ପୁରୀ: ବାଜ୍ୟାପ୍ତି ହେବ ପୁରୀର ବ୍ରାଉନସୁଗାର ବେପାରୀ ଅନିରୁଦ୍ଧ ଜୟସିଂର ସମ୍ପତ୍ତି । ସମ୍ପତି ବାଜ୍ୟାପ୍ତି କରିବାକୁ ଅନୁମତି ଦେଇଛି SAFEMA । ଏନେଇ ସୂଚନା ଦେଇଛି ପୁରୀ ପୋଲିସ । ସୂଚନା ଅନୁସାରେ ଗତ ଜାନୁୟାରୀ ୭ ତାରିଖରେ ଅନିରୁଦ୍ଧ ଜୟସିଂକୁ ଗିରଫ କରିଥିଲା ପୁରୀ ପୋଲିସ । ପୁରୀ ବାସେଳୀସାହି ଥାନା ଅଞ୍ଚଳରେ ବ୍ରାଉନସୁଗାର କାରବାରରେ ସେ ସଂପୃକ୍ତ ଥିଲା । ଅନିରୁଦ୍ଧ ନିକଟରୁ ପାଖାପାଖି କୋଟିଏ ଟଙ୍କାର ସମ୍ପତି ଜବତ ହୋଇଥିଲା । ଅନିରୁଦ୍ଧ ଜୟସିଂର ସମ୍ପତ୍ତି ବାଜ୍ୟାପ୍ତି କରିବାକୁ SAFEMA ନିକଟରେ ଆବେଦନ କରିଥିଲା ପୁରୀ ପୋଲିସ । ତେବେ ଅପରାଧୀର ସମ୍ପତ୍ତି ବାଜ୍ୟାପ୍ତି ପୁରୀ ଜିଲ୍ଲାରେ ପ୍ରଥମ ବୋଲି ଜଣାପଡ଼ିଛି ।
ବିନା ଅନୁମତିରେ ଛୁଟିରେ ଯାଇଥିଲେ, ସରକାର ସସପେଣ୍ଡ କରିଦେଲେ
ନୂଆଦିଲ୍ଲୀ: IPS ଅଧିକାରୀଙ୍କ ବିରୋଧରେ ୟୁପି ସରକାରଙ୍କ କଠୋର କାର୍ଯ୍ୟାନୁଷ୍ଠାନ । ଚାକିରୀରୁ ସସପେଣ୍ଡ କରିଦେଲେ ସରକାର । କାରଣ ମଧ୍ୟ ସେହିଭଳି । IPS ଅଧିକାରୀ ଅଳଙ୍କୃତା ସିଂହ ସରକାରଙ୍କ ବିନା ଅନୁମତିରେ ଛୁଟି କାଟିବାକୁ ଯାଇଛନ୍ତି । ତାହା ପୁଣି ଲଣ୍ଡନ । ତେଣୁ ବିନା ଅନୁମତି ଏବଂ ଆବେଦନରେ ଜଣେ ବରିଷ୍ଠ ପୋଲିସ ଅଧିକାରୀ ଲଣ୍ଡନରେ ଛୁଟି କାଟିବା ଖବର ଯେତିକି ରୋଚକମୟ । ସରକାର ପାଇଁ ସେତିକି ଗିରିତ୍ୱପୂର୍ଣ୍ଣ ମଧ୍ୟ । ତେଣୁ ସମସ୍ତ ଘଟଣାକ୍ରମକୁ ଅବଲୋକନ କରି ୟୁପି ସରକାର ତାଙ୍କୁ ଚାକିରୀରୁ ସସପେଣ୍ଡ କରିଥିବା ଜଣାପଡ଼ିଛି ।
ସୂଚନା ମୁତାବକ ଉକ୍ତ ଅଧିକାରୀ ଜଣଙ୍କ କିଛିଦିନ ହେବ ନିଜ ପଦବୀରୁ ନିଖୋଜ ଥିଲେ । ୧୯ ଅକ୍ଟୋବରରୁ ଛୁଟିରେ ରହିଥିଲେ । ଯେ ଅଳଙ୍କୃତା ସିଂହ କେଉଁଆଡ଼େ ଯାଇଛନ୍ତି ଏପର୍ଯ୍ୟନ୍ତ ମଧ୍ୟ ସରକାରଙ୍କ ପାଖରେ କୌଣସି ସୂଚନା ନଥିଲା । ପରବର୍ତ୍ତୀ ସମୟରେ ଜଣାପଡିଥିଲା ଯେ, ପୋଲିସ ଅଧିକାରୀ ଜଣଙ୍କ ଲଣ୍ଡନରେ ଛୁଟି କାଟୁଛନ୍ତି । ୟୁପି ବିଧାନସଭା ନିର୍ବାଚନରେ ଅଧିକାରୀ ଜଣଙ୍କ ଭାଗ ନେଇନଥିବାବେଳେ ନିଜର ଦାୟିତ୍ୱ ଓ କର୍ତ୍ତବ୍ୟ ମଧ୍ୟ ସମ୍ପାଦନ କରିନଥିଲେ । ଲଣ୍ଡନରେ ରହୁଥିବା ନେଇ ହ୍ୱାଟସଅପ ଜରିଆରେ ନିକଟସ୍ଥ ଅଧିକାରୀଙ୍କୁ ଅବଗତ କରାଇଥିଲେ ଅଳଙ୍କୃତା ।
କୌଣସି ପ୍ରଶାସନିକ ଅଧିକାରୀ କିମ୍ବା ଆଇପିଏସ ଅଫିସର ଯଦି ଛୁଟିରେ ଯାଆନ୍ତି, ତେବେ ତାଙ୍କୁ ପ୍ରଥମେ ଅବଗତ କରାଇବାକୁ ପଡ଼େ । ଅନୁମତି କ୍ରମେ ସେ ଛୁଟିରେ ଯିବା ନେଇ ଆଇନ ରହିଛି । କିନ୍ତୁ ଦୀର୍ଘ ଦିନ ହେବ ବିନା ଅନୁମତିରେ ଛୁଟିରେ ରହିଆସୁଥିଲେ ଉକ୍ତ ଅଧିକୀରୀ । ୨୦୦୮ ମସିହାରେ ଆଇପିଏସ ହୋଇଥିଲେ ଅଳଙ୍କୃତା । ମହିଳା ଏବଂ ଶିଶୁ ସୁରକ୍ଷା ସଂଗଠନର ଅଧିକାରୀ ଭାବେ ଉତ୍ତରପ୍ରଦେଶ ସରକାର ଦାୟିତ୍ୱ ପ୍ରଦାନ କରିଥିଲେ । ଏଥିରୁ ସେ ନିବୃତ୍ତ ରହିବା ସହ ନିଖୋଜ ରହିଥିଲେ । ତେଣୁ ଆଇନ ମୁତାବକ ଉତ୍ତରପ୍ରଦେଶ ସରକାର କାର୍ଯ୍ୟାନୁଷ୍ଠାନ ଗ୍ରହଣ କରିଛନ୍ତି ।
ଦେଢ଼ ବର୍ଷର ଶିଶୁକୁ ମାରି ଆତ୍ମହତ୍ୟା କଲେ ବାପା-ମାଆ
ଭୁବନେଶ୍ୱର: ଭୁବନେଶ୍ୱର ଲକ୍ଷ୍ମୀସାଗର ଥାନା ଚିନ୍ତାମଣିଶ୍ୱର ଅଞ୍ଚଳରେ ଅଭାବନୀୟ ଘଟଣା । ଗୋଟିଏ ପରିବାରର ୩ ଜଣଙ୍କ ମୃତ୍ୟୁ । ଦେଢ଼ ବର୍ଷର ଶିଶୁକୁ ହତ୍ୟା କରି ଆତ୍ମହତ୍ୟା କଲେ ବାପା-ମାଆ । ଛୁଆକୁ ହତ୍ୟା ପରେ ଲୁଗାରେ ଝୁଲି ପଡିଲେ ସ୍ବାମୀ ଓ ସ୍ତ୍ରୀ । ଆତ୍ମହତ୍ୟା କରିଥିବା ଦୁଇ ଜଣ ହେଉଛନ୍ତି ମହାରାଷ୍ଟ୍ରର ତୁଷାର ଜଗପାତ୍ ଓ ନିଲା ଜଗପାତ୍ । ପାରିବାରିକ କଳହରୁ ଏଭଳି ଘଟଣା ଘଟିଛି ବୋଲି ସୂଚନା ମିଳିଛି । ମହାରାଷ୍ଟ୍ରରେ ରହୁଥିବା ତୁଷାରଙ୍କ ବାପା ସାବତ ମାଆଙ୍କ ନାଁରେ ସମ୍ପତ୍ତି କରିଦେବାରୁ ଏଭଳି ନିଷ୍ପତ୍ତି ନେଇଥିବା ପୋଲିସ ପକ୍ଷରୁ ସୂଚନା ମିଳିଛି । ତେବେ ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହ ଉଦ୍ଧାର କରିବା ସହ ଅଧିକ ତଦନ୍ତ ଜାରି ରଖିଛି ।
ଜଗନଙ୍କ ସହ କଥାହେଲେ ନବୀନ, ସ୍ଥଗିତ ରହିଲା ଅଣ୍ଡା ଦିଆ କୁକୁଡ଼ା ଚାଷୀଙ୍କ ଆନ୍ଦୋଳନ
ଭୁବନେଶ୍ୱର: ଦୁଇ ଦିନ ଧରି ଚାଲିଥିବା ଅଣ୍ଡା ଦିଆ କୁକୁଡ଼ା ଚାଷୀଙ୍କ ଆନ୍ଦୋଳନ ସ୍ଥଗିତ । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ପରାମର୍ଶ କ୍ରମେ ଆନ୍ଦୋଳନ ସ୍ଥଗିତ ରହିଲା । ଚାଷୀଙ୍କ ଆନ୍ଦୋଳନ ସଂକ୍ରାନ୍ତରେ ଆନ୍ଧ୍ର ମୁଖ୍ୟମନ୍ତ୍ରୀଙ୍କ ସହ ମୁଖ୍ୟମନ୍ତ୍ରୀ ଆଲୋଚନା କରିଥିଲେ । ଜାତୀୟ ଅଣ୍ଡା ସମନ୍ବୟ କମିଟିର ମନମାନିକୁ ଅଣ୍ଡାଦିଆ କୁକୁଡା ଚାଷୀ ଜୋରଦାର ବିରୋଧ କରିଥିଲେ । ଏନଇସିସି ଚଳାଇଥିବା ଚାଷୀମାରଣ ନୀତି ବିରୋଧରେ ରାଜରାସ୍ତାକୁ ଓହ୍ଲାଇଥିଲେ ଚାଷୀ ।
ସୂଚନା ମୁତାବକ ଗୋଟିଏ ଅଣ୍ଡାର ଉତ୍ପାଦନ ଖର୍ଚ୍ଚ ପାଖାପାଖି ୪ ଟଙ୍କା ୭୫ ପଇସା ପଡୁଥିବା ବେଳେ ଖାଉଟି ସାଢେ ୬ଟଙ୍କାରୁ ୭ଟଙ୍କାରେ କିଣୁଛନ୍ତି । କିନ୍ତୁ ଚାଷୀଙ୍କଠାରୁ ବ୍ୟବସାୟୀ ଅଣ୍ଡା କିଣୁଛନ୍ତି ମାତ୍ର ୩ ଟଙ୍କା ୭୦ ପଇସାରେ । ଅଣ୍ଡା ପିଛା ଚାଷୀ କ୍ଷତି ସହୁଛନ୍ତି ୧ ଟଙ୍କା ୭୦ପଇସାରୁ ଅଧିକ । ଏପ୍ରିଲ ୪ ତାରିଖରେ ଏନେଇ ଏନଇସିସି ବିରୋଧରେ ଆନ୍ଦୋଳନ ହୋଇଥିଲା । ପରେ ଆନ୍ଦୋଳନ ପ୍ରତ୍ୟାହୃତ ହୋଇଥିଲା । ହେଲେ ଦାବି ପୂରଣ ନ ହେବାରୁ ଖୋର୍ଦ୍ଧା ଭୁବନେଶ୍ବର ରାସ୍ତାର ଗଙ୍ଗପଡ଼ା ଛକ ନିକଟରେ ବିକ୍ଷୋଭ କରିଥିଲେ ଚାଷୀ ।
ଗତ ଦୁଇ ବର୍ଷ ହେଲା, ରାଜ୍ୟ ଅଣ୍ଡା ଉତ୍ପାଦନକାରୀ ଚାଷୀମାନେ ଏନଇସିସି ୩.୩୦ ଟଙ୍କାରେ ଅଣ୍ଡା ବିକ୍ରି କରିବାକୁ ବାଧ୍ୟ କରୁଛନ୍ତି । ଏହାଦ୍ୱାରା ଓଡ଼ିଶା, ଆନ୍ଧ୍ରପ୍ରଦେଶ, ତେଲେଙ୍ଗାନା ଆଦି ରାଜ୍ୟର ଅଣ୍ଡାଦିଆ କୁକୁଡ଼ା ଚାଷୀମାନେ ବିପୁଳ କ୍ଷତି ସହୁଛନ୍ତି । ଏନେଇ ଓଡ଼ିଶା ଓ ପଶ୍ଚିମବଙ୍ଗ ଚାଷୀମାନେ ଏନଇସିସି ସହ ଆଲୋଚନା କରିଥିଲେ ମଧ୍ୟ କୌଣସି ସୁଫଳ ମିଳିପାରିନାହିଁ । ପନ୍ଦର ଦିନ ମଧ୍ୟରେ ସମସ୍ୟାର ସମାଧାନ ଲାଗି ଏନଇସିସି ରାଜ୍ୟ କୃଷିମନ୍ତ୍ରୀଙ୍କ ସହ ଉପସ୍ଥିତିରେ ଅନୁଷ୍ଠିତ ବୈଠକରେ ପ୍ରତିଶ୍ରୁତି ଦେଇଥିଲେ, କିନ୍ତୁ ତାହାକୁ କାର୍ଯ୍ୟକାରୀ କରିବାରେ ବିଫଳ ହୋଇଛନ୍ତି । ଯାହାକୁ ନେଇ ପୁନର୍ବାର କୁକୁଡ଼ା ଚାଷୀମାନେ ୧୬ ନମ୍ବର ଜାତୀୟ ରାଜପଥରେ ବିକ୍ଷୋଭ କରିଥିଲେ ।
ଭିଜିଲାନ୍ସ ଜାଲରେ ଯାଜପୁର ଆରଏମସି ମାର୍କେଟ ସରକାର, ଆୟ ବହିର୍ଭୂତ ସମ୍ପତ୍ତି ଠୁଳ ଅଭିଯୋଗରେ ଚଢ଼ାଉ
ଯାଜପୁର: ଆୟ ବହିର୍ଭୂତ ସମ୍ପତ୍ତି ଠୁଳ ଅଭିଯୋଗ । ଭିଜିଲାନ୍ସ ଜାଲରେ ଯାଜପୁର ନିୟନ୍ତ୍ରିତ ବଜାର କମିଟି ତଥା ଆରଏମସିର ମାର୍କେଟ ସରକାର ଗୟାଧର ସାହୁ । ଗୟାଧର ସାହୁଙ୍କ ବାସଭବନ ସହ ଯାଜପୁରର ୪ଟି ସ୍ଥାନରେ ଭିଜିଲାନ୍ସ ଚାଲିଛି ରେଡ୍ । ଯାଜପୁର ଚମ୍ପେଇପାଲରେ ଥିବା ଦୁଇ ମହଲା କୋଠା, ଯାଜପୁର ରାଉତରାପୁର ମୌଜାରେ ଥିବା ଦୁଇ ମହଲା କୋଠା ଓ ଏକ ମହଲା କୋଠାରେ ଚାଲିଛି ଚଢ଼ାଉ । ସେହିପରି ଯାଜପୁର ଟାଉନ ଥାନା ସନ୍ଥେଶ୍ବରପୁରରେ ଥିବା ଦୁଇ ମହଲା କୋଠା ସହ ଆରଏମସି କାର୍ଯ୍ୟାଳୟରେ ଚାଲିଛି ରେଡ୍ । ଗୟାଧରଙ୍କ ନାଁରେ ପୂର୍ବରୁ କୋର୍ଟରେ ଅଭିଯୋଗ ହୋଇଥିବା ବେଳେ କୋର୍ଟଙ୍କ ନିର୍ଦ୍ଦେଶ କ୍ରମେ ଭିଜିଲାନ୍ସ ରେଡ୍ ଜାରି ରହିଛି । ରେଡରେ ୩ ଜଣ ଡିଏସପି, ୬ ଇନସ୍ପେକ୍ଟର ସାମିଲ ହୋଇଛନ୍ତି ।
ଟ୍ୱିଟର ପରେ ମସ୍କଙ୍କ ଟାର୍ଗେଟରେ କୋକା-କୋଲା , ଲେଖିଲେ ଏମିତି….
ନ୍ୟୁୟର୍କ: ସୋସିଆଲ ମିଡ଼ିଆ ଟ୍ୱିଟରକୁ କ୍ରୟ କରିଥିବା ଟେସ୍ଲା ମାଲିକ ଏଲନ ମସ୍କ ଏବେ କୋକାକୋଲା ଉପରେ ନଜର ପକାଇଛନ୍ତି । ଟ୍ୱିଟର ମାଲିକ ହେବାପରେ ବେସ ସକ୍ରୀୟ ହୋଇପଡ଼ିଛନ୍ତି ଏଲନ ମସ୍କ । ଏକ ଟ୍ୱିଟ କରି ଏଲନ କହିଛନ୍ତି ଏବେ କୋକାକୋଲା ପାଳି ବୋଲି ଲେଖିଛନ୍ତି । ଅର୍ଥାତ ମସ୍କଙ୍କ ଏହି ଇଙ୍ଗିତ କହୁଛି ଆଗକୁ ସେ ଥଣ୍ଡା ପାନୀୟ କମ୍ପାନୀ କୋକାକୋଲାକୁ କିଣିବାକୁ ଯାଉଛନ୍ତି ।
ମସ୍କ ଟ୍ୱିଟ କରି କହିଛନ୍ତି, ଏବେ କୋକା କୋଲା କିଣିବାକୁ ଯାଉଛି । ଏବଂ ଏଥିରେ କୋକେନ ମଦ୍ୟ ମିଶ୍ରଣ କରାଯିବ ବୋଲି କହିଛନ୍ତି । ଏଲନ ମସ୍କଙ୍କ ଏହି ଟ୍ୱିଟ ପରେ ଲକ୍ଷାଧିକ ଲୋକ କମେଣ୍ଟ ଏବଂ ଟ୍ୱିଟ କରିବାରେ ଲାଗିଛନ୍ତି । ଟ୍ୱିଟରର ନୂଆ ମାଲିକ ଆଗକୁ କୋକାକୋଲା କିଣିବାକୁ ଯାଉଥିବା ଖବର ପ୍ରଚାର ହୋଇଛି । ସେପଟେ ଏହାର କିଛି ସମୟ ପରେ ମସ୍କ ପୁଣି ଏକ ଟ୍ୱିଟ କରିଛନ୍ତି । ଯେଉଁଥିରେ ଏଲନ ମସ୍କ କହିଛନ୍ତି- ଟ୍ୱିଟର ଆଗକୁ ଆହୁରି ଖୁସି ବନାଇବାର ସ୍ଥାନ ହେବା ଦରକାର ।
ସେହିପରି ଏଲନ ମସ୍କ ନିଜର ଏକ ପୁରୁଣା ଟ୍ୱିଟକୁ ସ୍କ୍ରିନସଟ କରି ପୋଷ୍ଟ କରିଛନ୍ତି । ଉକ୍ତ ପୋଷ୍ଟରେ ମସ୍କ ଲେଖିଛନ୍ତି- ମୁଁ ଆଗକୁ ମେକଡୋନଲ୍ଡାସ କିଣିବାକୁ ଯାଉଛି । ଏବଂ ଆଗକୁ ସମସ୍ତ ଆଇସକ୍ରିମ ମେସିନ ଠିକ କରିଦେବି । ନିଜେ ମଧ୍ୟ ମସ୍କ କମେଣ୍ଟରେ ଲେଖିଛନ୍ତି- ଶୁଣ, ମୁଁ ଚମତ୍କାର କରିପାରେ ନାହିଁ । ଅର୍ଥାତ ଏଲନ ମସ୍କ ଆଗକୁ କୋକାକୋଲା କିଣିବାକୁ ଯାଉଛନ୍ତି ବୋଲି ଯଦି ବା ଇଙ୍ଗିତ ଦେଇଛନ୍ତି କିନ୍ତୁ ଏହା କେତେଦୂର ସଫଳ ହେବାକୁ ଯାଉଛି ଆଗକୁ ଜଣାପଡ଼ିବ ।
ବର୍ତ୍ତମାନ ପରିପ୍ରେକ୍ଷୀରେ ଟ୍ବିଟରକୁ ସମସ୍ତେ ଆପଣାଇଛନ୍ତି । ସୋସିଆଲ ମିଡିଆରେ ଅଧିକ ୟୁଜର୍ସ ରଖିଥିବା ପ୍ଲାଟଫର୍ମ । ସାଧାରଣ ଯୁଜର୍ସଟି ବିଶେଷ ଭାବେ ସୂଚନା ଏବଂ ଖବର ପାଇବା ପାଇଁ ବ୍ୟବହାର କରିଥାନ୍ତି । ମିଳିଥିବା ସୂଚନା ମୁତାବକ ଆମେରିକାରେ ସବୁଠୁ ଅଧିକା ଲୋକ ଟ୍ବିଟର ବ୍ୟବହାର କରିଥାନ୍ତି । ଦ୍ୱିତୀୟ ସ୍ଥାନରେ ଜାପାନ ଥିବାବେଳେ ଟ୍ୱିଟର ବ୍ୟବହାରକାରୀ ଭାବେ ତୃତୀୟ ସ୍ଥାନରେ ରହିଛି ଭାରତ । ତେବେ ବିଶ୍ୱର ବଡ଼ ସୋସିଆଲ ପ୍ଲାଟଫର୍ମର ମାଲିକାନା ଅକ୍ତିଆର କରିଥିବା ଏଲନ ମସ୍କ ଆଗକୁ କଣ କୋକାକୋଲା କିଣିବେ ?
ଭିଜିଲାନ୍ସ ଜାଲରେ ପୂର୍ବତନ ଏଏସଆଇ, ଏକକାଳୀନ ୫ଟି ସ୍ଥାନରେ ଚାଲିଛି ରେଡ୍
ମାଲକାନଗିରି: ନିଲମ୍ବିତ ପୂର୍ବତନ ଏଏସଆଇଙ୍କ ଘରେ ଭିଜିଲାନ୍ସ ରେଡ୍ । ଗଞ୍ଜେଇ କାରବାରରେ ସଂପୃକ୍ତ ଥିବା ପୂର୍ବତନ ଏଏସଆଇ ଜୟଦାସ ଖରାଙ୍କ ସମ୍ପତ୍ତି ଆକଳନ ପାଇଁ ଏକକାଳୀନ ୫ଟି ସ୍ଥାନରେ ଚାଲିଛି ରେଡ୍ । ମାଲକାନଗିରି, ଜୟପୁର ଓ କୋରାପୁଟର ୫ଟି ସ୍ଥାନରେ ଚାଲିଛି ଚଢ଼ାଉ । ମାଲକାନଗିରି ସ୍ଥିତ ଭଡ଼ା ଘର, କୋରାପୁଟ ଏଲଆଇସି କଲୋନୀରେ ଥିବା ସମ୍ପର୍କୀୟଙ୍କ ଘର, କୋରାପୁଟ ଏଲଆଇସି କଲୋନୀରେ ଥିବା ସମ୍ପର୍କୀୟଙ୍କ ୩ ମହଲା କୋଠାରେ ଚଢ଼ାଉ ଚାଲିଛି । କୋରାପୁଟ ସୁନାବେଡ଼ା ଏଏଫ୍ କଲୋନୀରେ ଥିବା କ୍ବାର୍ଟର, ମେଘରାଜ କନଷ୍ଟ୍ରକ୍ସନ ସାଇଟରେ ଥିବା ଡୁପ୍ଲେକ୍ସରେ ଚାଲିଛି ରେଡ୍ । ଭିଜିଲାନ୍ସର ଏହି ଚଢ଼ାଉରେ ୩ ଡିଏସପି, ୫ ଇନ୍ସପେକ୍ଟର ଓ ଅନ୍ୟ ସଦସ୍ୟ ସାମିଲ ହୋଇଛନ୍ତି । କିଛିଦିନ ତଳେ ଗଞ୍ଜେଇ କାରବାରରେ ଗିରଫ ପରେ ନିଲମ୍ବିତ ହୋଇଥିଲେ ଜୟଦାସ ।
ଲଖିମପୁର ଖେରୀ ହିଂସା: ଶୁଣାଣି କରିଥିବା ବିଚାରପତି ନିଜକୁ ପ୍ରତ୍ୟାହାର କରିନେଲେ
ଲକ୍ଷ୍ନୌ: ଲଖିମପୁର ଖେରୀ ହିଂସା ମାମଲାରେ ନୂଆ ମୋଡ଼ । କେନ୍ଦ୍ର ଗୃହ ରାଷ୍ଟ୍ରମନ୍ତ୍ରୀ ଅଜୟ ମିଶ୍ରାଙ୍କ ପୁଅ ତଥା ଅଭିଯୁକ୍ତ ଆଶିଷ ମିଶ୍ରାଙ୍କ ଜାମିନ ଆବେଦନର ଶୁଣାଣି କରୁଥିବା ବିଚାରପତି ନିଜକୁ ପ୍ରତ୍ୟାହାର କରି ନେଇଛନ୍ତି । ପୂର୍ବରୁ ଆଶିଷ ମିଶ୍ରାଙ୍କୁ ଜାମିନ ପ୍ରଦାନ କରିଥିବା ବିଚାରପତି ଜଷ୍ଟିସ ରାଜୀବ ସିଂହ ଗତ ସପ୍ତାହରେ ସୁପ୍ରିମକୋର୍ଟ ତାଙ୍କ ଦ୍ବାରା ଦିଆଯାଇଥିବା ଜାମିନକୁ ବାତିଲ କରି ପୁଣି ଶୁଣାଣି କରିବାରୁ ନିଜକୁ ପ୍ରତ୍ୟାହାର କରି ନେଇଛନ୍ତି ଜଷ୍ଟିସ ସିଂହ । ଅଭିଯୁକ୍ତ ଆଶିଷ ମିଶ୍ରଙ୍କ ଜାମିନ ବାତିଲ କରିବା ସମୟରେ ସୁପ୍ରିମକୋର୍ଟ ମଧ୍ୟ ହାଇକୋର୍ଟଙ୍କୁ ଜାମିନ ଆବେଦନର ନୂଆ ନିଷ୍ପତ୍ତି ନେବାକୁ କହିଥିଲେ ।
ଏହାପରେ ଜଷ୍ଟିସ ସିଂହଙ୍କ ବେଞ୍ଚକୁ ଜାମିନ ଆବେଦନ ଶୁଣାଣି ପାଇଁ ଆସିଥିଲା । କିନ୍ତୁ ସେ ଏହାକୁ ନୂତନ ଭାବରେ ଶୁଣିବାରୁ ନିଜକୁ ପ୍ରତ୍ୟାହାର କରି ନେଇଛନ୍ତି । ଜାମିନ ଆବେଦନର ପରବର୍ତ୍ତୀ ଶୁଣାଣି ମଧ୍ୟ ନିର୍ଦ୍ଧାରିତ ହୋଇ ପାରି ନାହିଁ । ଏହି ଜାମିନ ଆବେଦନର ଶୁଣାଣି ପାଇଁ ଏକ ନୂତନ ବେଞ୍ଚ ଗଠନ ହେବା ପରେ ପରବର୍ତ୍ତୀ ଶୁଣାଣି ପାଇଁ ତାରିଖ ସ୍ଥିର କରାଯିବ । ଗତବର୍ଷ ଅକ୍ଟୋବରରେ ଲଖିମପୁର- ଖେରୀ ହିଂସା ମାମଲାରେ ଆଶିଷ ମିଶ୍ରଙ୍କୁ ଗିରଫ କରାଯାଇଥିଲା ।
ଛେଳିଗଡ଼ ଜଳ ବିଦ୍ୟୁତ ପ୍ରକଳ୍ପ ନିର୍ମାଣ କାର୍ଯ୍ୟର ସମୀକ୍ଷା କଲେ ମୁଖ୍ୟ ଶାସନ ସଚିବ ଓ 5T ସଚିବ
ଗଞ୍ଜାମ: ଗଜପତି ଛେଳିଗଡ଼ ଜଳ ବିଦ୍ୟୁତ ପ୍ରକଳ୍ପର ସମୀକ୍ଷା ପରେ ଗଞ୍ଜାମ ଜିଲ୍ଲା ଗସ୍ତ କରିଛନ୍ତି ମୁଖ୍ୟ ଶାସନ ସଚିବ ଓ 5T ସଚିବ । ଘଟକେଶ୍ବର ଜଳସେଚନ ପ୍ରକଳ୍ପ ସ୍ଥଳୀକୁ ଯାଇ ନିର୍ମାଣର ଅଗ୍ରଗତୀ ସମ୍ପର୍କରେ ସମୀକ୍ଷା କରିବାର କାର୍ଯ୍ୟକ୍ରମ ରହିଛି । ଜିଲ୍ଲାର ବୃହତ ଘଟେକେଶ୍ବର ଜଳସେଚନ ପ୍ରକଳ୍ପ କାମର ଅନୁଧ୍ୟାନ କରିଛନ୍ତି l ସେହିପରି ସ୍ଥାନୀୟ ଏକ ବିଦ୍ୟାଳୟକୁ ଗସ୍ତ କରି ସମୀକ୍ଷା କରିବେ ମୁଖ୍ୟ ଶାସନ ସଚିବ ଓ 5T ସଚିବ ।
ସେପଟେ ଆଜି ଗଜପତି ଜିଲ୍ଲା ଗସ୍ତ କରି ଛେଳିଗଡ଼ ଜଳ ବିଦ୍ୟୁତ ପ୍ରକଳ୍ପର ସମୀକ୍ଷା କରିଛନ୍ତି ମୁଖ୍ୟ ଶାସନ ସଚିବ ଓ 5T ସଚିବ । ନିର୍ମାଣସ୍ଥଳକୁ ଯାଇ କାର୍ଯ୍ୟର ଅଗ୍ରଗତି ସମ୍ପର୍କରେ ଅଧିକାରୀଙ୍କ ସହିତ କରିଛନ୍ତି ଆଲୋଚନା । ଏହା ସହ ଜଳସେଚନ ବିଭାଗ ଅତିରିକ୍ତ ସଚିବ ଅନୁ ଗର୍ଗ ମଧ୍ୟ ପ୍ରକଳ୍ପ ସ୍ଥାନରେ ସମୀକ୍ଷା କରିଛନ୍ତି । ୨୦୦୫-୦୬ ମସିହାରୁ ଏହି ପ୍ରକଳ୍ପ ନିର୍ମାଣ କାର୍ଯ୍ୟ ଜାରି ରହିଛି । ଏହି ପ୍ରକଳ୍ପ ଶେଷ ହେଲେ ଗଜପତି ସମେତ ଗଞ୍ଜାମ ଜିଲ୍ଲାର ୬ ହଜାରରୁ ଅଧିକ ହେକ୍ଟର ଚାଷ ଜମି ଜଳସେଚିତ ହୋଇପାରିବ ।
ଗଜପତି ଜିଲ୍ଲାର ୫୦୦ ଓ ଗଞ୍ଜାମ ଜିଲ୍ଲାର ୫୭୬୦ ହେକ୍ଟର ଜମି ଜଳସେଚିତ ହେବ । ଏହାଛଡ଼ା ପାନୀୟ ଜଳ ସମସ୍ୟା ମଧ୍ୟ ଦୂର ହେବ । ପ୍ରକଳ୍ପରୁ ୩୬ ମେଗାଓ୍ବାଟ ବିଦ୍ୟୁତ ଉତ୍ପାଦନ ହୋଇପାରିବ । ଜଳ ନିଷ୍କାସନ ପାଇଁ ପାହାଡ଼ ମଝିରେ ଏକ ସୁଡ଼ଙ୍ଗ ନିର୍ମାଣ ହେଉଛି l ଯାହାର ଲମ୍ବ ରହିଛି ୧୨୮୦ ମିଟର l ପ୍ରାଥମିକ ପର୍ଯ୍ୟାୟରେ ପ୍ରକଳ୍ପ ପାଇଁ ୬୬ କୋଟି ବ୍ୟୟ ବରାଦ ହୋଇଥିବା ବେଳେ ଏବେ ତାହା ୭୦୮ କୋଟିରେ ପହଞ୍ଚିଛି । ପ୍ରକଳ୍ପ ପାଇଁ ବିସ୍ଥାପନ କାର୍ଯ୍ୟ ମଧ୍ୟ ଜାରି ରହିଛି । କ୍ଷତିଗ୍ରସ୍ତ ପରିବାରକୁ ସରକାରୀ ନିୟମ ଅନୁସାରେ ଆର୍ଥିକ ସହାୟତା ଦିଆଯାଉଛି l ଗଞ୍ଜାମ ଜିଲ୍ଲାର ବିଭିନ୍ନ ସ୍ଥାନରେ ଲୋକଙ୍କୁ ଥଇଥାନ ପାଇଁ ଜମି ଚିହ୍ନଟ ସହ ବାସଗୃହ ନିର୍ମାଣ ସରିଛି l କିଛି ପରିବାରଙ୍କ ଥଇଥାନ ପ୍ରକ୍ରିୟା ମଧ୍ୟ ସରିଛି l ୨୦୨୪ ସୁଦ୍ଧା ଏହାର ନିର୍ମାଣ ଶେଷ କରିବାକୁ ଲକ୍ଷ୍ୟ ରଖାଯାଇଛି ।
ଅସହ୍ୟ ତାତିରେ ଜଳୁଛି ଓଡ଼ିଶା, ଗରମ ସାଙ୍ଗକୁ ଗୁଳୁଗୁଳିରେ ଅସ୍ତବ୍ୟସ୍ତ ଜନଜୀବନ
ଭୁବନେଶ୍ୱର: ଅସହ୍ୟ ଗରମରେ କଲବଲ ହେଉଛି ଓଡ଼ିଶା । ଅସହ୍ୟ ଗରମ ଓ ଗୁଳୁଗୁଳିରେ ଅସ୍ତବ୍ୟସ୍ତ ଜନଜୀବନ । ଆସନ୍ତା ୫ ଦିନ ପର୍ଯ୍ୟନ୍ତ ଏଭଳି ସ୍ଥିତିରୁ ମୁକ୍ତି ମିଳିବନି ବୋଲି ସତର୍କ କରିଛି ଆଞ୍ଚଳିକ ପାଣିପାଗ କେନ୍ଦ୍ର । ବିଶେଷକରି ଆଭ୍ୟନ୍ତର ଓଡ଼ିଶାରେ ସ୍ବାଭାବିକଠାରୁ ୩ରୁ ୫ ଡିଗ୍ରୀ, ଉପକୂଳରେ ୨ରୁ ୩ ଡିଗ୍ରୀ ପର୍ଯ୍ୟନ୍ତ ତାପମାତ୍ରା ବୃଦ୍ଧି ପାଇବ । ଏଥିପାଇଁ କାଲି ପର୍ଯ୍ୟନ୍ତ ୧୧ ଜିଲ୍ଲା ଏବଂ ଏପ୍ରିଲ ୩୦ ତାରିଖ ପର୍ଯ୍ୟନ୍ତ ୮ ଜିଲ୍ଲାକୁ ହିଟଓ୍ବେଭ୍ ଜାରି କରାଯାଇଛି । ରାଜ୍ୟର କିଛି ସ୍ଥାନରେ ତାପମାତ୍ରା ୪୭ ଡିଗ୍ରୀ ଛୁଇଁବା ନେଇ ଆଶଙ୍କା କରାଯାଉଛି । ଆଭ୍ୟନ୍ତରୀଣ ଓଡ଼ିଶାରେ ମେ’ ୩ ତାରିଖ ପର୍ଯ୍ୟନ୍ତ ହିଟଓ୍ବେଭ୍ ପ୍ରଭାବ ରହିବ । ଗ୍ରୀଷ୍ମ ପ୍ରବାହ ସମୟରେ ଖରାରୁ ଦୂରେଇ ରହିବା ପାଇଁ ଲୋକକଙ୍କୁ ସଚେତନ କରିବାକୁ ଜିଲ୍ଲାପାଳଙ୍କୁ ନିର୍ଦ୍ଦେଶ ଦେଇଛନ୍ତି ଏସଆରସି ।
ଆସନ୍ତା ୨୯ରୁ ୨ ତାରିଖ ଭିତରେ ଉପକୂଳରେ ସ୍ଥାନେ ସ୍ଥାନେ କାଳବୈଶାଖୀ ହେବ । ବିଶେଷ କରି କେନ୍ଦ୍ରୀୟ ଓ ଦକ୍ଷିଣ ଉପକୂଳରେ ବର୍ଷା ସମ୍ଭାବନା ଅଛି । ୨ରୁ ୭ ତାରିଖ ଭିତରେ ଉତ୍ତର ଉପକୂଳ ଓ ଉତ୍ତର ଆଭ୍ୟନ୍ତରୀଣରେ ଅପେକ୍ଷାକୃତ ଅଧିକ କାଳବୈଶାଖୀ ସମ୍ଭାବନା ଅଛି । ସାରା ରାଜ୍ୟରେ ୪ରୁ ୬ ତାରିଖ ଭିତରେ କାଳବୈଶାଖୀ ବିସ୍ତୃତ ଅଞ୍ଚଳରେ ହୋଇପାରେ ।