ପୁରୀ ଜିଲ୍ଲା କାକଟପୁର ବ୍ଲକ ଛୋଟୀପଡା ଗାଁରେ ଗୋଷ୍ଠୀ ସଂଘର୍ଷ। ଛୋଟୀପଡା ଗ୍ରାମସ୍ଥିତ ବହୁମୁଖି ବାତ୍ୟା ଆଶ୍ରୟସ୍ଥଳୀ ମରାମତିକୁ ନେଇ ଦୁଇ ଗୋଷ୍ଠୀ ମଧ୍ୟରେ ମୁହାଁମୁହିଁ ପରିସ୍ଥିତି ସୃଷ୍ଟି ହୋଇଛି। କାକଟପୁର ଥାନାରେ ଅଭିଯୋଗ ପରେ ପୋଲିସ ଘଟଣା ସ୍ଥଳରେ ପହଂଚି ଅନୁଧ୍ୟାନ କରିଛନ୍ତି। ସୂଚନା ଅନୁଯାୟୀ, ଛୋଟୀପଡା ଗ୍ରାମସ୍ଥିତ ବହୁମୁଖି ବାତ୍ୟା ଆଶ୍ରୟସ୍ଥଳୀ ମରାମତି ଓ ରଙ୍ଗ କରିବା ପାଇଁ ଓଡିଶା ରାଜ୍ୟ ବିପର୍ଯ୍ୟୟ ପରିଚାଳନା କର୍ତ୍ତୃପକ୍ଷ ପକ୍ଷରୁ ୬ଲକ୍ଷ ଟଙ୍କା ମଂଜୁର ହୋଇଥିଲା । ଏହାର କାର୍ଯ୍ୟାଦେଶ ବ୍ଲକର କନିଷ୍ଠ ଯନ୍ତ୍ରୀ ନାମରେ ଥିବା ବେଳେ କିନ୍ତୁ କାର୍ଯ୍ୟଟିକୁ ବାତ୍ୟା ଆଶ୍ରୟସ୍ଥଳୀ ପରିଚାଳନା କମିଟି କରିବାକୁ ବିଡ଼ିଓଙ୍କୁ ଅବଗତ କରାଇଥିଲେ । କିନ୍ତୁ ସ୍ଥାନୀୟ ସରପଞ୍ଚ କମିଟି ସମ୍ପାଦକ, କିଛି ସଦସ୍ୟକୁ ଅଣଦେଖା କରି କମିଟି ସଭାପତି ତଥା ବାଙ୍ଗୁରିଗାଁ ସରପଞ୍ଚ ମରାମତି କାମ କରିଛନ୍ତି । ଯାହାକୁ ନେଇ ଗଣ୍ଡଗୋଳ ତୀବ୍ର ହୋଇଛି। ଏହା ସହ ବାତ୍ୟା ଆଶ୍ରୟସ୍ଥଳୀ ମରାମତି ଓ ରଙ୍ଗ ମରା କାର୍ଯ୍ୟ ସମ୍ପୂର୍ଣ୍ଣ ନିମ୍ନ ମାନର ହୋଇଥିବା କମିଟି ସଦସ୍ୟ ଅଭିଯୋଗ କରିଛନ୍ତି। ଅଭିଯୋଗ ପରେ ପୋଲିସ ପହଂଚି ପାରିପାର୍ଶ୍ଵିକ ସ୍ଥିତି ଅନୁଧ୍ୟାନ କରିଛନ୍ତି। ଅନ୍ୟ ପଟେ ଏହାକୁ ଖଣ୍ଡନ କରି ବାଙ୍ଗୁରିଗାଁ ସରପଞ୍ଚ। ଯଦି ନିମ୍ନମାନର କାର୍ଯ୍ୟ ହୋଇଛି ତେବେ ସ୍ୱତନ୍ତ୍ର ଯନ୍ତ୍ରୀ ନିକଟରେ ଅଭିଯୋଗ କରିବାକୁ ସରପଞ୍ଚ ନିର୍ଦ୍ଦେଶ ଦେଇଛନ୍ତି।
ଛାତ୍ରୀଙ୍କୁ ଅଶୋଭନୀୟ ଆଚରଣ: ୪ ଅଧ୍ୟାପକଙ୍କ ବିରୋଧରେ ଅଭିଯୋଗ ଆଣିଲେ ଅଭିଭାବକ
ଅନୁଗୁଳରେ ୪ ଅଧ୍ୟାପକଙ୍କ ବିରୋଧରେ ଛାତ୍ରୀଙ୍କୁ ଅଶୋଭନୀୟ ଆଚରଣ ଅଭିଯୋଗ ଆଣିଲେ ଅଭିଭାବକ। ଅନୁଗୁଳ କଲେଜର ଚାରି ଜଣ ଅଧ୍ୟାପକଙ୍କ ବିରୁଦ୍ଧରେ ତିନି ଜଣ ଅଭିଭାବକ ମିଶି ମୁଖ୍ୟମନ୍ତ୍ରୀଙ୍କ ଦପ୍ତରକୁ ଅଭିଯୋଗ ପତ୍ର ପଠାଇଥିବା ଜଣା ପଡ଼ିଛି। ପ୍ରାଣୀ ବିଜ୍ଞାନର ଦୁଇ ଅଧ୍ୟାପକ, ଉଭିଦ ବିଜ୍ଞାନ ଅଧ୍ୟାପକ ଏବଂ ଇଂରାଜୀ ବିଭାଗର ଅଧ୍ୟାପକଙ୍କ ନାମରେ ଏହି ସାଙ୍ଘାତିକ ଅଭିଯୋଗ ଆସିଛି। ଛାତ୍ରୀମାନଙ୍କୁ ଅଧ୍ୟାପକ ଅଶୋଭନୀୟ କଥାବାର୍ତ୍ତା କରିବା ସହ ମାନସିକ ନିର୍ଯାତନା ଦେଉଥିବା ଭଳି ସାଂଘାତିକ ଅଭିଯୋଗ କରିଛନ୍ତି। କ୍ଲାସ ଏବଂ ଲାବୋରେଟୋରୀରେ ଏହି ସବୁ ଘଟଣା ଘଟିଛି। ଛାତ୍ରୀମାନେ ମାନସିକ ସ୍ତରରେ ଭାଙ୍ଗି ପଡିଛନ୍ତି। ଅଧ୍ୟାପକମାନେ ୧୫ ରୁ ୨୦ ବର୍ଷ ଧରି ଏଇ କଲେଜରେ ଅଛନ୍ତି। ତାଙ୍କୁ ବଦଳି କରାଯାଉ ନାହିଁ କାହିଁକି ବୋଲି ଅଭିଭାବକ ପ୍ରଶ୍ନ ଉଠାଇଛନ୍ତି। ଗତ ଜାନୁଆରୀ ୧୩ ତାରିଖରେ ଅଭିଭାବକମାନେ ମୁଖ୍ୟମନ୍ତ୍ରୀଙ୍କୁ ଚିଠି ଲେଖିଥିଲେ ମଧ୍ୟ ତଦନ୍ତ ପାଇଁ ଅନୁଗୁଳ କଲେଜକୁ ଆସି ନଥିଲା କିପରି ବୋଲି ଏବେ ପ୍ରଶ୍ନ ଉଠିଛି। ସବୁଆଡୁ ଖୋଳତାଡ଼ ପରେ ଏବେ ଅଭିଭାବକଙ୍କ ଚିଠି ଉପରେ ତର୍ଜମା ଚାଲିଛି। ଏଥିନେଇ ଅନୁଗୁଳ କଲେଜର ପ୍ରିନ୍ସପାଲ ନିଲାଞ୍ଚଳ ପଟେଲଙ୍କୁ ପଚାରିବାରୁ ସେ ଏବେ ଘଟଣା ସମ୍ପର୍କରେ ଶୁଣିଥିବା କହିଛନ୍ତି। କୌଣସି ଅଭିଭାବକ ତାଙ୍କୁ ଭେଟି ନାହାନ୍ତି। ଘଟଣା ନେଇ ଆମେ ତଦନ୍ତ କରୁଛୁ ବୋଲି ପ୍ରିନ୍ସିପାଲ ପ୍ରକାଶ କରିଛନ୍ତି। ତେବେ ଗତ ସାତ ମାସ ଧରି ନିର୍ଯାତନା ନେଇ ଆସିଥିବା ଅଭିଯୋଗ ପତ୍ର ବା ଚିଠିକୁ କିଏ କାହିଁକି ଚାପି ରଖିଥିଲା ସେନେଇ ପ୍ରଶ୍ନ ଉଠିଛି। ଅଭିଯୋଗର ଶୀଘ୍ର ତଦନ୍ତ କରାଯାଇ କାର୍ଯ୍ୟାନୁଷ୍ଠାନ ନେବାକୁ ଅଭିଭାବକ ଓ ବୁଦ୍ଧିଜୀବୀ ଦାବି କରିଛନ୍ତି ।
ରାଜ୍ୟରେ ନାରୀ ଅସୁରକ୍ଷିତ: ସରକାରଙ୍କ ଉପରେ ବର୍ଷିଲା କଂଗ୍ରେସ
ସାରା ଓଡିଶାରେ ଛାତ୍ରୀ ଅସୁରକ୍ଷିତ ହୋଇ ପଡିଥିବା ବେଳେ ବାଲେଶ୍ୱରର ଏଫଏମ କଲେଜ, ସମ୍ବଲପୁରର ଜିଏମ କଲେଜରେ ଛାତ୍ରୀ ନିର୍ଯାତନା ଘଟଣା ମନରୁ ନଲିଭୁଣୁ ପୁଣି ଏବେ ଯାଜପୁରରେ ଜଣେ ହକି କ୍ରୀଡାବିତ୍ ନାବାଳିକାକୁ ଗଣଦୁଷ୍ମର୍ମ କରାଯିବାର ଘଟଣା ସମଗ୍ର ରାଜ୍ୟରେ ଆଲୋଡନ ସୃଷ୍ଟି କରିଛି । ଯାହାକୁ ନେଇ ଜିଲ୍ଲା କଂଗ୍ରେସର ୧୧ ଜଣିଆ ପ୍ରତିନିଧି ମଣ୍ଡଳୀ ପିଡୀତାର ଘରକୁ ଯାଇ ପୀଡିତା ସହ ଆଲୋଚନା କରିଥିଲେ । ଏହି ଘଟଣାରେ ସମବେଦନା ଜଣାଇବା ସହ ନ୍ୟାୟ ନମିଳିବା ପର୍ଯ୍ୟନ୍ତ ପୀଡିତା ପରିବାର ସହ କଂଗ୍ରେସ ଛିଡା ହେବ ବୋଲି ପ୍ରତିଶ୍ରୃତି ଦେଇଥିଲେ । ଏହି ପ୍ରତିନିଧି ମଣ୍ଡଳୀରେ ଏଆଇସିସି ସଭ୍ୟ ପଦ୍ମାକର ଗୁରୁ, ସଭ୍ୟ ସନ୍ତୋଷ ନନ୍ଦ, ବିଧାନସଭା ପ୍ରାର୍ଥୀ ସୁଦିପ କୁମାର କର, ଆଇନୀଜୀବୀ ପ୍ରତିମା କର ପ୍ରମୁଖଙ୍କ ନେତୃତ୍ୱରେ ପୀଡିତା ଭେଟିଥିଲେ । ପରେ ଜିଲ୍ଳା କଂଗ୍ରେସ କାର୍ଯ୍ୟାଳୟ ଠାରେ ଏହି ପ୍ରତିନିଧି ମଣ୍ଡଳୀଙ୍କ ଉପସ୍ଥିତିରେ ସାମ୍ବାଦିକ ସମ୍ମିଳନୀ ଅନୁଷ୍ଠିତ ହୋଇଥିଲା । ସରକାରଙ୍କ ଅପାରଗତା ଯୋଗୁ ସମଗ୍ର ଓଡିଶାରେ ନାରୀ ନିର୍ଯ୍ୟାତନା ଦିନକୁ ଦିନ ବୃଦ୍ଧି ପାଇବାରେ ଲାଗିଥିବା ବେଳେ ସରକାର ଏବେବି ମଧ୍ୟ କୁମ୍ଭକର୍ଣ୍ଣ ନିଦ୍ରାରେ ଶୋଇଥିବା କମିଟି ସଦସ୍ୟମାନେ ମତ ଦେଇଥିଲେ ।
ଲାଇଭ ଭିଡିଓ କରି ଟ୍ରେନ ଆଗକୁ ଡେଇଁ କଲେ ଆତ୍ମହତ୍ୟା
ଯୁବକ ନେଲେ ଚରମ ନିଷ୍ପତ୍ତି । ଲାଇଭ ଭିଡିଓ କରି ଟ୍ରେନ ଆଗକୁ ଡେଇଁ କଲେ ଆତ୍ମହତ୍ୟା । ସୂଚନା ମୁତାବକ, ଯୁବକ ଜଣକ ସାଲେପୁର ଥାନା ଅନ୍ତର୍ଗତ ଛାଣିପୁର ପଞ୍ଚାୟତ ଅଧିନସ୍ତ ସାତବାଟି ଗାଁର ବୋଲି ଜଣାପଡିଛି । ଖବର ଅନୁସାରେ, ମାଧବାନନ୍ଦ ମହାରଣାଙ୍କ ଏକ ମାତ୍ର ପୁଅ ସୁନୀଲ କୁମାର ମହାରଣା। ସୁନୀଲ ଭୁବେନେଶ୍ୱରରେ ଏକ ଟ୍ରାଭେଲ ଏଜେନ୍ସି କରିଥିଲେ । କୌଣସି କାରଣକୁ ନେଇ ସୁନୀଲ ମାନସିକ ଭାରସାମ୍ୟ ହରାଇ ମଞ୍ଚେଶ୍ୱରରେ ଲାଇଭି ଭିଡିଓ କରିଥିଲେ । ପରେ ମଞ୍ଚେଶ୍ଵରରେ ଟ୍ରେନ ଆଗକୁ ଡେଇଁ ଆତ୍ମହତ୍ୟା କରିଥିବାର ଜଣା ପଡିଛି । ଏ ଖବର ଶୁଣିବା ପରେ ଗାଁରେ ଶୋକର ଛାୟା ଖେଳି ଯାଇଛି ।
ବାଲେଶ୍ଵରରେ ଲଜ୍ଜା: ୭ ବର୍ଷର ନାବାଳିକାଙ୍କୁ ସମ୍ପର୍କୀୟ ଜେଜେବାପା ଦୁଷ୍କର୍ମ କରିଥିବା ଅଭିଯୋଗ
ବାଲେଶ୍ଵର ବସ୍ତା ଅଂଚଳରେ ଲଜ୍ଜା। ୭ ବର୍ଷର ନାବାଳିକାଙ୍କୁ ସମ୍ପର୍କୀୟ ଜେଜେବାପା ଦୁଷ୍କର୍ମ କରିଥିବା ଅଭିଯୋଗ। ଅଭିଯୁକ୍ତ ଜେଜେବାପାକୁ ଥାନାରେ ଅଟକ ରଖିଛି ପୋଲିସ। ବସ୍ତା ଅମର୍ଦ୍ଦାରୋଡ଼ ଫାଣ୍ଡି ଅଂଚଳର ଏ ଘଟଣା। ନାବାଳିକା ଜଣକ ପଡୋଶୀ ଘରକୁ ଯିବା ସମୟରେ ଅଭିଯୁକ୍ତ ଜଣକ ନାବାଳିକାଙ୍କୁ ବିଭିନ୍ନ ପ୍ରକାରର ପ୍ରଲୋଭନ ଦେଖାଇ ଘରକୁ ନେଇ ଦୁଷ୍କର୍ମ ଉଦ୍ୟମ କରିଥିଲା। ଝିଅର ଚିତ୍କାର ଶୁଣି ପଡ଼ୋଶୀ ଆସି ନାବାଳିକାଙ୍କୁ ଉଦ୍ଧାର କରିଥିଲେ। ପରିବାର ଲୋକେ ଏ ସମ୍ପର୍କରେ ଅମର୍ଦ୍ଦାରୋଡ଼ ଫାଣ୍ଡିରେ ଲିଖିତ ଅଭିଯୋଗ କରିବା ପରେ ଫାଣ୍ଡି ଅଧିକାରୀ ଅଭିଯୁକ୍ତ ଜଣକୁ ଘରୁ ଉଠାଇ ଆଣି ପଚରାଉଚରା ଜାରି ରଖିଛନ୍ତି।
ଅନ୍ତରଙ୍ଗ ଭିଡିଓ ଭାଇରାଲ ପରେ ଯୁବତୀଙ୍କ ବିଷ ପିଇ ଆତ୍ମହତ୍ୟା ଉଦ୍ୟମ
ଅନ୍ତରଙ୍ଗ ଭିଡିଓ ଭାଇରାଲ ପରେ ଯୁବତୀଙ୍କ ବିଷ ପିଇ ଆତ୍ମହତ୍ୟା ଉଦ୍ୟମ। ନବରଙ୍ଗପୁର ରାଇଘର ବ୍ଲକ ଅଂଚଳର ଏ ଘଟଣା। ଯୁବତୀଙ୍କୁ ବିଚ ରାସ୍ତାରେ ମାଡ଼ ମାରିବା ସହ ଯୁବତୀ ଏବଂ ଅନ୍ୟ ଜଣେ ଯୁବକଙ୍କ ଅନ୍ତରଙ୍ଗ ଭିଡିଓ ଭାଇରାଲ କରିଥିଲେ ଅନ୍ୟ ଜଣେ ଯୁବକ। ଭିଡିଓ ଭାଇରାଲ ପରେ ଅପମାନ ଓ ବଦନାମ ଭୟରେ ଚରମ ନିଷ୍ପତ୍ତି ନେଲେ ଯୁବତୀ। କୀଟନାଶକ ପିଇ ଆତ୍ମହତ୍ୟା ଉଦ୍ୟମ କରିଛନ୍ତି ଯୁବତୀ। ଯୁବତୀଙ୍କୁ ଚିକିତ୍ସା ପରେ ଡାକ୍ତର ଫେରାଇ ଦେବାପରେ ଏବେ ମୃତ୍ୟୁ ସହ ଲଢେ଼ଇ କରୁଛନ୍ତି। ଜୟପୁରର ଏକ ନର୍ସିଂ କଲେଜରେ ପଢୁଛନ୍ତି ସମ୍ପୃକ୍ତ ଯୁବତୀ। କିଛି ଦିନ ତଳେ ଯୁବତୀ ଜଣକ ଲୁଚି ବିବାହ କରିଥିବା ମଧ୍ୟ ଚର୍ଚ୍ଚା ହେଉଛି। ସେପଟେ ଏକତରଫା ପ୍ରେମ କରୁଥିବା ଅନ୍ୟ ଜଣେ ଯୁବକ ଜଣକ ତାଙ୍କୁ ରାସ୍ତାରେ ମାରପିଟ୍ କରିବା ସହ ଯୁବତୀଙ୍କ ଫଟୋ ଓ ଭିଡିଓକୁ ସୋସିଆଲ ମିଡିଆରେ ଭାଇରାଲ କରିଥିଲେ। ଯୁବତୀଙ୍କ ପରିବାର ପକ୍ଷରୁ ରାଇଘର ଥାନାରେ ଏତଲା ଦିଆଯାଇଛି। ପୀଡ଼ିତାଙ୍କୁ ନ୍ୟାୟ ସହ ଅପରାଧୀଙ୍କୁ ଉଚିତ୍ ଦଣ୍ଡ ମିଳୁ ବୋଲି ଦାବି କରିଛନ୍ତି। ରାଇଘର ପୋଲିସ ଯୁବତୀଙ୍କ ଘରକୁ ଯାଇ ବୟାନ ନେଇଛି।
ଗଂଜାମରେ ଡାଇରିଆ ନେଲା ଆଉ ୩ ଜୀବନ
ଗଂଜାମରେ ଡାଇରିଆ ନେଲା ଆଉ ୩ ଜୀବନ। ଗତକାଲି ଦୁଇଜଣଙ୍କର ମୃତ୍ୟୁ ହୋଇଥିବାବେଳେ ଆଜି ଜଣକର ମୃତ୍ୟୁ ହୋଇଛି। ଗତକାଲି ବିଳମ୍ବିତ ରାତିରେ ଗୁରୁତର ମହିଳାଙ୍କ ମୃତ୍ୟୁ ହୋଇଛି। ମୃତ ମହିଳା ହେଉଛନ୍ତି ଶୁକୁରୀ ମଳିକ। ବର୍ତ୍ତମାନ ସୁଦ୍ଧା ମୃତ୍ୟୁ ସଂଖ୍ୟା ୩ରେ ପହଞ୍ଚିଛି। ଆଜି ସକାଳେ ପୁଣି ୪ ଜଣ ଆକ୍ରାନ୍ତଙ୍କୁ ଗୁରୁତର ଅବସ୍ଥାରେ ଦିଗପହଣ୍ଡି ମେଡ଼ିକାଲକୁ ସ୍ଥାନାନ୍ତର କରାଯାଇଛି। । ସ୍ୱାସ୍ଥ୍ୟ ବିଭାଗର ଟିମ ଓ ସାନଖେମୁଣ୍ଡି ପ୍ରଶାସନ ଗାଁରେ ପହଞ୍ଚି ସ୍ଥିତି ଅନୁଧ୍ୟାନ କରିଛନ୍ତି । ପୂର୍ବରୁ ସାନଖେମୁଣ୍ଡି ଓ ପାତ୍ରପୁର ଅଂଚଳରେ ଡାଇରିଆ ହୋଇ ପ୍ରାଥମିକ ସ୍ୱାସ୍ଥ୍ୟ କେନ୍ଦ୍ରରେ ୧୬୦ରୁ ଅଧିକ ଆକ୍ରାନ୍ତ ରୋଗୀ ଚିକିତ୍ସିତ ହୋଇ ଫେରିଥିଲେ । ଅନ୍ୟପଟେ ସାନଖେମୁଣ୍ଡି ବ୍ଲକ ଟି. ଗୋବିନ୍ଦପୁର ପଂଚାୟତ ଦାମପୁର ରାସ୍ତା ଅବସ୍ଥା ଶୋଚନୀୟ ଯୋଗୁଁ ରୋଗୀ ସ୍ତାନାନ୍ତର ପାଇଁ ସମସ୍ୟା ସୃଷ୍ଟି ହେଉଥିବା ସରପଞ୍ଚ ସୂଚନା ଦେଇଛନ୍ତି।
ଭିଜିଲାନ୍ସ ଜାଲରେ ବିଏମସି କାର୍ଯ୍ୟନିର୍ବାହୀ ଯନ୍ତ୍ରୀ
ନନ୍ଦିଘୋଷ ବ୍ୟୁରୋ : ଭିଜିଲାନ୍ସ ଜାଲରେ ବିଏମସି କାର୍ଯ୍ୟନିର୍ବାହୀ ଯନ୍ତ୍ରୀ। ଆୟ ବହିର୍ଭୂତ ସମ୍ପତ୍ତି ଠୁଳ ଅଭିଯୋଗରେ କାର୍ଯ୍ୟନିର୍ବାହୀ ଯନ୍ତ୍ରୀ ଜଗନ୍ନାଥ ପଟ୍ଟନାୟକଙ୍କ ଘରେ ରେଡ କରୁଛି ଭିଜିଲାନ୍ସ। ବାସଭବନ ସମେତ ୪ଟି ସ୍ଥାନରେ ରେଡ କରିଛି ଭିଜିଲାନ୍ସ। ରେଡରେ ୬ ଜଣ ଡ଼ିଏସପି, ୧୦ ଇନ୍ସପେକ୍ଟରଙ୍କୁ ନେଇ ଚାଲିଛି ରେଡ଼। ଭୁବନେଶ୍ୱର ବଡଗଡ଼ରେ ଥିବା ଘର, ବାଲିଅନ୍ତାରେ ଫାର୍ମ ହାଉସ, ରାୟଗଡାରେ ଥିବା ପୈତୃକ ଘର ଓ ଭୁବନେଶ୍ୱର ଅଫିସରେ ଚାଲିଛି ରେଡ଼। ଭୋର ସମୟରରୁ ଏହି ରେଡ଼ ଚାଲିଥିବା ବେଳେ ଅନେକ୍ ଗୁରୁତ୍ୱପୂର୍ଣ୍ଣ ଦସ୍ତାବିଜ ଭିଜିଲାନ୍ସ ହାତରେ ଲାଗିଥିବା ସୂଚନା ମିଳିଛି।
ଆଜିଠୁ ରାଜସ୍ଥାନରେ ଭାରତୀୟ ବାୟୁସେନାର ବଡ଼ଧରଣର ସମରାଭ୍ୟାସ
ନନ୍ଦିଘୋଷ ବ୍ୟୁରୋ : ଆଜିଠାରୁ ରାଜସ୍ଥାନରେ ଭାରତୀୟ ବାୟୁସେନାର ବଡ଼ଧରଣର ସମରାଭ୍ୟାସ । ରାଜସ୍ଥାନ ଅନ୍ତର୍ଗତ ଭାରତ-ପାକିସ୍ତାନ ସୀମାରେ ଆସନ୍ତା ୨୫ ଯାଏ ଚାଲିବ ସମରାଭ୍ୟାସ । ଏଥିଲାଗି ଜାରି ହୋଇଛି ନୋଟିସ ଟୁ ଏୟାରମେନ ବା ନୋଟାମ । ଏହି ବଡ଼ଧରଣର ସମରାଭ୍ୟାସ ବାର୍ମରରୁ ଯୋଧପୁର ଯାଏ ଚାଲିବ । ଭାରତୀୟ ବାୟୁସେନାକୁ ପ୍ରସ୍ତୁତ ରଖିବା, ସମ୍ଭାବ୍ୟ ବିପଦରେ ଜାଗତିଆର ଉଦ୍ଦେଶ୍ୟରେ ଏହି ଡ୍ରିଲ କରାଯିବ। ଏଥିରେ ବୟୁସେନାର ୩ଟି କମାଣ୍ଡ ସାମିଲ ହେବ। ସମରାଭ୍ୟାସ ଯୋଗୁ ବାର୍ମରରୁ ଯୋଧପୁର ଯାଏ ବେସାମରିକ ବିମାନ ଚଳାଚଳକୁ ନିଷିଦ୍ଧ କରାଯାଇଛି। ଏଥିରେ ରାଫେଲ, ମିରାଜ 2000, ସୁଖୋଇ-30, ଏୟାର ଡିଫେନ୍ସ ସିଷ୍ଟମ, ସପୋର୍ଟ ସିଷ୍ଟମ, ବହୁ ଲଢୁଆ ବିମାନ ସାମିଲ ହେବେ। ଏହା ସହ ରାତ୍ରୀକାଳୀନ ଡ୍ରିଲ ବି ଅନୁଷ୍ଠିତ ହେବ । ଦେଶର ପ୍ରତିରକ୍ଷା ସାମର୍ଥ୍ୟ ବଢାଇବା ଉଦ୍ଦେଶ୍ୟରେ ଏହି ସମରାଭ୍ୟାସ କରାଯାଉଛି । ଅପରେସନ ସିନ୍ଦୂର ବେଳେ ରାଜସ୍ଥାନର ବାର୍ମର, ଜୈସଲମର, ବିକାନେର, ଶ୍ରୀଗଙ୍ଗାନଗର ଅଞ୍ଚଳକୁ ପାକିସ୍ତାନ ୪ଶହରୁ ଅଧିକ ଡ୍ରୋନ ଛାଡିଥିଲା । ତେବେ ଏସମସ୍ତ ଡ୍ରୋନକୁ ଧ୍ବଂସ କରିଦିଆଯାଇଥିଲା ।
ରୁଷ-ୟୁକ୍ରେନ ମଧ୍ୟରେ ଶାନ୍ତି ପ୍ରତିଷ୍ଠା ଲାଗି ଆଉ ଏକ ପାଦ
ନନ୍ଦିଘୋଷ ବ୍ୟୁରୋ : ରୁଷ-ୟୁକ୍ରେନ ମଧ୍ୟରେ ଶାନ୍ତି ପ୍ରତିଷ୍ଠା ଲାଗି ଆଉ ଏକ ପାଦ । ଆଜି ତୁର୍କୀରେ ହେବ ଦୁଇ ଦେଶ ମଧ୍ୟରେ ଉଚ୍ଚସ୍ତରୀୟ କଥାବାର୍ତ୍ତା । ଏନେଇ ସୂଚନା ଦେଇଛନ୍ତି ୟୁକ୍ରେନ ରାଷ୍ଟ୍ରପତି ଭୋଲୋଦିମିର ଜେଲେନସ୍କି । କଥାବାର୍ତ୍ତା ନେଇ ୟୁକ୍ରେନ ଜାତୀୟ ନିରାପତ୍ତା ଓ ପ୍ରତିରକ୍ଷା ପରିଷଦ ପକ୍ଷରୁ ଏସଂକ୍ରାନ୍ତ ନିଷ୍ପତ୍ତି ହୋଇଛି । ଫଳରେ ଦୁଇ ଦେଶ ମଧ୍ୟରେ ଚାଲିଥିବା ଯୁଦ୍ଧର ସାମୟିକ ଅନ୍ତ ଘଟିପାରେ ବୋଲି ଆଶା କରାଯାଉଛି । ସେପଟେ ଶାନ୍ତି ପ୍ରତିଷ୍ଠା ପ୍ରସଙ୍ଗରେ କଥାବାର୍ତ୍ତାକୁ ଗୁରୁତ୍ବ ଦିଆଯିବ ବୋଲି କହିଛି କ୍ରେମଲିନ । କଥାବାର୍ତ୍ତା ଅବସରରେ ବନ୍ଦୀ ବିନିମୟ କାର୍ଯ୍ଯକ୍ରମ ପ୍ରସଙ୍ଗରେ ବି ହୋଇପାରେ ଆଲୋଚନା । ସେପଟେ ଯୁଦ୍ଧ ବନ୍ଦ ନେଇ ଆମେରିକା ରାଷ୍ଟ୍ରପତି ଡୋନାଲଡ ଟ୍ରମ୍ପ ଅତ୍ୟଧିକ ଚାପ ପକାଉଥିବାରୁ ତୁର୍କୀ ବୈଠକରେ ଏକ ବଡ଼ ନିଷ୍କର୍ଷ ଆସିବା ସମ୍ଭାବନା ରହିଛି । ୟୁକ୍ରେନରେ ମାର୍ଶଲ ଆଇନ ଜାରି ରହିଥିବାରୁ ଭୋଲଦିମିର ଜେଲେନସ୍କି ଜଣେ ବୈଧ ଶାସକ ନୁହନ୍ତି ବୋଲି କହିଆସୁଛନ୍ତି ରୁଷ ରାଷ୍ଟ୍ରପତି ଭ୍ଲାଦିମିର ପୁଟିନ । ଗତ ମେ ୧୬ ଓ ଜୁନ ୨ରେ ୟୁକ୍ରେନ ଓ ରୁଷ ମଧ୍ୟରେ ଇସ୍ତାନବୁଲରେ ଦୁଇ ଥର ଆଲୋଚନା ହୋଇଥିଲା । ଏହି କଥାବାର୍ତ୍ତାର ଫଳ ସ୍ବରୂପ ସହସ୍ରାଧିକ ବନ୍ଦୀଙ୍କୁ ବିନିମୟ କରାଯାଇଥିଲା ।