ଭୁବନେଶ୍ୱର: କୌଣସି ସମସ୍ୟାର ସମ୍ମୁଖୀନ ହେବେନି କେହିବି ଅନାଥ । ବାପା ମା ଛେଉଣ୍ଡ ୯ ବର୍ଷର କିରଣଙ୍କୁ ମିଳିଲା ବଞ୍ଚିବା ପାଇଁ ଆଶାର କିରଣ । କିରଣ ମୁଣ୍ଡାଙ୍କ ଦୁଃଖ ବୁଝିଲେ 5T ସଚିବ । ରକ୍ତ ଶିକୁଳୀ ରୋଗରେ ପୀଡିତ କିରଣଙ୍କର ଚିକିତ୍ସା ଓ ପାଠପଢ଼ା ବାବଦରେ ସମସ୍ତ ସହାୟତା ଯୋଗାଇ ଦେବାକୁ ବ୍ୟବସ୍ଥା ହୋଇଛି । 5T ସଚିବଙ୍କ ନିର୍ଦ୍ଦେଶକ୍ରମେ କେନ୍ଦୁଝର ଜିଲ୍ଲା ସଦର ବ୍ଳକ ଶଙ୍କିରୀ ପଞ୍ଚାୟତର ଜିଆରଏସ୍ କିରଣଙ୍କ ନିକଟରେ ପହଞ୍ଚି ସମସ୍ତ ସହାୟତା ଯୋଗାଇ ଦେବାକୁ ବ୍ୟବସ୍ଥା କରିଛନ୍ତି । ଶଙ୍କିରୀ ମୁଣ୍ଡା ସାହିର ଶ୍ୟାମସୁନ୍ଦର ମୁଣ୍ଡା ଓ ମା ଇନ୍ଦୁମତୀଙ୍କର କିରଣ ହେଲେ ଏକମାତ୍ର ସନ୍ତାନ ।
ସେ ୪ ବର୍ଷ ବୟସରୁ ରକ୍ତ ଶିକୁଳୀ ରୋଗରେ ପୀଡ଼ିତ ଥିବା ଜାଣିବା ପରେ ବାପା ମା ପୁଅକୁ ରକ୍ତ ଦେଇ ଯଥାସମ୍ଭବ ଚିକିତ୍ସା କରାଉଥିଲେ । ହେଲେ, ଶ୍ୟାମସୁନ୍ଦର ବର୍ଷେ ତଳେ ଅଜଣା ରୋଗରେ ଆରପାରିକୁ ଚାଲିଯିବା ପରେ, ମା ଇନୁମତୀ ପର ଘରେ କାମ କରି ପୁଅ ମୁହଁରେ ଖାଦ୍ୟ ଦେବା ସହିତ ପ୍ରତିମାସ ଜିଲ୍ଲା ମୁଖ୍ୟ ଚିକିତ୍ସାଳୟରେ ରକ୍ତ ଦେଉଥିଲେ । ହେଲେ ଗତ କିଛି ଦିନ ପୂର୍ବରୁ ଇନ୍ଦୁମତୀ ଜଣ୍ଡିସରେ ପ୍ରାଣ ହରାଇଛନ୍ତି । ମା’ଙ୍କ ମୃତ୍ୟୁ ପରେ ସମ୍ପୁର୍ଣ୍ଣ ଅସହାୟ ହୋଇ ପଡ଼ିଥିଲେ କିରଣ । ଏ ବିଷୟରେ ଜାଣିବା ପରେ 5T ସଚିବ ଭି.କେ. ପାଣ୍ଡିଆନ୍ କିରଣକୁ ଯଥାଶୀଘ୍ର ସହାୟତା ଯୋଗାଇ ଦେବାକୁ ସଦର ବିଡିଓଙ୍କୁ ନିର୍ଦ୍ଦେଶ ଦେଇଥିଲେ ।
