ବାପାକୁ ଠେଙ୍ଗାରେ ପିଟିପିଟି ମାରିଦେଲା ମଦ୍ୟପ ପୁଅ
ପିପିଲି: ପାରିବାରକି କଳହର କରୁଣ ପରିଣତି । ବାପାକୁ ଠେଙ୍ଗାରେ ପିଟିପିଟି ମାରିଦେଲା ସୈତାନ ପୁଅ । ମଦୁଆ ପୁଅର ଠେଙ୍ଗା ମାଡ଼ରେ ବାପା ପ୍ରାଣ ହରାଇଛନ୍ତି । ଘଟଣା ଘଟିଛି ପିପିଲି ସାନକଣ୍ଟି ଗାଁରେ । ମୃତକ ହେଲେ ୬୧ ବର୍ଷୀୟ ହୃଷୀକେଶ ପ୍ରଧାନ । ସାମାନ୍ୟ ବଚସାରୁ ବୃଦ୍ଧ ବାପାଙ୍କ ଜୀବନ ଯାଇଛି ।
ବିଳମ୍ବିତ ରାତିରେ ଘରେ ବାପା ମା ସହ କୌଣସି କଥାକୁ ନେଇ ବଚସା ହୋଇଛି । ତାପରେ ଉତ୍ୟକ୍ତ ହୋଇ ବାପାକୁ ହତ୍ୟା କରିବାକୁ ପଛାଇ ନଥିଲା ମଦ୍ୟପ ପୁଅ । ଭିତରୁ କବାଟ ଦେଇ ବାପା ହୃଷୀକେଶଙ୍କୁ ଠେଙ୍ଗାରେ ଆଖିବୁଜା ପିଟିଥିଲା ନିର୍ଦ୍ଦୟୀ ପୁଅ । ବାପାର ମୃତ୍ୟୁ ହେବା ଜାଣି ଅଭିଯୁକ୍ତ ପୁଅ ଛାତ ଉପରକୁ ପଳାଇଥିଲା ।
ସ୍ଥାନୀୟ ଲୋକ ଓ ସମ୍ପର୍କୀୟ କବାଟ ଭାଙ୍ଗି ଘର ଭିତରେ ଦେଖିବା ବେଳକୁ ହୃଷିକେଶଙ୍କ ମୃତ୍ୟୁ ହୋଇସାରିଥିଲା । ଛାତ ଉପରୁ ହତ୍ୟାକାରୀ ପୁଅ ଜିତୁକୁ କାବୁ କରି ପୋଲିସ ଜିମା ଦେଇଛନ୍ତି ଗାଁଲୋକ । ପିପିଲି ପୋଲିସ ପହଁଞ୍ଚି ଅଭିଯୁକ୍ତ ମଦ୍ୟପ ପୁଅକୁ ଚିକିତ୍ସା ପାଇଁ ମେଡିକାଲରେ ଭର୍ତ୍ତି କରିଛି । ମୃତଦେହ ଉଦ୍ଧାର କରିବା ସହ ହତ୍ୟାରେ ବ୍ୟବହୃତ ଠେଙ୍ଗା ଜବତ କରିଛି ପିପିଲି ପୋଲିସ ।
