କୋରାପୁଟ: କୋଟିଆର ବିକାଶ କରିଛନ୍ତି ରାଜ୍ୟ ସରକାର । ହେଲେ କୋଟିଆକୁ କେନ୍ଦ୍ର ସରକାର ଦେଇଛନ୍ତି କ’ଣ । କେବଳ ସେଠାକୁ କୁତ୍ସାରଟନା କରିବାକୁ କେନ୍ଦ୍ରମନ୍ତ୍ରୀ ଯାଉଥିବା କହି ବର୍ଷିଛନ୍ତି ବିଜେଡି ନେତା ପ୍ରଦୀପ ମାଝୀ । କେନ୍ଦ୍ରମନ୍ତ୍ରୀ ଗୋଟିଏ ଦିନ ବି କୋଟିଆ ପ୍ରସଙ୍ଗରେ କହିନାହାନ୍ତି । କେନ୍ଦ୍ର ସରକାର କ’ଣ ପଦକ୍ଷେପ ନିଆଯାଇପାରିବ ସେନେଇ କିଛି କହିନାହାନ୍ତି । ଆନ୍ଧ୍ର ବିରୋଧରେ ପଦୁଟିଏ ବି କହିନାହାନ୍ତି କେନ୍ଦ୍ରମନ୍ତ୍ରୀ । କୋଟିଆ ପାଇଁ ସୁପ୍ରିମକୋର୍ଟ ଯାଇଛନ୍ତି ମୁଖ୍ୟମନ୍ତ୍ରୀ । ୧୬୦ କୋଟିର ପ୍ରକଳ୍ପ କୋଟିଆ ପଞ୍ଚାୟତକୁ ଦିଆଯାଇଛି । ପକ୍କା ସଡ଼କ ହୋଇଛି, ପାନୀୟ ଜଳ ଓ ବିଦ୍ୟୁତ ପହଞ୍ଚିଛି । ବଡ଼ ଶିକ୍ଷାନୁଷ୍ଠାନ, ଫାଣ୍ଡି, ଚିକିତ୍ସାଳୟ ନିର୍ମାଣ ହୋଇଛି । ତେଣୁ କୋଟିଆରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ନାଟକବାଜୀ ବନ୍ଦ କରନ୍ତୁ ବୋଲି ପ୍ରଦୀପ କହିଛନ୍ତି । ବିଜେପିକୁ ରାଜ୍ୟବ୍ୟାସୀ ପ୍ରତ୍ୟାଖ୍ୟାନ କରିଆସିଛନ୍ତି। ଆଗାମୀ ଦିନରେ ମଧ୍ୟ ପ୍ରତ୍ୟାଖ୍ୟାନ କରିବେ।
ସେହିପରି କୋରାପୁଟ ସେଣ୍ଟ୍ରାଲ ୟୁନିଭର୍ସିଟିକୁ ନେଇ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଉପରେ ବର୍ଷିଛନ୍ତି ପ୍ରଦୀପ ମାଝୀ । କୋରାପୁଟ ସେଣ୍ଟ୍ରାଲ ୟୁନିଭର୍ସିଟିକୁ ଅନ୍ୟତ୍ର ଉଠାଇ ନେବାକୁ ଉଦ୍ୟମ ହେଉଛି ବୋଲି କହିଛନ୍ତି ପ୍ରଦୀପ । ୨୦୦୯ରେ କୋରାପୁଟକୁ ସେଣ୍ଟ୍ରାଲ ୟୁନିଭର୍ସିଟି ମିଳିଲା । ହେଲେ ୨୦୧୪ ପରଠୁ ଏହା ସବୁଠୁ ଅବହେଳିତ ହୋଇଛି । ସେଠାରେ ମାତ୍ର ୧୭ ଆସୋସିଏଟ୍ ଓ ୨ ଜଣ ପରମାନେଣ୍ଟ ପ୍ରଫେସର ଅଛନ୍ତି । ୧୩୮ଟି ଟିଚିଂ ଓ ୯୧ଟି ନନ-ଟିଚିଂ ସହ ମୋଟ୍ ୨୨୯ଟି ପୋଷ୍ଟ ଖାଲି ପଡ଼ିଛି । ୭ଟି ବିଭାଗରେ ୧୪ଟି ପାଠ୍ୟକ୍ରମରେ ଗୋଟିଏ ବିଭାଗ ବି ବଢ଼ାଯାଇନି। ହରିୟାଣା ସେଣ୍ଟ୍ରାଲ ୟୁନିଭର୍ସିଟିରେ ବଢ଼ାଯାଉଛି, ତେବେ କୋରାପୁଟରେ କାହିଁକି ବିଭାଗ ବଢ଼ାଯାଇନି ବୋଲି ପ୍ରଦୀପ ପ୍ରଶ୍ନ କରିଛନ୍ତି।
ସାଟେଲାଇଟ ସେଣ୍ଟର ହେଲେ ଭିସି କାର୍ଯ୍ୟାଳୟ ଅନ୍ୟତ୍ର ଉଠିଯିବ। କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଗସ୍ତର ମୁଖ୍ୟ ଉଦ୍ଦେଶ୍ୟ କୋରାପୁଟ ସେଣ୍ଟ୍ରାଲ ୟୁନିଭର୍ସିଟିକୁ ଅନ୍ୟତ୍ର ଉଠାଇ ନେବା ବୋଲି ପ୍ରଦୀପ କହିଛନ୍ତି। ଏହି ଉଦ୍ୟମରୁ କ୍ଷାନ୍ତ ରହିବାକୁ ବିଜେଡି ପରାମର୍ଶ ଦେଇଛି। ସେହିପରି ଆଦିବାସୀ ସମାଜକୁ ମାନ୍ୟତା ଦାବିକୁ ଅଣଦେଖା କରୁଛି କେନ୍ଦ୍ର। କେନ୍ଦ୍ର ସରକାର ଖାଲି ମିଛ ପ୍ରତିଶ୍ରୁତି ଦିଅନ୍ତି, କିଛି ପୂରଣ କରନ୍ତିନି ବୋଲି ପ୍ରଦୀପ କହିଛନ୍ତି ।
