ନନ୍ଦିଘୋଷ ବ୍ୟୁରୋ : ଅତ୍ୟନ୍ତ ଅସନା ପରିବେଶରେ ତିଆରି ହେଉଥିଲା ଔଷଧ, ଫ୍ୟାକଟ୍ରିର ସବୁ ଯନ୍ତ୍ରପାତିରେ ଲାଗି ଗଲାଣି କଳଙ୍କି, ଏୟାର ଫିଲଟର ବି କାମ କରୁନି, ଏପରିକି ଔଷଧ ପ୍ରସ୍ତୁତିରେ ଯେଉଁ ମାନର ରାସାୟନିକ ପଦାର୍ଥ ବ୍ୟବହାର ହେବା କଥା, ସେମିତି ସାମଗ୍ରୀ ବ୍ୟବହାର କରାଯାଇନାହିଁ। ଏମିତି ଗୋଟିଏ ଦୁଇଟି ନୁହେଁ, ପୁରା ୩୫୦ଟି ନିୟମର ଉଲ୍ଲଂଘନ କରିଛି କୋଲଡ୍ରିପ୍ କଫ୍ ସିରପ୍ ପ୍ରସ୍ତୁତ କରୁଥିବା କମ୍ପାନି ଶ୍ରେସାନ ଫାର୍ମାସ୍ୟୁଟିକାଲସ। ଏପରି ସାଂଘାତିକ ତଥ୍ୟ ଆସିଛି ତଦନ୍ତରୁ। ତାମିଲନାଡୁର କାଞ୍ଚିପୁରମରେ ଅଛି ଏହାର ଫ୍ୟାକଟ୍ରି । ମଧ୍ୟପ୍ରଦେଶ ଓ ରାଜସ୍ଥାନରେ ଅନେକ ଶିଶୁ କୋଲଡ୍ରିପ୍ କଫ୍ ସିରଫ ବ୍ୟବହାର କରି ମୃତ୍ୟୁମୁଖରେ ପଡ଼ିବା ପରେ ତାମିଲନାଡୁ ସରକାରଙ୍କ ଏକ ଟିମ୍ ଫ୍ୟାକଟ୍ରି ପରିଦର୍ଶନ କରି ତଦନ୍ତ କରିଛନ୍ତି। ସେଥିରୁ ଜଣାପଡ଼ିଛି କମ୍ପାନି ପକ୍ଷରୁ ବ୍ୟାପକ ନିୟମ ଉଲ୍ଲଂଘନ ହୋଇଛି। ମୋଟ ୩୫୦ ଟି ନିୟମର ଉଲ୍ଲଂଘନ ହୋଇଥିବା ଜଣାପଡ଼ିଛି। ଔଷଧ କେମିତି ପ୍ରସ୍ତୁତ ହେଉଛି, ତାହା ତଦାରଖ ରଖିବାକୁ ମଧ୍ୟ କେହି ନାହାନ୍ତି। ପୁରା ପ୍ଲାଣ୍ଟ ର ଲେଆଉଟ ଡିଜାଇନ୍ ଭୁଲ। ଔଷଧର ବ୍ୟାଚ ଯାଞ୍ଚ କରିବାକୁ କିମ୍ଵା କ୍ଵାଲିଟି ଯାଞ୍ଚ କରିବାକୁ, ମାନ ଠିକ୍ ନ ଥିଲେ ତାହା ଫେରସ୍ତ କରିବାକୁ ମଧ୍ୟ କୌଣସି ବ୍ୟବସ୍ଥା ନାହିଁ। ଏହି କମ୍ପାନି ୫୦ କେଜି ପ୍ରୋପିଲିନ୍ ଗ୍ଲାଏକଲ୍ କିଣିଛି ବିନା ବିଲରେ। ଏଥିରୁ ଜଣାପଡ଼ିଛି ବେଆଇନ ଭାବେ ଏହା କିଣାଯାଇଛି। ଅତ୍ୟନ୍ତ ବିଷାକ୍ତ ପଦାର୍ଥ ଡାଇଥିଲିନ୍ ଗ୍ଲାଏକଲ୍ ମଧ୍ୟ ମିଳିଛି। ଔଷଧ ପ୍ରସ୍ତୁତିରେ ଏହା ବିଲକୁଲ ବ୍ୟବହାର ହେବା କଥା ନୁହେଁ। କିନ୍ତୁ ସ୍ରେସାନ ଫାର୍ମାସିଟ୍ୟୁକାଲସ ପକ୍ଷରୁ ଏହା ବ୍ୟବହାର କରାଯାଉଥିବା ଜଣାପଡ଼ିଛି। କୋଲଡ୍ରିପ୍ ସେବନ କରି ମଧ୍ୟପ୍ରଦେଶରେ ୧୪ ଓ ରାଜସ୍ଥାନରେ ୨ ଶିଶୁଙ୍କ ମୃତ୍ୟୁ ହୋଇଥିବାର ଖବର ଆସିଥିଲା। ଏହାକୁ ନେଇ ଦେଶର ବିଭିନ୍ନ ସ୍ଥାନରେ ବିକ୍ଷୋଭ ବି ହୋଇଥିଲା। କୋଲଡ୍ରିପ୍ ସେବନ କରି ଶିଶୁଙ୍କ ମୃତ୍ୟୁ ଖବର ପରେ ତାମିଲନାଡୁ ସରକାର କଡ଼ା ପଦକ୍ଷେପ ନେଇଛନ୍ତି। ଏହି ଔଷଧକୁ ବ୍ୟାନ କରିବା ସହିତ ମାର୍କେଟରେ ଥିବା ସମସ୍ତ ଏହି ଔଷଧକୁ ଜବତ କରିବାକୁ ନିର୍ଦ୍ଦେଶ ଦେଇଛନ୍ତି। ସେହିପରି କର୍ତ୍ତୃପକ୍ଷଙ୍କୁ ନୋଟିସ ଦିଆଯାଇଛି। ଉତ୍ତର ନ ଆସିବା ପର୍ଯ୍ୟନ୍ତ ଫ୍ୟାକଟ୍ରି ବନ୍ଦ ରହିବ। ପ୍ରାୟ ୧୧ଟି ରାଜ୍ୟ ଏହି ଔଷଧକୁ ବ୍ୟାନ କରିଛନ୍ତି।
ଖସଡ଼ା ଜଳପ୍ରପାତକୁ ପର୍ଯ୍ୟଟକଙ୍କୁ ମନା
ମୋହନା : ଖସଡ଼ା ଜଳପ୍ରପାତକୁ ପର୍ଯ୍ୟଟକଙ୍କୁ ମନା । ଗତ ଲଗାଣ ବର୍ଷାରେ ଗଜପତି ଜିଲ୍ଲା ଖସଡ଼ା ଜଳପ୍ରପାତରେ ପ୍ରବଳ ମାତ୍ରାରେ ବନ୍ୟାଜଳ ପ୍ରବାହିତ ହେଉଛି । ଜଳପ୍ରପାତଟି ଏବେ ବିପଦପୂର୍ଣ୍ଣ ଥିବାରୁ ପ୍ରଶାସନ ପକ୍ଷରୁ ବ୍ୟାରିକେଟ କରାଯାଇଛି । ପର୍ଯ୍ୟଟକଙ୍କ ପ୍ରବେଶ ଉପରେ କଟକଣା ଜାରି କରାଯାଇଛି । ପୋଲିସ ୨୪ ଘଣ୍ଟିଆ ପହରା ଦେଉଥିବା ବେଳେ ଗାଁର ଛୋଟ ଛୋଟ ପିଲାମାନେ ବିପଦସଂକୁଳ ଅବସ୍ଥାରେ ଗାଧୋଇବାକୁ ଆସୁଥିବା ଦେଖୁବାକୁ ମିଳିଥିଲା। ପ୍ରାଖୋର ସ୍ରୋତ ଥିବା ହେତୁ ଛୋଟ ଛୋଟ ପିଲାମାନେ ପାଣିରେ ଭାସିଯିବା ଆଶଙ୍କା ରହିଛି । ତେଣୁ ପ୍ରଶାସନ ଏହା ଉପରେ ଦୃଷ୍ଟି ଦେବା ପାଇଁ ସ୍ଥାନୀୟବାସୀ ଦାବି କରିଛନ୍ତି ।
ବ୍ରହ୍ମପୁରରେ ଆଇନଜୀବୀଙ୍କୁ ହତ୍ୟା ଘଟଣା, ଦୁଃଖପ୍ରକାଶ କଲେ ବିଜେଡି ସାଂସଦ ମାନସ ମଙ୍ଗରାଜ
ନନ୍ଦିଘୋଷ ବ୍ୟୁରୋ : ବ୍ରହ୍ମପୁରରେ ବରିଷ୍ଠ ଆଇନଜୀବୀ ପୀତବାସ ପଣ୍ଡାଙ୍କୁ ଗୁଳି କରି ହତ୍ୟା ଘଟଣାରେ ଦୁଃଖପ୍ରକାଶ କଲେ ବିଜେଡି ସାଂସଦ ମାନସ ମଙ୍ଗରାଜ। ପୀତବାସ ପଣ୍ଡାଙ୍କୁ ଗୁଳି କରି ହତ୍ୟା ଘଟଣାକୁ ଦୃଢ ନିନ୍ଦା କରିଛନ୍ତି । ଏହାସହ ରାଜ୍ୟରେ ଆଇନ ଶୃଙ୍କଳାକୁ ନେଇ ଚିନ୍ତା ପ୍ରକଟ କରିଛନ୍ତି ସାଂସଦ ମାନସ ମଙ୍ଗରାଜ । ରାଜ୍ୟରେ ଏକ ବର୍ଷ ହେବ ହତ୍ୟା, ଦୁଷ୍କର୍ମ ଭଳି ଘଟଣା ବଢିବାରେ ଲାଗିଛି। ଯାହା ରାଜ୍ୟ ପାଇଁ ଶୁଭଙ୍କର ନୁହେଁ ବୋଲି ସାଂସଦ ମାନସ ମଙ୍ଗରାଜ କହିଛନ୍ତି।
କଟକର ଜାରି କରାଯାଇଥିବା କର୍ଫ୍ୟୁ ଅବଧି ଶେଷ, ସଂଧ୍ୟା ୭ଟା ପର୍ଯ୍ୟନ୍ତ ବଳବତ୍ତର ଇଣ୍ଟରନେଟ୍ କଟକଣା
କଟକ : ଶୋଭାଯାତ୍ରାରେ ଗଣ୍ଡଗୋଳରୁ ଉତ୍ତେଜନା ଘଟଣା। କଟକର ଜାରି କରାଯାଇଥିବା କର୍ଫ୍ୟୁ ଅବଧି ଶେଷ ହୋଇଛି। ଧିରେ ଧିରେ ସ୍ଵାଭାବିକ ହେଉଛି ଜନଜୀବନ। କର୍ଫ୍ୟୁ ସରିବା ନେଇ ପ୍ରଶାସନ ପକ୍ଷରୁ ବିଧିବଦ୍ଧ ଘୋଷଣା କରାଯାଇନାହିଁ। ଆଗକୁ କର୍ଫ୍ୟୁ ଜାରି ରହିବ ନା କୋହଳ କରାଯିବ ଏ ନେଇ ପ୍ରଶାସନ ଘୋଷଣା କରିପାରେ। ତେବେ ସୋସିଆଲ ମିଡିଆ ଉପରେ କଟକଣା ଜାରି ରହିଛି। ଗତକାଲିଠାରୁ ଆଉ କୌଣସି ନୂଆ ଗଣ୍ଡଗୋଳ ହୋଇ ନାହିଁ। ତଥାପି ପରିସ୍ଥିତି ଉପରେ କଡ଼ା ନଜର ରଖିଛି ପ୍ରଶାସନ। ବରିଷ୍ଠ ପୋଲିସ ଅଧିକାରୀ କ୍ୟାମ୍ପ କରି ସେଠାରେ ରହିଛନ୍ତି ଓ ପରିସ୍ଥିତି ଉପରେ ରଖିଛନ୍ତି ତୀକ୍ଷଣ ନଜର। କୌଣସି ପ୍ରକାର ଅପ୍ରୀତିକର ପରିସ୍ଥିତି ଏଡ଼ାଇବାକୁ ସବୁ ସ୍ତରରେ ଉଦ୍ୟମ ଚାଲିଛି। ଇଣ୍ଟରନେଟ ଓ ସୋସିଆଲ ମିଡିଆ କଟକଣା ଆଜି ସଂଧ୍ୟା ୭ ଯାଏ ରହିବ। କୌଣସି ପ୍ରକାର ଗୁଜବକୁ ସୁଯୋଗ ନ ଦେବାକୁ ଏହି ନିଷ୍ପତ୍ତି ନିଆଯାଇଛି। କଟକ ମହାନଗର ନିଗମ ଅଞ୍ଚଳ, ସିଡ଼ିଏ ଅଞ୍ଚଳ ଓ ବୟାଳିଶି ମୌଜା ଅଞ୍ଚଳରେ ଏହି ପ୍ରତିବନ୍ଧକ ଲାଗୁ କରାଯାଇଛି । ୩୬ ଘଣ୍ଟା ଧରି ଆଜି ସକାଳ ୧୦ ଟା ଯାଏ କର୍ଫ୍ୟୁ ଲଗାଯାଇଥିଲା।
ରାଉରକେଲାରେ ପୁଣି ଲଜ୍ଜା, ଵିଵାହିତ ମହିଳାଙ୍କୁ ଦୁଷ୍କର୍ମ ଅଭିଯୋଗ
ରାଉରକେଲା : ରାଉରକେଲା ସହରରେ ପୁଣି ଲଜ୍ଜା। ଗତକାଲି ରଘୁନାଥପାଲ୍ଲି ଥାନା ଅନ୍ତର୍ଗତ ଖରିଆଵାହାଲ ରେଳ ଲାଇନ ନିକଟରେ ଜଣେ ଵିଵାହିତ ମହିଳାଙ୍କୁ ଦୁଷ୍କର୍ମ କରାଯାଇଥିବା ଅଭିଯୋଗ ହୋଇଛି। ଏ ନେଇ ରଘୁନାଥପାଲ୍ଲି ଥାନାରେ ଅଭିଯୋଗ ହେଵା ପରେ ପୋଲିସ ପକ୍ଷରୁ ଦୁଇଜଣ ଅଭିଯୁକ୍ତଙ୍କୁ ଗିରଫ କରାଯାଇ ଘଟଣାର ତଦନ୍ତ ଆରମ୍ଭ ହୋଇଛି। ବିବାହିତ ମହିଳାଙ୍କୁ ଦୁଷ୍କର୍ମ କରିଥିବା ଅଭିଯୁକ୍ତକୁ ପୋଲିସ ଗିରଫ କରିଥିବା ବେଳେ ଦୁଷ୍କର୍ମ ଅଭିଯୁକ୍ତଙ୍କୁ ସହଯୋଗ କରିବା ସହ ମହିଳାଙ୍କୁ ଅସଦାଚରଣ କରିଥିବା ଅଭିଯୋଗରେ ସହଯୋଗୀକୁ ମଧ୍ୟ ଗିରଫ କରାଯାଇଛି। ଦୁଇ ଅଭିଯୁକ୍ତଙ୍କୁ ରଘୁନାଥପାଲ୍ଲି ଥାନାରେ ଅଟକ ରଖି ପୋଲିସ ପକ୍ଷରୁ ପଚରାଉଚରା କରାଯାଉଛି।
ବଲିଉଡ ଅଭିନେତ୍ରୀ ଶିଲ୍ପା ସେଟ୍ଟୀଙ୍କୁ EOWର ଜେରା
ନନ୍ଦିଘୋଷ ବ୍ୟୁରୋ : ବଲିଉଡ ଅଭିନେତ୍ରୀ ଶିଲ୍ପା ସେଟ୍ଟୀଙ୍କୁ EOWର ଜେରା। ଜଣେ ବ୍ୟବସାୟୀଙ୍କୁ ୬୦ କୋଟି ଠକେଇ ମାମଲାରେ ପଚରାଉଚରା କରିଛି ମୁମ୍ବାଇ ପୋଲିସର ଅର୍ଥନୈତିକ ଅପରାଧ ଶାକା EOW। ଦୀର୍ଘ ସାଢେ ୪ ଘଣ୍ଟା ଧରି EOWର ଟିମ ପଚରାଉଚରା କରିଛନ୍ତି। ମାମଲାରେ ଶିଳ୍ପା ସେଟ୍ଟୀଙ୍କ ସ୍ୱାମୀ ରାଜ କୁନ୍ଦ୍ରାଙ୍କ ସମେତ ମୋଟ ୫ ଜଣଙ୍କ ବୟାନ ରେକର୍ଡ କରିଛି ଇଓଡବ୍ଲୁ। ମୁମ୍ବାଇ ପୋଲିସର ଅର୍ଥନୈତିକ ଅପରାଧ ଶାଖା ବ୍ୟବସାୟୀ ରାଜ କୁନ୍ଦ୍ରା ଏବଂ ପତ୍ନୀ ଶିଳ୍ପା ସେଟ୍ଟୀଙ୍କ ସହିତ ଜଡିତ ୬୦ କୋଟି ଠକେଇ ମାମଲାରେ ରାଜେନ୍ଦ୍ର ଭୁତାଡାଙ୍କ ବୟାନ ରେକର୍ଡ କରିଥିଲା ତଦନ୍ତକାରୀ ସଂସ୍ଥା। ଭୁତାଡାଙ୍କୁ ଏହି ମାମଲାରେ ସାକ୍ଷୀ ଭାବରେ EOW କାର୍ଯ୍ୟାଳୟକୁ ଡକାଯାଇଥିଲା। ଭୁତାଡା ବେଷ୍ଟ ଡିଲ୍ ଟିଭି ପ୍ରାଇଭେଟ୍ ଲିମିଟେଡର ଜଣେ କର୍ମଚାରୀ। ରାଜ କୁନ୍ଦ୍ରା ଏବଂ ଅଭିନେତ୍ରୀ ଶିଳ୍ପା ବେଷ୍ଟ ଡିଲ ପ୍ରାଇଭେଟ ଲିମିଟେଡ ନାମରେ ଏକ ଅନଲାଇନ ସପିଙ୍ଗ ଏବଂ ଖୁଚୁରା ବିକ୍ରି ନେଇ ଏକ ପ୍ଲାଟଫର୍ମ କରିଥିଲେ। ଉଭୟ ରାଜ ଏବଂ ଶିଳ୍ପା ସେଟ୍ଟି ଏହି କମ୍ପାନୀର ନିର୍ଦ୍ଦେଶକ ଥିଲେ। ବ୍ୟବସାୟୀ ଦୀପକ କୋଠାରୀଙ୍କୁ ପ୍ରାୟ 60 କୋଟି ଠକେଇ କରିଥିବା ଅଭିଯୋଗରେ ଅଗଷ୍ଟ 14 ତାରିଖରେ ମାମଲା ହୋଇଥଲା। ଉଭୟଙ୍କ ବିରୁଦ୍ଧରେ ଜୁହୁ ପୋଲିସ ଷ୍ଟେସନରେ ଏକ ମାମଲା ରୁଜୁ କରାଯାଇଥିଲା। ରାଜ କୁନ୍ଦ୍ରା ତଦନ୍ତକାରୀଙ୍କ ସମ୍ମୁଖରେ ଦାବି କରିଛନ୍ତି ଯେ ଅର୍ଥର କିଛି ଅଂଶ ବଲିଉଡ୍ ଅଭିନେତା ବିପାଶା ବସୁ, ନେହା ଧୂପିଆ ଏବଂ ପ୍ରଯୋଜିକା ଏକତା କପୁରଙ୍କୁ ସେମାନଙ୍କର ବୃତ୍ତିଗତ ଫିସ୍ ଭାବରେ ଦେଇଥିଲେ। ମୁମ୍ବାଇ ପୋଲିସର ଅର୍ଥନୈତିକ ଅପରାଧ ଶାଖା EOW ସମ୍ମୁଖରେ ଏହି ତଥ୍ୟ ରଖିଥିଲେ। ମାମଲାରେ ରାଜ କୁନ୍ଦ୍ରା ଏବଂ ପତ୍ନୀ ତଥା ବଲିଉଡ୍ ଅଭିନେତ୍ରୀ ଶିଳ୍ପା ସେଟ୍ଟୀଙ୍କୁ ଅନ୍ୟମାନଙ୍କ ସହିତ ଅଭିଯୁକ୍ତ ଭାବରେ ଦର୍ଶାଯାଇଛି।
ନେପାଳରେ ନିର୍ବାଚନ ତାରିଖ ଘୋଷଣା, ମାର୍ଚ୍ଚ ୫ରେ ଭୋଟ୍
ନନ୍ଦିଘୋଷ ବ୍ୟୁରୋ : ୫ ମାର୍ଚ୍ଚରେ ହେବାକୁ ଥିବା ନିର୍ବାଚନ ପାଇଁ ନେପାଳର ସର୍ବୋଚ୍ଚ ନିର୍ବାଚନ ସଂସ୍ଥା କାର୍ଯ୍ୟସୂଚୀ ଘୋଷଣା କରିଛି। ଏକ ବିବୃତ୍ତିରେ, ନିର୍ବାଚନ କମିଶନ କହିଛନ୍ତି ଯେ ଅନୁମୋଦିତ ସମୟସାରଣୀରେ ପଞ୍ଜୀକରଣ, ଭୋଟଦାନ ଏବଂ ଭୋଟ ଗଣନା ସମେତ ସମସ୍ତ ପ୍ରମୁଖ ପ୍ରକ୍ରିୟା ଅନ୍ତର୍ଭୁକ୍ତ।
କାର୍ଯ୍ୟସୂଚୀ ଅନୁଯାୟୀ, ରାଜନୈତିକ ଦଳଗୁଡ଼ିକୁ ନଭେମ୍ବର ୧୬ ରୁ ୨୬ ତାରିଖ ପର୍ଯ୍ୟନ୍ତ ନିର୍ବାଚନ ପାଇଁ ପଞ୍ଜିକରଣ କରିବାକୁ ପଡିବ। ଯଦି କୌଣସି ନୂତନ ରାଜନୈତିକ ଦଳ ନିର୍ବାଚନରେ ଅଂଶଗ୍ରହଣ କରିବାକୁ ଚାହୁଁଛି, ତେବେ ତାଙ୍କୁ ନଭେମ୍ବର ୧୫ ତାରିଖ ସୁଦ୍ଧା ପଞ୍ଜିକରଣ କରିବାକୁ ପଡିବ।
ରାଜନୈତିକ ଦଳଗୁଡ଼ିକୁ ଫେବୃଆରୀ ୧୫ ରୁ ମାର୍ଚ୍ଚ ୨ ପର୍ଯ୍ୟନ୍ତ ୧୫ ଦିନ ପାଇଁ ସେମାନଙ୍କର ନିର୍ବାଚନ ପ୍ରଚାର କରିବାକୁ ଅନୁମତି ଦିଆଯିବ। ଏଥିରେ ଉଲ୍ଲେଖ ଅଛି ଯେ ଦଳଗୁଡ଼ିକୁ ୨୦୨୬ ମସିହା ଜାନୁଆରୀ ୨ ଓ ୩ରେ ଆନୁପାତିକ ନିର୍ବାଚନ ପାଇଁ ସେମାନଙ୍କର ତାଲିକା ଦାଖଲ କରିବାକୁ ପଡିବ। ଭୋଟଦାନ ୨୦୨୬ ମସିହା ମାର୍ଚ୍ଚ ୫ ରେ ସକାଳ ୭:୦୦ ରୁ ସନ୍ଧ୍ୟା ୫:୦୦ ପର୍ଯ୍ୟନ୍ତ ଅନୁଷ୍ଠିତ ହେବ। ଭୋଟ ବାକ୍ସ ସଂଗ୍ରହ ପରେ ସେହି ଦିନ ଗଣନା କରାଯିବ।
କମିଶନଙ୍କ ଅନୁସାରେ ସମୟୋଚିତ ପ୍ରସ୍ତୁତି ଏବଂ ଅଂଶୀଦାରମାନଙ୍କ ମଧ୍ୟରେ ପ୍ରଭାବଶାଳୀ ସମନ୍ୱୟ ମାଧ୍ୟମରେ ମୁକ୍ତ, ନିରପେକ୍ଷ ଏବଂ ସ୍ୱଚ୍ଛ ନିର୍ବାଚନ ସୁନିଶ୍ଚିତ କରିବା ତାଙ୍କର ଲକ୍ଷ୍ୟ। ରାଷ୍ଟ୍ରପତି ରାମଚନ୍ଦ୍ର ପାଉଡେଲ ପ୍ରତିନିଧି ସଭାକୁ ଭଙ୍ଗ କରି ସେପ୍ଟେମ୍ବର ୧୨ରେ ନୂତନ ନିର୍ବାଚନ ପାଇଁ ତାରିଖ ଘୋଷଣା କରିଛନ୍ତି। ଅନ୍ତରୀଣ ପ୍ରଧାନମନ୍ତ୍ରୀ ସୁଶୀଳା କାର୍କି କହିଛନ୍ତି ଯେ ତାଙ୍କ ସରକାର ସମୟୋଚିତ ସମୟରେ ସାଧାରଣ ନିର୍ବାଚନ କରିବା ପାଇଁ ପ୍ରତିବଦ୍ଧ।
ପ୍ରଧାନମନ୍ତ୍ରୀ କେପି ଶର୍ମା ଓଲିଙ୍କ ବହିଷ୍କାର ପରଠାରୁ ଜାରି ରହିଥିବା ରାଜନୈତିକ ଅନିଶ୍ଚିତତାର ଅବସାନ ଘଟାଇ ସେପ୍ଟେମ୍ବର ୧୨ରେ ସୁଶୀଳା କାର୍କି ପ୍ରଧାନମନ୍ତ୍ରୀ ହୋଇଥିଲେ। ଯୁବ ନେତୃତ୍ୱାଧୀନ ଜେନ୍ ଜେଡ୍ ଗୋଷ୍ଠୀର ଏକ ଗୋଷ୍ଠୀ ଦୁର୍ନୀତି ଏବଂ ସୋସିଆଲ ମିଡିଆ ଉପରେ ପ୍ରତିବନ୍ଧକକୁ ନେଇ ଓଲିଙ୍କ ସରକାର ବିରୁଦ୍ଧରେ ହିଂସାତ୍ମକ ପ୍ରତିବାଦ କରିଥିଲେ।
ଆସନ୍ତା ୫ ଦିନ ଯାଏଁ ବର୍ଷା ସମ୍ଭାବନା
ଭୁବନେଶ୍ବର : ଲଘୁଚାପ ଓଡ଼ିଶାର ପିଛା ଛାଡୁନି। ଦିନକ ପରେ ବଙ୍ଗୋପ ସାଗରେ ଆଉ ଏକ ଘୂର୍ଣ୍ଣିବଳୟ ସୃଷ୍ଟି ହୋଇପାରେ। ଏହି ପୂର୍ବାନୁମାନ କରିଛି ପାଣିପାଗ ବିଭାଗ। ଯଦି ଏହା ଅଧିକ ଘନୀଭୂତ ହୁଏ, ତେବେ ପରେ ଲଘୁଚାପର ରୂପ ନେଇପାରେ। ବର୍ତ୍ତମାନ ଟ୍ରପ ଲାଇନ୍ ପ୍ରଭାବରେ ରାଜ୍ୟରେ ମେଘୁଆ ପାଗ ସହ ବର୍ଷା ଲାଗି ରହିଛି । ଆସନ୍ତା ୨୪ ଘଣ୍ଟା ମଧ୍ୟରେ ଗୋଟିଏ କିମ୍ବା ଦୁଇଟି ସ୍ଥାନରେ ହାଲୁକାରୁ ମଧ୍ୟମ ଧରଣର ବର୍ଷା ହେବା ନେଇ ଚେତାବନୀ ଦିଆଯାଇଛି । ଆସନ୍ତା ୫ ଦିନ ପର୍ଯ୍ୟନ୍ତ ରାଜ୍ୟରେ ହାଲୁକାରୁ ମଧ୍ୟମ ଧରଣର ବର୍ଷା ଆକଳନ କରାଯାଇଥିବା ବେଳେ ଆସନ୍ତା ୯ ତାରିଖରେ ଉତ୍ତର ବଙ୍ଗୋପସାଗରରେ ସୃଷ୍ଟି ହୋଇପାରେ ଏକ ଘୂର୍ଣ୍ଣିବଳୟ ।
ଆଜି ଶ୍ରୀମନ୍ଦିରରେ ପାଳିତ ହେବ କୁମାରପୂର୍ଣ୍ଣିମାର ସ୍ୱତନ୍ତ୍ର ନୀତିକାନ୍ତି
ପୁରୀ : ଆଜି ଶ୍ରୀମନ୍ଦିରରେ ପାଳିତ ହେବ କୁମାରପୂର୍ଣ୍ଣିମାର ସ୍ୱତନ୍ତ୍ର ନୀତିକାନ୍ତି। ପରମ୍ପରା ଅନୁସାରେ ମଧ୍ୟାହ୍ନଧୂପ ଶେଷ ହେବାପରେ ଶ୍ରୀଦେବୀ ଓ ଭୂଦେବୀଙ୍କୁ ଖଟଶେଯ ଘରେ ବିଜେ କରାଯିବ। ଏହା ପରେ ମହାପ୍ରଭୁଙ୍କଠାରୁ ଆଜ୍ଞାମାଳ ପାଇ ଶ୍ରୀସୁଦର୍ଶନ ଚଉଦୋଳରେ ଚାରି ଆଶ୍ରମକୁ ବିଜେ କରିବେ। ସେଠାରେ ପନ୍ତିଭୋଗ ଓ ବନ୍ଦାପନା ନୀତି ସରିବା ପରେ ପଶ୍ଚିମଦ୍ବାର ଦେଇ ପୁନର୍ବାର ଶ୍ରୀମନ୍ଦିର ପ୍ରତ୍ୟାବର୍ତ୍ତନ କରିବେ। ଅନ୍ୟ ପକ୍ଷରେ ବଡସିଂହାର ଭୋଗ ସରିଲେ ରତ୍ନସିଂହାସନ ତଳେ ଓ ଉପରେ ଶକଟା, ପଶା ଓ କଉଡି ଖେଳ ହେବ। ଶ୍ରୀମନ୍ଦିରର ପରମ୍ପରାରେ ଏହା ଦ୍ୟୁତକ୍ରୀଡା ନାମରେ ଅଭିହିତ।ସର୍ତ୍ତ ଅନୁଯାୟୀ ଏହି ଦ୍ୟୂତ କ୍ରୀଡାରେ ମା ମହାଲକ୍ଷ୍ମୀଙ୍କ ଠାରୁ ଶ୍ରୀଜଗନ୍ନାଥ ମହାପ୍ରଭୁ ହାରିଯାଇଥିବାରୁ ପ୍ରଭୁଙ୍କ ଚଳନ୍ତି ପ୍ରତିମା ଶ୍ରୀମାଧବ ସାତଦିନ ପର୍ଯ୍ୟନ୍ତ ଲକ୍ଷ୍ମୀ ମନ୍ଦିରରେ ବନ୍ଧା ରହିବେ। ପରେ ଅଷ୍ଟମୀ ଦିନ ଅବକାଶ ପୂଜା ସମୟରେ ପୁନଃ ମାଧବ ସିଂହାସନରେ ବିଜେ କରିବେ।ମହାପ୍ରଭୁଙ୍କ ତରଫରୁ ପ୍ରତିନିଧି ମୁଦିରସ୍ତ ଓ ଲକ୍ଷ୍ମୀଙ୍କ ପ୍ରତିନିଧି ଭିତରଚ୍ଛ ମହାପାତ୍ର ୨୧ ଟି ହିଙ୍ଗୁଳ କଉଡ଼ି , ୨୧ ଟି ରୂପା କଉଡି, ପଶା ଶକଟାରେ ଏହି ପାରମ୍ପରିକ ଖେଳମାନ ଖେଳିଥାନ୍ତି ।
ଅନ୍ୟପଟେ ଆଜିଠୁ ଆରମ୍ଭ ହୋଇଛି ପବିତ୍ର କାର୍ତ୍ତିକ ମାସ। ହବିଷ କରୁଛନ୍ତି ବ୍ରତଧାରୀ। ସେଥିପାଇଁ ପୁରୀରେ ପ୍ରବଳ ଭିଡ଼। ଶୃଙ୍ଖଳିତ ଦର୍ଶନ ପାଇଁ ସବୁ ପ୍ରକାର ବ୍ୟବସ୍ଥା କରିଛି ପ୍ରଶାସନ। ସୁରକ୍ଷା ଓ ଅନ୍ୟାନ୍ୟ ଆନୁଷଙ୍ଗିକ ବ୍ୟବସ୍ଥା ପାଇଁ ଶ୍ରୀମନ୍ଦିର ସିଂହଦ୍ବାର ଆଗରେ ନିର୍ମାଣ ହୋଇଛି ସ୍ବତନ୍ତ୍ର ବ୍ଯାରିକେଡ । ୨୨ ପ୍ଲାଟୁନ ପୋଲିସ ଫୋର୍ସ ଓ ବରିଷ୍ଠ ପୋଲିସ ଅଧିକାରୀ ନିୟୋଜିତ କରାଯାଇଛି । ହବିଷ୍ୟାଳିମାନେ ହବିଷ ପାଳନ କରି ରାଧାଦାମୋଦର ପୂଜା କରୁଛନ୍ତି। ଏହା ଶ୍ରୀଜିଉଙ୍କୁ ମଧ୍ୟ ଦର୍ଶନ କରୁଛନ୍ତି। ବୃନ୍ଦାବତୀ ଭକ୍ତ ନିବାସ, ବଗଲା ଧର୍ମଶାଳା, ରେଲୱେ ଟୁରିଷ୍ଟ କମ୍ପ୍ଲେକ୍ସ ଓ ମୋଚିସାହି କଲ୍ୟାଣ ମଣ୍ଡପରେ କରାଯାଇଛି ସ୍ବତନ୍ତ୍ର ଶିବିର । ବ୍ରତଧାରୀଙ୍କ ମହାପ୍ରସାଦ ସେବନ, ପୂଜାର୍ଚ୍ଚନା, ଭଜନ କୀର୍ତ୍ତନ, ତୀର୍ଥ ପୁଷ୍କରିଣୀରେ ସ୍ନାନ ନେଇ ହୋଇଛି ବ୍ଯବସ୍ଥା ।
ସିମୁଳିଆରେ ତୀର୍ଥଯାତ୍ରୀ ବସ୍ ଦୁର୍ଘଟଣା
ସୋର : ବାଲେଶ୍ଵରରେ ତୀର୍ଥଯାତ୍ରୀ ବସ ଦୁର୍ଘଟଣା ଘଟି ୩୦ରୁ ଅଧିକ ଆହତ। ପୁରୀରୁ ଦର୍ଶନ ସାରି ପଶ୍ଚିମବଙ୍ଗ ଫେରିବାବେଳେ ସିମୁଳିଆ ଥାନା ୧୬ନମ୍ବର ଜାତୀୟ ରାଜପଥ ତାରିଣୀ ଛକ ନିକଟରେ ବସ ଦୁର୍ଘଟଣାଗ୍ରସ୍ତ ହୋଇଛି। ଡ୍ରାଇଭରଙ୍କ ଆଖି ଲାଗି ଯିବାରୁ ଏଭଳି ଦୁର୍ଘଟଣା ଘଟିଥିବା ସୂଚନା ମିଳିଛି। ଘଟଣାସ୍ଥଳରୁ ଡ୍ରାଇଭର ଓ ହେଲ୍ପର ଫେରାର ଥିବା ବେଳେ ପୋଲିସ ସମସ୍ତଙ୍କୁ ଉଦ୍ଧାର କରି ସିମୁଳିଆ ମେଡ଼ିକାଲରେ ଭର୍ତ୍ତି କରିଛନ୍ତି।ପଶ୍ଚିମବଙ୍ଗ ମୋହନପୁର ଥାନା ବୋଇତା ଅଞ୍ଚଳର ୬୫ଜଣ ଯାତ୍ରୀ ପୁରୀ ଜଗନ୍ନାଥ ଦର୍ଶନ କରିବା ପାଇଁ ଯାଇଥିଲେ। ଫେରିବା ବେଳେ ରାତି ପ୍ରାୟ ୨ଟା ସମୟରେ ତୀର୍ଥଯାତ୍ରୀ ବସଟି ଡିଭାଇଡର ଉପରକୁ ଚଡିଯାଇ ଜାତୀୟ ରାଜପଥ ଉପରେ ଓଲଟି ପଡିଛି। ବସରେ ଥିବା ସମସ୍ତ ଯାତ୍ରୀଙ୍କୁ ଗାଡ଼ିର କାଚ ଭାଙ୍ଗି ବାହାରକୁ ବାହାର କରାଯାଇଛି। ଘଟଣାସ୍ଥଳରେ ସିମୁଳିଆ ଥାନାର ଆଇଆଇସି ପହଞ୍ଚି ତଦନ୍ତ ଆରମ୍ଭ କରିଛନ୍ତି।