ଚାନ୍ଦବାଲି : ଭୁଶୁଡ଼ିପାରେ ବୈତରଣୀ ସେତୁ ! ବ୍ରିଜର ମୂଳଦୁଆରେ ପଡ଼ିଲାଣି ଫାଟ । ବିପଦସଙ୍କୁଳ ଅବସ୍ଥାରେ ଯାଆସ କରୁଛନ୍ତି ଲୋକେ । କେତେବେଳେ ଯେ ଅଘଟଣ ଘଟିବ କହିବା ମୁସ୍କିଲ । କେନ୍ଦ୍ରାପଡ଼ା ଓ ଭଦ୍ରକ ଜିଲ୍ଲାକୁ ଯୋଗାଯୋଗ ସୁଗମ ପାଇଁ ପୂର୍ବ ସରକାର ବୈତରଣୀ ନଦୀ ଉପରେ ନିର୍ମାଣ କରିଥିଲେ ବିଜୁ ସେତୁ । ପ୍ରାୟ ୧୮ କୋଟି ଟଙ୍କା ବ୍ୟୟରେ ନିର୍ମିତ ସେତୁକୁ ୨୦୦୮ ମେ ୨୭ରେ ଉଦଘାଟନ କରିଥିଲେ ତତ୍କାଳୀନ ମୁଖ୍ୟମନ୍ତ୍ରୀ ଶ୍ରୀଯୁକ୍ତ ନବୀନ ପଟ୍ଟନାୟକ । ଚାନ୍ଦବାଲିବାସୀ ବେଶ ଉପକୃତ ହେଉଥିଲେ । କେନ୍ଦ୍ରାପଡା, ପାରାଦୀପ, କଟକ, ଭୁବନେଶ୍ୱରକୁ ଯାତାୟତ ପାଇଁ କମିଥିଲା ଦୂରତା । ମାତ୍ର ଏବେ ଦୋହଲୁଛି ସେତୁ, ଦୋହଲୁଛି ଭାଗ୍ୟ ।
ବୈଷୟିକ ତ୍ରୁଟିରୁ ୨୦୧୬ ମସିହାରେ ବ୍ରିଜଟି ଦବିବାକୁ ଲାଗିଥିଲା । ପୂର୍ତ୍ତ ବିଭାଗ ପକ୍ଷରୁ ମରାମତି କରାଯାଇଥିଲେ ସୁଦ୍ଧା କୌଣସି ସୁଧାର ଆସିଲା ନାହିଁ । ଏହାକୁ ଦୃଷ୍ଟିରେ ରଖି ତତ୍କାଳୀନ ସରକାର ୨୦୨୨ରେ ଆଉ ଏକ ସେତୁ ନିର୍ମାଣ ପାଇଁ ପ୍ରୟାସ ଆରମ୍ଭ କରିଥିଲେ । ବହୁ ଥର ଟେଣ୍ଡର ସରିଛି । ମାତ୍ର ତାହା ଫାଇଲରେ ସୀମିତ ରହିଛି । ସେତୁ ପ୍ରସଙ୍ଗରେ ଚାନ୍ଦବାଲି ବିଧାୟକ ଗତ ବିଧାନସଭାରେ ଉତଥାପନ କରିଥିଲେ । ପୂର୍ତ୍ତ ମନ୍ତ୍ରୀ ପୃଥ୍ଵୀରାଜ ହରିଚନ୍ଦନ କହିଛନ୍ତି- ଟେଣ୍ଡର ସରିଛି । ମାତ୍ର ଜମି ଅଧିଗ୍ରହଣ ପାଇଁ କାର୍ଯ୍ୟ ଅଟକିଛି । ଜମି ଅଧିଗ୍ରହଣ ପରେ କାର୍ଯ୍ୟ ଆରମ୍ଭ ହେବ । ହେଲେ ଏଯାଏଁ ପ୍ରଶାସନ ସ୍ତରରେ କୌଣସି ତତ୍ପରତା ପ୍ରକାଶ ପାଇ ନାହିଁ । ଯାହାକୁ ନେଇ ଆଶା ଆଶଙ୍କାରେ ଲୋକେ । କେବେ ଆରମ୍ଭ ହେଉଛି ଦ୍ୱିତୀୟ ସେତୁ ନିର୍ମାଣ କାର୍ଯ୍ୟ ? ତାକୁ ହିଁ ଅପେକ୍ଷା ।

ଆସିକା : ଧୂଆଁବାଣ ସାଜିଛି ନିର୍ବାଚନୀ ଇସ୍ତାହାର । ବିଜେପି ସରକାରକୁ ପୂରିବାକୁ ବସିଲାଣି ୨ ବର୍ଷ । ହେଲେ ଆସିକା ବାଲାଜୀ ସୂତାକଳରୁ ଖୋଲୁନି ତାଲା । ଜିଲ୍ଲାରେ କୁଶଳୀ ଶ୍ରମିକଙ୍କୁ ମିଳୁନି କାମ । ଯନ୍ତ୍ରଣାରେ ପ୍ରବାସୀ ଶ୍ରମିକ ।… ଗଂଜାମ ଜିଲ୍ଲା ଏକ ଦାଦନ ପ୍ରବଣ ଅଞ୍ଚଳ । ଜିଲ୍ଲାରେ କୌଣସି କର୍ମ ସଂସ୍ଥାନ ନଥିବାରୁ ପେଟପାଟଣା ପାଇଁ ଲୋକଙ୍କୁ ବାହାରକୁ ଯିବାକୁ ପଡ଼େ । ଏବେ ଗ୍ୟାସ ସଙ୍କଟରୁ ପ୍ରତିଦିନ ସୁରଟ, ତାମିଲନାଡୁ, କେରଳ ଅଞ୍ଚଳରୁ ଗଞ୍ଜାମକୁ ଫେରୁଛନ୍ତି ହଜାର ହଜାର ଶ୍ରମିକ । ହେଲେ ବିଡ଼ମ୍ବନାର ବିଷୟ ଜିଲ୍ଲାରେ ଶ୍ରମିକଙ୍କୁ ମିଳୁନି କାମ । ଫଳରେ କିପରି ପରିବାର ଚଳାଇବେ ଚିନ୍ତାରେ ଲୋକେ ।
ଦିନ ଥିଲା ବାଲାଜୀ ସୂତାକଳରେ ଅନେକ କୁଶଳୀ ଶ୍ରମିକ କାମ କରୁଥିଲେ । ମିଲକୁ କପା ଯୋଗାଇ ଦୁଇ ପଇସା ରୋଜଗାର କରୁଥିଲେ ଚାଷୀ । ଗତ ୨୦୧୩ ମସିହାରୁ ସୂତାକଳଟି ସଂପୂର୍ଣ୍ଣ ବନ୍ଦ ହୋଇ ପଡିଛି । ଯନ୍ତ୍ରପାତି ସବୁ ମାଟିରେ ମିଶିଲାଣି । ବନ୍ଦ କଳକୁ ସୁରକ୍ଷା ଦେବାକୁ ନାଁ କୁ ମାତ୍ର କିଛି କର୍ମଚାରୀ ପହରା ଦେଉଛନ୍ତି । କିନ୍ତୁ ସରକାର ସୂତାକଳର ପୁନରୁଦ୍ଧାର କରୁନାହାନ୍ତି । ସରକାର ବାଲାଜୀ ସୂତାକଳର ପୁନରୁଦ୍ଧାର ସହ ଅନ୍ୟ ଶିଳ୍ପ ପ୍ରତିଷ୍ଠା କଲେ ଶ୍ରମିକ ମାନେ ନିଜ ଅଞ୍ଚଳରେ କାମ ପାଇପାରନ୍ତେ ବୋଲି ମତ ପ୍ରକାଶ ପାଇଛି ।

ଯାଜପୁର ରୋଡ : ତହସିଲଦାରଙ୍କ ଉପରେ ଟ୍ରାକ୍ଟର ଚଢ଼ାଇ ହତ୍ୟା ଉଦ୍ୟମ। ଗୁରୁତର ଅବସ୍ଥାରେ ମେଡିକାଲରେ ଭର୍ତ୍ତି ହେଲେ ତହସିଲଦାର। ଯାଜପୁର ଜିଲ୍ଲା କୋରେଇ ଥାନା ମିନାବଜାର ଛକ ନିକଟରେ ଘଟିଛି ଏଭଳି ଅଭାବନୀୟ ଘଟଣା। ଲଘୁ ଖଣିଜ ଲୁଟ୍ ହେଉଥିବା ନେଇ ଖବର ପାଇ ଚଢ଼ାଉ କରିବାକୁ ଯାଇଥିବା ସମୟରେ ବ୍ୟାସନଗର ତହସିଲଦାରଙ୍କ ଉପରେ ଟ୍ରାକ୍ଟର ଚଢ଼ାଇ ଦେଲେ ଦୁର୍ବୃତ୍ତ। ଫଳରେ ଗୁରୁତର ଅବସ୍ଥାରେ କୋରେଇ ମେଡ଼ିକାଲରେ ଭର୍ତ୍ତି ହେଲେ ବ୍ୟାସନଗର ତହସିଲଦାର ପ୍ରଶାନ୍ତ କୁମାର ପଣ୍ଡା। ସୂଚନା ମୁତାବକ ବ୍ୟାସନଗର ତହସିଲ ଅଧିନ ମିନାବଜାର ଛକ ନିକଟରେ ଥିବା ଏକ ପୋଖରୀକୁ ଖନଖ କରି ବେଆଇନ ଭାବେ ମାଟି ଲୁଟି ନେଉଥିଲେ କିଛି ଦୁର୍ବୃତ୍ତ। ଏନେଇ ଖବର ପାଇବା ପରେ ବ୍ୟାସନଗର ତହସିଲଦାର ପ୍ରଶାନ୍ତ କୁମାର ପଣ୍ଡା ସଦଳବଳେ ସେଠାରେ ପହଞ୍ଚିଥିଲେ। ହେଲେ ମାଟି ଲୁଟ୍ କରୁଥିବା ମାଫିଆମାନେ ତହସିଲଦାର ଙ୍କ ଉପରେ ଟ୍ରାକ୍ଟର ଚଢ଼ାଇ ଦେଇଥିଲେ। ଗୁରୁତର ଆହତ ଅବସ୍ଥାରେ ତହସିଲଦାର ଙ୍କୁ ଉଦ୍ଧାର କରାଯାଇ କୋରେଇ ମେଡ଼ିକାଲରେ ଭର୍ତ୍ତି କରାଯାଇଛି। ଏନେଇ ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ଘଟଣାର ତଦନ୍ତ ଆରମ୍ଭ କରିଛି।