ନୂଆଦିଲ୍ଲୀ: ଦ କପିଲ ଶର୍ମା ସୋ’ରେ ଯେତେବେଳେ ମହାଭାରତର କାଷ୍ଟ ଅତିଥି ହୋଇଆସିଥିଲେ ସେଥିରେ ମହାଭାରତରେ ଭୀଷ୍ମ ଚରିତ୍ରରେ ନଜର ଆସିଥିବା ମୁକେଶ ଖନ୍ନା ଉପସ୍ଥିତ ନଥିଲେ । ଏହା ଉପରେ ମୁକେଶ ଖନ୍ନା ସଫେଇ ଦେଇଛନ୍ତି ଯେ, ସେ ସୋ’ର ନିମନ୍ତ୍ରଣକୁ ସ୍ୱୀକାର କରିନଥିଲେ । କିନ୍ତୁ ଏହା ପଛରେ ସତ୍ୟତା ଆଉ କିଛି ଥିବା ଜଣାପଡ଼ୁଛି ।
ମୁକେଶ ଖନ୍ନା ସୋସିଆଲ ମିଡିଆରେ ଏକ ପୋଷ୍ଟରେ ଲେଖିଛନ୍ତି ଯେ, ଏହି ପ୍ରଶ୍ନ ଭାଇରାଲ ହେବାରେ ଲାଗିଛି ଯେ, କପିଲ ଶର୍ମା ସୋ’ରେ ହୋଇଥିବା ମହାଭାରତ ଏପିସୋଡରେ ଭୀଷ୍ମ ପିତାମହ କାହିଁକି ଉପସ୍ଥିତ ହୋଇନଥିଲେ । କିଏ କହୁଛନ୍ତି ତାଙ୍କୁ ନିମନ୍ତ୍ରଣ ଦିଆଯାଇନଥିଲା ତ ଆଉ କିଏ କହୁଛନ୍ତି ସେ ନିଜେ ସୋ’ କୁ ଆସିବେନି ବୋଲି ମନା କରିଛନ୍ତି । ଏହା ସତ ଯେ, ଭୀଷ୍ମ ପିତାମହଙ୍କ ବିନା ମହାଭାରତ ଅଧା ଅଧୁରା ଏବଂ ସୋ’ ରେ ଭୀଷ୍ମଙ୍କୁ ନିମନ୍ତ୍ରଣ ଦିଆଯାଇନଥିବ ଏଭଳି ହେବା ବି ସମ୍ଭବ ନୁହେଁ । ଅନ୍ୟପଟେ ଏହାକୁ ମଧ୍ୟ ଏଡ଼ାଇ ଦିଆଯାଇପାରିବ ନାହିଁ ଯେ ଅଭିନେତା ଜଣଙ୍କ କହିଛନ୍ତି ଯେ ସେ ନିମନ୍ତ୍ରଣକୁ ସ୍ୱୀକାର କରିନାହାନ୍ତି ।
କପିଲ ଶର୍ମା ସୋକୁ କହିଲେ ଅଶ୍ଲୀଳ
ମୁକେଶ କପିଲ ଶର୍ମା ସୋ’ କୁ ବାଜେ ବୋଲି କହିଛନ୍ତି । ସେ କହିଛନ୍ତି ଯେ, ସୋ’ ସଂପୂର୍ଣ୍ଣ ଭାବେ ଅଶ୍ଳୀଳତାରେ ଭର୍ତ୍ତି ହୋଇରହିଛି । ଡବଲ ମିନିଂ ଜୋକ୍ସ ସହ ଅଶ୍ଳୀଳତାରେ ଭର୍ତ୍ତି ଏହି ସୋ’ ରେ ପୁରୁଷକୁ ନାରୀ ଭାବରେ ସଜାଇ ବାଜେ କାର୍ଯ୍ୟକଳାପ କରାଯାଉଛି ଆଉ ତାକୁ ଦେଖି ଦର୍ଶକ ପେଟ ଫଟାଇ ହସୁଛନ୍ତି ।
ଭୀଷ୍ମ ପିତାମହଙ୍କ ଦାବି ଗୁଡିକ ବିଷୟରେ କହିଲେ ଧର୍ମରାଜ ଯୁଧିଷ୍ଠିର
ମହାଭାରତରେ ଧର୍ମରାଜ ଯୁଧିଷ୍ଠିରଙ୍କ ଚରିତ୍ର ଅଭିନୟ କରିଥିବା ଅଭିନେତା ଗଜେନ୍ଦ୍ର ଚୌହାନ କପିଲ ଶର୍ମା ସୋ’ ସପକ୍ଷରେ ମତ ଦେଇଛନ୍ତି । ଗଜେନ୍ଦ୍ର ଶର୍ମା ଦର୍ଶକ ମାନଙ୍କୁ ଏହି ଘଟଣାର ସତ୍ୟାସତ୍ୟ ଦର୍ଶାଇ କହିଛନ୍ତି ଯେ, ମୁକେଶ ଶର୍ମାଙ୍କୁ ସୋ’ରେ ନିମନ୍ତ୍ରଣ ଦିଆଯାଇନଥିଲା । ଆଉ ସେଥିପାଇଁ ସେ କ୍ରୋଧ ପ୍ରକାଶ କରି କପିଲ ଶର୍ମା ସୋ’ କୁ ଇନଷଲ୍ଟ କରୁଛନ୍ତି ।
ଗଜେନ୍ଦ୍ର କଲେ ଏହି ଦାବି
ଗଜେନ୍ଦ୍ର ଚୌହାନଙ୍କ ମୁତାବକ ସୋନି ଟିଭି ଏକ ସର୍ଭେ କରିଥିଲା, ଯାହା ହିସାବରେ ମହାଭାରତରେ ସବୁଠୁ ଚର୍ଚ୍ଚିତ ୫ଟି ଚରିତ୍ରକୁ ହିଁ କପିଲ ଶର୍ମା ସୋ’କୁ ନିମନ୍ତ୍ରଣ ଦିଆଯାଇଥିଲା ।
ଜଣାଇ ରଖୁଛୁ ଯେ, ପୁନିତ ଇସ୍ସର, ଗୁଫି ପଟେଲ, ଗଜେନ୍ଦ୍ର ଚୌହାନ, ଫିରୋଜ ଖାନ ଏବଂ ନିତିଶ ଭାରଦ୍ୱାଜ ସୋ’ ରେ ଅତିଥି ହୋଇ ଆସିଥିଲେ । ଗଜେନ୍ଦ୍ରଙ୍କ ଏହି ଦାବି ପରେ ମୁକେଶ ଖନ୍ନା କ୍ରୋଧ ପ୍ରକାଶ କରିଛନ୍ତି । ସେ ଏକ ଭିଡିଓ ସୋସିଆଲ ମିଡିଆରେ ସେୟାର କରି ଗଜେନ୍ଦ୍ରଙ୍କୁ ଅଜ୍ଞାନୀ ବୋଲି କହିଛନ୍ତି ।
