ଭୁବନେଶ୍ୱର: ଓଡ଼ିଶାରେ ନକଲି ଔଷଧ କାରବାର ମାମଲା । ରିମାଣ୍ଡରେ ଆସିବ ମାଷ୍ଟର ମାଇଣ୍ଡ ସୁଦୀପ ମୁଖାର୍ଜୀ । ସୁଦୀପକୁ ୧୦ ଦିନ ରିମାଣ୍ଡରେ ଆଣିବାକୁ ଆବେଦନ କରିବ STF । ରିମାଣ୍ଡରେ ସୁଦୀପକୁ ଆଣିବାକୁ କଟକ କୋର୍ଟ ମାଧ୍ୟମରେ ମୁମ୍ବାଇ କୋର୍ଟକୁ ଜଣାଇବ STF । ସେପଟେ ଅଭିଯୁକ୍ତ ଶିବ ଜେନା ଓ ଅନ୍ୟ ୩ଜଣଙ୍କ ଜାମିନ ଶୁମାଣି ଆସନ୍ତା ୫ତାରିଖରେ ହେବ । ନକଲି କରୋନା ମେଡିସିନ ଜବତ ଘଟଣାରେ ଶିବ ଜେନାଙ୍କ ସମେତ ମେଡିଲୟଡ କମ୍ପାନୀର ନିର୍ଦ୍ଦେଶକ ଶୁଭଲକ୍ଷ୍ମୀ ଜେନା, ଗୋଦାମ ଇନଚାର୍ଜ ସତ୍ୟ ପ୍ରକାଶ ମହାନ୍ତି, ମ୍ୟାନେଜର ପ୍ରୀତିରଞ୍ଜନ ପରିଡ଼ାଙ୍କୁ ଗିରଫ କରିଛି କ୍ରାଇମବ୍ରାଞ୍ଚ ଏସଟିଏଫ୍ । ସେହିପରି ୩ଟି ଫାର୍ମ ଏହି ମେଡିସିନ କିଣିଥିବା ବେଳେ ଡ୍ରଗ୍ସ ଡିପାର୍ଟମେଣ୍ଟ ଔଷଧ ଜବତ କରିବା ସହିତ ମାମଲା ରୁଜୁ କରିଛି ।
‘SEBCଙ୍କୁ ଚିହ୍ନଟ କରିବା ଦାୟିତ୍ୱ କେବଳ କେନ୍ଦ୍ର ସରକାରଙ୍କର’
ନୂଆଦିଲ୍ଲୀ: ସାମାଜିକ ଓ ଶିକ୍ଷାଗତ ପଛୁଆ ବର୍ଗ ବା ଏସଇବିସିଙ୍କୁ ଚିହ୍ନଟ କରିବା ଦାୟିତ୍ବ କେବଳ କେନ୍ଦ୍ର ସରକାରଙ୍କର । ରାଜ୍ୟ ନିକଟରେ ଏହି କ୍ଷମତା ନାହିଁ ବୋଲି ସୁପ୍ରିମକୋର୍ଟ କହିଛନ୍ତି । ଚାକିରି ଓ ଶିକ୍ଷା କ୍ଷେତ୍ରରେ ସଂରକ୍ଷଣ ନେଇ କେନ୍ଦ୍ରର ଆବେଦନକୁ ଖାରଜ କରିଛନ୍ତି ସର୍ବୋଚ୍ଚ ଅଦାଲତ । ଗତ ମେ’ ୫ ତାରିଖରେ କୋର୍ଟ ଦେଇଥିବା ରାୟର ପୁନଃସମୀକ୍ଷା ପାଇଁ କେନ୍ଦ୍ରର ଆବେଦନକୁ ଖାରଜ କରି କୋର୍ଟ ଏହା କହିଛନ୍ତି । ଏବେ କେନ୍ଦ୍ର ସରକାର ଏହି ରାୟକୁ ନେଇ ଏକ କ୍ୟୁରେଟିଭ ରିଟ୍ ପିଟିସନ ଦାଏର କରିବେ ବୋଲି ସୂଚନା ମିଳିଛି ।
ସୁପ୍ରିମକୋର୍ଟଙ୍କ ରାୟର ପୁନଃ ସମୀକ୍ଷା ଲାଗି କେନ୍ଦ୍ର ନିକଟରେ ଏହା ଶେଷ ବିକଳ୍ପ । ନଚେତ୍ ସରକାର ପ୍ରସଙ୍ଗକୁ ସଂସଦରେ ଉଠାଇବେ । ଜଷ୍ଟିସ ଅଶୋକ ଭୂଷଣଙ୍କ ନେତୃତ୍ୱରେ ଗଠିତ ୫ ଜଣିଆ ଖଣ୍ଡପୀଠ କହିଛନ୍ତି ଯେ, ଗତ ମେ ୫ ତାରିଖରେ ଦିଆଯାଇଥିବା ରାୟର ପୁନଃ ସମୀକ୍ଷା କରାଯାଇଛି । ମାତ୍ର ଏହାକୁ ପରିବର୍ତ୍ତନ କରିବାର କୌଣସି କ୍ଷେତ୍ର ନାହିଁ । ଗତ ମେ ୫ରେ ମରାଠା ସମ୍ପ୍ରଦାୟଙ୍କୁ ଆଡମିଶନ ଓ ସରକାରୀ ଚାକିରି କ୍ଷେତ୍ରରେ ସଂରକ୍ଷଣ ନେଇ ମହାରାଷ୍ଟ୍ର ସରକାରଙ୍କ ଏକ ଆଇନକୁ ଖଣ୍ଡପୀଠ ଖାରଜ କରିଥିଲେ ।
ଅଫିସରଙ୍କ ଦୌରାତ୍ମ୍ୟ ସହି ପାରିଲେନି ମନ୍ତ୍ରୀ, ନୀତିଶଙ୍କ କ୍ୟାବିନେଟରୁ ଦେଲେ ଇସ୍ତଫା
ପାଟଣା: ବିହାରର ନୀତିଶ ସରକାରରେ ଚାଲିଛ ଅଫିସର ରାଜ୍ । ଅଫିସରଙ୍କ କିରାଣି ବି ଶୁଣୁନାହାଁନ୍ତି ମନ୍ତ୍ରୀଙ୍କ କଥା । ଏମିତି ଅଭିଯୋଗ କରି ନୀତିଶ ସରକାରଙ୍କୁ କାଠଗଡ଼ାଙ୍କୁ ଟାଣିଛନ୍ତି ସମାଜ କଲ୍ୟାଣ ମନ୍ତ୍ରୀ ମଦନ ସହନି । ସେ ମନ୍ତ୍ରୀ ପଦରୁ ଇସ୍ତଫା ଦେଇଛନ୍ତି । କହିଛନ୍ତି, ବିହାରରେ ଅଫିସର ମାନେ ମନମୁଖୀ କାର୍ଯ୍ୟ କରୁଛନ୍ତି । ଅଫିସରଙ୍କ ଦୌରାତ୍ମ୍ୟ ଆଉ ସହି ହେଉନାହିଁ । ଅଧିକାରୀ ତ ଅଧିକାରୀ ବିଭାଗର କିରାଣି ମଧ୍ୟ କଥା ଶୁଣୁନାହାଁନ୍ତି ।

ମଦନ ସହଣି ମନ୍ତ୍ରୀ ପଦରୁ ଇସ୍ତଫା ଦେଇଛନ୍ତି । ସେ କହିଛନ୍ତି, ମୁଁ ଦଳରେ ରହିବି । ନୀତିଶ କୁମାର ବତାଇଥିବା ରାସ୍ତାରେ ଚାଲିବି । ମୁଁ ସୁବିଧାର ଫାଇଦା ଉଠାଇବାକୁ ମନ୍ତ୍ରୀ ହୋଇନାହିଁ, ଲୋକଙ୍କ ସେବା କରିବାକୁ ମନ୍ତ୍ରୀ ହୋଇଛି । ଯେତେବେଳେ ଜନତାଙ୍କ କାମ କରିପାରିବି ନାହିଁ, ତ ମନ୍ତ୍ରୀ ଭାବେ ରହି କଣ କରିବି । ତେବେ ଇସ୍ତଫା ନିଷ୍ପତ୍ତି ବହୁ ଭାବିଚିନ୍ତି ନେଇଛି । ଲୋକ କୁହନ୍ତି- ନେତା ଚୋର ବୋଲି, ମୁଁ କହିବି ଅଧିକାରୀ ଚୋର ବୋଲି ।
ଇସଲାମାବାଦ ସ୍ଥିତ ଭାରତୀୟ ଉଚ୍ଚାୟୁକ୍ତ କାର୍ଯ୍ୟାଳୟ ପରିସରରେ ଉଡ଼ିଲା ଡ୍ରୋନ୍
ନୂଆଦିଲ୍ଲୀ: ପ୍ରଥମେ ସୀମା ଏବେ ଇସଲାମାବାଦରେ ଥିବା ଭାରତୀୟ ଉଚ୍ଚାୟୁକ୍ତଙ୍କ କାର୍ଯ୍ୟାଳୟ ପରିସରରେ ଡ୍ରୋନ୍ ଉଡ଼ୁଥିବା ଦେଖିବାକୁ ମିଳିଛି । ଯାହାର ତୀବ୍ର ନିନ୍ଦା କରିଛି ଭାରତ । ଅନ୍ୟପଟେ ଜାମ୍ମୁରେ ତୃତୀୟ ଥର ପାଇଁ ଡ୍ରୋନ୍ ଉଡ଼ିଛି । ଅର୍ନିଆ ସେକ୍ଟରର ଅନ୍ତରାଷ୍ଟ୍ରୀୟ ସୀମାରେ ଦେଖିବାକୁ ମିଳିଛି ଡ୍ରୋନ୍ । ଡ୍ରୋନ୍ ଦେଖିବା ପରେ BSF ଯବାନ ଗୁଳି ଚଳାଇଥିଲେ । ଏହାପରେ ଡ୍ରୋନ ଗାଏବ ହୋଇଯାଇଥିଲା ।
Drone was spotted inside Indian High Commision in Islamabad, Pakistan. India strongly objected to this security breach.
— ANI (@ANI) July 2, 2021
ଗତ ୩୦ ତାରିଖରେ ଜାମ୍ମୁରେ ଦ୍ୱିତୀୟ ଥର ପାଇଁ ଡ୍ରୋନ୍ ଉଡ଼ିଥିଲା । ବାୟୁସେନା ଏୟାରବେସ୍ ଉପରେ ୩ଟି ଡ୍ରୋନ୍ ଉଡୁଥିବା ଦେଖିବାକୁ ମିଳିଥିଲା । କିଛିଦିନ ହେଲା ଏହି ଅଞ୍ଚଳରେ ପ୍ରାୟ ୮ଟି ଡ୍ରୋନ୍ ଦେଖାଗଲାଣି । ମିଲିଟାରୀ ବେସ୍ ଓ ମିଲିଟାରୀ ଷ୍ଟେସନ ନିକଟରେ ବାରମ୍ବାର ଡ୍ରୋନ୍ ଦେଖାଯିବା ପରେ ସୁରକ୍ଷା ଏଜେନ୍ସିର ଚିନ୍ତା ବଢିଯାଇଛି ।
ସେପଟେ ଜାମ୍ମୁ ଓ କାଶ୍ମୀରର ପୁଲୱାମାରେ ଆତଙ୍କବାଦୀ ଓ ସୁରକ୍ଷା କର୍ମୀଙ୍କ ମଧ୍ୟରେ ଏନକାଉଣ୍ଟର ହୋଇଛି । ପୋଲିସ ରାଜପୋରାର ହାଞ୍ଜିନି ଗାଁକୁ ଘେରାବନ୍ଦୀ କରିବା ସହ ସର୍ଚ୍ଚ ଅପରେସନ ଜାରି ରଖିଛନ୍ତି । ଏଥିରେ ଜଣେ ଯବାନ ସହିଦ ହୋଇଥିବା ବେଳେ ଜଣେ ଆତଙ୍କବାଦୀ ନିହତ ହୋଇଛନ୍ତି ।
ଏନଫୋର୍ସମେଣ୍ଟ କଡ଼ାକଡ଼ି କଲା ବିଏମସି, ବିଭିନ୍ନ ହାଟରେ ଚଢ଼ାଉ
ଭୁବନେଶ୍ୱର: ରାଜ୍ୟରେ ସଂକ୍ରମଣ ମାମଲା କମୁଥିବା ବେଳେ ଲକଡାଉନକୁ କୋହଳ କରିଛନ୍ତି ସରକାର । ଭୁବନେଶ୍ୱରରେ ଦିନ ୨ଟା ଯାଏ ଦୋକାନ ବଜାର ଖୋଲିବାକୁ ନିଷ୍ପତ୍ତି ନିଆଯାଇଛି । ବଜାର ଖୋଲାଥିବା ବେଳେ ଅନେକ ଦୋକାନରେ ଗହଳି ପରିଲକ୍ଷିତ ହେଉଛି । ଲୋକ ମାସ୍କ ପିନ୍ଧୁନଥିବା ବେଳେ ସାମାଜିକ ଦୂରତା ରକ୍ଷା ହେଉନି । ଏଭଳି ଅମାନିଙ୍କୁ ସାବାଡ୍ କରିବାକୁ ବିଭିନ୍ନ ହାଟରେ ରେଡ୍ କରିଛି ବିଏମସିର ଏନଫୋର୍ସମେଣ୍ଟ ସ୍କ୍ୱାଡ୍ ।
Joint Enforcement carried out by BMC & @cpbbsrctc on Haats at KIIT Square, Siripur, Baragada, Jharpada, Unit-1, Unit-4 on #COVID19 Guidelines. pic.twitter.com/OzH6aZLx0j
— BMC (@bmcbbsr) July 2, 2021
ବିଏମସି ଓ କମିଶନରେଟ୍ ପୋଲିସର ମିଳିତ ଏନଫୋର୍ସମେଣ୍ଟ ସ୍କ୍ୱାଡ୍ ଆଜି କିଟ୍ ହାଟ, ସିରିପୁର, ବରଗଡ଼, ଝାରପଡ଼ା, ୟୁନିଟ୍-୧ ସହ ୟୁନିଟ୍-୪ ମାର୍କେଟରେ ରେଡ୍ କରିଛି । ଲୋକଙ୍କ ମଧ୍ୟରେ ସାମାଜିକ ଦୂରତା, ମାସ୍କ ପିନ୍ଧୁଛନ୍ତି ନା ନାହିଁ ଏସବୁ ପରଖିଛି ଏନଫୋର୍ସମେଣ୍ଟ ଟିମ୍ ।
ଜନସନ୍ ଆଣ୍ଡ ଜନସନର ଦାବି, ଡେଲ୍ଟା ସହ ସବୁ ଭାରିଆଣ୍ଟ ଉପରେ ପ୍ରଭାବୀ ସିଙ୍ଗଲ୍ ଡୋଜ୍ ଟିକା
ନୂଆଦିଲ୍ଲୀ: ଆମେରିକୀୟ ଫାର୍ମା କମ୍ପାନୀ ଜନସନ୍ ଆଣ୍ଡ ଜନସନ୍ ଦାବି କରିଛି, କମ୍ପାନୀ ଦ୍ୱାରା ପ୍ରସ୍ତୁତ ସିଙ୍ଗଲ୍ ଡୋଜ୍ କୋଭିଡ୍ ଟିକା ଡେଲ୍ଟା ଭାରିଆଣ୍ଟକୁ ମାତ୍ ଦେବାରେ ସକ୍ଷମ । ସିଙ୍ଗଲ୍ ଡୋଜ୍ ଟିକା ଗମ୍ଭୀର ରୋଗୀଙ୍କ କ୍ଷେତ୍ରରେ ୮୫ ପ୍ରତିଶତ ପ୍ରଭାବୀ । କମ୍ପାନୀ ଦାବି କରିଛି ଏହି ସିଙ୍ଗଲ୍ ଡୋଜ୍ ଟିକା ନେଲେ ଲୋକଙ୍କୁ ହସ୍ପିଟାଲରେ ଭର୍ତ୍ତି ହେବାକୁ ପଡ଼ିବ ନାହିଁ, ମୃତ୍ୟୁ ହେବନି । ଜନସନ୍ ଆଣ୍ଡ ଜନସନର ମୁଖ୍ୟ ବୈଜ୍ଞାନିକ ଅଧିକାରୀ ପାଲ୍ ଷ୍ଟାଫଲ୍ସ କହିଛନ୍ତି, ଏହି ଟିକା ବିଶ୍ୱବ୍ୟାପୀ ଲୋକଙ୍କ ଜୀବନ ବଞ୍ଚାଇବ ।
କମ୍ପାନୀ ପକ୍ଷରୁ ଦାବି କରାଯାଇଛି, ଭ୍ୟାକ୍ସିନର ପ୍ରଥମ ଡୋଜର ୨୯ ଦିନ ଭିତରେ ଡେଲ୍ଟା ଭାରିଆଣ୍ଟ ନଷ୍ଟ ହୋଇଯାଇଥିଲା । ଦକ୍ଷିଣଆଫ୍ରିକା ଓ ବ୍ରାଜିଲ୍ ସହିତ ବିଶ୍ୱସ୍ତରରେ ଟିକାର ଏକ ପ୍ରକାର ପ୍ରଭାବ ରହିଛି । ତେବେ ବୁଷ୍ଟର ଡୋଜର ଆବଶ୍ୟକତା ନଥିବା କହିଛନ୍ତି ଆଉ ଜଣେ ଅଧିକାରୀ ।
ଟିକା ନେବାର ବର୍ଷେ ଯାଏଁ ବୁଷ୍ଟର ଡୋଜର ଆବଶ୍ୟକତା ନଥିବା କମ୍ପାନୀ କହିଛି । ଭାରତ ସରକାର ଜନସନ୍ ଆଣ୍ଡ ଜନସନ୍ ଟିକା ନେଇ କମ୍ପାନୀ ସହ ଆଲୋଚନା କରୁଛନ୍ତି ।
ଆଫଗାନିସ୍ତାନରୁ ସେନା ଫେରିବା ଆରମ୍ଭ, ୨ ଦଶନ୍ଧି ପରେ ଆମେରିକା ଆର୍ମି ଛାଡ଼ିଲା ବଗରାମ ଏୟାରଫିଲ୍ଡ
କାବୁଲ: ଆମେରିକା ରାଷ୍ଟ୍ରପତି ଜୋ ବାଇଡେନଙ୍କ ଘୋଷଣା ଅନୁସାରେ, ଆଫଗାନିସ୍ତାନରୁ ଆମେରିକା ସେନା ଓ ନାଟୋ ସେନା ଫେରିବା ଆରମ୍ଭ ହୋଇ ଯାଇଛି । ପ୍ରାୟ ୪୦ ବର୍ଷ ବଗରାମ ଏୟାରଫିଲ୍ଡ ଛାଡ଼ୁଛି ଆମେରିକା । ଆମେରିକା ମେ ୧ରେ ସେନା ପ୍ରତ୍ୟାହାର ନେଇ ନିଷ୍ପତ୍ତି ନେଇଥିଲା । ୨୦୨୧ ସେପ୍ଟେମ୍ବର ୧୧ ସୁଦ୍ଧା ସମ୍ପୂର୍ଣ୍ଣ ଭାବେ ସେନା ପ୍ରତ୍ୟାହାର କରିବ ଆମେରିକା ।
ଆଫଗାନିସ୍ତାନରେ ଏବେ ୨୫୦୦ରୁ ଅଧିକ ଆମେରିକା ସେନା ଓ ୭ ହଜାର ନାଟୋ ଯବାନ ମୁତୟନ ଅଛନ୍ତି । ସେନା ପ୍ରତ୍ୟାହାର ଆରମ୍ଭ ପରେ ଯୁଦ୍ଧାସ୍ତ୍ରର ଗଣତି ଚାଲିଛି । ଅସ୍ତ୍ରଶସ୍ତ୍ରର ତାଲିକା ପ୍ରସ୍ତୁତ କରି ଆଫଗାନିସ୍ତାନ ସେନାକୁ ଦିଆଯାଉଛି । ଆଉ କିଛି ଅସ୍ତ୍ର ଆଫଗାନିସ୍ତାନ ବଜାରରେ ବିକ୍ରି କରାଯାଇଛି । ଆମେରିକା ନେବାକୁ ଥିବା ଉପକରଣକୁ ସି-୧୭ କାର୍ଗୋ ବିମାନରେ ଲୋଡ୍ କରାଯାଉଛି ।
ଏହା ପୂର୍ବରୁ ଆଫଗାନିସ୍ତାନର ବରିଷ୍ଠ ଅଧିକାରୀ କହିଥିଲେ, ଆମେରିକା ସେନା ଫେରିଯିବା ପରେ ଏଠାରେ ଗୃହଯୁଦ୍ଧର ଆଶଙ୍କା ବଢ଼ିଯିବ । ବରିଷ୍ଠ ସୈନ୍ୟ କମାଣ୍ଡର ଜେନରାଲ ସ୍କଟ୍ ମିଲରଙ୍କ ଏହି ବୟାନ ଆଫଗାନିସ୍ତାନର ୩୭୦ ଜିଲ୍ଲାରୁ ୫୦ ଜିଲ୍ଲାରେ ତାଲିବାନ୍ କବଜାରେ ଥିବା ଜଣା ପଡ଼ିବା ପରେ ଆସିଥିଲା ।


