ଭୁବନେଶ୍ବର : ରାଜ୍ୟରେ ସ୍ବାଭାବିକ ହେଲା ବସ୍ ଚଳାଚଳ । ସୁରକ୍ଷା ଦାବିରେ ଦିଆଯାଇଥିବା ବସ ଧର୍ମଘଟ ନିଷ୍ପତ୍ତି ହୋଇଛି ପ୍ରତ୍ୟାହାର । ରାଜ୍ୟରେ ଆଜିଠାରୁ ଘରୋଇ ବସ ଚଳାଚଳ ସ୍ୱାଭାବିକ ହେଲା ବୋଲି କହିଛନ୍ତି ଘରୋଇ ବସ ମାଲିକ ସଙ୍ଘ ସମ୍ପାଦକ ଦେବେନ୍ଦ୍ର ସାହୁ । ସେ କହିଛନ୍ତି ବର୍ତ୍ତମାନ ରାଜ୍ୟର ଅଧିକାଶ ରୁଟକୁ ବସ ଚଳାଚଳ ଆରମ୍ଭ ହୋଇଛି । ଡ୍ରାଇଭରଙ୍କ ବିରୋଧ ଯୋଗୁ ବସ ଚଳାଚଳରେ ସୃଷ୍ଟି ହୋଇଥିବା ସମସ୍ୟାର ସମାଧାନ ହୋଇଥିବାରୁ ଏହି ନିଷ୍ପତ୍ତି ନିଆଯାଇଥିବା କହିଛନ୍ତି ସମ୍ପାଦକ ।
ହାଇଦ୍ରାବାଦର ସ୍ବପ୍ନାଲୋକ କମ୍ପ୍ଲେକ୍ସରେ ଅଗ୍ନିକାଣ୍ଡ, ୬ଜଣଙ୍କ ମୃତ୍ୟୁ
ହାଇଦ୍ରାବାଦ : ହାଇଦ୍ରାବାଦର ଏକ ବହୁତଳ କମର୍ସିଆଲ କମ୍ପ୍ଲେକ୍ସରେ ବଡ଼ଧରଣର ଅଗ୍ନିକାଣ୍ଡ । ଅଗ୍ନିକାଣ୍ଡରେ ୬ ଜଣଙ୍କ ମୃତ୍ୟୁ ହୋଇଛି । ଶ୍ବାସରୁଦ୍ଧ କାରଣରୁ ସେମାନଙ୍କ ମୃତ୍ୟୁ ଘଟିଥିବା ସୂଚନା ମିଳିଛି । ଗତକାଲି ରାତିରେ ସ୍ବପ୍ନାଲୋକ କମ୍ପ୍ଲେକ୍ସର ପଞ୍ଚମ ମହଲାରେ ସର୍ଟ ସର୍କିଟ କାରଣରୁ ନିଆ ଲାଗିଥିଲା ।
ନିଆଁ ଲାଗିବା ପରେ ପଞ୍ଚମ ମହଲାରେ ୧୩ ଜଣ ବ୍ୟକ୍ତି ଫସିଯାଇଥିଲେ । ସେମାନଙ୍କ ମଧ୍ୟରୁ ୭ଜଣଙ୍କୁ ଉଦ୍ଧାର କରାଯାଇଥିବାବେଳେ ୬ ଜଣ ପ୍ରାଣ ହରାଇଥିଲେ ବୋଲି କହିଛନ୍ତି ନର୍ଥ ଜୋନ ଡିସିପି ଚନ୍ଦନା ଦୀପ୍ତି । ଘଟଣାସ୍ଥଳରେ ଡିଆରଏଫ ଓ ପୋଲିସ ପହଞ୍ଚି ଉଦ୍ଧାର କାର୍ଯ୍ୟ କରିଥିଲେ ।
ଆଜିଠୁ ଭାରତ-ଅଷ୍ଟ୍ରେଲିଆ ଦିନିକିଆ ସିରିଜ
ନୂଆଦିଲ୍ଲୀ : ଆଜିଠୁ ଭାରତ-ଅଷ୍ଟ୍ରେଲିଆ ଦିନିକିଆ ସିରିଜ । ୩ଟିକିଆ ସିରିଜର ଆଜି ପ୍ରଥମ ମ୍ୟାଚ୍ । ଓ୍ବାଙ୍ଖଡେରେ ଦିନ ସାଢେ ଗୋଟାଏରେ ମ୍ୟାଚ୍ ଖେଳାଯିବ । ରୋହିତ ଶର୍ମାଙ୍କ ଅନୁପସ୍ଥିତିରେ ଟିମ ଇଣ୍ଡିଆର ନେତୃତ୍ବ ନେବେ ହାର୍ଦ୍ଦିକ ପାଣ୍ଡ୍ୟା ।
ଅଷ୍ଟ୍ରେଲିଆ ବିରୋଧରେ ଟେଷ୍ଟ ସିରିଜ ଜିତି ଭାରତର ମନୋବଳ ଦୃଢ ରହିଛି । ଖେଳାଳିମାନେ ମଧ୍ୟ ଫର୍ମରେ ରହିଛନ୍ତି । ପ୍ରଥମ ମ୍ୟାଚକୁ ଜିତି ସିରିଜରେ ଆଗଆ ରହିବାକୁ ଉଦ୍ୟମ କରିବ ଭାରତ । ସେପଟେ ଟେଷ୍ଟ ସିରିଜ ହାରି ବ୍ୟାକଫୁଟରେ ରହିଛି ଭ୍ରମଣକାରୀ ଦଳ । ଭାରତକୁ ତାର ଘରୋଇ ମାଟିରେ ଜବାବ ଦେବାକୁ ରଣନୀତି କରିଛି ଟିମ୍ କଙ୍ଗାରୁ ।
ଆଜି ସାରା ରାଜ୍ୟରେ ହେବ ପ୍ରବଳ ବର୍ଷା
ଭୁବନେଶ୍ବର : ଆଜି ପଡ଼ିବ ପଶ୍ଚିମା ଝଡ଼ର ସର୍ବାଧିକ ପ୍ରଭାବ । ସାରା ରାଜ୍ୟରେ ହେବ ପ୍ରବଳ ବର୍ଷା । ଉତ୍ତର ଏବଂ ଦକ୍ଷିଣ ଓଡ଼ିଶାର ପ୍ରବଳ ବର୍ଷା ନେଇ ୧୦ ଜିଲ୍ଲାକୁ ୟେଲୋ ଆଲର୍ଟ ଜାରି କରାଯାଇଛି । ଗଞ୍ଜାମ, ଗଜପତି, କୋରାପୁଟ, ନବରଙ୍ଗପୁର, ରାୟଗଡା,ମାଲକାନଗିରି, କନ୍ଧମାଳ, ବାଲେଶ୍ବର, ମୟୂରଭଞ୍ଜ, କେନ୍ଦୁଝରକୁ ସତର୍କତା ଜାରି ହୋଇଛି । ବାକି ୨୦ ଜିଲ୍ଲାରେ ବି ଘଡଘଡି ବିଜୁଳି ସହ ବର୍ଷାର ପ୍ରଭାବ ରହିବ ।
ସେହିପରି ଆସନ୍ତାକାଲି ଉପକୂଳ, ଉତ୍ତର ଏବଂ ଦକ୍ଷିଣ ଓଡ଼ିଶାର ୧୫ ଜିଲ୍ଲାକୁ ୟେଲୋ ଆଲର୍ଟ ଜାରି ହୋଇଛି । ବର୍ଷା ସହିତ ଘଣ୍ଟାପ୍ରତି ୪୦ ରୁ ୫୦ କିମି ବେଗରେ ବହିବ ପବନ । କିଛି ସ୍ଥାନରେ କୁଆପଥର ବୃଷ୍ଟି ସମ୍ଭାବନା ରହିଥିବା ପାଣିପାଗ କେନ୍ଦ୍ର କହିଛି । ଝଡବର୍ଷା ଏବଂ ଘଡଘଡି ବିଜୁଳି ସମୟରେ ଘରୁ ନ ବାହାରିବାକୁ ପରାମର୍ଶ ଦିଆଯାଇଛି ।
ଦୁଇ ଦିନିଆ ନବରଙ୍ଗପୁର ଗସ୍ତରେ ଯିବେ ଫାଇଭ-ଟି ସଚିବ ଭି.କେ ପାଣ୍ଡିଆନ
ନବରଙ୍ଗପୁର : ଆଜିଠୁ ଦୁଇଦିନିଆ ନବରଙ୍ଗପୁର ଜିଲ୍ଲା ଗସ୍ତରେ ଯିବେ 5T ସଚିବ ଭି.କେ ପାଣ୍ଡିଆନ । ଜୟପୁର ଏୟାରପୋର୍ଟରେ ପହଞ୍ଚି ନବରଙ୍ଗପୁର ଯିବେ ଫାଇଭଟି ସଚିବ । ପ୍ରଥମେ ସର୍କିଟ ହାଉସରେ ଜିଲ୍ଲାର ବିଭିନ୍ନ ସାମାଜିକ ସଙ୍ଗଠନ ଓ ବିଭିନ୍ନ ସମ୍ପ୍ରଦାୟର ଦାବି ସମ୍ପର୍କରେ ଆଲୋଚନା କରିବେ ।
ଜିଲ୍ଲାର ବିକାଶ ଓ କ’ଣ ସବୁ ଅସୁବିଧା ରହିଛି ? କଣ କରାଗଲେ ଅଧିକରୁ ଅଧିକ ବିକାଶ ହୋଇପାରିବ ? ସେନେଇ ଆଲୋଚନା କରିବେ। ପରେ ନବରଙ୍ଗପୁରର ଅଧିଷ୍ଠାତ୍ରୀ ଦେବୀ ମା’ ଭଣ୍ଡାର ଘରଣୀଙ୍କ ଦର୍ଶନ କରିବେ ଫାଇଭ-ଟି ସଚିବ।
ଟିରଲି ଆମଗୁଡ଼ାଠାରେ ଅନ୍ମେସା ହଷ୍ଟେଲକୁ ଯାଇ ଛାତ୍ରଛାତ୍ରୀଙ୍କ ସହ ଆଲୋଚନା କରିବା ସହ ରାତ୍ରୀ ଭୋଜନ କରିବା କାର୍ଯ୍ୟକ୍ରମ ରହିଛି । ସେହିପରି ଆସନ୍ତକାଲି ବିଭିନ୍ନ ଦର୍ଶନୀୟ ସ୍ଥାନ ସହ ଉନ୍ନୟନ ପ୍ରକଳ୍ପର ଅନୁଧ୍ୟାନ କରିବେ ଫାଇଭ-ଟି ସଚିବ ।
ଡ୍ରାଇଭରଙ୍କ ଆନ୍ଦୋଳନକୁ ଦୃଷ୍ଟିରେ ରଖି ଟାସ୍କ ଫୋର୍ସ ଗଠନ କଲେ ରାଜ୍ୟ ସରକାର
ଭୁବନେଶ୍ୱର: ରାଜ୍ୟରେ ଅତ୍ୟାବଶ୍ୟକ ସାମଗ୍ରୀ ଯୋଗାଣରେ ରହିବନି କୌଣସି ସମସ୍ୟା । ଡ୍ରାଇଭରଙ୍କ ଆନ୍ଦୋଳନକୁ ଦୃଷ୍ଟିରେ ରଖି ରାଜ୍ୟ ସରକାର ଗଠନ କରିଛନ୍ତି ଟାସ୍କ ଫୋର୍ସ । ମୁଖ୍ୟ ଶାସନ ସଚିବ ପ୍ରଦୀପ ଜେନାଙ୍କ ଅଧ୍ୟକ୍ଷତାରେ ଟାସ୍କଫୋର୍ସ ଗଠନ କରାଯାଇଛି । ଏଥିରେ ପୋଲିସ ଡିଜି, ଉନ୍ନୟନ କମିଶନର, ପରିବହନ ସଚିବ, ଯୋଗାଣ ସଚିବ ସଦସ୍ୟ ରହିଛନ୍ତି । ଟାସ୍କ ଫୋର୍ସ ଅତ୍ୟାବଶ୍ୟକ ସାମଗ୍ରୀ ଯୋଗାଣ ଉପରେ ନଜର ରଖିବ । ଅତ୍ୟାବଶ୍ୟକ ସାମଗ୍ରୀ ପରିବହନରେ ଯେପରି କୌଣସି ସମସ୍ୟା ନହୁଏ ସେଥିପ୍ରତି ଦୃଷ୍ଟି ଦିଆଯିବ । ଏଥିପାଇଁ ୩ଟି କଣ୍ଟ୍ରୋଲ ରୁମ୍ କାମ କରିବ । ଯେପରି ସମସ୍ତ ସାମଗ୍ରୀ ବିନା ବାଧାରେ ପରିବହନ ହୋଇପାରିବ ସେଥିପ୍ରତି ଦୃଷ୍ଟି ଦେବ ଟାସ୍କ ଫୋର୍ସ ।
ଜିମ୍ ଭିତରେ ପଞ୍ଜାବୀ ଅଭିନେତାଙ୍କୁ ରକ୍ତାକ୍ତ ଆକ୍ରମଣ
ନୂଆଦିଲ୍ଲୀ: ଜିମ୍ ଭିତରେ ପଞ୍ଜାବୀ ଅଭିନେତାଙ୍କୁ ରକ୍ତାକ୍ତ ଆକ୍ରମଣ । ଆମେରିକାରେ ଅଭିନେତା ଅମନ ଧଲିଓ୍ୱାଲଙ୍କୁ ହୋଇଛି ଛୁରିମାଡ଼ । ଛୁରିମାଡ଼ର ଭିଜୁଆଲ ସିସିଟିଭିରେ କଏଦ ହୋଇଛି । ଅମନ ଜିମ୍ ଭିତରେ ବ୍ୟାୟାମ କରୁଥିବାବେଳେ ଜଣେ ଅଜଣା ବ୍ୟକ୍ତି ଆସି ତାଙ୍କୁ ଛୁରିମାଡ଼ କରିଥିଲା । ଛୁରିମାଡ଼ରେ ତାଙ୍କର ଶରୀର କ୍ଷତାକ୍ତ ହୋଇଛି । ଗ୍ରାଣ୍ଡ ଓକ୍ ଅନ୍ତର୍ଗତ ପ୍ଲାନେଟ ଫିଟନେସ ଜିମରେ ଘଟିଛି ଘଟଣା । ବହୁ ହିନ୍ଦି ଓ ପଞ୍ଜାବୀ ଫିଲ୍ମରେ ଅଭିନୟ କରିଥିବା ଅମନଙ୍କୁ ଚିକିତ୍ସା ଲାଗି ଏକ ହସ୍ପିଟାଲରେ ଭର୍ତ୍ତି କରାଯାଇଛି । ତାଙ୍କ ଅବସ୍ଥା ଗୁରୁତର ଥିବା ଜଣାଯାଇଛି । ପୋଲିସ ଘଟଣାର ତଦନ୍ତ କରୁଥିବାବେଳେ ଆକ୍ରମଣର କାରଣ ସ୍ପଷ୍ଟ ହୋଇନାହିଁ ।
ଦିବ୍ୟାଙ୍ଗ ମହିଳା କ୍ରିକେଟରଙ୍କ ଦୁଃଖ ବୁଝିଲେ 5T ସଚିବ, ଆର୍ଥିକ ସହାୟତା ପ୍ରଦାନ କରିବାକୁ ଦେଲେ ନିର୍ଦ୍ଦେଶ
କେନ୍ଦୁଝର: ମହିଳା କ୍ରିକେଟରଙ୍କ ଦୁଃଖ ବୁଝିଲେ 5T ସଚିବ ଭି.କେ ପାଣ୍ଡିଆନ୍ । ଦିବ୍ୟାଙ୍ଗ୍ କ୍ରିକେଟର ଝିଲ୍ଲୀ ବିରୁଆଙ୍କୁ ଆର୍ଥିକ ସହାୟତା ପ୍ରଦାନ କଲେ 5T ସଚିବ । ଦିବ୍ୟାଙ୍ଗ ମହିଳା କ୍ରିକେଟର୍ ଝିଲ୍ଲୀ ବିରୁଆ ନେପାଳରେ ହେବାକୁ ଥିବା ବିଶ୍ୱ ଦୃଷ୍ଟିହୀନ କ୍ରିକେଟ୍ କାଉନସିଲ୍ ପାରାଅଲମ୍ପିକ୍ ଖେଳିବାକୁ ମନୋନୀତ ହୋଇଥିଲେ। କିନ୍ତୁ ପାସପୋର୍ଟ ଏବଂ ଟଙ୍କା ଅଭାବରୁ ସେ ଖେଳିବାକୁ ଯିବାରୁ ବଞ୍ଚିତ ହେବା ପରିସ୍ଥିତି ସୃଷ୍ଟି ହୋଇଥିଲା । ଯାହା ଆଜି ଦୈନିକ ଖବର କାଗଜ ‘ସକାଳ’ରେ ପ୍ରକାଶ ପାଇଥିଲା । ଏହି ଖବରଟିକୁ ସାମଜିକ ଗଣମାଧ୍ୟମରେ ଜଣେ ସାମାଜିକ କର୍ମୀ ପୋଷ୍ଟ କରି ତୁରନ୍ତ ସହାୟତା ପାଇଁ ନିବେଦନ କରିଥିଲେ।
ଏହି ଖବର 5T ସଚିବ ଭି.କେ ପାଣ୍ଡିଆନଙ୍କ ନଜରକୁ ଆସିବା ପରେ ସେ ତୁରନ୍ତ ସହାୟତା ପ୍ରଦାନ ପାଇଁ କେନ୍ଦୁଝର ଜିଲ୍ଳାପାଳ ଓ କ୍ରୀଡା ବିଭାଗକୁ ନିର୍ଦ୍ଦେଶ ଦେଇଥିଲେ । ଏହାପରେ ଦିବ୍ୟାଙ୍ଗ ମହିଳା କ୍ରିକେଟର୍ ଝିଲ୍ଲୀଙ୍କୁ ୩୦ ହଜାର ଟଙ୍କାର ଆର୍ଥିକ ସହାୟତା ସହ ପାସପୋର୍ଟ ନେଇ ବ୍ୟବସ୍ଥା କରାଯାଇଥିବା ଜଣାପଡ଼ିଛି। 5T ସଚିବଙ୍କ ଏହି କାର୍ଯ୍ୟ ପାଇଁ ସାମାଜିକ ଗଣମାଧ୍ୟମରେ ତାଙ୍କୁ ପ୍ରଶଂସା କରାଯାଉଛି।
ଡ୍ରାଇଭରଙ୍କ ଆନ୍ଦୋଳନ ଯୋଗୁଁ ଠିକ୍ ସମୟରେ ପହଞ୍ଚି ପାରିଲାନି ଆମ୍ବୁଲାନ୍ସ, ରାସ୍ତା କଡ଼ରେ ପ୍ରସବ କଲେ ମହିଳା
ଭୁବନେଶ୍ୱର: ଡ୍ରାଇଭରଙ୍କ ଆନ୍ଦୋଳନ ଯୋଗୁଁ ଠିକଣା ସମୟରେ ପହଞ୍ଚି ପାରିଲାନି ଆମ୍ବୁଲାନ୍ସ । ରାସ୍ତା କଡ଼ରେ ପ୍ରସବ କଲେ ମହିଳା । ଏପରି ଅଭାବନୀୟ ଘଟଣା ଦେଖିବାକୁ ମିଳିଛି ମହାକାଳପଡ଼ା ବ୍ଲକ ଗୋଗୁଆ ପଞ୍ଚାୟତର ଚକଡାଗୋଗୁଆ ଗ୍ରାମରେ । ଗ୍ରାମର ଅକ୍ଷୟ କୁମାର ଜେନାଙ୍କ ସ୍ତ୍ରୀ ବନିତା ରାସନ ଆଣିବା ପାଇଁ ଘରଠାରୁ ଏକ କିଲୋମିଟର ଦୂର ପଞ୍ଚାୟତ କାର୍ଯ୍ୟାଳୟକୁ ଯାଇଥିଲେ । ତେବେ ଭିଡ଼ ଦେଖି ଘରକୁ ଫେରି ଆସିଥିଲେ । ରାସ୍ତାରେ ଇଣ୍ଡିଆନ ଅଏଲ ପଏଣ୍ଟ ନିକଟରେ ମଧ୍ୟାହ୍ନ ୧୧ଟା ୪୫ ସମୟରେ ପ୍ରସବ ଯନ୍ତ୍ରଣା ପାଇ ବସିପଡି ଚିତ୍କାର କରିଥିଲେ ବନିତା । ନିକଟରେ ଥିବା ମହିଳାମାନେ ତାଙ୍କୁ ଚାରିପଟୁ ଘେରି ରଖିଥିଲେ ।
ସ୍ଥାନୀୟ ଲୋକେ ୧୦୮କୁ ଫୋନ କରିଥିଲେ । ତେବେ ଡ୍ରାଇଭରଙ୍କ ଆନ୍ଦୋଳନ ଯୋଗୁଁ ଆମ୍ବୁଲାନ୍ସ ପହଞ୍ଚିବାରେ ବିଳମ୍ବ ହେବାରୁ ଘଟଣା ସ୍ଥଳରେ ଏକ ଶିଶୁପୁତ୍ରକୁ ଜନ୍ମ ଦେଇଥିଲେ ବନିତା । ପରେ ଜନନୀ ଏକ୍ସପ୍ରେସ ପହଞ୍ଚି ବନିତାକୁ ସ୍ଥାନୀୟ ସ୍ବାସ୍ଥ୍ୟ ଆରୋଗ୍ୟ କେନ୍ଦ୍ର ନେଇଥିଲା । ଆରୋଗ୍ୟ କେନ୍ଦ୍ରରେ ଶିଶୁପୁତ୍ର ଓ ମା’କୁ ପ୍ରାଥମିକ ଚିକିତ୍ସା କରି କେନ୍ଦ୍ରାପଡ଼ା ଜିଲ୍ଲା ମୁଖ୍ୟ ଚିକିତ୍ସାଳୟକୁ ପଠାଇ ଦିଆଯାଇଛି । ଉଭୟ ଶିଶୁପୁତ୍ର ଓ ମା’ ସୁସ୍ଥ ଥିବା ଜଣାପଡ଼ିଛି । ଦୁଇଦିନ ହେବ ଡ୍ରାଇଭର ସଂଘର ଧର୍ମଘଟ ଯୋଗୁ କୌଣସି ଘରୋଇ ଗାଡି ଚାଲିପାରୁ ନଥିବାରୁ ୧୦୮ ଆମ୍ବୁଲାନ୍ସ କିମ୍ବା ଜନନୀ ଏକ୍ସପ୍ରେସ ରୋଗୀଙ୍କ ନିକଟରେ ସମୟରେ ପହଞ୍ଚି ପାରୁ ନଥିବା ଅଭିଯୋଗ ହୋଇଛି ।
ପୁନର୍ଗଠିତ ହେଲା ବିଜେଡି କଟକ ଜିଲ୍ଲା ଓ ନଗର କମିଟି
ଭୁବନେଶ୍ୱର: ପୁନର୍ଗଠିତ ହେଲା ବିଜେଡି କଟକ ନଗର କମିଟି । ବିଜେଡି କଟକ ନଗର କମିଟି ସଭାପତି ହେଲେ ମଧୁସୂଦନ ସାହୁ । ଇଞ୍ଜିନୟର ସୁବ୍ରତ ଘଡାଇ ଓ ସୂର୍ଯ୍ୟସାରଥି ବେହେରା ହୋଇଛନ୍ତି କାର୍ଯ୍ୟକାରୀ ସଭାପତି । ୧୫ ଜଣ ଉପ ସଭାପତି, ୨ ଜଣ ସାଧାରଣ ସମ୍ପାଦକ, ୩୫ ଜଣ ସମ୍ପାଦକ ନିଯୁକ୍ତ ହୋଇଛି । ଚିରଞ୍ଜୀବ ପ୍ରଧାନ ବିଜେଡି କଟକ ନଗର କମିଟି କୋଷାଧ୍ୟକ୍ଷ ଭାବେ ନିଯୁକ୍ତ ହୋଇଛନ୍ତି ।
ସେହିପରି କଟକ ଜିଲ୍ଲା ବିଜେଡି କମିଟି ପୁନର୍ଗଠିତ ହୋଇଛି । ଦେବାଶିଷ ସାମନ୍ତରାୟ କଟକ ଜିଲ୍ଲା ବିଜେଡି ସଭାପତି ଭାବେ ନିଯୁକ୍ତ ହୋଇଛନ୍ତି । ୩୪ ଉପସଭାପତି ଓ ୩୦ ସାଧାରଣ ସମ୍ପାଦକଙ୍କୁ ଦାୟିତ୍ୱ ଦିଆଯାଇଛି । ନରେନ୍ଦ୍ର ବାରିକ କଟକ ଜିଲ୍ଲା କମିଟି କୋଷାଧ୍ୟକ୍ଷ ଭାବେ ନିଯୁକ୍ତ ହୋଇଛନ୍ତି । ଏହାସହ ୩୭ ଜଣ ସମ୍ପାଦକ ଓ ୮ ଜଣ ଯୁଗ୍ମ ସମ୍ପାଦକଙ୍କୁ ଜିଲ୍ଲା କମିଟି ଦାୟିତ୍ୱ ଦିଆଯାଇଛି । ଏନେଇ ସୂଚନା ଦେଇଛନ୍ତି ବିଜେଡି ସାଧାରଣ ସମ୍ପାଦକ ମାନସ ମଙ୍ଗରାଜ ।