spot_img
Home Blog Page 5361

ଚଳନ୍ତା ଅଟୋରୁ ମହିଳାଙ୍କୁ ଫିଙ୍ଗି ଫେରାର ଅଭିଯୋଗ ଘଟଣାରେ ମିଳିଲା ମହିଳାଙ୍କ ପରିଚୟ

ବାରିପଦା: ଚଳନ୍ତା ଅଟୋରୁ ମହିଳାଙ୍କୁ ଫିଙ୍ଗି ଫେରାର ଅଭିଯୋଗ ଘଟଣାରେ ମିଳିଲା ମହିଳାଙ୍କ ପରିଚୟ। ମହିଳାଙ୍କ ଘର ମରୋଡା ଥାନା ଅନ୍ତର୍ଗତ ଛୋଟରାୟପୁର ଅଞ୍ଚଳରେ ମହିଳା ଜଣକ ହେଉଛନ୍ତି ପ୍ରଭାତି ମହାନ୍ତ ବୋଲି ଜଣାପଡିଛି। ମହିଳାଜଣଙ୍କ ବାପଘର ଜାମଶୁଳିରୁ ଶାଶୁଘର ମୋରଡା ଥାନା ଅଞ୍ଚଳକୁ ଯିବା ସମୟରେ ଅଟୋରେ ବାତ ରୋଗର ଶିକାର ହୋଇଥିଲେ। ସେ ନିଶାଶକ୍ତ ଥିବାରୁ ସମ୍ଭବତ ଅଟୋରେ ଥିବା ଲୋକମାନେ ତାଙ୍କୁ ଓହ୍ଲାଇଦେଇ ପଳାଇଥିଲେ।

ଯାହାକୁ ସ୍ଥାନୀୟ ଲୋକେ ଫୋପାଡିବା ରୂପ ଦେଇଛନ୍ତି ବୋଲି ଆଇଆଇସି ପ୍ରେମଦା ନାୟକ କହିଛନ୍ତି। ତେବେ ଅଟୋ ଚାଳକ କିମ୍ବା ଅଟୋର କୌଣସି ସୂଚନା ମିଳିନଥିବା ବେଳେ ଏନେଇ ଅଧିକ ତଦନ୍ତ ଜାରି ରଖିଥିବା ନେଇ ପୁଲିସ ସୂଚନା ଦେଇଛି। ଗତକାଲି ମୋରଡ଼ା-ବାରିପଦା ମୁଖ୍ୟ ରାସ୍ତାରେ ଥିବା ବୁଦୁବୁଦିଆ ଜଙ୍ଗଲରେ ମହିଳାଙ୍କୁ ଫିଙ୍ଗିଦେଇଥିବା ଅଭିଯୋଗ ହୋଇଥିଲା। ଗାଈ ଜଗୁଆଳମାନେ ଦେଖି ଘଟଣା ସମ୍ପର୍କରେ ଗ୍ରାମବାସୀଙ୍କୁ ଜଣାଇଥିଲେ। ଗୁରୁତର ଅବସ୍ଥାରେ ମହିଳାଙ୍କୁ ଉଦ୍ଧାର କରି ପୋଲିସ ଓ ଆମ୍ବୁଲାନ୍ସକୁ ଖବର ଦେଇଥିଲେ ଲୋକେ। ପୋଲିସ୍ ମହିଳାଙ୍କୁ ଉଦ୍ଧାର କରି ଆମ୍ବୁଲାନ୍ସରେ ପିଆରଏମ ମେଡ଼ିକାଲ କଲେଜ ଏଣ୍ଡ ହସ୍ପିଟାଲକୁ ପଠାଇଥିଲା।

ଲଗାଣ ବର୍ଷାର ବିତ୍ପାତ ନେଇ ମାର୍ଗଦର୍ଶିକା ଜାରି କଲା ବନ ବିଭାଗ

ଭୁବନେଶ୍ୱର: ଲଗାଣ ବର୍ଷାର ବିତ୍ପାତ ନେଇ ମାର୍ଗଦର୍ଶିକା ଜାରି କଲା ବନ ବିଭାଗ। ବର୍ତ୍ତମାନ ଉପକୂଳ ପୁରୀ, ଜଗତସିଂହପୁର, କେନ୍ଦ୍ରାପଡ଼ା DFOଙ୍କ ସହ ଯୋଗାଯୋଗରେ ରହିଛି ବନବିଭାଗ। ମୁଖ୍ୟତଃ ବାଲୁଖଣ୍ଡ, ଭିତରକନିକା ବନବିଭାଗର ନଜରରେ ରହିଛି। ବନ୍ୟଜନ୍ତୁଙ୍କ ଭିତ୍ତିଭୂମିର ସୁରକ୍ଷା ନେଇ ସେମାନଙ୍କ ପାଇଁ ମାର୍ଗଦର୍ଶିକା ଜାରି ହୋଇଛି। ବନ୍ୟଜନ୍ତୁଙ୍କର ବର୍ଷାରେ ଯେପରି କ୍ଷତି ନ ହୁଏ, ସେ ଦିଗରେ ନଜର ରଖିବାକୁ DFO ମାନଙ୍କୁ ନିର୍ଦ୍ଦେଶ ଦିଆଯାଇଛି।

ସେପଟେ ହାତୀ ମଣିଷ ସଂଘର୍ଷ ରୋକିବାକୁ ଜଙ୍ଗଲ ଓ ପରିବେଶ ବିଭାଗର ନୂଆ ପ୍ରଣାଳୀ। ଆଫ୍ରିକା ଦେଶରେ ମହୁମାଛି ବସାକୁ ଜଙ୍ଗଲରୁ ଗାଁକୁ ଆସୁଥିବା ରାସ୍ତାରେ ଲଗାଯାଏ। ଯେଉଁଥିପାଇଁ ବିରକ୍ତ ହୋଇ ହାତୀ ପୁଣି ଜଙ୍ଗଲ ମଧ୍ୟକୁ ଫେରିଯାଏ। ଆଠମଲ୍ଲିକ ଓ କେନ୍ଦୁଝରରେ ଏହିଭଳି ପାଇଲଟ ପ୍ରୋଜେକ୍ଟ ଚାଲିଛି। ଆସନ୍ତା ମାସରୁ ମାର୍ଚ୍ଚ ଯାଏ ଚାଷ ଋତୁ ଆସୁଛି। ସେ ସମୟରେ ମଣିଷ ହାତୀ ସଂଘର୍ଷ ଦେଖାଯାଏ। ସେ ସମୟରେ ଅନ୍ୟ ସ୍ଥାନରେ ଏହି ମହୁମାଛି ପ୍ଲାନକୁ ପ୍ରୟୋଗ କରାଯିବ ବୋଲି ସୂଚନା ଦିଆଯାଇଛି।

ଆରମ୍ଭ ହେବ ଗଜ ସାଥୀ ଯୋଜନା। ହାତୀର ଗତିବିଧି ସମ୍ପର୍କରେ ଆଗୁଆ ସୂଚନା ଦେବାକୁ ବନ ସୁରକ୍ଷା ସମିତି ସଦସ୍ୟଙ୍କୁ ଗଜ ସାଥୀ ରୂପେ ନିୟୋଜିତ କରାଯିବ। ସେମାନଙ୍କୁ ବାଣ, ଲାଇଟ ଭଳି ଉପକରଣ ଯୋଗାଇ ଦିଆଯିବ। ପ୍ରତି ବନ ସୁରକ୍ଷା ସମିତିର ପାଞ୍ଚ ଜଣଙ୍କୁ ଗଜ ସାଥୀ ରୂପେ ଦାୟିତ୍ୱ ଦେବାକୁ ଯୋଜନା କରାଯାଉଛି। ଏଥିପାଇଁ ପ୍ରତି ବନ ସୁରକ୍ଷା ସମିତିକୁ ୨୫ ହଜାର ଟଙ୍କା ଲେଖାଏଁ ଦିଆଯିବ। ଚନ୍ଦକା, ବାଦାମ ପାହାଡ଼ ଓ ଶିମିଳିପାଳରେ ହାତୀଙ୍କ ବେକରେ ରେଡ଼ିଓ କଲର ଲଗାଯିବ। ବେଙ୍ଗାଳୁରୁ ସ୍ଥିତ ଇଣ୍ଡିଆନ ଇନଷ୍ଟିଚ୍ୟୁଟ ଅଫ ସାଇନ୍ସ ଏହାର ଦାୟିତ୍ୱ ନେଇଛି। ଚଳିତ ସପ୍ତାହରେ ୩ଟି ହାତୀଙ୍କ ରେଡ଼ିଓ କଲାରିଂ କରାଯିବ ସୂଚନା ଦେଇଛନ୍ତି PCCF ଶଶୀ ପଲ।

‘ମୁଁ ବି ଅରଶଦ’, ସାଥିଙ୍କୁ ମନେ ପକାଇଲେ ପୋଲିସ କର୍ମୀ, ଲୁହ ଭିଜା ଆଖିରେ ଯବାନଙ୍କୁ ବିଦାୟ ଦେଲେ ହଜାର ହଜାର ଲୋକ

ଶ୍ରୀନଗର: ରବିବାର ଦିନ ଶ୍ରୀନଗରର ଖାନୟାର ଅଞ୍ଚଳରେ ଜଣେ ଆତଙ୍କବାଦୀର ଗୁଳି ଚଳାଇବା ପରେ ଶହୀଦ ହୋଇଥିବା ୨୫ ବର୍ଷୀୟ ପୋଲିସ ଅଧିକାରୀଙ୍କ ଅନ୍ତିମ ସଂସ୍କାରରେ ବହୁ ସଂଖ୍ୟାରେ ଜନସମାଗମ ଦେଖିବାକୁ ମିଳିଛି । ଏହି ଘଟଣା ପରଠାରୁ ସ୍ଥାନୀୟ ଲୋକଙ୍କ ମଧ୍ୟରେ କ୍ରୋଧ ରହିଛି । କୁପୱାରା ଜିଲ୍ଲାର ବାସିନ୍ଦା ପ୍ରୋବେସନାରୀ ସବ୍-ଇନ୍ସପେକ୍ଟର ଅର୍ଶଦ ଅହମ୍ମଦ ଜଣେ ଅଭିଯୁକ୍ତଙ୍କୁ ଡାକ୍ତରଖାନାକୁ ଡାକ୍ତରୀ ପରୀକ୍ଷା ପାଇଁ ନେଇଥିଲେ, ଯେଉଁଠାରୁ ଫେରିବା ବାଟରେ ତାଙ୍କ ଉପରକୁ ଗୁଳି ଚାଳନା କରାଯାଇଥିଲା ।

ଜାମ୍ମୁ କାଶ୍ମୀର ପୋଲିସ ନିଜ ଅଫିସିଆଲ୍ ଟ୍ୱିଟର ହ୍ୟାଣ୍ଡେଲରୁ ଶହୀଦ ଅଧିକାରୀ ଅର୍ଶଦ ଅହମ୍ମଦଙ୍କ ଅନ୍ତିମ ସଂସ୍କାରର ଭିଡିଓ ଟ୍ୱିଟ୍ କରିଛି। ଭିଡିଓରେ ଶହିଦଙ୍କ ମୃତ ଶରୀର ଚାରିପାଖରେ ଭିଡ଼ ଜମିଥିବା ଦେଖିବାକୁ ମିଳିଛି । ଅନ୍ୟପକ୍ଷରେ, ପୋଲିସ୍ ଯବାନଙ୍କୁ ଶ୍ରଦ୍ଧାଞ୍ଜଳି ଜଣାଇବା ପାଇଁ ଘାଟିର ବରିଷ୍ଠ ପୋଲିସ ଅଧିକାରୀମାନେ ଅର୍ଶଦ ଅହମ୍ମଦଙ୍କ ଫଟୋକୁ ନିଜ ଟ୍ୱିଟର ଡିପିରେ ରଖିଛନ୍ତି । ଫଟୋ ସହିତ ସମସ୍ତ ପୋଲିସ ଅଧିକାରୀ #WeAreAllArshid ହ୍ୟାସଟ୍ୟାଗ୍ ମଧ୍ୟ ଲେଖିଛନ୍ତି ।

ଘଟଣାର ସିସିଟିଭି ଫୁଟେଜରେ ଆତଙ୍କବାଦୀ ଜଣଙ୍କ ପୋଲିସ ଅଫିସରଙ୍କୁ ଅତି ନିକଟରୁ ଦୁଇଟି ଗୁଳି ଚଳାଇ ପଳାଇଥିବାର ନଜର ଆସିଛି । ସବ୍-ଇନ୍ସପେକ୍ଟରଙ୍କୁ ସୌରାର SKIMS ଡାକ୍ତରଖାନାକୁ ନିଆଯାଇଯାଇଥିଲା । ସେଠାରେ ତାଙ୍କର ମୃତ୍ୟୁ ଘଟିଥିଲା ।

ସାମ୍ବାଦିକମାନଙ୍କ ସହ କଥାବାର୍ତ୍ତା ବେଳେ ସିଂ କହିଛନ୍ତି ଯେ ଏହି ହତ୍ୟାକାଣ୍ଡରେ ସମ୍ପୃକ୍ତ ଥିବା ବ୍ୟକ୍ତିଙ୍କୁ ଚିହ୍ନଟ କରାଯାଇଛି ଏବଂ ସେମାନଙ୍କୁ ଶୀଘ୍ର ଦଣ୍ଡିତ କରାଯିବ। ଯୁବ ଅଧିକାରୀଙ୍କ ହତ୍ୟା ଅତ୍ୟନ୍ତ ଦୁଃଖଦାୟକ ବୋଲି ପୋଲିସ ମୁଖ୍ୟ କହିଛନ୍ତି। ଡିଜିପି କହିଛନ୍ତି ଯେ, ‘ସେବା ଆରମ୍ଭରେ ଆମେ ଜଣେ ଯୁବ ସାହସୀ ଅଧିକାରୀଙ୍କୁ ହରାଇଛୁ । ସେ ଏବେ ପୋଲିସିଂ ଶିଖୁଥିଲେ । ତାଙ୍କୁ ଜଣେ ଅଭିଯୁକ୍ତଙ୍କୁ ଡାକ୍ତରଖାନା ନେବା ଦାୟିତ୍ୱ ଦିଆଯାଇଥିଲା ଏବଂ ଫେରିବା ବାଟରେ ତାଙ୍କୁ ଗୁଳି କରି ହତ୍ୟା କରାଯାଇଥିଲା।

ଜାମ୍ମୁ କାଶ୍ମୀର ଲେଫ୍ଟନାଣ୍ଟ ଗଭର୍ଣ୍ଣର ମନୋଜ ସିହ୍ନା ଏହି ହତ୍ୟାକାଣ୍ଡକୁ ନିନ୍ଦା କରିଛନ୍ତି। “ଏହା ମାନବିକତା ଏବଂ ଶାନ୍ତିର ଶତ୍ରୁମାନଙ୍କର କାର୍ଯ୍ୟ। ତାଙ୍କର ସର୍ବୋଚ୍ଚ ବଳିଦାନ ବୃଥା ହେବ ନାହିଁ, ଆତଙ୍କବାଦୀମାନେ ଦଣ୍ଡ ପାଇବେ । ଶହୀଦଙ୍କ ପରିବାରକୁ ଆମର ସମବେଦନା ।’ ଜାତୀୟ ସମ୍ମିଳନୀ ସଭାପତି ତଥା ସାଂସଦ ଫାରୁକ୍ ଅବଦୁଲ୍ଲା ଏବଂ ତାଙ୍କ ପୁଅ ଓମାର ଅବଦୁଲ୍ଲା ମଧ୍ୟ ଏହି ଘଟଣାକୁ ନିନ୍ଦା କରିଛନ୍ତି । ପିଡିପି ସଭାପତି ମେହବୁବା ମୁଫତିଙ୍କ ସମେତ ଅନ୍ୟ ଦଳର ନେତାମାନେ ମଧ୍ୟ ଏହି ଘଟଣାକୁ ନିନ୍ଦା କରିଛନ୍ତି।

‘NHI ପାଇଁ ଭୁବନେଶ୍ୱର ଜଳବନ୍ଦୀ, ରାଜ୍ୟ ସରକାର ଦେଇଛନ୍ତି ୧୩୦ କୋଟି ଟଙ୍କା’

ଭୁବନେଶ୍ୱର: ଭୁବନେଶ୍ୱରରେ ଜଳବନ୍ଦୀକୁ ନେଇ ସାଂସଦ ଅପରାଜିତାଙ୍କ ଟ୍ୱିଟ୍‌ ପରେ ଅପରାଜିତାଙ୍କୁ ଟାର୍ଗେଟ କରିଛନ୍ତି ଭୁବନେଶ୍ୱର ମଧ୍ୟ ବିଧାୟକ ଅନନ୍ତ ନାରାୟଣ ଜେନା। ଏହା ସହିତ  ଜଳବନ୍ଦୀ ସ୍ଥିତିକୁ ନେଇ ଜାତୀୟ ରାଜପଥ ପ୍ରାଧିକରଣର ଅବହେଳାକୁ ଦାୟୀ କରିଛନ୍ତି ଓ ସରକାରଙ୍କୁ ସମାଲୋଚନା କରିବା ବଦଳରେ ଜାତୀୟ ରାଜପଥ ପ୍ରାଧିକରଣ ସହିତ ସାଂସଦ ଆଲୋଚନା କରନ୍ତୁ ବୋଲି କହିଛନ୍ତି ।

ବିଧୟକ କହିଛନ୍ତି ଯେ, ଭୁବନେଶ୍ୱର ସାଂସଦ ଅପରାଜିତ ଷଢଙ୍ଗୀ କମିଶନର ଥିବା ସମୟରେ ଜଳବନ୍ଦୀ ସମସ୍ୟାକୁ ଭଲଭାବରେ ଜାଣିଛନ୍ତି। କେବଳ ଟ୍ୱିଟ କରିନଦେଇ ଜନପ୍ରତିନିଧି ଭାବେ ଏନଏଚଏଆଇ ସହ ଆଲୋଚନା କରି ସମସ୍ୟାର ସମାଧାନ କରନ୍ତୁ।  ଖାଲି ଟ୍ୱିଟ କଲେ କୌଣସି ସମସ୍ୟାର ସମାଧାନ ହୋଇପାରିବ ନାହିଁ। ସାଂସଦ ଅପରାଜିତା ଷଡ଼ଙ୍ଗୀ ଆଗ NHI ପାଖରେ ପହଞ୍ଚି ଭୁବନେଶ୍ୱରରେ ଜାତୀୟ ରାଜପଥ କଡ଼ରେ ଡ୍ରେନ୍‌ କରିବାର ବ୍ୟବସ୍ଥା କରନ୍ତୁ ।

ସେ ଆହୁରି ମଧ୍ୟ କହିଛନ୍ତି ଭୁବନେଶ୍ୱର ଭିତରେ  ୧୦ଟି ମେନ୍‌ ଡ୍ରେନ୍‌ ନିର୍ମାଣ କରିବା ପାଇଁ ମୁଖ୍ୟମନ୍ତ୍ରୀ ୧୩୦ କୋଟି ଟଙ୍କା ପ୍ରଦାନ କରିଛନ୍ତି। କିନ୍ତୁ ଭୁବନେଶ୍ୱରର ସ୍ଥିତି ନେଇ NHIର ବିଲକୁଲବି ଚିନ୍ତା ନାହିଁ। ଯେତେବେଳେ କି ଭୁବନେଶ୍ୱରରେ ଜଳବନ୍ଦୀ କେବଳ NHI କାରଣରୁ ହିଁ ହେଉଛି। ମହାନଗର ନିଗମରେ NHI ଯେତିକି କାମ କରିବା କଥା ସେତିକି କରୁନାହିଁ।  ଯଦି NHI ରାସ୍ତା କଡ଼ରେ ବର୍ଷା ପାଣି ଯିବା ପାଇଁ ଡ୍ରେନ୍‌ ହୋଇଥାନ୍ତା ତେବେ ବର୍ଷା ପାଣି ଆଜି ସହର ଭିତରକୁ ପ୍ରବେଶ କରିନଥାନ୍ତା କି ଇଷ୍କନ ସାମ୍ନାରେ ଅଣ୍ଟାଏ ଉଚ୍ଚର ପାଣି ଜମା ହୋଇନଥାନ୍ତା। ସେଥିପାଇଁ NHIକୁ ଏଥିପାଇଁ ଧ୍ୟାନ ଦେବାକୁ କହିଛନ୍ତି ଅନନ୍ତ ନାରାୟଣ ଜେନା। ଭୁବନେଶ୍ୱରରେ ଏବେ ଯେଉଁ ଯେଉଁ ସ୍ଥାନରେ ପାଣି ଜଣା ହୋଇଥିଲା ତାକୁ ଏବେ ଜଳମୁକ୍ତ କରାଯାଉଛି। ରାଜ୍ୟ ସରକାରଙ୍କର ପୁରା ଟିମ୍‌ ଜଳବନ୍ଦୀକୁ ମୁକ୍ତ କରିବା ପାଇଁ କାର୍ଯ୍ୟ ଜାରି ରଖିଛି ବୋଲି ଭୁବନେଶ୍ୱରର ମଧ୍ୟ ବିଧାୟକ ଅନନ୍ତ ନାରାୟଣ ଜେନା କହିଛନ୍ତି।

 

ବିରାଟ ବାପା ହେବା ଦିନଠାରୁ ନୂଆ କ୍ୟାପ୍ଟେନ୍ ଖୋଜିବା ଆରମ୍ଭ କରିଥିଲା BCCI

ନୂଆଦିଲ୍ଲୀ: ଭାରତୀୟ କ୍ରିକେଟ୍ ଦଳରେ ଆସନ୍ତା କିଛି ଦିନ ମଧ୍ୟରେ ବଡ଼ ଧରଣର ପରିବର୍ତ୍ତନ ହେବାର ସମ୍ଭାବନା ରହିଛି । ଅଧିନାୟକ ପଦ ଛାଡିବେ ଟିମ୍ ଇଣ୍ଡିଆ ଅଧିନାୟକ ବିରାଟ କୋହଲି । ଟି-୨୦ ବିଶ୍ୱକପ ପରେ ଟି -୨୦ ଏବଂ ODI ଦଳର ଅଧିନାୟକତ୍ୱ ଛାଡିବେ ବୋଲି ଚର୍ଚ୍ଚା ହେଉଛି । ତେବେ ତାଙ୍କ ସ୍ଥାନରେ ରୋହିତ ଶର୍ମାଙ୍କୁ ଦଳର ଅଧିନାୟକ ପଦ ମିଳିପାରେ ।

ବିରାଟ କୋହଲି ତାଙ୍କ ବ୍ୟାଟିଂ ଉପରେ ଧ୍ୟାନ ଦେବା ପାଇଁ ଏହି ବଡ ପଦକ୍ଷେପ ନେବେ ବୋଲି ଚର୍ଚ୍ଚା ହେଉଛି । ୩୨ ବର୍ଷୀୟ କୋହଲି ଟିମ୍ ଇଣ୍ଡିଆର ସଫଳ ଅଧିନାୟକମାନଙ୍କ ମଧ୍ୟରୁ ଅନ୍ୟତମ । ଅଷ୍ଟ୍ରେଲିଆ ଗସ୍ତ ପରେ ବିରାଟ କୋହଲି, ରୋହିତ ଶର୍ମା ଦଳ ପରିଚାଳନା ନେଇ ଦୀର୍ଘ ସମୟ ଧରି ଆଲୋଚନା କରିଛନ୍ତି । ୟୁଏଇ ଏବଂ ଓମାନରେ ୧୭ ଅକ୍ଟୋବରରୁ ୧୪ ନଭେମ୍ବର ମଧ୍ୟରେ ଟି -୨୦ ବିଶ୍ୱକପ ମ୍ୟାଚ୍ ଅନୁଷ୍ଠିତ ହେବ ।

ବିରାଟ କୋହଲି ବାପା ହେବା ପରେ ବ୍ୟାଟିଂ ଉପରେ ଫୋକସ କରି ଏହି ପଦକ୍ଷେପ ନେଇପାରନ୍ତି । ସୂତ୍ରରୁ ପ୍ରକାଶ, ‘ବିରାଟ ଏ ନେଇ ନିଜେ ଘୋଷଣା କରିବେ । ସେ ବିଶ୍ୱାସ କରନ୍ତି ଯେ ତାଙ୍କ ବ୍ୟାଟିଂ ଉପରେ ଧ୍ୟାନ ଦେବା ଏବଂ ଦୁନିଆର ଶ୍ରେଷ୍ଠ ବ୍ୟାଟ୍ସମ୍ୟାନ୍ ହେବା ତାଙ୍କ ପାଇଁ ଅତି ଜରୁରୀ । ରୋହିତ ଶର୍ମା ତାଙ୍କ ଅଧିନାୟକତ୍ୱରେ ମୁମ୍ବାଇ ଇଣ୍ଡିଆନ୍ସକୁ ୫ ଥର ଆଇପିଏଲ ଟାଇଟଲ ଦେଇଛନ୍ତି । ଅନ୍ୟପକ୍ଷରେ କୋହଲି ଏପର୍ଯ୍ୟନ୍ତ ଅଧିନାୟକ ଭାବରେ ଆଇସିସି ଟ୍ରଫି ଜିତି ନାହାଁନ୍ତି । ଏହା ବ୍ୟତୀତ ସେ ଆଇପିଏଲ୍ ଟାଇଟଲ୍ ମଧ୍ୟ ଜିତିପାରିନଥିଲେ । ଆସନ୍ତା ମାସରୁ ଅନୁଷ୍ଠିତ ହେବାକୁ ଥିବା ଟି -୨୦ ବିଶ୍ୱକପ ପାଇଁ ପୂର୍ବତନ ଅଧିନାୟକ ଏମଏସ ଧୋନିଙ୍କୁ ଏକ ଗୁରୁତ୍ୱପୂର୍ଣ୍ଣ ଦାୟିତ୍ୱ ଦିଆଯାଇଛି । ତାଙ୍କୁ ଦଳର ପରାମର୍ଶଦାତା କରାଯାଇଛି । କୋହଲିଙ୍କ ଅଧିନାୟକତ୍ୱରେ ଟିମ୍ ଇଣ୍ଡିଆ ୨୦୧୭ ଚାମ୍ପିଅନ୍ସ ଟ୍ରଫି, ୨୦୧୯ ODI ବିଶ୍ୱକପ ଏବଂ ୨୦୨୧ ବିଶ୍ୱ ଟେଷ୍ଟ ଚାମ୍ପିଅନସିପ ଖେଳିଛି । କିନ୍ତୁ ଗୋଟିଏ ହେଲେ ଟାଇଟଲ୍ ଜିତିନାହିଁ । ଏଭଳି ପରିସ୍ଥିତିରେ ଧୋନି ତାଙ୍କୁ ସାହାଯ୍ୟ କରିବା ପାଇଁ ଦଳରେ ଯୋଗ ଦେଇଛନ୍ତି ।

ଅନେକ ଦିନର ଆଲୋଚନା ପରେ ନିଷ୍ପତ୍ତି ନେଲେ କୋହଲି

ସମସ୍ତ ତିନୋଟି ଫର୍ମାଟରେ ବିରାଟ କୋହଲିଙ୍କ ଅଧିନାୟକତ୍ୱର ଭାର ରହିଛି, ବିସିସିଆଇ କ୍ରମାଗତ ଭାବରେ ତାଙ୍କ କାର୍ଯ୍ୟ ଭାର ହ୍ରାସ କରିବାକୁ ଚେଷ୍ଟା କରୁଛି । ଅଷ୍ଟ୍ରେଲିଆ ଗସ୍ତରେ ଟେଷ୍ଟ ସିରିଜ୍ ଜିତିବା ପରେ ସୀମିତ ଓଭରରେ ଅଧିନାୟକଙ୍କୁ ବଦଳାଇବା ଉପରେ ଏକ ଗୁରୁତ୍ୱପୂର୍ଣ୍ଣ ଆଲୋଚନା ହୋଇଥିଲା। ଟିମ୍ ଇଣ୍ଡିଆ ସୂତ୍ର ଅନୁଯାୟୀ ଗତ କିଛି ମାସ ଧରି ଚାଲିଥିବା ଆଲୋଚନାରେ ବିରାଟ ତାଙ୍କ ବ୍ୟାଟିଂକୁ ନେଇ ଚିନ୍ତିତ ଥିବା ଦେଖାଯାଇଥିଲା। ଆଗାମୀ ଦୁଇ ବର୍ଷରେ ଭାରତକୁ ଟି -୨୦ ଏବଂ ODI ବିଶ୍ୱକପ୍ ଖେଳିବାକୁ ପଡ଼ିବ ଏବଂ ବିରାଟ ଏଥିରେ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବାକୁ ଚାହୁଁଛନ୍ତି । ବିରାଟ ବ୍ୟାଟ୍ସମ୍ୟାନ୍ ଭାବରେ ତାଙ୍କର ପୁରୁଣା ଫର୍ମକୁ ଫେରିବାକୁ ଚାହୁଁଛନ୍ତି।

କୋହଲିଙ୍କ ବଦଳରେ ରୋହିତ ପରବର୍ତ୍ତୀ ଅଧିନାୟକ ପାଇଁ ସର୍ବୋତ୍ତମ ବିକଳ୍ପ । ୩୪ ବର୍ଷୀୟ ରୋହିତ ଶର୍ମା ବର୍ତ୍ତମାନ ପ୍ରାୟ ସମସ୍ତ ଫର୍ମାଟରେ ଭଲ ପ୍ରଦର୍ଶନ କରୁଛନ୍ତି । ସେ ଦଳରେ ୨ ନମ୍ବର ସ୍ଥାନ ଅଧିକାର କରିଛନ୍ତି, ଟି -୨୦ ରେ ଅଧିନାୟକତ୍ୱ ରେକର୍ଡ ଅତୁଳନୀୟ । ସେ ମୁମ୍ବାଇ ଇଣ୍ଡିଆନ୍ସ ପାଇଁ ପାଞ୍ଚ ଥର ଆଇପିଏଲ ଟ୍ରଫି ଜିତିଛନ୍ତି । ଖାଲି ସେତିକି ନୁହେଁ, ଏହି ସମୟରେ ହ୍ୱାଇଟ୍ ବଲ୍ କ୍ରିକେଟ୍ ରେ ରୋହିତ ଶର୍ମାଙ୍କ ଅପେକ୍ଷା ଦୁନିଆରେ କେହି ବି ଭଲ ଓପନିଂ ବ୍ୟାଟ୍ସମ୍ୟାନ୍ ନାହାଁନ୍ତି ।

ବିସିସିଆଇ ସୂତ୍ରରୁ ଜଣାପଡିଛି ଯେ ଅଧିନାୟକତ୍ୱର ପରିବର୍ତ୍ତନ ଖବରକୁ ଅତିରଞ୍ଜିତ କରି ଉପସ୍ଥାପନ କରାଯିବା ବିସିସିଆଇକୁ ପୂର୍ବରୁ ଜଣାଥିଲା । ବୋର୍ଡ ଏହା ପାଇଁ ବହୁ ପୂର୍ବରୁ ପ୍ରସ୍ତୁତ ହୋଇସାରିଥିଲା ।| ଏହି ପରିବର୍ତ୍ତନକୁ ନେଇ ବିରାଟ ଏବଂ ରୋହିତଙ୍କ ସମାନ ମତ ରହିଛି ବୋଲି ସୂତ୍ରରୁ ପ୍ରକାଶ ପାଇଛି ।

ଝିଅ ଜନ୍ମ ହେବାରୁ ଲୋକଙ୍କୁ ମାଗଣାରେ ଗୁପଚୁପ୍ ଖୁଆଇଲେ ଅଞ୍ଚଲ ଗୁପ୍ତା

0

ମଧ୍ୟପ୍ରଦେଶ: ଆମ ସମାଜରେ, ପୁଅ ଏବଂ ଝିଅ ମଧ୍ୟରେ ଭେଦଭାବ କରୁଥିବା ଅନେକ ଘଟଣା ଶୁଣିଥିବେ ଏବଂ ଦେଖିଥିବେ ମଧ୍ୟ । ଏମିତିକି କିଛି ଲୋକ ଅଛନ୍ତି ଯେଉଁମାନେ ଘରେ କେବଳ ପୁଅର ଜନ୍ମ ହିଁ ଚାହାଁନ୍ତି । କିନ୍ତୁ ମଧ୍ୟପ୍ରଦେଶର ଭୋପାଳରେ ଗୁପଚୁପ ବିକାଳିଙ୍କ ଘରେ ଝିଅ ଜନ୍ମ ହେବାପରେ ଭିନ୍ନ ଢଙ୍ଗରେ  ଖୁସି ପାଳନ କରାଯାଇଛି । ଗୁପଚୁପ ବିକାଳି ଅଞ୍ଚଳ ଗୁପ୍ତା ସମସ୍ତଙ୍କୁ ମାଗଣାରେ ଗୁପଚୁପ ଖାଇବାକୁ ଦେଇଛନ୍ତି । ଏଥିପାଇଁ ସେ ପ୍ରଥମେ ୫୦ ହଜାର ଗୁପ୍‌ଚୁପ୍‌ ପ୍ରସ୍ତୁତ କରିଥିଲେ । ଏଥିପାଇଁ ୧୦ଟି ଷ୍ଟଲ୍ ଲଗାଇଥିଲେ। ଲୋକମାନେ ଅପରାହ୍ନ ୧ଟାରୁ ସନ୍ଧ୍ୟା ୬ଟା ପର୍ଯ୍ୟନ୍ତ ଧାଡିରେ ଗୁପ୍‌ଚୁପ୍ର ମଜା ନେଇଥିଲେ । ଏହାପରେ ସୋସିଆଲ ମିଡିଆରେ ତାଙ୍କୁ ବହୁତ ପ୍ରଶଂସା କରାଯାଉଛି।

ମହିଳା, ଶିଶୁ ଏବଂ ବୟସ୍କମାନେ ଗୁପଚୁପ ଖାଇବା ପରେ ଅଞ୍ଚଲ ଗୁପ୍ତାଙ୍କୁ ତାଙ୍କ ଝିଅର ଆଗମନ ଆନନ୍ଦରେ ଅଭିନନ୍ଦନ ଜଣାଇଛନ୍ତି। ଆଞ୍ଚଳିକ ବିଧାୟକ ରମେଶ୍ୱର ଶର୍ମା ମଧ୍ୟ ଅଞ୍ଚଲ ଗୁପ୍ତାଙ୍କୁ ଅଭିନନ୍ଦନ ଜଣାଇଛନ୍ତି। ସେ କହିଛନ୍ତି ଯେ ତାଙ୍କ ଝିଅର ଆଗମନକୁ ପାଳନ କରିବାର ଏହି ଭିନ୍ନ ଉପାୟ ତାଙ୍କୁ ପସନ୍ଦ ଆସିଛି । ବେଟି ବଚାଓ ଏବଂ ବେଟି ପଢ଼ାଓ ଅଭିଯାନକୁ ପ୍ରୋତ୍ସାହିତ କରିବାର ଏହା ଏକ ଜୀବନ୍ତ ଉଦାହରଣ ।

ଅଞ୍ଚଲ ଗୁପ୍ତା ଗତ ୧୪ବର୍ଷ ଧରି କୋଲାରର ବଞ୍ଜାରୀ ମୁଖ୍ୟ ରାସ୍ତାରେ ଗୁପଚୁପର ଏକ ଷ୍ଟଲ୍ ଲଗାଇଛନ୍ତି। ସେ ଜଣେ ଗୁପ୍‌ଚୁପ୍‌ ବିକ୍ରେତା । ସେ କହିଛନ୍ତି ଯେ ଆଜି ବି ସମାଜର ଅନେକ ଲୋକ ମାଆ ଗର୍ଭରେ ଝିଅମାନଙ୍କୁ ହତ୍ୟା କରିଦେଉଛନ୍ତି। ଏହିପରି ଘଟଣା ପ୍ରତିଦିନ ଖବରକାଗଜରେ ପଢ଼ିଥାଉ। ଏଥିରୁ ଏହା ଜଣାପଡୁଛି ଯେ ଆମେ କେଉଁ ସମାଜରେ ବାସ କରୁଛୁ ଯେ ଜନ୍ମ ପୂର୍ବରୁ ଝିଅମାନଙ୍କୁ ହତ୍ୟା କରାଯାଏ । ଏହି କାରଣରୁ, ମୁଁ ସ୍ଥିର କରିଥିଲି ଯେ ଯଦି ଘରେ ଝିଅ ଜନ୍ମ ନେବ, ତେବେ ମୁଁ ଲୋକଙ୍କୁ ମାଗଣାରେ ଖାଇବାକୁ ଦେବି ।

ମହାନଦୀ ଉପରମୁଣ୍ଡରେ ହୋଇଛି କମ୍‌ ବର୍ଷା, ସେଥିପାଇଁ ରାଜ୍ୟରେ ନାହିଁ ବନ୍ୟା ଆଶଙ୍କା

ଭୁବନେଶ୍ୱର: ରାଜ୍ୟରେ ନାହିଁ ବନ୍ୟା ସ୍ଥିତି। ମହାନଦୀ ଉପରମୁଣ୍ଡରେ ଅଧିକ ବର୍ଷା ହୋଇନି। ବୈତରଣୀ, ସୁବର୍ଣ୍ଣରେଖା, ବୁଢ଼ାବଳଙ୍ଗ, କୋଲାବ    ବେସିନରେ ବି ଅଧିକ ବର୍ଷା ନାହିଁ। ୮ଟି ବୃହତ ଜଳଭଣ୍ଡାରରୁ ହୀରାକୁଦ ଓ ରେଙ୍ଗାଲିକୁ ଛାଡିଦେଲେ ଅନ୍ୟ ଜଳଭଣ୍ଡାରରେ ୫୦ ପ୍ରତିଶତରୁ କମ ଜଳ ରହିଛି। ଏହା ଜଳସେଚନ ପାଇଁ ସହଯୋଗ କରିବ।

ମହାନଦୀ ନରାଜରେ ଜଳସ୍ତର ୪ ମିଟର ତଳେ ଅଛି। ବ୍ରାହ୍ମଣୀରେ ଜଳସ୍ତର ବଢ଼ୁଥିଲେ ବି ବିପଦ ସଙ୍କେତ ଉପରେ ନାହିଁ। ବୈତରଣୀ ଆଖୁଆପଦାରେ ବଢୁଛି ଜଳସ୍ତର। ସୁବର୍ଣ୍ଣରେଖା ବି ବିପଦ ସଂକେତ ତଳେ ରହିଛି ଜଳସ୍ତର। ସେପଟେ ବିପଦ ସଂକେତ ଉପରେ ପ୍ରବାହିତ ହେଉଛି ଜଳକା ନଦୀର ଜଳସ୍ତର। ବିପଦ ସଂକେତ ୫.୫୦ ମିଟର ଥିବା ବେଳେ ୫.୫୫ ମିଟରରେ ଜଳ ପ୍ରବାହିତ ହେଉଛି। ଅନ୍ୟ ନଦୀ ଗୁଡିକ ବିପଦ ସଂକେତ ତଳେ ରହିଛି।

ସବୁ ସ୍ଥାନରେ ଅଧିକାରୀ ସଜାଗ ଅଛନ୍ତି। ସମ୍ଭାବ୍ୟ ସ୍ଥିତିକୁ ଦେଖି ସଜାଗ ରହିଛି ବିଭାଗ। ଚିହ୍ନଟ ହୋଇଥିବା ସମ୍ବେଦନଶୀଳ ସ୍ଥାନ ଉପରେ ନଜର ରଖାଯାଇଛି। ଲଗାଣ ବର୍ଷା ନେଇ ଜଳସମ୍ପଦ ବିଭାଗ ଅଧିକାରୀଙ୍କ ଛୁଟି ବାତିଲ କରାଯାଇଛି। ୨୦ଟି ସମ୍ବେଦନଶୀଳ ସ୍ଥାନ ଚିହ୍ନଟ ହୋଇଛି। ରାତ୍ରିକାଳୀନ ପାଟ୍ରୋଲିଂ ଆବଶ୍ୟକସ୍ଥଳେ କରିବାକୁ କୁହାଯାଇଛି। ତଳିଆ ଅଞ୍ଚଳରେ ସ୍ଥିତି ନିୟନ୍ତ୍ରଣ ପାଇଁ  ସଜାଗ ରହିଛି ବିଭାଗ।

ଶସ୍ତା ରାଜନୀତିରୁ ଦୁରେଇ ରହିବାକୁ ସାଂସଦ ଅପରାଜିତା ଷଡ଼ଙ୍ଗୀଙ୍କୁ ବିଜେଡିର ପରାମର୍ଶ

ଭୁବନେଶ୍ୱର: ଲଘୁଚାପ ଗଭୀର ଅବପାତର ରୂପ ନେବା ଫଳରେ ରାଜ୍ୟର ବିଭିନ୍ନ ସ୍ଥାନରେ ପ୍ରବଳ ବର୍ଷା ଜାରି ରହିଛି। ରାଜଧାନୀ ଭୁବନେଶ୍ୱରରେ ଗତ ୪୮ ଘଣ୍ଟା ମଧ୍ୟରେ ୧୯୫ ମିଲିମିଟର ବର୍ଷା ହୋଇଛି। ରାଜ୍ୟର ବିଭିନ୍ନ ନଦୀରେ ବୃଦ୍ଧି ପାଉଛି ଜଳସ୍ତର। ଏଭଳି ସ୍ଥିତିରେ ଲୋକଙ୍କ ସହ ରହିବା ପରିବର୍ତ୍ତେ ଭୁବନେଶ୍ୱର ସାଂସଦ ଅପରାଜିତା ଷଡ଼ଙ୍ଗୀ ଶସ୍ତା ରାଜନୀତି କରୁଛନ୍ତି ବୋଲି ଅଭିଯୋଗ କରିଛି ବିଜେଡି ।

ଭୁବନେଶ୍ୱରେ ଲଗାଣ ବର୍ଷା ଯୋଗୁ ସୃଷ୍ଟି ହୋଇଥିବା ସ୍ଥିତିକୁ ନେଇ ଟ୍ୱିଟ୍ କରିଥିଲେ ସାଂସଦ ଅପରାଜିତା ଷଡ଼ଙ୍ଗୀ। ଟ୍ୱିଟକରି ସେ ରାଜ୍ୟ ସରକାରଙ୍କୁ ସମାଲୋଚନା କରିବା ସହିତ  ସଂସଦୀୟ ଷ୍ଟାଣ୍ଡିଂ କମିଟିର ପରାମର୍ଶକୁ ଲାଗୁ କରିବାରେ କାହିଁକି ବିଳମ୍ବ ହେଉଛି ବୋଲି ପ୍ରଶ୍ନ କରିଥିଲେ। ଯାହାର ଉତ୍ତର ଦେଇଛନ୍ତି ବିଜେଡି ମୁଖପାତ୍ର ଶ୍ରୀମୟୀ ମିଶ୍ର। ପାଲଟା ଟ୍ୱିଟ୍ କରି ଶ୍ରୀମୟୀ ମିଶ୍ର ବିଏମସି କମିଶନର ଭାବେ ଅପରାଜିତାଙ୍କ କାର୍ଯ୍ୟକାଳକୁ ମନେ ପକାଇଛନ୍ତି। ସେ ଟ୍ୱିଟରରେ ଲେଖିଛନ୍ତି ଯେ, ୧୨ ବର୍ଷ ତଳେ ୨୦୦୬ରୁ ୨୦୦୯ ମସିହା ପର୍ଯ୍ୟନ୍ତ ୩ ବର୍ଷ ଧରି ବିଏମସି କମିଶନର ଥିବା ବର୍ତ୍ତମାନର ସାଂସଦ ଅପରାଜିତା ଷଡ଼ଙ୍ଗୀ ନିଜ ଉନ୍ନତ ମସ୍ତିଷ୍କରେ ସେତେବେଳେ ଯେଉଁ କାମ କରିଥିଲେ ତା’ର ପରିଣାମ ଏବେ ଭୁବନେଶ୍ୱର ସହରବାସୀଙ୍କୁ ଭୋଗିବାକୁ ପଡୁଛି।

ବିଏମସି କମିଶନର ଭାବେ ତାଙ୍କ କାର୍ଯ୍ୟର ପ୍ରାୟଶ୍ଚିତ ଆମେ କରୁଛୁ ବୋଲି ଶ୍ରୀମୟୀ ଲେଖିଛନ୍ତି। ସେ ଆହୁରି ଉଲ୍ଲେଖ କରିଛନ୍ତି ଯେ, ଭୁବନେଶ୍ୱର ଜଳ ନିଷ୍କାସନ ସମସ୍ୟା ନେଇ ସାଂସଦଙ୍କ ବିବୃତି ଅତ୍ୟନ୍ତ ହାସ୍ୟାସ୍ପଦ। ଏହା ସାଂସଦ ଓ ପୂର୍ବରୁ ବିଏମସି କମିଶନର ଭାବେ ତାଙ୍କ ଅପାରଗତାକୁ ପଦାରେ ପକାଉଛି। ଗୁଜରାଟ ମଡେଲର ଡିଣ୍ଡିମ ପିଟୁଥିବା ବିଜେପି, ଅହମଦାବାଦରେ ବର୍ଷା ପରବର୍ତ୍ତୀ ବିକଳ ଚିତ୍ର ଟିକେ ଦେଖି ନିଅନ୍ତୁ ବୋଲି ଶ୍ରୀମୟୀ କହିଛନ୍ତି। ଶସ୍ତା ରାଜନୀତି ଛାଡ଼ନ୍ତୁ ବୋଲି ମଧ୍ୟ ଲେଖିଛନ୍ତି ବିଜେଡିର ନେତ୍ରୀ। ଟ୍ୱିଟରରେ ଗୁଜରାଟ ଓ ଲକ୍ଷ୍ନୌରେ ପ୍ରବଳ ବର୍ଷାରେ ସ୍ଥିତି କେମିତି ବେହାଲ ହୋଇଛି ତାର ଚିତ୍ର ମଧ୍ୟ ଲୋକେ କମେଣ୍ଟରେ ଦେଇଥିବା ଦେଖିବାକୁ ମିଳିଛି।

ଚୋରକୁ ମାଡ଼ି ବସିଲା ୧୪ ବର୍ଷର ପିଲା,ଜାଣନ୍ତୁ କେଉଁଠି

ଅନୁଗୁଳ: ଘରେ ପଶି ଚୋରି କରିବା ବେଳେ ଧରା ପଡ଼ିଲା ଚୋର। ରୋରକୁ ବାନ୍ଧି ସ୍ଥାନୀୟ ଲୋକେ ନିସ୍ତୁକ ମାଡ଼ ଦେବା ପରେ ପୋଲିସ ଜିମା ଦେଲେ। ଅନୁଗୁଳ ଜିଲ୍ଲା ଜରପଡ଼ା ଥାନା  କୋରଡ଼ା ଆମ୍ବୁରି ସାହିରେ ଏହି ଘଟଣା ଘଟିଛି। ରାତିରେ ଚକ୍ରଧର ସାହୁଙ୍କ ଘରେ ପଶି ଚୋର ଚୋରି କରୁଥିଲା। ଚକ୍ରଧରଙ୍କ ମୁଣ୍ଡ ପାଖରୁ ମୋବାଇଲ ଓ ଶେଜ ତଳୁ ୭୭୦ ଟଙ୍କା ନେବା ପରେ ଚାବି ନେଇ ଆଲମୀରା ଖୋଲି ଥିଲା।

ଆଲମୀରାରୁ କିଛି ଜିନିଷ ଖସି ପଡ଼ିବାରୁ ଶବ୍ଦ ଶୁଣି ଚକ୍ରଧରଙ୍କ ୧୪ ବର୍ଷର ପୁଅ ଦିପେନ ସାହସ କରି ଚୋରର ବେକକୁ ଜାବୁଡି ଧରି ପାଟି କରିଥିଲା। ଅନ୍ୟମାନେ ଉଠି ପଡ଼ିବା ସହ ସମସ୍ତେ ମିଶି ଚୋରକୁ କାବୁ କରି ନେଇଥିଲେ। ତାକୁ ବାନ୍ଧି ନିସ୍ତୁକ ମାଡ଼ ଦେବା ପରେ ଜରପଡ଼ା ଥାନାକୁ ଖବର ଦେବା ପରେ ପୋଲିସ ଚୋରକୁ ଅଟକ ରଖିଛି। ସମ୍ପୃକ୍ତ ଚୋର ପୁଟଗାଡ଼ିଆ ଗାଁର ସାଗର ସିଂହ ବୋଲି ଜଣାପଡ଼ିଛି।

ପ୍ରକାଶ ପାଇଲା ଯୁକ୍ତ ୨ କଟ୍‌ଅଫ୍‌ ମାର୍କ, ଜାଣନ୍ତୁ କେଉଁ କଲେଜରେ କେତେ ରହିଛି କଟ୍‌ଅଫ୍‌

ଭୁବନେଶ୍ୱର: ପ୍ରକାଶ ପାଇଲା ଯୁକ୍ତ ୨ କଟ୍‌ ଅଫ୍‌ ମାର୍କ। ww.samsodisha.gov.in ପୋର୍ଟାଲରେ ଉପଲବ୍ଧ ହୋଇଛି ତାଲିକା। ତିନୋଟି ଷ୍ଟ୍ରିମରେ ରେଭେନ୍ସା ହାୟର ସେକେଣ୍ଡାରୀ ସ୍କୁଲର ସର୍ବାଧିକ କଟ୍‌ ଅଫ ମାର୍କ ରିହଛି। କଳାରେ ୭୯.୦୩% କଟ୍‌ ଅଫ୍‌ ରହିଥିବା ବେଳେ ବାଣିଜ୍ୟରେ ୮୨% ଏବଂ ବିଜ୍ଞାନରେ ୯୧.୩୩% ସହ ଆଗରେ ରହିଛି ରେଭେନ୍ସା।

ଅଗଷ୍ଟ ୧୨ ତାରିଖରୁ ଯୁକ୍ତ୨ ନାମଲେଖା ପାଇଁ ଆବେଦନ ପ୍ରକ୍ରିୟା ଆରମ୍ଭ ହୋଇ ସେପ୍ଟେମ୍ବର ୫ ତାରିଖ ପର୍ଯ୍ୟନ୍ତ ଚାଲିଥିଲା ଆବେଦନ। ଆଜି ମେରିଟ ଲିଷ୍ଟ ପ୍ରକାଶ ପାଇଥିବୀ ବେଳେ ୧୪ ରୁ ୨୧ ତାରିଖ ମଧ୍ୟରେ ନାମଲେଖା ହେବ। ସେହିପର ଦ୍ୱିତୀୟ ପର୍ଯ୍ୟାୟ କଟ୍ ଅଫ୍ ମାର୍କ ୨୭ ତାରିଖରେ ବାହାରିବା ପରେ ୨୯ରୁ ଅକ୍ଟୋବର ୧ ତାରିଖ ମଧ୍ୟରେ ନାମଲେଖା ହେବ।

ଏହି ଦୁଇ ପର୍ଯ୍ୟାୟ ନାମଲେଖା ପରେ ବଳକା ସିଟ ପାଇଁ ଅକ୍ଟୋବର ୪ରେ ତାଲିକା ପ୍ରକାଶ ପାଇବ ଓ ୫ ସୁଦ୍ଧା ପଞ୍ଜୀକରଣ ଏବଂ ମେରିଟ ଲିଷ୍ଟ ପରେ ଅକ୍ଟୋବର ୭ ତାରିଖରେ ହେବ ନାମଲେଖା। ତେବେ ଏଥର ପ୍ରାୟ ୫ ଲକ୍ଷ ଯୁକ୍ତ ଦୁଇ ସିଟ୍ ପାଇଁ ଆବେଦନ କରିଛନ୍ତି ୪ଲକ୍ଷ ୭୧ ହଜାର ୬୧୨ ଜଣ ଛାତ୍ରଛାତ୍ରୀ।