ନୂଆଦିଲ୍ଲୀ: ପୁଣି ସୃଷ୍ଟି ହୋଇପାରେ ଭାରତ ଓ ଚୀନ ମଧ୍ୟରେ ଉତ୍ତେଜନା। ସୀମାରେ ବିପୁଳ ସୈନ୍ୟ ମୁତୟନକୁ ନେଇ ଚୀନ ଉପରେ କ୍ଷୁବ୍ଧ ଭାରତ। ଦ୍ୱିପାକ୍ଷିକ ରାଜିନାମାର ଏହା ଉଲ୍ଲଂଘନ ବୋଲି କହିଛି ଭାରତ। ଗତବର୍ଷ ପୂର୍ବ ଲଦାଖସ୍ଥିତ ପ୍ରକୃତ ନିୟନ୍ତ୍ରଣ ରେଖା ବା ଏଲଏସିରେ ଘଟିଥିବା ସଂଘର୍ଷ ପରେ ଦୁଇ ଦେଶ ମଧ୍ୟରେ ଏକ ରାଜିନାମା ହୋଇଥିଲା। ମାତ୍ର ବର୍ତ୍ତମାନ ସୀମାରେ ସୈନ୍ୟ ମୁତୟନକୁ କେନ୍ଦ୍ର କରି ଭାରତ କ୍ଷୁବ୍ଧ ହୋଇଛି। ଭାରତର ପ୍ରତିବାଦ ପରେ ଚୀନ କହିଛି ଏହି ସୈନ୍ୟ ମୁତୟନ ଏକ ନିୟମିତ ପ୍ରକ୍ରିୟା ଏବଂ ଜବରଦଖଲ ଓ ଅନ୍ୟାନ୍ୟ ବିପଦର ମୁକାବିଲା ଲାଗି ଉଦ୍ଦିଷ୍ଟ। ଚୀନର ଏହି ତଥାକଥିତ ଯୁକ୍ତି ପରେ ପୁଣି ଦୁଇ ଦେଶ ମଧ୍ୟରେ ଉତ୍ତେଜନା ଦେଖାଦେବାର ଆଶଙ୍କା କରାଯାଉଛି। ବୈଦେଶିକ ବ୍ୟାପାର ମନ୍ତ୍ରଣାଳୟର ମୁଖପାତ୍ର ଅରିନ୍ଦମ ବାଗଚୀ କହିଛନ୍ତି, ଗତବର୍ଷ ସୀମାରେ ଚୀନ ପକ୍ଷରୁ ସୁଚିନ୍ତିତ ଭାବେ ଆକ୍ରମଣ କରାଯାଇଥିଲା। ବର୍ତ୍ତମାନ ବି ସୀମାରେ ସେହି ଢଙ୍ଗରେ ସୈନ୍ୟ ମୁତୟନ ଯୋଗୁ ଶାନ୍ତି ଓ ସ୍ଥିରତା ବାଧାପ୍ରାପ୍ତ ହୋଇପାରେ। ଚୀନର ଏହି ପଦକ୍ଷେପ ଦ୍ୱିପାକ୍ଷିକ ରାଜିନାମାକୁ ଉଲ୍ଲଂଘନ କରୁଛି ବୋଲି ସେ କହିଛନ୍ତି। ପୂର୍ବରୁ ବି ୧୯୯୩ ଓ ୧୯୯୬ରେ ହୋଇଥିବା ବିଭିନ୍ନ ରାଜିନାମାକୁ ଚୀନ ଜାଣିଶୁଣି ଉଲ୍ଲଂଘନ କରିଛି।
ଦେଶରେ ୨୪ ଘଣ୍ଟାରେ ୫୧ ହଜାର ୬୬୭ ସଂକ୍ରମିତ ଚିହ୍ନଟ
ନୂଆଦିଲ୍ଲୀ: ଦେଶରେ ଆକ୍ରାନ୍ତଙ୍କ ଠାରୁ ସୁସ୍ଥ ହେଉଛନ୍ତି ଅଧିକ ସଂକ୍ରମିତ । ୨୪ ଘଣ୍ଟାରେ ୫୧ ହଜାର ୬୬୭ ସଂକ୍ରମିତ ଚିହ୍ନଟ ହୋଇଥିବା ବେଳେ ୬୪ ହଜାର ୫୨୭ ଜଣ ସୁସ୍ଥ ହୋଇଛନ୍ତି । ୧ ହଜାର ୩୨୯ ଜଣକ ଜୀବନ ନେଇଛି କରୋନା । ଦେଶରେ ଆକଟିଭ୍ କେସ ୬ ଲକ୍ଷ ୧୨ ହଜାର ୮୬୮ରେ ପହଞ୍ଚିଛି । ମୋଟ ୨ କୋଟି ୯୧ ଲକ୍ଷ ୨୮ ହଜାର ୨୬୭ ଜଣ କରୋନାରେ ସୁସ୍ଥ ହୋଇଛନ୍ତି । ୩ ଲକ୍ଷ ୯୩ ହଜାର ୩୧୦ ଜଣକ ମୃତ୍ୟୁ ହୋଇଛି । ସାରା ଦେଶରେ କରୋନାରେ ୩ କୋଟି ୧ ଲକ୍ଷ ୩୪ ହଜାର ୪୪୫ ଜଣ ସଂକ୍ରମିତ ହୋଇଛନ୍ତି । ଏବେ ସୁଦ୍ଧା ୩୦ କୋଟି ୭୯ ଲକ୍ଷ ୪୮ ହଜାର ୭୪୪ ଜଣ କରୋନା ଟିକା ନେଇସାରିଛନ୍ତି ।
ଗତ ୨୪ ଘଣ୍ଟା ମଧ୍ୟରେ ପାଞ୍ଚଟି ରାଜ୍ୟ ତଥା କେନ୍ଦ୍ରଶାସିତ ଅଞ୍ଚଳରେ ଚିକିତ୍ସିତ ହେଉଥିବା ରୋଗୀଙ୍କ ସଂଖ୍ୟାରେ ବୃଦ୍ଧି ଘଟିଛି। ତାମିଲନାଡୁ ଏବଂ ଆନ୍ଧ୍ରପ୍ରଦେଶରେ ସକ୍ରିୟ ମାମଲା ସଂଖ୍ୟା ୫୦ ହଜାରରୁ କମ୍ ହୋଇଛି। ଏହାସହ ମହାରାଷ୍ଟ୍ର, କେରଳ ଏବଂ କର୍ଣ୍ଣାଟକ ହେଉଛି ତିନୋଟି ରାଜ୍ୟ ଯେଉଁଠାରେ ୫୦ ହଜାରରୁ ଅଧିକ ସକ୍ରିୟ ମାମଲା ରହିଛି । ତେବେ କେରଳରେ ୧୨ ହଜାରରୁ ଅଧିକ ନୂଆ ମାମଲା ଚିହ୍ନଟ ହୋଇଛନ୍ତି ।
ମହାରାଷ୍ଟ୍ରରେ ୯.୮ ହଜାରରୁ ଅଧିକ ନୂତନ ରୋଗୀଙ୍କୁ ମିଳିଛି । ଏଠାରେ ୫୫୬ ଜଣଙ୍କର ମୃତ୍ୟୁ ହୋଇଥିଲା। ତାମିଲନାଡୁରେ ଆହୁରି ୬ ହଜାର ନୂଆ ସଂକ୍ରମଣ ରୋଗ ହୋଇଥିବା ଏବଂ ୧୫୫ ଜଣଙ୍କର ମୃତ୍ୟୁ ହୋଇଥିବା ସୂଚନା ମିଳିଛି। କର୍ଣ୍ଣାଟକରେ ୧୩୮ ରୋଗୀ ପ୍ରାଣ ହରାଇଛନ୍ତି।
ଗ୍ରାହକ ବେଶରେ ଆସିଲେ ଅଳଙ୍କାର ଦେଖିଲେ, ଲୁଟିନେଲେ
ସୋର: ସିସିଟିଭିରେ ସୁନା ଲୁଟ୍ । ବାଲେଶ୍ୱର ସୋର ଥାନା ବଡ଼ଖୁରି ଛକରେ ଥିବା ଜଗଦ୍ଧାତ୍ରୀ ଜୁଏଲାରୀରୁ ସୁନା ଅଳଙ୍କାର ଲୁଟ୍ ହୋଇଛି । ଗ୍ରାହକ ବେଶରେ ଆସି ଗହଣା ଦୋକାନରୁ ୧୪ ଗ୍ରାମର ସୁନା ହାର ଲୁଟି ନେଇ ଯାଇଛନ୍ତି ଦୁର୍ବୃତ୍ତ । ଲୁଟ୍ ବେଳର ଭିଡିଓ ସିସିଟିଭିରେ କଏଦ ହୋଇଛି । ପୋଲିସ ସିସିଟିଭି ଫୁଟେଜ୍ ଆଧାରରେ ତଦନ୍ତ କରୁଛି ।

ଗ୍ରାହକ ବେଶରେ ଆସିଥିବା ଦୁର୍ବୃତ୍ତ ଏକ ୧୪ ଗ୍ରାମ୍ ଓଜନର ସୁନା ହାର ଦେଖୁଥିଲେ । ଅନ୍ୟ ଗ୍ରାହକ ଆସିବାରୁ ଗହଣା ଦୋକାନର ମାଲିକ ଅନ୍ୟ ଗ୍ରାହକଙ୍କୁ ଅଳଙ୍କାର ଦେଖାଉଥିଳେ । ଏହାର ସୁଯୋଗ ନେଇ ଦୁର୍ବୃତ୍ତ ଜଣଙ୍କ ହାର ନେଇ ଚମ୍ପଟ ମାରିଛନ୍ତି । ଯାହାର ଦୃଶ୍ୟ ସିସିଟିଭିରେ କଏଦ ହୋଇଛି । ଏନେଇ ଗହଣା ଦୋକାନର ମାଲିକ ଟୁନୁ ସାହୁ ସୋର ଥାନାରେ ଅଭିଯୋଗ କରିଛନ୍ତି । ପୋଲିସ ଛାନଭିନ୍ କରୁଛି ।
ନକଲି କୋଭିଡ୍ ଟିକା ନେଲେ ସାଂସଦ, ଅଭିଯୋଗ ପରେ ଅଭିଯୁକ୍ତ ଗିରଫ
ପଶ୍ଚିମବଙ୍ଗ: ପଶ୍ଚିମବଙ୍ଗର ଟିଏମସି ସାଂସଦ-ଅଭିନେତ୍ରୀ ମିମି ଚକ୍ରବର୍ତ୍ତୀ ନିକଟରେ ନକଲି ଟିକାର ଶିକାର ହୋଇଛନ୍ତି । ସେ ନିଜେ ଏନେଇ ଖୁଲାସା କରିଛନ୍ତି । ଏହା ସହିତ ସେ କୋଲକାତାରେ ଏକ ନକଲି କୋଭିଡ ଟୀକାକରଣ କ୍ୟାମ୍ପ କରିଥିବା ଜଣେ ବ୍ୟକ୍ତିଙ୍କ ବିରୋଧରେ ଅଭିଯୋଗ କରିଛନ୍ତି। ଏହା ପରେ ଉକ୍ତ ବ୍ୟକ୍ତିଙ୍କୁ ପୋଲିସ ଗିରଫ କରିଥିବା ବେଳେ ଉକ୍ତ ବ୍ୟକ୍ତିଙ୍କ ନାମ ଦେବାଞ୍ଜନ ଦେବ ବୋଲି ସୂଚନା ମିଳିଛି।

ଦେବାଞ୍ଜନ ଜଣେ ଆଇଏସ୍ ଅଧିକାରୀ ବୋଲି ନିଜେ ପରିଚୟ ଦେଇଥିଲେ। ଦେବାଞ୍ଜନ କହିଥିଲେ ଯେ, ଟୀକାକରଣ ଶିବିରର ଆୟୋଜନ କୋଲକତା ନଗର ନିଗମ ଦ୍ୱାରା କରାଯାଇଛି । ଦେବାଞ୍ଜନ ଶତାଧିକ ଲୋକଙ୍କୁ ନକଲି ଟିକା ଦେଇଥିବା ନେଇ ଏବେ ଆକଳନ କରାଯାଉଛି। ତେବେ ଗିରଫ ବ୍ୟକ୍ତି ମିମି ଚକ୍ରବର୍ତ୍ତୀଙ୍କୁ ଟୀକାକରଣ ଶିବିରରେ ମୁଖ୍ୟ ଅତିଥି ଭାବେ ନିମନ୍ତ୍ରଣ କରିଥିଲେ। ସାଧାରଣ ଲୋକଙ୍କୁ ଉତ୍ସାହିତ କରିବା ପାଇଁ ମିମି ଚକ୍ରବର୍ତ୍ତୀ ସେହି କ୍ୟାମ୍ପରେ ଟିକା ନେଇଥିଲେ। ତେବେ ମିମି ଟିକା ନେବା ପରେ ତାଙ୍କ ମୋବାଇଲରେ ଆଧିକାରିକ ଭାବେ କୌଣସି ମେସେଜ୍ ପାଇନଥିଲେ। ଏହା ପରେ ମିମି ଉକ୍ତ ବ୍ୟକ୍ତିଙ୍କୁ ସନ୍ଦେହ କରି ପୋଲିସକୁ ଏ ବିଷୟରେ ଜଣାଇଥିଲେ।

ସୂଚନାଯୋଗ୍ୟ ଯେ, ଏହି ନକଲି କ୍ୟାମ୍ପରେ ପାଖାପାଖି ୨୫୦ ଲୋକେ ଟିକା ନେଇଛନ୍ତି । ମିମି ଚକ୍ରବର୍ତ୍ତୀଙ୍କ କହିବା ଅନୁସାରେ, ଦେବାଞ୍ଜନ କହିଥିଲେ ଯେ ସେ କିନ୍ନର ଏବଂ ଭିନ୍ନକ୍ଷମଙ୍କ ପାଇଁ ଏକ ସ୍ୱତନ୍ତ୍ର ଭ୍ୟାକ୍ସିନେସନ୍ ଡ୍ରାଇଭ୍ ଆରମ୍ଭ କରିଛନ୍ତି । ଏବଂ ମିମିଙ୍କୁ ସେଠାକୁ ଯିବା ପାଇଁ ଅନୁରୋଧ କରିଥିଲେ । ଲୋକଙ୍କୁ ଉତ୍ସାହିତ କରିବା ପାଇଁ ମିମି ତାଙ୍କ ଟୀକାକରଣ କେନ୍ଦ୍ରରେ କୋଭିଶିଲ୍ଡ ନେଇଥିଲେ । ହେଲେ ଟିକା ନେବା ପରେ ମଧ୍ୟ ତାଙ୍କୁ କୋୱିନ୍ ପକ୍ଷରୁ କୌଣସି ମେସେଜ୍ ଆସିନଥିଲା । ଟୀକାକରଣ କ୍ୟାମ୍ପରେ ଆଧାର ନମ୍ବର ସହିତ ପ୍ରତ୍ୟେକ ଜରୁରୀ ସୂଚନା ତାଙ୍କଠୁ ନିଆଯାଇଥିଲା । ଏହା ସତ୍ତ୍ୱେ ତାଙ୍କୁ କୌଣସି ମେସେଜ ଆସିନଥିଲା । କୋଲକାତା ପୋଲିସ ଏନେଇ ତଦନ୍ତ କରିବା ପରେ ଦେବାଞ୍ଜନଙ୍କୁ ଗିରଫ କରାଯାଇଛି ।
ଆରଏସପିରେ ଶ୍ରମିକଙ୍କ ଆନ୍ଦୋଳନ, ନୂତନ ମଜୁରୀ ଚୁକ୍ତିନାମା କାର୍ଯ୍ୟକାରୀ ଦାବି
ଭୁବନେଶ୍ୱର: ସେଲ୍ ଅଧିନରେ ପରିଚାଳିତ ଦେଶର ବିଭିନ୍ନ ଇସ୍ପାତ କାରଖାନା ସହିତ ରାଉରକେଲା ଇସ୍ପାତ କାରଖାନାର କର୍ମଚାରୀଙ୍କ ମଧ୍ୟରେ ଅସନ୍ତୋଷ । କର୍ମଚାରୀଙ୍କ ନୂତନ ମଜୁରୀ ଚୁକ୍ତିନାମା କାର୍ଯ୍ୟକାରୀ ହେବାରେ ବିଳମ୍ବ ହୋଇଥିବାରୁ ବିଭିନ୍ନ ଶ୍ରମିକ ସଂଗଠନ ପକ୍ଷରୁ ବିକ୍ଷୋଭ ପ୍ରଦର୍ଶନ କରାଯାଇଛି । ରାଉରକେଲା ଇସ୍ପାତ କାରଖାନା ଫାଟକ ସମ୍ମୁଖ ବିଶ୍ରା ଛକ ଠାରେ ବିକ୍ଷୋଭ ପ୍ରଦର୍ଶନ କରିଛନ୍ତି ଶ୍ରମିକ ସଂଗଠନ ।

ସେଲ୍ କର୍ମଚାରୀଙ୍କ ନୂତନ ମଜୁରୀ ଚୁକ୍ତିନାମା କାର୍ଯ୍ୟକାରୀ ହେବାରେ ୪ ବର୍ଷ ୫ ମାସ ବିଳମ୍ବ ହୋଇଥିବା ଅଭିଯୋଗ ହୋଇଛି । ୨୦୧୭ ମସିହା ଜାନୁଆରୀ ମାସ ୧ ତାରିଖରୁ ନୂତନ ମଜୁରୀ ଚୁକ୍ତିନାମା କାର୍ଯ୍ୟକାରୀ ହେବାର ଥିଲେ ମଧ୍ୟ ଏହା ବିଳମ୍ବ ହେଉଥିବାରୁ ଅସନ୍ତୋଷ ପ୍ରକାଶ ପାଇଛି । କର୍ମଚାରୀଙ୍କ ସ୍ୱାର୍ଥକୁ ଦୃଷ୍ଟିରେ ରଖି ସେଲ୍ କର୍ତ୍ତୃପକ୍ଷ ଓ କେନ୍ଦ୍ର ଇସ୍ପାତ ମନ୍ତ୍ରାଳୟ ମଜୁରୀ ଚୁକ୍ତିନାମା କାର୍ଯ୍ୟକାରୀ କରିବାରେ ବିଳମ୍ବ କରୁଥିବାରୁ ଆନ୍ଦୋଳନ ବ୍ୟାପକ ପାଇଁ ନିଷ୍ପତ୍ତି ହୋଇଛି ।

ଆସନ୍ତା ୨୮ ତାରିଖରେ କଳାଚ୍ୟାଚ ପିନ୍ଧି ଆନ୍ଦୋଳନ, ୨୯ରେ ଇସ୍ପାତ କାରଖାନା ଫାଟକ ସମ୍ମୁଖରେ ଅନଶନ ଓ ୩୦ ତାରିଖ ସମସ୍ତ ଇସ୍ପାତ କାରଖାନାରେ ଧର୍ମଘଟ ଆନ୍ଦୋଳନ ପାଇଁ ମିଳିତ ଶ୍ରମିକ ସଂଗଠନ ପକ୍ଷରୁ ନିଷ୍ପତ୍ତି ହୋଇଛି । ନୂତନ ମଜୁରୀ ଚୁକ୍ତିନାମା ତୁରନ୍ତ କାର୍ଯ୍ୟକାରୀ କରିବା ସହିତ କୋଭିଡରେ ମୃତ୍ୟୁ ବରଣ କରିଥିବା କର୍ମଚାରୀଙ୍କ ପରିବାର ସଦସ୍ୟଙ୍କୁ ଆର୍ଥିକ ସହାୟତା ଓ ପରିବାରର ଜଣଙ୍କୁ ଚାକିରି ପ୍ରଦାନ ପାଇଁ ଦାବି ହେଉଛି । ସେଲ ଗତ ବର୍ଷ ପ୍ରଫିଟ କରିଥିବାରୁ କର୍ମଚାରୀଙ୍କ ନୂତନ ମଜୁରୀ ଚୁକ୍ତିନାମା ତୁରନ୍ତ କାର୍ଯ୍ୟକାରୀ କରିବା ପାଇଁ ଦାବି କରିଛନ୍ତି ଶ୍ରମିକ ।
ଅଭିନେତ୍ରୀଙ୍କ ଫଟୋ ଦେଇ STET ପରୀକ୍ଷା ପାସ୍, ଫଳାଫଳ ଭାଇରାଲ ପରେ ହେଲା କାର୍ଯ୍ୟାନୁଷ୍ଠାନ
ବିହାର: STET ପରୀକ୍ଷାରେ ଜଣେ ପ୍ରାର୍ଥୀଙ୍କ ଅବହେଳା ତାଙ୍କୁ ଅଡ଼ୁଆରେ ପକାଇଛି । STET ୨୦୧୯ ପରୀକ୍ଷା ପାଇଁ ଦେଇଥିବା ଫର୍ମରେ ଋଷିକେଶ କୁମାର ନାମକ ଜଣେ ଛାତ୍ର ସାଉଥ୍ ଅଭିନେତ୍ରୀ ଅନୁପମା ପରମେଶ୍ୱରମଙ୍କ ଫଟୋ ଲଗାଇଥିଲେ । ଋଷିକେଶ ପରୀକ୍ଷା ଦେବା ପରେ ପାସ୍ କରିଛନ୍ତି ଏବଂ ଅଭିନେତ୍ରୀଙ୍କ ଫଟୋ ତାଙ୍କ ମାର୍କସିଟରେ ରହିଛି ।
ଏହି ମାମଲାରେ ବିହାର ବୋର୍ଡ (BSEB) ଋଷିକେଶ କୁମାରଙ୍କୁ ଅଭିନେତ୍ରୀଙ୍କ ଫଟୋ ଲଗାଇବା ନେଇ କାରଣ ଦର୍ଶାଅ ନୋଟିସ୍ ଜାରି କରିଛନ୍ତି । ଏହା ସହିତ ପ୍ରାର୍ଥୀଙ୍କ ଆବେଦନ ମଧ୍ୟ ବାତିଲ କରାଯାଇଛି। STET ୨୦୧୯ ପରୀକ୍ଷା ଦେବା ପାଇଁ ପ୍ରାର୍ଥୀମାନେ ନିଜେ ପରୀକ୍ଷା ଫର୍ମ ପୂରଣ କରିଥିଲେ ।

ବିହାର ଜହାନାବାଦ ଜିଲ୍ଲାର ଜଣେ ପ୍ରାର୍ଥୀ ଋଷିକେଶ କୁମାର ତାଙ୍କ ପରୀକ୍ଷା ଫର୍ମରେ ନିଜ ଫଟୋ ବଦଳରେ ଅଭିନେତ୍ରୀଙ୍କ ଫଟୋ ଅପଲୋଡ୍ କରିଛନ୍ତି। ଭୁଲକୁ ସୁଧାରିବା ପାଇଁ BSEB ସମସ୍ତ ପ୍ରାର୍ଥୀଙ୍କୁ ନିବେଦନ କରିଥିଲା। ଏହା ସତ୍ତ୍ୱେ ଋଷିକେଶ କୁମାରଙ୍କ ଫଟୋରେ କୌଣସି ପରିବର୍ତ୍ତନ ହୋଇନଥିଲା । ପରୀକ୍ଷା ଦେବା ପର୍ଯ୍ୟନ୍ତ ଅଭିନେତ୍ରୀଙ୍କ ଫଟୋ ସେହି ଫର୍ମରେ ଥିଲା । ଏବଂ ବିଶେଷ କଥା ହେଉଛି ଯେ, ସୋସିଆଲ ମିଡିଆରେ ନିଜ ଫଟୋ ବଦଳରେ ଅନ୍ୟ କାହା ଫଟୋ ଅପଲୋଡ୍ କଲା ଭଳି ପ୍ରାର୍ଥୀ ଜଣକ ଫେକ୍ ଫଟୋ ଦେଇ ପରୀକ୍ଷା ମଧ୍ୟ ଦେଇଛନ୍ତି ।
ଋଷିକେଶ କୁମାରଙ୍କ ଆଡମିଟ୍ କାର୍ଡରେ ଅଭିନେତ୍ରୀଙ୍କ ଫଟୋ ରହିଥିଲା । ଏବଂ ଏହି ଆଡମିଟ୍ କାର୍ଡ ନେଇ ସେ ପରୀକ୍ଷା ମଧ୍ୟ ଦେଇଥିଲେ। ବୋର୍ଡର କହିବା ଅନୁସାରେ ପରୀକ୍ଷା ସମୟରେ ଫଟୋ ତ୍ରୁଟି ହେତୁ କୌଣସି ପ୍ରାର୍ଥୀ ପରୀକ୍ଷାରୁ ବଞ୍ଚିତ ହେବା ଅନୁଚିତ୍ । ଏଥିପାଇଁ ଆଧାର କାର୍ଡ, ଭୋଟର ପରିଚୟ ପତ୍ର ଆଧାରରେ ପରୀକ୍ଷା ହଲରେ ପ୍ରବେଶ କରିବା ପାଇଁ ଅନୁମତି ଦିଆଯାଇଥିଲା।

ଏହି ପରୀକ୍ଷାରେ ଋଷିକେଶ କୁମାର ମଧ୍ୟ ପାସ୍ କରିଛନ୍ତି । ତଥାପି ସେ ଫଟୋ ବଦଳାଇ ନଥିଲେ। ବର୍ତ୍ତମାନ ମାର୍କସିଟର ଫଟୋ ଭାଇରାଲ ହେବା ପରେ ବିହାର ବୋର୍ଡ ଏହି ମାମଲା ନେଇ କାର୍ଯ୍ୟାନୁଷ୍ଠାନ ହେବ ବୋଲି କହିଛି । ଏହା ସହିତ ଋଷିକେଶଙ୍କୁ ନୋଟିସ୍ ଜାରି କରାଯାଇଛି । କେବଳ ସେତିକି ନୁହେଁ ପରୀକ୍ଷାରେ ପାସ୍ ହେବା ପରେ ତାଙ୍କ ଫଳାଫଳକୁ ରଦ୍ଦ କରାଯାଇଛି। ଏହି ପ୍ରସଙ୍ଗରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ବିହାର ବୋର୍ଡ କହିଛି।
ମନ୍ଦିର ପୂଜକଙ୍କୁ ସହାୟତାର ହାତ ବଢ଼ାଇଲା ବିଜୁ ଯୁବ ଜନତା ଦଳ
ଭୁବନେଶ୍ୱର: କରୋନା ମହାମାରୀ ପାଇଁ ତାଲାବନ୍ଦ କାରଣରୁ ରାଜ୍ୟର ସମସ୍ତ ଦେବାଳୟ ବନ୍ଦ ରହିଛି । ମନ୍ଦିର ପୂଜକ ମାନେ ଆର୍ଥିକ ଅନଟନରେ ଗତି କରୁଛନ୍ତି । ମନ୍ଦିର ପୂଜକ ମାନଙ୍କୁ ବିଜୁ ଯୁବ ଜନତା ଦଳର ରାଜ୍ୟ ସାଧାରଣ ସମ୍ପାଦକ ଆଶିଷ ରଞ୍ଜନ ମିଶ୍ର ସହାୟତାର ହାତ ବଢ଼ାଇଛନ୍ତି । ସ୍ନାନ ପୂର୍ଣ୍ଣିମାରେ ଭୁବନେଶ୍ୱର ଚନ୍ଦ୍ରଶେଖରପୁର ଅଞ୍ଚଳରେ ଥିବା ବିଭିନ୍ନ ମନ୍ଦିରରେ ପୂଜକ ମାନଙ୍କୁ ଦୈନନ୍ଦିନ ଆବଶ୍ୟକୀୟ ଶୁଖିଲା ଖାଦ୍ୟ ବଣ୍ଟନ କରିଛନ୍ତି ସେ ।

ଏହି ବିପତ୍ତି ସମୟରେ ଅସୁବିଧାରେ ଥିବା ମନ୍ଦିର ପୂଜକ ମାନଙ୍କୁ ସାହାଯ୍ୟର ହାତ ବଢ଼ାଇବା ପାଇଁ ସମସ୍ତ ଜନସାଧାରଣ ମାନଙ୍କୁ ଅନୁରୋଧ କରିଛନ୍ତି ଆଶିଷ । ଏହି କାର୍ଯ୍ୟକ୍ରମରେ ବରିଷ୍ଠ ଆଇନଜୀବୀ ସମରେନ୍ଦ୍ର ସାହୁ, ଯୁବ ସମାଜସେବୀ ଅନିରୁଦ୍ଧ ଲେଙ୍କା, ଉମାକାନ୍ତ ପୃଷ୍ଟି, କିରଣ ଦାଶ, ଦେବୀଦତ୍ତ ତ୍ରିପାଠୀ ପ୍ରମୁଖ ଉପସ୍ଥିତ ଥିଲେ ।
ଏହି ମହିଳାଙ୍କ ପାଇଁ ଭାଙ୍ଗିଥିଲା କରିସ୍ମା ଓ ଅଭିଷେକଙ୍କ ବିବାହ
ମୁମ୍ବାଇ: ୯୦ ଦଶକରେ ବଲିଉଡରେ ରାଜ କରୁଥିଲେ ଅଭିନେତ୍ରୀ କରିସ୍ମା କପୁର । ସେହି ସମୟରେ ସେ ହିନ୍ଦୀ ସିନେମା ଇଣ୍ଡଷ୍ଟ୍ରୀରେ ବେଶ ଚର୍ଚ୍ଚାରେ ରହୁଥିଲେ। କପୁର ଖାନଦାନର ସମସ୍ତ କଳାକାର ପ୍ରଥମରୁ ହିଁ ସୁପରଷ୍ଟାର ରହିଆସିଛନ୍ତି। ଆଜିକାଲି କରିସ୍ମା ଲାଇମ୍ଲାଇଟ୍ରୁ ଦୂରାଇ ଯାଇଛନ୍ତି ସତ ହେଲେ ଏବେ ବି ସେ ଜଣେ ଲୋକପ୍ରିୟ ଅଭିନେତ୍ରୀ ଭାବେ ପରିଚିତ। ଫିଲ୍ମରେ ନଜର ଆସୁନାହାନ୍ତି କରିସ୍ମା ହେଲେ ତଥାପି ଚର୍ଚ୍ଚାରେ ଅଛନ୍ତି ଏହି ସୁନ୍ଦରୀ ଅଭିନେତ୍ରୀ। ବଲିଉଡକୁ ଅନେକ ଧମାକେଦାର ଫିଲ୍ମ ଦେଇଛନ୍ତି କରିସ୍ମା।

ତେବେ ବଲିଉଡର କିଛି ଲଭ ଷ୍ଟୋରୀ ବିବାହ ବନ୍ଧନରେ ପରିଣତ ହୋଇଛି ତ ଆଉ କିଛି ବ୍ରେକ୍ ଅପର ରୂପ ନେଇଛି । ଏହା ସହିତ ଏମିତି କିଛି ପ୍ରେମ କାହାଣୀ ମଧ୍ୟ ରହିଛି ଯାହା ବିବାହ ପୂର୍ବରୁ ଭାଙ୍ଗିଯାଇଛି । କରିସ୍ମା ହେଉଛନ୍ତି ସେଥିମଧ୍ୟରୁ ଜଣେ । ସେ ତାଙ୍କ ଫିଲ୍ମି କ୍ୟାରିଅର ପାଇଁ ଯେତିକି ଚର୍ଚ୍ଚାରେ ରହିଛନ୍ତି ସେତିକି ନିଜ ବ୍ୟକ୍ତିଗତ ଜୀବନ ପାଇଁ ମଧ୍ୟ ଅଛନ୍ତି। ତାଙ୍କ ବିବାହିତ ଜୀବନକୁ ସେ ସଫଳ କରିପାରିଲେ ନାହିଁ। ଏହା ବ୍ୟତୀତ କରିସ୍ମାଙ୍କ ଏଫେୟର ମଧ୍ୟ କାହାଠୁ ଲୁଚିନଥିଲା ।

ଅଭିଷେକ ବଚ୍ଚନ ଏବଂ କରିସ୍ମା କପୁରଙ୍କ ଯୋଡି ନେଇ ମଧ୍ୟ ଅନେକ ଚର୍ଚ୍ଚା ହୋଇଥିଲା । ଅଭିଷେକ ଓ କରିସ୍ମା କପୁର ପିଲା ବେଳୁ ପରସ୍ପରଙ୍କୁ ଜାଣିଥିଲେ। ରିପୋର୍ଟ ଅନୁଯାୟୀ, ଅମିତାଭ ବଚ୍ଚନଙ୍କ ୬୦ତମ ଜନ୍ମଦିନ ଅବସରରେ କରିସ୍ମା କପୁର ଏବଂ ଅଭିଷେକ ବଚ୍ଚନଙ୍କ ନିର୍ବନ୍ଧ ନେଇ ଘୋଷଣା କରାଯାଇଥିଲା। ଫିଲ୍ମି ଜଗତର ଦୁଇଟି ପାୱାରଫୁଲ ପରିବାର କପୁର୍ସ ଏବଂ ବଚ୍ଚନ ସମ୍ପର୍କୀୟ ହେବାକୁ ଯାଉଥିଲେ। କିନ୍ତୁ ଏହି ସମ୍ପର୍କ ଗଢ଼ିବା ପୂର୍ବରୁ ଭାଙ୍ଗି ଯାଇଥିଲା । ତେବେ ଏହି ବିବାହ ଭାଙ୍ଗିବାର କାରଣ କରିସ୍ମା କପୁରଙ୍କ ମାଆ ବବିତା କପୁର ବୋଲି କୁହାଯାଏ ।

ସୂଚନାଯୋଗ୍ୟ ଯେ, କରିସ୍ମାଙ୍କ ମା ବିଗ୍ ବି ଅର୍ଥାତ୍ ଅମିତାଭ ବଚ୍ଚନଙ୍କ ସମ୍ମୁଖରେ ଏକ ସର୍ତ୍ତ ରଖିଥିଲେ। ସେହି ସମୟରେ ବଚ୍ଚନଙ୍କ ପରିବାରର ଆର୍ଥିକ ଅବସ୍ଥା ଠିକ୍ ନଥିବାରୁ ବବିତା ତାଙ୍କ ଝିଅର ଭବିଷ୍ୟତକୁ ନେଇ ଚିନ୍ତିତ ଥିଲେ। ବଚ୍ଚନ ପରିବାରର ସମ୍ପତ୍ତିରେ ଅଭିଷେକଙ୍କ ଭାଗ ପ୍ରଥମେ ରଖିବାକୁ ଦାବି କରିଥିଲେ ବବିତା। ଏହା ଶୁଣି ବଚ୍ଚନ ପରିବାର ଆଶ୍ଚର୍ଯ୍ୟ ହୋଇଯାଇଥିଲେ। ସେଥିପାଇଁ ଏହି ସମ୍ପର୍କରେ ଫାଟ ସୃଷ୍ଟି ହୋଇଥିଲା ।

ଏହା ପରେ ୨୦୦୩ ମସିହାରେ କରିସ୍ମାଙ୍କ ବିବାହ ସଞ୍ଜୟ କପୁରଙ୍କ ସହ ହୋଇଥିଲା। ବିବାହର କିଛି ବର୍ଷ ପରେ ଉଭୟପରସ୍ପରଙ୍କଠାରୁ ଅଲଗା ହୋଇଥିଲେ।କରିସ୍ମା କପୁର ଓ ସଂଜୟ କପୁରଙ୍କ ବିବାହ ବିଚ୍ଛେଦ ପରେ ଝିଅ ଓ ପୁଅ ସହ କରିସ୍ମା ଏକା ରୁହନ୍ତି। କରିସ୍ମା, କପୁର ବଂଶର ପ୍ରଥମ ଝିଅ ଯିଏ ବିବାହ ପରେ ମଧ୍ୟ ସିନେମାରେ କାମ କରିଛନ୍ତି।


