିଲ । ମାଓଙ୍କ କମ୍ୟୁନିଜମକୁ ଋଷ ସନ୍ଦେହ ଦୃଷ୍ଟିରେ ଦେଖୁଥିବା ବେଳେ ମାଓ ସେ ତୁଙ୍ଗ୍ ମଧ୍ୟ ଋଷକୁ ବିଶ୍ୱାସ କରୁନଥିଲେ । ୧୯୬୦ ଦଶକ ପରଠାରୁ ଦୁଇ ଦେଶଙ୍କ ମଧ୍ୟରେ ସମ୍ପର୍କ ଖରାପ ହୋଇଥିଲା ।
ଏବେ ନିକଟରେ ଲଦାଖକୁ ନେଇ ଭାରତ ସହ ଚୀନ ସେନା ମୁହାଁମୁହିଁ ହେବା ପରେ ଋଷ ଡ୍ରାଗନକୁ ଏସ-୪୦୦ ମିସାଇଲ ଡିଫେନ୍ସ ସିଷ୍ଟମ ଦେବାକୁ ମନା କରିଦେଇଥିଲା । ଯଦିଓ ବହୁ ଆଗରୁ ଋଷ ଏନେଇ ଚୀନ୍ ସହ ଚୁକ୍ତି କରିଥିଲା । ଏସ-୪୦୦ ମିଶାଇଲ ଡିଫେନ୍ସ ସିଷ୍ଟମ ଦେବାକୁ ଋଷର ଅଗ୍ରାହ୍ୟ ପରେ ଚୀନର ସରକାର ନିୟନ୍ତ୍ରିତ ମିଡିଆ ଏଥିପାଇଁ ନାମ ନନେଇ ଭାରତକୁ ଦାୟୀ କରିଥିଲା । ଅନ୍ୟଗୋଟିଏ ଦେଶ ପାଇଁ ଋଷ ଏଭଳି ନିଷ୍ପତି ନେଇଛି ବୋଲି ସେତେବେଳ ଚୀନ୍ ମିଡିଆ ଦାବି କରିଥିଲା ।
+୨ ପରୀକ୍ଷା ଫଳ : ବିଜ୍ଞାନ ଅଗଷ୍ଟ ୧୨ରେ, ୩ୟ ସପ୍ତାହରେ ବାଣିଜ୍ୟ ଓ ଶେଷ ସପ୍ତାହରେ କଳା
ଭୁବନେଶ୍ୱର : +୨ ପରୀକ୍ଷା ଫଳ ପ୍ରକାଶ ପାଇବ । ଅଗଷ୍ଟ ୧୨ରେ ବିଜ୍ଞାନ ବିଭାଗର ଓ ୩ୟ ସପ୍ତାହରେ ବାଣିଜ୍ୟ ବିଭାଗର ଓ ଶେଷ ସପ୍ତାହରେ କଳା ବିଭାଗର ଫଳ ପ୍ରକାଶ ପାଇବ । ତେବେ ବିଜ୍ଞାନ ବିଭାଗର ସପ୍ଲିମେଣ୍ଟାରୀ ପରୀକ୍ଷା ୧୪ରୁ ୨୨ ତାରିଖ ମଧ୍ୟରେ ଶେଷ କରିବା ପାଇଁ ସରକାର ଯୋଜନା ରଖିଛନ୍ତି । ଏନେଇ ସୂଚନା ଦେଇଛନ୍ତି ରାଜ୍ୟ ସ୍କୁଲ ଓ ଗଣଶିକ୍ଷା ମନ୍ତ୍ରୀ ସମୀର ରଞ୍ଜନ ଦାସ । ତେବେ କରୋନା ଯୋଗୁଁ ଓପନ ଲର୍ଣ୍ଣିଂ ପରୀକ୍ଷା ମଧ୍ୟ ବିଳମ୍ୱ ହୋଇଛି ।
ଏପର୍ଯ୍ୟନ୍ତ ଓପନ ଲର୍ଣ୍ଣିଂ ପରୀକ୍ଷା ହୋଇ ପାରି ନାହିଁ । ସରକାର ଏବେ ଖୁବ୍ ଶୀଘ୍ର ଓପନ ଲର୍ଣ୍ଣିଂ ପରୀକ୍ଷାକୁ ମଧ୍ୟ ଶେଷ କରିବାକୁ ଯୋଜନା ରଖିଛନ୍ତି । ଆସନ୍ତା ଅଗଷ୍ଟ ୧୪ରୁ ୨୪ ତାରିଖ ମଧ୍ୟରେ ଓପନ ଲର୍ଣ୍ଣିଂ ପରୀକ୍ଷାକୁ ଶେଷ କରିବା ନେଇ ନିଷ୍ପତ୍ତି ହୋଇଥିବା ମନ୍ତ୍ରୀ ସମୀର ରଞ୍ଜନ ଦାସ କହିଛନ୍ତି । ଚଳିତ ବର୍ଷ ୫୬ ହଜାର ଶିକ୍ଷକ ଶିକ୍ଷୟତ୍ରୀଙ୍କ ପଦନ୍ନୋତି ହେବା କଥା । କରୋନା ବେଳେ ଏହି ପ୍ରକ୍ରିୟା କୌଣସି ପ୍ରକାରରେ ପ୍ରଭାବିତ ହେବ ନାହିଁ ବୋଲି ସୂଚନା ମିଳିଛି ।
ରାଜସ୍ଥାନ ରାଜନୀତି: ରାହୁଲ ଓ ପ୍ରିୟଙ୍କାଙ୍କୁ ଭେଟିଲେ ସଚିନ,ଶେଷ ହୋଇପାରେ ରାଜନୈତିକ ଡ୍ରାମା
ଜୟପୁର: ରାଜସ୍ଥାନ ରାଜନୀତିରେ ନୂଆ ମୋଡ଼ ଆସିଛି । ସଚିନ ପାଇଲଟ କଂଗ୍ରେସର ପୂର୍ବତନ ସଭାପତି ରାହୁଲ ଗାନ୍ଧୀଙ୍କୁ ଭେଟିଛନ୍ତି । ଏହି ବୈଠକରେ କଂଗ୍ରେସର ସାଧାରଣ ସମ୍ପାଦକ ପ୍ରିୟଙ୍କା ଗାନ୍ଧୀ ମଧ୍ୟ ଉପସ୍ଥିତ ଥିଲେ । ପାଇଲଟ୍ କ୍ୟାମ୍ପ ସୂତ୍ରରୁ ପ୍ରକାଶ ଯେ, ରାହୁଲ ଗାନ୍ଧୀ ପ୍ରତ୍ୟେକ ଅଭିଯୋଗର ସମାଧାନ ପାଇଁ ପ୍ରସ୍ତୁତ ଅଛନ୍ତି । ଏହା ସହିତ ଆଗାମୀ ଦିନରେ ଆହୁରି ବୈଠକ ହେବ ବୋଲି କୁହାଯାଇଛି । କୁହାଯାଉଛି ଯେ, ପାଇଲଟ୍ ନରମ ପଡିଛନ୍ତି । ସେ ଦଳକୁ ପୁଣି ଫେରିବେ ।
ସୋମବାର ସକାଳ ଠାରୁ ରାଜସ୍ଥାନରେ ରାଜନୈତିକ ହଟଚମକ ଦେଖିବାକୁ ମିଳିଥିଲା । ସୂତ୍ରରୁ ପ୍ରକାଶ ଯେ, ସଚିନ ପାଇଲଟ ଏବଂ ଅନ୍ୟ ବିଦ୍ରୋହୀ ବିଧାୟକମାନେ କଂଗ୍ରେସର ବରିଷ୍ଠ ନେତାଙ୍କ ସହ ସାକ୍ଷାତ କରିବାକୁ ଯାଉଛନ୍ତି ।
କୁହାଯାଉଛି ଯେ ଏହି ବୈଠକରେ ସେହିସବୁ ତିକ୍ତତାକୁ ଦୂର କରିବାକୁ ଚେଷ୍ଟା କରାଯିବ ଯେଉଁ କାରଣରୁ ଗେହଲଟ ସରକାରଙ୍କ ଉପରେ ବିପଦର ବାଦଲ ଛାଇ ରହିଛି । ନିକଟରେ ଏନସିଆରର କୌଣସି ଏକ ସ୍ଥାନରେ ପ୍ରିୟଙ୍କା ଗାନ୍ଧୀଙ୍କୁ ସଚିନ ପାଇଲଟ ଭେଟିଥିଲେ। ଯାହା ପରେ ଏହି ବୈଠକ ସ୍ଥିର ହୋଇପାରିଛି । ପ୍ରିୟଙ୍କା ଏବଂ ସଚିନଙ୍କ ସାକ୍ଷାତ ପରେ ଅନେକ ସ୍ତରରେ ମଧ୍ୟ ଆଲୋଚନା ହୋଇଛି ।
କୁହାଯାଉଛି ଯେ ଏହି ଘଟଣା ରାଜସ୍ଥାନ ବିଧାନସଭା ଅଧିବେଶନ ଡକାଯିବାର ପାଞ୍ଚ ଦିନ ପୂର୍ବରୁ ଘଟିଥିଲା । ଯେଉଁଠାରେ ଅଶୋକ ଗେହଲୋଟ୍ ତାଙ୍କର ସଂଖ୍ୟାଗରିଷ୍ଠତା ପ୍ରମାଣ କରିବାକୁ ଦାବି କରିଛନ୍ତି । ସେ ତାଙ୍କ ବିରୋଧୀଙ୍କ ଉପରେ ବିଜେପି ସହ ମିଶି ସରକାର ଭାଙ୍ଗିବା ଭଳି ଅଭିଯୋଗ ଆଣିଛନ୍ତି ।
ଏଥି ସହିତ, ପାଇଲଟ୍ କ୍ୟାମ୍ପ ପୁରୁଣା କଥା ଉପରେ ଜିଦ୍ ଧରି ବସିଛନ୍ତି । କଂଗ୍ରେସର ସଫଳତାର ଦାବିକୁ ପ୍ରତ୍ୟାଖ୍ୟାନ କରି ପାଇଲଟ୍ କ୍ୟାମ୍ପ କହିଛନ୍ତି ଯେ, ଆମର ମୁଖ୍ୟ ଲକ୍ଷ୍ୟ ମୁଖ୍ୟମନ୍ତ୍ରୀ ଅଶୋକ ଗେହଲୋଟଙ୍କୁ ପଦରୁ ହଟାଇବା ।