ଟାଙ୍ଗୀ: ୩ ଲକ୍ଷର କାମରେ ୩୦ ହଜାର ପିସି । କେମିତି ହେବ ବିକାଶ? ସାଂସଦଙ୍କ ହାତପାଣ୍ଠିରୁ ବିକାଶମୂଳକ କାମ ପାଇଁ ଆସୁଛି ଅନୁଦାନ । ହେଲେ କାମ ପାଇଁ ଆସୁଥିବା ଟଙ୍କାରୁ ପିସି ବା ପର୍ସେଣ୍ଟେଜ୍ ମାଗୁଛନ୍ତି ସାଂସଦଙ୍କ ବ୍ଲକ ପ୍ରତିନିଧି । ଖୋର୍ଦ୍ଧା ଜିଲ୍ଲା ଟାଙ୍ଗୀ ବ୍ଲକରୁ ଆସିଛି ଏଭଳି ସଙ୍ଗୀନ୍ ଅଭିଯୋଗ । ଟାଙ୍ଗୀ ବ୍ଲକ ଲେଣ୍ଡୋ ପଞ୍ଚାୟତର ରେଙ୍ଗଟାରେ କଂକ୍ରିଟ୍ ରୋଡ୍ ପାଇଁ ଝୁନା ଦେଇ ନାମକ ଜଣେ ମହିଳାଙ୍କୁ ୩ ଲକ୍ଷ ଟଙ୍କାର ଓ୍ୱାର୍କ ଅର୍ଡର ଆସିଥିଲା । ୨୦୨୧ ସେପ୍ଟେମ୍ବର ସୁଦ୍ଧା ରାସ୍ତା ନିର୍ମାଣ କାମ ସାରିବାକୁ ଡେଡ୍ ଲାଇନ୍ ଦିଆଯାଇଥିଲା । ହେଲେ କାମ ପାଇଁ ଖୋଲାଖୋଲି ପିସି ମାଗିଥିଲେ ସାଂସଦ ଅପରାଜିତା ଷଡ଼ଙ୍ଗୀଙ୍କ ପ୍ରତିନିଧି ପ୍ରଦୋଷ ହରିଚନ୍ଦନ । ୩ ଲକ୍ଷ ଟଙ୍କାର କାମ ପାଇଁ ୧୦ ପ୍ରତିଶତ ପିସି ଦେବାକୁ ଦାବି କରୁଥିଲେ ସାଂସଦଙ୍କ ପ୍ରତିନିଧି ପ୍ରଦୋଷ ହରିଚନ୍ଦନ ।
ଦରବୃଦ୍ଧି ପ୍ରତିବାଦରେ କଂଗ୍ରେସର ଦେଶବ୍ୟାପୀ ହଙ୍ଗାମା, ରାହୁଲ ଓ ପ୍ରିୟଙ୍କା ଗାନ୍ଧୀ ଅଟକ
ନୂଆଦିଲ୍ଲୀ: ମୁଦ୍ରାସ୍ଫୀତି, ଦରଦାମ୍ ବୃଦ୍ଧି, ଜିଏସଟି ଏବଂ ବେକାରୀ ସମସ୍ୟାକୁ ବିରୋଧ କରି ଆଜି କଂଗ୍ରେସ ନେତାମାନେ ଦେଶବ୍ୟାପୀ ପ୍ରତିବାଦ ପ୍ରଦର୍ଶନ କରିଛି । ରାଷ୍ଟ୍ରପତି ଭବନ ଅଭିମୁଖେ ପଦଯାତ୍ରା କରୁଥିବା ସମୟରେ କଂଗ୍ରେସ ନେତା ଓ ପ୍ରିୟଙ୍କା ଗାନ୍ଧୀଙ୍କୁ ଅଟକ ରଖିଛି ପୋଲିସ୍ । ଆନ୍ଦୋଳନ ବେଳେ ପ୍ରିୟଙ୍କାଙ୍କୁ ପୋଲିସ ଟାଣି ଟାଣି ଭ୍ୟାନ ଭିତରକୁ ନେବା ଦେଖାଯାଇଛି । ଦେଶବ୍ୟାପୀ ଦିଆଯାଇଥିବା ବିକ୍ଷୋଭ ଆହ୍ବାନ ପରିପ୍ରେକ୍ଷୀରେ ଦିଲ୍ଲୀରେ କଂଗ୍ରେସ ନେତା, ସାଂସଦ ଓ କର୍ମୀ ଜୋରଦାର ବିକ୍ଷୋଭ କରିଛନ୍ତି । ଦେଶର ସମସ୍ତ ରାଜ୍ୟର କଂଗ୍ରେସ ଶାଖା ପକ୍ଷରୁ ମଧ୍ୟ ଆନ୍ଦୋଳନ ହୋଇଛି ।
କଂଗ୍ରେସ କାର୍ଯ୍ୟକାରୀ କମିଟି ସଦସ୍ୟ ଓ ବରିଷ୍ଠ ନେତାମାନେ ପ୍ରଧାନମନ୍ତ୍ରୀ ବାସଭବନ ଘେରାଉ ଅଭିଯାନ କରିଥିବାବେଳେ ଲୋକସଭା ଓ ରାଜ୍ୟସଭା ସାଂସଦମାନେ ରାଷ୍ଟ୍ରପତି ଭବନ ଅଭିମୁଖେ ପଦଯାତ୍ରା କରିଛନ୍ତି । କଂଗ୍ରେସର ଶୋଭାଯାତ୍ରାକୁ ଦୃଷ୍ଟିରେ ରଖି ଦିଲ୍ଲୀର ବିଭିନ୍ନ ସ୍ଥାନରେ ପୋଲିସ ସୁରକ୍ଷା ବ୍ୟବସ୍ଥା କଡ଼ାକଡ଼ି କରାଯାଇଛି । ବିକ୍ଷୋଭ ବେଳେ କଂଗ୍ରେସ ନେତ୍ରୀ ପ୍ରିୟଙ୍କା ଗାନ୍ଧୀ ରାସ୍ତାରେ ବସିପଡ଼ିବା ଦେଖାଯାଇଥିଲା । ତେବେ ଏହି ବିକ୍ଷୋଭ ସମୟରେ ରାହୁଲ କହିଛନ୍ତି ଦେଶରେ ଗଣତନ୍ତ୍ରର ମୃତ୍ୟୁ ଘଟିବାକୁ ଯାଉଛି । ଶହେ ବର୍ଷ ତଳେ ଭାରତ ଯେପରି ଗଠିତ ହୋଇଥିଲା ବର୍ତ୍ତମାନ ତାହା ଧ୍ୱଂସ ହେବାରେ ଲାଗିଛି । ଦିଲ୍ଲୀରେ କଂଗ୍ରେସର ବିକ୍ଷୋଭ ଯୋଗୁ ରାଜଧାନୀରେ ୧୪୪ ଧାରା ଜାରି କରାଯାଇଛି ।
ରାଷ୍ଟ୍ରପତି ନିର୍ବାଚନରେ ଦ୍ରୌପଦୀ ମୁର୍ମୁଙ୍କୁ ଭୋଟ ଦେବା ପ୍ରସଙ୍ଗ, ନୋଟିସ୍ ପରେ ଜବାବ ରଖିଲେ ମୋକିମ୍
ଭୁବନେଶ୍ୱର: ଦଳୀୟ ନିର୍ଦ୍ଦେଶ ନ ମାନି ରାଷ୍ଟ୍ରପତି ନିର୍ବାଚନରେ ଦ୍ରୋପଦୀ ମୁର୍ମୁଙ୍କୁ ଭୋଟ ଦେବା ପ୍ରସଙ୍ଗ । ପିସିସି ସଭାପତିଙ୍କଠାରୁ ନୋଟିସ୍ ପାଇବା ପରେ ଜବାବ ରଖିଲେ ବିଧାୟକ ମହମ୍ମଦ ମୋକିମ୍ । ନୋଟିସର ଜବାବ ଦେବା ପରେ ମୋକିମ୍ କହିଛନ୍ତି ମୁଁ ଦଳୀୟ ଫୋରମରେ ଉତ୍ତର ରଖିଛି । କ’ଣ ଲେଖିଛି ତାହା ଏବେ ସ୍ପଷ୍ଟ କରି ପାରିବି ନାହିଁ ବୋଲି ମହମ୍ମଦ ମୋକିମ୍ କହିଛନ୍ତି । ତେବେ କଂଗ୍ରେସ ବିଧାୟକ ମହମ୍ମଦ ମୋକିମଙ୍କ ଜବାବ ପରେ ପ୍ରତିକ୍ରିୟା ରଖିଛନ୍ତି ପିସିସି ସଭାପତି ଶରତ ପଟ୍ଟନାୟକ । ସେ କହିଛନ୍ତି ମୋକିମଙ୍କ ଉତ୍ତର ମିଳିଛି କିନ୍ତୁ ମୁଁ ତାକୁ ପଢ଼ିନାହିଁ । ଏହା ଆମ ଦଳର ଆଭ୍ୟନ୍ତରୀଣ ବ୍ୟାପାର । ମୋକିମ ନିଜ ଉତ୍ତରରେ କ’ଣ କହିଛନ୍ତି ପଢ଼ିବା ପରେ କି ପଦକ୍ଷେପ ନିଆଯିବ ତାହା କହିବି । ସେପଟେ ବିଧାୟକ ସନ୍ତୋଷ ସିଂ ସାଲୁଜା ମୋକିମଙ୍କ ଉତ୍ତର ବିଷୟରେ ହାଇ କମାଣ୍ଡଙ୍କୁ ଜଣାଯିବ ବୋଲି କହିଛନ୍ତି ।
ଯାଜପୁରରେ ଟ୍ରକ୍ ଚଢ଼ାଇ ମାଆ ଝିଅଙ୍କୁ ହତ୍ୟା ଘଟଣା: ଗିରଫ ହେଲା ଅଭିଯୁକ୍ତ ଡ୍ରାଇଭର
ଯାଜପୁର: ଯାଜପୁର ଜିଲ୍ଲା ୫୩ ନମ୍ବର ଜାତୀୟ ରାଜପଥର ବରଡ଼ା ଛକରେ ଟ୍ରକ୍ ଚଢ଼ାଇ ମାଆ ଝିଅଙ୍କୁ ହତ୍ୟା ଘଟଣା । ଆରୁହା ଛକରେ ମାଆ, ଝିଅ ଓ ଡ୍ରାଇଭର ମଧ୍ୟରେ ଝଗଡ଼ାର ଭିଡିଓ ମୋବାଇଲରେ ସୁଟ୍ କରିଥିଲେ ଝିଅ ସୋନାଲି । ସେହି ମୋବାଇଲକୁ ଜେନାପୁର ପୋଲିସ ଜବତ କରିଛି । ମୋବାଇଲକୁ ତଦନ୍ତ ପରିସର ଭୁକ୍ତ କରାଯିବ । ଭିଡିଓ ହସ୍ତଗତ ହେଲେ, ଉଭୟଙ୍କ ମଧ୍ୟରେ ଝଗଡ଼ା କେତେ ଉଗ୍ର ହୋଇଥିଲା ତାହା ସ୍ପଷ୍ଟ ହେବ । ଅନ୍ୟପକ୍ଷରେ ଅଭିଯୁକ୍ତ ଡ୍ରାଇଭର ଅମର ସ୍ବାଇଁଙ୍କୁ ଗିରଫ କରିଛି ପୋଲିସ୍ । ଗିରଫ କରିବା ପରେ ଆଜି ଅମର ସ୍ୱାଇଁଙ୍କୁ କୋର୍ଟ ଚାଲାଣ କରିବ ଜେନାପୁର ପୋଲିସ ।
ସେପଟେ କେନ୍ଦ୍ର ମାନବାଧିକାର କମିଶନଙ୍କ ଟିମ୍ ତଦନ୍ତ କରିବା ସହ ଅଶୋକ ଚକ୍ରବର୍ତ୍ତୀଙ୍କ ପରିବାରକୁ ୩୦ ଲକ୍ଷ ଟଙ୍କା କ୍ଷତିପୂରଣ ଦେବା ପାଇଁ କେନ୍ଦ୍ର ମାନବାଧିକାର କମିଶନଙ୍କ ଦ୍ଵାରସ୍ଥ ହୋଇଛନ୍ତି ଭାରତୀୟ ବିକାଶ ପରିଷଦର ଜଗତସିଂହପୁର ଜିଲ୍ଲା ସଭାପତି ସୁବ୍ରତ କୁମାର ଦାଶ । ଗତ ବୁଧବାର ଗାଡ଼ି ସାଇଡ୍ ମରାକୁ କେନ୍ଦ୍ର କରି ଟ୍ରକ୍ ଡ୍ରାଇଭର ଓ ମା, ଝିଅଙ୍କ ମଧ୍ୟରେ ପାଟିତୁଣ୍ଡ ହୋଇଥିଲା । ପରେ ମାଆ, ଝିଅ ସ୍କୁଟିରେ ଯାଉଥିବା ବେଳେ ଡ୍ରାଇଭର ତାଙ୍କ ଉପରେ ଟ୍ରକ୍ ମଡ଼ାଇ ଦେଇଥିଲା । ଏଥିରେ ସୁକିନ୍ଦା ଅଞ୍ଚଳର ଶ୍ରୀତିକା ଚକ୍ରବର୍ତ୍ତୀ ଓ ଝିଅ ସୋନାଲି ଚକ୍ରବର୍ତ୍ତୀ ପ୍ରାଣ ହରାଇଥିଲେ । ଶ୍ରୀତିକା ତାଙ୍କ ବାପାଙ୍କ ଶୁଦ୍ଧିକ୍ରିୟାରେ ଯୋଗଦେବାକୁ କେନ୍ଦ୍ରାପଡ଼ା ଯାଇଥିଲେ । ଝିଅ ସହିତ ସ୍କୁଟିରେ ଫେରିବା ବେଳେ ସାଇଡ୍ ମରାକୁ ନେଇ ଟ୍ରକ ଡ୍ରାଇଭରଙ୍କ ସହ ପାଟିତୁଣ୍ଡ ହୋଇଥିଲା ।
ଚିକିତ୍ସା ଅବହେଳାରୁ ଦ୍ୱିତୀୟ ଶ୍ରେଣୀ ଛାତ୍ରର ମୃତ୍ୟୁ ପରେ ସେବାଶ୍ରମରେ ଉତ୍ତେଜନା
ବାଲେଶ୍ୱର: ବାଲେଶ୍ୱର ଜିଲ୍ଲା ନୀଳଗିରି ଉପଖଣ୍ଡ ଖଇରବଣି ସେବାଶ୍ରମରେ ଉତ୍ତେଜନା । ଚିକିତ୍ସା ଅବହେଳାରୁ ଦ୍ୱିତୀୟ ଶ୍ରେଣୀ ଛାତ୍ରଙ୍କ ମୃତ୍ୟୁ ପରେ ସେବାଶ୍ରମ ଆଗରେ ଠେଙ୍ଗାବାଡ଼ି ଧରି ପ୍ରତିବାଦ କରୁଛନ୍ତି ଲୋକ । କ୍ଷତିପୂରଣ ଦାବିରେ ଗ୍ରାମବାସୀ ଧାରଣା ଦେଇଛନ୍ତି । ହଷ୍ଟେଲକୁ ଘେରାଉ କରିବା ସହ ପ୍ରିନ୍ସିପାଲଙ୍କୁ ହଷ୍ଟେଲରେ ତାଲା ପକାଇ ଦେଇଛନ୍ତି ଉତ୍ତ୍ୟକ୍ତ ଲୋକ । ହଷ୍ଟେଲ ଦାୟିତ୍ୱରେ ଥିବା ଶିକ୍ଷକଙ୍କ ବିରୋଧରେ କାର୍ଯ୍ୟାନୁଷ୍ଠାନ ଦାବି ଜୋର ଧରିଛି । ଘଟଣାସ୍ଥଳରେ ପହଞ୍ଚିଛନ୍ତି ଅତିରିକ୍ତ ଜିଲ୍ଲା ମଙ୍ଗଳ ଅଧିକାରୀ ରଞ୍ଜନ କୁମାର ଦାସ । ନୀଳଗିରି ପୋଲିସ ପହଞ୍ଚି ଉତ୍ୟକ୍ତ ଲୋକଙ୍କୁ ବୁଝାସୁଝା କରୁଛି ।
ସୂଚନା ଅନୁସାରେ, ଧବଶିଳା ରାବୁଣୁ ସାହିର ପୂର୍ଣ୍ଣଚନ୍ଦ୍ର ସିଂଙ୍କ ୭ ବର୍ଷର ପୁଅ ତପୁ ସିଂ ଖଇରବଣି ସେବାଶ୍ରମ ହଷ୍ଟେଲରେ ରହି ପଢ଼ୁଥିଲେ । କିଛିଦିନ ଧରି ସେ ଜ୍ଵରରେ ପୀଡିତ ଥିଲେ । ତାଙ୍କୁ ହଷ୍ଟେଲରେ ଚିକିତ୍ସା କରାଯାଇନାହିଁ କି କୌଣସି ମେଡିକାଲକୁ ନେଇ ପ୍ରାଥମିକ ଚିକିତ୍ସା କରାଯାଇନଥିଲା ବୋଲି ଅଭିଯୋଗ ହୋଇଛି । ଅସୁସ୍ଥ ଅବସ୍ଥାରେ ଛାତ୍ରଙ୍କୁ ପରିବାର ବର୍ଗଙ୍କୁ ହସ୍ତାନ୍ତର କରାଯାଇଥିଲା । ଆଜି ପରିବାର ପକ୍ଷରୁ ନୀଳଗିରି ମେଡିକାଲରେ ଭର୍ତ୍ତି କରାଯାଇ ଚିକିତ୍ସା କରାଯାଉଥିବା ବେଳେ ଛାତ୍ରଙ୍କର ମୃତ୍ୟୁ ହୋଇଥିଲା । ସେବାଶ୍ରମରେ ଏପରି ପରିସ୍ଥିତି ପାଇଁ ଦୋଷୀ ବିରୋଧରେ କାର୍ଯ୍ୟାନୁଷ୍ଠାନ ନେବାକୁ ଲୋକମାନେ ଦାବି କରିଛନ୍ତି ।
ଦର ବୃଦ୍ଧି, ଜିଏସଟିକୁ ନେଇ କଂଗ୍ରେସର ହଲ୍ଲାବୋଲ, ଦେଶବ୍ୟାପୀ ବିରୋଧ ପ୍ରଦର୍ଶନ
ନୂଆଦିଲ୍ଲୀ: ମହଙ୍ଗାମାଡ଼, ବେରୋଜଗାରୀକୁ ବିରୋଧ କରି କଂଗ୍ରେସର ଦେଶବ୍ୟାପୀ ପ୍ରଦର୍ଶନ । କେନ୍ଦ୍ରର ନୀତିକୁ ବିରୋଧ କରି ଦେଶବ୍ୟାପୀ କଂଗ୍ରେସର ହଲ୍ଲାବୋଲ । ଆଜି ସାରା ଦେଶରେ କଂଗ୍ରେସ ବିକ୍ଷୋଭ କରୁଥିବା ବେଳେ ସାମ୍ବାଦିକ ସମ୍ମିଳନୀ କରି କେନ୍ଦ୍ର ସରକାରଙ୍କୁ ଟାର୍ଗେଟ କରିଛନ୍ତି କଂଗ୍ରେସ ନେତା ରାହୁଲ ଗାନ୍ଧୀ । ଦେଶରେ ଏକଛତ୍ରବାଦୀ ଶାସନ ଚାଲିଥିବା ବେଳେ ଲୋକତନ୍ତ୍ରର ହତ୍ୟା କରାଯାଉଛି ବୋଲି ରାହୁଲ ଗାନ୍ଧୀ କହିଛନ୍ତି । ପେଟ୍ରୋଲ, ଡିଜେଲ, ଗ୍ୟାସ ଦାମ୍ ଲଗାତାର ବଢ଼ୁଥିବା ବେଳେ ଭାରତରେ ବେରୋଜଗାରୀ ଭୟଙ୍କର ହୋଇଛି ।
ସଂସଦରେ ଏସବୁ ପ୍ରସଙ୍ଗ ଉଠାଉଥିବା ସାଂସଦଙ୍କ ମୁହଁ ବନ୍ଦ କରିବାକୁ ପ୍ରୟାସ କରାଯାଉଛି । ଦେଶରେ ଏକଛତ୍ରବାଦୀ ଶାସନ ବିରୋଧରେ ମୁହଁ ଖୋଲୁଥିବାରୁ ବିରୋଧୀ ନେତାଙ୍କ ପଛରେ କେନ୍ଦ୍ରୀୟ ଏଜେନ୍ସି ଲଗାଇ ଦିଆଯାଉଛି । ବିରୋଧୀଙ୍କୁ ଡରାଇବାକୁ ଇଡି, ସିବିଆଲ ଭଳି କେନ୍ଦ୍ରୀୟ ଏଜେନ୍ସି ଦୂରୁପଯୋଗ କରାଯାଉଛି ବୋଲି ରାହୁଲ କହିଛନ୍ତି । ସଂସଦରେ ଏ ନେଇ ଆଲୋଚନା କରିବାକୁ ସରକାର ଡରୁଛନ୍ତି ବୋଲି କଂଗ୍ରେସ କହିଛି । ସେପଟେ ଦେଶବ୍ୟାପୀ ବିରୋଧ ପ୍ରଦର୍ଶନକୁ ନେଇ କଂଗ୍ରେସକୁ ଜୋରଦାର ଟାର୍ଗେଟ କରିଛି ବିଜେପି । ଦିଲ୍ଲୀରେ କଂଗ୍ରେସର ବିକ୍ଷୋଭ ଯୋଗୁ ରାଜଧାନୀରେ ୧୪୪ ଧାରା ଜାରି କରାଯାଇଛି ।
୫୦ ବେସିସ ପଏଣ୍ଟ ବଢ଼ିଲା ରେପୋରେଟ, ଲଗାତାର ତୃତୀୟ ଥର ଲାଗି ବୃଦ୍ଧି କଲେ RBI
ନୂଆଦିଲ୍ଲୀ: ବଢ଼ିଲା ରେପୋରେଟ । ରେପୋ ହାର ୫୦ ବେସିସ ପଏଣ୍ଟ ବଢ଼ାଇଲେ ଭାରତୀୟ ରିଜର୍ଭ ବ୍ୟାଙ୍କ । ଲଗାତର ତୃତୀୟ ଥର ଲାଗି ରେପୋରେଟ ବୃଦ୍ଧି କରିଛନ୍ତି RBI । ତିନି ଦିନର ସମୀକ୍ଷା ପରେ ଏହି ପଦକ୍ଷେପ ନେଇଛନ୍ତି ଆରବିଆଇ । ଫଳରେ ରେପୋ ହାର ୫.୪୦ ପ୍ରତିଶତ ହୋଇଛି । ଭାରତୀୟ ଅର୍ଥନୀତି ଅତ୍ୟଧିକ ମୁଦ୍ରାସ୍ଫୀତି ମଧ୍ୟରେ ଯାଉଥିବାବେଳେ ଆରବିଆଇ ବଢାଇଛନ୍ତି ରେପୋରେଟ । ଗତ କିଛି ମାସ ଧରି ଭାରତ ୧୩.୩ ବିଲିୟନ ଡଲାର କ୍ୟାପିଟାଲ ଆଉଟଫ୍ଲୋ ଅବସ୍ଥାରେ ଥିବାବେଳେ ମୁଦ୍ରାନୀତି ନିର୍ଦ୍ଧାରଣ କରିବା ଆରବିଆଇ ଲାଗି କଷ୍ଟସାଧ୍ୟ ହୋଇଛି ।
ସେପଟେ ଚଳିତ ଆର୍ଥକ ବର୍ଷ ଲାଗି ଜିଡିପି ଅଭିବୃଦ୍ଧି ଲକ୍ଷ୍ୟ ହାରକୁ ୭.୨ ପ୍ରତିଶତ ରଖିଛନ୍ତି RBI । ବିଶ୍ୱର ଭୂ-ରାଜନୈତିକ ଅସ୍ଥିରତା ଯୋଗୁ ଭାରତୀୟ ଅର୍ଥନୀତି ବାରମ୍ବାର ପ୍ରଭାବିତ ହୋଇଛି । ସେହିପରି ମୁଦ୍ରାସ୍ଫୀତି ହାର ଆର୍ଥିକ ବର୍ଷ ୨୦୨୩ ଲାଗି ୬.୭ ପ୍ରତିଶତ ଆକଳନ କରାଯାଇଛି । ସାଧାରଣ ମୌସୁମୀ ଓ ଅଶୋଧିତ ତୈଳ ଦର ବ୍ୟାରେଲ ପିଛା ୧୦୫ ଡଲାରକୁ ଆକଳନ କରି ୨୦୨୩ ଲାଗି ମୁଦ୍ରାସ୍ଫୀତି ଆକଳନ କରାଯାଇଛି ।
ଭିଜିଲାନ୍ସ ଜାଲରେ କ୍ରୀଡା ଶିକ୍ଷକ, ଏକକାଳୀନ ୧୧ଟି ସ୍ଥାନରେ ରେଡ୍
ବ୍ରହ୍ମପୁର: ଭିଜିଲାନ୍ସ ଜାଲରେ କ୍ରୀଡା ଶିକ୍ଷକ । PET ଜନାର୍ଦ୍ଦନ ସାହୁଙ୍କ ବାସଭବନରେ ଚାଲିଛି ରେଡ୍ । ଆୟ ବର୍ହିଭୂତ ସମ୍ପତ୍ତି ଠୁଳ ଅଭିଯୋଗରେ ଗଞ୍ଜାମ ଜିଲ୍ଲା ପାତ୍ରପୁର ବ୍ଲକ ଜୟନ୍ତୀପୁର ଦିବ୍ୟସିଂହ ବିଦ୍ୟାପୀଠ ଉଚ୍ଚ ବିଦ୍ୟାଳୟର କ୍ରୀଡା ଶିକ୍ଷକ ଜନାର୍ଦ୍ଦନ ସାହୁଙ୍କ ଘରେ ଚଢ଼ାଉ କରିଛି ଭିଜିଲାନ୍ସ । ଏକକାଳୀନ ୧୧ଟି ସ୍ଥାନରେ ଚାଲିଛି ଚଢ଼ାଉ । ପାତ୍ରପୁରର ପେଟ୍ରୋଲ ପମ୍ପ ସମେତ ପୈତୃକ ବାସଭବନ, ମଦ ଭାଟି ଓ ୩ଟି ଗୋଦାମରେ ରେଡ୍ କରିଛି ଭିଜିଲାନ୍ସ ।
ରାଜ୍ୟଗୋଷ୍ଠୀ କ୍ରୀଡ଼ାରେ ଭାରତକୁ ଆଉ ଏକ ସ୍ୱର୍ଣ୍ଣ, ପାରା ପାଓ୍ୱାରଲିଫ୍ଟିଂରେ ସୁନା ଆଣିଲେ ସୁଧୀର
ବର୍ମିଂହାମ: ରାଜ୍ୟଗୋଷ୍ଠୀ କ୍ରୀଡ଼ାରେ ପୁଣି ଦେଶକୁ ମିଲିଲା ଆଉ ଏକ ପଦକ । ସ୍ୱର୍ଣ୍ଣ ପଦକ ଜିତିଲେ ସୁନା ପୁଅ ସୁଧିର । ପାରା ପାୱାରଲିଫ୍ଟିଂର ଭାରତକୁ ମିଳିଲା ପ୍ରଥମ ସ୍ୱର୍ଣ୍ଣ ପଦକ । ପୁରୁଷ ବର୍ଗରେ ସୁନା ପଦକ ଆଣିଲେ ସୁଧିର । ଏକ ଐତିହାସିକ ସଫଳତା ସହ ରେକର୍ଡର ଅଧିକାରୀ ହୋଇଛନ୍ତି ସୁଧିର । ପ୍ରଥମ ପ୍ରୟାସରେ ୨୦୮ କେଜି ଭାରୋତ୍ତଳନ କରିଥିଲେ ସୁଧିର । ଦ୍ୱିତୀୟ ଲିଫ୍ଟରେ ୨୧୨ କେଜି ଭାର ଉଠାଇ ସ୍ୱର୍ଣ୍ଣ ଜିତିଛନ୍ତି ସୁଧିର ।
HISTORIC GOLD FOR INDIA 🔥🔥🔥
Asian Para-Games Bronze medalist, #Sudhir wins 🇮🇳's 1st ever GOLD🥇 medal in Para-Powerlifting at #CommonwealthGames with a Games Record to his name 💪💪
Sudhir wins his maiden 🥇 in Men's Heavyweight with 134.5 points (GR) at CWG#Cheer4India
1/1 pic.twitter.com/cBasuHichz— SAI Media (@Media_SAI) August 4, 2022
୨୭ ବର୍ଷୀୟ ସୁଧିର ଏସିଆନ ପାରା ଗେମ୍ସରେ ବ୍ରୋଞ୍ଜ ମେଡାଲ ହାତେଇଥିଲେ । ଏବେ ସୁଦ୍ଧା କମନୱେଲ୍ଥ ଗେମ୍ସରେ ଦେଶକୁ ୨୦ଟି ପଦକ ମିଳିଥିବା ବେଳେ ୬ଟି ସ୍ୱର୍ଣ୍ଣ ପଦକ ହାସଲ ହୋଇଛି ।
ଆଜିଠୁ ପୁଣି ଭିଜିବ ଓଡ଼ିଶା, ୧୦ ତାରିଖ ଯାଏ ରାଜ୍ୟରେ ଅବିଶ୍ରାନ୍ତ ବର୍ଷା
ଭୁବନେଶ୍ୱର: ଆଜିଠୁ ୧୦ ତାରିଖ ପର୍ଯ୍ୟନ୍ତ ରାଜ୍ୟରେ ନନଷ୍ଟପ ବର୍ଷା । ସାଧାରଣ ଅବସ୍ଥାନଠାରୁ ଦକ୍ଷିଣରେ ମୌସୁମୀ ନିମ୍ନ ଚାପରେଖା ଯୋଗୁ ଆଜିଠୁ ଦକ୍ଷିଣ ଓଡ଼ିଶାର କିଛି ଜିଲ୍ଲାରେ ହୋଇପାରେ ପ୍ରବଳ ବର୍ଷା । ଆସନ୍ତାକାଲିଠାରୁ ବଢ଼ିବ ବର୍ଷାର ପରିମାଣ । ଆସନ୍ତା ୧୦ ତାରିଖ ଯାଏଁ ରାଜ୍ୟରେ ଅଧିକାଂଶ ସ୍ଥାନରେ ହାଲୁକାରୁ ମଧ୍ୟମ ଧରଣର ବର୍ଷା ହୋଇପାରେ । ଏହାସହ କିଛି ଜିଲ୍ଲାରେ ପ୍ରବଳରୁ ଅତି ପ୍ରବଳ ବର୍ଷା ହେବା ନେଇ ପୂର୍ବାନୁମାନ କରିଛି ପାଣିପାଗ ବିଭାଗ ।
ମୌସୁମୀର ସକ୍ରିୟତା ବୃଦ୍ଧି ଏବଂ ସମ୍ଭାବ୍ୟ ଲଘୁଚାପ ପ୍ରଭାବରେ ୭ରୁ ପଶ୍ଚିମ-କେନ୍ଦ୍ରୀୟ ବଙ୍ଗୋପସାଗରରେ ଝଡ଼ ବର୍ଷା ସହ ଘଣ୍ଟା ପ୍ରତି ୪୫ ରୁ ୫୫ କିଲୋମିଟର ବେଗରେ ପବନ ବହିବାର ସମ୍ଭାବନା ରହିଛି । ସେହିପରି ୭ ତାରିଖରୁ ପଶ୍ଚିମ-କେନ୍ଦ୍ରୀୟ ବଙ୍ଗୋପସାଗରର ଗଭୀର ସମୁଦ୍ର ଅଞ୍ଚଳକୁ ମତ୍ସ୍ୟଜୀବୀଙ୍କୁ ବାରଣ କରାଯାଇଛି ।