ଭୁବନେଶ୍ବର: ଜେଡ୍ ଇଷ୍ଟେଟର ଜେଡ୍ ଓ୍ବାନ ପ୍ରକଳ୍ପରେ ସାଙ୍ଘାତିକ ତ୍ରୁଟି । ସାମ୍ନାକୁ ଆସୁଛି ଗୋଟିଏ ପରେ ଗୋଟିଏ ବେଆଇନ କାରନାମା । ଘର ମାଲିକଙ୍କ ବିନା ସମ୍ମତିରେ ଜେଡ୍ ଇଷ୍ଟେଟର ବାରମ୍ବାର ପ୍ଲାନ ପରିବର୍ତନ ହେଉ କି ବେଆଇନ ଭାବେ ପ୍ରକଳ୍ପ ପରିସରରେ ଥିବା କମନ ଆମେନିଟିଜକୁ ପ୍ରମୋଟର ଏରିଆ କହି କ୍ରେତାଙ୍କୁ ଠକିବା ଯାଏଁ । ସବୁଠି ଜେଡ୍ ଇଷ୍ଟେଟର ଦାଦାଗିରି ଦେଖିବାକୁ ମିଳିଛି । ନିଜ ଅଧିକାର ପାଇବାକୁ ୪୪୦ ଘର ମାଲିକ ଦୀର୍ଘ ୬ ବର୍ଷ ହେଲା ସଂଘର୍ଷ କରୁଛନ୍ତି । ମାନବ ଅଧିକାର କମିଶନଙ୍କ ନିର୍ଦ୍ଦେଶ ପରେ ରେସିଡେଣ୍ଟ ଓ୍ବେଲଫେୟାର ଆସୋସିଏସନ ଗଢା ହୋଇଛି ସତ, ହେଲେ ଅଧିକାର ପାଇଁ ପ୍ରତି ମୁହୂର୍ତ୍ତରେ ଲଢ଼ିବାକୁ ପଡୁଛି । ଅର୍ଥବଳ, ବାହୁବଳ ସାଙ୍ଗକୁ ମିଡିଆ ପାୱାର ଦେଖାଇ ଜେଡ୍ ଇଷ୍ଟେଟ ମାଲିକ ମାନଙ୍କୁ ନାନା ପ୍ରକାର ହଇରାଣ କରୁଥିବାର ଅଭିଯୋଗ ଆସିଛି । ନନ୍ଦିଘୋଷ ଟିଭିରେ ସବୁ ଅଭିଯୋଗ ଓ ବେଆଇନ କାର୍ଯ୍ୟକଳାପର ଦସ୍ତାବିଜ ଲାଗିଛି । EOWରେ ଜେଡ୍ ଇଷ୍ଟେଟ ମାଲିକ ଓ ତାଙ୍କ ପୁଅ ହାଜର ହେବା ପରେ ଘର ମଳିକଙ୍କୁ ନ୍ୟାୟ ମିଳିବାର ଆଶା ବଢିଛି ।
ଅନନ୍ତନାଗରେ ପଞ୍ଚମ ଦିନରେ ଏନକାଉଣ୍ଟର ଜାରି
ଜାମ୍ମୁକାଶ୍ମୀର: ଜାମ୍ମୁକାଶ୍ମୀରର ଅନନ୍ତନାଗରେ ଜାରି ଏନକାଉଣ୍ଟର । ଆତଙ୍କବାଦୀଙ୍କ ପ୍ରତିଶୋଧ ନେଉଛି ଭାରତୀୟ ସେନା । ଶନିବାର ରାତିରେ ଅପରେସନ ବନ୍ଦ ରହିଥିବାବେଳେ ଜଣଙ୍କୁ ଏକକାଉଣ୍ଟର କରାଯାଇଛି । ଏବେ ୨ଜଣ ଆତଙ୍କବାଦୀ ଲୁଚି ରହିଥିବା ଅନୁମାନ କରାଯାଉଥିବାବେଳେ ସର୍ଚ୍ଚ ଅପରେସନ ଜାରି ରହିଛି । ପ୍ରଥମଥର ପାଇଁ ହେରନ ମାର୍କ ୨ ଡ୍ରୋନରୁ ଗ୍ରେନେଡ ବର୍ଷିଛି । ଆତଙ୍କବାଦୀମାନେ ଭୟରେ ଛତ୍ରଭଙ୍ଗ ଦେଇଛନ୍ତି । ସେପଟେ ଆତଙ୍କବାଦୀଙ୍କ ମୃତଦେହକୁ ଉଦ୍ଧାର କରାଯାଇଥିବାବେଳେ ସେମାନଙ୍କ ନିକଟରୁ ପାକିସ୍ତାନୀ ମୁଦ୍ରା ମଧ୍ୟ ମିଳିଛି । ଏପରିକି ଭାରତୀୟ ମୁଦ୍ରା ମଧ୍ୟ ରହିଥିବା ଦେଖିବାକୁ ମିଳିଛି । ଡ୍ରୋନ ଏବଂ ହେଲିକପ୍ଟର ମାଧ୍ୟମରେ ସର୍ଚ୍ଚ ଅପରେସନ ଜାରି ରହିଥିବାବେଳେ ଆହୁରି ଆତଙ୍କବାଦୀ ଲୁଚି ରହିଥିବା ଜଣାପଡ଼ିଛି । ଘଞ୍ଚ ଜଙ୍ଗଲରେ ଆତଙ୍କବାଦୀମାନେ ଗୁମ୍ଫା ମଧ୍ୟରେ ଲୁଚି ରହିଛନ୍ତି ।
ସୌମ୍ୟରଞ୍ଜନ ପଟ୍ଟନାୟକଙ୍କ ନାଁରେ ଇଓଡବ୍ଲୁରେ ମାମଲା ରୁଜୁ
ଭୁବନେଶ୍ବର: ଇଷ୍ଟର୍ଣ୍ଣ ମିଡିଆ ପ୍ରାଇଭେଟ୍ ଲିମିଟେଡ୍ ତଥା ସମ୍ବାଦର ପୂର୍ବତନ କର୍ମଚାରୀଙ୍କ ଅଭିଯୋଗକ୍ରମେ କ୍ରାଇମବ୍ରାଞ୍ଚର ଅର୍ଥନୈତିକ ଅପରାଧ ଶାଖା (ଇଓଡବ୍ଲୁ)ରେ ମାମଲା ରୁଜୁ । ମାମଲାରେ ସମ୍ବାଦର ମୁଖ୍ୟ ସମ୍ପାଦକ ସୌମ୍ୟରଞ୍ଜନ ପଟ୍ଟନାୟକ ଏବଂ ମାନବ ସମ୍ବଳ ବିଭାଗର ମୁଖ୍ୟ ବୈଜୟନ୍ତୀ କରଙ୍କୁ ଅଭିଯୁକ୍ତ କରାଯାଇଛି । ଏମାନଙ୍କ ବିରୋଧରେ ଭାରତୀୟ ଦଣ୍ଡବିଧି ଆଇନର ୫୦୬, ୪୬୭, ୪୬୮, ୪୭୧, ୪୨୦ ଏବଂ ୧୨୦ (ଖ) ଧାରାରେ ମାମଲା ରୁଜୁ ହୋଇଛି । କ୍ରାଇମବ୍ରାଞ୍ଚ ଇଓଡବ୍ଲୁ ଏବେ ଅଭିଯୁକ୍ତଙ୍କୁ ଡାକି ଜେରା କରିବ ବୋଲି ଜଣାପଡିଛି । ସୂଚନାଯୋଗ୍ୟ, ଗତକାଲି ଅପରାହ୍ନରେ ସମ୍ବାଦର ଜଣେ ପୂର୍ବତନ ଜିଲ୍ଲା ପ୍ରତିନିଧି ସୌମ୍ୟରଞ୍ଜନ ପଟ୍ଟନାୟକଙ୍କ ବିରୋଧରେ ଶୋଷଣ, ନିର୍ଯାତନା ଓ ବ୍ୟାଙ୍କ ଘୋଟାଲା ନେଇ ଅଭିଯୋଗ ଆଣିଥିଲେ । ସେହିଭଳି ଇଷ୍ଟର୍ଣ୍ଣ ମିଡିଆର ମାନବ ସମ୍ବଳ ଅଧିକାରୀଙ୍କ ବିରୋଧରେ ଚାକିରିରୁ ବହିଷ୍କାର କରିବା ଧମକ ଭଳି ବିଭିନ୍ନ ଅଭିଯୋଗ କରିଥିଲେ ।
ଅଭିଯୋଗକାରୀଙ୍କ ଅନୁସାରେ, ସୌମ୍ୟଙ୍କ ନିର୍ଦ୍ଦେଶରେ ବିଭିନ୍ନ କର୍ମଚାରୀ ଓ ସାମ୍ବାଦିକଙ୍କ ଫେକ୍ ସାଲାରି ସାର୍ଟିଫିକେଟ୍ ଜରିଆରେ ବିଭିନ୍ନ ବ୍ୟାଙ୍କରୁ ଋଣ ଉଠାଯାଇଥାଏ । ଏହି ଋଣ ଟଙ୍କା ସୌମ୍ୟ ହଡ଼ପ କରିନିଅନ୍ତି । କର୍ମଚାରୀମାନେ ଋଣ କରିବାକୁ ମନାକଲେ ସେମାନଙ୍କୁ ଚାକିରିରୁ ବହିଷ୍କାର କରିବା ଲାଗି ମଧ୍ୟ ଧମକ ଦିଆଯାଇଥାଏ । କର୍ମଚାରୀଙ୍କୁ ଲୋନ୍ ଦେବା ପାଇଁ ଇଷ୍ଟର୍ଣ୍ଣ ମିଡିଆ ମାନବ ସମ୍ବଳ ବିଭାଗର ଅଧିକାରୀ ବୈଜୟନ୍ତୀ କର ବାଧ୍ୟ କରିବା ସହ ଚାକିରି ନେଇଯିବାର ଧମକ ଦେଇଥିବା ଭଳି ସାଂଘାତିକ ଅଭିଯୋଗ ସେ କରିଥିଲେ ।
ଫାଇନାଲରେ ଏହିସବୁ ରେକର୍ଡ କରିବେ ରୋହିତ
କଲମ୍ବୋ: ଆଉ ଅଳ୍ପ ସମୟର ଅପେକ୍ଷା । ଶ୍ରୀଲଙ୍କା ବିପକ୍ଷରେ ଏସିଆ କପର ଫାଇନାଲ ମୁକାବିଲା ଖେଳିବା ପାଇଁ ମଇଦାନକୁ ଓହ୍ଲାଇବ ଟିମ୍ ଇଣ୍ଡିଆ । ତେବେ ଭାରତ ଟାଇଟଲ ଜିତିଲେ ନୂଆ ରେକର୍ଡ କରିବ । ସେପଟେ ଅଧିନାୟକ ରୋହିତ ଶର୍ମା ମଧ୍ୟ ଏହି ଫାଇନାଲ ମ୍ୟାଚରେ କିଛି ରେକର୍ଡ କରିବା ସୁଯୋଗ ରହିଛି ।
– ଏସିଆ କପରେ ପ୍ରଥମ ଭାରତୀୟ ଖେଳାଳିଭାବେ ୫ଟି ଟୁର୍ଣ୍ଣାମେଣ୍ଟ ଖେଳିବେ । ପୂର୍ବରୁ ସଚିନ, ଆଝାରୁଦ୍ଧିନ, ଧୋନି ଏବଂ ସୁଦ୍ଧୁ ୪ଟି ଲେଖାଏଁ ମ୍ୟାଚ ଖେଳିଛନ୍ତି ।
– ୩୩ ରନ ବନେଇଲେ ଭାରତ ଭାରତ ପକ୍ଷରୁ ସର୍ବାଧିକ ସ୍କୋର କରିବାର ରେକର୍ଡ କରିବେ ।
– ୬୧ ରନ ମାରିଲେ ଏସିଆ କପରେ ୧ହଜାର ରନ ପୂରଣ କରିବେ ।
– ପ୍ରଥମ ଭାରତୀୟଭାବେ ଦିନିକିଆ ଫର୍ମାଟରେ ଏସିଆ କପରେ ୧ହଜାର ରନ ମାରିବାରେ ପ୍ରଥମ ହେବ ।
– ଫାଇନାଲ ମୁକାବିଲାରେ ରୋହିତ ନିଜ ୨୫୦ତମ ମ୍ୟାଚ ଖେଳିବାକୁ ଯାଉଛନ୍ତି ।
ଭଉଣୀ ଗୀତା ମେହେଟ୍ଟାଙ୍କ ଶେଷ ଦର୍ଶନ କଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ
ନୂଆଦିଲ୍ଲୀ: ବିଶିଷ୍ଟ ଲେଖିକା ଗୀତା ମେହେଟ୍ଟାଙ୍କ ଶେଷ ଦର୍ଶନ କଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଦିଲ୍ଲୀ ଯାଇ ଭଉଣୀ ଗୀତାଙ୍କ ଶେଷ ଦର୍ଶନ କରିଛନ୍ତି ନବୀନ । ଏହାସହ ଭଉଣୀ ଗୀତା ମେହେଟ୍ଟାଙ୍କ ପରଲୋକରେ ଗଭୀର ମର୍ମାହତ ଥିବା ପ୍ରକାଶ କରିଛନ୍ତି ।
ଗତକାଲି ଦିଲ୍ଲୀ ସ୍ଥିତ ବାସଭବନରେ ୮୦ ବର୍ଷ ବୟସରେ ଗୀତା ମେହେଟ୍ଟାଙ୍କ ପରଲୋକ ଘଟିଥିଲା । ଆଜି ସକାଳୁ ଗୀତାଙ୍କ ଶେଷ ଦର୍ଶନ କରିବାକୁ ଦିଲ୍ଲୀ ଅଭିମୁଖେ ବାହାରିଥିଲେ ମୁଖ୍ୟମନ୍ତ୍ରୀ । ନବୀନ ନିବାସରୁ ମୁଖ୍ୟମନ୍ତ୍ରୀ ଭୁବନେଶ୍ବର ବିମାନ ବନ୍ଦରରେ ପହଞ୍ଚିବା ପରେ, ସ୍ବତନ୍ତ୍ର ବିମାନରେ ଦିଲ୍ଲୀ ଯାଇଥିଲେ । ସେଠାରୁ ଗୀତାଙ୍କ ବାସଭବନରେ ପହଞ୍ଚି ଭଉଣୀଙ୍କ ଶେଷ ଦର୍ଶନ କରିଛନ୍ତି । ଆସନ୍ତାକାଲି କରାଯିବ ଗୀତାଙ୍କ ଅନ୍ତିମ ସାଂସ୍କାର ।
ସୂଚନାଯୋଗ୍ୟ, ଗୀତା ଏକାଧାରରେ ଜଣେ ଲେଖିକା, ବୃତ୍ତଚିତ୍ର ନିର୍ମାତା, ସାମ୍ବାଦିକା ଥିଲେ । ୧୯୪୩ରେ ଜନ୍ମିତ ଗୀତା ଭାରତ ଓ ବ୍ରିଟେନରେ ଶିକ୍ଷା ଲାଭ କରିଥିଲେ । ସେ କେମ୍ବ୍ରିଜ ବିଶ୍ବବିଦ୍ୟାଳୟରେ ଉଚ୍ଚ ଶିକ୍ଷା ଲାଭ କରିଥିଲେ । ତାଙ୍କର କେତେକ ପ୍ରଖ୍ୟାତ ପୁସ୍ତକ ହେଉଛି- କର୍ମା କୋଲା, ସ୍ନେକ ଆଣ୍ଡ ଲ୍ୟାଡର୍ସ, ଏ ରିଭର ସୂତ୍ର, ଦ ଏଟରନାଲ ଗଣେଶ ଇତ୍ୟାଦି । ସାହିତ୍ୟ ଓ ଶିକ୍ଷା କ୍ଷେତ୍ରରେ ଉଲ୍ଲେଖନୀୟ ଅବଦାନ ପାଇଁ ଗତ ୨୦୧୯ ମସିହାରେ କେନ୍ଦ୍ର ସରକାର ତାଙ୍କ ପଦ୍ମଶ୍ରୀ ପୁରସ୍କାର ପ୍ରଦାନ କରିବାକୁ ଘୋଷଣା କରିଥିଲେ । କିନ୍ତୁ ତାହାକୁ ପ୍ରତ୍ୟାଖ୍ୟାନ କରି ଗୀତା ଚର୍ଚ୍ଚାକୁ ଆସିଥିଲେ ।
ଗୀତାଙ୍କର ସ୍ବାମୀ ସୋନୀ ମେହେଟ୍ଟାଙ୍କର ଗତ ୨୦୧୯ରେ ପରଲୋକ ହୋଇଥିଲା । ୪୦ ବର୍ଷର ସାହିତ୍ୟ ଜୀବନରେ ଅନେକ ଉଲ୍ଲେଖନୀୟ ପୁସ୍ତକ ରଚନା କରିଥିଲେ ।
ଏସିଆ କପ୍ ଫାଇନାଲରେ ବର୍ଷା ହେଲେ କ’ଣ ହେବ?
କଲମ୍ବୋ: ସୁପର ସଣ୍ଡେରେ ଖେଳାଯିବାକୁ ଯାଉଛି ସୁପର ମ୍ୟାଚ୍ । ଏସିଆ କପର ଫାଇନାଲରେ ସାମନା ସାମନି ହେବାକୁ ଯାଉଛନ୍ତି ଭାରତ ଏବଂ ଶ୍ରୀଲଙ୍କା । ଟୁର୍ଣ୍ଣାମେଣ୍ଟ ଆରମ୍ଭରୁ ବର୍ଷା ବାଧକ ସାଜିଥିବାବେଳେ ଫାଇନାଲରେ ବର୍ଷା ହେବାର ସମ୍ଭାବନା ରହିଛି । କିନ୍ତୁ ପାଣିପାଗ ବିଭାଗର ସୂଚନା ଅନୁଯାୟୀ ପାଗ ଏବେ ଭଲ ରହିଛି । ତେବେ ଯଦି ବର୍ଷା ହୁଏ ତାହେଲେ ରିଜର୍ଭ ଡେରେ ମ୍ୟାଚ ଖେଳାଯିବ । ସୋମବାର ରିଜର୍ଭ ଡେରେ ମ୍ୟାଚ ଖେଳାଯିବ, ଯଦି ସେଦିନ ମଧ୍ୟ ବର୍ଷା ହୁଏ ତାହେଲେ ଶେଷ ପର୍ଯ୍ୟାୟରେ ୨୦ ଓଭର ବିଶିଷ୍ଟ ମ୍ୟାଚ ଖେଳାଯିବ । ଯଦି ଏହା ସମ୍ଭବ ନ ହୁଏ ତାହେଲେ ଉଭୟ ଦେଶକୁ ଚାମ୍ପିୟନ ଘୋଷଣା କରାଯିବ । ୨୦୦୨ ମସିହାରେ ଚାମ୍ପିୟନସ ଟ୍ରଫିର ଫାଇନାଲରେ ଏଭଳି ସ୍ଥିତି ଉପୁଜିଥିଲା । ଏଣୁ ଭାରତ ଏବଂ ଶ୍ରୀଲଙ୍କା ଉଭୟ ଦେଶ ଟ୍ରଫି ଭାଗ ବାଣ୍ଟିଥିଲେ ।
ପାନ ଓ କିଆଫୁଲ ଚାଷ ପାଇଁ ‘ରାଜ୍ୟ ଯୋଜନା’ରେ ମିଳିବ ସ୍ବତନ୍ତ୍ର ଆର୍ଥିକ ସହାୟତା
ଭୁବନେଶ୍ବର: ପାନ ଓ କିଆ ଫୁଲ ଚାଷୀଙ୍କ ପାଇଁ ଖୁସି ଖବର । ପାନ ଚାଷକୁ ‘ରାଜ୍ୟ ଯୋଜନା’ରେ ମିଳିବ ସ୍ବତନ୍ତ୍ର ଆର୍ଥିକ ସହାୟତା । ମୁଖ୍ୟମନ୍ତ୍ରୀ କୃଷି ଉଦ୍ୟୋଗ ଯୋଜନାରେ ଉଭୟ ଚାଷର ପ୍ରକ୍ରିୟାକରଣ ୟୁନିଟ ପାଇଁ ସହାୟତା ମିଳିବ । ପ୍ରାକୃତିକ ବିପର୍ଯ୍ୟୟରେ କ୍ଷତିଗ୍ରସ୍ତ କିଆଫୁଲ ଚାଷକୁ ମଧ୍ୟ ଦିଆଯିବ ସହାୟତା ।
ନିଷ୍ପତ୍ତି ଅନୁଯାୟୀ, ସବୁ ପାନଚାଷୀଙ୍କୁ ରାଜ୍ୟ ଯୋଜନାର ସ୍ବତନ୍ତ୍ର ଫଳ ଭିତ୍ତିକ ଯୋଜନାରେ ସାମିଲ କରି ଆର୍ଥିକ ସହାୟତା ଦିଆଯିବ । ଅତିକମ୍ରେ ୨୦୦ ବର୍ଗ ମିଟର ପରିଧିର ପାନ ବରଜ ଥିବା ଚାଷୀ ସହାୟତା ପାଇଁ ଯୋଗ୍ୟ ବିବେଚିତ ହେବେ । କୃଷି ଓ କୃଷକ ସଶକ୍ତିକରଣ ବିଭାଗ ଏଥିପାଇଁ ସ୍ବତନ୍ତ୍ର ନିୟମାବଳୀ ପ୍ରସ୍ତୁତ କରିବ । ପାନ ବରଜ ଥିବା ଚାଷୀଙ୍କୁ ଏହାର ପରିଚାଳନା ପାଇଁ ୟୁନିଟ ପିଛା ୨ ହଜାର ୫ଶହ ଟଙ୍କା ସହାୟତା ଦିଆଯିବ । ଜଣେ ଚାଷୀଙ୍କୁ ସର୍ବାଧିକ ଦୁଇଟି ୟୁନିଟ ପାଇଁ ସହାୟତା ମିଳିବ । ପାନଚାଷ ପାଇଁ କିଷାନ କ୍ରେଡିଟ କାର୍ଡ ଜରିଆରେ ବିନା ସୁଧରେ ଏକ ଲକ୍ଷ ଟଙ୍କା ପର୍ଯ୍ୟନ୍ତ ମିଳିବ ଋଣ ।
ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନିର୍ଦ୍ଦେଶରେ 5T ସଚିବ ଭି.କେ. ପାଣ୍ଡିଆନଙ୍କ ପୁରୀ ଓ ଗଞ୍ଜାମ ଗସ୍ତ ସମୟରେ ପାନ ଓ କିଆ ଫୁଲ ଚାଷୀଙ୍କ ବିଭିନ୍ନ ଅସୁବିଧା ସମ୍ପର୍କରେ ଆପତ୍ତି ଅଭିଯୋଗ ଆସିଥିଲା । ସେ ସବୁର ସମାଧାନ ପାଇଁ ଆଜି ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ପକ୍ଷରୁ ଏକ ସମୀକ୍ଷା ବୈଠକ ଅନୁଷ୍ଠିତ ହୋଇଥିଲା । ବୈଠକରେ 5T ସଚିବଙ୍କ ସହିତ ଉନ୍ନୟନ କମିଶନର ତଥା ଅତିରିକ୍ତ ମୁଖ୍ୟ ଶାସନ ସଚିବ ଅନୁ ଗର୍ଗ, କୃଷି ଓ କୃଷକ ସଶକ୍ତିକରଣ ବିଭାଗର ପ୍ରମୁଖ ସଚିବ ଅରବିନ୍ଦ ପାଢ଼ୀ, ସମବାୟ ବିଭାଗର ସଚିବ ଅରବିନ୍ଦ ଅଗ୍ରୱାଲ ପ୍ରମୁଖ ଉପସ୍ଥିତ ଥିଲେ ।
ବୈଠକରେ ହୋଇଥିବା ନିଷ୍ପତ୍ତି ଅନୁସାରେ ପାନପତ୍ର ବ୍ୟବସାୟରେ ଜିଏସଟି ଲାଗୁ ସମ୍ପର୍କରେ ଜିଏସଟି କମିଶନରଙ୍କୁଠାରୁ ସ୍ପଷ୍ଟୀକରଣ ମଗାଯିବା ସହିତ ଏ ସଂପର୍କରେ ବ୍ୟାପକ ସଚେତନତା ସୃଷ୍ଟି କରାଯିବ । ପାନପତ୍ର ପ୍ରକ୍ରିୟାକରଣ ୟୁନିଟ ଗୁଡିକୁ ମୁଖ୍ୟମନ୍ତ୍ରୀ କୃଷି ଉଦ୍ୟୋଗ ଯୋଜନାରେ ସବ୍ସିଡି ଯୋଗାଇ ଦିଆଯିବ। ଏଥିପାଇଁ ଆପିକଲ୍ ପକ୍ଷରୁ ଏକ ଡିପିଆର ପ୍ରସ୍ତୁତ କରାଯିବ।
ସେହିପରି ଗଞ୍ଜାମର କିଆ ଫୁଲ ଚାଷୀଙ୍କୁ ମଧ୍ୟ ଜାତୀୟ ଉଦ୍ୟାନ କୃଷି ଅଧୀନରେ ପ୍ରୋତ୍ସାହନ ଦେବାକୁ ନିଷ୍ପତ୍ତି ହୋଇଛି । ଉଦ୍ୟାନ କୃଷି ମିଶନର ସହାୟତା ସହିତ ରାଜ୍ୟ ବଜେଟରୁ କିଆ ଫୁଲ ଚାଷ ପାଇଁ ଅତିରିକ୍ତ ସହାୟତା ମଧ୍ୟ ଦିଆଯିବ । କିଆ ଫୁଲ ଚାଷ ସ୍ଥାନ ଗୁଡିକର ସାଇଣ୍ଟିଫିକ୍ ମ୍ୟାପିଙ୍ଗ୍ କରି ସହାୟତା ଦିଆଯିବ । ପ୍ରାକୃତିକ ବିପର୍ଯ୍ୟୟରେ କ୍ଷତିଗସ୍ତ ହୋଇଥିବା କିଆ ଫୁଲ ଫସଲ ପାଇଁ ଗଞ୍ଜାମ ଜିଲ୍ଲାପାଳଙ୍କ ରିପୋର୍ଟ ଭିତ୍ତିରେ ଦିଆଯିବ ସହାୟତା । ଏଥିପାଇଁ କୃଷି ଓ କୃଷକ ସଶକ୍ତିକରଣ ବିଭାଗ ଓ ଗଞ୍ଜାମ ଜିଲ୍ଲାପାଳ ମିଳିତ ଭାବେ ମୋଡାଲିଟି ପ୍ରସ୍ତୁତ କରିବେ । ମୁଖ୍ୟମନ୍ତ୍ରୀ କୃଷି ଉଦ୍ୟୋଗ ଯୋଜନାରେ କିଆ ଫୁଲ ପ୍ରକ୍ରିୟାକରଣ ୟୁନିଟକୁ ସାମିଲ କରିବା ପାଇଁ ଯୋଜନାର ନିୟମାବଳୀରେ ଆବଶ୍ୟକ ପରିବର୍ତ୍ତନ କରାଯିବ । ଗଞ୍ଜାମ ଜିଲ୍ଲାରେ କିଆଫୁଲ ଚାଷକୁ ପ୍ରୋତ୍ସାହନ ଦେବାକୁ ବୈଷୟିକ ସହାୟତା ଯୋଗାଇ ଦେବା ପାଇଁ ଓଡିଶା କୃଷି ଓ ବୈଷୟିକ ବିଶ୍ବବିଦ୍ୟାଳୟ କିମ୍ବା ଅନ୍ୟ କୌଣସି ଭାରତୀୟ କୃଷି ଗବେଷଣା ପ୍ରତିଷ୍ଠାନର ସହାୟତା ନିଆଯିବ ।
‘ଆଦିବାସୀ କଳା ଓ ସଂସ୍କୃତିର ପ୍ରଶଂସକ ଥିଲେ ଗୀତା’
ଭୁବନେଶ୍ବର: ଆରପାରିରେ ପ୍ରସିଦ୍ଧ ଲେଖିକା ଗୀତା ମେହେଟ୍ଟା । ଗୀତାଙ୍କ ପରଲୋକ ଖବର ଶୁଣି ମର୍ମାହତ ହୋଇଯାଇଛନ୍ତି ପ୍ରଖ୍ୟାତ ସଂଗ୍ରାହକ ଓ ଐତିହ୍ୟ ଗବେଷକ ସୁଦର୍ଶନ ସାହୁ । ଗୀତାଙ୍କୁ ଶ୍ରଦ୍ଧାଞ୍ଜଳି ଜଣାଇବା ସହ ସେ କଳା ଓ ସଂସ୍କୃତିର ଗବେଷିକା ଥିବା କହିଛନ୍ତି ସୁଦର୍ଶନ ।
୨୦୧୮ ଏପ୍ରିଲ ୧୮ ତାରିଖ କଥା ମନେ ପକାଇ ସୁଦର୍ଶନ କହିଛନ୍ତି, ‘ଆଦିବାସୀମାନେ ପରିଧାନ କରୁଥିବା ଅଳଙ୍କାରକୁ ଭଲ ପାଉଥିଲେ ଗୀତା । ପଖାଳ କଂସା ଓ କିରୋସିନ ଡିବି ସମ୍ପର୍କରେ ସେ ଗବେଷଣା କରିବାକୁ ଭଲ ପାଉଥିଲେ । ଲୋକଲୋଚନରୁ ଦୂରେଇ ରହିବା ଲାଗି ସେ ଗୋପନୀୟ ଭାବେ ସଂଗ୍ରହାଳୟକୁ ଆସିଥିଲେ ।’
ଆଗକୁ ସେ କହିଛନ୍ତି, ‘ଆଦିବାସୀ ପିନ୍ଧୁଥିବା ହାର, ବାରୁଟି, ପାଉଁଜି, ଖଡୁ ଓ ଅନ୍ୟାନ୍ୟ କଳାଗୁଡିକୁ ଦେଖିଥିଲେ । ଏହାସହ ୩୦ ପ୍ରକାର ପଖାଳ କଂସାର ଉତ୍ପତ୍ତି, ଡିଜାଇନ, ସେଗୁଡିକର ସମୟ କାଳ ସମ୍ପର୍କରେ ମଧ୍ୟ ଅବଗତ ହୋଇଥିଲେ । ୬ ଲିଟର କ୍ଷମତାର ଏକ କଂସାବେଲା ଟଭା ଫାଳିଆ ଦେଖି ସେ ଅଭିଭୁତ ହୋଇଯାଇଥିଲେ ।’
ପରିଦର୍ଶକ ନଥିରେ ମଧ୍ୟ ସେ ନିଜର ମତ ଉଲ୍ଲେଖ କରିଥିବା କହିଛନ୍ତି ସୁଦର୍ଶନ । ଆଦିବାସୀ ସଂସ୍କୃତିକୁ ଭଲ ପାଉଥିବା ଗୀତା ସେହିଦିନ ୮ଟି ଆଦିବାସୀ ଅଳଙ୍କାର ଓ କଳାକୃତି ବି କିଣିଥିଲେ ।
ନିମାପଡାରେ ୮୧ ତମ ସହିଦ ଦିବସ ପାଳିତ
ନିମାପଡ଼ା: ପୁରୀ ଜିଲ୍ଲା ନିମାପଡାରେ ୮୧ ତମ ସହିଦ ଦିବସ ପାଳିତ । ୧୯୪୨ ମସିହାରେ ମହାତ୍ମା ଗାନ୍ଧୀଙ୍କ ଭାରତ ଛାଡ଼ ଆନ୍ଦୋଳନ ଡାକରାରେ ନିମାପଡାର ତତ୍କାଳୀନ ସ୍ବାଧୀନତା ସଂଗ୍ରାମୀ ପଦ୍ମଚରଣ ସାମନ୍ତସିଂହାର ଓ ମୋହନ ଦାଶଙ୍କ ନେତୃତ୍ୱରେ ସେହିବର୍ଷ ସେପ୍ଟେମ୍ବର ୧୬ରେ ଶତାଧିକ ସଂଗ୍ରାମୀ ନିମାପଡା ଥାନା ଘେରାଉ କରି ପୋଡାଜଳା କରିଥିଲେ । ଇଂରେଜ ପୋଲିସଙ୍କ ଗୁଳିରେ ସଂଗ୍ରାମୀ ଉଚ୍ଛବ ମଲ୍ଲିକ ସହିଦ ହୋଇଥିଲେ । ନିମାପଡା ଏନଏସି ପକ୍ଷରୁ ସହିଦ ଦିବସ ପାଳନ ଅବସରରେ ଶତାଧିକ ଛାତ୍ରଛାତ୍ରୀ ଏକ ମଶାଲ ଶୋଭାଯାତ୍ରାରେ ଅଞ୍ଚଳ ପରିକ୍ରମା କରିଥିଲେ । ପରେ ସହୀଦ ସ୍ମୃତି ସ୍ତମ୍ବରେ ମାଲ୍ୟାର୍ପଣ କରାଯାଇଥିଲା ।
ପୁରୀ ପୋଲିସ ପକ୍ଷରୁ ସହୀଦ ସ୍ମୃତି ସ୍ତମ୍ବ ନିକଟରେ ଗାର୍ଡ ଅଫ ଅନର ପ୍ରଦାନ କରାଯାଇଥିଲା । ଏହି ଅବସରରେ ଜଗତସିଂହପୁର ସାଂସଦ ରାଜଶ୍ରୀ ମଲ୍ଲିକ ମୁଖ୍ୟ ଅତିଥି ଓ ସ୍ଥାନୀୟ ବିଧାୟକ ସମୀର ରଞ୍ଜନ ଦାଶ ସମ୍ମାନୀତ ଅତିଥି ଭାବେ ଯୋଗ ଦେଇ ସ୍ୱାଧିନତା ସଂଗ୍ରାମୀଙ୍କ ଫଟୋଚିତ୍ରରେ ପୁଷ୍ପାଞ୍ଜଳି ପ୍ରଦାନ କରି ଶହୀଦଙ୍କ ସ୍ମୃତି ଚାରଣ କରିଥିଲେ । ଏହି ଅବସରରେ ସ୍ଥାନୀୟ ଛାତ୍ରଛାତ୍ରୀଙ୍କ ଦ୍ୱାରା ସାସ୍କୃତିକ କାର୍ଯ୍ୟକ୍ରମ ପରିବେଷିତ ହୋଇଥିଲା ।
ଭଉଣୀ ଗୀତା ମେହେଟ୍ଟାଙ୍କ ଶେଷ ଦର୍ଶନ କରିବାକୁ ଦିଲ୍ଲୀ ଗଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ
ଭୁବନେଶ୍ବର: ପରଲୋକରେ ବିଶିଷ୍ଟ ଲେଖିକା ଗୀତା ମେହେଟ୍ଟା । ଦିଲ୍ଲୀ ସ୍ଥିତ ବାସଭବନରେ ୮୦ ବର୍ଷ ବୟସରେ ଗତକାଲି ଗୀତାଙ୍କ ପରଲୋକ ଘଟିଛି । ସ୍ବର୍ଗତା ଗୀତା ପ୍ରବାଦ ପୁରୁଷ ବିଜୁ ପଟ୍ଟନାୟକଙ୍କ କନ୍ୟା ଏବଂ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଭଉଣୀ । ଗୀତାଙ୍କ ଶେଷ ଦର୍ଶନ କରିବାକୁ ଦିଲ୍ଲୀ ଅଭିମୁଖେ ବାହାରିଛନ୍ତି ମୁଖ୍ୟମନ୍ତ୍ରୀ । ନବୀନ ନିବାସରୁ ମୁଖ୍ୟମନ୍ତ୍ରୀ ଭୁବନେଶ୍ବର ବିମାନ ବନ୍ଦରରେ ପହଞ୍ଚିବା ପରେ, ସ୍ବତନ୍ତ୍ର ବିମାନରେ ଦିଲ୍ଲୀ ଅଭିମୁଖେ ଯାତ୍ରା କରିଛନ୍ତି । ଦିଲ୍ଲୀରେ ପହଞ୍ଚିବା ପରେ ଭଉଣୀ ଗୀତାଙ୍କ କରିବେ ଶେଷ ଦର୍ଶନ । ଆସନ୍ତାକାଲି କରାଯିବ ଗୀତାଙ୍କ ଅନ୍ତିମ ସାଂସ୍କାର ।
ସୂଚନାଯୋଗ୍ୟ, ଗୀତା ଏକାଧାରରେ ଜଣେ ଲେଖିକା, ବୃତ୍ତଚିତ୍ର ନିର୍ମାତା, ସାମ୍ବାଦିକା ଥିଲେ । ୧୯୪୩ରେ ଜନ୍ମିତ ଗୀତା ଭାରତ ଓ ବ୍ରିଟେନରେ ଶିକ୍ଷା ଲାଭ କରିଥିଲେ । ସେ କେମ୍ବ୍ରିଜ ବିଶ୍ବବିଦ୍ୟାଳୟରେ ଉଚ୍ଚ ଶିକ୍ଷା ଲାଭ କରିଥିଲେ । ତାଙ୍କର କେତେକ ପ୍ରଖ୍ୟାତ ପୁସ୍ତକ ହେଉଛି- କର୍ମା କୋଲା, ସ୍ନେକ ଆଣ୍ଡ ଲ୍ୟାଡର୍ସ, ଏ ରିଭର ସୂତ୍ର, ଦ ଏଟରନାଲ ଗଣେଶ ଇତ୍ୟାଦି । ସାହିତ୍ୟ ଓ ଶିକ୍ଷା କ୍ଷେତ୍ରରେ ଉଲ୍ଲେଖନୀୟ ଅବଦାନ ପାଇଁ ଗତ ୨୦୧୯ ମସିହାରେ କେନ୍ଦ୍ର ସରକାର ତାଙ୍କ ପଦ୍ମଶ୍ରୀ ପୁରସ୍କାର ପ୍ରଦାନ କରିବାକୁ ଘୋଷଣା କରିଥିଲେ । କିନ୍ତୁ ତାହାକୁ ପ୍ରତ୍ୟାଖ୍ୟାନ କରି ଗୀତା ଚର୍ଚ୍ଚାକୁ ଆସିଥିଲେ ।
ଗୀତାଙ୍କର ସ୍ବାମୀ ସୋନୀ ମେହେଟ୍ଟାଙ୍କର ଗତ ୨୦୧୯ରେ ପରଲୋକ ହୋଇଥିଲା । ୪୦ ବର୍ଷର ସାହିତ୍ୟ ଜୀବନରେ ଅନେକ ଉଲ୍ଲେଖନୀୟ ପୁସ୍ତକ ରଚନା କରିଥିଲେ ।