ସମ୍ୱଲପୁର: ସମ୍ବଲପୁର ୟୁନିଭର୍ସିଟି ପାଇଲା ନୂଆ କୁଳପତି । ପ୍ରଫେସର ବିଧୁ ଭୂଷଣ ମିଶ୍ର ହେଲେ ନୂଆ କୁଳପତି । ୪ବର୍ଷ ପାଇଁ କୁଳପତି ଦାୟିତ୍ବ ତୁଲାଇବେ ପ୍ରଫେସର ମିଶ୍ର । ଉତ୍କଳ ବିଶ୍ବବିଦ୍ୟାଳୟ ବାଣିଜ୍ୟ ବିଭାଗର ପୂର୍ବତନ ପ୍ରଫେସର ହେଉଛନ୍ତି ବିଧୁ ଭୂଷଣ । ତାଙ୍କର ୯ଟି ପୁସ୍ତକ ସହ ଶତାଧିକ ଲେଖା ପ୍ରକାଶିତ ହୋଇଛି । ପ୍ରଫେସର ମିଶ୍ରଙ୍କର ଅଧ୍ୟାପନା କ୍ଷେତ୍ରରେ ୩୪ବର୍ଷର ଅଭିଜ୍ଞତା ରହିଛି । ଜଣେ ଡିଲିଟ୍, ୩୯ପିଏଚଡି ଓ ୩ଏମଫିଲ ସ୍କଲାରଙ୍କୁ ଗାଇଡ୍ କରିଛନ୍ତି ବିଧୁ ଭୂଷଣ ।
ଆର୍ଥିକ ସଙ୍କଟ ଦେଇ ଗତି କରୁଛି ପାକିସ୍ତାନ
ଇସଲାମବାଦ: ଯେଉଁଠାରେ ରାତି ୮ଟାରେ ଦୋକାନ ବଜାର ବନ୍ଦ ହୋଇଯାଏ ସେଠାରେ ପିଲାମାନଙ୍କ ଜନ୍ମ କମ୍ ହୋଇଥାଏ । ଏହି କଥା ଆମେ କହୁନୁ କିଛି ଏଭଳି ବୟାନ ଦେଇଛନ୍ତି ପାକିସ୍ତାନର ରକ୍ଷାମନ୍ତ୍ରୀ । ଯାହା ସୋସିଆଲ ମିଡିଆରେ ଖୁବ୍ ଭାଇରାଲ ହେବାରେ ଲାଗିଛି । ପାକିସ୍ତାନ କିଛି ବର୍ଷ ହେବ ଆର୍ଥିକ ସଙ୍କଟ ଦେଇ ଗତିକରୁଛି । ଦିନକୁ ଦିନ ଅର୍ଥନୀତି ବିପର୍ଯ୍ୟସ୍ତ ହେବାରେ ଲାଗିଛି। ଟଙ୍କା ସଞ୍ଚୟ କରିବା ପାଇଁ କିଛି ଏଭଳି ବୟାନ ଦେଇଛନ୍ତି ରକ୍ଷାମନ୍ତ୍ରୀ । କେବଳ ରକ୍ଷାମନ୍ତ୍ରୀ ନୁହେଁ ବରଂ ଦେଶର ଜନସାଧାରଣା ଯୋଗାଡ କରି ନିଜ ପରିବାରକୁ ପ୍ରତିପୋଷଣ କରିବାରେ ଲାଗିଛନ୍ତି । ଦରଦାମ୍ ବୃଦ୍ଧି ହେତୁ ଦେଶରେ ଜନସାଧାରଣାମାନେ ବହୁ ଅସୁବିଧାର ସମ୍ମୁଖୀନ ହେଉଛନ୍ତି। ଏଥିପାଇଁ ପାକିସ୍ତାନରେ ଯୋଗାଡ କରି ଲୋକମାନେ ନିଜର ପରିବାର ପ୍ରତିପୋଷଣ କରୁଛନ୍ତି । ଆପଣା ମାନେ ଜାଣିଲେ ଆଶ୍ଚର୍ଯ୍ୟ ହେବେ ଯେ, କିଭିଳି ଭାବରେ ଆବଶ୍ୟକୀୟ ଜିନିଷ ସଂରକ୍ଷିତ କରୁଛନ୍ତି ସାଧାରଣ ଲୋକେ ।
ପାକିସ୍ତାନର ଆର୍ଥିକ ଅବସ୍ତା ଏବେ ସମସ୍ତେ ଜାଣିଛନ୍ତି । ପ୍ରଥମତଃ ବିଜୁଳି ବଞ୍ଚାଇବା ପାଇଁ ପାକିସ୍ତାନ ପକ୍ଷରୁ ନିଆଯାଇଥିବା ନିଷ୍ପତ୍ତିରେ ପ୍ରଥମ ବିଜୁଳିକୁ ପ୍ରାଧାନ୍ୟ ଦିଆଯାଇଛି । ଦୋକାନ ବଜାରରେ ଲାଗଥିବା ଲାଇଟକୁ ୮ଟାରେ ବନ୍ଦ କରାଯିବା ସହିତ ବାହାଘର ମଣ୍ଡପ, ସପିଂ ମହଲ ୧୦ଟାରେ ବନ୍ଦ କରିବାକୁ ନିର୍ଦ୍ଦେଶ ଦିଆଯାଇଛି। ଏହାସହ ସରକାରୀ କାର୍ଯ୍ୟାଳୟରେ ୩୦ ପ୍ରତିଶତ ବିଜୁଳି କାଟ ହେବ। ସୂଚନା ମୁତାବକ ଏଥିରେ ବିଜୁଳି ଖର୍ଚ୍ଚ ୬୨୦୦ କୋଟି ଟଙ୍କା ରହିଯିବ। ତେବେ ମାକେର୍ଟକୁ ଜଲଦି ବନ୍ଦ କରାଗଲେ ଅର୍ଥନୀତି ଉପରେ ଏହାର ପ୍ରଭାବ ପଡିବ ବୋଲି ରକ୍ଷା ମନ୍ତ୍ରୀଙ୍କୁ ପଚରା ଯିବାରୁ ସେ ଏଭଳି ବୟାନ ଦେଇଛନ୍ତି।
ଅନ୍ୟପଟେ ଟଙ୍କା ବଞ୍ଚାଇବା ଯାଇ ପୁରୁଣା ଜ୍ଞାନକୌଶଳ ବ୍ୟବହୃତ ବଲଭ୍, ଫ୍ୟାନ, ଆଦି ଜିନିଷକୁ ବନ୍ଦ କରିବାକୁ ପାକିସ୍ତାନ ସରକାର ନିଷ୍ପତ୍ତି ନେଇଛି । ପୁରୁଣା ବିଦ୍ୟୁତ୍ ଜନିତ ସାମଗ୍ରୀରେ ଅଧିକ ବିଦ୍ୟୁତ୍ ଖର୍ଚ୍ଚ ହେଉଥିବାରୁ ଏହାର ବ୍ୟବହାର କରାଯିବ ନାହିଁ । ଏଥିରେ ପାକିସ୍ତାନ ସରକାର ୨୨୦୦ କୋଟି ଟଙ୍କା ଖର୍ଚ୍ଚ ହେବାରୁ ରଖିପାରିବ ।
ପାକିସ୍ତାନ ସରକାର ଠାରୁ ୨ ପାଦ ଆଗରେ ଅଛନ୍ତି ସେଠାକାର ଜନସାଧାରଣାମାନେ। ବର୍ତ୍ତମାନ ଏକ ଭିଡିଓ ଭାଇରାଲ ହେବାରେ ଲାଗିଛି ଯେଉଁଥିରେ ଦେଖିବାକୁ ମିିଳିଛି ରୋଷେଇରେ ବ୍ୟବହୃତ ହେଉଥିବା ଏଲପିଜି ଗ୍ୟାସକୁ ଲୋକମାନେ ସିଲିଣ୍ଡର ବଦଳରେ ପ୍ଲାଷ୍ଟିକ ବେଲୁନରେ ଭର୍ତ୍ତି କରୁଛନ୍ତି । ଏଭଳି ବିପଦପୂର୍ଣ୍ଣ ପଦାର୍ଥକୁ ଲୋକମାନେ କିଭଳି ବେଲୁନରେ ଭର୍ତ୍ତି କରି ସଂରକ୍ଷଣ କରି ରଖୁଛନ୍ତି। କୁହାଯାଉଛି ଯେ, ପାକିସ୍ତାନରେ ଗ୍ୟାସ ଦର ଆକାଶ ଛୁଆଁ ହୋଇଥିବା ବେଳେ ଗ୍ୟାସ ସିଲିଣ୍ଡର ଅଭାବ ଦେଖାଦେଇଛି । ସାଧାରଣ ଲୋକଙ୍କ ପାଖରେ ଏହାକୁ କିଣିବା ଅସମ୍ଭବ ହୋଇପଡିଛି । ପାକିସ୍ତାନରେ କର୍ମସିଆଲ ଗୋଟିଏ ଗ୍ୟାସ ସିଲିଣ୍ଡର ଦାମ୍ ପାକିସ୍ତାନି ଟଙ୍କା ଅନୁସାରେ ୧୦ ହଜାର ଟଙ୍କାର ରହିଛି।
ପାକିସ୍ତାନରେ ଆର୍ଥିକ ସଙ୍କଟର ବଡ କାରଣ ହେଉଛି ମୁଦ୍ରାସ୍ଫୀତି ଏବଂ ବିଶୃଙ୍ଖଳା ଯୋଗୁଁ ଜନସାଧାରଣମାନେ ଅସୁବିଧାର ସମ୍ମୁଖିନ ହେଉଛନ୍ତି ।
କ୍ରିକେଟ ଖେଳି ବାଇକରେ ଫେରିବା ବେଳେ ଧକ୍କା ଦେଲା ଗ୍ୟାସ୍ ଟ୍ୟାଙ୍କର, ୩ ଯୁବକ ମୃତ
କଳାହାଣ୍ଡି: କଳାହାଣ୍ଡି ପାସ୍ତିଗୁଡ଼ିରେ ମର୍ମନ୍ତୁଦ ସଡ଼କ ଦୁର୍ଘଟଣା । ବାଇକକୁ ଧକ୍କା ଦେଲା ଗ୍ୟାସ ଟ୍ୟାଙ୍କର । ଘଟଣା ସ୍ଥଳରେ ତିନି ଯୁବକଙ୍କ ମୃତ୍ୟୁ । ମୃତଙ୍କ ମାନେ ରକଵାହଳିର ଅକ୍ଷଗୌଡ଼ ଓ ଟୁଟୁ ଗୌଡ଼ । କ୍ରିକେଟ ଖେଳି ଗାଁକୁ ଫେରୁଥିବା ବେଳେ ଅଘଟଣ । ଘଟଣା ସ୍ଥଳେ ଉତେଜନା ଜାରି ରହିଛି । ଜାତୀୟ ରାଜପଥ ୨୬ ଅବରୋଧ ଯୋଗୁ କେସିଙ୍ଗା ଭବାନୀପାଟଣା ଯାତାୟାତ ବନ୍ଦ ହୋଇଛି । ସ୍ଥାନୀୟ ଲୋକମାନେ ଦୁର୍ଘଟଣାସ୍ଥଳରେ ରାସ୍ତା ବନ୍ଦ କରିଦେଇଛନ୍ତି । କ୍ଷତିପୂରଣ ସହ ଦୁର୍ଘଟଣା ଘଟାଇଥିବା ଗାଡିର ଡ୍ରାଇଭରଙ୍କୁ ଗିରଫ ଦାବିରେ ଆନ୍ଦୋଳନ କରିଛନ୍ତି ।
ଭାରତର ୫ ଫ୍ୟୁଚର ଷ୍ଟାର କ୍ରିକେଟର
ନୂଆଦିଲ୍ଲୀ: ନା ଥିଲେ ରୋହିତ ଶର୍ମା, ନା ଥିଲେ ବିରାଟ କୋହଲି । କେଏଲ ରାହୁଲଙ୍କୁ ଦେଖିବାକୁ ମିଳି ନଥିଲା କି ଭୁବନେଶ୍ବର କୁମାର ନଥିଲେ । ହେଲେ କ୍ରିଜ୍ ଉପରେ ଏମାନଙ୍କ ଅନୁପସ୍ଥିତି ଅନୁଭବ କରି ନଥିଲେ କ୍ରିକେଟ ପ୍ରେମୀ । ଶ୍ରୀଲଙ୍କା ବିପକ୍ଷ ସିରିଜରେ ଏମାନେ ଦଳରେ ସାମିଲ ନହେବା ପରେ ନିରାଶ ପ୍ରଶଂସକଙ୍କୁ ଭରପୂର ମନୋରଞ୍ଜନ ଦେଇଥିଲେ ଭାରତର ୫ ଫ୍ୟୁଚର୍ କ୍ରିକେଟ୍ ଷ୍ଟାର । ଏମାନଙ୍କ ଦମଦାର ପ୍ରଦର୍ଶନ ବଳରେ ଭାରତ ଶ୍ରୀଲଙ୍କାକୁ ୨-୧ରେ ସିରିଜ ହରାଇଛି । ଆସନ୍ତୁ ଜାଣିବା ସିରିଜରେ ଷ୍ଟାର ପାଲଟି ଥିବାର ଭାରତର ଏହି ୫ ଷ୍ଟାର କ୍ରିକେଟରଙ୍କ ସମ୍ପର୍କରେ ।
ଅକ୍ଷର ପଟେଲ: ବାମହାତୀ ଅଲରାଉଣ୍ଡର ଅକ୍ଷର ପଟେଲ ଏ ସିରିଜରେ ରବୀନ୍ଦ୍ର ଜାଡେଜାଙ୍କ ଅନୁପସ୍ଥିତି ଅନୁଭବ ହେବାକୁ ଦେଇ ନଥିଲେ । ସିରିଜରେ ସେ ୧୧୭ ରନ୍ କରିବା ସହ ୩ଟି ଓ୍ବିକେଟ ହାସଲ କରିଛନ୍ତି । ଦ୍ବିତୀୟ ଟି-୨୦ରେ ଅକ୍ଷରଙ୍କ ଧମାକାଦାର ବ୍ୟାଟିଂ କ୍ରିକେଟ୍ ପ୍ରଶଂସକଙ୍କ ମନରେ ବହୁତ ଦିନ ରହିବ । ଅଲରାଉଣ୍ଡ ପ୍ରଦର୍ଶନ ପାଇଁ ଅକ୍ଷର ପଟେଲ ପ୍ଲେୟାର ଅଫ ସିରିଜ ମଧ୍ୟ ହୋଇଛନ୍ତି ।
ସୂର୍ଯ୍ୟକୁମାର ଯାଦବ: ବିଶ୍ବର ନମ୍ବର ଓ୍ବାନ ଟି-୨୦ ବ୍ୟାଟ୍ସମ୍ୟାନ ସୂର୍ଯ୍ୟକୁମାର ଯାଦବଙ୍କ ଦମଦାର ପ୍ରଦର୍ଶନ ସିରିଜରେ ଦେଖିବାକୁ ପାଇଥିଲେ କ୍ରିକେଟ ପ୍ରଶଂସକ । ୩ଟି ମ୍ୟାଚରେ ୧୭୫ରୁ ଅଧଇକ ଷ୍ଟ୍ରାଇକରେଟରେ ୧୭୦ ରନ୍ କରିଥିଲେ । ଏଥରେ ଗୋଟିଏ ଶତକ ଓ ଗୋଟିଏ ଅର୍ଦ୍ଧଶତକ ମଧ୍ୟ ରହିଛି । ସିରିଜରେ ୧୨ ଛକା ଓ ୧୧ଟି ଚୌମା କରିଥିଲେ ସୂର୍ଯ୍ୟ ।
ଉମରାନ ମଲ୍ଲିକ: ଫାଷ୍ଟ ବୋଲର ଉମରାନ ମଲ୍ଲିକଙ୍କ ପାଇଁ ଏହି ସିରିଜ ଭଲ ରହିଥିଲା । ସିରିଜର ୩ଟି ମ୍ୟାଚରେ ୧୫.୧୪ ପ୍ରତିଶତରେ ୭ ଓ୍ବିକେଟ ହାସଲ କରିଛନ୍ତି । ଉମରାନଙ୍କ ସ୍ପେସ୍ ଓ ବାଉନ୍ସ ଶ୍ରୀଲଙ୍କ ଖେଳାଳିଙ୍କୁ ବହୁତ ସମସ୍ୟାରେ ପକାଇଥିଲା । ସିରିଜରେ ସବୁଠାରୁ ଅଧିକ ଓ୍ବିକେଟ ନେବା ଖେଳାଳି ଥିଲେ ଉମରାନ ।
ଶିବମ ମାଭି: ଶ୍ରୀଲଙ୍କା ବିପକ୍ଷ ସିରିଜରୁ ଫାଷ୍ଟ ବୋଲର ଶିବମ ମାଭି ଇଣ୍ଟରନ୍ୟାସନାଲ ଡେବ୍ୟୁ କରିଥିଲେ । ମୁମ୍ବାଇରେ ଡେବ୍ୟୁ ମ୍ୟାଚରେ ୪ଟି ଓ୍ବିକେଟ ହାସଲ କରିଥିଲେ । ଶେଷ ଦୁଇଟି ମ୍ୟାଚରେ ଓ୍ବିକେଟ ପାଇନଥିଲେ ବି ବ୍ୟାଟିଂରେ ଭଲ ଯୋଗଦାନ ଦେଇଥିଲେ ।
ହାର୍ଦ୍ଦିକ ପାଣ୍ଡ୍ୟା: ଅଧିନାୟକ ହାର୍ଦ୍ଦିକ ପାଣ୍ଡ୍ୟା ବି ସିରିଜରେ ଷ୍ଟାର ଖେଳାଳି ଥିଲେ । ସେ ୩ଟି ଓ୍ବିକେଟ ନେବା ସହ ୪୫ ରନ୍ କରିଥିଲେ । ହେଲା ତାଙ୍କ ଅଧିନାୟକତ୍ବରେ କିଛି ଭଲ ନିଷ୍ପତ୍ତି ତାଙ୍କଠାରୁ ଦେଖିବାକୁ ମିଳିଥିଲା । ପାଣ୍ଡ୍ୟାଙ୍କ ଏହା ତୃତୀୟ ସିରିଜ ବିଜୟ ।
୩୦୦ ରୁ ଆରମ୍ଭ କରିଥିଲେ କ୍ୟାରିୟର ଏବେ ପାନ ଇଣ୍ଡିଆ ସୁପରଷ୍ଟାର
ବେଙ୍ଗାଲୁରୁ: କନ୍ନଡ ଫିଲ୍ମର ସୁପରଷ୍ଟାର ୟଶ । କେଜିଏଫ ଫିଲ୍ମ ପରେ ଦେଶରେ ରକି ଭାଇ ନାମ ବେଶ ଜଣାଶୁଣା । ଭାରତୀୟ ସିନେମା ସୁପରଷ୍ଟାରମାନଙ୍କ ମଧ୍ୟରେ ନିଜର ଜାଗା ବନାପାରିଛନ୍ତି ୟଶ । ଆଜି ୩୭ ବର୍ଷ ବୟସରେ ପାଦ ଥାପିଛନ୍ତି ଏହି ସୁପରଷ୍ଟାର । ତାଙ୍କର ପ୍ରକୃତ ନାମ ହେଉଛି ନବୀନ କୁମାର ଗୌଡା । କନ୍ନଡ ଫିଲ୍ମ ଇଣ୍ଡ୍ରଷ୍ଟ୍ରିରେ ସବୁଠାରୁ ଅଧିକ ପାରିଶ୍ରମିକ ନେଉଥିବା ଅଭିନେତାଙ୍କ ମଧ୍ୟରୁ ସେ ଜଣେ । କେଜିଏଫ ଚ୍ୟାପଟର-୨ ପାଇଁ ତାଙ୍କୁ ୩୦ କୋଟି ଟଙ୍କାର ଚେକ୍ ମିଳିଥିବା ସୂଚନା ମିଳିଛି । କର୍ଣ୍ଣାଟକର ମଧ୍ୟବିତ ପରିବାରେ ଜନ୍ମ ଗ୍ରହଣ କରିଥିଲେ ଏହି ସୁପରଷ୍ଟାର ୟଶ । ଗୋଟିଏ ବିଜ୍ଞାପନରେ କାମ କରିବା ପାଇଁ ସେ ପ୍ରାୟ 60 ଲକ୍ଷ ଟଙ୍କା ଚାର୍ଜ କରୁଥିବା ବେଳେ ତାଙ୍କର ମୋଟ୍ ସମ୍ପତ୍ତି ୭ ମିଲିୟନ୍ ଡଲାର ଅର୍ଥାତ୍ ପାକାପାଖି ୫୭ କୋଟି ଟଙ୍କା ରହିଛି ।
କର୍ଣ୍ଣାଟକର ଏକ ଛୋଟ ଗାଁରେ ୟଶଙ୍କ ଜନ୍ମ । ତାଙ୍କ ବାପା ଜଣେ ସରକାରୀ ବସର ଡ୍ରାଇଭର ଭାବେ କାମ କରି ଘର ପ୍ରତିପୋଷଣ କରୁଥିଲେ । ୟଶଙ୍କର ଛୋଟବେଳୁ ଅଭିନୟ ପ୍ରତି ରୁଚି ରହିଥିଲା । ସେ ଯେତେବେଳେ ଦ୍ୱାଦଶରେ ପଢୁଥିଲେ ସେତେବେଳେ ସେ ଭାବି ନେଇଥିଲେ ଯେ, ଫିଲ୍ମରେ ହିଁ କ୍ୟାରିୟର କରିବେ କିନ୍ତୁ ତାଙ୍କ ପରିବାର ଲୋକେ ଚାହୁଁନଥିଲେ ସେ ଆକ୍ଟର ହୁଅନ୍ତୁ । ୟଶ ତାଙ୍କ ଘର ଛାଡି ବେଙ୍ଗାଲୁରୁ ଆସିଥିଲେ । ସେ ଘରୁ ଆସିବା ବେଳେ ନିଜ ସହିତ ମାତ୍ର ୩୦୦ ଟଙ୍କା ଧରି ଆସିଥିଲେ ଆକ୍ଟର ହେବା ପାଇଁ। ପ୍ରଥମେ ସେ ବେଙ୍ଗାଲୁରୁରେ ଏକ ଥିଏଟରରେ ଗ୍ରୁପରେ ମିଶି କାମ କରିଥିଲେ । ବହୁ ପରିଶ୍ରମ ପରେ ସେ ଥିଏଟରେ ବ୍ୟାକ ଗ୍ରାଉଣ୍ଡ ଆକ୍ଟର ଭାବେ ଅଭିନୟ କରିଥିଲେ । ଏହାପରେ ୟଶ ଧିରେ ଧିରେ ଆଗକୁ ବଢି ଚିଲିଲେ। ଫିଲ୍ମରେ ସହ ନିର୍ଦ୍ଦେଶକ ଭାବେ ମଧ୍ୟ କାମ କରିଥିଲେ । ଏହି ସମୟରେ ସେ ଟିଭି ଏବଂ ଫିଲ୍ମ ପାଇଁ ଅଡିସନ୍ ଦେଉଥିଲେ ।ୟଶ ଟିଭି ପାଇଁ ଅନେକ କାମ କରିବା ସହ ୨୦୦୮ ମସିହାରେ ତାଙ୍କୁ ପ୍ରଥମ ଫିଲ୍ମ ଅଫର ହୋଇଥିଲା । ‘ମୋଗିନା ମାନସୁ’ ନାମକ ଏହି ଫ୍ମିଲରେ ସେ ଚମତ୍କାର ଅଭିନୟ କରିଥିବା ବେଳେ ତାଙ୍କୁ ପ୍ରଥମ ଏହି ଫିଲ୍ମ ପାଇଁ ଆୱର୍ଡ ମିଳିଛି। ଏହାପରେ ସେ କେବେ ପଛକୁ ବୁଲି ଦେଖିନଥିଲେ ଆଗକୁ ବଢିବା ସଙ୍ଗେ ସଙ୍ଗେ ସୁପରଷ୍ଟାର ହୋଇଛନ୍ତି ୟଶ ।
‘ନମସ୍ତେ ପ୍ରିୟବନ୍ଧୁ’ ଅନୁଷ୍ଠାନ ପକ୍ଷରୁ ଗାୟତ୍ରୀବାଳା ପଣ୍ଡାଙ୍କୁ ନାଗରିକ ସମ୍ମାନ ପ୍ରଦାନ
ଭୁବନେଶ୍ୱର: ଏବେଠାରୁ ପିଲାଙ୍କୁ ଓଡ଼ିଆ ଭାଷା ସାହିତ୍ୟ ସହିତ ଜଡ଼ିତ କଲେ ହିଁ ଓଡ଼ିଆ ଭାଷାର ବିକାଶ ହେବ । ଆମ କଳା ସଂସ୍କୃତି ଓ ଐତିହ୍ୟକୁ ବଞ୍ଚାଇ ରଖିବା ପାଇଁ ଆମ ପିଲା ଓଡ଼ିଆ ଶିଖିବା ନିହାତି ଜରୁରୀ । କେନ୍ଦ୍ର ସାହିତ୍ୟ ଏକାଡେମୀ ପୁରସ୍କାରପ୍ରାପ୍ତ କବି ଡକ୍ଟର ଗାୟତ୍ରୀବାଳା ପଣ୍ଡା ଏହି ମତ ଦେଇଛନ୍ତି । କୁଜଙ୍ଗଠାରେ `ନମସ୍ତେ ପ୍ରିୟବନ୍ଧୁ’ ଅନୁଷ୍ଠାନ ପକ୍ଷରୁ ଗାୟତ୍ରୀବାଳା ପଣ୍ଡାଙ୍କୁ ନାଗରିକ ସମ୍ମାନ ପ୍ରଦାନ ଅବସରରେ ସେ ଏହା କହିଛନ୍ତି । କାର୍ଯ୍ୟକ୍ରମ ଆରମ୍ଭରେ ବିଭିନ୍ନ ଅଞ୍ଚଳରୁ ଆସିଥିବା କବିମାନେ କବିତା ପାଠ କରିଥିଲେ ।
ଏହି ଅବସରରେ ବିଶିଷ୍ଟ କବି ପୀତାମ୍ବର ତରାଇ, ସାହିତ୍ୟିକ ଚନ୍ଦ୍ରକାନ୍ତ ପଣ୍ଡା, କୁଜଙ୍ଗ ତହସିଲଦାର ପ୍ରୀତିପର୍ଣ୍ଣା ମିଶ୍ର, ବିଡିଓ ସୋମ୍ୟଶ୍ରୀ ପାଣିଗ୍ରାହୀ ପ୍ରମୁଖ ଡକ୍ଟର ଗାୟତ୍ରୀବାଳା ପଣ୍ଡାଙ୍କ `ଦୟାନଦୀ’ କବିତା ସଂକଳନ ସମ୍ପର୍କରେ ଆଲୋଚନା କରିଥିଲେ । ଶେଷରେ ଡକ୍ଟର ଗାୟତ୍ରୀବାଳା ପଣ୍ଡା ଓ ବିଶିଷ୍ଟ ଶିକ୍ଷାବିତ୍ ତଥା ନିଶା ନିବାରଣର ପୁରୋଧା ନିଶାକର ମୁଦୁଲିଙ୍କୁ ନାଗରିକ ସମ୍ମାନରେ ସମ୍ମାନିତ କରାଯାଇଥିଲା। ଉତ୍ସବରେ ରଘୁନାଥ ସାହୁ ସଭାପତିତ୍ବ କରିଥିଲେ ।
ବିବାହର ପ୍ରତିଶ୍ରୁତି ଦେଇ ପ୍ରାପ୍ତ ବୟସ୍କ ମହିଳାଙ୍କ ସହ ଶାରୀରିକ ସଂପର୍କ ରଖିବା ଦୁଷ୍କର୍ମ ନୁହେଁ: ହାଇକୋର୍ଟ
କଟକ: ବିବାହର ପ୍ରତିଶ୍ରୁତି ଦେଇ ପ୍ରାପ୍ତ ବୟସ୍କ ମହିଳାଙ୍କ ସହିତ ଶାରୀରିକ ସଂପର୍କ ରଖିବା ଦୁଷ୍କର୍ମ ଅପରାଧ ପରିସରଭୁକ୍ତ ନୁହେଁ । ଏଭଳି ଏକ ଗୁରୁତ୍ୱପୂର୍ଣ୍ଣ ରାୟ ଦେଇଛନ୍ତି ଓଡିଶା ହାଇକୋର୍ଟ । କେତେକ କ୍ଷେତ୍ରରେ ମହିଳାମାନେ ସ୍ୱଇଚ୍ଛାରେ ସଂପର୍କ ରଖୁଛନ୍ତି । ତେଣୁ ଏଭଳି ଘଟଣାରେ ଦୁଷ୍କର୍ମ ସଂକ୍ରାନ୍ତୀୟ ଆଇନ ବ୍ୟବହାର ହେବା ଉଚିତ ନୁହେଁ । ଆଇପିସିର ଦଫା ୩୭୫ ଅନୁସାରେ ପୀଡ଼ିତାଙ୍କ ସହିତ ଘଟିଥିବା ନିର୍ଦ୍ଦିଷ୍ଟ ଯୌନ ନିର୍ଯାତନା ପ୍ରସଙ୍ଗକୁ ଦୁଷ୍କର୍ମ ଅପରାଧ ପରିସରଭୁକ୍ତ କରାଯାଇଛି ।
କିନ୍ତୁ ବିବାହର ପ୍ରଲୋଭନ ଦେଇ ଶାରୀରିକ ସଂପର୍କ ରଖିବା ଘଟଣା ଏହାର ଅନ୍ତର୍ଭୁକ୍ତ ନୁହେଁ । ଏହିଭଳି ଘଟଣା ଗୁଡ଼ିକୁ ଦୁଷ୍କର୍ମ ଭାବେ ଗ୍ରହଣ କରିବା ଭୁଲ୍ ହେବ । ଡକ୍ଟର ଜଷ୍ଟିସ ସଞ୍ଜୀବ କୁମାର ପାଣିଗ୍ରାହୀଙ୍କୁ ନେଇ ଗଠିତ ଖଣ୍ଡପୀଠ ଏକ ଦୁଷ୍କର୍ମ ମାମଲାରେ ଜାମିନ ଆବେଦନର ଶୁଣାଣି କରି ଏପରି ରାୟ ଦେଇଛନ୍ତି । ସୂଚନା ଅନୁଯାୟୀ, ଜଣେ ଯୁବତୀଙ୍କୁ ବିବାହ ପ୍ରତିଶ୍ରୁତି ଦେଇ ଜଣେ ବ୍ୟକ୍ତି ବାରମ୍ବାର ଶାରୀରିକ ସମ୍ପର୍କ ରଖିଥିଲେ । କିଛିଦିନ ପରେ ସେ ଯୁବତୀଙ୍କୁ ଛାଡ଼ି ପଳାଇଥିଲା ।
ଏନେଇ ଯୁବତୀଙ୍କ ପକ୍ଷରୁ ନିମାପଡା ଥାନାରେ ଅଭିଯୋଗ ହୋଇଥିଲା । ଅଭିଯୋଗ ଆଧାରରେ ପୋଲିସ ଅଭିଯୁକ୍ତଙ୍କୁ ଗିରଫ କରି କୋର୍ଟ ଚାଲାଣ କରିଥିଲା । ନିମ୍ନ ଅଦାଲତରେ ଜାମିନ ଆବେଦନ ଖାରଜ ହେବା ପରେ ଅଭିଯୁକ୍ତ ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ । ଆଉ ଏହି ଆବେଦନର ଶୁଣାଣି କଲା ବେଳେ ହାଇକୋର୍ଟ ଦୁଷ୍କର୍ମକୁ ନେଇ ଏଭଳି ଏକ ରାୟ ଦେଇଛନ୍ତି । ଏହା ସହିତ ଅଭିଯୁକ୍ତଙ୍କୁ ସର୍ତ୍ତମୂଳକ ଜାମିନ ପ୍ରଦାନ କରିବା ପାଇଁ ନିମ୍ନ ଅଦାଲତଙ୍କୁ ନିର୍ଦ୍ଦେଶ ଦେଇଛନ୍ତି ।
ଅଞ୍ଜଳି ଗାଡ଼ି ଚକରେ ଫସିଥିବା ଜାଣି ବି ଗାଡ଼ି ଅଟକାଇ ନଥିଲେ ଅଭିଯୁକ୍ତ
ନୂଆଦିଲ୍ଲୀ: ଅଞ୍ଜଳି ସିଂ ମୃତ୍ୟୁ ମାମଲାରେ ବଡ଼ ଖୁଲାସା । ଜାଣି ଜାଣି ଅଞ୍ଜଳିଙ୍କ ଜୀବନ ନେଇଗଲେ ଅଭିଯୁକ୍ତ । ସେମାନଙ୍କୁ ଜଣାଥିଲା ଦୁର୍ଘଟଣା ପରେ ଅଞ୍ଜଳି ଗାଡିରେ ଫସି ଯାଇଥିବା । ହେଲେ ମଦ ନିଶାରେ ଚୁର ଅଭିଯୁକ୍ତମାନେ ନା ଗାଡି ଅଟକାଇଥିଲେ, ନା ଅଞ୍ଜଳିଙ୍କ ଜୀବନ ବଞ୍ଚାଇଥିଲେ । ଏନେଇ ପୋଲିସ ଆଗରେ ସ୍ବୀକାର କରିଛନ୍ତି ଗିରଫ ଅଭିଯୁକ୍ତମାନେ ।
ପୋଲିସକୁ ସେମାନେ କହିଛନ୍ତି, ଦୁର୍ଘଟଣା ପରେ ଅଞ୍ଜଳି କାର ତଳେ ଫସି ସେମାନେ ଜାଣିଥିଲେ । ହେଲେ ଭୟରେ ଗାଡ଼ି ନଅଟକାଇ ଚଳାଇଥିଲେ । କଞ୍ଝାବାଲା ପର୍ଯ୍ୟନ୍ତ କାର ବାରମ୍ବାର ୟୁଟର୍ଣ୍ଣ ନେଇଥିଲା । ଗାଡ଼ି ତଳୁ ଅଞ୍ଜଳିଙ୍କୁ କାଢ଼ିଲେ ହତ୍ୟା ମାମଲାରେ ଫସିବା ଭୟ ଥିଲା । ତେଣୁ ଦୁର୍ଘଟଣା ପରେ ଅଭିଯୁକ୍ତମାନେ ଅଞ୍ଜଳିଙ୍କୁ କାଢି ନଥିଲେ ।
ପୂର୍ବରୁ କାରରେ ହାଇ ଭଲ୍ୟୁମରେ ମ୍ୟୁଜିକ୍ ଚାଲିଥିବାରୁ କିଛି ଜାଣିପାରିନଥିବା ଅଭିଯୁକ୍ତମାନେ କହିଥିଲେ । ଏବେ କାରରେ କୌଣସି ମ୍ୟୁଜିକ ଚାଲି ନଥିବା ପୋଲିସକୁ କହିଛନ୍ତି । ସେପଟେ ଅଞ୍ଜଳିଙ୍କ ସାଙ୍ଗ ନିଧି ୨୦୨୦ରେ ଏକ ଡ୍ରଗ୍ସ ମାମଲାରେ ଧରା ପଡ଼ିଥିଲେ। ଏପରିକି ତାଙ୍କ ନାଁରେ ଟ୍ରାଫିକ୍ ଚାଲାଣ ବି ବାକିଆ ଥିବା ଜଣାପଡିଛି ।
ସୁନ୍ଦର ରାଜ୍ୟ ଗଠନ ପାଇଁ ମୁଖ୍ୟମନ୍ତ୍ରୀଙ୍କ ଆହ୍ବାନ
ପୁରୀ: ପୁରୀରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ତାଳବଣିଆସ୍ଥିତ ସ୍ପୋର୍ଟ୍ସ କମ୍ପ୍ଲେକ୍ସଠାରେ ଆୟୋଜିତ ଠାକୁର ଅନୁକୁଳଚନ୍ଦ୍ରଙ୍କର ଉତ୍କଳ ଆଗମନକୁ ୧୦୧ ତମ ବର୍ଷ ପୂର୍ତ୍ତି ଉତ୍ସବରେ ହେଲେ ସାମିଲ । ସୁନ୍ଦର ରାଜ୍ୟ ଓ ଦେଶ ଗଠନ ପାଇଁ ଦେଲେ ଆହ୍ବାନ ।
ମୁଖ୍ୟମନ୍ତ୍ରୀଙ୍କ ହେଲିକପ୍ଟର ତାଳବଣିଆ ସ୍ଥିତ ହେଲିପ୍ୟାଡ଼ରେ ପହଞ୍ଚିବା ପରେ ସୁରକ୍ଷା ବଳୟ ଭିତରେ ସଭା ସ୍ଥଳକୁ ଯାଇଥିଲେ । ସଭାରେ ସାମିଲ ହେବା ସହ ଜୟ ଜଗନ୍ନାଥ, ଜୟଗୁରୁ କହି ମୁଖ୍ୟମନ୍ତ୍ରୀ ତାଙ୍କ ଅଭିଭାଷଣ ଆରମ୍ଭ କରିଥିଲେ । ଠାକୁର ଅନୁକୁଳଚନ୍ଦ୍ରଙ୍କ ସ୍ମୃତିଚାରଣ କରିବା ସହ ଠାକୁରଙ୍କ ଭକ୍ତ ସମାଜ ସେବାରେ ଭଲ ଯୋଗଦାନ କରୁଥିବା କହିଥିଲେ । ଏହାସହ ଉପସ୍ଥିତ ଠାକୁର ଅନୁକୁଳଚନ୍ଦ୍ରଙ୍କ ଭକ୍ତଙ୍କୁ ଏକାଠି କାମ କରିବା ସହ ସୁନ୍ଦର ଦେଶ ଓ ରାଜ୍ୟ ଗଠନରେ ସହଯୋଗର ହାତ ବଢ଼ାଇବାକୁ ଆହ୍ବାନ ଦେଇଥିଲେ ।
ମୁଖ୍ୟମନ୍ତ୍ରୀ କହିଥିଲେ ୧୦୦ ବର୍ଷ ତଳେ ଠାକୁର ଅନୁକୁଳଚନ୍ଦ୍ର ପୁରୀ ଆସିଥିଲେ । ନେତାଜୀ ସୁଭାଷ ଚନ୍ଦ୍ର ବୋଷଙ୍କ ବାପାଙ୍କ ଅନୁରୋଧରେ ପୁରୀ ଆସିଥିଲେ ଠାକୁର ଅନୁକୁଳଚନ୍ଦ୍ର । ଠାକୁରଙ୍କ ସହ ତାଙ୍କର ବହୁ ଅନୁଗାମୀ ମଧ୍ୟ ପୁରୀ ଆସିଥିଲେ । ଠାକୁରଙ୍କ ଲକ୍ଷ ଲକ୍ଷ ଅନୁଗାମୀ ସେବା କାର୍ଯ୍ୟରେ ନିୟୋଜିତ ଅଛନ୍ତି । ସୁନ୍ଦର ଓ ସୁସ୍ଥ ଓଡ଼ିଶା ଗଠନରେ ସେମାନଙ୍କର ଅବଦାନ ଅନସ୍ୱୀକାର୍ଯ୍ୟ । ତେଣୁ ସମସ୍ତେ ମିଶି ସୁନ୍ଦର ରାଜ୍ୟ ଗଠନ କରିବା । ଏଭଳି ଏକ ଖୁସି ମୁହୂର୍ତ୍ତରେ ସମସ୍ତଙ୍କୁ ଅଭିନନ୍ଦନ ଜଣାଇଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ।
ଦଶମ ପାସଙ୍କ ପାଇଁ ଖୁସି ଖବର: ରେଲଓ୍ବେରେ ୪ ହଜାର ଚାକିରି
ନୂଆଦିଲ୍ଲୀ: ଦଶମ ପାସ କରିଛନ୍ତି ଓ ଚାକିରି ଖୋଜୁଛନ୍ତି କି ? ଆପଣଙ୍କ ପାଇଁ ଖୁସି ଖବର । ରେଲଓ୍ବେରେ ବମ୍ଫର ଅଫର୍ । ୪ ହଜାର ୧୦୩ ପଦ ପାଇଁ ବାହାରିଲା ନୋଟିସ୍ । ଦକ୍ଷିଣ-ମଧ୍ୟ ରେଲଓ୍ବେ ପାଇଁ ଏହି ଚାକିରି ନୋଟିସ୍ ବାହାରିଛି । ଏସି ମେକାନିକ, କାରପେଣ୍ଟର, ଇଲେକ୍ଟ୍ରିସିଆନ, ଇଲେକ୍ଟ୍ରୋନିକ ମେକାନିକ, ଫିଟର, ପେଣ୍ଟର ଓ ଟ୍ରେଡ୍ସ ପଦ ପାଇଁ ଚାକିରି ବାହାରିଛି । ଇଚ୍ଛୁକ ଆଶାୟୀ scr.indianrailways.gov.in ରେ ଆବେଦନ କରିପାରିବେ ।
ମେକାନିକ ପଦ ପାଇଁ ୨୫୦, କାରପେଣ୍ଟର ପାଇଁ ୧୮, ଡିଜେଲ ମେକାନିକ ପାଇଁ ୫୩୧, ଇଲେଟ୍ରିସିଆନ ପାଇଁ ୧୦୧୯, ଇଲେଟ୍ରୋନିକ୍ସ ମେକାନିକ ପାଇଁ ୯୨, ଫିଟର ପାଇଁ ୧୪୬୦, ମେସିନିଷ୍ଟ ପାଇଁ ୭୧, ମେକାନିକ ମେସିନ ଟୁଲ ମେଣ୍ଟେନାନ୍ସ ପାଇଁ ୫, ମିଲ ରାଇଟ ମେଣ୍ଟେନାନ୍ସ ପାଇଁ ୨୪, ପେଣ୍ଟର ପାଇଁ ୮୦ ଓ ଓ୍ବେଲ୍ଡର ପାଇଁ ୫୫୩ ପଦ ରହିଛି ।
ଯୋଗ୍ୟତା
୫୦ ପ୍ରତିଶତ ନମ୍ବରରେ ଦଶମ ପାସ କରିଥିଲେ ଆପଣ ରେଲଓ୍ବେର ଆବେଦନ କରିପାରିବେ । ସେହିପରି ଟେକ୍ନିସିଆ ଭଳି ପଦ ପାଇଁ ସମ୍ପୃକ୍ତ ଟ୍ରେଡରେ ଆଇଟିଆଇ କରିଥିବା ଆବଶ୍ୟକ ।
ବୟସ
ଆପଣ ଯଦି ୨୦୨୨ ଡିସେମ୍ବର ୩୦ ତାରିଖ ସୁଦ୍ଧ ୧୫ ବର୍ଷରୁ ୨୪ ବର୍ଷ ମଧ୍ୟରେ ହୋଇଥିବେ ତେବେ ଆପଣ ଏସବୁ ପଦ ପାଇଁ ଆବେଦନ କରିପାରିବେ । ସଂରକ୍ଷିତ ବର୍ଗର ଆଶାୟୀ ସରକାରୀ ମାନଦଣ୍ଡ ବୟସ ଅନୁସାରେ ଆବେଦନ କରିପାରିବେ ।
ଆବେଦନ ଫି’
ସାଧାରଣ ବର୍ଗ, ଓବିସି, ଇଡବ୍ଲୁଏସ ବର୍ଗର ଆଶାୟୀଙ୍କୁ ଆବେଦନ ପାଇଁ ୧୦୦ ଟଙ୍କା ଜମା କରିବାକୁ ପଡ଼ିବ । ଡେବିଟ କାର୍ଡ, କ୍ରେଡିଟ କାର୍ଡ, ନେଟ୍ ବ୍ୟାଙ୍କିଂ ଜରିଆରେ ମଧ୍ୟ ଆବେଦନ ଫି’ ଜମା କରିପାରିବେ । ମହିଳା ଓ ସଂରକ୍ଷିତ ବର୍ଗର ଆଶାୟୀଙ୍କୁ କୌଣସି ଆବେଦନ ଫି’ ଦେବାକୁ ପଡ଼ିବ ନାହିଁ ।
୨୦୨୨ ଡିସେମ୍ବର ୩୦ ତାରିଖରୁ ଆବେଦନ ପ୍ରକ୍ରିୟା ଆରମ୍ଭ ହୋଇଛି । ଜାନୁଆରୀ ୨୯ ସନ୍ଧ୍ୟା ୫ଟା ପର୍ଯ୍ୟନ୍ତ ଆବେଦନ କରିପାରିବେ ଆଶାୟୀ ।