ଭୁବନେଶ୍ୱର: ପ୍ରକାଶ ପାଇଲା ୟୁପିଏସସି ସିଭିଲ ସର୍ଭିଲ୍- ୨୦୨୨ ରେଜଲ୍ଟ । ମୋଟ୍ ୯୩୩ ଜଣ କୃତକାର୍ଯ୍ୟ ହୋଇଛନ୍ତି । ସାଧାରଣ ବର୍ଗରେ ୩୪୫ଜଣ ଉତ୍ତୀର୍ଣ୍ଣ ହୋଇଛନ୍ତି । କୃତକାର୍ଯ୍ୟ ହୋଇଥିବା ୯୩୩ ପରୀକ୍ଷାର୍ଥୀଙ୍କ ମଧ୍ୟରୁ ୧୮୦ ଜଣ ଆଇଏଏସ୍, ୩୮ ଜଣ ଆଇଏଫ୍ଏସ୍, ୨୦୦ ଜଣ ଆଇପିଏସ୍ ଏବଂ ବାକି ମାନେ ସେଣ୍ଟ୍ରାଲ ସର୍ଭିସେସ୍ ଗ୍ରୁପ୍ ଏ ଓ ଗ୍ରୁପ୍ ବି ସର୍ଭିସେସ୍ରେ ନିଯୁକ୍ତି ପାଇବେ । ୟୁପିଏସସି ସିଏସଇ-୨୦୨୩ରେ ସାରା ଦେଶରେ ଟପ୍ପର ହୋଇଛନ୍ତି ଇଶିତା କିଶୋର । ଟପ୍ ଫୋରରେ ରହିଛନ୍ତି ୪ ଝିଅ । ଦ୍ବିତୀୟରେ ଗରିମା ଲୋହିଆ, ତୃତୀୟରେ ଏନ୍. ଉମା ହାରଥୀ ଓ ଚତୁର୍ଥରେ ସ୍ମିତି ମିଶ୍ରା । ଚଳିତ ୟୁପିଏସସି ସିଭିଲ ସର୍ଭିସ ପରୀକ୍ଷାରେ ଓଡ଼ିଆଙ୍କୁ ମଧ୍ୟ ସଫଳତା ମିଳିଛି । ଓଡ଼ିଆ ପରୀକ୍ଷାର୍ଥୀ ଚମତ୍କାର ପ୍ରଦର୍ଶନ କରିଛନ୍ତି । ଓଡ଼ିଶାରୁ ଏଥର ୨୬ ଜଣ କୃତକାର୍ଯ୍ୟ ହୋଇଛନ୍ତି ।
୩୩ ନମ୍ବର ରାଙ୍କରେ ଅଛନ୍ତି ଓଡ଼ିଶାର ଥରୁନ ପଟ୍ଟନାୟକ ମାଦଳା । ସେହିପରି ୩୮ ରାଙ୍କ ହାସଲ କରି ରାଜ୍ୟ ପାଇଁ ଗୌରବ ଆଣିଛନ୍ତି ଅନୁପ ଦାସ । ଅନୁପ ଦାସଙ୍କ ଘର ଜଗତସିଂହପୁର ଜିଲ୍ଲାର ନାଉଗାଁ ବ୍ଲକରେ । ଏହା ପୂର୍ବରୁ ସେ ୨୦୧୯ ସିଭିଲ ସର୍ଭିସ ପରୀକ୍ଷାରେ ୧୨୦ ରାଙ୍କ ହାସଲ କରିଥିଲେ । ସେହିପରି ପ୍ରଣିତା ଦାସ ୪୨ ରାଙ୍କ, ଅର୍ଣ୍ଣବ ମିଶ୍ର ୫୬ରାଙ୍କ, ଦୀକ୍ଷିତା ଯୋଶୀ ୫୮ରାଙ୍କ, କୃତିକା ମିଶ୍ର ୬୭ରାଙ୍କ, କସ୍ତୁରୀ ପଣ୍ଡା ୬୭ରାଙ୍କ, ପଲ୍ଲବୀ ମିଶ୍ର ୭୩ରାଙ୍କ ଓ ପ୍ରଶାନ୍ତ ରାଜ ୯୭ ରାଙ୍କ ପାଇଛନ୍ତି । ସେହିପରି ସିଦ୍ଧାର୍ଥ ମିଶ୍ର ୧୦୬ ନମ୍ବର ରାଙ୍କରେ ରହିଥିବା ବେଳେ ସୌମ୍ୟରଞ୍ଜନ ଦାସ ୧୩୬, ସୋନାଲି ମିଶ୍ର ୧୪୦, ଦୁର୍ଗା ପ୍ରସାଦ ଅଧିକାରୀ ୧୬୨, ସୁଶ୍ରୀ ଶୁଭାଙ୍ଗୀ ଖୁଣ୍ଟିଆ ୨୪୮, ସତ୍ୟ ପ୍ରକାଶ ମିଶ୍ର ୨୬୧, ଆୟୁଷୀ ପ୍ରଧାନ ୩୩୪, ଦିବ୍ୟା ଜୈନ ୩୬୩, କୃତିକା ମିଶ୍ର ୪୦୧, ରଶ୍ମୀ ପ୍ରଧାନ ୪୦୫, ତେଜସ୍ୱୀ ବେହେରା ୫୧୬, ପ୍ରଥମା ପ୍ରତୀକ୍ଷା ପ୍ରଧାନ ୬୭୦, ଶୁଭସ୍ନିଗ୍ଧା ସେଠୀ ୬୮୦, ଶୁଭମ ମିଶ୍ର ୬୮୮, ନିବେଦିତା ଦାସ ୮୪୮, ବୀରେନ୍ଦ୍ର କୁମାର ଦାସ ୮୫୪ ଓ ମାନସଜ୍ୟୋତି ଦାସ ୮୮୧ ରାଙ୍କରେ କୃତକାର୍ଯ୍ୟ ହୋଇଛନ୍ତି।
ଏମାନଙ୍କ ସଫଳତା ପରେ ପରିବାର ଏବଂ ଅଞ୍ଚଳରେ ଖୁସିର ମାହୋଲ ଖେଳିଯାଇଛି । କାରଣ ଦେଶର ସର୍ବବୃହତ ପରୀକ୍ଷାରେ ଏମାନେ ଭଲ ପ୍ରଦର୍ଶନ କରି ଅଞ୍ଚଳ ତଥା ରାଜ୍ୟକୁ ଗୌରବ୍ୱାନୀତ କରିଛନ୍ତି । ୪୨ ନମ୍ବର ରାଙ୍କ ପାଇଛନ୍ତି ବାରିପଦାର ପ୍ରଣିତା ଦାସ । କେମ୍ବ୍ରିଜ ବିଶ୍ବବିଦ୍ୟାଳୟରେ ଏମଫିଲ୍ କରୁଛନ୍ତି ପ୍ରଣିତା । ଏହା ପୂର୍ବରୁ କୋଲକାତା ସେଣ୍ଟ ଜାଭିୟର୍ସ ଓ ଲଣ୍ଡନ ବିଶ୍ବବିଦ୍ୟାଳୟରୁ ପଢିଛନ୍ତି । ହିନ୍ଦୁସ୍ତାନୀ ଶାସ୍ତ୍ରୀୟ ସଂଗୀତ ଓ ଓଡ଼ିଶୀ ନୃତ୍ୟରେ ବି ପ୍ରଶିକ୍ଷଣ ନେଇଛନ୍ତି ପ୍ରଣିତା । ୫୧୬ ନଂ ରାଙ୍କ ପାଇଥିବା ତେଜସ୍ୱିନୀ ବେହେରା ଗତ ଓପିଏସସି ଓଏସରେ ଟପ୍ କରିଥିଲେ । UPSCରେ ଉତ୍ତୀର୍ଣ୍ଣ ଓଡ଼ିଆଙ୍କୁ ଶୁଭେଚ୍ଛା ଜଣାଇଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଲୋକଙ୍କ ପାଇଁ ସମର୍ପିତ ହୋଇ କାମ କରିବାକୁ ପରାମର୍ଶ ଦେଇଛନ୍ତି ମୁଖ୍ୟମନ୍ତ୍ରୀ । ଲୋକଙ୍କ ମଙ୍ଗଳ ପାଇଁ ନୂତନ ପଦକ୍ଷେପ ନେବା ସହିତ ତୃଣମୂଳସ୍ତରରେ କାମ କରିବାକୁ ପରାମର୍ଶ ଦେଇଛନ୍ତି ନବୀନ । ଏହା ସହିତ ଉଜ୍ବଳ ଭବିଷ୍ୟତ ପାଇଁ ଶୁଭେଚ୍ଛା ଜଣାଇଛନ୍ତି ମୁଖ୍ୟମନ୍ତ୍ରୀ ।
