ଜମ୍ମୁରେ ବିଗ୍ ବସ୍ ବିଜେତା ଏଲଭିଶ୍ ଯାଦବଙ୍କୁ ଆକ୍ରମଣ
ପୁଣି ଥରେ ଅଡୁଆରେ ଏଲଭିଶ୍ ଯାଦବ । ଏଥର ଜମ୍ମୁରେ ଏଲଭିଶ୍ଙ୍କୁ ଆକ୍ରମଣ ଅଭିଯୋଗ ହୋଇଛି । ବିଗ ବସ୍ ଓଟିଟି ୨ ବିଜେତା ଏଲଭିଶ୍ ଏକ ଭିଡିଓ ସୋସିଆଲ ମିଡିଆରେ ସେୟାର କରିଛନ୍ତି । ଯେଉଁଥିରେ ତାଙ୍କୁ ଆକ୍ରମଣ କରାଯାଉଥିବା ଦେଖିବାକୁ ମିଳିଛି । ଗତ ଡିସେମ୍ବର ୨୦ରେ ଏଲଭିଶ୍ ତାଙ୍କ ସାଙ୍ଗ ରାଘବ ଶର୍ମା ସହ ବୈଷ୍ଣୋ ଦେବୀ ମନ୍ଦିର ଦର୍ଶନ କରିବାକୁ ଯାଇଥିଲେ ।
ସେମାନେ ମନ୍ଦିରରୁ ଗୋଡ କାଢିବା ମାତ୍ରେ କିଛି ଯୁବକ ତାଙ୍କ ସାଙ୍ଗଙ୍କ କଲର୍ ଭିଡି ବାହାରକୁ ଟାଣି ନେଇଥିଲେ । ପ୍ରକୃତରେ କିଛି ଯୁବକ ୟୁଟ୍ୟୁବର ଏଲଭିଶ୍ ଓ ତାଙ୍କ ସାଙ୍ଗଙ୍କ ସହ ଫଟୋ ଉଠାଇବା ପାଇଁ କହିଥିଲେ । କିନ୍ତୁ ସେମାନେ ମନା କରିଦେଇଥିଲେ । ଏଥିରେ ଉତକ୍ଷିପ୍ତ ହୋଇ ଯୁବକ ମାନେ ଏଲଭିଶ୍ ଓ ତାଙ୍କ ସାଙ୍ଗକୁ ଘେରି ଯାଇଥିଲେ । ସେମାନେ ରାଘବଙ୍କ କଲର୍ ଧରି ଟାଣି ନେବାବେଳେ ଏଲଭିଶ୍ ଘଟଣାସ୍ଥଳରୁ ଅନ୍ୟତ୍ର ଚାଲିଯାଇଥିଲେ ।
ଗତ ନଭେମ୍ବରରେ ସାପବିଷ ମାମଲାରେ ବିବାଦ ଘେରକୁ ଚାଲିଆସିଥିଲେ ଏଲଭିଶ୍ । ପାର୍ଟିରେ ସାପ ବିଷ ବ୍ୟବହାର ହେଉଥିବା ନେଇ ଖବର ପାଇବା ପରେ ପୋଲିସ ୫ ଜଣଙ୍କୁ ଗିରଫ କରିଥିଲା । ଅଭିଯୁକ୍ତଙ୍କୁ ପଚରାଉଚୁରା ପରେ ଏଲଭିଶ୍ଙ୍କ ନାଁ ସାମନାକୁ ଆସିଥିଲା । ବିଗ୍ ବସ୍ ଓଟିଟି ବିଜେଡାଙ୍କ ପାର୍ଟିକୁ ଅଭିଯୁକ୍ତ ମାନେ ସାପ ବିଷ ଯୋଗାଉଥିବା ପୋଲିସ ନିକଟରେ ସେମାନେ ସ୍ବୀକାର କରିଥିଲେ ।
ଆଇପିଏଲ ଖେଳିବେନି ପାଣ୍ଡ୍ୟା!
ନୂଆଦିଲ୍ଲୀ: ଟିମ ଇଣ୍ଡିଆ ଓ ମୁମ୍ବାଇ ଇଣ୍ଡିଆନ୍ସକୁ ଲାଗିପାରେ ଧକ୍କା । ଅଲରାଉଣ୍ଡର ହାର୍ଦ୍ଦିକ ପାଣ୍ତ୍ୟା ଆଫଗାନିସ୍ତାନ ବିରୋଧରେ ହେବାକୁ ଥିବା ତିନିଟିକିଆ ଟି-୨୦ ସିରିଜରେ ଖେଳିବା ନେଇ ଏବେ ବି ଲାଗି ରହିଛି ସସପେନ୍ସ । ଏହାସହ ଆଇପିଏଲ ୨୦୨୪ ସିଜନରେ ବି ହାର୍ଦ୍ଦିକଙ୍କ ସାମିଲ ହେବା ନେଇ ଉଠିଛି ପ୍ରଶ୍ନ । ଆଇସିସି ଓ୍ବାର୍ଲଡ କପ୍ ୨୦୨୩ ଚାଲିଥିବାବେଳେ ହାର୍ଦ୍ଦିକ ପାଣ୍ଡ୍ୟା ଆହତ ହୋଇଥିଲେ । ତାଙ୍କ ଗୋଇଠିରେ କ୍ଷତ ସୃଷ୍ଟି ହୋଇଥିଲା । ଏହାକୁ ନେଇ ସେ ଦୁର୍ଭାଗ୍ୟଜନକ ଭାବେ ଟୁର୍ଣ୍ଣାମେଣ୍ଟରୁ ବିଦାୟ ନେଇଥିଲେ । ହେଲେ ଏବେ ବି ସେ ଖେଳିବାକୁ ଶତପ୍ରତିଶତ ଫିଟ ହୋଇନାହାଁନ୍ତି । ସେଥିପାଇଁ ମୁମ୍ବାଇ ଇଣ୍ଡିଆନସ ପାଇଁ କ୍ୟାପଟେନ୍ସି କରିପାରିବେ କି ନାହିଁ ସେ ନେଇ ଆଶଂକା ସୃଷ୍ଟି ହୋଇଛି । ସେପଟେ ପାଣ୍ଡ୍ୟା ମୁମ୍ବାଇ ଇଣ୍ଡିଆନ୍ସକୁ ଘରବାହୁଡ଼ା ହେବା ପରେ ଫ୍ୟାନ୍ସଙ୍କ ମଧ୍ୟରେ ଅସନ୍ତୋସ ଦେଖିବାକୁ ମିଳିଛି। ମୁମ୍ବାଇ ଇଣ୍ଡିଆନ୍ସର ଫଲୋର୍ସ ସଂଖ୍ୟା ମଧ୍ୟ କମିଯାଇଛି । ସେପଟେ ବିଶ୍ବକପ ସମୟରେ ଆହତ ହୋଇଥିବା ପାଣ୍ଡ୍ୟା କ୍ରିକେଟ ମହାକୁମ୍ଭ ଅଧାରୁ ବାଦ ପଡ଼ିଥିଲେ । ଏଯାବତ ସେ ଦଳକୁ ଫେରି ନଥିବାବେଳେ କେବେ ଫେରିବେ ତାକୁ ନେଇ ଆରମ୍ଭ ହୋଇଛି ଚର୍ଚ୍ଚା । ମାତ୍ର ତାଙ୍କ ଆହତ ଅନେକ ଫ୍ୟାନ୍ସଙ୍କୁ ହତୋତ୍ସାହିତ କରିଛି ।
ନର୍କ ର ଦୃଶ୍ଯର ମଜା ନେଉଛନ୍ତି ପର୍ଯ୍ଯଟକ
ନୂଆଦିଲ୍ଲୀ: ଫୁଟୁଥିବା ଲାଭା ପାଖରେ ଛୁଟି ମନାଉଛନ୍ତି ପର୍ଯ୍ଯଟକ । ଲୋକେ ଛୁଟି ମନାଇବାକୁ ବେଳାଭୂମି ହେଉ ଅବା ପ୍ରାକୃତିକ ସୌନ୍ଦର୍ଯ୍ଯରେ ଭରପୂର ଥିବା ଜାଗାକୁ ବୁଲିବାକୁ ଯାଆନ୍ତି । କିନ୍ତୁ ଏଠି ଲୋକେ ବେଳାଭୂମି କି କେଉଁ ପାହାଡ ପର୍ବତ ଘେରା ଅଞ୍ଚଳକୁ ଯାଉନାହାନ୍ତି ଯେଉଁଠି ଆଗ୍ନେୟଗିରି ରହିଛି ସେଠାକୁ ବୁଲିବାକୁ ଯାଉଛନ୍ତି । କଥା ଟା ଆଶ୍ଚର୍ଯ୍ଯ ଲାଗୁଥିଲେ ବି ସତ , ଆଗ୍ନୋୟଗିରି ରେ ଏବେ ବି ଆଗ୍ନେୟ ଉଦ୍ଗୀରଣ ଚାଲିଛି କିନ୍ତୁ ନିଜ ଜୀବନ କୁ ବାଜି ଲଗାଇ ଲୋକେ ଛୁଟି କଟାଇବା ପାଇଁ ଏହି ଆଗ୍ନେୟଗିରିକୁ ଯାଉଛନ୍ତି । ଆଇସ୍ଲାଣ୍ଡର ଗ୍ରୀଡାଓ୍ବିକ୍ ରେ ଥିବା ଗୋଟେ ଆଗ୍ନୋୟଗିରି ଫାଟି ସେଥିରୁ ଲାଭା ବାହାରୁଛି । ଲାଭା ଏତେ ଭୟଙ୍କର ଭାବରେ ବାହାରୁଛି ଯେ ଆକାଶ ଉଚ୍ଚା ଯାଏଁ ତାର ଧୂଆଁ ଉଠୁଛି । ଆକାଶ ମଧ୍ଯ କଳା ରଙ୍ଗର ହୋଇଯାଇଛି । ଯେଉଁଥିପାଇଁ ଲୋକଙ୍କର ଜୀବନ ପ୍ରତି ବିପଦ ସୃଷ୍ଟି ହେବାର ସମ୍ଭାବନା ରହିଛି । ସେଠାରେ ଲୋକ ମାନଙ୍କୁ ଚେତାଇ ଦିଆଯାଇଛି ଯେ କେହି ବି ଏହି ଆଗ୍ନୋୟଗିରି ପାଖକୁ ଯାଆନ୍ତୁ ନାହିଁ । କିନ୍ତୁ ପର୍ଯ୍ଯଟକ ମାନେ କାହାର କଥାକୁ ଖାତିର ନ କରି ବହୁ ସଂଖ୍ଯାରେ ଏଠାକୁ ଛୁଟି ମନାଇବାକୁ ଆସୁଛନ୍ତି । ଆଉ ମଧ୍ଯ ଏହାର ବହୁତ ପାଖକୁ ବି ଯାଉଛନ୍ତି । 
ଡେଲି ଷ୍ଟାରର ରିପୋର୍ଟ ଆଧାରରେ , ଏହି ଜ୍ବାଳାମୁଖୀର ନାଁ ସୁଧଜୁକା ଯାହାକି ଗ୍ରୀଡାଓ୍ବିକ୍ ସହର ପାଖରେ ଅବସ୍ଥିତ । ଏଠି ସୋମବାର ଦିନ ବହୁତ ବଡ ଆକାରରେ ଲାଭା ଉଦ୍ଗୀରଣ ହେବା ପରେ ଫୁଟୁଥିବା ଲାଭା ଓ ଧୁଆଁ ବହୁତ ଉପରକୁ ଉଠୁଥିବାର ଦେଖିବାକୁ ମିଳିଥିଲା । ଏଠି ଯେତେ ବି ବିପଦ ପରିସ୍ଥିତି ଥାଉ ନା କାହିଁକି ପର୍ଯ୍ଯଟକ ମାନେ ବିଲକୁଲ୍ ଡରୁ ନଥିବାର ଦେଖିବାରୁ ମିଳିଛି । ସେଠିକାର ପର୍ଯ୍ଯାବରଣ ମନ୍ତ୍ରାଳୟ ପର୍ଯ୍ଯଟକ ମାନେ ଜ୍ବାଳାମୁଖୀର ଏତେ ପାଖକୁ ଯାଉଥିବାର ଦେଖି ଖୁସି ନାହାନ୍ତି । ପର୍ଯ୍ଯାବରଣ ମନ୍ତ୍ରାଳୟ ଏକ ବୟାନ ଜାରି କରି କହିଛି ଯେ , ନିଜ ଛଡା ଅନ୍ଯ ମାନଙ୍କର ବିଷୟରେ ଭାବନ୍ତୁ , ସାର୍ବଜନୀକ ସୁରକ୍ଷାର ନିର୍ଦ୍ଦେଶାବଳୀ ନିୟମର ପାଳନ ଚିନ୍ତା କରନ୍ତୁ ।
୯ ମାସ ପରେ ଜେଲରୁ ମୁକୁଳିଲେ ୟୁଟ୍ୟୁବର ମନୀଷ କାଶ୍ୟପ
ପାଟନା: ସୋସିଆଲ ମିଡିଆରେ ବେଶ ଭାଇରାଲ ହେବା ସହ ଭିନ୍ନ ଢ଼ଙ୍ଗରେ ଖବର ପରିବେଶଣ କରୁଥିବା ୟୁଟ୍ୟୁବର ମନୀଷ କାଶ୍ୟପ ଦୀର୍ଘ ୯ ମାସ ପରେ ପାଟନା ହାଇକୋର୍ଟରୁ ସର୍ତ୍ତମୂଳନ ଜାମିନ ପାଇଛନ୍ତି । ବିହାରର ବିୟୂ ଜେଲରେ ସେ ରହିଥିଲେ । ତାମିଲନାଡୁ ଜେଲକୁ ପଠାଯିବ ବୋଲି କୁହାଯାଇଥିଲା । ମାତ୍ର ସେ ୯ ମାସ ଧରି ବିବାହରରେ ଜେଲରେ ରହିଥିଲେ । ତେବେ ଜେଲରୁ ମୁକୁଳିବା ପରେ ମନୀଷ ନିଜର ପ୍ରତିକ୍ରିୟାରେ କହିଥିଲେ କି, ବିହାରରେ କଂସ ସରକାର ଚାଲିଛି । ମାତ୍ର ବେଶି କିଛି କହିବାର ସୁଯୋଗ ପାଇ ନଥିଲେ । ସେ ମୁକୁଳିବାବେଳେ ଜେଲ ସମାନାରେ ତାଙ୍କୁ ଦେଖିବା ପାଇଁ ଲୋକଙ୍କ ଗହଳି ଲାଗିଥିଲା । କାର ପାଖରେ ଲୋକମାନେ ଗହଳି କରିଥିବାବେଳେ ତାଙ୍କୁ ଦେଖିବା ପାଇଁ ଭିଡ଼ ଜମାଇଥିଲେ ।
ସୂଚନା ଥାଉକି, ମାର୍ଚ୍ଚ ୧୨, ୨୦୨୩ ତାରିଖରେ ସେ ଜେଲ ଯାଇଥିଲେ । ତାମିଲନାଡୁରେ ତାଙ୍କ ବିରୋଧରେ ମାମଲା ରୁଜୁ ହୋଇଥିଲା । ହାତଗୋଡ଼ ବନ୍ଧା ହୋଇଥିବା ଜଣେ ବ୍ୟକ୍ତିଙ୍କ ଭିଡିଓକୁ ନିଜ ୟୁଟ୍ୟୁବରେ ଅପଲୋଡ କରିଥିଲେ । ଏହା ଜନତାଙ୍କ ଭାବାବେଗକୁ କୁଠାରଘାତ କରୁଥିବା ଅଭିଯୋଗରେ ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଥିଲା । ତାମିଲନାଡ଼ୁ ସରକାର ଏନଏସଏ ଆଧାରରେ ତାଙ୍କ ବିରୋଧରେ ମାମଲା ରୁଜୁ କରିଥିବାବେଳେ ତାଙ୍କୁ ଜେଲ ହୋଇଥିଲା । ତାଙ୍କୁ ଗିରଫ କରାଯିବା ପରେ ବହୁ ପ୍ରତିକ୍ରିୟା ମଧ୍ୟ ଦେଖିବାକୁ ମିଳିଥିଲା ।
ଅରବିନ୍ଦ କେଜ୍ରିୱାଲଙ୍କୁ EDର ତୃତୀୟ ସମନ୍, ଏଥର ହାଜର ନହେଲେ କରିବେ କଣ ?
ନୂଆଦିଲ୍ଲୀ: ଅବକାରୀ ନୀତି ସହ ଜଡିତ ଯାଞ୍ଚ ମାମଲାରେ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କୁ ଜାନୁଆରୀ ୩ରେ ହାଜର ହେବାକୁ ନୂଆ ସମନ ଜାରି ହୋଇଛି । ତୃତୀୟ ଥର ପାଇଁ ଆପ୍ର ସଂଯୋଜକ କେଜ୍ରିୱାଲଙ୍କୁ ସମନ ଜାରି କରାଯାଇଛି । ଏହା ପୂର୍ବରୁ ଦୁଇ ଥର କେଜ୍ରିୱାଲଙ୍କୁ ସମନ ଜାରି ହୋଇଥିବାବେଳେ ସେ ହାଜର ହେବାକୁ ମନା କରି ଦେଇଥିଲେ ।
ଯଦି ତୃତୀୟ ଥର ପାଇଁ କେଜ୍ରିୱାଲ ଇଡିରେ ହାଜର ହେବେ ନାହିଁ ତେବେ ଏଜେନ୍ସୀ ତାଙ୍କ ବିରୁଦ୍ଧରେ ସ୍ବତନ୍ତ୍ର କୋର୍ଟରୁ ୱାରେଣ୍ଟ ଜାରି କରିପାରେ । ତଦନ୍ତରେ ଅସହଯୋଗ କରୁଥିବା ନେଇ କେଜ୍ରିୱାଲଙ୍କ ପାଇଁ ଅଡୁଆ ବଢିପାରେ । ଧାରା ୧୯ ଆଧାରରେ ତାଙ୍କୁ ଗିରଫ କରିବା ପ୍ରକ୍ରିୟା ଆରମ୍ଭ ହୋଇପାରେ । ଯଦି ଇଡି ଚାହିଁବେ କେଜ୍ରିୱାଲଙ୍କ ସହ ଜଡିତ ଜାଗାରେ ବି ଚଢାଉ କରିପାରିବେ । ସେପଟେ ଇଡି ସମନକୁ କୋର୍ଟରେ ଚ୍ୟାଲେଞ୍ଜ କରିବା ପାଇଁ କେଜ୍ରିୱାଲଙ୍କ ପାଖରେ ଅଲଗା ବିକଳ୍ପ ମଧ୍ୟ ରହିଛି ।
ସୋସିଆଲ ମିଡିଆ X ର ଏକ ପୋଷ୍ଟରେ ଆପ୍ ନେତା ସୌରଭ ଭରଦ୍ବାଜ କହିଛନ୍ତି ମୁଖ୍ୟମନ୍ତ୍ରୀ କେଜ୍ରିୱାଲ ଏବେ ଯୋଗକେନ୍ଦ୍ରରେ ଅଛନ୍ତି । ଇଡି ବି ଜାଣିଛନ୍ତି ଯେ କେଜ୍ରିୱାଲଙ୍କୁ ଏବେ ସମନ ଦିଆଯାଇ ପାରିବ ନାହିଁ । କାରଣ ସେ ୧୦ ଦିନ ପର୍ଯ୍ୟନ୍ତ ଯୋଗ କେନ୍ଦ୍ରରେ ରହିବେ । ସେତେଦିନ ପର୍ଯ୍ୟନ୍ତ ତାଙ୍କ ପାଖରେ ଯୋଗାଯୋଗର କୌଣସି ମାଧ୍ୟମ ରହିବ ନାହିଁ । ଏହି ସମନ୍ ଆଇନ ପ୍ରକ୍ରିୟା ଠୁ ଅଧିକ କେନ୍ଦ୍ର ସରକାରଙ୍କ ରାଜନୈତିକ ଚାଲ୍ ବୋଲି ପ୍ରତୀତ ହେଉଛି ।
କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କୁ ଟ୍ୟାଗ୍ କରି ଟୁଇଟ୍ କଲେ ସାଂସଦ ମାନସ ମଙ୍ଗରାଜ, କହିଲେ ଭାଇ, ଡେରିରେ ହେଉ ପଛେ ଠିକ୍ କଥା କହିଛନ୍ତି
ଭୁବନେଶ୍ବର: ପୁଣି କେନ୍ଦ୍ରମନ୍ତ୍ରୀଙ୍କୁ ଟୁଇଟ୍ କରି ପରାମର୍ଶ ଦେଲେ ସାଂସଦ ମାନସ ମଙ୍ଗରାଜ। ସୋସିଆଲ୍ ମିଡିଆ ଇନଫ୍ଲୁଏନସର କାମିଆ ଜାନିଙ୍କ ଶ୍ରୀମନ୍ଦିର ପ୍ରବେଶକୁ ନେଇ ଗଲା ଦୁଇଦିନ ହେଲା ରାଜ୍ୟ ବିଜେପି ନେତା ଅଯଥା ବିବାଦ ସୃଷ୍ଟି କରିବାକୁ ଚେଷ୍ଟା କରୁଛନ୍ତି। ମିଛ ପ୍ରଚାର ଜରିଆରେ ଓଡ଼ିଶାକୁ ବଦମାନ କରିବାକୁ ଚକ୍ରାନ୍ତ ଚଳାଇ ଆସିଛନ୍ତି। ତେବେ ଏନେଇ ଆଜି ଧର୍ମେନ୍ଦ୍ର ପ୍ରଧାନ ଗଣମାଧ୍ୟମ ଆଗରେ ନିଜ ପ୍ରତିକ୍ରିୟା ରଖିଛନ୍ତି। ଯାହାକୁ ନେଇ ସାଂସଦ ମାନସ ମଙ୍ଗରାଜ କହିଛନ୍ତି, ଡେରିରେ ହେଉ ପଛେ ଆପଣ ଠିକ୍ କଥା କହିଛନ୍ତି । ମହାପ୍ରଭୁ ଶ୍ରୀ ଜଗନ୍ନାଥ ହେଉଛନ୍ତି ଓଡିଶା ତଥା ଓଡିଶା ବାହାରେ ରହୁଥିବା ସଭିଙ୍କର ଆଧ୍ୟାତ୍ମିକତାର ପ୍ରାଣକେନ୍ଦ୍ର ।
ହେଲେ, ବିଜେପିର କିଛି ନେତା ଗତ ଦୁଇ-ତିନି ଦିନ ଧରି ଓଡିଶାକୁ ଏବଂ ଶ୍ରୀକ୍ଷେତ୍ରକୁ ବଦନାମ କରିବାକୁ ଯେଉଁ ଅପଚେଷ୍ଟା କରିଛନ୍ତି ତାକୁ ସଭିଏଁ ଦେଖୁଛନ୍ତି । କାମିଆ ଜାନିଙ୍କୁ କେନ୍ଦ୍ର ସରକାର ଦେଶର ହିନ୍ଦୁ ମନ୍ଦିର ଐତିହ୍ୟ, ସଂସ୍କୃତିର ପ୍ରଚାର ପ୍ରସାର ପାଇଁ ନିୟୋଜିତ କରିଥିଲେ। ହେଲେ ଜଗନ୍ନାଥ ଧାମ ଆସି ପରିକ୍ରମା ପ୍ରକଳ୍ପର ଭିଡିଓ କଲେ କାହିଁକି ଅସୁବିଧା ହେଉଛି । କେବଳ ସେତିକି ନୁହେଁ କାହିଁକି ବିଜେପି ନେତା ଫେକ୍ ନ୍ୟୁଜ ଓ ଫେକ୍ ଭିଡିଓ ଜରିଆରେ ବଦନାମ କରିବାକୁ ଚେଷ୍ଟା କରୁଛନ୍ତି ବୋଲି ସେ ପାଲଟା ପ୍ରଶ୍ନ କରିଛନ୍ତି। କାମିଆ ଜାନି ଯଦି ରାମ ମନ୍ଦିରକୁ ପ୍ରମୋଟ୍ କରିବା ଠିକ୍, ତେବେ ପରିକ୍ରମା ପ୍ରକଳ୍ପକୁ ପ୍ରମୋଟ୍ କଲେ ଅସୁବିଧା କେଉଁଠି ରହିଲା? ଫେକ ନ୍ୟୁଜ୍ ଜରିଆରେ ଲୋକଙ୍କ ଭାବାବେଗ ସହ ଖେଳିଥିବା ରାଜ୍ୟ ବିଜେପିର ଏହି ନେତାଙ୍କ ବିରୋଧରେ ଆପଣ କାର୍ଯ୍ୟାନୁଷ୍ଠାନ ଗ୍ରହଣ କରନ୍ତୁ ବୋଲି ସାଂସଦ ମାନସ ମଙ୍ଗରାଜ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କୁ ପରାମର୍ଶ ଦେଇଛନ୍ତି।
ଭିସା ଦୁର୍ନୀତି ମାମଲା, କାର୍ତ୍ତି ଚିଦାମ୍ବରମଙ୍କୁ ଇଡିର ଜେରା
ନୂଆଦିଲ୍ଲୀ: ଭିସା ଦୁର୍ନୀତି ମାମଲା । ପୂର୍ବତନ କେନ୍ଦ୍ର ଅର୍ଥମନ୍ତ୍ରୀ ପି. ଚିଦାମ୍ବରମଙ୍କ ପୁଅ ତଥା କଂଗ୍ରେସ ସାଂସଦ କାର୍ତ୍ତି ଚିଦାମ୍ବରମଙ୍କୁ ପ୍ରବର୍ତ୍ତନ ନିର୍ଦ୍ଦେଶାଳୟର ଜେରା । ଜେରା କରିବା ଲାଗି ଗତ କିଛି ଦିନ ତଳେ ସମନ ଜାରି କରିଥିଲା ଇଡି । ପଞ୍ଜାବରେ ଏକ ପାଓ୍ବାର ପ୍ଲାଣ୍ଟ ପ୍ରତିଷ୍ଠା ଲାଗି ୨୦୧୧ରେ ତାଲଓ୍ବାଣ୍ଡି ସାବୋ ପାଓ୍ବାର ଲିମିଟେଡ ବା ଟିଏସପିଏଲର ଜଣେ ପ୍ରମୁଖ ପଦାଧିକାରୀଙ୍କ ଦ୍ବାରା କାର୍ତ୍ତି ଓ ତାଙ୍କର ଜଣେ ଘନିଷ୍ଠ ସହଯୋଗୀ ଏସ. ଭାସ୍କର ରମଣଙ୍କୁ ୫୦ ଲକ୍ଷ ଟଙ୍କା ଲାଞ୍ଚ ଦେବା ନେଇ ଅଭିଯୋଗ ହୋଇଥିଲା । ପଞ୍ଜାବରେ ଚୀନର ଏକ କମ୍ପାନି ଜରିଆରେ ପାଓ୍ବାର ପ୍ଲାଣ୍ଟ ପ୍ରତିଷ୍ଠା ଲାଗି ଯୋଜନା କରାଯାଇଥିଲା ଯେଉଁଥିରେ ଦୁର୍ନୀତିର ବାସ୍ନା ଆସିଥିଲା । ୨୬୩ଜଣ ଚୀନ ଶ୍ରମିକଙ୍କ ଲାଗି ପ୍ରୋଜେକ୍ଟ ଭିସା ପୁନଃ ପ୍ରଦାନ କରିବା ଲାଗି ଟିଏସପିଏଲର କର୍ତ୍ତୃପକ୍ଷ ୫୦ ଲକ୍ଷ ଟଙ୍କା ଲାଞ୍ଚ ଦେବା ଏଫଆଇଆରରେ ଦର୍ଶାଯାଇଥିଲା ।
ଚାଷୀଙ୍କୁ ମିଳିଲା ଆଶ୍ୱସ୍ତି, କଥା ରଖିଲେ ସରକାର
ଉମରକୋଟ: କଥା ରଖିଲେ ସରକାର। ଚାଷୀଙ୍କୁ ମିଳିଲା ଆଶ୍ୱସ୍ତି। ଓଡ଼ିଶା ଉଠା ଜଳସେଚନ ନିଗମ ଦ୍ଵାରା ବିଜୁ କୃଷକ ବିକାଶ ଯୋଜନାରେ ଡିପ୍ ବୋରୱେଲ ସେଚ କାର୍ଯ୍ୟକ୍ରମ ମାଧ୍ୟମରେ ବିଦ୍ୟୁତ୍ ସଂଯୋଗ ଓ ସୌର ଶକ୍ତି ପମ୍ପ ଜରିଆରେ ଗଭୀର ନଳକୂପ ପ୍ରକଳ୍ପ ସ୍ଥାପନ କରିବାକୁ ଆବେଦନ ପାଇଁ ଥିବା ଦରଖାସ୍ତ ଓ ପଞ୍ଜିକରଣ ତାରିଖ୍ ଘୁଞ୍ଚିଲା। ଡିସେମ୍ବର ୨୨ ରୁ ୩୦ କୁ ଘୁଞ୍ଚାଇଲେ ସରକାର । ଆସନ୍ତା ୩୦ ତାରିଖ ପର୍ଯ୍ୟନ୍ତ ବ୍ୟାଙ୍କ୍ ରେ ଡିପୋଜିଟ କରି ପାରିବେ ଚାଷୀ।ଚାଷ ଜମିରେ ନଳକୂପ ଖୋଳିବା ପାଇଁ ଅନ ଲାଇନ୍ ଆବେଦନ ତାରିଖ ପ୍ରଥମେ ୧୬ ଥିଲା । କେବଳ ଗୋଟିଏ ବ୍ୟାଙ୍କରେ ଡିପୋଜିଟ କରିବାକୁ ବିଭାଗ ତରଫରୁ ନିୟମ ଥିଲା । ଏହାପରେ ସମୟ ସୀମାକୁ ୨୨ ତାରିଖ କୁ ସମ୍ପ୍ରସାରଣ କରାଗଲା । କିନ୍ତୁ ଏହି ସମୟ ସୀମା କୁ ଆହୁରି ଅଧିକ ସମୟ ବଢ଼ାଇବା ପାଇଁ ଚାଷୀମାନେ ସରକାର ଙ୍କୁ ଅନୁରୋଧ କରିଥିଲେ । ଶେଷରେ ଆସନ୍ତା ୩୦ ତାରିଖକୁ ଶେଷ ଅବଧି ସମୟ ବୃଦ୍ଧି କରାଯାଇଛି। ସମୟ ସୀମା ବଢାଇଥିବାରୁ ଚାଷୀମାନେ ମୁଖ୍ୟମନ୍ତ୍ରୀଙ୍କ ସହ 5T ଅଧ୍ୟକ୍ଷ କାର୍ତ୍ତିକ ପାଣ୍ଡିଆନଙ୍କୁ ଧନ୍ୟବାଦ ଜଣାଇଛନ୍ତି
ପୁଣି ଡରାଇଲାଣି କରୋନା, ୨୪ ଘଣ୍ଟାରେ ଚିହ୍ନଟ ହେଲେ ୭୫୨ ଆକ୍ରାନ୍ତ
ନୂଆଦିଲ୍ଲୀ: ଦେଶରେ ବଢୁଛି କୋଭିଡ ସଂକ୍ରମଣ । ଗତ ୨୪ ଘଣ୍ଟାରେ ୭୫୨ଟି ନୂଆ ମାମଲା ଚିହ୍ନଟ ହୋଇଥିବାବେଳେ ୪ଜଣଙ୍କ ମୃତ୍ୟୁ ଘଟିଛି । ଗତ ମେ ୨୧ ତାରିଖଠାରୁ ଏହି ସଂକ୍ରମଣ ସର୍ବାଧିକ ବୋଲି ସୂଚନା ମିଳିଛି । ଏହାକୁ ମିଶାଇ ବର୍ତ୍ତମାନ ସୁଦ୍ଧା ୩ ହଜାର ୪୨୦ ଲୋକ କୋଭିଡ ସଂକ୍ରମିତ ହୋଇଛନ୍ତି । ବିହାରର ପାଟନା, ଗୟା ଓ ଦରଭଙ୍ଗା ବିମାନ ବନ୍ଦରରେ ରାଣ୍ଡମ ଟେଷ୍ଟ ଲାଗି ନିର୍ଦ୍ଦେଶ ଦିଆଯାଇଛି । ସେପଟେ ବିଶ୍ବରେ ବଢୁଛି ଜେଏନ.1 ସଂକ୍ରମଣ । ଇଂଲଣ୍ଡରେ ସବୁଠାରୁ ଅଧିକ ସଂକ୍ରମଣ ସୃଷ୍ଟି କରୁଛି ଭାରିଆଣ୍ଟ । ଇଂଲଣ୍ଡ ଓ ସ୍କଟଲ୍ଯାଣ୍ଡରେ ପ୍ରତି 24ଜଣରେ ଜଣେ କୋଭିଡ ସଂକ୍ରମିତ ହେଉଛନ୍ତି । ବିଶେଷ କରି ୧୮ରୁ ୪୪ ବର୍ଷ ବୟସ୍କ ଅଧିକ ସଂକ୍ରମିତ ହେଉଛନ୍ତି । ବ୍ରିଟେନ ସ୍ବାସ୍ଥ୍ୟ ନିରାପତ୍ତା ଏଜେନ୍ସିର ରିପୋର୍ଟ ଅନୁସାରେ ଶୀତ ଋତୁରେ ହିଁ ଏହି ସଂକ୍ରମଣ ବଢୁଛି । ସେମାନଙ୍କୁ ପ୍ରଶ୍ବାସଗତ ସମସ୍ୟା ଦେଖାଦେଉଛି । ଲଣ୍ଡନରେ ସଂକ୍ରମିତଙ୍କ ହାର ହୋଇଛି ୬.୧ ପ୍ରତିଶତ ।