ଭୁବନେଶ୍ବର: ରାଜଧାନୀ ରାଜରାସ୍ତାରେ ସାଦା ପୋଷାକରେ ବୁଲିବେ ପୋଲିସ । ବିଭିନ୍ନ ସ୍ଥାନରେ କଡାକଡି ହେବ ମଦୁଆ ଧରା ଅଭିଯାନ । ମଦ ପିଇ ଉତ୍ପାତ କଲେ ଉଠାଇ ଆଣିବ ପୋଲିସ । ଶବ୍ଦ ପ୍ରଦୂଷଣକାରୀ ବାଣ ଫୁଟାଇଲେ ନିଆଯିବ କାର୍ଯ୍ୟାନୁଷ୍ଠାନ । ପିସିଆର ସହ ଥାନା କର୍ମଚାରୀ ଗଳିକନ୍ଦିରେ କରିବେ ପାଟ୍ରୋଲିଂ । ରାତିରେ ସହରର ବିଭିନ୍ନ ସ୍ଥାନରେ କରାଯିବ ଚେକିଂ ବ୍ଲକିଂ । ଏଥିପାଇଁ ଅତିରିକ୍ତ ଡିସିପିଙ୍କ ନେତୃତ୍ବରେ ଗଠନ ହୋଇଛି ସ୍ପେଶାଲ ଟିମ୍ । କୌଣସି ଦୁର୍ଘଟଣାକୁ ଆଶଙ୍କା କରି ଅଗ୍ନିଶମ ଓ ହସ୍ପିଟାଲ କର୍ମଚାରୀଙ୍କ ସହ ଆଲୋଚନା କରିଛି ପୋଲିସ । ଆଲୋକର ପର୍ବ ଖୁସି ଆଣୁ, କିନ୍ତୁ କାହାକୁ ଦୁଃଖ ନଦେଉ ବୋଲି କହିଛନ୍ତି ଭୁବନେଶ୍ବର ଡିସିପି ପ୍ରତୀକ ସିଂହ ।
ବଡ଼ଦାଣ୍ଡରେ ବଡ଼ବଡୁଆ ଡାକ ପାଇଁ ପାଲଟିଛି ଜନସମୁଦ୍ର
ପୁରୀ: ରବିବାର ପବିତ୍ର ଦୀପାବଳି ଅମାବାସ୍ୟାରେ ଶ୍ରୀକ୍ଷେତ୍ରରେ ପୟାଶ୍ରାଦ୍ଧ ବା ବଡ଼ବଡୁଆ ଡାକ ପାଇଁ ଜମିଛି ଶ୍ରଦ୍ଧାଳୁଙ୍କ ଭିଡ଼ । ଜଗାଦର୍ଶନ ସହ ପିତୃପୁରୁଷଙ୍କ ଉଦ୍ଦେଶ୍ୟରେ ଶ୍ରୀମନ୍ଦିର ନିକଟରେ କାଉଁରିଆ କାଠି ଜାଳୁଛନ୍ତି ଦର୍ଶନାର୍ଥୀ। ବଡ଼ବଡୁଆ ହୋ, ଅନ୍ଧାରେ ଆସି ଆଲୁଅରେ ଯାଅ, ଗଙ୍ଗା ଯା, ଗୟା ଯା, ଅଭଡ଼ା ଖାଇ ବାଇଶି ପାହାଚେ ଗଡଗଡଉ ଥାଅ । ଏହି ଡାକରେ ଗୁଞ୍ଜରିତ ହେଉଛି ସମଗ୍ର ଅଞ୍ଚଳ । ଆଶ୍ୱିନ କୃଷ୍ଣ ପ୍ରତିପଦା ଠାରୁ ପିତୃପକ୍ଷରେ ମର୍ତ୍ତ୍ୟଲୋକରୁ ଆସିଥିବା ପିତୃପୁରୁଷଙ୍କୁ ଆଜି ଦୀପାବଳିରେ ଆଲୋକର ମାର୍ଗ ଦେଖାଇ ମେଲାଣି ଦେବାର ବିଧି ରହିଛି । କାଉଁରିଆ କାଠି ଜାଳି ବଡ଼ବଡୁଆ ଡାକନ୍ତି ଶ୍ରଦ୍ଧାଳୁ । ଆଜି ଶ୍ରୀମନ୍ଦିର ନିକଟରେ କାଉଁରିଆ କାଠି ଜାଳୁଛନ୍ତି ଶ୍ରଦ୍ଧାଳୁ । ବିଧି ମୁତାବକ ଫଳ, ଫୁଲ, ଚନ୍ଦନ ଆଦି ଦ୍ରବ୍ୟରେ ପିତୃପୁରୁଷଙ୍କ ଉଦେଶ୍ୟରେ ଶ୍ରଦ୍ଧାଳୁ ମାନେ ଶ୍ରାଦ୍ଧ ଦାନ କରିଛନ୍ତି । ଉଦ୍ଦିଷ୍ଟ ସ୍ଥାନରେ ପୋଲିସ ଓ ଅଗ୍ନିଶମ ବାହିନୀ କଡା ସୁରକ୍ଷା ଏବଂ ବ୍ୟାରିକେଡ ମଧ୍ୟରେ କାଉଁରିଆ ଜାଳି ପିତୃପୁରୁଷଙ୍କ ଉଦ୍ଦେଶ୍ୟରେ ଅର୍ପଣ କରିଛନ୍ତି ଶ୍ରଦ୍ଧାଳୁ । ଜଗା ଦର୍ଶନ ସହ ପୟାଶ୍ରାଦ୍ଧ ପାଇଁ ଲୋକାରଣ୍ୟ ହୋଇଛି ଶ୍ରୀକ୍ଷେତ୍ର ଓ ଶ୍ରୀମନ୍ଦିର।
ବିଶ୍ବକପରେ ପୁଣି ଆଉ ଏକ କିର୍ତ୍ତୀମାନ ରଚିଲେ କୋହଲି
ନୂଆଦିଲ୍ଲୀ: ବିରାଟ କୋହଲି ଚଳିତ ବିଶ୍ବକପରେ ଦମଦାର ଫର୍ମରେ ରହିବା ସହ ଗୋଟିଏ ପରେ ଗୋଟିଏ ରେକର୍ଡ କରି ଚାଲିଛନ୍ତି । ବିରାଟ କୋହଲି ଆଉ ଏକ ନୂଆ କିର୍ତ୍ତୀମାନ ହାସଲ କରିବା ସହ ଭାରତର ପୂର୍ବତନ କିମ୍ବଦନ୍ତୀ କ୍ରିକେଟର ସଚିନ ତେନ୍ଦୁଲକରଙ୍କ ସମକକ୍ଷ ହୋଇଛନ୍ତି । ଗୋଟିଏ ବିଶ୍ବକପ ସିଜିନରେ କୋହଲି ୭ଥର ୫୦ରୁ ଅଧିକ ସ୍କୋର କରିଛନ୍ତି । ପୂର୍ବରୁ ସଚିନ ଏବଂ ବାଂଲାଦେଶ ଅଧିନାୟକ ସାକିବ ଅଲ୍ଲ ହାସନ ଏହି ରେକର୍ଡ କରିଛନ୍ତି । ସଚିନ ୨୦୦୩ ବିଶ୍ବକପରେ ୭ରୁ ମ୍ୟାଚରେ ୫୦ରୁ ଅଧିକ ସ୍କୋର କରିଥିବାବେଳେ ସାକିବ ୨୦୧୯ ବିଶ୍ବକପରେ ଏହି ରେକର୍ଡ ହାସଲ କରିଥିଲେ । କିନ୍ତୁ ଚଳିତ ବିଶ୍ବକପରେ କୋହଲି ଏହି ରେକର୍ଡ ହାସଲ କରିଥିବାବେଳେ ସେମିଫାଇନାଲରେ ଆଉ ଏକ ବଡ଼ ସ୍କୋର କରି ନୂଆ ସର୍ବାଧିକ ୫୦ରୁ ଅଧିକ ସ୍କୋର କରିଥିବା ଖେଳାଳିଙ୍କ ତାଲିକାରେ ଶୀର୍ଷରେ ରହିବେ ।
ଚଳିତ ବିଶ୍ବକପରେ ସର୍ବାଧିକ ସ୍କୋର କରିଛନ୍ତି ବିରାଟ କୋହଲି । କୋହଲି ୫୯୪ ରନ କରିଥିବାବେଳେ ଡିକକ ୫୯୧ ରନ କରିଛନ୍ତି । ଚଳିତ ବିଶ୍ବକପରେ କୋହଲି ୫ ଅର୍ଦ୍ଧଶତକ କରିଥିବାବେଳେ ୨ଟି ଶତକ ମଧ୍ୟ ହାସଲ କରିଛନ୍ତି । ବଡ଼ ପାଳି ଖେଳିବା ସହ ଏକ ଦମଦାର ପ୍ରଦର୍ଶନ ଜାରି ରଖିଛନ୍ତି କୋହଲି । ସେପଟେ ଆଜି ନେଦରଲାଣ୍ଡସକୁ ଭେଟୁଥିବା ଭାରତ ଏକ ବଡ଼ ସ୍କୋର କରିବ ବୋଲି ଆଶା କରାଯାଉଛି ।
ଯୁବକଙ୍କୁ ଫସାଇବା ପାଇଁ ଏମିତି ଉପାୟ ଆପଣାଇଛନ୍ତି ବାର..
ନୂଆାଦିଲ୍ଲୀ: ଯୁଗ ଆଗେଇବା ସହ ଟେକ୍ନୋଲୋଜି ମଧ୍ୟ ଆଗଉଛି । ତେବେ ଦିନକୁ ଦିନ ସାଇବର ସ୍କାମ ସଂଖ୍ୟା ମଧ୍ୟ ବଢ଼ିବାରେ ଲାଗିଛି। ତେବେ ବାର ମାଲିକମାନେ ଯୁବ ପିଢ଼ୀଙ୍କୁ ଠକିବା ପାଇଁ ଏକ ନୂଆ ଉପାୟ ଆପଣାଇଥିବା ଅଭିଯୋଗ ହୋଇଛି । ଦିଲ୍ଲୀର ଜଣେ ସାମ୍ବାଦିକ ଏଭଳି ସ୍କାମର ଶିକାର ହେବା ପରେ ସେ ସୋସିଆଲ ମିଡିଆରେ ପୋଷ୍ଟ କରିଛନ୍ତି । ଅବିବାହିତ ଥିବା ସାମ୍ବାଦିକ ଜଣକ ଡେଟିଂ ଆପ ବମ୍ବଲରେ ଜଣେ ଯୁବତୀଙ୍କ କଥା ହୋଇଥିଲେ । ତେବେ ଯୁବତୀ ଜଣକ ତାଙ୍କୁ ଦେଖା କରିବା ପାଇଁ ଏକ ବାର ତଥା ରେଷ୍ଟୁରାଣ୍ଟକୁ ଡକାଇଥିଲେ । ରାଜଗୌରୀ ଗାର୍ଡେନର ଏକ ରେଷ୍ଟୁରାଣ୍ଟକୁ ସେମାନେ ଯାଇଥିବାବେଳେ ୧୫ ହଜାରରୁ ଅଧିକ ଟଙ୍କାର ବିଲ୍ ହୋଇଥିଲା । ମାତ୍ର ପରବର୍ତ୍ତୀ ସମୟରେ ତାଙ୍କର ସେ ଯୁବତୀଙ୍କ ସହ କଥାବାର୍ତ୍ତା ହୋଇପାରିନଥିଲେ । କିମ୍ବା ସେ ନମ୍ବରରେ ଆଉ କଲ ଲାଗିନଥିଲା । ଯାହାକୁ ନେଇ ସେ କିପରିଭାବେ ଠକାମିର ଶିକାର ହୋଇଛନ୍ତି ସୋସିଆଲ ମିଡିଆରେ ପୋଷ୍ଟ କରିଛନ୍ତି ।
Fraud Alert: Met a girl on @bumble, went to The Race Lounge & Bar in Rajouri Garden. She ordered drinks and the bill was Rs 15,886. Realised it was a scam. Discovered many people are scammed. @Cyberdost 1930 not working, @DelhiPolice please take action. Read the whole story: pic.twitter.com/Ux18iYSRm1
— Archit Gupta (@architguptalive) November 11, 2023
ଯୁବତୀ ଜଣକ ତାଙ୍କ ବାରକୁ ନେଇଥିବାବେଳେ କିଛି ଡିଙ୍କସ ମଗାଇଥିଲେ । ଏହାସହ ସେ ନିଦ୍ଧିଷ୍ଟ ବାର ତଥା ରେଷ୍ଟୁରାଣ୍ଟକୁ ଯିବା ପାଇଁ ପୂର୍ବରୁ ହିଁ କହିଥିଲେ । ଆଉ ସେଠାକୁ ଯିବା ପରେ ସେ କିଛି ଡ୍ରିଙ୍କସ ମଗାଇଥିଲେ । ଯାହାର ଦାମ ରହିଥିଲା ୧୫ ହଜାର ୮୮୬ ଟଙ୍କା । ମାତ୍ର ଏହା ମଗାଇ ସାରିବା ପରେ ଭାଇଙ୍କ ସହ ବାହାରକୁ ଯିବାକୁ କହି ସେ ସେଠାରୁ କୁଆଡ଼େ ଚାଲି ଯାଇଥିଲେ । ଏହାପରେ ତାଙ୍କ ସହ ଯେତେ କଣ୍ଟାଣ୍ଟ କରିଥିଲେ ସୁଦ୍ଧା ବିଫଳ ହୋଇଥିଲେ । ପରେ ସେ ଅନ୍ୟମାନଙ୍କ ସହ ଏକଥାକୁ କହିଥିଲେ । ସାମ୍ବାଦିକଙ୍କ ଭଳି ବହୁ ଯୁବକ ମଧ୍ୟ ଏଭଳି ଶିକାର ହୋଇଥିବା କହିଥିଲେ । ପରେ ସେ ଜାଣିବାକୁ ପାଇଥିଲେ କି, ବାର ମାଲିକମାନେ ଯୁବକଙ୍କୁ ଫସାଇବା ପାଇଁ ଏଭଳି ନୂଆ ଉପାୟ ଆପଣାଇଛନ୍ତି । ଏହାସହ ନିଜର ସୋସିଆଲ ମିଡିଆରେ ମଧ୍ୟ ନିଜର ଦୁଃଖକୁ ପ୍ରକାଶ କରିବା ସହ ଅନ୍ୟମାନେ କିଭଳି ଏହାର ଶିକାର ନହେବେ ସେ ସମ୍ପର୍କରେ ଲେଖିଛନ୍ତି ।
ମା’ ଓ ୩ ସନ୍ତାନଙ୍କୁ ହତ୍ୟା
ବାଙ୍ଗାଲୋର: ଦୀପାବଳିରେ ସବୁଠି ଦେଖିବାକୁ ମିଳିଛି ଉତ୍ସାହର ମାହୋଲ । ଗାଁଠୁ ସହର ସବୁଠି ଆନନ୍ଦ ଉଲ୍ଲାସ ଦେଖିବାକୁ ମିଳିଥିବାବେଳେ କର୍ଣ୍ଣାଟକ ଉଡୁପି ଜିଲ୍ଲାରେ ଘଟିଛି ବୀଭତ୍ସ ହତ୍ୟାକାଣ୍ଡ । ମା ଓ ୩ ସନ୍ତାନଙ୍କୁ କରାଯାଇଛି ହତ୍ୟା । ଉଡୁପି ଜିଲ୍ଲାର କେମ୍ମାନୁରେ ଘଟିଛି ହତ୍ୟାକାଣ୍ଡ । ପୋଲିସ ସୂତ୍ରରୁ ପ୍ରକାଶ ଜଣେ ମୁଖାପିନ୍ଧା ଦୁର୍ବୃତ୍ତ ଘରେ ପଶି ସାରା ପରିବାର ଉପରେ ଆକ୍ରମଣ କରିଥିଲା । ଆକ୍ରମଣରେ ୪୬ ବର୍ଷ ବୟସ୍କା ମା ଓ ୨୩, ୨୧, ୧୨ ବର୍ଷ ବୟସ୍କ ୩ ପୁଅ ପ୍ରାଣ ହରାଇଥିଲେ । ଜଣେ ମହିଳା ବି ଗୁରୁତର ହୋଇଛନ୍ତି । ତାଙ୍କୁ ଏକ ହସ୍ପିଟାଲରେ ଭର୍ତ୍ତି କରାଯାଇଛି । ମୃତ ମହିଳାଙ୍କ ସ୍ବାମୀ ଉପସାଗରୀୟ ଦେଶରେ କାମ କରୁଛନ୍ତି । ଘଟଣାସ୍ଥଳରେ ଉଡୁପି ଜିଲ୍ଲା ଏସପି ଅରୁଣ କୁମାର ଉପସ୍ଥିତ ରହି ତଦନ୍ତ କରିଛନ୍ତି । ଗଣହତ୍ୟାର କାରଣ ସ୍ପଷ୍ଟ ହୋଇ ନଥିବାବେଳେ ବିଭିନ୍ନ ଦିଗରୁ ତଦନ୍ତ କରୁଛି ପୋଲିସ ।
ଦୀପାବଳିରେ ଅଘଟଣ ,ଗ୍ୟାରେଜରେ ଜଳିଗଲା ୫ଟି ବସ୍
ଭୁବନେଶ୍ବର: ଗ୍ୟାରେଜରେ ଜଳିଗଲା ୫ଟି ବସ୍ । ଭୁବନେଶ୍ବର ପାତ୍ରପଡ଼ାରେ ଘଟିଛି ଅଘଟଣ । ୫ଟି ବସ ଏକକାଳୀନ ଜଳିଯାଇଛି । ବାଣ ଫୁଟାଉଥିବା ବେଳେ ନିଆଁ ଲାଗିଥିବା ସୂଚନା ମିଳିଛି । ଘଟଣାସ୍ଥଳରେ ଅଗ୍ନିଶମ ବାହିନୀ ପହଞ୍ଚି ନିଆଁକୁ ଆୟତ୍ତ କରିଛି । ଦୀପାବଳିରେ ଏଭଳି ଅଘଟଣ ଘଟିଥିବାବେଳେ କୌଣସି ଲୋକ ଆହତ ହୋଇ ନାହାନ୍ତି ।
ସେନା ଜ୍ୟାକେଟରେ ପ୍ରଧାନମନ୍ତ୍ରୀ: ହିମାଚଳ ପ୍ରଦେଶର ଲେପଚାରେ ଯବାନଙ୍କ ସହ ପାଳିଲେ ଦୀପାବଳି
ଲେପଚା: ପ୍ରତିବର୍ଷ ପରି ଚଳିତବର୍ଷ ମଧ୍ୟ ଯବାନଙ୍କ ସହ ଦୀପାବଳି ପାଳିଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ହିମାଚଳ ପ୍ରଦେଶର ଲେପଚା ଯାଇ ସୁରକ୍ଷାବାହିନୀଙ୍କ ସହ ଦୀପାବଳି ପାଳନ କରିଛନ୍ତି ମୋଦି । ଏହି ଅବସରରେ ସେନା ଜ୍ୟାକେଟରେ ତାଙ୍କୁ ଦେଖିବାକୁ ମିଳିଥିଲା । ହିମାଚଳ ପ୍ରଦେଶରେ ପହଞ୍ଚିବା ପରେ ସୀମାନ୍ତ ଲେପଚାକୁ ଯାଇ ଯବାନଙ୍କୁ ଭେଟିଛନ୍ତି ପ୍ରଧାନମନ୍ତ୍ରୀ ।
ଲେପଚାରେ ପହଞ୍ଚିବା ପରେ ସୁରକ୍ଷା କର୍ମୀଙ୍କ ସହ ଦୀପାବଳି ପାଳନ କରିଛନ୍ତି । ଯବାନଙ୍କୁ ଦୀପାବଳିର ଶୁଭେଚ୍ଛା ଜଣାଇଥିଲେ ପ୍ରଧାନମନ୍ତ୍ରୀ । ଏହାସହ ଯବନାଙ୍କୁ ମୁଠା ଖୁଆଇଥିଲେ । ଏହି ଅବସରରେ ଯବାନଙ୍କ ସହ ବିଭିନ୍ନ ପ୍ରସଙ୍ଗରେ ଆଲୋଚନା ମଧ୍ୟ କରିଥିଲେ ।
ଲେପଚାରେ ପହଞ୍ଚିବା ପରେ ସୋସିଆଲ ମିଡ଼ିଆ ଏକ୍ସରେ ଏକ ପୋଷ୍ଟ କରି ଲେଖିଥିଲେ- ଆମ ବୀର ଯବାନଙ୍କ ସହ ଦୀପାବଳି ପାଳନ କରିବାକୁ ହିମାଚଳ ପ୍ରଦେଶରେ ପହଞ୍ଚି ଗଲିଣି ।
ସାରା ଦେଶ ଦୀପାବଳି ପାଳୁଥିବା ବେଳେ ସୀମା ସୁରକ୍ଷାରେ ମୁତୟନ ଯବାନ ସେମାନଙ୍କ ଡ୍ୟୁଟି କରୁଛନ୍ତି । ଏମିତି ସ୍ଥିତିରେ ଏହି ପବିତ୍ର ଦିନରେ ସେମାନେ ନିଜ ପରିବାରଠାରୁ ଦୂରରେ ରହୁଥିବାରୁ ପ୍ରତିବର୍ଷ ପ୍ରଧାନମନ୍ତ୍ରୀ ଦୀପାବଳି ପାଳନ କରିବାକୁ ଯବାନଙ୍କ ପାଖକୁ ଯାଇଥାନ୍ତି ।
୨୦୧୪ରେ ପ୍ରଧାନମନ୍ତ୍ରୀ ହେବା ପରେ ମୋଦି ଦୀପାବଳି ପାଳନ କରିବାକୁ ସିୟାଚୀନରେ ମୁତୟନ ଯବାନଙ୍କ ପାଖକୁ ଯାଇଥିଲେ । ୨୦୧୫ରେ କାରଗିଲରେ ମୁତୟନ ଯବାନଙ୍କ ସହ ଦୀପାବଳି ପାଳନ କରିଥିଲେ ମୋଦି । ସେହିପରି ୨୦୧୬ରେଲଦାଖ ଯାଇ ଯବାନଙ୍କ ସହ ଦୀପାବଳି ପାଳନ କରିଥିଲେ ।
ISIS ଲିଙ୍କରେ ୩ ଛାତ୍ରଙ୍କ ସମେତ ୪ ଗିରଫ
ଅଲିଗଡ଼: ଆତଙ୍କବାଦୀ ସଂଗଠନ ISIS ଲିଙ୍କରେ ଉତ୍ତରପ୍ରଦେଶରୁ ୪ ଜଣ ଗିରଫ । ଗିରଫଙ୍କ ମଧ୍ୟରେ ରହିଛନ୍ତି ଅଲିଗଡ଼ ମୁସଲିମ ବିଶ୍ବବିଦ୍ୟାଳୟର ୩ ଛାତ୍ର । । ୟୁପି ପୋଲିସର ଆଣ୍ଟି ଟେରଟିଷ୍ଟ ସ୍କ୍ବାଡ୍ ଏମାନଙ୍କୁ ଗିରଫ କରିଛି । ଗିରଫ ଛାତ୍ର ସମ୍ଭଲ ଜିଲ୍ଲାର ବୋଲି ଜଣାପଡିଛି । ଏମାନେ ହେଲେ ନମାନ, ନାଜିମ ଏବଂ ନାଭେଦ ।
ISISର ଅଲିଗଡ଼ ମଡ୍ୟୁଲ ଲିଙ୍କରେ ସମସ୍ତେ ଗିରଫ ହୋଇଛନ୍ତି । ଅଭିଯୁକ୍ତଙ୍କ ପାଖରୁ ଆତଙ୍କବାଦ ପ୍ରଚାର ପ୍ରସାର କରୁଥିବା ଏକାଧିକ ଆପତ୍ତିଜନକ ଲିଫଲେଟ୍ ଜବତ ହୋଇଛି । ପୂର୍ବରୁ ଅଲିଗଡ଼ ମୁସଲିମ ବିଶ୍ବବିଦ୍ୟାଳୟରୁ ୨ ଜଣଙ୍କୁ ISIS ଲିଙ୍କରେ ଗିରଫ କରିଥିଲା ୟୁପି ଏଟିଏସ୍ । ଦୁଇ ଜଣଙ୍କୁ ଧରିବା ପରେ ISIS ଲିଙ୍କର ଚେର ଖୋଜି ବାହାର କରିଛି ଏଟିଏସ । ଲିଙ୍କରେ ଆଉ କିଏ ଅଛନ୍ତି ସେମାନଙ୍କୁ ଠାବ କରିବାକୁ ଏଟିଏସ୍ ଛାନବିନ ଚଳାଇଛି ।
୩ ଛାତ୍ରଙ୍କ ସହ ରକିଭ୍ ଇମାନ ଅନସାରୀ ନାମକ ଅନ୍ୟ ଜଣେ ବ୍ୟକ୍ତି ମଧ୍ୟ ଆତଙ୍କବାଦୀ ଲିଙ୍କରେ ଗିରଫ ହୋଇଛି । ଗିରଫ ରକିଭ୍ ଭଦୋହି ଜିଲ୍ଲାର ବାସିନ୍ଦା । ଏମାନେ ISISର ଅଲିଗଡ଼ ଲିଙ୍କରେ ରହିଥିଲେ ।
ପାଲେଷ୍ଟାଇନ ଉପରେ କବଜାକୁ ଭାରତ ନାପସନ୍ଦ, ଇସ୍ରାଏଲ ବିରୋଧରେ ଦେଲା ଭୋଟ
ନୂଆଦିଲ୍ଲୀ: ଜାତିସଂଘ ପ୍ରସ୍ତାବକୁ ନେଇ ଇସ୍ରାଏଲକୁ ଭାରତର ବିରୋଧ । ପାଲେଷ୍ଟାଇନ ସହ ଇସ୍ରାଏଲର ଯୁଦ୍ଧ ଲାଗି ରହିଥିବାବେଳେ ପାଲେଷ୍ଟାଇନ ଉପରେ କବଜାକୁ ବିରୋଧ କରିଛି ଭାରତ । ପାଲେଷ୍ଟାଇନ ଉପରେ ଇସ୍ରାଏଲର କବଜାକୁ ନେଇ ଜାତିସଂଘରେ ଆଗତ ହୋଇଥିଲା ପ୍ରସ୍ତାବ । ଏହି ପ୍ରସ୍ତାବକୁ ବିରୋଧ କରି ଇସ୍ରାଏଲ ବିପକ୍ଷରେ ଭୋଟ ଦେଇଛି ଭାରତ । ତେବେ ଆମେରିକା ଓ କାନାଡା ସହ ୭ ଦେଶ ଇସ୍ରାଏଲ ସମର୍ଥନରେ ଭୋଟ ଦେଇଛନ୍ତି ।
ଜାତିସଂଘର ଏହି ପ୍ରସ୍ତାବ ଉପରେ ଭୋଟ ଦେବାରୁ ବିରତ ରହିଥିଲେ ୧୮ ଦେଶ । ପାଲେଷ୍ଟାଇନର ପୂର୍ବ ଜେରୁଜେଲମ ଏବଂ ସିରିଆ ସୀମାନ୍ତ ଗୋଲାନ ଅଂଚଳରେ ପ୍ରଭୁତ୍ବ ବିସ୍ତାର କରି ଚାଲିଛି ଇସ୍ରାଏଲ । ସେଠାରେ ନିଜର ସୈନ୍ୟ ସଂଖ୍ୟା ବୃଦ୍ଧି କରିବା ସହ ଅଂଚଳକୁ ନିଜ ଅକ୍ତିଆରକୁ ନେଇଛି । ଏହା ପୂର୍ବରୁ ପାଲେଷ୍ଟାଇନ ଉପରେ ଇସ୍ରାଏଲର ଆକ୍ରମଣକୁ ନେଇ ଜାତିସଂଘ ଯୁଦ୍ଧ ବନ୍ଦ କରିବାକୁ ପ୍ରସ୍ତାବ ଆଣିଥିଲା । ଏହି ପ୍ରସ୍ତାବରେ ଭୋଟ ଦେବାରୁ ବିରତ ରହିଥିଲା ଭାରତ ।
ଅକ୍ଟୋବର ୭ ତାରିଖରେ ଇସ୍ରାଏଲ ଉପରେ ହମାସ ଆତଙ୍କବାଦୀଙ୍କ ଆକ୍ରମଣ ପରଠାରୁ ଇସ୍ରାଏଲ ପାଲେଷ୍ଟାଇନ ଉପରେ ଆକ୍ରମଣ କରିଛି । ଉତ୍ତର ଗାଜାକୁ ନିଜ ଅକ୍ତିଆରକୁ ନେବା ସହ ହମାସ ଆତଙ୍କବାଦୀଙ୍କୁ ନିପାତ ନେଇ ଚଳାଇଛି ଗ୍ରାଉଣ୍ଡ ଅପରେସନ । ବର୍ତ୍ତମାନ ସୁଦ୍ଧା ଏହି ଅପରେସନରେ ପାଲେଷ୍ଟାଇର ୧୧ ହଜାରରୁ ଅଧିକ ଲୋକଙ୍କ ମୃତ୍ୟୁ ହୋଇସାରିଲାଣି । ହମାସ ଆତଙ୍କବାଦୀଙ୍କ ଆକ୍ରମଣରେ ଯାଇଥିଲା ୧୪ ଶହ ଇସ୍ରାଏଲ ନାଗରିକଙ୍କ ଜୀବନ । ଏବେ ବି ୨ଶହରୁ ଅଧିକ ପଣବନ୍ଦୀଙ୍କୁ ନିଜ ପାଖରେ ରଖିଛନ୍ତି ହମାସ ଆତଙ୍କବାଦୀ । ସେମାନଙ୍କ ମଧ୍ୟରେ ଅନେକ ବିଦେଶୀ ନାଗରିକ ଅଛନ୍ତି । ପଣବନ୍ଦୀଙ୍କୁ ଛାଡିବା ପର୍ଯ୍ୟନ୍ତ ଆକ୍ରମଣ ଜାରି ରହିବ ବୋଲି ଇସ୍ରାଏଲ ପ୍ରଧାନମନ୍ତ୍ରୀ ବେଂଜାମିନ ନେତନ୍ୟାହୁ କହିଛନ୍ତି ।
ବିଶ୍ବକପ୍: ଟସ୍ ଜିତି ଭାରତର ବ୍ୟାଟିଂ ନିଷ୍ପତ୍ତି
ବେଙ୍ଗାଲୁରୁ: ଚଳିତ ବିଶ୍ବକପର ଶେଷ ଲିଗ୍ ମ୍ୟାଚ୍ । ଭାରତ ଓ ନେଦରଲାଣ୍ଡସ ମଧ୍ୟରେ ଚାଲିଛି ଟକ୍କର । ଟସ ଜିତି ପ୍ରଥମେ ବ୍ୟାଟିଂ କରୁଛି ଭାରତ । ଆଜିର ମ୍ୟାଚ୍ ଜିତି ଅପରାଜେୟ ରହିବାକୁ ଲକ୍ଷ୍ୟ ରଖିଛି ଟିମ ଇଣ୍ଡିଆ ।
କୋହଲି ୫୦ତମ ଶତକ କରି ରେକର୍ଡ କରିବା ଲକ୍ଷ୍ୟ ରଖିଛନ୍ତି । ଆନ୍ତର୍ଜାତିକ ଦିନିକିଆରେ ୫୦ ତମ ଶତକ କଲେ ମାଷ୍ଟରବ୍ଲାଷ୍ଟର ସଚିନ ତେନ୍ଦୁଲକରଙ୍କ ରେକର୍ଡ ଭାଙ୍ଗିବେ ବିରାଟ କୋହଲି । ସେପଟେ ବିଶ୍ବକପରେ ସମସ୍ତ ୮ ଲିଗ୍ ମ୍ୟାଚ ଜିତିଥିବା ଭାରତ ଆଜିର ମ୍ୟାଚ୍ ଜିତି ଅପରାଜେୟ ରହିବାକୁ ଲକ୍ଷ୍ୟ ରହିଛି । ଆଜିର ମ୍ୟାଚ୍ ଜିତି ସେମିଫାଇନାଲରେ ପୂର୍ଣ୍ଣ ଆତ୍ମବିଶ୍ବାସ ସହ ପଡ଼ିଆକୁ ଓହ୍ଲାଇବ ଟିମ ଇଣ୍ଡିଆ । ସେମିରେ ନ୍ୟୁଜିଲାଣ୍ଡ ସହ ହେବ ଟକ୍କର । ଭାରତୀୟ ଟିମ ଅପରିବର୍ତ୍ତିତ ରହିଛି । ୪ ସ୍ପେଶାଲିଷ୍ଟ ବୋଲରଙ୍କୁ ନେଇ ଖେଳିୁଛି ଟିମ ଇଣ୍ଡିଆ ।
ଆସନ୍ତା ୧୫ ତାରିଖରେ ପ୍ରଥମ ସେମିଫାଇନାଲରେ ନ୍ୟୁଜିଲାଣ୍ଡ କୁ ଭେଟିବ ଭାରତ । ୧୬ ନଭେମ୍ବରରେ ଦ୍ବିତୀୟ ସେମିଫାଇନାଲ ଅଷ୍ଟ୍ରେଲିଆ ଓ ଦକ୍ଷିଣ ଆଫ୍ରିକା ମଧ୍ୟରେ ଖେଳାଯିବ । ସେହିପରି ବିଶ୍ବକପ ଫାଇନାଲ ୧୯ ନଭେମ୍ବରରେ ଖେଳାଯିବ ।