ଭୁବନେଶ୍ବର: ପୁଣି ରକ୍ତରଞ୍ଜିତ ହେଲା ରାଜଧାନୀ । ୨୨ର ରାଗ ୨୩ରେ ସୁଝେଇଲେ ମାଛ ବ୍ୟବସାୟୀ । ପ୍ରତିଶୋଧ ପରାୟଣ ହୋଇ ବ୍ୟବସାୟୀଙ୍କୁ ହାଣିଲେ ଅଟୋ ଡ୍ରାଇଭର । ବଡଗଡ ହାଇସ୍କୁଲ ପାଖରେ ମାଛ ବ୍ୟବସାୟୀଙ୍କୁ ଆକ୍ରମଣ କରି ଲହୁଲୁହାଣ କରି ପକାଇଲେ ଅଟୋ ଡ୍ରାଇଭର। ଗୁରୁତର ଅବସ୍ଥାରେ କ୍ୟାପିଟାଲ ହସ୍ପିଟାଲରେ ଭର୍ତ୍ତି ହୋଇଛନ୍ତି ଅଜୟ କୁମାର ରାଉତ।
ମୁଣ୍ଡରେ ଓ ହାତରେ ଆଘାତ ଲାଗିଥିବା ବେଳେ ପୂର୍ବ ଶତ୍ରୁତାକୁ କେନ୍ଦ୍ର କରି ହାଣିଥିବା ସୁଚନା ମିଳିଛି। ଏନେଇ ଅଭିଯୁକ୍ତ ଅଟୋ ଡ୍ରାଇଭରକୁ ଖୋଜୁଛି ପୋଲିସ। ପୁରୀରେ ଲୁଚିଥିବା ବେଳେ ପୋଲିସ ଧରିବା ପାଇଁ ଡେରା ପକାଇଛି।
ହାଇଦ୍ରାବାଦ: ଗୋଟିଏ ମଞ୍ଚରେ ତିନୋଟି ରାଜ୍ୟର ମୁଖ୍ୟମନ୍ତ୍ରୀ ଓ ୟୁପିର ପୂର୍ବତନ ମୁଖ୍ୟମନ୍ତ୍ରୀ । ଉଦ୍ଦେଶ୍ୟ ସ୍ପଷ୍ଟ, ଲକ୍ଷ୍ୟ ୨୦୨୪ । ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ, ପଞ୍ଜାବ ମୁଖ୍ୟମନ୍ତ୍ରୀ ଭଗବତ ମାନ, କେରଳ ମୁଖ୍ୟମନ୍ତ୍ରୀ ପି. ବିଜୟନ୍, ୟୁପିର ପୂର୍ବତନ ମୁଖ୍ୟମନ୍ତ୍ରୀ ଅଖିଳେଶ ଯାଦବ ଏବଂ ସିପିଆଇ ସାଧାରଣ ସମ୍ପାଦକ ଡି. ରାଜା । କେସିଆରଙ୍କ ନେତୃତ୍ବରେ ନୂଆ ସାମ୍ମୁଖ୍ୟର ନକ୍ସା ।
ତେଲେଙ୍ଗାନାରେ କେସିଆରଙ୍କ ଶକ୍ତି ପ୍ରଦର୍ଶନ, ନୂଆ ସାମୁଖ୍ୟ ନେଇ ଚର୍ଚ୍ଚା ଜୋର ଧରିଛି । ବିଶାଳ ଜନସଭା ସାଙ୍ଗକୁ ହଜାର ହଜାର ଜନତା, ଶହ ଶହ ନେତା ଏକାଠି ହେବେ । ଏକାଧିକ ମୁଖ୍ୟମନ୍ତ୍ରୀଙ୍କ ମେଳରେ, ଦକ୍ଷିଣରୁ ଦିଲ୍ଲୀର ଆସନ ଯାଏଁ ପହଞ୍ଚିବା ପାଇଁ ତେଲେଙ୍ଗାନା ମୁଖ୍ୟମନ୍ତ୍ରୀଙ୍କ ମେଗା ପ୍ଲାନ୍ । ଅଣ-ବିଜେପି ଓ ଅଣ କଂଗ୍ରେସ ନେତାଙ୍କୁ ଏକାଠି କରି ଏକ ନୂଆ ସାମୁଖ୍ୟର ଯୋଜନା କରୁଛନ୍ତି କେ. ଚନ୍ଦ୍ରଶେଖର ରାଓ ।
ସୁବର୍ଣ୍ଣପୁର: ଡକାୟତି ମାମଲାରେ ଦୁଇ କଲେଜ ଛାତ୍ର ଗିରଫ । ସୁବର୍ଣ୍ଣପୁର ଜିଲ୍ଲା ଉଲୁଣ୍ଡା ପୋଲିସ ହାତରେ ଧରା ପଡିଛନ୍ତି ଡକାୟତି ଦଳ । ଚଢେଇପଙ୍କ ଛକରେ ବାଲି ବୋଝେଇ ହାଇଓ୍ବାର ଚାଳକ ଓ ହେଲପରକୁ ବନ୍ଧୁକ ଦେଖାଇ ଟଙ୍କା ଓ ମୋବାଇଲ ଲୁଟ କରିଥିବା ଅଭିଯୋଗ ହୋଇଥିଲା । ଘଟଣାରେ ଦୁଇ ନାବାଳକ ସମେତ ୪ ଜଣ ଅଭିଯୁକ୍ତଙ୍କ ମଧ୍ୟରୁ ଦୁଇ ଜଣଙ୍କୁ କୋର୍ଟଚାଲାଣ କରାଯାଇଛି ।
ଅନ୍ୟ ଦୁଇ ଜଣ ନାବାଳକଙ୍କୁ ବାଳ ଅପରାଧ ନ୍ୟାୟିକ ବୋର୍ଡକୁ ପଠାଯାଇଥିବା ସାମ୍ବାଦିକ ସମ୍ମିଳନୀରେ ଏସଡିପିଓ ସୂଚନା ଦେଇଛନ୍ତି । ଗତକାଲି ଭୋରରେ ବାଲି ବୋଝେଇ ହାଇୱା ତେଲ ମିଲକୁ ଆସୁଥିଲା । ସେହି ସମୟରେ ଚାରି ଜଣ ଦୁର୍ବୃତ୍ତ ଏକ ଆପାଚୀ ବାଇକରେ ଆସି ଅଟକାଇଥିଲେ । ବନ୍ଧୁକ ଦେଖାଇ ଧମକଚମକ ଦେବାରୁ ଭୟଭୀତ ହୋଇ ଗାଡିର ଚାଳକ ଘଟଣାସ୍ଥଳରୁ ଫେରାର ହୋଇ ଯାଇଥିଲେ ।
ତେବେ ଗାଡିର ହେଲପର ଦୁଃଖଶ୍ୟାମ ଗାଇଗରିଆକୁ ସେମାନେ ମାଡ଼ ମାରିବା ସହ ଧମକ ଚମକ ଦେଇ ଗୋଟିଏ ମୋବାଇଲ ଓ ନଗଦ ୬ ହଜାର ୫୦୦ ଟଙ୍କା ଲୁଟି ନେଇ ଫେରାର ମାରିଥିଲେ । ପୁଲିସ ଦୁବୃର୍ତ୍ତ ମାନଙ୍କ ଠାରୁ ଗୋଟିଏ ଆପାଚି ବାଇକ୍ , ଗୋଟିଏ ଖେଲଣା ବନ୍ଧୁକ , ଦୁଇଟି ଲାଇଟର , ଦୁଇଟି ମନିପର୍ସ , ଛଅଟି ମୋବାଇଲ ଏବଂ ନଗଦ ଛଅ ହଜାର ପାଞ୍ଚଶହ ଟଙ୍କା ଜବତ କରିଥିବା ସୂଚନା ମିଳିଛି । ମୁଖ୍ୟ ଅଭିଯୁକ୍ତ ସୋନପୁର ଦେବାଶିଷ ଖପର ଧୁଆ ଏବଂ କେନ୍ଦୁପାଲିର ସୁମନ୍ତ ମେହେରଙ୍କୁ କୋର୍ଟଚାଲାଣ କରାଯାଇଛି ।
କଟକ: ଆସିଲା ମହିଳା କ୍ରିକେଟର ରାଜଶ୍ରୀ ସ୍ବାଇଁଙ୍କ ପୋଷ୍ଟମର୍ଟମ ରିପୋର୍ଟ । ଶ୍ବାସରୁଦ୍ଧ ହୋଇ ରାଜଶ୍ରୀଙ୍କ ମୃତ୍ୟୁ ହୋଇଥିବା ବ୍ୟବଚ୍ଛେଦ ରିପୋର୍ଟରେ ଉଲ୍ଲେଖ ଅଛି । ମୃତ୍ୟୁ ପରେ ମୁଣ୍ଡରେ କ୍ଷତ ଚିହ୍ନ ରହିଛି । ଗୁରୁଡିଝାଟିଆ ପୋଲସକୁ ପୋଷ୍ଟମଟମ୍ ରିପୋର୍ଟ ହସ୍ତାନ୍ତର କରାଯାଇଛି । ମୃତ୍ୟୁର କାରଣ ଜାଣିବାକୁ ଭିସେରା ରିପୋର୍ଟକୁ ଅପେକ୍ଷା । ମୃତ୍ୟୁ ପୂର୍ବରୁ ରାଜଶ୍ରୀ କପୁରସିଂହ ପେଟ୍ରୋଲ ପମ୍ପରେ ଶେଷଥର ପାଇଁ ପେଟ୍ରୋଲ ପକାଇଥିଲେ ।
ତାଙ୍କ ଗାଡ଼ି ଡ଼ିକିରୁ ପେଟ୍ରୋଲ ପକାଇଥିବା ବିଲ୍ ସହ ଏଟିଏମ୍ କାର୍ଡ ଜବତ ହୋଇଛି । । ପେଟ୍ରୋଲ ପମ୍ପ ଠାରୁ ମାତ୍ର ୧ କିଲୋମିଟର ଦୁରରେ ମିଳିଥିଲା ମୃତଦେହ । ପେଟ୍ରୋଲ ପକାଇବାର ସିସିଟିଭି ଦୃଶ୍ୟ ଯାଞ୍ଚ କରୁଛି ପୋଲସି । ଗତ ୧୩ ତାରିଖରେ ରାଜଶ୍ରୀଙ୍କ ଝୁଲନ୍ତା ମୃତଦେହ ଆଠଗଡ ସୁବାସିଂ ଜଙ୍ଗଲରୁ ମିଳିଥିଲା । ୨୦୧୪-୧୫ ଓଡିଶା ସିନିୟର ମହିଳା କ୍ରିକେଟ ଟିମରେ ଖେଳୁଥିଲେ ରାଜଶ୍ରୀ।
ତେବେ ପୁଡୁଚେରୀ ଦିନିକିଆ ପାଇଁ ଚୂଡାନ୍ତ ଦଳରେ ତାଙ୍କ ନାଁ ନରହିବାକୁ ନେଇ ଦୁଶ୍ଚିନ୍ତାରେ ଥିଲେ। ୧୧ତାରିଖରେ ଘରକୁ ଯିବାକୁ କହି ହୋଟେଲରୁ ବାହାରିଥିଲେ, ହେଲେ ଘରେ ପହଞ୍ଚିନଥିଲେ। ଏନେଇ କଟକ ମଙ୍ଗଳାବାଗ ଥାନାରେ ତାଙ୍କ କୋଚ୍ ଏତଲା ଦେଇଥିଲେ । ଏତଲା ପରେ ଖୋଜାକୋଜି ବେଳେ ସୁବାସିଂ ଜଙ୍ଗଲରୁ ତାଙ୍କ ସ୍କୁଟି ଓ ହେଲମେଟ୍ ମିଲିଥିଲା । ପରେ ଜଙ୍ଗଲ ଭିତରୁ ଝୁଲନ୍ତା ମୃତଦେହ ଉଦ୍ଧାର ହୋଇଥିଲା । ପୋଲିସ ଏହି ଘଟଣାରେ ତଦନ୍ତ ଜାରି ରଖିଛି ।
ୱେଲିଂଟନ: ନ୍ୟୁଜିଲାଣ୍ଡରେ ରାଜନୈତିକ ସଙ୍କଟ । ପ୍ରଧାନମନ୍ତ୍ରୀ ପଦ ଛାଡିବେ ଜେସିଣ୍ଡା ଅର୍ଡନ । ଆସନ୍ତା ମାସ ଆରମ୍ଭରୁ ସେ ଇସ୍ତଫା ଦେବେ ବୋଲି କହିଛନ୍ତି । ଏଥିସହ ଆଉ ଆଗକୁ ନିର୍ବାଚନ ଲଢିବେ ନାହିଁ । ରାଜନୀତିରୁ ସନ୍ୟାସ ନେବେ । ଆସନ୍ତା ଅକ୍ଟୋବର ୧୪ରେ ସାଧାରଣ ନିର୍ବାଚନ ହେବାକୁ ଥିବାବେଳେ ତା ପୂର୍ବରୁ ଇସ୍ତଫା ଦେବା ଚର୍ଚ୍ଚାର ବିଷୟ ପାଲଟିଛି ।
ନ୍ୟୁଜିଲାଣ୍ଡର ଲେବର ପାର୍ଟିକୁ ପ୍ରତିନିଧିତ୍ବ କରନ୍ତି ଜେସିଣ୍ଡା ଅର୍ଡନ । ଆଗାମୀ ନିର୍ବାଚନରେ ମଧ୍ୟ ଦଳର ବିଜୟ ହେବ ବୋଲି ଆଶା କରିଛନ୍ତି ।କିନ୍ତୁ ସେ ନିର୍ବାଚନ ଲଢିବେ ନାହିଁ । ପ୍ରଧାନମନ୍ତ୍ରୀ ପଦ ଛାଡିବା ପଛରେ ଅନ୍ୟ କୌଣସି କାରଣ ନାହିଁ । ପ୍ରଧାନମନ୍ତ୍ରୀ ହେବା ସହ ଦେଶ ପ୍ରତି ଥିବା ବଡ଼ ଦାୟିତ୍ବ ମଧ୍ୟ ତୁଲାଇଛି । ଦେଶ ସମ୍ଭାଳିବାରେ କୌଣସି ଅସୁବିଧା ହୋଇନାହିଁ । ଇସ୍ତଫା ପରେ କିଏ ପ୍ରଧାନମନ୍ତ୍ରୀ ହେବ ସମୟ କହିବ ବୋଲି ସେ କହିଛନ୍ତି ।
ଏପଟେ ଏହି ଘୋଷଣା ପରେ ବିରୋଧୀ ଦଳ ମଧ୍ୟରେ ତତ୍ପରତା ପ୍ରକାଶ ପାଇଛି । ଆଗାମୀ ନିର୍ବାଚନ ପାଇଁ ନୂଆ ରଣନୀତି ପ୍ରସ୍ତୁତ କରିବା ଆରମ୍ଭ କଲେଣି ବିରୋଧୀ ।
ନୂଆଦିଲ୍ଲୀ: ରେସଲିଂ ଫେଡେରେସନ ସଭାପତି ତଥା ବିଜେପି ସାଂସଦ ବ୍ରିଜ ଭୂଷଣ ଶରନ ସିଂଙ୍କ ବିରୋଧରେ ଯୌନ ନିର୍ଯାତନା ଅଭିଯୋଗ । ମାମଲାରେ ୭୨ ଘଣ୍ଟା ଭିତରେ ରିପୋର୍ଟ ଦେବାକୁ କହିଛନ୍ତି କେନ୍ଦ୍ର ସରକାରଙ୍କ କ୍ରୀଡା ମନ୍ତ୍ରାଳୟ । ଦିଲ୍ଲୀରେ ଖ୍ୟାତନାମା ରେସଲରଙ୍କ ନାରାବାଜି ପରେ ଘଟଣାକୁ ଗୁରୁତର ସହ ନେଇଛନ୍ତି କେନ୍ଦ୍ର ସରକାର । ମହିଳା ରେସଲରମାନଙ୍କୁ ସଭାପତି ବ୍ରିଜ ଭୂଣଷ ଯୌନ ନିର୍ଯାତନା ଦେଇଆସୁଥିବା ନେଇ ହୋଇଛି ଗୁରୁତର ଅଭିଯୋଗ ।
ସେପଟେ ଏହି ଅଭିଯୋଗକୁ ଖଣ୍ଡନ କରିବା ସହ ଏହା ଏକ ଷଡ଼ଯନ୍ତ୍ର ବୋଲି କରିଛନ୍ତି ବ୍ରିଜ ଭୂଷଣ । ଦିଲ୍ଲୀ ଜନ୍ତରମନ୍ତରଠାରେ ବ୍ରିଜ ଭୂଷଣଙ୍କ ବିରୋଧରେ ହୋଇଥିବା ବିକ୍ଷୋଭରେ ସାମିଲ ହୋଇଥିଲେ ବିନେଶ ଫୋଗାଟ, ବଜରଙ୍ଗ ପୁନିଆଙ୍କ ସମେତ ବହୁ ପ୍ରତିଷ୍ଠିତ ରେସଲର । ବ୍ରିଜ ଭୂଷଣ କହିଛନ୍ତି- ଧାରଣାରତ ରେସଲରଙ୍କ ମଧ୍ୟରୁ ଅନେକେ ଜାତୀୟ ସ୍ତରରେ ଭାଗ ନେଇନାହାନ୍ତି ।
ଯେତେବେଳେ ଫେଡେରସନ ଏକ ନିୟମ ଆଣିଥାଏ ସେତେବେଳେ ସମସ୍ୟା ଆସିଥାଏ । ଏହି ଆନ୍ଦୋଳନ ପଛରେ ଜଣେ ଶିଳ୍ପପତିଙ୍କ ହାତ ରହିଛି । ବିନେଶ ଫୋଗାଟ ହାରି ଯିବା ପରେ ସେ ତାଙ୍କୁ ସାନ୍ତ୍ବନା ଦେବା ସହ ପ୍ରେରଣା ଯୋଗାଇଥିଲେ । ଅଭିଯୋଗ ପ୍ରସଙ୍ଗରେ ଯେକୌଣସି ତଦନ୍ତର ସମ୍ମୁଖୀନ ହେବାକୁ ସେ ପ୍ରସ୍ତୁତ ଅଛନ୍ତି ବୋଲି କହିଛନ୍ତି ବ୍ରିଜ ଭୂଷଣ । ଏସିଆନ ଗେମସ ଓ କମନଓ୍ବେଲଥ ଗେମ୍ସ ସ୍ବର୍ଣ୍ଣପଦକ ବିଜୟୀ ଫୋଗାଟ ଅଭିଯୋଗ କରିଛନ୍ତି- ତାଙ୍କୁ ବ୍ରିଜ ଭୂଷଣ ମାନସିକ ଭାବେ ଆଘାତ ପହଞ୍ଚାଇଛନ୍ତି ।
ଅତୀତରେ ଯୌନ ନିର୍ଯାତନା ପ୍ରସଙ୍ଗରେ ସେ କିଛି ଅଭିଯୋଗ କରିଥିଲେ ସୁଦ୍ଧା ତାଙ୍କୁ ଦବାଇ ଦିଆଯାଇଥିଲା । ଏହାକୁ ନେଇ ସେ ଆତ୍ମହତ୍ୟା କରିବା ଲାଗି ଚିନ୍ତା କରିଥିଲେ । ଦିଲ୍ଲୀରେ ହୋଇଥିବା ବିକ୍ଷୋଭରେ ଅନ୍ୟମାନଙ୍କ ମଧ୍ୟରେ ଅଲିମ୍ପିକ ପଦକବିଜେତା ସାକ୍ଷୀ ମଲ୍ଲିକ ବି ସାମିଲ ହୋଇଥିଲେ । ବ୍ରିଜ ଭୂଷଣ ବର୍ତ୍ତମାନ ଉତ୍ତରପ୍ରଦେଶ କୈସରଗଞ୍ଜ ଆସନରୁ ବିଜେପି ସାଂସଦ ଅଛନ୍ତି ।
ଭୁବନେଶ୍ବର: ବିଦେଶରେ କରୋନା ସ୍ଥିତିକୁ ଦେଖି ଆଲର୍ଟରେ ଓଡ଼ିଶା । ସମ୍ଭାବ୍ୟ କରୋନା ମୁକାବିଲା ପାଇଁ ରାଜ୍ୟ ସରକାରଙ୍କ ଆଗୁଆ ପ୍ରସ୍ତୁତି । ଆଜିଠୁ ଓଡ଼ିଶାରେ ପୁଣି ଥରେ ହେବ ଟିକାକରଣ । ରାଜ୍ୟର ସମସ୍ତ ଜିଲ୍ଲା, ସହରାଞ୍ଚଳ, ଗୋଷ୍ଠୀ ଓ ପ୍ରାଥମିକ ଡାକ୍ତରଖାନାରେ ଭ୍ୟାକସିନ୍ ଦିଆଯିବ। ଯେଉଁମାନେ ଦ୍ବିତୀୟ ଓ ପ୍ରିକସନ୍ ଡୋଜ୍ ନେଇ ନାହାନ୍ତି ସେମାନେ ଏହି ଟିକା ନେଇପାରିବେ।
ସ୍ବାସ୍ଥ୍ୟକେନ୍ଦ୍ର ଗୁଡ଼ିକରେ କେବଳ କୋଭିସିଲ୍ଡ ଟିକା ଉପଲବ୍ଧ ହେବ। ଯେଉଁ ସବୁ ଲୋକେ କୋଭିସିଲ୍ଡ ନେଇଥିବେ ସେମାନେ ପୁଣି ଦ୍ବିତୀୟ ଓ ପ୍ରିକସନ୍ ଡୋଜ୍ ନେଇ ପାରିବେ। ଲୋକେ ଟିକାକରଣର ସୁଯୋଗ ଉଠାଇବା ସହ କରୋନାରୁ ସୁରକ୍ଷିତ ରହିବା ନିମନ୍ତେ ଅଭିଯାନରେ ସାମିଲ ହେବାକୁ ଆହ୍ୱାନ ଦେଇଛି ସ୍ୱାସ୍ଥ୍ୟ ବିଭାଗ। ମାର୍ଚ୍ଚ ଦ୍ବିତୀୟ କିମ୍ବା ତୃତୀୟ ସପ୍ତାହରେ କରୋନାର ଚତୁର୍ଥ ଲହର ଆସିବା ଆଶଙ୍କା କରାଯାଉଛି ।
ଏବେ ସୁଦ୍ଧା ପ୍ରାୟ ୪୦ ପ୍ରତିଶତ ଲୋକ ବୁଷ୍ଟର ଡୋଜ ନେଇନାହାନ୍ତି । ୧୦ ପ୍ରତିଶତ ଲୋକ ଦ୍ବିତୀୟ ଡୋଜ୍ ନେଇନାହାନ୍ତି ।
ଭୁବନେଶ୍ବର: ଓଡ଼ିଶାରେ ତାମିଲନାଡୁ କ୍ରୀଡ଼ା ମନ୍ତ୍ରୀ । ହକି ବିଶ୍ବକପ୍ ପାଇଁ ନବୀନଙ୍କ ନିମନ୍ତ୍ରଣ ରଖି ଓଡ଼ିଶାକୁ ଆସିଛନ୍ତି ତାମିଲନାଡୁ ମୁଖ୍ୟମନ୍ତ୍ରୀ ଏମ.କେ ଷ୍ଟାଲିନଙ୍କ ପୁଅ ତଥା ସେଠାକାର କ୍ରୀଡ଼ା ମନ୍ତ୍ରୀ ଉଦ୍ଧୟାନିଧି ଷ୍ଟାଲିନ୍ । ସେ ଭୁବନେଶ୍ବରରେ ପହଞ୍ଚିବା ପରେ ତାଙ୍କୁ ଭବ୍ୟ ସ୍ବାଗତ କରାଯାଇଛି । ବିଧାୟକ ତଥା ବିଜେଡି ସାଂଗଠନିକ ସମ୍ପାଦକ ପ୍ରଣବ ପ୍ରକାଶ ଦାସ ତାଙ୍କୁ ସ୍ବାଗତ କରିଛନ୍ତି ।
ମେୟର ସୁଲୋଚନା ଦାସ, ରାଜ୍ୟ ନିର୍ମାଣ ଶ୍ରମିକ ବୋର୍ଡ ଅଧ୍ୟକ୍ଷା ଶ୍ରୀମୟୀ ମିଶ୍ର, ବିଧାୟକ ପ୍ରଣବ ବଳବନ୍ତରାୟ, ଭୁବନେଶ୍ବର ମଧ୍ୟ ବିଧାୟକ ଅନନ୍ତ ନାରାୟଣ ଜେନା, ଉତ୍ତର ବିଧାୟକ ସୁଶାନ୍ତ ରାଉତ ଓ ମନ୍ତ୍ରୀ ଅତନୁ ସବ୍ୟସାଚୀ ନାୟକ ପ୍ରମୁଖ ଉପସ୍ଥିତ ଥିଲେ । ଉଦ୍ଧୟାନିଧି ଷ୍ଟାଲିନ ସ୍ବତନ୍ତ୍ର ଭାବେ ଟିମ୍ ଇଣ୍ଡିଆର ମ୍ୟାଚ୍ ଦେଖିବାକୁ ଆସିଛନ୍ତି । ରାତି ୭ଟାରେ କଳିଙ୍ଗରେ ହେବ ମ୍ୟାଚ୍ । ଷ୍ଟାଡିୟମରେ ବସି ଭାରତ ଓ ୱେଲ୍ସର ମ୍ୟାଚ୍ ଦେଖିବେ ଏବଂ ହକି କ୍ରେଜ୍କୁ ପାଖରୁ ଉପଭୋଗ କରିବେ ।
ଭୁବନେଶ୍ବର: ଆଜି କମ୍ପିବ କଳିଙ୍ଗ । ହକି ବିଶ୍ବକପ୍ର ସପ୍ତମ ଦିନରେ କଳିଙ୍ଗ ଷ୍ଟାଡିୟରେ ରହିଛି ୪ଟି ମହାମୁକାବିଲା । ଦିନ ଗୋଟାଏରେ ପ୍ରଥମେ ମୁହାଁମୁହିଁ ହେବେ ମାଲେସିଆ ଓ ନ୍ୟୁଜିଲାଣ୍ଡ । ସେହିପରି ଦିନ ୩ଟାରେ ନେଦରଲ୍ୟାଣ୍ଡ ଓ ଚିଲି ମଧ୍ୟରେ ହେବ ଟକ୍କର । ସନ୍ଧ୍ୟା ୫ଟାରେ ମୁହାଁମୁହିଁ ହେବେ ସ୍ପେନ୍ ଓ ଇଂଲଣ୍ଡ । ସନ୍ଧ୍ୟା ୭ଟାରେ ରହିଛି ହାଇଭୋଲଟେଜ୍ ମ୍ୟାଚ୍ ।
ଭାରତ ଓ ଓ୍ବେଲ୍ସ ମଧ୍ୟରେ ହେବ ଟକ୍କର । ହକି ବିଶ୍ୱକପର ଶେଷ ପୁଲ ମ୍ୟାଚରେ ଭାରତ ଓ୍ୱେଲ୍ସକୁ ଭେଟିବ । ଏହାକୁ ବଡ଼ ବ୍ୟବଧାନରେ ଜିତି ସିଧାସଳଖ କ୍ବାର୍ଟର ଫାଇନାଲରେ ପ୍ରବେଶ କରିବାକୁ ଲକ୍ଷ୍ୟ ରଖିଛି ଟିମ୍ ଇଣ୍ଡିଆ । ଭାରତର ସବୁ ପ୍ଲେୟାର ଫିଟ୍ ଅଛନ୍ତି । ମ୍ୟାଚ ପାଇଁ ସ୍ବତନ୍ତ୍ର ରଣନୀତି ପ୍ରସ୍ତୁତ କରିଛି ଦଳ । ଦଳ ପେନାଲ୍ଟିକୁ ସଠିକ ପରିଚାଳନା କରିବାକୁ ଧ୍ୟାନ ଦେବ ।
ଭାରତ ପୁଲ ପର୍ଯ୍ୟାୟରେ ସ୍ପେନ ବିପକ୍ଷରେ ୨-୦ରେ ବିଜୟୀ ହୋଇଥିବା ବେଳେ ଦ୍ବିତୀୟ ମ୍ୟାଚରେ ଇଂଲଣ୍ଡ ବିପକ୍ଷରେ ଡ୍ର ରଖିଥିଲା । ତେବେ ଭାରତ କ୍ୱାର୍ଟର ଫାଇନାଲରେ ସିଧା ପ୍ରବେଶ କରିବ କି କ୍ରସ ଓଭର ଖେଳିବ ଏହା ସ୍ପେନ୍ ଓ ଇଂଲଣ୍ଡ ମ୍ୟାଚର ଫଳାଫଳ ଉପରେ ମଧ୍ୟ ନିର୍ଭର କରେ ।
ସାଲେପୁର: ଏକାଦଶାହ ଭୋଜି ଖାଇ ସାଲେପୁର ପାଗା ଲକ୍ଷ୍ମୀ ନାରାୟଣପୁର ଗାଁରେ ୧୦୦ରୁ ଉର୍ଦ୍ଧ୍ବ ଲୋକ ଝାଡ଼ବାନ୍ତିରେ ଆକ୍ରାନ୍ତ। ଆକ୍ରାନ୍ତଙ୍କୁ ବିଭିନ୍ନ ଚିକିତ୍ସା କେନ୍ଦ୍ରରେ ଭର୍ତ୍ତି କରାଯାଇଛି । ଗତକାଲି ଗ୍ରାମରେ ଏକ ଶୁଦ୍ଧିକ୍ରିୟା ଭୋଜି ହୋଇଥିଲା । ଗ୍ରାମବାସୀ ଭୋଜି ଖାଇବା ପରେ ଅନେକଙ୍କୁ ଝାଡ଼ାବାନ୍ତି ହୋଇଥିଲା ।
ଫଳରେ ଆକ୍ରାନ୍ତଙ୍କୁ ସାଲେପୁର ଜଗତପୁର ଏବଂ କଟକ ମେଡ଼ିକାଲରେ ଭର୍ତ୍ତି କରାଯାଇଛି । ଆକ୍ରାନ୍ତଙ୍କ ଅବସ୍ଥା ଏବେ ସ୍ଥିର ଥିବା ସୂଚନା ଦେଇଛନ୍ତି ଡାକ୍ତର
