ଭୁବନେଶ୍ୱର: ଦୟାନଦୀରେ ଅଘଟଣ । ଗାଧୋଉବା ବେଳେ ନଦୀରେ ବୁଡିଗଲେ ନାବାଳକ । ନିଖୋଜ ହୋଇଥିବା ନାବାଳକ ହେଲେ ଭୁବନେଶ୍ବର ଉପକଣ୍ଠ ଲିଙ୍ଗିପୁର ପଞ୍ଚାୟତ ଇନ୍ଦିରା କଲୋନୀର ସୁମିତେନ୍ଦ୍ର ସାହୁ । ଆଜି ଅପରାହ୍ନରେ ୪ ଜଣ ନାବାଳକ ଦୟା ନଦୀକୁ ଗାଧୋଇବାକୁ ଆସିଥିବା ବେଳେ ଏଭଳି ଘଟଣା ଘଟିଛି । ଅନ୍ୟ ୩ ଜଣଙ୍କୁ ଉଦ୍ଧାର କରାଯାଇଥିବା ବେଳେ, ସିମୁତେନ୍ଦ୍ର ଏବେ ବି ନିଖୋଜ ଅଛନ୍ତି । ଅଗ୍ନିଶମ ବାହିନୀ ଓ ସ୍ଥାନୀୟ ପୋଲିସ ନିଖୋଜ ଥିବା ସୁମିତେନ୍ଦ୍ରଙ୍କୁ ଖୋଜାଖୋଜି କରୁଛନ୍ତି । ହେଲେ ଅନ୍ଧାର କାରଣରୁ ଅଧାରେ ଅଟକିଲା ଅପରେସନ । ଦୀର୍ଘ ୫ ଘଣ୍ଟାର ଅପରେସନ ପରେ ମଧ୍ୟ ସୁମିତେନ୍ଦ୍ରର ପତ୍ତା ମିଳୁନି । ଫଳରେ ଫେରିଛନ୍ତି ଅଗ୍ନିଶମ ବାହିନୀ । ଉଦ୍ଧାର କାର୍ଯ୍ୟରେ ସାମିଲ ହୋଇଥିଲେ ସ୍କୁବା ଡାଇଭର । ଆସନ୍ତାକାଲି ସକାଳୁ ପୁଣି ଉଦ୍ଧାର କାର୍ଯ୍ୟ ଆରମ୍ଭ ହେବ ।
ଫିଲିପାଇନ୍ସରେ ବଡ଼ ଧରଣର ଦୁର୍ଘଟଣା, ବୁଡ଼ିଗଲା ୨୫୦ ଲୋକଙ୍କୁ ନେଇ ଯାଉଥିବା ବୋଟ୍
ନୂଆଦିଲ୍ଲୀ: ଫିଲିପାଇନ୍ସରେ ଏକ ବଡ଼ ଧରଣର ଦୁର୍ଘଟଣା ଘଟିଛି । ୨୫୦ ଲୋକଙ୍କୁ ନେଇ ଯାଉଥିବା ଏକ ବୋଟ୍ ବୁଡ଼ିଯାଇଛି । ଜାହାଜରେ ନିଆଁ ଲାଗିବା କାରଣରୁ ଏହା ବୁଡ଼ିଯାଇଥିବା ଜଣାପଡ଼ିଛି । ଏଥିରେ ୩୧ ଜଣଙ୍କର ମୃତ୍ୟୁ ହୋଇଥିବା ବିଭିନ୍ନ ଅନ୍ତର୍ଜାତୀୟ ଗଣମାଧ୍ୟମ ରିପୋର୍ଟ କରିଛନ୍ତି । ଏଯାଏଁ ୨୦୦ରୁ ଅଧିକ ଲୋକଙ୍କୁ ଉଦ୍ଧାର କରାଯାଇଥିବା ବେଳେ ୭ ଜଣ ଲୋକ ନିଖୋଜ ଅଛନ୍ତି ।ଦକ୍ଷିଣ ଫିଲିପାଇନ୍ସରେ ଘଟିଛି ଏହି ଘଟଣା । ବେଲିଲନର ଦକ୍ଷିଣ ଦୀପର ଗଭର୍ଣ୍ଣର ଜିମ୍ ହାଟାମନ୍ କହିଛନ୍ତି ଘଟଣାର ତଦନ୍ତ ନିର୍ଦ୍ଦେଶ ଦିଆଯାଇଛି । ୧୮ ଲୋକଙ୍କର ଶବ ଉଦ୍ଧାର କରାଯାଇଛି ।
ରାମନବମୀ ଶୋଭାଯାତ୍ରା ବେଳେ ପଶ୍ଚିମବଙ୍ଗରେ ଉତ୍ତେଜନା
କୋଲକାତା: ପବିତ୍ର ରାମନବମୀ ଶୋଭାଯାତ୍ରା ବେଳେ ପଶ୍ଚିମବଙ୍ଗରେ ଉତ୍ତେଜନା । ଶୋଭାଯାତ୍ରା ଉପରକୁ ପଥର ଓ ଇଟା ଫୋପାଡିଛନ୍ତି ଦୁର୍ବୃତ୍ତ । ଏଥିସହ ଅନେକ ଗାଡିରେ ନିଆଁ ଲଗାଇ ଦେଇଛନ୍ତି ଦୁର୍ବୃତ୍ତ । ପଶ୍ଚିମବଙ୍ଗ ହାୱଡା ଜିଲ୍ଲା ଶିବପୁର ଅଞ୍ଚଳରେ ଘଟିଛି ଏଭଳି ଘଟଣା । ସୂଚନା ଅନୁସାରେ, ଆଜି ରାମନବମୀରେ ଶୋଭାଯାତ୍ରା ଯାଉଥିବା ବେଳେ, କିଛି ଦୁର୍ବୃତ୍ତ ଶୋଭାଯାତ୍ରାକୁ ଲକ୍ଷ୍ୟ କରି ପଥର ମାଡ଼ କରିଥିଲେ । ଯାହାକୁ ନେଇ ଉତ୍ତେଜନା ପ୍ରକାଶ ପାଇଛି । ଘଟଣାସ୍ଥଳରେ ପୋଲିସ ଓ ରାପିଡ୍ ଆକ୍ସନ ଫୋର୍ସ ମୁତୟନ ହୋଇଛନ୍ତି । ସ୍ଥିତିକୁ ନଜରରେ ରଖି ସ୍ଥାନୀୟ ଅଞ୍ଚଳରେ ୧୪୪ ଧାରା ଜାରି କରାଯାଇଛି ।
ଦହିକୁ ନେଇ ଦକ୍ଷିଣରେ ଖଟା ହୋଇଛି ରାଜନୀତି, ହିନ୍ଦୀରେ ଦହି ଲେଖିବା ନିର୍ଦ୍ଦେଶକୁ ଜୋରଦାର ବିରୋଧ
ଚେନ୍ନାଇ: ଦହିକୁ ନେଇ ଦକ୍ଷିଣରେ ଖଟା ହୋଇଛି ରାଜନୀତି । ଦହି ପ୍ୟାକେଟ ଉପରେ ହିନ୍ଦୀରେ ଦହି ଲେଖିବାକୁ ଖାଦ୍ୟ ସୁରକ୍ଷା ଓ ମାନକ ପ୍ରାଧିକରଣ ପକ୍ଷରୁ ନିର୍ଦ୍ଦେଶକୁ ତାମିଲନାଡୁରେ ଜୋରଦାର ବିରୋଧ କରାଯାଇଛି । ଦକ୍ଷିଣ ଭାରତୀୟ ରାଜ୍ୟରେ ଜବରଦସ୍ତି ହିନ୍ଦୀ ଭାଷାର ବ୍ୟବହାରକୁ ଲଦି ଦିଆଯାଉଛି ବୋଲି କହିବା ସହ FSSAIର ଏଭଳି ପଦକ୍ଷେପକୁ ନିନ୍ଦା କରିଛନ୍ତି ମୁଖ୍ୟମନ୍ତ୍ରୀ ଏମ କେ ଷ୍ଟାଲିନ । ଏହା ସହ ରାଜ୍ୟ ଉପରେ ଜୋର କରି ହିନ୍ଦୀ ଭାଷାର ବ୍ୟବହାର ପାଇଁ ଚାପ ପକାଇବା ପଛରେ ଥିବା ଲୋକମାନଙ୍କୁ ଦକ୍ଷିଣ ଭାରତରୁ ବାହାର କରିଦେବା ଆବଶ୍ୟକ ବୋଲି ଷ୍ଟାଲିନ କହିଛନ୍ତି ।
ସେପଟେ ରାଜ୍ୟ ବିଜେପି ମଧ୍ୟ କେନ୍ଦ୍ରର ଏହି ନିଷ୍ପତ୍ତିକୁ ବିରୋଧ କରିଛି । ଏହାସହ ରାଜ୍ୟ ସରକାରଙ୍କୁ ଜାରି ହୋଇଥିବା ଅଧିସୂଚନା ଫେରାଇ ନେବାକୁ ରାଜ୍ୟ ବିଜେପି ମୁଖ୍ୟ ଦାବି କରିଛନ୍ତି । ହିନ୍ଦୀ ଶବ୍ଦ ଦହି ବଦଳରେ ତାମିଲ ଶବ୍ଦ ନାୟୀର ବ୍ୟବହାର କରାଯିବ ବୋଲି କହିଛି ତାମିଲନାଡୁ ଦୁଗ୍ଧ ଉତ୍ପାଦନ ସଂଘ । ଏନେଇ FSSAIକୁ ସୂଚିତ କରିଦିଆଯାଇଛି । ତାମିଲନାଡ଼ୁରେ ହିନ୍ଦୀ ଭାଷାର ଥୋପକୁ ବିରୋଧ କରି ସୋସିଆଲ ମିଡିଆରେ ଟ୍ରେଣ୍ଡ କରୁଛି ଦହି-ନହି-ପୋଡ଼ା ହାସଟ୍ୟାଗ । ଦକ୍ଷିଣ ଭାରତୀୟ ରାଜ୍ୟଗୁଡ଼ିକ ଆଞ୍ଚଳିକ ଭାଷାକୁ ନେଇ ଆରମ୍ଭରୁ ବେଶ୍ ସମ୍ବେଦଳଶୀଳ । ଏବେ ହିନ୍ଦୀ ଭାଷା ପ୍ରୟୋଗ ନେଇ କେନ୍ଦ୍ର ଚାପ ପକାଇବାରୁ ତାମିଲନାଡୁ ସରକାର ସିଧାସିଧା ଏହାର ବିରୋଧ କରିଛନ୍ତି ।
ଜଙ୍ଗଲ ଓ ଜନ୍ତୁ ସୁରକ୍ଷାରେ ବି ଅବହେଳା, ଯୋଜନା ଲାଗୁ କରି କେନ୍ଦ୍ର ଦେଉନି ଅନୁଦାନ
ଭୁବନେଶ୍ୱର: କେନ୍ଦ୍ର କାଟୁଛି । ରାଜ୍ୟ ବଢାଉଛି । ବନ୍ୟଜନ୍ତୁ ସୁରକ୍ଷା ଉଭୟ କେନ୍ଦ୍ର ଓ ରାଜ୍ୟର ଦାୟିତ୍ବ । ହେଲେ ଓଡ଼ିଶା ପାଇଁ କେନ୍ଦ୍ର ନିଜର ଏହି ଦାୟିତ୍ବ ଯେପରି ଭୁଲିଯାଇଛି । ହାତୀ ସଂରକ୍ଷଣ ନେଇ ଲାଗୁ ହୋଇଛି କେନ୍ଦ୍ର ପ୍ରବର୍ତ୍ତିତ ଯୋଜନା । ହାତୀ ପ୍ରକଳ୍ପ ବାବଦ କେନ୍ଦ୍ର ପ୍ରବର୍ତ୍ତିତ ଯୋଜନା ବାବଦରେ ଗତ ଦୁଇବର୍ଷରେ କେନ୍ଦ୍ର କାଟିଚାଲିଛି ୫୨.୪୯ ପ୍ରତିଶତ ଅର୍ଥ । ୨୦୨୧-୨୨ରେ ଏ ବାବଦରେ ପ୍ରସ୍ତାବିତ ୧୫ କୋଟିରୁ ଅନୁମୋଦନ କଲେ ୧୨ କୋଟି । ଦେଲାବେଳକୁ ଦେଇଛନ୍ତି ୯ କୋଟି । ୨୦୨୨-୨୩ ଆର୍ଥିକ ବର୍ଷ ପାଇଁ ପ୍ରସ୍ତାବିତ ୧୨ କୋଟିରୁ ଅନୁମୋଦନ ହେଲା ୫ କୋଟି ୯୮ ଲକ୍ଷ । କିନ୍ତୁ ଦେଲାବେଳକୁ ଦେଲା ୪ କୋଟି ୪୯ ଲକ୍ଷ ଟଙ୍କା । ସେହିପରି ବ୍ୟାଘ୍ର ପ୍ରକଳ୍ପ ବାବଦରେ ବି ଚଳିତ ଆର୍ଥିକ ବର୍ଷ ଓ ଗତବର୍ଷ ମିଶାଇ କାଟିଲେଣି ୨୭ ପ୍ରତିଶତ ଅର୍ଥ । ସବୁଠୁ ଗୁରୁତ୍ବପୂର୍ଣ୍ଣ କଥା ହେଉଛି ୨୦୦୮ ମସିହାରୁ ଶିମିଳିପାଳ ଜୈବମଣ୍ଡଳ ୟୁନେସ୍କୋ ଦ୍ବାରା ବିଶ୍ବ ଐତିହ୍ୟର ମାନ୍ୟତା ପାଇଛି । ବିଶ୍ବ ଐତିହ୍ୟର ରକ୍ଷଣାବେକ୍ଷଣ ଓ ଭିତ୍ତିଭୂମି ବିକାଶ ବାବଦ ଅନୁଦାନ ଦେବା କେନ୍ଦ୍ରର ଦାୟିତ୍ବ । ୨୦୨୧-୨୨ ଓ ୨୦୨୨-୨୩ ବର୍ଷରେ ଶିମିଳିପାଳ ଅଭୟାରଣ୍ୟ ବାବଦରେ କେନ୍ଦ୍ର ଟଙ୍କାଟିଏ ଦେଇନି । ଖାଲି ସେତିକି ନୁହେଁ, ନନ୍ଦନକାନନ ଭଳି ପ୍ରାଣୀ ଉଦ୍ୟାନ ବିକାଶ ବାବଦରେ ଚଳିତ ଆର୍ଥିକ ବର୍ଷ ଓ ଗତ ଆର୍ଥିକ ବର୍ଷରେ କେନ୍ଦ୍ରୀୟ ପାଣ୍ଠି ଶୂନ ।
କେନ୍ଦ୍ରର ଏପରି ଚରମ ଅବହେଳାକୁ ନିନ୍ଦା କରିଛନ୍ତି ପୂର୍ବତନ ଜଙ୍ଗଲ ଅଧିକାରୀ । ୨୦୨୧-୨୨ ଓ ୨୦୨୨-୨୩ ଆର୍ଥିକ ବର୍ଷରେ କେନ୍ଦ୍ର ପ୍ରବର୍ତ୍ତିତ ଯୋଜନା ବାବଦରେ କେନ୍ଦ୍ର ସରକାର ରାଜ୍ୟକୁ ୩୦.୪୫ ଅର୍ଥ କାଟିଥିବାବେଳେ ରାଜ୍ୟ ସରକାର ନିଜସ୍ବ ପାଣ୍ଠିରୁ ବନ୍ୟଜନ୍ତୁ ସୁରକ୍ଷା ଓ ଜଙ୍ଗଲ ସଂରକ୍ଷଣ ବାବଦରେ ୩୨.୭୧ ପ୍ରତିଶତ ଅର୍ଥ ବୃଦ୍ଧି କରିଛନ୍ତି । ଯାହାକି ଅତ୍ୟନ୍ତ ପ୍ରଶଂସନୀୟ । କେନ୍ଦ୍ର ସରକାର ପାଣ୍ଠି ପ୍ରଦାନରେ ଅବହେଳା କରି ରାଜ୍ୟ ମୁଣ୍ଡକୁ ଦାୟିତ୍ବ ଖସାଇବାକୁ ଚାଲିଛନ୍ତି । ଦୁଇବର୍ଷ ତଳେ ଏକ କମିଟି ହାତୀ ପ୍ରକଳ୍ପ ବଦଳରେ ଜାତୀୟ ହସ୍ତୀ ସଂରକ୍ଷଣ ପ୍ରାଧିକରଣ ଗଠନ ନେଇ କେନ୍ଦ୍ର ସରକାରଙ୍କୁ ସୁପାରିସ କରିଥିଲେ । କିନ୍ତୁ ତାହା ଏ ଯାଏ କାର୍ଯ୍ୟକାରୀ ହୋଇନି । ଯେ ପର୍ଯ୍ୟନ୍ତ ପ୍ରାଧିକରଣ କାର୍ଯ୍ୟକାରୀ ହୋଇନି, ସେ ପର୍ଯ୍ୟନ୍ତ ହାତୀ ପ୍ରକଳ୍ପ ବାବଦ ରାଜ୍ୟକୁ ଟଙ୍କା ଦେବା ଦରକାର । ଏଥିରେ ଅବହେଳା କଲେ ହାତୀ ସଂରକ୍ଷଣ ନେଇ ଓଡ଼ିଶା ସରକାରଙ୍କ ଉପରେ ଆର୍ଥିକ ଚାପ ରହିବ । କେନ୍ଦ୍ର ଏପରି କରି ନିଜ ଦାୟିତ୍ବ ରାଜ୍ୟକୁ ଠେଲିଦେବାକୁ ବସିଛି ।
ଜଙ୍ଗଲ ଓ ପରିବେଶ ସନ୍ତୁଳନ ପାଇଁ ଯେତିକି ରାଜ୍ୟର ଦାୟିତ୍ବ ସେତିକି ଦାୟିତ୍ବ କେନ୍ଦ୍ର ସରକାରଙ୍କର ମଧ୍ୟ । ଜଙ୍ଗଲରେ ନିଆଁ ଲାଗିଲା ବୋଲି ଏଠି ବିରୋଧୀ ପାଟିତୁଣ୍ଡ କରୁଛନ୍ତି । କିନ୍ତୁ ଜଙ୍ଗଲ ନିଆଁ ବାବଦରେ କେନ୍ଦ୍ରୀୟ ପାଣ୍ଠି ଦେବାରେ ବି ଓଡ଼ିଶା ଅବହେଳାର ଶିକାର ହେଉଛି । ଯେଉଁଠି ପାଣ୍ଠିର ଆବଶ୍ୟକ ରହିଛି ସେଠି ପାଣ୍ଠି ଦେଉନି କେନ୍ଦ୍ର । ଯଦି ଦେଉଛି ତାହେଲେ ଆର୍ଥିକ ବର୍ଷ ଶେଷବେଳକୁ । ଯେପରି ରାଜ୍ୟ ଖର୍ଚ୍ଚ କରିବାକୁ ସମୟ ପାଇବନି । ଆଉ ରାଜ୍ୟ ବିନିଯୋଗ ପ୍ରମାଣପତ୍ର ଦେଇ ନ ପାରିଲେ ବଦନାମ କରିହେବ । କେନ୍ଦ୍ରର ଏଭଳି ଚାଲାକି ଏବେ ଦାଣ୍ଡରେ ପଡ଼ି ହାଟରେ ଗଡ଼ିଲାଣି ।
ମିଲେଟ୍ ମିଶନର ସଫଳତା ପରେ ନୂଆ ମିଶନ, ଦେଶ ବିଦେଶରେ ନୂଆ ପରିଚୟ ପାଇବ ଓଡ଼ିଶା ମସଲା
ଭୁବନେଶ୍ୱର: ପ୍ୟାରିସ୍, ଲଣ୍ଡନ, ସିଙ୍ଗାପୁରରେ ଓଡ଼ିଶାର ମା’ମାନେ ପୁଣି ନୂଆ ପରିଚୟ ପାଇବେ । ମିଲେଟ୍ ମିଶନର ସଫଳତା ପରେ ରାଜ୍ୟ ସରକାର ମସଲା ମିଶନ ଆରମ୍ଭ କରିଛନ୍ତି । ମସଲା ମିଶନ ପାଇଁ ଗତ ବର୍ଷ ୮୫ କୋଟି ଟଙ୍କା ବ୍ୟବସ୍ଥା କରାଯାଇଥିଲା । ଏଥର ୧୮୫ କୋଟିର ବ୍ୟବସ୍ଥା କରାଯାଇଛି । ଉଦ୍ଦେଶ୍ୟ ଫସଲ କ୍ଷେତ୍ରରେ ଉତ୍ପାଦନ ବୃଦ୍ଧି ସହ କୃଷକଙ୍କ ଆୟ ବୃଦ୍ଧି । କନ୍ଧମାଳର ହଳଦୀ ହେଉ କି ବୌଦ୍ଧର ଅଦା, ଏସବୁର ରାଜ୍ୟ ତଥା ଦେଶ ବାହାରେ ସ୍ବତନ୍ତ୍ର ଚାହିଦା ରହିଛି । ମସଲା ମିଶନକୁ ସଫଳ ରୂପ ଦେବା ସହ ଧାନ, କପା, ମୁଗ, ବିରି, ମାଣ୍ଡିଆ ଉତ୍ପାଦନ ବୃଦ୍ଧି ଉପରେ ସରକାର ଗୁରୁତ୍ବ ଦେଇଛନ୍ତି । ଏହି ମିଶନରେ ମିଶନ ଶକ୍ତି ମା’ମାନଙ୍କୁ ପ୍ରତ୍ୟକ୍ଷ ଏବଂ ପରୋକ୍ଷ ଭାବେ ସାମିଲ କରାଯିବ । ସରକାରଙ୍କ ଏହି ପ୍ରୟାସକୁ ମସଲା ଉଦ୍ୟୋଗୀ ସ୍ବାଗତ କରିଛନ୍ତି ।
ମିଶନ ଶକ୍ତିର ମା’ମାନେ ଏବେ ଦେଶ ବାହାରେ ମାଣ୍ଡିଆରୁ ପ୍ରସ୍ତୁତ ଦ୍ରବ୍ୟ ନେଇ ଖୁବ୍ ପରିଚୟ ପାଇଲେଣି । ଏବେ ମସଲା ମିଶନ ଆଉ ଏକ ନୂଆ ପରିଚୟ ଦେବ । ଗାଁ ଗାଁରେ ଲଘୁ ମସଲା ଉଦ୍ୟୋଗୀଙ୍କ ଭୂମିକା ନେବାକୁ ଯାଉଛନ୍ତି ମହିଳା ସ୍ବୟଂ ସହାୟକ ଗୋଷ୍ଠୀ । ବଡ଼ ବଡ଼ ଫ୍ୟାକ୍ଟ୍ରିରେ ମସଲା ପାଇଁ ବ୍ୟବହୃତ କଞ୍ଚାମାଲକୁ ପ୍ରସେସ୍ କରି ଦେବାର ସୁଯୋଗ ମିଳିବ । ବିନା ସୁଧରେ ୫ ଲକ୍ଷ ଟଙ୍କା ପର୍ଯ୍ୟନ୍ତ ଋଣ ବ୍ୟବସ୍ଥା ମିଶନ ଶକ୍ତି ମା’ମାନଙ୍କୁ ଅଧିକ ବଳ ଦେଇଛି । ବିଧାନସଭାରେ ବିଜେଡି ବିଧାୟକ ସୌମ୍ୟରଞ୍ଜନ ପଟ୍ଟନାୟକଙ୍କ ପ୍ରଶ୍ନର ଉତ୍ତରରେ କୃଷିମନ୍ତ୍ରୀ ରଣେନ୍ଦ୍ର ପ୍ରତାପ ସ୍ବାଇଁ ମସଲା ମିଶନ ନେଇ ସୂଚନା ଦେଇଛନ୍ତି । ମିଶନ ଶକ୍ତି ସଂଘ ପକ୍ଷରୁ ଏହାକୁ ସ୍ବାଗତ କରାଯାଇଛି ।
ଏଥର ୩୦ ଜିଲ୍ଲାର ୧୭୭ଟି ବ୍ଲକକୁ ମିଲେଟ୍ ମିଶନର ସମ୍ପ୍ରସାରଣ ସାଙ୍ଗକୁ ୯ଟି ଜିଲ୍ଲାର ୫୦ଟି ବ୍ଲକରେ ପଣସ ମିଶନ ଆରମ୍ଭ ହେଉଛି । ଏହା ସହ ଫୁଲ ମିଶନ, ଛତୁ ମିଶନ ବି କାର୍ଯ୍ୟକାରୀ ହେଉଛି । ଏବେ ମସଲା ମିଶନ, ମିଶନ ଶକ୍ତିକୁ ନୂଆ ପରିଚୟ ଦେବା ସହ ଓଡ଼ିଶାର ବ୍ରାଣ୍ଡ ଭାଲ୍ୟୁ ମଧ୍ୟ ଦେଶ ବାହାରେ ବଢ଼ିବ ।
ଇନ୍ଦୋରରେ ରାମନବମୀରେ ବଡ଼ ଅଘଟଣ, କୂଅରେ ଖସି ୧୩ ଶ୍ରଦ୍ଧାଳୁ ମୃତ
ଇନ୍ଦୋର: ରାମନବମୀରେ ବଡ଼ ଅଘଟଣ । ମଧ୍ୟପ୍ରଦେଶ ଇନ୍ଦୋରରେ ପୂଜାର୍ଚ୍ଚନା ବେଳେ ଛାତ ଧସିଯାଇ ୧୩ ଜଣ ଶ୍ରଦ୍ଧାଳୁଙ୍କର ମୃତ୍ୟୁ ହୋଇଛି । ଇନ୍ଦୋରର ଶ୍ରୀ ବେଲେଶ୍ବର ମହାଦେବ ଝୁଲେଲାଲ ମନ୍ଦିର ପ୍ରାଙ୍ଗଣରେ ଥିବା ଏକ କୂଅର ଛାତ ଭୁଶୁଡ଼ି ପଡ଼ିବାରୁ ପ୍ରାୟ ୩୦ ଜଣ ଭକ୍ତ କୂଅ ମଧ୍ୟକୁ ଖସି ପଡ଼ିଥିଲେ । ୫୦ରୁ ୬୦ ଫୁଟ ତଳେ ଫସି ରହିଥିବା ୧୯ ଶ୍ରଦ୍ଧାଳୁଙ୍କୁ ସୁରକ୍ଷିତ ଉଦ୍ଧାର କରାଯାଇଥିବା ବେଳେ ୧୩ ଜଣଙ୍କର ମୃତ୍ୟୁ ହୋଇଛି । ଭିଡ଼ ବଢ଼ିବାରୁ ଛାତ ଗଳିପଡ଼ିଥିବା ଆଶଙ୍କା କରାଯାଉଛି । ମୃତକଙ୍କ ପରିବାର ପାଇଁ ୫ଲକ୍ଷ ଲେଖାଏଁ ଆର୍ଥିକ ସହାୟତା ଘୋଷଣା କରାଯାଇଛି । ଏହାସହ ଆହତଙ୍କ ପରିବାରକୁ ୫୦ ହଜାର ଲେଖାଏଁ ସହାୟତା ଘୋଷଣା କରିଛନ୍ତି ମଧ୍ୟପ୍ରଦେଶ ସରକାର । ସେପଟେ ଅଘଟଣର ମାଜିଷ୍ଟ୍ରେଟସ୍ତରୀୟ ତଦନ୍ତ ପାଇଁ ନିର୍ଦ୍ଦେଶ ଦିଆଯାଇଛି ।
ବ୍ୟାପକ ହେବ ରାଜଧାନୀ ଟ୍ରାଫିକ ପରିଚାଳନା, ଡିଜିଟାଲ ଓ୍ବାଲ୍ ନଜରରେ ରହିବେ ଅମାନିଆ
ଭୁବନେଶ୍ୱର: ରଙ୍ଗିଲା ରୋଡ୍ ରୋମିଓ ସାବଧାନ ! ସ୍ମାର୍ଟସିଟି ଡିଜିଟାଲ ଓ୍ବାଲ ନଜରରେ ଖିଲାପକାରୀ । ଅପଗ୍ରେଡ କ୍ୟାମେରା ନଜରରେ ରହିବ ୧୧ଟି ଥାନା । ପାତ୍ରପଡ଼ାଠାରେ ନୂଆ ଥାନା ଉଦଘାଟନ୍ କଲେ ଡିଜିପି । ୧୬ ନମ୍ବର ଜାତୀୟ ରାଜପଥ ଜଟଣୀ ଠାରୁ ନନ୍ଦନକାନନ ପର୍ଯ୍ୟନ୍ତ ୨୭ଟି ଟ୍ରାଫିକ ପୋଷ୍ଟ ରହିଛି । ୧୧ଟି ଥାନା ପରିବ୍ୟାପ୍ତ ଏହି ଏରିଆରେ ଟ୍ରାଫିକ କଣ୍ଟ୍ରୋଲ ପାଇଁ ପାତ୍ରପଡା ଠାରେ ପୋଲିସ ଡିଜିପି ସୁନୀଲ ବଂଶଲଙ୍କ ଦ୍ୱାରା ଉଦଘାଟିତ ହୋଇଛି ନୂଆ ଟ୍ରାଫିକ ଥାନା । ୧ କୋଟି ୬୪ ଲକ୍ଷ ଟଙ୍କା ବ୍ୟୟରେ ପୋଲିସ ଗୃହ ନିର୍ମାଣ ଓ କଲ୍ୟାଣ ନିଗମ ପକ୍ଷରୁ ଏହାର କାମ ହୋଇଛି । ଦ୍ଵିତୀୟ ଟ୍ରାଫିକ ଥାନାରେ ଜଣେ ଇନ୍ସପେକ୍ଟରଙ୍କ ସହ ୬ ଏସଆଇ, ୧୦ ଏଏସଆଇ ଓ ୧୪୦ କନଷ୍ଟେବଳ ପଦ ରହିଛି । ଏହି ଉଦଘାଟନ କାର୍ଯ୍ୟକ୍ରମରେ କମିଶନର ସୌମେନ୍ଦ୍ର ପ୍ରିୟଦର୍ଶୀ, ଓପିଏଚଡବ୍ଲୁସି ପରିଚାଳନା ନିର୍ଦ୍ଦେଶକ ସଞ୍ଜୀବ ପଣ୍ଡା, ଡିସିପି ପ୍ରତୀକ ସିଂ, ଟ୍ରାଫିକ ଡିସିପି ଓ ଏସିପି ପ୍ରମୁଖ ଉପସ୍ଥିତ ଥିଲେ ।
ସ୍ମାର୍ଟସିଟି ଡିଜିଟାଲ ଓ୍ବାଲ ଏହି ନୂଆ ଥାନାରୁ କଣ୍ଟ୍ରୋଲ ହେବ । ଦୁର୍ଘଟଣା, ବେଆଇନ ପାର୍କିଂ, ଓଭର ସ୍ପିଡ୍, ଡ୍ରଙ୍କ୍ ଆଣ୍ଡ ଡ୍ରାଇଭ୍, ଇନସ୍ୟୁରାନ୍ସ, ଡ୍ରାଇଭିଂ ଲାଇସେନ୍ସ, ପଲ୍ୟୁସନ, ଓଭର ଲୋଡିଂ ଆଦି ଏହି ଡିଜିଟାଲ ଓ୍ବାଲର ସ୍କାନରରେ ରହିବ। ଦୁର୍ଘଟଣା ରୋକିବା ପାଇଁ ସୁପ୍ରିମକୋର୍ଟ କମିଟି NHରେ ଥିବା ବ୍ଲାକସ୍ପଟ ପରିଦର୍ଶନ କରିଥିଲା । ଏହାପରେ ରାଜ୍ୟରେ ଉଭୟ ପୋଲିସ ଓ ପରିବହନ ବିଭାଗ ପକ୍ଷରୁ ଏନଫୋର୍ସମେଣ୍ଟକୁ ବ୍ୟାପକ କରାଯାଇଥିଲା । ନୂଆ କନଷ୍ଟେବଳଙ୍କ ନିଯୁକ୍ତି ପରେ ଟ୍ରାଫିକ ପରିଚାଳନା ଆହୁରି ବ୍ୟାପକ ହେବ ବୋଲି କହିଛନ୍ତି କମିଶନର । ଖିଲାପକାରୀଙ୍କ ବିରୋଧରେ ଜିରୋ ଟଲରାନ୍ସ ନୀତି ଅବଲମ୍ବନ କରିବାକୁ ଯାଇ ପ୍ରତିଦିନ ଚାଲାଣ କଟୁଛି, ଡିଏଲ ବି ରଦ୍ଦ ହେଉଛି। ତଥାପି ନଚେତିବାରୁ ପାଣିଫୋଟକା ଭଳି ଚାଲିଯାଉଛି ଜୀବନ ।
ଏଆଇ ରିସର୍ଚ୍ଚ ବନ୍ଦ କରିବାକୁ ଦାବି କଲେ ଏଲନ ମସ୍କ ଓ ଆପଲ ସହ ପ୍ରତିଷ୍ଠାତା
ନୂଆଦିଲ୍ଲୀ: ଆସିବ କି ଆର୍ଟିଫିସିଆଲ ଇଣ୍ଟେଲିଜେନସର ଯୁଗ ? ସାରା ବିଶ୍ବରେ ବର୍ତ୍ତମାନ ଏହାର ଉନ୍ନତିକରଣ ଚାଲିଥିବାବେଳେ ଭବିଷ୍ୟତରେ ଏହାର ବ୍ୟବହାରକୁ ନେଇ ସୃଷ୍ଟି ହୋଇଛି ଆଶଙ୍କା । ଯଦି ବାସ୍ତବରେ ଆର୍ଟିଫିସିଆଲ ଇଣ୍ଟେଲିଜେନସ କାର୍ଯ୍ୟକାରୀ ହୁଏ ତେବେ ୩୦୦ ନିୟୁତ ଚାକିରି ବିପନ୍ନ ହେବା ଆଶଙ୍କା ସୃଷ୍ଟି ହୋଇଛି । ସେପଟେ ଇନଭେଷ୍ଟମେଣ୍ଟ ବ୍ୟାଙ୍କ ଗୋଲଡମ୍ୟାନ ସାକ୍ସ ପକ୍ଷରୁ କୁହାଯାଇଛି- ଆର୍ଟିଫିସିଆଲ ଇଣ୍ଟେଲିଜେନସ ଯୋଗୁ ନିଯୁକ୍ତି ବୃଦ୍ଧି ପାଇବ ଓ ପ୍ରଡକ୍ଟିଭିଟି ବଢିବ ।
ଆର୍ଟିଫିସିଆଲ ଇଣ୍ଟେଲିଜେନସ ମାନବ ଜାତି ଲାଗି ବିପଦ ସୃଷ୍ଟି କରିବ ବୋଲି କେତେକ ମହଲ ଆଶଙ୍କା ବ୍ୟକ୍ତ କରିଛନ୍ତି । ତୁରନ୍ତ ଏହାକୁ ବନ୍ଦ କରିବା ଲାଗି ଦାବି କରାଯାଇଛି । ଆର୍ଟିଫିସିଆଲ ଇଣ୍ଟେଲିଜେନସ କ୍ରମଶଃ ନିୟନ୍ତ୍ରଣ ବାହାରକୁ ଚାଲିଯିବ ବୋଲି ସେମାନେ ଏକ ଖୋଲା ପତ୍ରରେ ଦର୍ଶାଇଛନ୍ତି । ଏହି ଧରଣର ପ୍ରଶିକ୍ଷଣ ଅତି କମରେ ୬ ମାସ ବନ୍ଦ କରିବା ଲାଗି ଦାବି କରିଛନ୍ତି ଟୁଇଟର ମୁଖ୍ୟ ଏଲନ ମସ୍କ ଓ ଆପଲ୍ ସହପ୍ରତିଷ୍ଠାତା ଷ୍ଟିଭ ଓ୍ବଜନାକଙ୍କ ସମେତ ବହୁ ବ୍ୟକ୍ତି । ଡିପ ମାଇଣ୍ଡର କେତେକ ଗବେଷକ ମଧ୍ୟ ସମାନ ସ୍ବର ଉତ୍ତୋଳନ କରିଛନ୍ତି । ଚାଟଜିପିଟି ଅନ୍ତର୍ଗତ ଓପନଅଲ ନାମକ ଏକ କମ୍ପାନି ଏକ ସ୍ବଦେଶୀ କାରିଗରh ବାହାର କରିଛି ଯାହାକି ବିଭିନ୍ନ ଇମେଜରେ ଥିବା ବସ୍ତୁ ସମ୍ପର୍କିତ ପ୍ରଶ୍ନ ଦେବାରେ ସକ୍ଷମ ହେଉଛି ।
ଅପରାଧ ମୁକ୍ତ ହେବ କଟକ ସହରର ବସ୍ତି, କଟକରେ ଆରମ୍ଭ ହେଲା ବସ୍ତିକୁ ଚାଲ ଅଭିଯାନ
କଟକ: ଅପରାଧ ମୁକ୍ତ ହେବ କଟକ ସହରର ବସ୍ତି । ଭୁବନେଶ୍ବର ପରେ କଟକରେ ଆରମ୍ଭ ହେଲା ବସ୍ତିକୁ ଚାଲ ଅଭିଯାନ। ନୂଆପଡ଼ା ବାଲିସାହି ବସ୍ତିରେ ପୋଲିସ କମିଶନର, ଅତିରିକ୍ତ ପୋଲିସ କମିଶନର, ଡିସିପିଙ୍କ ସମେତ ସବୁ ଜୋନର ଏସିପି ଓ ସବୁ ଥାନା ଅଧିକାରୀଙ୍କ ଉପସ୍ଥିତିରେ ଅଭିଯାନ ଆରମ୍ଭ ହୋଇଛି । ଏହି ଅବସରରେ ବସ୍ତିବାସିନ୍ଦାଙ୍କ ଦ୍ବାରା ପରିବେଷିତ ହୋଇଥିଲା ରଙ୍ଗାରଙ୍ଗ କାର୍ଯ୍ୟକ୍ରମ ।
ଏହି ରଙ୍ଗାରଙ୍ଗ କାର୍ଯ୍ୟକ୍ରମର ଆକର୍ଷଣର କେନ୍ଦ୍ରବିନ୍ଦୁ ପାଲଟିଥିଲେ ବସ୍ତିର ଦୃଷ୍ଟିହୀନ ଯୁବତୀ ଆଶା ବାହାଦୁର ଗୁରୁଙ୍ଗ। ତେବେ ତାଙ୍କ ଗୀତର ଯାଦୁରେ ସମସ୍ତେ ମତୁଆଲା ହୋଇଥିଲେ । ନାଚ ଗୀତରେ ପ୍ରାୟ ଚାରି ଘଣ୍ଟା ବସ୍ତିରେ କାଟିଥିଲେ ପୋଲିସ ଅଧିକାରୀ । ବାଲିସାହି ବସ୍ତିର ପ୍ରାୟ ଦୁଇ ଶହ ଜଣଙ୍କୁ ପୋଲିସ ମିତ୍ର ଭାବେ ଦାୟିତ୍ବ ଦିଆଯାଇଛି । ସେମାନେ ପୋଲିସ ସହ ମିଶି ବସ୍ତି ପାଇଁ କାମ କରିବେ।