ନନ୍ଦିଘୋଷ ବ୍ୟୁରୋ : ତାମିଲନାଡୁ ସରକାର ଲଗାତାର ଭାବେ କିଛି ଅଲଗା ଓ ଭିନ୍ନ ଧରଣର ନିଷ୍ପତ୍ତି ନେଉଛନ୍ତି । ବିଜୟ ସରକାର ରାଜ୍ୟର ୫୨ଟି ବଡ ମନ୍ଦିରରେ ସ୍ମାର୍ଟଫୋନ ନେବା ଓ ଏହାର ବ୍ୟବହାର ଉପରେ ରୋକ ଲଗାଇଛନ୍ତି, ଏହି ନୂଆ ନିୟମ ସେପ୍ଟେମ୍ବର ୧ ତାରିଖରୁ ଲାଗୁ ହୋଇଛି । ନୂଆ ନିୟମ ଅନୁସାରେ, ମନ୍ଦିରକୁ ଆସୁଥିବା ଭକ୍ତଙ୍କ ପାଖରେ ସ୍ମାର୍ଟଫୋନ୍ ଥିଲେ ତାହାକୁ କାଉଣ୍ଟରରେ ଜମା କରିବା ସହ । ପ୍ରତି ଫୋନ୍ ପିଛା ୫ ଟଙ୍କା ଫିସ ଦେବାକୁ ପଡ଼ିବ। ତେବେ କ୍ୟାମେରା ନଥିବା ମୋବାଇଲ୍ ଫୋନ୍କୁ ମନ୍ଦିର ଭିତରକୁ ନେବାକୁ ଅନୁମତି ରହିବ ।
ଏହି କଟକଣା ଲାଗୁ ନେଇ ହିନ୍ଦୁ ରିଲିଜିୟସ୍ ଆଣ୍ଡ ଚାରିଟେବଲ୍ ଏଣ୍ଡାଉମେଣ୍ଟ (HR&CE) ମନ୍ତ୍ରୀ ରମେଶଙ୍କ ଘୋଷଣା ପରେ ଏହି ନିୟମ ଲାଗୁ ହୋଇଛି। ମାଡ୍ରାସ ହାଇକୋର୍ଟଙ୍କ ପୂର୍ବ ନିର୍ଦ୍ଦେଶ ଆଧାରରେ ମନ୍ଦିରର ପବିତ୍ରତା ଓ ଶାନ୍ତିପୂର୍ଣ୍ଣ ପରିବେଶ ବଜାୟ ରଖିବା ପାଇଁ ଏହି ପଦକ୍ଷେପ ନିଆଯାଇଛି । ବିଶେଷକରି ଯୁବପିଢ଼ିଙ୍କ ଦ୍ୱାରା ମନ୍ଦିର ପରିସର ଭିତରେ ଫଟୋ ଉଠାଇବା, ରିଲ୍ସ ତିଆରି କରିବା ଏବଂ ଭିଡିଓ ରେକର୍ଡ କରିବା ନେଇ ଚିନ୍ତା ପ୍ରକାଶ ପାଇବା ପରେ ସରକାର ଏହି ନିଷ୍ପତ୍ତି ନେଇଛନ୍ତି। ଏପରି କାମ ମନ୍ଦିରର ନିୟମ ବିରୋଧୀ ଥିଲା।
‘ବ୍ୟାନ୍ର ମୁଖ୍ୟ ଉଦ୍ଦେଶ୍ୟ ଶାନ୍ତିରେ ପୂଜା କରିବା।
ନିଜର ଏକ ବୟାନରେ ରମେଶ ସ୍ପଷ୍ଟ କରିଛନ୍ତି ଯେ, କ୍ୟାମେରା ନଥିବା ମୋବାଇଲ୍ ଫୋନ୍କୁ ମନ୍ଦିର ଭିତରକୁ ନେବାକୁ ଅନୁମତି ରହିବ। ଏହି କଟକଣାର ଉଦ୍ଦେଶ୍ୟ ମନ୍ଦିର ଭିତରେ ଅନଧିକୃତ ଫଟୋଗ୍ରାଫି ଓ ଭିଡିଓ ରେକର୍ଡିଂ ଉପରେ ରୋକ୍ ଲଗାଇବା ସହ ଶ୍ରଦ୍ଧାଳୁମାନେ ଶାନ୍ତିପୂର୍ଣ୍ଣ ଭାବେ ପୂଜା କରିପାରିବେ ତାହା ସୁନିଶ୍ଚିତ କରିବା। ନୂଆ ବ୍ୟବସ୍ଥା ଅନୁସାରେ, ସ୍ମାର୍ଟଫୋନ୍ ନେଇ ଆସୁଥିବା ଶ୍ରଦ୍ଧାଳୁମାନେ ମନ୍ଦିର ପ୍ରବେଶ ଦ୍ୱାରରେ ଥିବା ସ୍ୱତନ୍ତ୍ର କାଉଣ୍ଟରରେ ଫୋନ୍ ଜମା କରିବାକୁ ପଡ଼ିବ। ଏଥିପାଇଁ ଭକ୍ତମାନଙ୍କୁ ଏକ ଟୋକନ୍ ଦିଆଯିବ। ଫୋନ୍ ଫେରି ନେବା ସମୟରେ ଏହି ଟୋକନ୍ ଜମା କରିବାକୁ ପଡ଼ିବ।
ପାର୍କିଂ ଅଞ୍ଚଳରେ ଅନେକ ଭାଷାରେ ଲଗାଯାଇଛି ସୂଚନା ଫଳକ
କାଞ୍ଚିପୁରମର ପ୍ରସିଦ୍ଧ ଦେବରାଜସ୍ୱାମୀ-ଅଥି ବରଦର ମନ୍ଦିରରେ ଏହି ବ୍ୟବସ୍ଥା ଗତକାଲି ମଙ୍ଗଳବାର ସକାଳ ୬ଟାରୁ ଲାଗୁ ହୋଇଛି। ଫୋନ୍ ଜମା କରିବା ପାଇଁ ୨ ଜଣ କମ୍ପ୍ୟୁଟର ଅପରେଟର ଏବଂ ୨ ଜଣଙ୍କୁ ନିୟୋଜିତ କରାଯାଇଛି। ଫୋନ୍ ଜମା କରିବା ସମୟରେ ଶ୍ରଦ୍ଧାଳୁଙ୍କ ଫଟୋ, ମୋବାଇଲ୍ ଫୋନ୍ର ମଡେଲ୍ ଏବଂ ଫୋନ୍ ନମ୍ବର ରେକର୍ଡ କରାଯାଏ ଏବଂ ବଦଳରେ ଏକ ରସିଦ ଦିଆଯାଏ। ଫୋନ୍ ଫେରାଇବା ସମୟରେ ସମସ୍ତ ତଥ୍ୟ ମେଳ କରିବା ପରେ ଫୋନ୍ ଫେରାଇ ଦିଆଯାଏ। ମନ୍ଦିର ଆଖପାଖରେ ଥିବା ପାର୍କିଂ ଅଞ୍ଚଳ ଏବଂ ଅନ୍ୟ ପ୍ରମୁଖ ସ୍ଥାନରେ ଅନେକ ଭାଷାରେ ସୂଚନା ଫଳକ ଲଗାଯାଇଛି। ଏହି ଫଳକ ମାଧ୍ୟମରେ ଶ୍ରଦ୍ଧାଳୁଙ୍କୁ ସ୍ମାର୍ଟଫୋନ୍ ଉପରେ ଲାଗୁ ହୋଇଥିବା କଟକଣା ସମ୍ପର୍କରେ ସୂଚନା ଦିଆଯାଉଛି। HR&CE ବିଭାଗ କହିଛି ଯେ, ପ୍ରାୟ ୪ ବର୍ଷ ପୂର୍ବେ ୨ ଡିସେମ୍ବର ୨୦୨୨ରେ ମାଡ୍ରାସ ହାଇକୋର୍ଟର ମଦୁରାଇ ବେଞ୍ଚ ଦେଇଥିବା ଆଦେଶ ଅନୁସାରେ ଏହି ନିର୍ଦ୍ଦେଶ ଜାରି କରାଯାଇଛି। ପୂର୍ବରୁ ଜାରି ହୋଇଥିବା ସର୍କୁଲାରରେ ମଧ୍ୟ ମନ୍ଦିରଗୁଡ଼ିକୁ ଶ୍ରଦ୍ଧାଳୁମାନଙ୍କୁ ମୋବାଇଲ୍ ଫୋନ୍ ଭିତରକୁ ନେବାରୁ ରୋକିବା ଏବଂ ଫୋନ୍ଗୁଡ଼ିକୁ ସୁରକ୍ଷିତ ରଖିବା ପାଇଁ ବ୍ୟବସ୍ଥା କରିବାକୁ ନିର୍ଦ୍ଦେଶ ଦିଆଯାଇଥିଲା।
ହାଇକୋର୍ଟଙ୍କ ଆଦେଶ ପରେ ସରକାର ଲାଗୁ କଲେ ବ୍ୟବସ୍ଥା
ହାଇକୋର୍ଟ ତିରୁଚେନ୍ଦୁରର ଅରୁଲମିଗୁ ସୁବ୍ରମଣ୍ୟ ସ୍ୱାମୀ ମନ୍ଦିର ଭିତରେ ସ୍ମାର୍ଟଫୋନ୍ ବ୍ୟବହାର ଉପରେ ରୋକ୍ ଲଗାଇବା ଦାବିରେ ସୀତାରମଣଙ୍କ ଜନସ୍ୱାର୍ଥ ମାମଲାର ଶୁଣାଣି ପରେ ଏହି ଆଦେଶ ଜାରି କରିଥିଲେ। HR&CEର ଏକ ସର୍କୁଲାରରେ କୁହାଯାଇଛି ଯେ, କିଛି ଶ୍ରଦ୍ଧାଳୁ ଏବେ ମଧ୍ୟ ମନ୍ଦିର ପରିସର ଭିତରେ ଫଟୋ ଉଠାଇବା, ଭିଡିଓ ରେକର୍ଡ କରିବା, ସେଲ୍ଫି ନେବା ଏବଂ ସୋସିଆଲ ମିଡିଆ ପାଇଁ ଶର୍ଟ ଭିଡିଓ କିମ୍ବା ରିଲ୍ ତିଆରି କରିବାରେ ମୋବାଇଲ୍ ଫୋନ୍ ବ୍ୟବହାର କରୁଛନ୍ତି।
ସର୍କୁଲାରରେ କୁହାଯାଇଛି ଯେ, ଏଭଳି କାର୍ଯ୍ୟକଳାପ ଯୋଗୁଁ ମନ୍ଦିରର ଶାନ୍ତ ଓ ଆଧ୍ୟାତ୍ମିକ ପରିବେଶ ପ୍ରଭାବିତ ହେଉଛି ଏବଂ ଅନ୍ୟ ଭକ୍ତମାନେ ମଧ୍ୟ ଅସୁବିଧାର ସମ୍ମୁଖୀନ ହେଉଛନ୍ତି। ମନ୍ଦିରର ପ୍ରବେଶ ଦ୍ୱାର ଏବଂ ମନ୍ଦିର ପରିସର ବାହାରେ ସ୍ପଷ୍ଟ ଭାବେ ବୋର୍ଡ ଲଗାଇବାକୁ ମନ୍ଦିର ପ୍ରଶାସନକୁ ନିର୍ଦ୍ଦେଶ ଦିଆଯାଇଛି। ଏହି ବୋର୍ଡରେ ମୋବାଇଲ୍ ଫୋନ୍ ବ୍ୟବହାର ମନା ବୋଲି ଲେଖା ରହିବ। ପବ୍ଲିକ୍ ଆଡ୍ରେସ୍ ସିଷ୍ଟମ୍ ମାଧ୍ୟମରେ ମଧ୍ୟ ଏହି କଟକଣା ବିଷୟରେ ଘୋଷଣା କରାଯିବ। ଏଥିସହ ବିଭାଗ ପକ୍ଷରୁ ମନ୍ଦିର ପରିସର ଭିତରେ ଦେବାଦେବୀଙ୍କ ଫଟୋ ଓ ଭିଡିଓ ନେବା ସହ ଧାର୍ମିକ ଅନୁଷ୍ଠାନର ରେକର୍ଡିଂ ଉପରେ ମଧ୍ୟ ରୋକ୍ ଲଗାଯାଇଛି। ଏକ ରିପୋର୍ଟ ଅନୁସାରେ, VIP, ପ୍ରସିଦ୍ଧ ବ୍ୟକ୍ତି କିମ୍ବା ଫିଲ୍ମ ତାରକାଙ୍କ ସହ ଜଡ଼ିତ ଫଟୋ କିମ୍ବା ଭିଡିଓ ପାଇଁ ମଧ୍ୟ ଅନୁମତି ନଦେବାକୁ ନିର୍ଦ୍ଦେଶ ଦିଆଯାଇଛି।
ନୂଆ ନିୟମକୁ ନେଇ ମନ୍ଦିର କର୍ମଚାରୀ-ଶ୍ରଦ୍ଧାଳୁ ଚିନ୍ତିତ
‘ଦ ହିନ୍ଦୁ’ ଖବରକାଗଜ ମନ୍ଦିର କର୍ମଚାରୀ ଏବଂ ଶ୍ରଦ୍ଧାଳୁଙ୍କ ଉଦ୍ଧୃତ କରି କହିଛି ଯେ, ସ୍ମାର୍ଟଫୋନ୍ର ସୁରକ୍ଷା ଦାୟିତ୍ୱକୁ ନେଇ ସେମାନେ ଏବେ ଚିନ୍ତାରେ ଅଛନ୍ତି। ମନ୍ଦିରର ଜଣେ କର୍ମଚାରୀ କହିଛନ୍ତି ଯେ, ବହୁ ସଂଖ୍ୟକ ସ୍ମାର୍ଟଫୋନ୍ ସମ୍ଭାଳିବା କର୍ମଚାରୀଙ୍କ ପାଇଁ ଏକ ବଡ଼ ଦାୟିତ୍ୱ ଏବଂ ଚାପର କାମ ହେବ।
ଏହି କର୍ମଚାରୀ କହିଛନ୍ତି ଯେ, ଜୋତା-ଚପଲ ଭଳି ନୁହେଁ, ଯାହା କେବେ କେବେ ଏପଟ ସେପଟ ହୋଇଗଲେ ମଧ୍ୟ ଖୋଜି ମିଳିପାରେ। କିନ୍ତୁ ମୋବାଇଲ୍ ଫୋନ୍ ମୂଲ୍ୟବାନ ବ୍ୟକ୍ତିଗତ ଗ୍ୟାଜେଟ୍। ଏହାକୁ ସମ୍ଭାଳିବାରେ କୌଣସି ଭୁଲ ହେଲେ ଏହା ସମସ୍ୟାର କାରଣ ହୋଇପାରେ।
ମୋବାଇଲ ଫୋନ୍ ଜମା ପାଇଁ ଫି’କୁ ନେଇ ଅସନ୍ତୋଷ
