ଭୁବନେଶ୍ୱର: ଭୁବନେଶ୍ୱର ମଞ୍ଚେଶ୍ୱର ଥାନାରେ ଠକ ବିଲ୍ଡର ଅଟକ । ରିଅଲ ଡେଭଲପର ଆଣ୍ଡ୍ କନଷ୍ଟ୍ରକ୍ସନର ମୁଖ୍ୟ ଅରୁଣଜ୍ୟୋତି ପଟ୍ଟନାୟକଙ୍କୁ ଥାନାରେ ଅଟକ ରଖିଛି ପୋଲିସ । ୧୦ କୋଟିରୁ ଉର୍ଦ୍ଧ୍ୱ ଟଙ୍କା ଠକିଥିବା ଅଭିଯୋଗରେ ବିଲଡର ଅରୁଣଜ୍ୟୋତି ପଟ୍ଟନାୟକଙ୍କୁ ମଞ୍ଚେଶ୍ୱର ଥାନାରେ ଅଟକ ରଖାଯାଇଛି । ପୂର୍ବରୁ ଏହି ବିଲ୍ଡରଙ୍କ ନାଁରେ ଏତଲା ଦେଇଥିଲେ ଅଭିନେତ୍ରୀ ବିଦୁସ୍ମିତା । ଖଣ୍ଡଗିରି ଥାନାରେ ଅଭିନେତ୍ରୀ ବିଦୁସ୍ମିତା ଏତଲା ଦେଇଥିଲେ ।
ସେମିଫାଇନାଲ ପୂର୍ବରୁ ଟିମ୍ ଇଣ୍ଡିଆକୁ ବଡ଼ ଝଟକା, ଆହତ ହେଲେ ଅଧିନାୟକ ରୋହିତ ଶର୍ମା
ଆଡିଲେଡ: ଟି-୨୦ ବିଶ୍ୱକପ ସେମିଫାଇନାଲ ମ୍ୟାଚ୍ ପୂର୍ବରୁ ଟିମ୍ ଇଣ୍ଡିଆକୁ ବଡ଼ ଝଟକା । ଅଭ୍ୟାସ ସମୟରେ ଆହତ ହୋଇଛନ୍ତି ଭାରତୀୟ ଦଳର ଅଧିନାୟକ ରୋହିତ ଶର୍ମା । ପ୍ରାକ୍ଟିସ ମ୍ୟାଚ୍ ବେଳେ ରୋହିତଙ୍କ ଡାହାଣ ହାତରେ ଆଘାତ ଲାଗିଛି । ତାଙ୍କ ହାତରେ ବରଫ ପ୍ୟାକ୍ ଦିଆଯାଇଛି । ତେବେ ରୋହିତ କେତେ ଗୁରୁତର ହୋଇଛନ୍ତି ସେ ନେଇ ବିସିସିଆଇ ପକ୍ଷରୁ କୌଣସି ସ୍ପଷ୍ଟ ସୂଚନା ମିଳିନାହିଁ । ଆହତ ହେବାର କିଛି ସମୟ ପରେ ରୋହିତ ପୁଣି ଅଭ୍ୟାସ କରୁଥିବା ଦେଖାଯାଇଛି ।
ସୂଚନା ଅନୁସାରେ ଆସନ୍ତା ଗୁରୁବାର ଆଡେଲିଡରେ ଟି-୨୦ ମେସିଫାଇନାଲ ମ୍ୟାଚରେ ଭାରତ-ଇଂଲଣ୍ଡ ମୁହାଁମୁହିଁ ହେବେ । ସୁପର ୧୨ର ଗ୍ରୁପ-୧ରୁ ନ୍ୟୁଜିଲାଣ୍ଡ ଓ ଇଂଲଣ୍ଡ ସେମିଫାଇନାଲରେ ପହଞ୍ଚିଥିବା ବେଳେ ଗ୍ରୁପ୍-୨ରୁ ଭାରତ-ପାକିସ୍ତାନ ସେମିରେ ପହଞ୍ଚିଛନ୍ତି । ପ୍ରଥମ ସେମିଫାଇନାଲ ମ୍ୟାଚ୍ ଆସନ୍ତାକାଲି ପାକିସ୍ତାନ ଓ ନ୍ୟୁଜିଲାଣ୍ଡ ମଧ୍ୟରେ ଖେଳାଯିବ ।
ପେସ ବୋଲରଙ୍କ ପାଇଁ ନିଜ ବିମାନ ସିଟ୍ ଛାଡି଼ଲେ ଦ୍ରାଭିଡ୍,କୋହଲି ଓ ରୋହିତ
ଏଡିଲେଡ: କୌଣସି ବଡ଼ ପ୍ରତିଯୋଗିତା ପୂର୍ବରୁ ଖେଳାଳିଙ୍କ ଫିଟ୍ ରହିବା ଆଥଲେଟଙ୍କ ପାଇଁ ଖୁବ୍ ଜରୁରୀ । ସେମି ଫାଇନାଲ୍ରେ ପ୍ରବେଶ କରିଥିବା ଟିମ୍ ଇଣ୍ଡିଆ ଗୁରୁବାର ଦିନ ଦ୍ୱିତୀୟ ସେମି ଫାଇନାଲ୍ରେ ଇଂଲଣ୍ଡକୁ ଭେଟିବ । ତେଣୁ ସେମି ଫାଇନାଲ ଫାଇଟ୍ ପାଇଁ ଭାରତୀୟ କ୍ରିକେଟ ଟିମ୍ ମଧ୍ୟ ଏହାର ଦୃତ ବୋଲର ମାନଙ୍କୁ ଫିଟ୍ ରଖିବା ଏବଂ ଆରାମ ପ୍ରଦାନ ଉଦ୍ଦେଶ୍ୟରେ ବିଶେଷ କାର୍ଯ୍ୟ କରୁଛି । ଯାହା ଆପଣଙ୍କୁ ଆଶ୍ଚର୍ଯ୍ୟ ଲାଗିପାରେ ।
ସୂଚନା ଅନୁସାରେ ଅଷ୍ଟ୍ରେଲିୟାରେ ଅନୁଷ୍ଠିତ T20 ବିଶ୍ୱ କପ୍ରେ ବିମାନରେ ଯାତ୍ରା କରିବା ସମୟରେ ଟିମ୍ ଇଣ୍ଡିଆର ମୁଖ୍ୟ କୋଚ୍ ରାହୁଲ ଦ୍ରାବିଡ, ଅଧିନାୟକ ରୋହିତ ଶର୍ମା ଏବଂ ଷ୍ଟାର କ୍ରିକେଟର ବିରାଟ କୋହଲି ଦୃତ ବୋଲର ମୋହମ୍ମଦ ଶାମୀ, ଅର୍ଶଦୀପ ସିଂ, ଭୁବନେଶ୍ୱର କୁମାର ଏବଂ ହାର୍ଦ୍ଦିକ ପାଣ୍ଡ୍ୟାଙ୍କ ପାଇଁ ନିଜ ବିଜନେସ ସିଟ୍କୁ ଛାଡ଼ିଦେଲେ । ଏହାର ଏକମାତ୍ର କାରଣ ହେଉଛି କ୍ରିକେଟର ମାନଙ୍କୁ ପର୍ଯ୍ୟାପ୍ତ ଲେଗରୁମ୍ ମିଳୁ । ଯାହା ଦୃତ ବୋଲରଙ୍କୁ ଦୁଇ ମ୍ୟାଚ୍ ମଧ୍ୟରେ ଆରାମ କରିବାକୁ ସାହାଯ୍ୟ ମିଳିବ । ଭାରତୀୟ ଦଳର ଜଣେ ସଦସ୍ୟଙ୍କ କହିବା ହେଉଛି, ଟୁର୍ଣ୍ଣାମେଣ୍ଟରୁ ଦୃତ ବୋଲରଙ୍କୁ ସବୁଠାରୁ ଅଧିକ ମାଇଲେଜ୍ ମିଳିବା ଜରୁରୀ ।
ଅନ୍ତଃରାଷ୍ଟ୍ରୀୟ କ୍ରିକେଟ୍ ପରିଷଦ(ICC)ର ନିୟମ ଅନୁସାରେ ପ୍ରତ୍ୟେକ ଟିମକୁ ୪ଟି ବିଜନେସ୍ କ୍ଲାସ୍ ସିଟ୍ ମିଳିଥାଏ । ଅଧିକାଂଶ ଟିମ୍ ବିମାନରେ ଯାତ୍ରା ସମୟରେ ସେମାନଙ୍କ କୋଚ୍, ଅଧିନାୟକ, ଉପ-ଅଧିନାୟକ ଏବଂ ମୁଖ୍ୟ ପରିଚାଳକଙ୍କୁ ଦେଇଥାନ୍ତି । କିନ୍ତୁ ବିମାନ ଯାତ୍ରାର ଆବଶ୍ୟକତା ଅଧିକ ବଢ଼ିବାରୁ ସେମାନଙ୍କୁ କିଭଳି ଭଲ ସିଟ୍ ମିଳିବ ସେଥିପ୍ରତି ଗୁରୁତ୍ୱ ଦିଆଗଲା ।
ସୂଚନାଯୋଗ୍ୟ, ଟିମ୍ ଇଣ୍ଡିଆ ଗୁରୁବାର ଦିନ ଦ୍ୱିତୀୟ ସେମି ଫାଇନାଲ୍ରେ ଇଂଲଣ୍ଡକୁ ଭେଟିବ । ମେଲବର୍ଣ୍ଣରେ ଜିମ୍ବାୱେକୁ ପରାସ୍ତ କରି ଭାରତ ସେମିରେ ସ୍ଥାନ ପକ୍କା କରିଥିଲା ।
ବାଲିଯାତ୍ରା ପୂର୍ବରୁ ଅଘଟଣ, ମହାନଦୀରେ ବୁଡ଼ି ଯୁବକ ନିଖୋଜ
କଟକ: କଟକ ମହାନଦୀରେ ବୁଡିଗଲେ ଯୁବକ । ଗଡଗଡିଆ ଘାଟରେ ଗାଧୋଉଥିବା ବେଳେ ପାଣିରେ ବୁଡ଼ି ନିଖୋଜ ଯୁବକ । ନିଖୋଜ ଯୁବକ ଜଣଙ୍କ ହେଲେ ବିହାରର ମହମ୍ମଦ ଇର୍ଷାଦ । ବାଲିଯାତ୍ରାରେ ବ୍ୟବସାୟ ପାଇଁ ଆସିଥିଲେ । ବାଲିଯାତ୍ରା ପଡିଆରେ ଥିବା ଅଗ୍ନିଶମ ବାହିନୀ ଖୋଜା ଖୋଜି ଜାରି ରଖିଥିବା ବେଳେ ବର୍ତ୍ତମାନ ସୁଦ୍ଧା ଇର୍ସାଦର କୌଣସି ପତ୍ତା ମିଳିନାହିଁ।
ରାଷ୍ଟ୍ରପତିଙ୍କ ଦୁଇ ଦିନିଆ ଗସ୍ତକୁ ନେଇ କମିଶନରେଟ ପୋଲିସ ତତ୍ପର, ବିମାନବନ୍ଦରରେ ସୁରକ୍ଷା ସମୀକ୍ଷା
ଭୁବନେଶ୍ୱର: ମହାମହିମ ରାଷ୍ଟ୍ରପତିଙ୍କ ଦୁଇ ଦିନିଆ ଗସ୍ତକୁ ନେଇ କମିଶନରେଟ ପୋଲିସର ସୁରକ୍ଷା ବ୍ୟବସ୍ଥା କଡ଼ାକଡ଼ି କରିଛି । ଭୁବନେଶ୍ବର ବିମାନବନ୍ଦରରେ ସୁରକ୍ଷା ବ୍ୟବସ୍ଥାର ସମୀକ୍ଷା କରିଛନ୍ତି ପୋଲିସ କମିଶନର, ଡିସିପି, ବିମାନବନ୍ଦର ନିର୍ଦ୍ଦେଶକ ଓ ସିଆରପିଏଫ ଅଧିକାରୀ । ବ୍ଲୁ ବୁକ ଅନୁସାରେ ସୁରକ୍ଷା ବ୍ୟବସ୍ଥା ଗ୍ରହଣ କରାଯିବ । ସୁରକ୍ଷା ଲାଗି ମୁତୟନ ହେବେ ୫୫ ପ୍ଲାଟୁନ ପୋଲିସ ଫୋର୍ସ । ଏହା ସହ ୩୦୦ ଜଣ ବରିଷ୍ଠ ପୋଲିସ ଅଧିକାରୀ ସୁରକ୍ଷା ଦାୟିତ୍ବରେ ରହିବେ ।
ରାଷ୍ଟ୍ରପତିଙ୍କ ଗସ୍ତକୁ ଦୃଷ୍ଟିରେ ରଖି ବିମାନବନ୍ଦରଠାରୁ ରାଜଭବନ ପର୍ଯନ୍ତ ସୁରକ୍ଷା ବ୍ୟବସ୍ଥା କଡ଼ାକଡ଼ି କରାଯିବ । ଭୁବନେଶ୍ୱରରେ ରାଷ୍ଟ୍ରପତିଙ୍କ ବିଭିନ୍ନ କାର୍ଯ୍ୟକ୍ରମ ରହିଛି । ସେ ସବୁ ସ୍ଥାନରେ ମଧ୍ୟ ସୁରକ୍ଷା ବ୍ୟବସ୍ଥା କଡ଼ାକଡ଼ି କରାଯିବ । ଆସନ୍ତାକାଲି ଫୁଲ୍ ଡ୍ରେସ ରିହଲସଲ କରାଯିବ । ରାଷ୍ଟ୍ରପତିଙ୍କୁ ଗାର୍ଡ ଅଫ ଅନର ଦେବା ପାଇଁ ରିହଲସଲ କରାଯାଇଛି ।
ଆଲିଆଙ୍କୁ ଅମୁଲର ନିଆରା କମ୍ପ୍ଲିମେଣ୍ଟ୍
ମୁମ୍ବାଇ: ବଲିଉଡ ସୁନ୍ଦରୀ ଆଲିୟା ଭଟ୍ଟ ଏବଂ ରଣବୀର କପୂରଙ୍କ ଘରକୁ ନୂଆ ଅତିଥି ଆସିବା ପରେ କପୂର ପରିବାରରେ ଖୁସିର ପରିବେଶ ଦେଖିବାକୁ ମିଳିଛି । ବନ୍ଧୁ ପରିଜନଙ୍କ ଠାରୁ ଆରମ୍ଭ କରି ପ୍ରଶଂସକଙ୍କ ପର୍ଯ୍ୟନ୍ତ ସମସ୍ତେ ଶୁଭେଚ୍ଛା ଜଣାଉଛନ୍ତି । ଏହା ମଧ୍ୟରେ ଲୋକପ୍ରିୟ ଡେୟରୀ ବ୍ରାଣ୍ଡ୍ ଅମୁଲ ଇଣ୍ଡିଆ ମଧ୍ୟ ଆଲିୟା ଏବଂ ରଣବୀରଙ୍କୁ ଖୁବ୍ କ୍ରିଏଟିଭ୍ ଅନ୍ଦାଜରେ ଶୁଭେଚ୍ଛା ଜଣାଇଛନ୍ତି ।
ଅମୁଲ ଇଣ୍ଡିଆ ତା’ର ଅଫିସିଆଲ ଇଂଷ୍ଟାଗ୍ରାମ ଆକାଉଣ୍ଟରେ ଏକ ମୋନୋକ୍ରାଟିକ୍ ଡୁଡଲ ମାଧ୍ୟମରେ ଶୁଭେଚ୍ଛା ଜଣାଇଛି । ଏଥିରେ ରଣବୀର ଏବଂ ଆଲିୟାଙ୍କର ଏକ କାର୍ଟୁନ୍ ଭର୍ସନ ଦେଖିବାକୁ ମିଳିଛି । ଏହି ଫଟୋକୁ ଶେୟାର କରି ଅମୁଲ ଇଣ୍ଡିଆ କ୍ୟାପ୍ସନରେ ଲେଖିଛିଯେ, ଷ୍ଟାର ଦମ୍ପତିଙ୍କ ଘରେ କନ୍ୟା ସନ୍ତାନ ଜନ୍ମ ହୋଇଛି ।
ଅମୁଲ ଇଣ୍ଡିଆର ଏହି କ୍ରିଏଟିଭ୍ ପୋଷ୍ଟ ସୋସିଆଲ ମିଡିଆରେ ଖୁବ୍ ଭାଇରାଲ ହେଉଛି । ପୋଷ୍ଟଙ୍କୁ ଷ୍ଟାର କପଲ ରଣବୀର ଏବଂ ଆଲିୟାଙ୍କ ଫ୍ୟାନ୍ସ ଯଥେଷ୍ଟ ପ୍ରଶଂସା ମଧ୍ୟ କରୁଛନ୍ତି ।
ସୂଚନାଯୋଗ୍ୟ, କନ୍ୟା ସନ୍ତାନ ଜନ୍ମ ପରେ ଆଲିୟା ଏବଂ ରଣବୀରଙ୍କୁ କରଣ ଜୋହର, ଅକ୍ଷୟ କୁମାର, ଅନୁଷ୍କା ଶର୍ମା,ପ୍ରିୟଙ୍କା ଚୋପ୍ରା,କରିନା ଏବଂ କରିସ୍ମାଙ୍କ ସମେତ ଦୀପିକା ପାଦୁକୋନ ଏବଂ କ୍ୟାଟ୍ରିନା କୈଫ୍ ଶୁଭେଚ୍ଛା ଜଣାଇ ପୋଷ୍ଟ ଶେୟାର କରିଥିଲେ । ତେବେ ପରସ୍ପରକୁ ୫ ବର୍ଷ ଡେଟ୍ କରିବା ପରେ ଆଲିୟା ଏବଂ ରଣବୀର ବିବାହ ବନ୍ଧନରେ ବାନ୍ଧି ହୋଇଥିଲେ । ଓ୍ୱର୍କଫ୍ରଣ୍ଟ୍ କଥା ଯଦି ଆଲୋଚନା କରିବା ତେବେ ଉଭୟଙ୍କୁ ଶେଷ ଥର ଫିଲ୍ମ ବ୍ରହ୍ମାସ୍ତ୍ରରେ ଏକା ସାଙ୍ଗରେ ରୂପେଲି ପରଦାରେ ଦେଖିବାକୁ ମିଳିଥିଲା । ତେବେ ଆଗାମୀ ଦିନରେ ଏହି କପଲଙ୍କୁ ଏକାଧିକ ଫିଲ୍ମରେ ଏକା ସାଙ୍ଗରେ ଦେଖିବାକୁ ମିଳିବ ।
ଆଜିଠୁ କମ୍ପିବ କୁଆଖାଇ ପଠା, ୮ ଦିନ ଧରି ଚାଲିବ ଭୁବନେଶ୍ୱର ବାଲିଯାତ୍ରା
ଭୁବନେଶ୍ୱର: ଦୁଇ ବର୍ଷ ପରେ ଆଜିଠୁ ଭୁବନେଶ୍ବରରେ ଅନୁଷ୍ଠିତ ହେବ ବାଲିଯାତ୍ରା । ୮ ଦିନ ଧରି ଚାଲିବାକୁ ଥିବା ଏହି ମେଳାରେ ୫ ଶହରୁ ଅଧିକ ଷ୍ଟଲ୍ ପଡ଼ିବା ସହ ପ୍ରତିଦିନ ସାଂସ୍କୃତିକ କାର୍ଯ୍ୟକ୍ରମ ଆୟୋଜନ କରାଯିବ । ପିଲାଙ୍କ ମନୋରଞ୍ଜନ ପାଇଁ ମୀନାବଜାରର ବ୍ୟବସ୍ଥା ମଧ୍ୟ କରାଯାଇଛି । ଏହି ଉତ୍ସବ ପାଇଁ ରାଜଧାନୀବାସୀଙ୍କ ମଧ୍ୟରେ ଏବେଠୁ ଉତ୍କଣ୍ଠା ଦେଖିବାକୁ ମିଳିଲାଣି । ପ୍ରବଳ ଜନସମାଗମ ହେବାର ସମ୍ଭାବନା ରହିଛି । ଶାନ୍ତି ଶୃଙ୍ଖଳାର ସହ ଲୋକେ ଯାତ୍ରା ବୁଲି ଦେଖିବେ, ସେ ନେଇ ଗୁରୁତ୍ୱ ଦିଆଯାଇଛି ।
ସେହିପରି ଭୁବନେଶ୍ୱର ବାଲିଯାତ୍ରା ପଡ଼ିଆରେ ଅନୁଷ୍ଠିତ ହୋଇଯାଇଛି ବୋଇତ ବନ୍ଦାଣ ଉତ୍ସବ । କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ଯୋଗ ଦେଇଥିଲେ ଭୁବନେଶ୍ୱର ଉତ୍ତର ବିଧାୟକ ସୁଶାନ୍ତ ରାଉତ । ଚଳିତ ବର୍ଷ କିଭଳି ସୁରୁଖୁରୁରେ ବାଲିଯାତ୍ରାକୁ ଶେଷ କରାଯିବ, ସେନେଇ ବିଶେଷ ଗୁରୁତ୍ବ ଦିଆଯାଇଛି ।
କମ୍ପୁଛି ହିମାଚଳ ପ୍ରଦେଶ ମଇଦାନ, ଆଜିଠୁ ପ୍ରଚାର ମଙ୍ଗ ଧରିବେ AICC ସଭାପତି
ସିମଲା: କମ୍ପୁଛି ହିମାଚଳ ପ୍ରଦେଶ ନିର୍ବାଚନ ମଇଦାନ । ଆଜିଠାରୁ ଦୁଇ ଦିନିଆ ଗସ୍ତରେ ଏଆଇସିସି ସଭାପତି ମଲ୍ଲିକାର୍ଜୁନ ଖଡଗେ । ରାଜ୍ୟରେ କେତେକ ପ୍ରମୁଖ ସ୍ଥାନରେ ନିର୍ବାଚନୀ ରାଲିରେ ଉଦବୋଧନ ଦେବା ସହ କରିବେ କ୍ୟାମ୍ପେନ । ବିଜେପି ସରକାରକୁ ହଟାଇବା ଲାଗି ଖଡଗେ ଦେବେ ବଜ୍ର ଆହ୍ୱାନ । ସେପଟେ ରାଜ୍ୟରେ ପ୍ରଚାର ଅଭିଯାନ ଜାରି ରଖିଛନ୍ତି କଂଗ୍ରେସ ନେତ୍ରୀ ପ୍ରିୟଙ୍କା ଗାନ୍ଧୀ । ପୂର୍ବରୁ ଛତିଶଗଡ଼ ମୁଖ୍ୟମନ୍ତ୍ରୀ ଭୂପେଶ ବଘେଲ, କଂଗ୍ରେସ ନେତା ସଚିନ ପାଇଲଟ ପ୍ରମୁଖ କରିଥିଲେ ପ୍ରଚାର । ରାଜ୍ୟରେ ଆସନ୍ତା ନଭେମ୍ବର ୧୨ରେ ଭୋଟଗ୍ରହଣ ହେବ ଏବଂ ୮ ଡିସେମ୍ବରରେ ଫଳ ପ୍ରକାଶ ପାଇବ ।
ସରକାରୀ କର୍ମଚାରୀଙ୍କ ଲାଗି ପୁରୁଣା ପେନସନ ସ୍କିମ ବା ଓପିଏସ କାର୍ଯ୍ୟକାରୀ କରିବା, ୩୦୦ ୟୁନିଟ ଯାଏ ମାଗଣା ବିଦ୍ୟୁତ, ୧୮ରୁ ୬୦ ବର୍ଷ ବୟସ୍କା ମହିଳାଙ୍କୁ ମାସିକ ୧୫ ଶହ ଟଙ୍କାର ପେନସନ ଦେବା ଲାଗି ଘୋଷଣା କରିଛି ଦଳ । ଏହାସହ ପ୍ରତିଗ୍ରାମରେ ମୋବାଇଲ କ୍ଳିନିକ, ୧ ଲକ୍ଷ ସରକାରୀ ଚାକିରି, ୧୦ କୋଟି ଟଙ୍କାରେ ଯୁବକଙ୍କ ଲାଗି ଷ୍ଟାର୍ଟଅପ ଫଣ୍ଡ ପ୍ରତିଷ୍ଠା ଲାଗି ଘୋଷଣା କରିସାରିଛି କଂଗ୍ରେସ ।
ଆସନ୍ତାକାଲି ୫୦ ତମ CJI ଭାବେ ଦାୟିତ୍ୱ ନେବେ ଜଷ୍ଟିସ ଚନ୍ଦ୍ରଚୂଡ଼, ୨୦୨୪ ନଭେମ୍ବର ୧୦ ଯାଏ ତୁଲାଇବେ ଦାୟିତ୍ୱ
ନୂଆଦିଲ୍ଲୀ: ଆସନ୍ତାକାଲି ଦେଶର ନୂଆ ସିଜେଆଇ ଭାବେ ଦାୟିତ୍ୱ ନେବେ ଜଷ୍ଟିସ ଡି.ଓ୍ବାଇ. ଚନ୍ଦ୍ରଚୂଡ଼ । ଜଷ୍ଟିସ ଚନ୍ଦ୍ରଚୂଡ଼ ୫୦ ତମ ପ୍ରଧାନ ବିଚାରପତି ଭାବେ କାର୍ଯ୍ୟଭାର ଗ୍ରହଣ କରିବେ । ଗତକାଲି ଜଷ୍ଟିସ ଲଳିତଙ୍କୁ ଦିଆଯାଇଥିଲା ବିଦାୟକାଳୀନ ସମ୍ବର୍ଦ୍ଧନା । ଏହି ଉତ୍ସବରେ ଯୋଗଦେଇଥିଲେ ଜଷ୍ଟିସ ଡି.ଓ୍ବାଇ. ଚନ୍ଦ୍ରଚୂଡ ଓ ଜଷ୍ଟିସ ବେଲା ଏମ. ତ୍ରିବେଦୀ । ଏହାସହ ସୁପ୍ରିମକୋର୍ଟର ବହୁ ବିଚାରପତି, ବରିଷ୍ଠ ଆଇନଜୀବୀ ପ୍ରମୁଖ ଯୋଗଦେଇଥିଲେ ।
ପୂର୍ବତନ ପ୍ରଧାନ ବିଚାରପତି ଜଷ୍ଟିସ ୱାଇ ବି ଚନ୍ଦ୍ରଚୂଡ଼ଙ୍କ ପୁଅ ଜଷ୍ଟିସ ଡି ଓ୍ବାଇ ଚନ୍ଦ୍ରଚୂଡ଼ । ପରବର୍ତ୍ତୀ ପ୍ରଧାନ ବିଚାରପତି ଚୟନ ପାଇଁ ଆଇନ ମନ୍ତ୍ରଣାଳୟକୁ ସୁପ୍ରିମକୋର୍ଟର ବରିଷ୍ଠ ବିଚାରପତି ଜଷ୍ଟିସ ଧନଞ୍ଜୟ ୟଶୋବନ୍ତ ଚନ୍ଦ୍ରଚୂଡ଼ଙ୍କ ନାଁ ସୁପାରିସ କରିଥିଲେ ପ୍ରଧାନ ବିଚାରପତି ଜଷ୍ଟିସ ୟୁ ୟୁ ଲଳିତ । ୨୦୨୪ ନଭେମ୍ବର ୧୦ ଯାଏ ପ୍ରଧାନ ବିଚାରପତି ରହିବେ ଜଷ୍ଟିସ ଚନ୍ଦ୍ରଚୂଡ଼ ।
ବିମୁଦ୍ରୀକରଣ ଜ୍ବାଳାକୁ ପୂରିଲା ୬ ବର୍ଷ, ୨୦୧୬ ମସିହା ଆଜିର ଦିନରେ କେନ୍ଦ୍ର ସରକାର ନେଇଥିଲେ ନିଷ୍ପତ୍ତି
ନୂଆଦିଲ୍ଲୀ: ବିମୁଦ୍ରୀକରଣର ଜ୍ୱାଳାକୁ ପୂରିଲା ୬ ବର୍ଷ । ୨୦୧୬ ମସିହା ନଭେମ୍ବର ୮ ତାରିଖରେ କେନ୍ଦ୍ର ସରକାରଙ୍କ ଏହି ନିଷ୍ପତ୍ତି ସାରା ଦେଶବାସୀଙ୍କ ଅର୍ଥନୈତିକ ସ୍ଥିତିକୁ କରିଦେଇଥିଲା ଗଡ଼ବଡ଼ । ୫୦୦ ଓ ୧ ହଜାର ଟଙ୍କିଆ ନୋଟକୁ ରଦ୍ଦ କରିଥିବାବେଳେ କୋଟି କୋଟି ଲୋକ ନାହିଁ ନଥିବା ସମସ୍ୟାର ସମ୍ମୁଖୀନ ହୋଇଥିଲେ । କଳାଧନ ଓ ଜାଲନୋଟର ପ୍ରସାର ରୋକିବା ତଥା ସମାନ୍ତରାଳ ଛାୟା ଅର୍ଥନୀତିକୁ କବଜା କରିବା ଲାଗି ତତକାଳୀନ ସରକାରଙ୍କ ଏହି ନିଷ୍ପତ୍ତି ବିଭିନ୍ନ ମହଲରେ ହୋଇଥିଲା ସମାଲୋଚିତ । ଉପଯୁକ୍ତ ପଦକ୍ଷେପ ନନେଇ ହଠାତ୍ ବିମୁଦ୍ରୀକରଣ ନିଷ୍ପତ୍ତି ଦ୍ୱାରା ଦେଶବାସୀ ନାହିଁ ନଥିବା ସମସ୍ୟାର ଶିକାର ହୋଇଥିଲେ । ଦେଶବ୍ୟାପୀ ସମସ୍ତ ବ୍ୟାଙ୍କରେ ଅଭୁତପୂର୍ବ ସମସ୍ୟା ସୃଷ୍ଟି ହୋଇଥିଲା ।
ରିଜର୍ଭ ବ୍ୟାଙ୍କର ତଥ୍ୟ ଅନୁସାରେ ମୋଟ ମୁଦ୍ରା ପରିମାଣ ୧୫.୪୧ ଟ୍ରିଲିୟନ ଟଙ୍କା ମଧ୍ୟରୁ ବିଭିନ୍ନ ବ୍ୟାଙ୍କରେ ଜମା ହୋଇଥିଲା ୧୫.୩ ଟ୍ରିଲିୟନ ଟଙ୍କା । ଅର୍ଥାତ ମୋଟ ୯୯.୩ ପ୍ରତିଶତ ନୋଟ ବ୍ୟାଙ୍କରେ ଜମା ହୋଇଥିଲା । ସରକାରଙ୍କ ଏହି ନିଷ୍ପତ୍ତି ଯୋଗୁ ଦେଶରେ ଡିଜିଟାଲ ଓ କ୍ୟାସଲେସ କାରବାର ବୃଦ୍ଧି ପାଇଥିଲା । ତେବେ ଯେଉଁ ଲକ୍ଷ୍ୟ ନେଇ ନୋଟବନ୍ଦୀ କରାଯାଇଥିଲା ତାହା ଏକରକମ ବିଫଳ ହୋଇଛି । ରିଜର୍ଭ ବ୍ୟାଙ୍କ ତଥ୍ୟ ଅନୁସାରେ ଚଳିତ ବର୍ଷ ଅକ୍ଟୋବର ୨୧ ସୁଦ୍ଧା ଦେଶରେ ଲୋକମାନଙ୍କ ନିକଟରେ ମୋଟ ୩୦.୮୮ ଲକ୍ଷ କୋଟି ଟଙ୍କାର ନଗଦ ଟଙ୍କା ରହିଛି । ଏହାର ଅର୍ଥ- ଡିଜିଟାଲ୍ ପେମେଣ୍ଟ ଅପେକ୍ଷା ଲୋକମାନେ ନଗଦ ଉପରେ ଅଧିକ ବିଶ୍ୱାସ କରୁଛନ୍ତି ।