ଭୁବନେଶ୍ବର : ଆହୁରି ୩ ଦିନ କାଚିବ ବର୍ଷା। ୨୮ ତାରିଖ ଯାଏ ବର୍ଷାରୁ ନିସ୍ତାର ନାହିଁ। କାରଣ ଅବପାତରେ ପରିଣତ ହେଲା ସ୍ପଷ୍ଟ ଚିହ୍ନିତ ଲଘୁଚାପ। ଧୀରେ ଧୀରେ ଏହା ପଶ୍ଚିମ ଓ ଉତ୍ତର ପଶ୍ଚିମ ଦିଗକୁ ଗତି କରିବ। ଆଗାମୀ ୨୪ ଘଣ୍ଟାରେ ପଶ୍ଚିମବଙ୍ଗର ଗାଙ୍ଗେୟ ଉପକୂଳ,ଓଡ଼ିଶା, ଝାଡ଼ଖଣ୍ଡ ଦେଇ ଅତିକ୍ରମ କରିବ। ଏହାର ପ୍ରଭାବରେ ସାରା ରାଜ୍ୟରେ ପ୍ରବଳ ବର୍ଷା ଜାରି ରହିଛି। ଫଳରେ ରାଜ୍ୟରେ ଆସନ୍ତା 28 ତାରିଖ ପର୍ଯ୍ୟନ୍ତ ବର୍ଷା ଲାଗି ରହିବ ବୋଲି ପାଣିପାଗ କେନ୍ଦ୍ର ପୂର୍ବାନୁମାନ କରିଛି। ବାଲେଶ୍ୱର, ଭଦ୍ରକ, ଯାଜପୁର, ଢେଙ୍କାନାଳ, ଅନୁଗୁଳ, ଦେଓଗଡ଼, ସମ୍ବଲପୁର, ସୁନ୍ଦରଗଡ଼, ଝାରସୁଗୁଡ଼ା ଓ ବରଗଡ଼କୁ ଅରେଞ୍ଜ ଆଲର୍ଟ ଜାରି ହୋଇଛି। ଏହି ୧୦ ଜିଲ୍ଲାର କିଛି କିଛି ସ୍ଥାନରେ ବିଜୁଳି, ଘଡ଼ଘଡ଼ି ସହ ପ୍ରବଳ ବର୍ଷା ହେବା ସମ୍ଭାବନା ରହିଛି। ୩୦ରୁ ୪୦ କିଲୋମିଟର ବେଗରେ ପବନ ବହିପାରେ। କିଛି ସ୍ଥାନରେ ପ୍ରବଳ ବର୍ଷା ହୋଇପାରେ ବୋଲି ସୂଚନା ଦେଇଛି ପାଣିପାଗ କେନ୍ଦ୍ର I ଅନ୍ଯପଟେ ସ୍ବତନ୍ତ୍ର ରିଲିଫ କମିଶନର ମଧ୍ଯ ପ୍ରବଳ ବର୍ଷା ନେଇ ସତର୍କ କରାଇଦେଇଛନ୍ତି । ସ୍ଥାନୀୟ ପ୍ରଶାସନକୁ ଯନ୍ତ୍ରପାତି ସହ ସତର୍କ ରହିବାକୁ କହିଥିବାବେଳେ ତୁରନ୍ତ ରାଜ୍ୟ ଆପାତକାଳୀନ ଅପରେସନ କେନ୍ଦ୍ରକୁ ଜଣାଇବାକୁ କହିଛନ୍ତି ଏସଆରସି । ମତ୍ସ୍ୟଜୀବୀଙ୍କୁ ୨୫ ତାରିଖରୁ ୨୮ ତାରିଖ ପର୍ଯ୍ୟନ୍ତ ଉତ୍ତର ଓଡ଼ିଶା ଉପକୂଳରେ ପ୍ରବେଶ ନକରିବାକୁ ଏସଆରସି ସତର୍କ କରାଇ ଦେଇଛନ୍ତି ।
ସରପଞ୍ଚଙ୍କ ବାପାଙ୍କ ଉପରକୁ ପ୍ରଥମେ ବୋମାମାଡ ଓ ପରେ ଗୁଳିମାଡ
ବ୍ରହ୍ମପୁର : ସରପଞ୍ଚଙ୍କ ବାପାଙ୍କ ଉପରକୁ ପ୍ରଥମେ ବୋମାମାଡ ଓ ପରେ ଗୁଳିମାଡ। ଗଞ୍ଜାମ ଜିଲ୍ଲା ଶେରଗଡ ଥାନା ସୁନାନ୍ତର ଗାଁରେ ବୋମାମାଡ ସହିତ ଗୁଳି ମାଡ ହୋଇଛି । ସୂଚନା ଅନୁସାରେ, ଗତକାଲି ସନ୍ଧ୍ୟା ପ୍ରାୟ ସାଢେ ୭ଟାରେ ସରପଞ୍ଚଙ୍କ ବାପା ନିରଞ୍ଜନ ଜେନା ଓରଫ କାଳିଆ ଘର ସମ୍ମୁଖରେ ଥିବା ପୋଖରୀ କୂଳରେ ବସି କଥାବାର୍ତ୍ତା ହେଉଥିଲେ। ଏହି ସମୟରେ ଶେରଗଡ ପଟୁ ୩ଟି ବାଇକରେ ପ୍ରାୟ ୬ ଜଣ ମୁଖାପିନ୍ଧା ଦୁର୍ବୃତ୍ତ ଘଟଣାସ୍ଥଳରେ ପହଞ୍ଚି କାଳିଆଙ୍କ ଉପରକୁ ୫ ରୁ ୬ଟି ବୋମାମାଡ କରିଥିଲେ। ବୋମାମାଡ ଦେଖି କାଳିଆ ଦୌଡି ପଳାଇବାରୁ ଦୁର୍ବୃତ୍ତ ମାନେ ଗୁଳିମାଡ କରିଥିଲେ। ଗୁଳିମାଡରେ କାଳିଆ ଆହତ ହୋଇଛି । ବୋମାମାଡ ଓ ଗୁଳିମାଡ଼ ଶବ୍ଦ ଶୁଣି କାଳିଆଙ୍କ ପୁତୁରା ମନୁ ଆସି ଘଟଣାସ୍ଥଳରେ ପହଞ୍ଚି ଦୁର୍ବୃତ୍ତଙ୍କୁ ଧରିବାକୁ ଉଦ୍ୟମ କରିଥିଲେ। ହେଲେ ଦୁର୍ବୃତ୍ତମାନେ ତାଙ୍କୁ ମଧ୍ୟ ବୋମାମାଡ଼ କରିଥିଲେ । ବୋମାମାଡ ଓ ଗୁଳିମାଡ ପରେ ଦୁର୍ବୃତ୍ତ ମାନେ ଅନ୍ଧାରର ସୁଯୋଗ ନେଇ ଫେରାର ହୋଇଯାଇଛନ୍ତି। କାଳିଆଙ୍କୁ ଗ୍ରାମବାସୀ ଘଟଣାସ୍ଥଳରୁ ଉଦ୍ଧାର କରି ମେଡିକାଲରେ ଭର୍ତ୍ତି କରିଛନ୍ତି। କେଉଁ କାରଣରୁ ଆକ୍ରମଣ ହୋଇଛି ତାହା ବର୍ତ୍ତମାନ ସୁଦ୍ଧା ଜଣା ପଡିନାହିଁ । ଘଟଣାସ୍ଥଳରେ ଗଞ୍ଜାମ ଏସପି ଶୁଭେନ୍ଦୁ କୁମାର ପାତ୍ର, ଆସିକା ଏସଡିପିଓ ସନ୍ତୋଷ କୁମାର ଜେନା, ହିଞ୍ଜିଳି ଥାନାଧିକାରୀ ଶ୍ରୀନିବାସ ସେଠୀଙ୍କ ସହିତ ଶେରଗଡ ଥାନାର ଏଏସଆଇ ପହଞ୍ଚି ତଦନ୍ତ ଜାରି ରଖିଛନ୍ତି।
ବଳଙ୍ଗା ମାମଲା : ଘାଣ୍ଟିବ କ୍ରାଇମବ୍ରାଞ୍ଚ ଓ ପୋଲିସ
ନିମାପଡା ; ଆଜିଠାରୁ ବଳଙ୍ଗା ମାମଲାର ତଦନ୍ତ ତ୍ଵରାନ୍ଵିତ ହେବ। ଘାଣ୍ଟିବ କ୍ରାଇମବ୍ରାଞ୍ଚ ଓ ବଳଙ୍ଗା ଥାନା ପୋଲିସ। ଗତକାଲି ଦିଲ୍ଲୀ ଏମ୍ସରେ ତଦନ୍ତକାରୀ ଟିମ୍ ପୀଡ଼ିତାଙ୍କ ବୟାନ ନେଇଛି। ବୟାନରେ କଣ କହିଛନ୍ତୀ ପୀଡ଼ିତା, କାହାର ନାଁ ନେଇଛନ୍ତି କି, ଦୁର୍ବୃତ୍ତଙ୍କୁ ଆଗରୁ ଚିହ୍ନିଥିଲେ କି, ଦେହରେ ନିଆଁ ଲଗାଇ ଦେବା ପରେ ଜଘନ୍ୟକାଣ୍ଡ ପଛରେ କଣ ଅଛି। ଏସବୁ ପ୍ରଶ୍ନର ଉତ୍ତର ନିଜେ ଖୋଜୁଛି ପୋଲିସ। ବୋଧହୁଏ ଏହାର ଉତ୍ତର ମିଳିବ ପରେ ନିଶ୍ଚିତ ଭାବେ ମାମଲାର ଖିଅ ମିଳିବ। ସେପଟେ ଜଟଣୀରେ ଥାନାରେ ଜଣେ ଯୁବକକୁ ପଚରା ଉଚରା କରାଯାଇଛି। ବଳଙ୍ଗାରେ ରହୁଥିବା ରଥିପୁର ଗାଁର ଯୁବକଙ୍କୁ ଜେରା କରାଯାଇଥିଲା। ପୋଲିସର ଚାରି ଜଣିଆ ଟିମ ଏହି ଜେରା କରିଛି। ଟିମରେ ଅଛନ୍ତି ପୁରୀ ଆଡିସନାଲ ଏସ୍ପି ଓ ଆଡିସନାଲ ଡିଏସପି । ଘଟଣା ସହିତ ସେ କେମିତି ସଂପୃକ୍ତ ତାହା ଏଯାଏ ସ୍ପଷ୍ଟ ନାହିଁ। ଗତକାଲି ବଳଙ୍ଗା ପୀଡ଼ିତାଙ୍କ ବୟାନ ରେକର୍ଡ ଶେଷ ହୋଇଛି। ଦିଲ୍ଲୀ ଏମ୍ସରେ ତାଙ୍କର ବୟାନ ରେକର୍ଡ କରାଯାଇଛି। ଏହାର ସଂପୂର୍ଣ୍ଣ ଭିଡିଓ କରାଯାଇଥିଲା।
ଅଶ୍ଳୀଳ ଓ ଯୌନ ସମ୍ପର୍କିତ ଦୃଶ୍ୟ ପ୍ରସାରଣ ପ୍ରସଙ୍ଗ, ବ୍ୟାନ ହେଲା ଅଶ୍ଲୀଳ ଓଟିଟି ଆପ୍
ନନ୍ଦିଘୋଷ ବ୍ୟୁରୋ : ଅଶ୍ଳୀଳ ଓ ଯୌନସମ୍ପର୍କିତ ଦୃଶ୍ୟ ପ୍ରସାରଣ ପ୍ରସଙ୍ଗ। ଉଲ୍ଲୁ, ଆଲଟି, ଦେଶୀଫ୍ଲିକ୍ସ, ବିଗ୍ ସଟସ୍ ଓ ଅନ୍ୟାନ୍ୟ ଓଟିଟି ପ୍ଲାଟଫର୍ମକୁ ନିଷିଦ୍ଧ କରିଛନ୍ତି ସରକାର। ସଫ୍ଟ ପର୍ଣ୍ଣ ଭାବେ ବିଭିନ୍ନ ଦୃଶ୍ୟ ପ୍ରସାରଣ କରୁଥିବାରୁ ଏହି ଆପ୍ଲିକେସନଗୁଡିକୁ ବ୍ୟାନ କରିଛନ୍ତି ସରକାର। ଆଇଟି ନିୟମାବଳୀ ଅନୁସାରେ ଏହି ପଦକ୍ଷେପ ନିଆଯାଇଛି। କେନ୍ଦ୍ର ଇଲେକ୍ଟ୍ରୋନିକ୍ସ ଓ ପ୍ରଯୁକ୍ତି ବିଭାଗ ମନ୍ତ୍ରାଳୟ ପକ୍ଷରୁ ଏହି ନିଷ୍ପତ୍ତି ନିଆଯାଇଛି। ଏରୋଟିକ ୱେବ ସିରିଜ ନାମରେ ବିଭିନ୍ନ ପ୍ରାପ୍ତବୟସ୍କ କଣ୍ଟେଣ୍ଟ ପ୍ରସାରିତ ହେଉଥିଲା। ନାବାଳକ, ନାବାଳିକାମାନେ ଯେପରି ସଫ୍ଟ ପର୍ଣ୍ଣ ଜାଲରେ ଫସିବେ ନାହିଁ ସେଥିଲାଗି ସରକାର ଏହି ପଦକ୍ଷେପ ନେଇଛନ୍ତି। ଗତ ମାର୍ଚ୍ଚରେ ସରକାର ୧୯ଟି ୱେବସାଇଟ, ୧୦ଟି ଆପ୍ ୧୭ଟି ସୋସିଆଲ ମିଡିଆକୁ ସରକାର ନିଷିଦ୍ଧ କରିଥିଲେ।
ଖୋଲୁଛି ନକଲି ରାଷ୍ଟ୍ରଦୂତ ହର୍ଷବର୍ଦ୍ଧନ ଜୈନଙ୍କ ଗୁମର
ନନ୍ଦିଘୋଷ ବ୍ୟୁରୋ : ଖୋଲିବାରେ ଲାଗିଛି ନକଲି ରାଷ୍ଟ୍ରଦୂତ ହର୍ଷବର୍ଦ୍ଧନ ଜୈନଙ୍କ ଗୁମର । ତାଙ୍କ ନେଟଓ୍ବର୍କ ଦେଖି ତାଜୁବ ହୋଇଯାଇଛି ଉତ୍ତରପ୍ରଦେଶ ଏସଟିଏଫ । ବେଆଇନ ଅର୍ଥ ଚାଲାଣ ନିମନ୍ତେ ସେ ବାହାର ରାଷ୍ଟ୍ରରେ ବହୁ ଜାଲ୍ କମ୍ପାନୀ ପ୍ରତିଷ୍ଠା କରିଥିବା ସୂଚନା ମିଳିଛି । ଏପରିକି ୨୦୦୮ରୁ ୨୦୧୧ ଭିତରେ ତାଙ୍କ ସହଯୋଗୀ ଏହସାନ ଅଲି ସୟଦ ଜାଲ୍ ଉପାୟ ଅବଲମ୍ବନ କରି ୭୦ ନିୟୁତ ପାଉଣ୍ଡ ଋଣ କରିବାକୁ ସକ୍ଷମ ହୋଇଥିଲେ । ହର୍ଷବର୍ଦ୍ଧନଙ୍କ ବିରୋଧରେ ଏଫଆଇଆର ଦାୟର ପରେ ସମସ୍ତ ବ୍ୟାଙ୍କ ଆକାଉଣ୍ଟକୁ ଯାଞ୍ଚ କରାଯାଉଛି । ଏସଟିଏଫ ଅନୁସାରେ ବିଦେଶରେ ହର୍ଷବର୍ଦ୍ଧନ ବ୍ରିଟେନରେ ଇଷ୍ଟ ଇଣ୍ଡିଆ କମ୍ପାନୀ ୟୁକେ ଲିମିଟେଡ, ମରିସସ, ଦୁବାଇ ଓ ଆଫ୍ରିକୀୟ ରାଷ୍ଟ୍ରରେ ଫେକ୍ କମ୍ପାନୀ ପ୍ରତିଷ୍ଠା କରିଥିଲେ । ସେହିପରି ତାଙ୍କ ନାମରେ ଦୁବାଇରେ ଷ୍ଟେଟ ଟ୍ରେଡିଂ କର୍ପୋରେସନ, ଆଇଲାଣ୍ଡ ଜେନେରାଲ ଟ୍ରେଡିଂ କୋ ପ୍ରତିଷ୍ଠା ହୋଇଥିଲା । ସେହିପରି ମରିସସରେ ଇନ୍ଦିରା ଓଭରସିଜ୍ ଲିମିଟେଡ, ଆଫ୍ରିକାରେ କାମେରୁନ ଇସ୍ପାତ ସର୍ଲ ପ୍ରତିଷ୍ଠା ହୋଇଥିଲା । ଏହି ସବୁ କମ୍ପାନୀ ଜରିଆରେ ଟଙ୍କା କାରବାର ହେଉଥିଲା । ଜେରା ବେଳେ ହର୍ଷବର୍ଦ୍ଧନ କହିଛନ୍ତି- ବିବାଦୀୟ ଗଡମ୍ୟାନ ଚନ୍ଦ୍ରସ୍ବାମୀଙ୍କ ଘନିଷ୍ଠ ଥିବା ଏହସାନ ଅଲି ସୟଦଙ୍କ ନିର୍ଦ୍ଦେଶ ଅନୁସାରେ ସେ ସବୁକିଛି କରିଛନ୍ତି । ଏହସାନଙ୍କ ଘର ହାଇଦ୍ରାବାଦରେ । ବର୍ତ୍ତମାନ ସେ ତୁର୍କୀରେ ବସବାସ କରୁଛନ୍ତି । ଏହି ଫେକ୍ କମ୍ପାନୀ ଜରିଆରେ ହାଓ୍ବଲା କାରବାର ଓ ବଡ଼ ଧରଣର ଆର୍ଥିକ ଜାଲିଆତି ହୋଇଥିବା ସୂଚନା ମିଳିଛି । ୨୦୦୮ରୁ ୨୦୧୧ ମଧ୍ୟରେ ଏହସାନ ୭୦ ନିୟୁତ ପାଉଣ୍ଡର ଜାଲ୍ ଋଣ ହାସଲ କରିଥିଲେ ଏବଂ କମିଶନ ବାବଦରେ ପାଇଥିଲେ ୨୫ ନିୟୁତ ପାଉଣ୍ଡ । ପରେ ସେ ତୁର୍କୀ ଚାଲିଯାଇଥିଲେ । ୨୦୨୨ରେ ସୁଇସ ସରକାରଙ୍କ ଅନୁରୋଧ କ୍ରମେ ଏହସାନଙ୍କୁ ଲଣ୍ଡନରେ ଗିରଫ କରାଯାଇଥିଲା । ୨୦୨୩ରେ ଲଣ୍ଡନର ଏକ କୋର୍ଟ ସୁଇଜରଲ୍ୟାଣ୍ଡ ହାତରେ ପ୍ରତ୍ୟର୍ପଣ କରିବା ଲାଗି ନିର୍ଦ୍ଦେଶ ଦେଇଥିଲେ । ତଦନ୍ତରୁ ଜଣାଯାଇଛି ହର୍ଷବର୍ଦ୍ଧନଙ୍କ ନାମରେ ବହୁ ବ୍ୟାଙ୍କ ଆକାଉଣ୍ଟ ରହିଛି । ଏହସାନଙ୍କ ସହ ତାଙ୍କର ସମ୍ପର୍କର ବିଭିନ୍ନ ଦିଗକୁ ବି ତଦନ୍ତ କରାଯାଉଛି । ହର୍ଷବର୍ଦ୍ଧନଙ୍କ ନାମରେ ଧାରା ୩୧୮, ୩୧୮(୪), ୩୩୬(୩), ୩୩୮, ୩୪୦ ଅନୁସାରେ ମାମଲା ରୁଜୁ ହୋଇଛି ।
ବିଜୁଳି ସଂକଟରୁ ଉପଭୋକ୍ତାଙ୍କୁ ଉଦ୍ଧାର କରିବା ପାଇଁ ଅଣ୍ଟା ଭିଡ଼ିଛି ବିଦ୍ୟୁତ ଉପଭୋକ୍ତା ମହାସଂଘ
ଭୁବନେଶ୍ୱର : ରାଜ୍ୟବାସୀଙ୍କ ବିଜୁଳି ସମସ୍ୟା ପ୍ରସଙ୍ଗ। ସମସ୍ତ ଅଭିଯୋଗ ଓଡିଶା ବିଦ୍ୟୁତ ନିୟାମକ ଆୟୋଗଙ୍କ ନିକଟରେ ପହଞ୍ଚାଇବା ପାଇଁ ବଡ଼ ପଦକ୍ଷେପ ନେଇଛି ବିଦ୍ୟୁତ ଉପଭୋକ୍ତା ମହାସଂଘ। ବିଜୁଳି କାଟଠୁ ଆରମ୍ଭ କରି ସ୍ମାର୍ଟ ମିଟର, ଅଧିକ ବିଜୁଳି ଦର ଓ ଅନ୍ୟ ସମସ୍ୟାରେ ଉପଭୋକ୍ତା ଝଟପଟ ହେଉଥିବା ବେଳେ ସବୁ ସମସ୍ୟା ଆୟୋଗଙ୍କୁ ଜଣାଇବାକୁ ନୋଟିସ ହୋଇଛି। ଏଥିପାଇଁ ଏକ ଫର୍ମାଟ ଜାରି କରିଛି ମହାସଂଘ। ୧୨ଟି ପଏଣ୍ଟରେ ଏହି ଫର୍ମାଟ ଜରିଆରେ ଓଇଆରସିଙ୍କୁ ସମସ୍ୟା ଜଣାଇବାକୁ କୁହାଯାଇଛି। ଇମେଲ ଆଡ୍ରେସ ଦ୍ୱାରା ନିଜ ଅସୁବିଧା ସିଧାସଳଖ ଓଇଆରସି କିମ୍ବା ମହାସଂଘକୁ ଜଣାଇବାକୁ ପରାମର୍ଶ ଦିଆଯାଇଛି। ଏହି ଫର୍ମାଟକୁ ଲୋକଙ୍କ ପାଖରେ ପହଂଚାଯିବାକୁ ଯୋଜନା ହୋଇଛି। ଫର୍ମାଟକୁ ହ୍ବାଟସଆପ୍ ନମ୍ବରରେ ମଧ୍ୟ ଦିଆଯିବ। ପ୍ରତି ପଞ୍ଚାୟତ, ୱାର୍ଡରୁ ଅଭିଯୋଗ ସଂଗ୍ରହ କରି ଆୟୋଗଙ୍କ ନିକଟରେ ଦାଖଲ କରିବାକୁ କୁହାଯାଇଛି।…
ମହାସଂଘ ପକ୍ଷରୁ ଆୟୋଜିତ ବୈଠକରେ ବିଭିନ୍ନ ରାଜନୈତିକ ଦଳର ପ୍ରତିନିଧି ଯୋଗ ଦେଇ ବିଜୁଳି ସମସ୍ୟା ସମ୍ପର୍କରେ ଅବଗତ କରାଇଥିଲେ। ରାଜନୈତିକ ଦଳ ବି ଲୋକଙ୍କ ଅଭିଯୋଗ ସଂଗ୍ରହ କରି ଆୟୋଗଙ୍କୁ ଦେବାକୁ ନିଷ୍ପତ୍ତି ହୋଇଛି। ସେପଟେ ସ୍ମାର୍ଟ ମିଟର ଲଗାଇବା ନୋଟିସକୁ ବିରୋଧ କରାଯାଇଛି। ସରକାରକୁ ଆସିବା ପୂର୍ବରୁ ବିଜେପି ଯେଉଁ ୩୦୦ ୟୁନିଟ ମାଗଣା ବିଜୁଳି ପ୍ରତିଶ୍ରୁତି ଦେଇଥିଲା ତାହା କୁଆଡେ ଗଲା ବୋଲି ଉଠିଛି ପ୍ରଶ୍ନ। ରାଜ୍ୟର ବିଜୁଳି ସମ୍ପର୍କିତ ସମସ୍ୟା ନେଇ ଆସନ୍ତା ୧୭ ପରେ ହେବ ରାଜ୍ୟସ୍ତରୀୟ କନଭେନ୍ସନ। ବିଜୁଳି ଲଢେଇରେ ସମସ୍ତେ ସାମିଲ ହେବାକୁ ଆହ୍ୱାନ ଦିଆଯାଇଛି। ଫର୍ମାଟରେ ବିଦ୍ୟୁତ ବିଲ୍, ବିଜୁଳି କାଟ, ନୂତନ ବିଜୁଳି ସଂଯୋଗ, ସ୍ମାର୍ଟ ମିଟର, ଟ୍ରାନ୍ସଫର୍ମର କିମ୍ବା ଅଯଥା ବିଜୁଳି ଶୁଳ୍କ ଆଦି ପ୍ରସଙ୍ଗ ଦର୍ଶାଇ ପାରିବେ ଉପଭୋକ୍ତା।
୨୮ ତାରିଖ ଯାଏଁ ପ୍ରବଳ ବର୍ଷା, ୨ ଜିଲ୍ଲାକୁ ରେଡ୍ ଓ ୧୦ ଜିଲ୍ଲାକୁ ଅରେଞ୍ଜ ୱାର୍ଣ୍ଣିଂ ଜାରି
ନନ୍ଦିଘୋଷ ବ୍ୟୁରୋ : ଆସନ୍ତା ୨୮ ତାରିଖ ଯାଏ ରାଜ୍ୟରେ ପ୍ରବଳ ବର୍ଷା। ଏହି ଆକଳନ କରିଛି ପାଣିପାଗ ବିଭାଗ। ସୁଦୃଶ୍ୟ ଲଘୁଚାପ ଅବପାତରେ ପରିଣତ ହେବା ପରେ ପଶ୍ଚିମ ଓ ଉତ୍ତର ପଶ୍ଚିମ ଦିଗକୁ ଗତି କରୁଛି। ତା ପ୍ରଭାବରେ ପ୍ରବଳ ବର୍ଷା ହେବ। କେନ୍ଦୁଝର, ମୟୂରଭଞ୍ଜକୁ ରେଡ଼ ଆଲର୍ଟ ଜାରି କରାଯାଇଥିବା ବେଳେ ବାଲେଶ୍ୱର, ଭଦ୍ରକ, ଯାଜପୁର, ଢେଙ୍କାନାଳ, ଅନୁଗୁଳ, ଦେବଗଡ଼, ସମ୍ବଲପୁର, ସୁନ୍ଦରଗଡ଼, ଝାରସୁଗୁଡ଼ା ଓ ବରଗଡ଼କୁ ଅରେଞ୍ଜ ଆଲର୍ଟ ଜାରି ହୋଇଛି। ଏହି ୧୦ ଜିଲ୍ଲାର କିଛି ସ୍ଥାନରେ ବିଜୁଳି, ଘଡ଼ଘଡ଼ି ସହ ପ୍ରବଳ ବର୍ଷା ହେବା ସମ୍ଭାବନା ରହିଛି। ସେପଟେ ହୀରାକୁଦକୁ ବନ୍ୟାଜଳ ପ୍ରବେଶର ମାତ୍ରା ବଢୁଥିବାରୁ ୨୦ଟି ଗେଟ୍ ଦେଇ ଜଳ ନିଷ୍କାସନ ହେଉଛି। ରୁଲ୍ କର୍ଭ ଅନୁସାରେ ଜୁଲାଇ ୩୧ ସୁଦ୍ଧା ଡ୍ୟାମର ଜଳସ୍ତର ୬୦୫ ଫୁଟ୍ କୁ ହ୍ରାସ କରାଯିବ ବୋଲି ଜଣାପଡ଼ିଛି। …
ପ୍ରବଳ ବର୍ଷାରେ ବେହାଲ ସୁବର୍ଣ୍ଣଜିଲ୍ଲାର ବିନିକା ଅଞ୍ଚଳ। ଏପରିକି ଉପନିବନ୍ଦକଙ୍କ ଅଫିସ ଭିତରେ ଅଣ୍ଟାଏ ପାଣି। ଉପୁଡ଼ି ପଡ଼ିଛି ବିଜୁଳି ଖୁଣ୍ଟ। ଲାଇନ୍ ବି ନାହିଁ। ଲୋକେ ବହୁତ ହନ୍ତସନ୍ତ ହୋଇଛନ୍ତି। ସେପଟେ ଲଗାଣ ବର୍ଷା ଯୋଗୁଁ ବୌଦ୍ଧ ଜିଲ୍ଲା କଣ୍ଟାମାଳ ବ୍ଲକର ଟୁନିମୁଣ୍ଡା ମେହେରୁଣି ବ୍ରିଜ୍ ଉପରେ ତିନି ଫୁଟର ପାଣି ଚାଲୁଛି। ଏଥିପାଇଁ ଯିବା ଆସିବା ପୁରା ଠପ୍। ପାଣିର ସ୍ରୋତ ବଢ଼ିବାରେ ଲାଗିଛି। ୩ଟି ପଂଚାୟତର ୧୦ଟି ଗାଁ ଲୋକେ ହନ୍ତସନ୍ତ ହେଉଛନ୍ତି। …
ସେପଟେ କେନ୍ଦ୍ରାପଡ଼ା ଜିଲ୍ଲା ରାଜନଗର ବ୍ଲକରେ ବନ୍ୟା ଦୁର୍ଦ୍ଦଶା । ୩୦ରୁ ଅଧିକ ଗାଁ ୧୦ ଦିନ ହେଲାଣି ପାଣି ଘେରରେ ଅଛନ୍ତି। ରିଲିଫ ବି ପହଞ୍ଚି ନାହିଁ କି ଡଙ୍ଗା ଟିଏ ବି ସରକାର ଦେଇ ନାହାନ୍ତି। … ସେହିପରି ପଟ୍ଟାମୁଣ୍ଡାଇ ବ୍ଲକରେ ଦୁର୍ଦ୍ଦଶା ଆଣିଛି ବ୍ରାହ୍ମଣୀ ନଦୀ। କେଉଁଠି ଘର ଧୋଇ ହୋଇଯାଇଛି ତ ଆଉ କେଉଁଠି କାନ୍ଥ ଦବି ଯାଇଛି। ଅନେକ ସ୍ଥାନରେ ଏଯାଏ ଚୁଳି ଜଳିଛି। ପଚି ଗଲାଣି ତଳି। ବିଡିଓ କହିଛନ୍ତି, କ୍ଷତିପୂରଣ ଯୋଗାଇ ଦିଆଯିବ। ପୁରୀ ଜିଲ୍ଲା ପିପିଲିରେ ମଧ୍ୟ ସେହି ଅବସ୍ଥା। ଜଇଶପାଟଣା ଛକ ନିକଟରେ ଭାଙ୍ଗିଲା କେନାଲ ବନ୍ଧ। ଡେଲାଙ୍ଗ ଶାଖା କେନାଲ୍ ର ଡାହାଣ ପାର୍ଶ୍ଵ ବନ୍ଧରେ ୫୦ ଫୁଟର ଘାଇ ହୋଇଛି। ପୁରା ଅଞ୍ଚଳ ଜଳମଗ୍ନ।
ମୟୂରଭଂଜ ଜିଲ୍ଲାର ବାରିପଦା ସମେତ ବିଭିନ୍ନ ସ୍ଥାନରେ ଲାଗିରହିଛି ବର୍ଷା। ଏହି ଜିଲ୍ଲାକୁ ତ ରେଡ ୱାର୍ଣ୍ଣିଂ ଦିଆଯାଇଛି। ବର୍ଷାକୁ ଦେଖି ସ୍କୁଲ ବନ୍ଦ ନିର୍ଦ୍ଦେଶ ଦିଆଯାଇଥିଲା। ଛାତ୍ରଛାତ୍ରୀଙ୍କ ସୁରକ୍ଷା ପ୍ରତି ଧ୍ୟାନ ଦେବାକୁ ନିଆଯାଇଛି ନିର୍ଦ୍ଦେଶ। ବ୍ଲକ ହେଡକ୍ଵାଟରରେ ରହିବାକୁ ଅଧିକାରୀଙ୍କୁ କୁହାଯାଇଛି। ମାଲକାନଗିରିରେ ମଧ୍ୟ ପ୍ରବଳ ବର୍ଷା। କନ୍ୟାଶ୍ରମ ପୋଲ ବୁଡ଼ି ଯିବାରୁ କାଲିମେଳା ପଡ଼ିଆ ରାସ୍ତାରେ ଯାତାୟତ ଠପ୍ ହୋଇଛି। ଅନ୍ୟ ନଦୀର ଜଳସ୍ତର ବି ବଢିଛି। ସକାଳେ ବହୁ ସମୟ ଧରି ଗାଡ଼ି ମଟର ଅଟକି ରହିଥିଲା।
‘ରାଜ୍ୟରେ ଅସୁରକ୍ଷିତ ମହିଳା, ନାରୀ ନିର୍ଯାତନା ବଢିବଢି ଚାଲିଥିବା ବେଳେ ଶୋଇଛନ୍ତି ସରକାର’
ଭୁବନେଶ୍ବର : ବାଲେଶ୍ବରରୁ ବଳଙ୍ଗା । ସବୁଠି ମହିଳା ନିର୍ଯାତନାର ଶିକାର ହୋଇ ମାଗୁଛି ନ୍ୟାୟ । ରାଜଧାନୀ ରାଜରାସ୍ତାରେ ବି ଅସୁରକ୍ଷିତ ମହିଳା । ପ୍ରତ୍ୟେକ ଦିନ ଦୁଷ୍କର୍ମ, ହତ୍ୟା, ଅସଦାଚରଣ ଅଭିଯୋଗର ଲମ୍ବା ଫର୍ଦ୍ଦ । ଘରେ କି ବାହାରେ କେଉଁଠି ବି ସୁରକ୍ଷିତ ନୁହେଁ ମହିଳା । ଓଡିଶାରେ ମହିଳା ନିର୍ଯାତନା ଦେଶ ଓ ବିଦେଶରେ ଚର୍ଚ୍ଚାର ବିଷୟ । ସାଧାରଣ ଜନତା ଠାରୁ ଆରମ୍ଭ କରି ସୁପ୍ରିମକୋର୍ଟ ଯାଏ ମହିଳା ନିର୍ଯାତନା ନେଇ ସମସ୍ତେ ଚିନ୍ତିତ । ହେଲେ ସରକାର ଚୁପ ଓ ନିରବଦ୍ରଷ୍ଟା । ଓଡିଶାରେ ବିଜେପି ସରକାର ଆସିବା ଦିନଠାରୁ ରାଜ୍ୟରେ ମହିଳା ବଢିଚାଲିଥିବାରୁ ରାଜରାସ୍ତାକୁ ଓହ୍ଲାଇଛି ବିଜେଡି । ମହିଳାମାନଙ୍କୁ ନ୍ୟାୟ ଦେବା ପାଇଁ ଦଳ ସବୁ ଫୋରମରେ ଲଢେଇ ଜାରି ରଖିଛି । ପ୍ରତିବାଦ, ଆନ୍ଦୋଳନ କରି ସରକାରଙ୍କ ଉପରେ ଚାପ ପକାଇଛି । ଆଗକୁ ଏ ପ୍ରସଙ୍ଗକୁ ନେଇ ଲମ୍ବା ଲଢେଇ ଜାରି ରହିବ ବୋଲି ବିରୋଧୀ ଦଳ ଉପ ମୁଖ୍ୟ ସଚେତକ ପ୍ରତାପ ଦେବ କହିଛନ୍ତି । ସେପଟେ ରାଜ୍ୟରେ ମହିଳା ନିର୍ଯାତନା ବୃଦ୍ଧି ପାଇଥିବାରୁ ରାଜ୍ୟ ସରକାରଙ୍କୁ ଟାର୍ଗେଟ କରିଛି କଂଗ୍ରେସ । ନାରୀ ନିର୍ଯାତନା ବଢିବଢି ଚାଲିଥିବାରୁ ତୁରନ୍ତ ରାଜ୍ୟ ସରକାର ବିଧାନସଭା ଅଧିବେଶନ ଡାକିବାକୁ ଦଳ ଦାବି କରିଛି ।
ବିରୋଧୀଙ୍କ ଅଭିଯୋଗର କଡ଼ା ଜବାବ ଦେଇଛି ବିଜେପି । ଦଳୀୟ ବିଧାୟକ ସରୋଜ ପାଢୀ କହିଛନ୍ତି କଂଗ୍ରେସ ନାରୀ ନିର୍ଯାତନା ପ୍ରସଙ୍ଗରେ କହିବାର ଅଧିକାର ନାହିଁ । ଛାତ୍ର କଂଗ୍ରେସ ସଭାପତି ନାରୀ ନିର୍ଯାତନା ମାମଲାରେ ଗିରଫ ହୋଇଛନ୍ତି । ଅନ୍ଯପଟେ ବିଜେପି ଅଭିଯୋଗର କଡା ଜବାବ ଦେଇଛନ୍ତି କଂଗ୍ରେସ ମୁଖପାତ୍ର ନିଶିକାନ୍ତ ମିଶ୍ର । ବିଜେପି ସରକାରକୁ ଗାଦିଚ୍ୟୁତ ନକରିବା ଯାଏ କଂଗ୍ରେସ ଲଢେଇ ଜାରି ରଖିବ ବୋଲି ଦଳ କହିଛି । ମହିଳା ନିର୍ଯାତନା ରୋକିବାରେ ସରକାର ବିଫଳ ହୋଇଛନ୍ତି । ଦୁଇ ବିରୋଧୀ ସରକାରଙ୍କୁ ଏ ପ୍ରସଙ୍ଗରେ ଷଣ୍ଢୁଆସୀ ଆକ୍ରମଣ କରୁଥିବା ବେଳେ ଶାସକ ଦଳ ବି କଡା ଜାବବ ଦେଉଛି ।
ମହାନଦୀ ଜଳ ବିବାଦକୁ ନେଇ ସର୍ବଦଳୀୟ ବୈଠକ ଡାକିବାକୁ ନବୀନଙ୍କ ଦାବି, ସମର୍ଥନ କଲା କଂଗ୍ରେସ
ଭୁବନେଶ୍ବର : ମହାନଦୀ ପାଇଁ ହୋଇଛି କି ରୁଦ୍ଧ ଦ୍ବାର ଡିଲ ? ଓଡ଼ିଶାର ଜଳ ଅଧିକାରକୁ କରି ଦିଆଯାଉଛି କି ଗୌଣ ? ରାଜ୍ୟ ସରକାର ଆଇନଗତ ଲଢ଼େଇରୁ ଓହିରି ଯାଇଛନ୍ତି କି ? ଯଦି ଓହରି ନାହାନ୍ତି ତେବେ ତୁରନ୍ତ ଡାକନ୍ତୁ ସର୍ବଦଳୀୟ ବୈଠକ। ଛତିଶଗଡ ସହ କେଉଁ ପ୍ରକାର ବୁଝାମଣା ହୋଇଛି ତାହା ସ୍ପଷ୍ଟ କରିବାକୁ ଦାବି କରିଛନ୍ତି ବିରୋଧୀ ଦଳ ନେତା ନବୀନ ପଟ୍ଟନାୟକ। ମହାନଦୀ ଜଳ ବିବାଦ ଟ୍ରିବ୍ୟୁନାଲରେ ରାଜ୍ୟ ସରକାର ଆଇନଗତ ଲଢେଇ ଲଢିବେ ନା ନାହିଁ ତାହା ମଧ୍ୟ ସ୍ପଷ୍ଟ କରିବାକୁ ଦାବି କରିଛନ୍ତି ନବୀନ। ଦୁଇ ରାଜ୍ୟ ମଧ୍ୟରେ ଆପୋଷ ବୁଝାମଣା ଜରିଆରେ ମହାନଦୀ ବିବାଦର ସମାଧାନ ପାଇଁ ମୁଖ୍ୟମନ୍ତ୍ରୀ ଘୋଷଣା କରିବା ପରେ ଏଭଳି ପ୍ରଶ୍ନ କରିଛନ୍ତି ବିରୋଧୀ ଦଳ ନେତା ନବୀନ ପଟ୍ଟନାୟକ। ଅଗଷ୍ଟ ୨ ତାରିଖରେ ଟ୍ରିବ୍ୟୁନାଲରେ ପରବର୍ତ୍ତୀ ଶୁଣାଣି ଥିବାରୁ, ସରକାର ଏବେଠୁ ନିଜର ଆଭିମୁଖ୍ୟ ସ୍ପଷ୍ଟ କରିବାକୁ ଦାବି ହୋଇଛି। ସରକାର ରାଜ୍ୟବାସୀ ଓ ରାଜନୈତିକ ଦଳଙ୍କୁ ବିଶ୍ବାସକୁ ନେବା ଦରକାର। କାରଣ ମହାନଦୀ କେବଳ ଏକ ନଦୀ ନୁହେଁ, ଏହା ରାଜ୍ୟର ଆତ୍ମା। ତେଣୁ ମହାନଦୀ ବିବାଦରେ ସରକାର ସ୍ବଚ୍ଛତା ଅବଲମ୍ବନ କରିବା ଉଚିତ ବୋଲି କହିଛନ୍ତି ନବୀନ। ଜଳ ବିବାଦ ନେଇ ନବୀନ ଉଦବେଗ ପ୍ରକାଶ କରିବା ପରେ ଶାସକ ବିଜେପିକୁ ଘେରିଛନ୍ତି ଦୁଇ ବିରୋଧୀ ବିଜେଡି ଓ କଂଗ୍ରେସ। ବିଜେଡି ବିଧାୟକ କ୍ୟାପଟେନ ଦିବ୍ୟଶଙ୍କର ମିଶ୍ର କହିଛନ୍ତି, ଛତିଶଗଡ଼ ମହାନଦୀ ଜଳ ଛାଡୁନାହିଁ। ଓଡ଼ିଶାରେ ଅଣମୌସୁମୀ ସମୟରେ ଦେଖାଦେଉଛି ଜଳ ସଙ୍କଟ। ଛତିଶଗଡ, ଓଡ଼ିଶା ଓ କେନ୍ଦ୍ରରେ ବିଜେପି ସରକାର ଥିଲେ ମଧ୍ୟ କାହିଁକି ସମସ୍ୟାର ସମାଧାନ ହେଉ ନାହିଁ ବୋଲି ପ୍ରଶ୍ନ କରିଛନ୍ତି ବିରୋଧୀ। ଏହାସହ ମହାନଦୀ ଜଳ ବିବାଦର ସମାଧାନ ପାଇଁ ସରକାର କଣ ପଦକ୍ଷେପ ନେଇଛନ୍ତି, ସେନେଇ ସର୍ବଦଳୀୟ ବୈଠକ ଡାକି ସ୍ପଷ୍ଟ କରନ୍ତୁ ବୋଲି ଦାବି କରିଛି କଂଗ୍ରେସ।
ତତ୍କାଳୀନ ରାଜ୍ୟ ସରକାରଙ୍କ ପିଟିସନ ଆଧାରରେ ୨୦୧୮ ଜାନୁଆରୀ ୨୩ ତାରିଖରେ ସୁପ୍ରିମକୋର୍ଟ କେନ୍ଦ୍ର ସରକାରଙ୍କୁ ମହାନଦୀ ଜଳ ବିବାଦ ଟ୍ରିବ୍ୟୁନାଲ ଗଠନ କରିବାକୁ ନିର୍ଦ୍ଦେଶ ଦେଇଥିଲେ। ବିଜେଡିର ନିୟମିତ ଦାବି ଯୋଗୁ ମାର୍ଚ୍ଚ ୧୨ ତାରିଖରେ ଟ୍ରିବ୍ୟୁନାଲ ଗଠନ କରିଥିଲେ କେନ୍ଦ୍ର କ୍ୟାବିନେଟ। ହେଲେ ଏବେ ଦେଖିବାକୁ ମିଳୁଛି ଯେ, ବିଜେଡି ଯେଉଁ ଆଇନଗତ ଲଢେଇ ଆରମ୍ଭ କରିଥିଲା, ତାକୁ ଦୁର୍ବଳ କରିଦେବାକୁ ଚେଷ୍ଟା କରାଯାଉଛି । ରାଜ୍ୟବାସୀଙ୍କୁ ବିଶ୍ବାସକୁ ନନେଇ ରାଜ୍ୟ ସରକାର କେଉଁ ପ୍ରକାର ଆପୋଷ ବୁଝାମଣା କରୁଛନ୍ତି ତାହା ମଧ୍ୟ ସ୍ପଷ୍ଟ କରୁନାହାନ୍ତି । ରାଜ୍ୟ ସ୍ବାର୍ଥକୁ ରୁଦ୍ଧ ଦ୍ବାର ଡିଲରେ ପାଣିଚିଆ କରାଯାଉଛି କି ବୋଲି ନବୀନ ପ୍ରଶ୍ନ କରିବା ସହ, ଏନେଇ ରାଜ୍ୟ ସରକାର ସମ୍ପୂର୍ଣ୍ଣ ସ୍ବଚ୍ଛତାର ସହ ଉତ୍ତର ଦେବାକୁ ଦାବି କରିଛନ୍ତି। ଅନ୍ୟପଟେ ପଞ୍ଚାୟତିରାଜ ମନ୍ତ୍ରୀ କହିଛନ୍ତି ଯେ, ଏବେ ଟ୍ରିପଲ ଇଞ୍ଜିନ ସରକାର ଅଛି । ଆମେ ଏହା ଉପରେ ନଜର ରଖିଛୁ। ଛତିଶଗଡ଼ ମୁଖ୍ୟମନ୍ତ୍ରୀଙ୍କ ସହ ମଧ୍ୟ ଆଲୋଚନା ସରିଛି ବୋଲି କହିଛନ୍ତି ମନ୍ତ୍ରୀ ରବି ନାୟକ। ସୋସିଆଲ ମଡିଆରେ ମହାନଦୀ ପ୍ରସଙ୍ଗରେ ଓଡ଼ିଶାର ହକକୁ ନ୍ୟୁନ କରିବାକୁ ହେଉଥିବା ଉଦ୍ୟମକୁ ନେଇ ବର୍ଷିଛନ୍ତି ନବୀନ। ମହାନଦୀ ଓଡ଼ିଶାର ଜୀବନରେଖା। ତେଣୁ ତୁରନ୍ତ ବିଜେପି ସରକାର ଭିତିରି ବୁଝାମଣା ନୁହେଁ, ବରଂ ରାଜ୍ୟର ସ୍ବାର୍ଥକୁ ଗୁରୁତ୍ବ ଦେବାକୁ ଦାବି କରିଛନ୍ତି ନବୀନ ପଟ୍ଟନାୟକ।
ବିହାର ସ୍ବତନ୍ତ୍ର ଭୋଟର ତାଲିକା ସଂଶୋଧନ ପ୍ରସଙ୍ଗକୁ ନେଇ ସଂସଦରେ ଅଚଳାବସ୍ଥା ଜାରି
ନୂଆଦିଲ୍ଲୀ : ବିହାର ସ୍ବତନ୍ତ୍ର ଭୋଟର ତାଲିକା ସଂଶୋଧନ ପ୍ରସଙ୍ଗ। ସଂସଦରେ ଏହାକୁ ନେଇ ଅଚଳାବସ୍ଥା ଜାରି ରହିଛି। ପ୍ରତିବାଦରେ ବିରୋଧୀ ସାଂସଦ କରିଛନ୍ତି ଡଷ୍ଟବିନ ପ୍ରୋଟେଷ୍ଟ। ଆଜି ପଞ୍ଚମ ଦିନରେ ବି ସଂସଦ ହୋଇଥିଲା ଅଚଳ। ବିହାର ସ୍ପେସାଲ ଇଣ୍ଟେନସିଭ ରିଭିଜନକୁ ନେଇ ସଂସଦ ଭବନ ବାହାରେ ପ୍ରତିବାଦ କରିଥିଲେ ଇଣ୍ଡିମେଣ୍ଟ ସାଂସଦ। ବିକ୍ଷୋଭରେ ସାମିଲ ହୋଇଥିଲେ ବିରୋଧୀ ଦଳ ନେତା ରାହୁଲ ଗାନ୍ଧି, ପ୍ରିୟଙ୍କା ଗାନ୍ଧିଙ୍କ ସମେତ ବହୁ ନେତା। ବିକ୍ଷୋଭରେ ସାଙ୍କେତିକ ଭାବେ ବିହାର ଏସଆଇଆରକୁ ଚିରିବା ସହ ଡଷ୍ଟବିନରେ ପକାଇଥିଲେ ସାଂସଦ। ଗତ ୨୧ ତାରିଖଠାରୁ ଏହି ପ୍ରସଙ୍ଗରେ ସଂସଦରେ ବିକ୍ଷୋଭ ଜାରି ରଖିଛନ୍ତି ସାଂସଦ। ଏସଆଇଆର ଯୋଗୁ ବର୍ତ୍ତମାନ ସୁଦ୍ଧା ୫୬ ଲକ୍ଷରୁ ଅଧିକ ଭୋଟର ବାଦ୍ ପଡିଥିବା ନେଇ ସୂଚନା ମିଳିଥିବାବେଳେ ଆହୁରି ବହୁ ଅଧିକ ଭୋଟର ବାଦ୍ ପଡିବା ଆଶଙ୍କା ସୃଷ୍ଟି ହୋଇଛି। ଏହାକୁ କେନ୍ଦ୍ର କରି ବିରୋଧୀ ସାଂସଦମାନେ ତୀବ୍ର ହଟ୍ଟଗୋଳ କରିବା ସହ ସଂସଦ ଭବନ ବାହାରେ ପ୍ରତିବାଦ କରିଛନ୍ତି।