ନନ୍ଦିଘୋଷ ବ୍ୟୁରୋ :ଏବେ ପିତାମାତାଙ୍କ ସେବା କରିବା ପାଇଁ ଛୁଟି ନେଇ ପାରିବେ ସରକାରୀ କର୍ମଚାରୀ । ବୃଦ୍ଧ ମାତାପିତାଙ୍କ ଯତ୍ନ ପାଇଁ କେନ୍ଦ୍ର ସରକାରୀ କର୍ମଚାରୀ ୩୦ ଦିନିଆ ଛୁଟି ନେଇପାରିବେ। କାର୍ମିକ ରାଷ୍ଟ୍ରମନ୍ତ୍ରୀ ଜିତେନ୍ଦ୍ର ସିଂ ଗୁରୁବାର ରାଜ୍ୟ ସଭାରେ ଏନେଇ ସୂଚନା ଦେଇଛନ୍ତି। ବୃଦ୍ଧ ମାତାପିତାଙ୍କ ଯତ୍ନ ପାଇଁ କର୍ମଚାରୀ ଛୁଟି ପାଇବାର ବ୍ୟବସ୍ଥା ରହିଛି କି ବୋଲି ଏକ ପ୍ରଶ୍ନର ଉତ୍ତର ରଖି ସେ କହିଛନ୍ତି, କେନ୍ଦ୍ରୀୟ ସିଭିଲ ସର୍ଭିସେସ୍ (ଲିଭ୍) ରୁଲ୍, ୧୯୭୨ ଅନୁଯାୟୀ କେନ୍ଦ୍ର ସରକାରୀ କର୍ମଚାରୀ ୩୦ ଦିନିଆ ଅର୍ନଡ୍ ଲିଭ୍ ପାଇପାରିବେ, ଯେଉଁଥିରେ ସେମାନେ ବୃଦ୍ଧ ମାତାପିତାଙ୍କ ଯତ୍ନନେବା ପରି ଅନେକ ବ୍ୟକ୍ତିଗତ କାର୍ଯ୍ୟ କରିପାରିବେ। କର୍ମଚାରୀଙ୍କୁ ୨୦ ଦିନର ଅଧା ବେତନ ଛୁଟି ଏବଂ ୮ ଦିନର ଆକସ୍ମିକ ଛୁଟି ସୁବିଧା ମିଳୁଥିବା ସେ କହିଛନ୍ତି।
ଚିକିତ୍ସାଳୟ ୱାର୍ଡରେ ପଶିଲା ପାଣି,ଅନ୍ୟତ୍ର ସ୍ଥାନାନ୍ତର ହେଲେ ରୋଗୀ
ନନ୍ଦିଘୋଷ ବ୍ୟୁରୋ : ଉପଖଣ୍ଡ ଚିକିତ୍ସାଳୟ ୱାର୍ଡରେ ପଶିଲା ପାଣି। ଅନ୍ୟତ୍ର ସ୍ଥାନାନ୍ତର ହେଲେ ରୋଗୀ। ଅନୁଗୁଳ ଜିଲ୍ଲା ପାଲଲହଡା ଉପଖଣ୍ଡ ଚିକିତ୍ସାଳୟର ଏ ଦୃଶ୍ୟ। ଗତକାଲି ପାଳଲହଡାରେ ପ୍ରବଳ ବର୍ଷା ହୋଇଥିଲା। ଫଳରେ ଅତ୍ୟଧିକ ବର୍ଷା କାରଣରୁ ପାଣି ଉପଖଣ୍ଡ ଚିକିତ୍ସାଳୟ ମଧ୍ୟକୁ ପ୍ରବେଶ କରିଥିଲା। ଡାକ୍ତରଖାନାର ପୁରୁଣା ୱାର୍ଡରେ ବର୍ଷା ଜଳ ପ୍ରବେଶ କରିଥିଲା। ଡାକ୍ତରଖାନାରୁ ଜଳ ନିଷ୍କାସନ ବ୍ୟବସ୍ଥା ନଥିବାରୁ ଲୋକେ ନାହିଁ ନଥିବା ଅସୁବିଧାର ସମ୍ମୁଖୀନ ହୋଇଥିଲେ। ଅତ୍ୟାଧିକ ପାଣି ୱାର୍ଡ ଭିତରକୁ ପଶିବାରୁ ସ୍ଥିତି ଅସମ୍ଭାଳ ହୋଇ ପଡିଥିଲା। ଆଣ୍ଠୁଏ ପାଣିରୁ ଡାକ୍ତରଖାନା କତୃପକ୍ଷ ଉକ୍ତ ୱାର୍ଡରେ ଚିକିତ୍ସିତ ହେଉଥିବା ରୋଗୀଙ୍କୁ ଅନ୍ୟ ୱାର୍ଡକୁ ସ୍ଥାନାନ୍ତର କରିଥିଲେI ପ୍ରତି ବର୍ଷ ଏହିପରି ଘଟଣା ଘଟୁଥିଲେ ମଧ୍ୟ ସ୍ଥାନୀୟ ପ୍ରଶାସନ ପକ୍ଷରୁ କୌଣସି ପଦକ୍ଷେପ ନିଆଯାଇନଥିଲା। ଅନ୍ୟପଟେ ପୁରୁଣା ୱାର୍ଡଟି ତଳିଆ ଅଂଚଳରେ ଥିବାରୁ ଏପରି ପରିସ୍ଥିତି ଉପୁଜିଥିବା ଉପଖଣ୍ଡ ଚିକିତ୍ସା ଅଧିକାରୀ ସୂଚନା ଦେଇଛନ୍ତିI
ଚୀନ ନାଗରିକଙ୍କ ପାଇଁ ପୁଣି ଭାରତ ପର୍ଯ୍ୟଟନ ଭିସା ଜାରି କରିବାକୁ ଘୋଷଣା
ନନ୍ଦିଘୋଷ ବ୍ୟୁରୋ : ପୁଣି ଭାରତ ଆସିପାରିବେ ଚୀନ ପର୍ଯ୍ୟଟକ । ଚୀନ୍ ନାଗରିକଙ୍କ ପାଇଁ ପୁଣି ଥରେ ଭାରତ ପର୍ଯ୍ୟଟନ ଭିସା ଜାରି କରିବାକୁ ଘୋଷଣା କରିଛି। ଗାଲୱାନ୍ ଉପତ୍ୟକାରେ ସାମରିକ ସଂଘର୍ଷ ପରେ ଖରାପ ହୋଇଥିବା ପାରସ୍ପରିକ ସମ୍ପର୍କରେ ଉନ୍ନତି ଆଣିବା ପାଇଁ ଏହି ପଦକ୍ଷେପ ନିଆଯାଇଛି। ପାଞ୍ଚ ବର୍ଷ ପୂର୍ବେ ଗାଲୱାନ୍ ସଂଘର୍ଷ ପରେ ଏହାକୁ ନିଷେଧ କରାଯାଇଥିଲା। ଭାରତ ଗସ୍ତ କରିବାକୁ ଚାହୁଁଥିବା ଚୀନ୍ ନାଗରିକମାନେ ପର୍ଯ୍ୟଟନ ଭିସା ପାଇଁ ଆବେଦନ କରିପାରିବେ। ଭାରତୀୟ ଦୂତାବାସ ଏହାର ଚୀନ୍ ସୋସିଆଲ ମିଡିଆ ପ୍ଲାଟଫର୍ମରେ ଏହି ସୂଚନା ଦେଇଛି । ଚୀନ୍ ଭାରତର ଏହି ପଦକ୍ଷେପକୁ ସ୍ୱାଗତ କରିଛି । ଚୀନ୍ ବିଦେଶ ମନ୍ତ୍ରଣାଳୟର ମୁଖପାତ୍ର ଗୁଓ ଜିଆକୁନ୍ କହିଛନ୍ତି ଯେ ସୀମାପାର ଯାତ୍ରାକୁ ସହଜ କରିବା ଉଭୟ ପକ୍ଷ ପାଇଁ ଲାଭଦାୟକ। ଭାରତର ଏହି ପଦକ୍ଷେପକୁ ଆମେରିକା ପାଇଁ ଏକ ବଡ଼ ଝଟକା ବୋଲି ବିବେଚନା କରାଯାଉଛି।
ଆଜିଠୁ ବଡ଼ ବର୍ଷା, ପ୍ରବଳ ବୃଷ୍ଟିପାତ ନେଇ ୪ ଜିଲ୍ଲାକୁ ରେଡ ଓ ୭ ଜିଲ୍ଲାକୁ ଅରେଞ୍ଜ ଆଲର୍ଟ
ନନ୍ଦିଘୋଷ ବ୍ୟୁରୋ : ଲଘୁଚାପ ପ୍ରଭାବରେ ୨୯ ତାରିଖ ପର୍ଯ୍ୟନ୍ତ ବର୍ଷାରେ ଭିଜିବ ଓଡ଼ିଶା । ପ୍ରବଳ ବୃଷ୍ଟିପାତ ନେଇ ଅନେକ ଜିଲ୍ଲାକୁ ସତର୍କ ସୂଚନା ଜାରି କରିଛି ପାଣିପାଗ କେନ୍ଦ୍ର । ବଙ୍ଗୋପସାଗରରେ ସକ୍ରିୟ ରହିଛି ଲଘୁଚାପ । ଆସନ୍ତା ୨୪ ଘଣ୍ଟା ମଧ୍ୟରେ ଆହୁରି ଘନୀଭୂତ ହେବା ସମ୍ଭାବନା ରହିଛି। ଏହା ପଶ୍ଚିମ ଉତ୍ତରପଶ୍ଚିମ ଦିଗରେ ଗତିକରିବା ସହ ଉତ୍ତର ଓଡିଶା ଏବଂ ପାର୍ଶ୍ଵବର୍ତ୍ତୀ ପଶ୍ଚିମବଙ୍ଗ ଉପକୂଳମୁହାଁ ହେବ। ଆସନ୍ତା ୨୪ ଘଣ୍ଟା ପାଇଁ ବାଲେଶ୍ଵର,ଭଦ୍ରକ,ମୟୁରଭଞ୍ଜ,କେଉଁଝରରେ ପ୍ରବଳ ବର୍ଷା ଅର୍ଥାତ ୨୦ ସେଣ୍ଟିମିଟରରୁ ଅଧିକ ବର୍ଷା ହେବାର ଆଶଙ୍କା କରାଯାଇଛି। ବିଜୁଳି ଘଡଘଡି ସହ ପବନର ବେଗ ୩୦ ରୁ ୪୦ କିଲେମିଟର ରହିବା ସମ୍ଭାବନା ରହିଛି । ଏନେଇ ଏହି ସବୁ ଜିଲ୍ଲାକୁ ରେଡ ଆଲର୍ଟ ଜାରି କରାଯାଇଛି । ଏଥିସହ କେନ୍ଦ୍ରାପଡ଼ା, ଯାଜପୁର,କଟକ, ଜଗତସିଂହପୁର, ଢେଙ୍କାନାଳ,କୋରାପୁଟ,ମାଲକାନଗିରି ରେ ପ୍ରବଳରୁ ଅତି ପ୍ରବଳ ବର୍ଷା ନେଇ ଅରେଞ୍ଜ ୱାର୍ଣ୍ଣିଂ ଜାରି କରିଛି ପାଣିପାଗ କେନ୍ଦ୍ର । ବାକି ୧୨ ଜିଲ୍ଲାକୁ ୟେଲୋ ଓ୍ବାର୍ଣ୍ଣିଂ ଜାରି କରାଯାଇଛି । ପ୍ରବଳ ବୃଷ୍ଟିପାତ ଯୋଗୁ ଉପର ମୁଣ୍ଡରେ ପ୍ରବଳ ବର୍ଷା ସମ୍ଭାବନା ଥିବାରୁ ବଢିବ ନଦୀର ଜଳ ସ୍ତର। ବିଶେଷକରି ବୁଢ଼ାବଳଙ୍ଗ, ବୈତରଣୀ ଓ ସଂଲଗ୍ନ ନଦୀ ଗୁଡ଼ିକରେ ଜଳ ସ୍ତର ବଢ଼ିପାରେ ।
ବଳଙ୍ଗାରେ ନାବାଳିକାକୁ ପୋଡ଼ି ମାରିବା ଉଦ୍ୟମ ଘଟଣାରେ ରହସ୍ୟ ଖୋଲିପାରେ ରୁପା ମୁଦି
ନନ୍ଦିଘୋଷ ବ୍ୟୁରୋ : ବଳଙ୍ଗାରେ ନାବାଳିକାକୁ ପୋଡ଼ି ମାରିବା ଉଦ୍ୟମ ଘଟଣାରେ ତନାଘନା। ରହସ୍ୟ ଖୋଲିପାରେ ରୁପା ମୁଦି। ଘଟଣାସ୍ଥଳରୁ ମିଳିଥିବା ରୁପା ମୁଦିଟି ବଳଙ୍ଗା ବଜାରରେ ଥିବା କ୍ରିଷ୍ଣା ଜୁଏଲାରୀରୁ କିଣା ଯାଇଥିବା ସୂଚନା ମିଳିବା ପରେ, ଏବେ କ୍ରିଷ୍ଣା ଜୁଏଲାରୀ ମାଲିକଙ୍କୁ ଉଠାଇ ନେଇ ପଚରାଉଚରା କରୁଛି ପୋଲିସ। ପଚାରଉଚରା ସମୟରେ ପୋଲିସକୁ ମିଳିପାରେ ବଡ଼ ସୁରାକ । ସୁନା ଦୋକାନୀ ମାଲିକଙ୍କୁ ଥାନାରେ ଅଟକ ରଖିଥିବା ବେଳେ, ରୁପା ମୁଦି କିଏ କିଣିଥିଲା, ସେନେଇ ଜେରା ଚାଲିଛି। ଘଟଣାସ୍ଥଳରୁ ମିଳିଥିବା ରୁପା ମୁଦି ଏବେ ପ୍ରକୃତ ଘଟଣାର ରହସ୍ୟ ଖୋଲିବ ବୋଲି ବିଶେଷ ସୂତ୍ରରୁ ସୂଚନା ମିଳିଛି। ସେପଟେ କ୍ରିଷ୍ଣା ଜୁଏଲାରୀ ମାଲିକଙ୍କୁ ପଚାରିବାରୁ, ଏନେଇ କିଛି କହିବାକୁ ମନା କରି ଦେଇଛନ୍ତି। ଯାହାକୁ ନେଇ ସନ୍ଦେହ ଆହୁରି ଘନୀଭୂତ ହୋଇଛି।
ବଳଙ୍ଗା ଘଟଣାକୁ ବିତିଲା ୬ ଦିନ, ଅଭିଯୁକ୍ତଙ୍କ ଟେର ପାଉନି ପୋଲିସ: ଅଜଣା ଭୟରେ ପୂରା ଗାଁ
ନନ୍ଦିଘୋଷ ବ୍ୟୁରୋ: ବଳଙ୍ଗା ଘଟଣାକୁ ବିତିଲାଣି ୬ ଦିନ । ପ୍ରତିଦିନ ୟାକୁ ତାକୁ ପଚରାଉଚରାରେ ଯାଉଛି ଦିନ । ହେଲେ ଅଭିଯୁକ୍ତଙ୍କ ବାବଦରେ ଟିକିଏ ବି ସୁରାକ ପାଉନି ପୋଲିସ । ଅନ୍ୟପଟେ ଘଟଣାକୁ ନେଇ ସ୍ତବ୍ଦ ହୋଇଯାଇଛି ପୂରା ଗାଁ । ନା ପୀଡ଼ିତାଙ୍କ ଘରେ ଚୁଲି ଜଳୁଛି, ନା କାହାର ମନ ଭଲ ଅଛି । ଅନ୍ୟପଟେ ଦିଲ୍ଲୀ ଏମ୍ସରେ ଝିଅର ଚିକିତ୍ସା ଚାଲିଛି । ଆଜି ସ୍କିନ ଗ୍ରାଫ୍ଟିଂ କରାଯାଉଛି । ପୁଣି ଥରେ ପୀଡ଼ିତାଙ୍କ ବୟାନ ରେକର୍ଡ କରିବାକୁ ଦିଲ୍ଲୀରେ ଡେରା ପକାଇଛି କ୍ରାଇମବ୍ରାଞ୍ଚ ଟିମ୍ ।
ପୁରୀ ଜିଲ୍ଲା ବଳଙ୍ଗା ଥାନା ନୂଆ ଗୋପାଳପୁର ଗାଁ ଏବେ ପୂରା ସ୍ତବ୍ଦ । ଅଜଣା ଭୟରେ ଅଛି ପୂରା ଗାଁ । ପିଲାଙ୍କୁ ସ୍କୁଲ କି ଟ୍ୟୁସନ ଛାଡିବାକୁ ବି ଭୟ କରୁଛନ୍ତି ଗାଁ ଲୋକେ । ଏଭଳି ଏକ ସ୍ଥିତିରେ ସମସ୍ତେ ଅପେକ୍ଷା କରିଛନ୍ତି, କେବେ ପୋଲିସ ସେଇ ୩ ଦୁର୍ବୃତ୍ତଙ୍କୁ ଗିରଫ କରିବ । ପୋଲିସର ତଦନ୍ତ ପ୍ରକ୍ରିୟାର ଶିଥିଲତାକୁ ନେଇ ଅସନ୍ତୋଷ ପ୍ରକାଶ କରିଛନ୍ତି ଗାଁ ଲୋକେ ।
ସେପଟେ ଆଜି ଦିଲ୍ଲୀ ଏମ୍ସରେ ପୀଡିତାଙ୍କର ସ୍କିନ ଗ୍ରାଫ୍ଟିଂ କରାଯାଇଥିବା ଜଣାପଡିଛି । ପୀଡିତାଙ୍କ ବୟାନ ରେକର୍ଡ ପାଇଁ ମଧ୍ୟ କ୍ରାଇମବ୍ରାଞ୍ଚ ଦିଲ୍ଲୀରେ ପହଞ୍ଚିଛି । ଡାକ୍ତରଙ୍କ ଅନୁମତି ନେଇ ପୀଡିତାଙ୍କ ବୟାନ ରେକର୍ଡ କରିବ କ୍ରାଇମବ୍ରାଞ୍ଚ । ଗାଁରେ ମାଆ, ଦାଦା, ଝିଅ ସହ କଥା ପଦେ ହୋଇ ପାରୁନାହାଁନ୍ତି । ଅଭିଯୁକ୍ତଙ୍କୁ ଶୀଘ୍ର ଧରି ଫାଶୀ ଦଣ୍ଡ ଦେବାକୁ ଦାବି କରିଛନ୍ତି ପୀଡିତାଙ୍କ ମା ।
ତଦନ୍ତ ପରେ ତଦନ୍ତ ଚାଲିଛି । ହେଲେ ଖିଅ ପାଉନି ପୋଲିସ । ପ୍ରତିଦିନ କାହାକୁ ନା କାହାକୁ ପଚରାଉଚରା କରାଯାଉଛି । କିନ୍ତୁ ଯେଉଁମାନେ ଏଭଳି କାଣ୍ଡ ଭିଆଇଥିଲେ ସେମାନଙ୍କୁ ଧରିବାରେ ବିଫଳ ହୋଇଛି ପୋଲିସ ।
୫ ବର୍ଷ ଭିତରେ କେନ୍ଦ୍ରୀୟ ସ୍ତରରେ କେତେ ସଂଖ୍ୟାରେ ସାଧାରଣ ଲୋକଙ୍କ ଅଭିଯୋଗ ଶୁଣାଣି ହୋଇ ପ୍ରତିବିଧାନ ହୋଇଛି: ମାନସ ମଙ୍ଗରାଜ
ନନ୍ଦିଘୋଷ ବ୍ୟୁରୋ: ଗତ ୫ ବର୍ଷ ଭିତରେ କେତେ ସଂଖ୍ୟାରେ କେନ୍ଦ୍ରୀୟ ସ୍ତରରେ ସାଧାରଣ ଲୋକଙ୍କ ଅଭିଯୋଗ ଶୁଣାଣି ହୋଇ ପ୍ରତିବିଧାନ କରାଯାଇଛି ? ଅଭିଯୋଗ ଦାଖଲ ଦିନଠାରୁ କେତେ ଦିନ ଭିତରେ ସମସ୍ୟାର ସମାଧାନ କରାଯାଇଛି ? ଏସବୁ ପ୍ରତିବିଧାନରେ ଲୋକେ ସନ୍ତୁଷ୍ଟ ନା ନାହିଁ ? ପଞ୍ଜିକୃତ ଅଭିଯୋଗର ପ୍ରତିବିଧାନ କ୍ଷେତ୍ରରେ ସ୍ବଚ୍ଛତା ଓ ଉତ୍ତରଦାୟୀ କାର୍ଯ୍ୟାନୁଷ୍ଠାନ ନିଆଯାଉଛି ନା ନାହିଁ ? ଆଜି ରାଜ୍ୟସଭାରେ ଅଣତାରକା ପ୍ରଶ୍ନରେ କେନ୍ଦ୍ର ସରକାରଙ୍କୁ ଏପରି ପଚାରିଛନ୍ତି ରାଜ୍ୟସଭା ସାଂସଦ ମାନସ ମଙ୍ଗରାଜ ।
ସିପିଗ୍ରାମସ୍ ବା କେନ୍ଦ୍ରୀୟ ଅଭିଯୋଗ ପ୍ରତିବିଧାନ ବ୍ୟବସ୍ଥା ୨୦୨୨ ଏପ୍ରିଲରେ ଆରମ୍ଭ ହେଲା । ଏଥିରେ ୧୦ଟି ସଂସ୍କାର କାର୍ଯ୍ୟକ୍ରମ ହାତକୁ ନିଆଯାଇଛି । ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ ଦାୟିତ୍ବରେ ଥିବା ମନ୍ତ୍ରୀ ଡ. ଜିତେନ୍ଦ୍ର ସିଂହ ଉତ୍ତର ଦେଇ କହିଛନ୍ତି ଯେ, ୨୦୨୨, ୨୦୨୩, ୨୦୨୪ ଓ ୨୦୨୫ର ଏବେ ସୁଦ୍ଧା ୮୦ ଲକ୍ଷ ୩୬ ହଜାର ୪୨ଟି ଅଭିଯୋଗ ପଞ୍ଜିକୃତ ହୋଇଥିଲା । ଅଭିଯୋଗ ପ୍ରତିବିଧାନ ପାଇଁ ନିୟୋଜିତ ହୋଇଛନ୍ତି ୧ ଲକ୍ଷ ୫ ହଜାର ୬୮୧ ଜଣ ଅଧିକାରୀ । ଅଭିଯୋଗ ପଞ୍ଜିକୃତ ହେବାର ୨୮ ଦିନ ଭିତରେ ସମାଧାନ କରିବାକୁ ୨୦୧୯ରେ ବ୍ୟବସ୍ଥା ଥିଲା । ଏବେ ତାକୁ ହ୍ରାସ କରି ୧୬ଦିନ କରାଯାଇଛି । ଫଳରେ ୨୦୨୫ ଜୁନ୍ ସୁଦ୍ଧା ଅଭିଯୋଗ ସଂଖ୍ୟା ହ୍ରାସ ପାଇ ମାତ୍ର ୬୨ ହଜାର ୬୨୦ରେ ପହଞ୍ଚିଛି । ୨୦୨୪ ଅଗଷ୍ଟ ୨୩ରେ କେନ୍ଦ୍ର ସରକାରଙ୍କ ପକ୍ଷରୁ ତ୍ବରିତ ଅଭିଯୋଗ ପ୍ରତିବିଧାନ ପାଇଁ ସ୍ବତନ୍ତ୍ର ବିସ୍ତୃତି ମାର୍ଗଦର୍ଶିକା ଜାରି କରାଯାଇଛି । ଯେଉଁଥିରେ ୩୦ ଦିନରୁ ୨୧ ଦିନ ଭିତରେ ଅଭିଯୋଗ ସମାଧାନ ହୋଇପାରୁଛି । ଅଭିଯୋଗ ପ୍ରତିବିଧାନ ପାଇଁ ସମସ୍ତ ମନ୍ତ୍ରାଳୟରେ ସ୍ବତନ୍ତ୍ର ସମନ୍ବିତ ଅଭିଯୋଗ ପ୍ରତିବିଧାନ ପ୍ଲାଟଫର୍ମ, ସ୍ବତନ୍ତ୍ର ସେଲ, ସ୍ବତନ୍ତ୍ର ନୋଡାଲ ଅଧିକାରୀଙ୍କୁ ନିଯୁକ୍ତି ଦିଆଯାଇଛି ।
ଏହାସହିତ ଅଭିଯୋଗ ସମାଧାନ ନେଇ ଲୋକଙ୍କ ମତାମତ ମଧ୍ୟ ସଂଗ୍ରହ କରାଯାଉଛି । ୨୦୨୫ ଜୁନ ୩୦ ସୁଦ୍ଧା ଫିଡବ୍ୟାକ କଲ ସେଣ୍ଟର ଯୋଗେ ୨୩ ଲକ୍ଷ ମତାମତ ସଂଗ୍ରହ କରାଯାଇଥିଲା । ଯଦି କୌଣସି ବ୍ୟକ୍ତି ଅଭିଯୋଗ ପ୍ରତିବିଧାନରେ ସନ୍ତୁଷ୍ଟ ନ ହୁଅନ୍ତି, ତା’ହେଲେ ଅପିଲ କରିବା ପାଇଁ ବ୍ୟବସ୍ଥା କରାଯାଇଛି । ଏଥିପାଇଁ ୯୦ଟି ଆପିଲେଟ୍ ଅଥରିଟି ସମେତ ୧୫୯୭ଟି ସବ୍ ଆପିଲେଟ୍ ଅଥରିଟି ଗଠିତ ହୋଇଛି । ୨୦୨୨ରୁ ଜୁନ୍ ୨୦୨୫ ଯାଏଁ ସମୁଦାୟ ୭ ଲକ୍ଷ ୭୫ ହଜାର ୨୪୦ଟି ଅପିଲ ମାମଲାର ସମାଧାନ କରାଯାଇଥିବା ମନ୍ତ୍ରୀ ଜିତେନ୍ଦ୍ର ସିଂ ଉତ୍ତରରେ ଉଲ୍ଲେଖ କରିଛନ୍ତି ।
ମହାନଦୀ ବିବାଦ ଆପୋଷ ଆଲୋଚନା ମାଧ୍ୟମରେ ସମାଧାନକୁ ନେଇ ଜୋର ଧରିଲା ରାଜନୀତି
ନନ୍ଦିଘୋଷ ବ୍ୟୁରୋ: ଆପୋଷ ଆଲୋଚନା ମାଧ୍ୟମରେ ମହାନଦୀ ଜଳ ବିବାଦର ସମାଧାନ କରାଯିବ । ମୁଖ୍ୟମନ୍ତ୍ରୀଙ୍କ ଆଲୋଚନା ପରେ ଏହାକୁ ନେଇ ଜୋର ଧରିଛି ରାଜନୀତି । ଅଣ ମୌସୁମୀ ସମୟରେ ଓଡ଼ିଶାର ଯେତିକି ପାଣି ଆବଶ୍ୟକ ତାକୁ ପ୍ରଥମେ ସୁନିଶ୍ଚିତ କରାଯାଉ । ନଚେତ ଆଲୋଚନାର କୌଣସି ମୂଲ୍ୟ ନାହିଁ ବୋଲି କହିଛି ମହାନଦୀ ବଞ୍ଚାଅ ଆନ୍ଦୋଳନ । ସେପଟେ ପ୍ରମୁଖ ରାଜନୈତିକ ଦଳ ଗୁଡିକ ମଧ୍ୟ ଏ ପ୍ରସଙ୍ଗରେ ସ୍ବର ଉଠାଇଛନ୍ତି ।
ମହାନଦୀ ଜଳବିବାଦର ସମାଧାନ ପାଇଁ ଉଚ୍ଚସ୍ତରୀୟ ବୈଠକର ମାନେ କ’ଣ ? ଦୁଇ ରାଜ୍ୟ ମଧ୍ୟରେ ଆପୋଷ ଆଲୋଚନା ଦ୍ବାରା କ’ଣ ସୁଫଳ ମିଳିବ ? ପ୍ରଥମେ ଅଣ ମୌସୁମୀ ସମୟରେ ଓଡ଼ିଶାକୁ ଆବଶ୍ୟକ ଥିବା ପାଣି ସୁନିଶ୍ଚିତ କରିବାକୁ ବିରୋଧୀ କରିଛନ୍ତି ଦାବି । ଦୀର୍ଘ ଦିନର ସମସ୍ୟାର ଶୀଘ୍ର ସମାଧାନ ପାଇଁ ସ୍ବର ଉଠାଇଛି ମହାନଦୀ ବଞ୍ଚାଅ ଆନ୍ଦୋଳନ । ଓଡ଼ିଶାବାସୀ ଆପୋଷ ସମାଧାନର ଆଧାର କ’ଣ ତାହା ଜାଣିବା ଦରକାର । ଗତ ଜୁଲାଇ ୧୭ ତାରିଖରେ ମହାନଦୀ ଟ୍ରିବ୍ୟୁନାଲ ସମ୍ମୁଖରେ ଓଡ଼ିଶାର ଆଡଭୋକେଟ୍ ଜେନେରାଲ ଆପୋଷ ସମାଧାନ ପାଇଁ ଓଡ଼ିଶା ଓ ଛତିଶଗଡ଼ ଭିତରେ ଆଲୋଚନାର ଅଗ୍ରଗତି ହୋଇଛି ବୋଲି କହିଥିଲେ । ମାତ୍ର ଛତିଶଗଡର ଆଡଭୋକେଟ ଜେନେରାଲ ଏହାକୁ ଖଣ୍ଡନ କରିଛନ୍ତି ବୋଲି ଖବର ପ୍ରକାଶ ପାଇଛି l ତେଣୁ କିଏ ସତ କହୁଛି, ତାହା ଓଡ଼ିଶାବାସୀଙ୍କ ଭିତରେ ପ୍ରଶ୍ନ ସୃଷ୍ଟି କରିଛି ।
ଆସନ୍ତା ଅଗଷ୍ଟ ୨ ତାରିଖରେ ମହାନଦୀ ଟ୍ରିବ୍ୟୁନାଲର ପରବର୍ତ୍ତୀ ଶୁଣାଣି । ଏହି ପରିପ୍ରେକ୍ଷୀରେ ମହାନଦୀ ବଞ୍ଚାଅ ଆନ୍ଦୋଳନର ଏକ ଗୁରୁତ୍ବପୂର୍ଣ୍ଣ ଆଲୋଚନା ସଭା ଭୁବନେଶ୍ୱରରେ ଆୟୋଜିତ ହେବ ବୋଲି କୁହାଯାଇଛି । ସେପଟେ ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ସମୟରେ ମହାନଦୀ ପ୍ରସଙ୍ଗରେ ପ୍ରତିବାଦର ସ୍ବର ଭୁବନେଶ୍ୱରରୁ ଦିଲ୍ଲୀ ପର୍ଯ୍ୟନ୍ତ ପ୍ରତିଫଳିତ ହୋଇଥିଲା । କିନ୍ତୁ କେନ୍ଦ୍ର ସରକାର ଏହାକୁ ଅବହେଳା ଓ ଅଣଦେଖା କରିଥିବା ଅଭିଯୋଗ ହୋଇଛି ।
ମହାନଦୀ ପ୍ରସଙ୍ଗରେ ବାହାବା ନେବା ପାଇଁ ବିଜେପି ମହାନଦୀ କଥା କହୁଥିବା କହିଛି କଂଗ୍ରେସ । ବର୍ତ୍ତମାନ ରାଜ୍ୟର ବିପର୍ଯ୍ୟସ୍ତ ସ୍ଥିତିରୁ ନଜର ହଟାଇବା ପାଇଁ ସରକାର ମହାନଦୀ ସମସ୍ୟାର ସମାଧାନ କଥା କହିଛନ୍ତି । ସେପଟେ ଛତିଶଗଡ ପ୍ରଶାସନିକ ଅଧିକାରୀଙ୍କ ସହ ଆଲୋଚନା ହେଲାଣି । କେତେ ପାଣି କେତେବେଳେ ଛାଡିବେ, କେଉଁ ସମୟରେ କେତେ ପାଣିର ଆବଶ୍ୟକତା ଓ କର୍ଭ ରୁଲ ସମ୍ପର୍କରେ ଛତିଶଗଡ଼ ସହ ଆଲୋଚନା ହୋଇଛି ବୋଲି କହିଛନ୍ତି ରାଜସ୍ୱ ମନ୍ତ୍ରୀ ।
ଗତ ମାର୍ଚ୍ଚ ମାସରେ ଭୁବନେଶ୍ୱରରେ ଛତିଶଗଡ଼ ମୁଖ୍ୟମନ୍ତ୍ରୀ ବିଷ୍ଣୁଦେଓ ସାଏ ଏବଂ ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ମଧ୍ୟରେ ମହାନଦୀକୁ ନେଇ ଆଲୋଚନା ହୋଇଥିଲା । ଉଭୟ ମୁଖ୍ୟମନ୍ତ୍ରୀ ଏହାର ଆପୋଷ ସମାଧାନ ଉପରେ ଗୁରୁତ୍ୱାରୋପ କରିଥିବା କୁହାଯାଇଥିଲା ।
ନବୀନଙ୍କ ପ୍ରଶ୍ନ: ମହାନଦୀ ବିବାଦର ସମାଧାନ ପାଇଁ ରାଜ୍ୟ ସରକାର ରୁଦ୍ଧଦ୍ବାର ଡିଲ କରିଛନ୍ତି କି ?
ନନ୍ଦିଘୋଷ ବ୍ୟୁରୋ: ମହାନଦୀ ବିବାଦର ସମାଧାନ ପାଇଁ ରାଜ୍ୟ ସରକାର ରୁଦ୍ଧଦ୍ବାର ଡିଲ କରିଛନ୍ତି କି ? ରାଜ୍ୟ ବିଜେପି ସରକାର ଆଉ ଏକ ବିଜେପି ସରକାର ସହ ଗୁପ୍ତ ବୁଝାମଣା କରି ଓଡିଶାର ଜଳ ଅଧିକାରକୁ ଗୌଣ କରିଦିଆଯାଉଛି କି ? ଗତକାଲି ଦୁଇ ରାଜ୍ୟ ମଧ୍ୟରେ ଆପୋଷ ବୁଝାମଣା ଜରିଆରେ ମହାନଦୀ ବିବାଦର ସମାଧାନ ପାଇଁ ମୁଖ୍ୟମନ୍ତ୍ରୀଙ୍କ ଘୋଷଣା ପରେ ଏଭଳି ପ୍ରଶ୍ନ କରିଛନ୍ତି ବିରୋଧୀ ଦଳ ନେତା ନବୀନ ପଟ୍ଟନାୟକ ।
ସୋସିଆଲ ମଡିଆରେ ନବୀନ ମହାନଦୀ ପ୍ରସଙ୍ଗରେ ଓଡିଶାର ହକକୁ ନ୍ୟୁନ କରିବାକୁ ହେଉଥିବା ଉଦ୍ୟମକୁ ନେଇ ବର୍ଷିଛନ୍ତି ନବୀନ । ରାଜ୍ୟ ସରକାର ଆଇନ ଗତ ଲଢେଇରୁ ଓହିରି ଯାଇଛନ୍ତି କି ବୋଲି ନବୀନ ପ୍ରଶ୍ନ କରିବା ସହ ତୁରନ୍ତ ସର୍ବଦଳୀୟ ବୈଠକ ଡାକି ଛତିଶଗଡ ସହ କେଉଁ ପ୍ରକାର ବୁଝାମଣା ହୋଇଛି ତାହା ସ୍ପଷ୍ଟ କରିବାକୁ ଦାବି କରିଛନ୍ତି । ମହାନଦୀ ଜଳ ବିବାଦ ଟ୍ରିବ୍ୟୁନାଲରେ ରାଜ୍ୟ ସରକାର ଆଇନଗତ ଲଢେଇ ଲଢିବେ ନା ନାହିଁ ତାହା ମଧ୍ୟ ସ୍ପଷ୍ଟ କରିବାକୁ ନବୀନ ଦାବି କରିଛନ୍ତି ।
ଅଗଷ୍ଟ ୨ ତାରିଖରେ ଟ୍ରିବ୍ୟୁନାଲରେ ପରବର୍ତ୍ତି ଶୁଣାଣି ଥିବାରୁ ସରକାର ଏବେଠୁ ନିଜର ଆଭିମୁଖ୍ୟ ସ୍ପଷ୍ଟ କରିବାକୁ ସେ ଦାବି କରିଛନ୍ତି । ରାଜ୍ୟବାସୀ, ସବୁ ରାଜ୍ୟ ରାଜନୈତିକ ଦଳ ସମସ୍ତଙ୍କୁ ବିଶ୍ବାସକୁ ନେବା କଥା ସରକାର । କାରଣ ମହାନଦୀ କେବଳ ଏକ ନଦୀ ନୁହେଁ, ଏହା ରାଜ୍ୟର ଆତ୍ମା । ତେଣୁ ମହାନଦୀ ବିବାଦରେ ସରକାର ସ୍ବଚ୍ଛତା ଅବଲମ୍ବନ କରିବା ଉଚିତ ବୋଲି ନବୀନ କହିଛନ୍ତି । ତତ୍କାଳୀନ ରାଜ୍ୟ ସରକାରଙ୍କ ପିଟିସନ ଆଧାରରେ ୨୦୧୮ ଜାନୁଆରୀ ୨୩ ତାରିଖରେ ସୁପ୍ରିମକୋର୍ଟ କେନ୍ଦ୍ର ସରକାରଙ୍କୁ ମହାନଦୀ ଜଳ ବିବାଦ ଟ୍ରିବ୍ୟୁନାଲ ଗଠନ କରିବାକୁ ନିର୍ଦ୍ଦେଶ ଦେଇଥିଲେ । ବିଜେଡିର ନିୟମିତ ଦାବି ଫଳରେ କେନ୍ଦ୍ର କ୍ୟାବିନେଟ ଟ୍ରିବ୍ୟୁନାଲ ଗଠନ ପାଇଁ ରାଜି ହୋଇଥିଲେ ଓ ମାର୍ଚ୍ଚ ୧୨ ତାରିଖରେ କେନ୍ଦ୍ର ସରକାର ଟ୍ରିବ୍ୟୁନାଲ ଗଠନ କରିଥିଲେ । କିନ୍ତୁ ବର୍ତ୍ତମାନ ଦେଖିବାକୁ ମିଳୁଛି, ବିଜେଡି ସରକାର ଯେଉଁ କଷ୍ଟ କରି ଆଇନଗତ ଲଢେଇ ଆରମ୍ଭ କରିଥିଲା ତାକୁ ଦୁର୍ବଳ କରିଦେବାକୁ ଚେଷ୍ଟା କରାଯାଉଛି । ରାଜ୍ୟ ସରକାର ରାଜ୍ୟବାସୀଙ୍କୁ ବିଶ୍ବାସକୁ ନନେଇ କେଉଁ ପ୍ରକାର ଓଡିଶାର ଆପୋଷ ବୁଝାମଣା କରୁଛନ୍ତି ତାହା ମଧ୍ୟ ସ୍ପଷ୍ଟ କରିନାହାଁନ୍ତି । ରାଜ୍ୟର ସ୍ବାର୍ଥକୁ ରୁଦ୍ଧଦ୍ବାର ଡିଲରେ ପାଣିଚିଆ କରାଯାଉଛି କି ବୋଲି ନବୀନ ପ୍ରଶ୍ନ କରିବା ସହ ଏନେଇ ରାଜ୍ୟ ସରକାର ଏ ଦିଗରେ ସମ୍ପୂର୍ଣ୍ଣ ସ୍ବଚ୍ଛତାର ସହ ଉତ୍ତର ଦେବାକୁ ଦାବି କରିଛନ୍ତି ।
ଇଣ୍ଡିଆ-ଇଂଲଣ୍ଡ ଟେଷ୍ଟକୁ ନେଇ ବଡ଼ ଅପଡେଟ; ଆହତ ସତ୍ତ୍ବେ ବ୍ୟାଟିଂ କରିବେ ପନ୍ତ
ନନ୍ଦିଘୋଷ ବ୍ୟୁରୋ: ଭାରତ ଓ ଇଂଲଣ୍ଡ ମଧ୍ୟରେ ଟେଷ୍ଟ ସିରିଜ ଚାଲିଛି । ଲଡର୍ସ ପରି ମଞ୍ଚେଷ୍ଟରରେ ବି ଆହତ ହୋଇଛନ୍ତି ଭାରତର ଓ୍ବିକେଟ କିପର ବ୍ୟାଟର ରିଷଭ ପନ୍ତ । ଆହତ ସତ୍ତ୍ବେ ସେ ଲଡର୍ସରେ ବ୍ୟାଟିଂ କରିଥିଲେ ବି ମଞ୍ଚେଷ୍ଟରରେ ବ୍ୟାଟିଂ କରିବାକୁ ନେଉ ପ୍ରଶ୍ନ ଉଠିବାରେ ଲାଗିଥିଲା । କାରଣ ଏଥର ତାଙ୍କ ଆହତ ସମସ୍ୟା ଗମ୍ଭୀର ରହିଛି । ହେଲେ ଆଜି ମ୍ୟାଚର ଦ୍ବିତୀୟ ଦିନର ଖେଳ ଆରମ୍ଭ ହେବା ସହ ପନ୍ତଙ୍କୁ ପୂରା ପ୍ରସ୍ତୁତ ହୋଇ ଷ୍ଟାଡିୟମକୁ ଆସିବା ଦେଖିବାକୁ ମିଳିଛି । ଏହାକୁ ନେଇ ବିସିସିଆଇ ଏକ ବଡ଼ ଅପଡେଟ୍ ସେୟାର କରି କହିଛି, ଟିମର ଆବଶ୍ୟକତା ଅନୁସାରେ ପନ୍ତ ବ୍ୟାଟିଂ ପାଇଁ ଉପଲବ୍ଧ ହେବେ ।
ଗତକାଲି ଆରମ୍ଭ ହୋଇଥିବା ମଞ୍ଚେଷ୍ଟର ଟେଷ୍ଟର ପ୍ରଥମ ଶେଷ ବେଳକୁ ଏକ ସର୍ଟ ଖେଳିବାକୁ ଚେଷ୍ଟା କରିବା ବେଳେ ପନ୍ତଙ୍କ ଡାହାଣ ଗୋଡରେ ବଲ ବାଜିଥିଲା । ଏଥିପାଇଁ ତାଙ୍କୁ ରିଟାୟାର୍ଡ ହଟ୍ ହୋଇ ଫିଲ୍ଡ ବାହାରକୁ ଯିବାକୁ ପଡ଼ିଥିଲା । ରିପୋର୍ଟ ଅନୁସାରେ, ପନ୍ତଙ୍କ ଗୋଡ଼ର ସ୍କାନ କରାଯିବା ପରେ ଫ୍ୟାକ୍ଚର ହୋଇଥିବା ଜଣାପଡ଼ିଛି । ତେବେ ଆଜି ପନ୍ତଙ୍କୁ ପୂରା ପ୍ରସ୍ତତି ସହ ଷ୍ଟାଡିୟମରେ ଦେଖିବାକୁ ମିଳିଛି । ତାଙ୍କ ଗୋଡରେ ଏକ କଭର ଲାଗିଥିବା ଦେଖିବାକୁ ମିଳିଛି । ଏହାସହ ବିସିସିଆଇ ପକ୍ଷରୁ କୁହାଯାଇଛି, ଆବଶ୍ୟକ ପଡ଼ିଲେ ପନ୍ତ ବ୍ୟାଟିଂ ପାଇଁ ଉପଲବ୍ଧ ରହିବେ ।