ମୁମ୍ବାଇ: ମୁମ୍ବାଇରେ ଇଣ୍ଡିଆ ମେଣ୍ଟ ବୈଠକ ଶେଷ । ବିଜେପି ବିରୋଧରେ ପ୍ରସ୍ତୁତ ହେଲା ମାଷ୍ଟରପ୍ଲାନ । ବୈଠକ ପରେ ପ୍ରେସମିଟରେ କେନ୍ଦ୍ରକୁ କଡ଼ା ଆକ୍ଷେପ କରିଛନ୍ତି କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖଡଗେ । ବିଜେପି ସରକାର ସମ୍ବିଧାନ ବିରୋଧୀ ବୋଲି ଖଡଗେ କହିଛନ୍ତି । କେନ୍ଦ୍ର ସରକାର ଗତ ୧୦ ବର୍ଷରେ ସରକାରୀ ଏଜେନ୍ସିର ସତ୍ୟାନାସ କରିଛନ୍ତି । ଚୀନ, ବିମୁଦ୍ରୀକରଣ ବେଳେ ସ୍ବତନ୍ତ୍ର ଅଧିବେଶନ ଡକାଯାଇ ନଥିବା ବେଳେ ଏବେ କାହିଁକି ସଂସଦର ସ୍ବତନ୍ତ୍ର ଅଧିବେଶନ ଡକାଯାଇଛି ବୋଲି ପ୍ରଶ୍ନ କରିଛନ୍ତି ଖଡଗେ । ଦେଶରେ ଦରବୃଦ୍ଧି, ବେରୋଜଗାରୀ ଚରମ ସୀମାରେ ପହଞ୍ଚିଛି । ଇଣ୍ଡିଆ ମେଣ୍ଟ କେନ୍ଦ୍ରର ତାନାସାହି ଶାସନ ବିରୋଧରେ ଲଢ଼େଇ କରିବ ।
ବିରୋଧୀ ମେଣ୍ଟରେ ଏକ ୧୩ ଜଣିଆ ସମନ୍ବୟ କମିଟି ଗଠନ କରାଯାଇଛି । ଏହି କମିଟିରେ ରହିଛନ୍ତି କେ.ସି. ଭେନୁଗୋପାଲ, ଶରଦ ପାଓ୍ବାର, ତେଜସ୍ବୀ ଯାଦବ, ଏମକେ ଷ୍ଟାଲିନ, ଲଲନ ସିଂ, ଅଭିଷେକ ବାନାର୍ଜୀ, ହେମନ୍ତ ସୋରେନ, ସଞ୍ଜୟ ରାଓ୍ବତ, ରାଘବ ଚଢା, ଡି. ରାଜା, ଓମାର ଅବଦୁଲ୍ଲା, ମେହବୁବା ମୁଫତି, ଜାଭେଦ ଖାଁ। ଏହି ବୈଠକରେ ଆସନ୍ତା ଲୋକସଭା ନିର୍ବାଚନ ଲାଗି ପ୍ରଚାର କୌଶଳ ବି ନିର୍ଦ୍ଧାରିତ ହେବ ବୋଲି ସୂଚନା ମିଳିଛି । ଏହି ସମନ୍ବୟ କମିଟି ବ୍ୟତୀତ ପ୍ରଚାର, ରାଲି, ସୋସିଆଲ ମିଡିଆ, ତଥ୍ୟଗତ ପରିଚାଳନା ଲାଗି ମଧ୍ୟ ୪ଟି ସବକମିଟି ଗଠିତ ହୋଇଛି । ଆସନ୍ତା ଅକ୍ଟୋବର ୨ ସୁଦ୍ଧା ଯଥାସମ୍ଭବ ଘୋଷିତ ହୋଇପାରେ ଇଣ୍ଡିଆର ଇସ୍ତାହାର ।
