ପୁରୀ: ଆଜି ବୈଶାଖ-କୃଷ୍ଣ ଦ୍ଵାଦଶୀ ତିଥି। ଏହି ଅବସରରେ ଶ୍ରୀମନ୍ଦିରରେ ଶ୍ରୀବିଗ୍ରହମାନଙ୍କ ପଇତା ଲାଗି ନୀତି ଅନୁଷ୍ଠିତ ହେବ। ଏହି ନୀତି ଅତ୍ୟନ୍ତ ଗୁପ୍ତ ନୀତି ହୋଇଥିବାରୁ ଦ୍ବିତୀୟ ଭୋଗମଣ୍ଡପ ବଢିବା ପରେ ସନ୍ଧ୍ୟା ୬ ଟାରୁ ରାତ୍ର ୧୦ଟା ପର୍ଯ୍ୟନ୍ତ ପ୍ରାୟ ୪ଘଣ୍ଟା ସର୍ବସାଧାରଣ ଦର୍ଶନ ବନ୍ଦ ରହିବ। ଏନେଇ ଶ୍ରୀମନ୍ଦିର ସୂଚନା ଓ ଲୋକସମ୍ପର୍କ ବିଭାଗ ପକ୍ଷରୁ ସୂଚନା ଦିଆଯାଇଛି।
ବିଜୁ ବାବୁଙ୍କ ୨୬ତମ ଶ୍ରାଦ୍ଧ ଦିବସ; ବିନ୍ଦୁସାଗରରେ ତିଳ ତର୍ପଣ କାର୍ଯ୍ୟକ୍ରମ ଅନୁଷ୍ଠିତ
ଭୁବନେଶ୍ୱର: ସେବା, ତ୍ୟାଗ, ଓଡ଼ିଆ ସ୍ବାଭିମାନର ପ୍ରତୀକ ବିଜୁ ପଟ୍ଟନାୟକ । ଶିକ୍ଷା, ଶିଳ୍ପ, ସ୍ବାସ୍ଥ୍ୟ ସେବାର ମୂର୍ତ୍ତିମନ୍ତ ପ୍ରତୀକ ପ୍ରବାଦ ପୁରୁଷ ବିଜୁ ବାବୁଙ୍କ ଇହଲୀଳା ତ୍ୟାଗକୁ ପୂରିଛି ୨୬ ବର୍ଷ। ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶକ୍ରମେ ତିରୋଧାନ ଦିବସକୁ ରାଜ୍ୟର ସମସ୍ତ ନିର୍ବାଚନମଣ୍ଡଳୀରେ ନିରାଡମ୍ବର ଭାବେ ପାଳୁଛି ବିଜୁ ଜନତା ଦଳ ।
ଏହି ଅବସରରେ ସକାଳ ୬ ଘଟିକାରେ ବିନ୍ଦୁସାଗର ଉତ୍ତରେଶ୍ୱର ଘାଟରେ ରାମଧୂନ ସହ ତିଳ ତର୍ପଣ କାର୍ଯ୍ୟକ୍ରମ କରାଯାଇଛି । ଏକାମ୍ର ବିଧାୟକ ତଥା ମନ୍ତ୍ରୀ ଅଶୋକ ଚନ୍ଦ୍ର ପଣ୍ଡା, ଉତ୍ତର ବିଧାୟକ ସୁଶାନ୍ତ ରାଉତ, ମଧ୍ୟ ବିଧାୟକ ଅନନ୍ତ ନାରାୟଣ ଜେନା, ଓଡ଼ିଶା ମୋ ପରିବାରର ଆବାହକ ଅରୂପ ପଟ୍ଟନାୟକ ଓ ଦଳୀୟ ନେତୃବୃନ୍ଦ ସାମିଳ ହୋଇଥିଲେ । ରାଜ୍ୟର ଅନ୍ୟସ୍ଥାନରେ ଆଜି ତିଳତର୍ପଣ, ପ୍ରଭାତଫେରି ଓ ସମୂହ ସଫେଇ ଅଭିଯାନ ସହ ବିଜୁ ପଟ୍ଟନାୟକଙ୍କ ଫଟୋଚିତ୍ରରେ ମାଲ୍ୟାର୍ପଣ, ସ୍ମୃତିସଭା, ରକ୍ତଦାନ ଶିବିର, ସମ୍ବର୍ଦ୍ଧନା କାର୍ଯ୍ୟକ୍ରମ ରହିଛି ।
ସେହିପରି ଅପରା୍ହଣରେ ସମୂହ ଦୀପ ଦାନ କରାଯିବ। କ୍ୟାପିଟାଲ ହସ୍ପିଟାଲ ରେଡ଼କ୍ରସ ରକ୍ତ ଭଣ୍ଡାରରେ ଆୟୋଜନ ହେବ ରକ୍ତଦାନ ଶିବିର। ରକ୍ତ ଅଭାବ ଦୂର ଲାଗି ଓଡିଶା ମୋ ପରିବାର, ଜୀବନ ବିନ୍ଦୁ ଓ ଜୟ ଓଡ଼ିଶା ପକ୍ଷରୁ ଆୟୋଜନ ହେବ ମହତ କାର୍ଯ୍ୟକ୍ରମ। ବିଜୁ ପଟ୍ଟନାୟକଙ୍କ ନୀତି ଓ ଆଦର୍ଶରେ ନିଜକୁ ଗଢି ତୋଳିବାକୁ ଦଳୀୟ ନେତା ଓ କର୍ମୀ ଶପଥ ନେବେ ।
ଆଜିଠୁ ପୁଣି ସକାଳୁଆ ସ୍କୁଲ, ସାଢ଼େ ୬ରୁ ୧୧ଟା ଯାଏଁ ପାଠପଢା
ଭୁବନେଶ୍ୱର: ପୁଣି ଆରମ୍ଭ ହୋଇଛି ସକାଳୁଆ ସ୍କୁଲ। ସକାଳ ୭ଟାରୁ ସାଢ଼େ ୧୧ଟା ବଦଳରେ ସାଢ଼େ ୬ରୁ ୧୧ଟା ଯାଏଁ ଶ୍ରେଣୀରେ ବସି ପାଠ ପଢୁଛନ୍ତି ଛାତ୍ରଛାତ୍ରୀ । ଗ୍ରୀଷ୍ମ ପ୍ରବାହର ସ୍ଥିତି ଦେଖି ଜିଲ୍ଲାପାଳ ମାନେ ଚାହିଁଲେ କ୍ଲାସ ଟାଇମିଂ ପରିବର୍ତ୍ତନ କରିପାରିବେ। ଏନେଇ ସ୍କୁଲ ଓ ଗଣଶିକ୍ଷା ବିଭାଗ ନିଷ୍ପତ୍ତି ନେଇଛି।
ସେହିଭଳି ଆଜିଠୁ ରାଜ୍ୟର ସମସ୍ତ ଅଙ୍ଗନବାଡ଼ି କେନ୍ଦ୍ରରେ ସକାଳ ୭ଟାରୁ ଦିନ ୧୦ଟା ପର୍ଯ୍ୟନ୍ତ ପାଠପଢ଼ା ଚାଲିଛି। ସ୍କୁଲରେ ପାନୀୟଜଳ ଓ ଅନ୍ୟାନ୍ୟ ସୁବିଧା ପାଇଁ ନିର୍ଦ୍ଦେଶ ଦିଆଯାଇଛି। ପ୍ରବଳ ଗ୍ରୀଷ୍ମ ପ୍ରବାହ ପାଇଁ ଏପ୍ରିଲ ୧୨ରୁ ୧୬ତାରିଖ ପର୍ଯ୍ୟନ୍ତ ସ୍କୁଲ ବନ୍ଦ ଥିଲା।
କେଜରିୱାଲଙ୍କୁ ସାଢ଼େ ୯ ଘଣ୍ଟାରେ ୫୬ଟି ପ୍ରଶ୍ନ ପଚାରିଲା ସିବିଆଇ
ନୂଆଦିଲ୍ଲୀ: ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜରିଓ୍ବାଲଙ୍କୁ ସାଢେ ୯ ଘଣ୍ଟା ଧରି ଜେରା । ୫୬ଟି ପ୍ରଶ୍ନର ଉତ୍ତର ଦେଇଛନ୍ତି କେଜରିଓ୍ବାଲ । ସିବିଆଇ ଯାହା ବି ପଚାରିଥିଲା ତାର ଠିକ୍ ଠିକ୍ ଉତ୍ତର ଦେଇଛନ୍ତି କେଜରିଓ୍ବାଲ । ଦିଲ୍ଲୀ ଓ ପଞ୍ଜାବରେ ବିକାଶ ମୂଳକ କାମକୁ ଦେଖି ସହି ପାରୁନାହାନ୍ତି କେନ୍ଦ୍ର ସରକାର । ଆପ୍କୁ ବଦନାମ କରିବାକୁ ବଡ଼ ଷଡ଼ଯନ୍ତ୍ର କରଯାଉଛି । ଆପ୍କୁ ଶେଷ କରିବାକୁ ଚେଷ୍ଟା କରାଯାଉଛି । କିନ୍ତୁ ଦେଶ ବାସୀ ଆମ ସହ ଅଛନ୍ତି ବୋଲି କହିଛନ୍ତି ଅରବିନ୍ଦ କେଜରିଓ୍ବାଲ ।
ପଚରାଉଚରା ଶେଷ ହେବା ପରେ ଗଣମାଧ୍ୟମକୁ ଆସି ଏଭଳି କହିଛନ୍ତି କେଜରିଓ୍ବାଲ । ଦିଲ୍ଲୀ ମଦନୀତି ମାମଲାରେ କେନ୍ଦ୍ରୀୟ ସଂସ୍ଥା କେଜରିଓ୍ବାଲଙ୍କୁ ପଚରାଉଚରା କରିଛି । ଜେରାକୁ ନେଇ ଦିଲ୍ଲୀରେ ହାଇଡ୍ରାମା ହୋଇଥିଲା । କେନ୍ଦ୍ର ସରକାରଙ୍କ ବିରୋଧରେ ଶହ ଶହ ଆପ କର୍ମୀ ବିକ୍ଷୋଭ କରିଥିଲେ । ସିଏମଙ୍କୁ ସାଥ୍ ଦେଇଥିଲେ ପଞ୍ଜାବ ମୁଖ୍ୟମନ୍ତ୍ରୀ ଭଗଓ୍ବନ୍ତ ମାନଙ୍କ ସମେତ ଆପର ବହୁ ମନ୍ତ୍ରୀ ଓ ନେତା । ହାଜର ହେବା ପୂର୍ବରୁ ବିଜେପି ଓ କେନ୍ଦ୍ରୀୟ ଏଜେନ୍ସି ଉପରେ ବର୍ଷିଥିଲେ କେଜ୍ରିଓ୍ବାଲ ।
ମାଫିଆ ଭାଇ ଅତିକ୍ ଓ ଅସରଫକୁ ଦିଆଗଲା କବର
ପ୍ରୟାଗରାଜ: ମାଟିରେ ମିଶିଲେ ଡନ୍ ଭାଇ । ମାଫିଆ ଭାଇ ଅତିକ୍ ଅହମଦ ଓ ଅସରଫକୁ ଆଜି ସନ୍ଧ୍ୟାରେ କବର ଦିଆଯାଇଛି । ଅତିକ୍ ସହ ତାର ୪୪ ବର୍ଷର ଅପରାଧିକ ସାମ୍ରାଜ୍ୟକୁ ମଧ୍ୟ କବର ଦିଆଯାଇଛି । ଅତିକ୍ ଅହମଦ ଏବଂ ତାର ଭାଇ ଅସରଫର ଶୁଟଆଉଟରେ ହତ୍ୟା ପରେ ରବିବାର ସନ୍ଧ୍ୟାରେ ଉଭୟଙ୍କୁ ପ୍ରୟାଗରାଜର କସାରୀ-ମସାରୀ କବରସ୍ତାନରେ ସୁପୁର୍ଦ-ଏ-ଖାକ କରିଦିଆଯାଇଛି । ଏହି ଦୁଇଜଣଙ୍କ ଅନ୍ତିମ ସଂସ୍କାରରେ ଅନେକ ସମ୍ପର୍କୀୟ ଏବଂ ପରିବାର ଲୋକେ ସାମିଲ ହୋଇଥିଲେ । ହେଲେ ଅତିକର ପତ୍ନୀ ସାଇସ୍ତା ଏହି ଅନ୍ତିମ ସଂସ୍କାରରେ ସାମିଲ ହୋଇନଥିଲେ ।
ସେ ଏବେବି ଫେରାର ଅଛନ୍ତି । ଅତିକର ଦୁଇ ନାବାଳକ ପୁଅ ଅହଜମ ଏବଂ ଏବାନ ତାଙ୍କୁ କବର ଦେଇଥିଲେ । ପୋଲିସର କଡ଼ା ସୁରକ୍ଷା ବଳୟରେ ଶବକୁ ସ୍ୱରୁପରାଣୀ ହସ୍ପିଟାଲରୁ କବରସ୍ତାନ ପର୍ଯ୍ୟନ୍ତ ନିଆଯାଇଥିଲା । ଉମେଶ ପାଲ ହତ୍ୟାକାଣ୍ଡର ଏହି ଦୁଇ ଅଭିଯୁକ୍ତଙ୍କ ହତ୍ୟା ପରେ ଉତ୍ତରପ୍ରଦେଶର ସମସ୍ତ ଜିଲ୍ଲାରେ ୧୪୪ ଧାରା ଲାଗୁ କରାଯାଇଛି । ମୁଖ୍ୟମନ୍ତ୍ରୀ ନିଜର ସମସ୍ତ କାର୍ଯ୍ୟକ୍ରମକୁ ରଦ୍ଦ କରିଦେଇଛନ୍ତି । ତାଙ୍କର ସମସ୍ତ ଧ୍ୟାନ ରାଜ୍ୟର ଆଇନ ବ୍ୟବସ୍ଥା ଉପରେ ରହିଛି ।
ଅନ୍ୟପକ୍ଷରେ ଗୁଳିମାଡ଼ କରିବା ପରେ ଆତ୍ମସମର୍ପଣ କରିଥିବା ୩ ଯୁବକ ସନ୍ନି, ଲଭଲେଶ ଓ ବରୁଣକୁ ପୁଲିସ୍ ଜେରା କରିବା ପରେ ଆଜି କୋର୍ଟରେ ହାଜର କରିଥିଲା । ଏହାପରେ କୋର୍ଟ ସମସ୍ତ ୩ ଅଭିଯୁକ୍ତଙ୍କୁ ୧୪ ଦିନ ପାଇଁ ବିଚାର ବିଭାଗୀୟ ହାଜତକୁ ପଠାଇ ଦେଇଛନ୍ତି । ସୂଚନାଥାଉକି ଗତକାଲି ରାତିରେ ଗଣମାଧ୍ୟମ କ୍ୟାମେରା ସମ୍ମୁଖରେ ପୋଲିସର କଡ଼ା ସୁରକ୍ଷା ଭିତରେ ଅତିକ ଏବଂ ତା ଭାଇ ଅସରଫକୁ ଗୁଳି କରି ହତ୍ୟା କରିଥିଲେ ତିନି ଦୁର୍ବୁର୍ତ୍ତ ।
ତିନି ଦୁର୍ବୃର୍ତ୍ତ ମିଡିଆକର୍ମୀ ଭାବେ ଆସି ଅତିକକୁ ନିକଟରୁ ଗୁଳିମାରିଥିଲେ । ଏହାପରେ ଅସରଫକୁ ଗୁଳିମାରିଥିଲେ । ମୋଟ୍ ୧୮ ରାଉଣ୍ଡ ଗୁଳି ଏମାନେ ଚଳାଇଥିଲେ । ଏହାପରେ ସେମାନେ ପୋଲିସ ଆଗରେ ସରେଣ୍ଡର କରିଥିଲେ । ଏହାକୁ ନେଇ ନେଇ ବର୍ତ୍ତମାନ ସାରା ଦେଶରେ ରାଜନୈତିକ ପାରା ହାଇ ରହିଛି । ୟୁପରେ ଜଙ୍ଗଲରାଜ ଚାଲିଥିବା କଥା କହିଛନ୍ତି ବିରୋଧୀ । ପୋଲିସ କଷ୍ଟଡିରେ ଥାଇ ମଧ୍ୟ ଦୁଇ ଜଣଙ୍କୁ ହତ୍ୟା କରାଯିବା ୟୁପି ପୋଲିସର ବିଫଳତାକୁ ଦର୍ଶାଉଛି ବୋଲି କହିଛନ୍ତି ବିରୋଧୀ ନେତା ।
ସମ୍ବଲପୁରରେ ଅତ୍ୟାବଶ୍ୟକ ସାମଗ୍ରୀ କିଣିବାକୁ କର୍ଫ୍ୟୁ କୋହଳ
ସମ୍ବଲପୁର: ସମ୍ବଲପୁରରେ ଅତ୍ୟାବଶ୍ୟକ ସାମଗ୍ରୀ କିଣିବାକୁ କର୍ଫ୍ୟୁ କୋହଳ । ସକାଳ ୭ଟା ୩୦ରୁ ୧୧ଟା ୩୦ ପର୍ଯ୍ୟନ୍ତ ଖୋଲା ରହିବ ଦୋକାନବଜାର । ଅପରାହ୍ନ ୩ଟା ୩୦ରୁ ସନ୍ଧ୍ୟା ୬ଟା ପର୍ଯ୍ୟନ୍ତ ଖୋଲିବ ଦୋକାନ । ଆସନ୍ତାକାଲିଠାରୁ ବର୍ଦ୍ଧିତ କୋହଳ ସମୟ ଲାଗୁହେବ ବୋଲି କହିଛନ୍ତି ଜିଲ୍ଲାପାଳ ଅନନ୍ୟା ଦାସ । ସେପଟେ SRC ସତ୍ୟବ୍ରତ ସାହୁଙ୍କ ସମ୍ବଲପୁରରେ ପହଞ୍ଚି ସ୍ଥିତି ସମୀକ୍ଷା କରିଛନ୍ତି ।
ପରିସ୍ଥିତି ନିୟନ୍ତ୍ରଣରେ ରହିଛି । ୪୮ଘଣ୍ଟା ମଧ୍ୟରେ କୌଣସି ଗଣ୍ଡଗୋଳ ହୋଇନାହିଁ । ଖୁବଶୀଘ୍ର ସ୍ଥିତି ଫେରିଆସିବା ସମ୍ଭାବନା ରହିଛି । ଭାଇଚାରା ବଜାୟ ରଖିବାକୁ ସମସ୍ତଙ୍କୁ ନିବେଦନ କରିଛନ୍ତି SRC । ସେପଟେ ଏସପି ଅଫିସରେ ପୁଣି ସମୀକ୍ଷା କରିଛନ୍ତି ପୋଲିସ ଡିଜି । ଦିନେ ୨ ଦିନ ମଧ୍ୟରେ ସ୍ବାଭାବିକ ହେବ ସ୍ଥିତି । ବିଶୃଙ୍ଖଳା କଲେ ଦୃଢ଼ କାର୍ଯ୍ୟାନୁଷ୍ଠାନ ନିଆଯିବ । ଘଟଣାକୁ ପ୍ରତ୍ୟେକ୍ଷ ଭାବେ ନଜର ରଖାଯାଇଛି ବୋଲି କହିଛନ୍ତି ପୋଲିସ ଡିଜି ।
ସତ ହେଲା ଅସରଫର ଭବିଷ୍ୟବାଣୀ, ହତ୍ୟା ନେଇ କହିଥିଲା ଏମିତି କଥା…..
ଲକ୍ଷ୍ନୌ: ମାଫିଆ ଅତିକ୍ ଅହମଦ ଏବଂ ତାର ଭାଇ ଅସରଫକୁ ଶନିବାର ଗୁଳି କରି ହତ୍ୟା କରାଯାଇଛି । ପୋଲିସର କଡ଼ା ସୁରକ୍ଷା ବଳୟକୁ ଭେଦ କରି ତିନି ଯୁବକ ଦୁଇ ଭାଇଙ୍କୁ ଗୁଳି କରି ହତ୍ୟା କରିଛନ୍ତି । ତିନି ଅଭିଯୁକ୍ତଙ୍କୁ ପୋଲିସ ଗିରଫ କରିନେଇଛି । ଏହି ଗୁଳିକାଣ୍ଡ ପୂର୍ବରୁ ଅସରଫ ବରେଲିରେ ଗଣମାଧ୍ୟମ ସହ ସକ୍ଷାତକାରରେ କହିଥିଲା ଯେ ତାକୁ ଦୁଇ ସପ୍ତାହ ପରେ ହତ୍ୟା କରାଯିବ । ଆଶ୍ଚମ୍ବିତ କଲା ଭଳି ଘଟଣା ଏହା ଯେ ଏହି ବୟାନର ଠିକ୍ ଦୁଇ ସପ୍ତାହ ୫ ଦିନ ପରେ ଏହି ହତ୍ୟାକାଣ୍ଡ ଘଟିଛି । ସୂଚନାଯୋଗ୍ୟ, ଉମେଶ ପାଲ ହତ୍ୟାକାଣ୍ଡରେ କୋର୍ଟରେ ହାଜର ହେବା ପରେ ୨୮ ମାର୍ଚ୍ଚ ରାତିରେ ଅସରଫ ବରେଲି ଜେଲ ପହଞ୍ଚିଥିଲା ।
ଏଠାରେ ମିଡିଆକୁ ଦେଇଥିବା ପ୍ରତିକ୍ରିୟାରେ ଅସରଫ ନିଜର ହତ୍ୟା ନେଇ ଆଶଙ୍କା ପ୍ରକଟ କରିଥିଲା । କହିଥିଲା ଯେ ୨ ସପ୍ତାହ ପରେ ତାକୁ ଜେଲରୁ ବାହାର କରି ହତ୍ୟା କରିଦିଆଯିବ । ଅସରଫ କହିଥିଲା ଯେ, ଜଣେ ବଡ଼ ଅଧିକାରୀ କହିଛନ୍ତି ଯେ କୌଣସି ବାହାନାରେ ଗୋଟିଏ ଦୁଇ ସପ୍ତାହ ପରେ ତୋତେ ଜେଲରୁ ବାହାରକୁ ନେବୁ ଏବଂ ହତ୍ୟା କରିଦେବୁ । ମୁଁ ତାଙ୍କ ନାଁ ନେବି ନାହିଁ । ମୋ ପରିବାରକୁ ଫସାଇବାକୁ ଷଡ଼ଯନ୍ତ୍ର କରାଯାଉଛି ।
ଏଥିସହିତ ହିଁ ଉତ୍ତରପ୍ରଦେଶ ସରକାରଙ୍କୁ ମଧ୍ୟ ବଦନାମ କରିବା ପାଇଁ ଷଡ଼ଯନ୍ତ୍ର କରାଯାଉଛି । ମୁଖ୍ୟମନ୍ତ୍ରୀଙ୍କ ଉପରେ ମିଛ ମାମଲା ଲାଗିଛି, ଏଥିପାଇଁ ସେ ଭଲ ଭାବରେ ମୋ ପୀଡା ବୁଝୁଥିବେ । ଅସରଫ କହିଥିଲା, ମୋ ହତ୍ୟା ପରେ ପ୍ରୟାଗରାଜର ମୁଖ୍ୟ ବିଚାରପତି, ମୁଖ୍ୟମନ୍ତ୍ରୀଙ୍କୁ ମୋର ବନ୍ଦ ଲଫାପା ପହଞ୍ଚିଯିବ । ଏହାପରେ କହିଥିଲା ଯେ, ମୁଁ ମାଫିଆ ଦେଖୁଛି? ୩ ବର୍ଷ ହେବ ଜେଲରେ ରହିଛି । ଗୋଟିଏ ଥର ବିଧାୟକ ରହି ସାରିଛି । ଜେଲରେ ରହି କିପରି ଷଡଯନ୍ତ୍ର କରିପାରିବି ।
ପ୍ରକାଶଥାଉକି, ଅତିକ୍ ଏବଂ ଅସରଫର ମେଡିକାଲ ପରୀକ୍ଷା ପାଇଁ ଗତାକାଲି ରାତିରେ ପୋଲିସ ଦୁଇ ଭାଇଙ୍କୁ ନେଇ ପ୍ରୟାଗରାଜ ମେଡିକାଲ ପହଞ୍ଚିଥିଲା । ଗଣମାଧ୍ୟମକୁ ଅତିକ୍ ପ୍ରତିକ୍ରିୟା ଦେଉଥିବା ବେଳେ ଏହି ସମୟରେ ପୋଲିସ ସୁରକ୍ଷା ଘେରରେ ପଶି ଆକ୍ରମଣକାରୀମାନେ ଗୁଳିମାଡ଼ କରିଥିଲେ । ଅତିକ୍ ଏବଂ ଅସରଫ ଘଟଣା ସ୍ଥଳରେ ମୃତ୍ୟୁ ବରଣ କରିଥିଲେ । ସେହିପିର ଜଣେ ପୋଲିସ କର୍ମଚାରୀ ଏବଂ ଗଣମାଧ୍ୟମ କର୍ମୀ ଏହି ଗୁଳିମାଡ଼ରେ ଆହତ ହୋଇଥିଲେ ।
ଘର ସାମ୍ନାରେ ଜାଗା ଖୋଳିବାକୁ ବିରୋଧ କରିବାରୁ ସାମାଜିକ ବାସନ୍ଦ ହେଲେ ପୁରା ପରିବାର
ଆଠଗଡ଼: ଘର ଆଗରେ ଥିବା ଜାଗା ଖୋଳିବାକୁ ବିରୋଧ କରିବାରୁ ଗାଁରୁ ନିଆଁ ପାଣି ବନ୍ଦ ସହ ସାମାଜିକ ବାସନ୍ଦ ହେଲେ ପରିବାର । ବାସନ୍ଦ ଖବରକୁ ଗାଁ ଦାଣ୍ଡରେ ଡେଙ୍ଗୁରା ବାଡେଇ କରାଗଲା ପ୍ରଚାର । ଏଭଳି ଏକ ଖବର ଆସିଛି ଆଠଗଡ଼ରୁ । ଘର ସାମ୍ନାରେ ଥିବା ସରକାରୀ ଜାଗାରେ ଯାଆସ କରିବାରୁ ଗାଁ ଲୋକ ସୁଦାମ ସାହୁଙ୍କ ପରିବାରକୁ ସାମାଜିକ ବାସନ୍ଦ କରିଥିବା ଆଠଗଡ଼ ଥାନାରେ ଅଭିଯୋଗ ହେଇଛି । ଆଠଗଡ଼ ଥାନା ଧାଇପୁର ଗାଁରେ ଘଟିଛି ଘଟଣା । ପରିବାର ପକ୍ଷରୁ ଥାନାର ଦ୍ବାରସ୍ଥ ହୋଇଥିଲେ ମଧ୍ୟ ନ୍ୟାୟ ମିଳୁନଥିବା ଅଭିଯୋଗ ଆଣିଛନ୍ତି ସୁଦାମଙ୍କ ପରିବାର । ଏ ନେଇ ଗାଁର ସଭାପତିଙ୍କୁ ଯୋଗାଯୋଗ କରିଥିଲେ ମଧ୍ୟ କୌଣସି ପ୍ରତିକ୍ରିୟା ମିଳି ପାରି ନାହିଁ ।
ମେଡ଼ିକାଲ କଲେଜରେ ସିଟ ଦେବାକୁ କହି ଅନଲାଇନରେ ଠକିନେଲେ ୩ କୋଟି
ବାଲେଶ୍ୱର: ମେଡ଼ିକାଲ କଲେଜରେ ସିଟ ଦେବାକୁ କହି ଅନଲାଇନ୍ ଠକେଇ । ବିଭିନ୍ନ ଆଶାୟୀଙ୍କଠାରୁ ୩ କୋଟି ଟଙ୍କା ଠକି ନେଇଥିଲେ ଅଭିଯୁକ୍ତ । ଅଭିଯୋଗ ପରେ ଘଟଣାର ତଦନ୍ତ କରି ୨ ଜଣ ଠକଙ୍କୁ ଗିରଫ କଲା ବାଲେଶ୍ବର ସାଇବର ଥାନା ପୋଲିସ । ସେମାନଙ୍କ ନିକଟରୁ ଏଣ୍ଡୋଭର କାର, 6 ଟି ଦାମି ମୋବାଇଲ, ଏଟିଏମ୍ କାର୍ଡ, ନକଲି ଆଧାରକାର୍ଡ ଜବତ କରାଯାଇଛି । ଗିରଫ ଅଭିଯୁକ୍ତମାନେ ହେଲେ ଯାଜପୁର ଜିଲ୍ଲାର ସୁନିଲ ସାମନ୍ତରାୟ, ସୁମିତ ବିଶ୍ବାଳ ।
ଉଭୟେ ବି’ଟେକ ଗ୍ରାଜୁଏଟ୍ । ଏମାନେ ଭୁବନେଶ୍ବରରେ କନସଲଟାନ୍ସି ଅଫିସ କରି ବିଭିନ୍ନ ଲୋକଙ୍କୁ ଠକିଛନ୍ତି । ଅଭିଯୁକ୍ତମାନେ ଖନ୍ତାପଡାର ଶିକ୍ଷକ ଗୋକୁଳଚନ୍ଦ୍ର ନାୟକଙ୍କ ଝିଅକୁ ମେଡିକାଲ କଲେଜରେ ଆଡମିସନ କରାଇଦେବାକୁ କହି ଯୋଗଯୋଗ କରିଥିଲେ । NEETରେ ୭୦୦ ରୁ ୧୩୧ ନମ୍ବର ରଖିଥିଲେ ମଧ୍ୟ ଏମକେସିଜି ମେଡିକାଲ କଲେଜରେ ସିଟ୍ କରିଦେବାକୁ କହି ୫୦ ଲକ୍ଷ ଟଙ୍କା ଦାବି କରିଥିଲେ । ତେବେ ଶେଷରେ ୨୮ ଲକ୍ଷ ଟଙ୍କାରେ ଆଡମିସନ କରିଦେବାକୁ ସ୍ଥିର ହୋଇଥିଲା ।
ୟୁପିଆଇ ଓ ନଗଦ ଟଙ୍କାକୁ ମିଶାଇ ଅଭିଯୁକ୍ତମାନେ ୨୧ ଲକ୍ଷ ଟଙ୍କା ନେଇ ମେଡିକାଲ କଲେଜରେ ଡାକ୍ତରୀ ଆପ୍ରୋନ, ଷ୍ଟେଥୋ ଯୋଗାଇ ଦେଇଥିଲେ । ଏହି ଡ୍ରେସ୍ କୋଡ ସହିତ ଛାତ୍ରୀ ଜଣକ ୨ ଦିନ କଲେଜ ଯିବାପରେ ମିଛ ବୋଲି ଜାଣିପାରି ଥାନାରେ ଅଭିଯୋଗ କରିଥିଲେ । ଘଟଣାର ତଦନ୍ତ କରି ଅଭିଯୁକ୍ତଙ୍କୁ ଗିରଫ କରିବା ସହ 5 ଟି ବ୍ୟାଙ୍କ ଆକାଉଣ୍ଟକୁ ପୋଲିସ ଫ୍ରିଜ୍ କରିଛି ପୋଲିସ । ୨୦୧୫ ମସିହାରୁ ଠକେଇ କରୁଥିବା ଏହି ଅଭିଯୁକ୍ତ ମାନଙ୍କ ନାମରେ ଓଡିଶା ଓ ଝାଡଖଣ୍ଡର ୧୨ଟି ଥାନାରେ ଠକେଇ ମାମଲା ରହିଛି ।
ଅତିକ-ଅସରଫ ହତ୍ୟାକାଣ୍ଡ; ତିନି ଆକ୍ରମଣକାରୀ କିପରି ରଚିଥିଲେ ହତ୍ୟା ଷଡ଼ଯନ୍ତ୍ର? ରହସ୍ୟ ଉପରୁ ପରଦା ହଟାଇଲା ୟୁପି ପୋଲିସ୍
ପ୍ରୟାଗରାଜ: ଅତିକ୍ ଅହମଦ ଏବଂ ତାର ଭାଇ ଅସରଫର ହତ୍ୟାରେ ସାମିଲ ଲବଲେଶ ତିୱାରୀ (ବାନ୍ଦା), ମୋହିତ ଓରଫ ସନୀ (ହମିରପୁର) ଏବଂ ଅରୁଣ ମୌର୍ଯ୍ୟ (କାସଗଞ୍ଜ)ଙ୍କୁ ବନ୍ଧୁକ କେଉଁ ସୋର୍ସ ଜରିଆରେ ମିଳିଥିଲା, ଏ ସମ୍ପର୍କରେ ସୂଚନା ହାସଲ କରିଛି ୟୁପି ପୋଲିସ । ୟୁପି ପୋଲିସର ଜଣେ ଅଧିକାରୀ ନାଁ ଗୋପନ ରଖି କହିଛନ୍ତି ଘଟଣାରେ ବ୍ୟବହୃତ ଜୀଗନା ମୋଡ ପିସ୍ତଲ ଏବଂ .୩୨ ବୋର ପିସ୍ତଲ କେଉଁଠାରୁ ଆସିଛି, ପୋଲିସ ଏହାର ସୂଚନା ହାସଲ କରିଛି । ଜୀଗନା ପିସ୍ତଲ ବର୍ତ୍ତମାନ ଭାରତରେ ବ୍ୟାନ୍ ରହିଛି । ଏହା ତୁର୍କୀ ନିର୍ମିତ ପିସ୍ତଲ ଅଟେ ।
ତେବେ ଏହା ଭାରତକୁ କେମିତି ଆସିଲା ସେ ସମ୍ପର୍କରେ ପୋଲିସ ଆବଶ୍ୟକ ତଥ୍ୟ ହାସଲ କରିଛି । ଅବଶ୍ୟ, ଏ ସମ୍ପର୍କରେ ଏବେ ଖୁଲାସା କରାଯାଉ ନାହିଁ । ଏପର୍ଯ୍ୟନ୍ତ ସୁଦ୍ଧା ହୋଇଥିବା ତଦନ୍ତ ଅନୁଯାୟୀ କୌଣସି ବି ମାଫିଆ ବା ଗ୍ୟାଙ୍ଗଷ୍ଟର ବାହୁବଳୀଙ୍କ ଇସାରାରେ ଏହି ସୁଟଆଉଟ୍ କରାଯାଇ ନାହିଁ । ବରଂ ତିନି ଆକ୍ରମଣକାରୀ ନିଜେ ହିଁ ଏହି ଘଟଣାକୁ ରୂପ ଦେଇଛନ୍ତି । ପୋଲିସ ତିନି ଆକ୍ରମଣକାରୀଙ୍କ ଘଟଣା ସ୍ଥଳ ପର୍ଯ୍ୟନ୍ତ ଆସିବାର ସମ୍ପୂର୍ଣ୍ଣ ରୁଟ୍ ସମ୍ପର୍କରେ ସୂଚନା ପାଇ ସାରିଛି । ସେମାନେ କିଭଳି ଜିଲ୍ଲାରେ ପ୍ରବେଶ କରିଥିଲେ ଏବଂ କେବେ କେଉଁଠିକୁ ଯାଇଥିଲେ । ପୋଲିସ ସମସ୍ତ ସୂଚନା ହାସଲ କରିନେଇଛି ।
ଏହା ମଧ୍ୟ ଜଣା ପଡ଼ିଛି ଯେ ତିନି ଆକ୍ରମଣକାରୀ ଜଣେ ଅନ୍ୟଜଣଙ୍କୁ ପୂର୍ବରୁ ଜାଣିଥିଲେ ଏବଂ ଯୋଜନା ମୁତାବକ ଏକାସାଙ୍ଗରେ ଘଟଣାସ୍ଥଳରେ ପହଞ୍ଚିଥିଲେ । ସୂଚନା ମୁତାବକ, ସନୀ ଏବଂ ଲବଲେଶଙ୍କ ଭେଟଘାଟ ବାନ୍ଦା ଜେଲରେ ହୋଇଥିଲା, ପରେ ଉଭୟଙ୍କ ମଧ୍ୟରେ ବନ୍ଧୁତା ସ୍ଥାପନା ହୋଇଥିଲା,ଯେତେବେଳେ କି ସନୀ ଏବଂ ଅରୁଣ ପୂର୍ବରୁ ହିଁ ସାଙ୍ଗ ଥିଲେ ଏବଂ ସନୀ ହିଁ ଲବଲେଶ ସହ ଅରୁଣର ବନ୍ଧୁତା କରାଇଥିଲା ।
ସୂଚନା ଥାଉକି ଅତିକ ଏବଂ ତା ଭାଇ ଅସରଫକୁ ଶନିବାର ରାତିରେ ଆକ୍ରମଣକାରୀ ଏପରି ସମୟରେ ଗୁଳିମାରି ହତ୍ୟା କରିଥିଲେ ଯେବେ ପୋଲିସ ଉଭୟଙ୍କୁ ମେଡିକାଲ ଯାଞ୍ଚ ପାଇଁ ପ୍ରୟାଗରାଜ ମେଡିକାଲ କଲେଜ ନେଇ ଯାଉଥିଲା । ଏହି ହତ୍ୟାକାଣ୍ଡ ପରେ ସମ୍ପୂର୍ଣ୍ଣ ରାଜ୍ୟରେ ଆଲର୍ଟ ଜାରି କରାଯାଇଛି । କୌଣସି ବିଶୃଙ୍ଖଳାକୁ ଏଡ଼ାଇବା ପାଇଁ ୧୪୪ ଧାରା ଜାରି କରାଯାଇଛି । ଗତାକାଲିର ଏହି ଆକ୍ରମଣରେ ଜଣେ ସାମ୍ବାଦିକ ସମେତ ଜଣେ ପୋଲିସ କର୍ମଚାରୀ ମଧ୍ୟ ଆହତ ହୋଇଛନ୍ତି । ଘଟଣାକୁ ଗମ୍ଭୀରତାର ସହ ନେଇ ୟୁପି ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଉଚ୍ଚସ୍ତରୀୟ ତଦନ୍ତ ପାଇଁ ନିର୍ଦ୍ଦେଶ ଦେଇଛନ୍ତି ।