ଅମରାବତୀ: ଓଡ଼ିଶା ଓ ଆନ୍ଧ୍ର ସୀମାନ୍ତ ମାଲବାହୀ ଟ୍ରେନ ଲାଇନଚ୍ୟୁତ । ଆନ୍ଧ୍ରପ୍ରଦେଶ ବୋରାରୁ ଶିବଲିଙ୍ଗପୁରମ୍ ମଧ୍ୟରେ ରେଳ ଲାଇନରେ ଧସିଲା ମାଟି ଅତଡ଼ା । ମାଲବାହୀ ଟ୍ରେନ ହଠାତ ବ୍ରେକ ମାରିବାରୁ ଲାଇନଚ୍ୟୁତ ହୋଇଯାଇଛି । ଟ୍ରେନର ଇଞ୍ଜିନ ସହ ଗୋଟିଏ ବଗି ଲାଇନଚ୍ୟୁତ ହୋଇଛି । ବର୍ଷା ଯୋଗୁ ମାଟି ଅତଡ଼ା ଖସିଥିବା ସୂଚନା ମିଳିଛି । ଟ୍ରାକରେ ଟ୍ରେନ ଚଳାଚଳ ବନ୍ଦ ରହିଥିବାବେଳେ ରେଳ ବିଭାଗର କର୍ମଚାରୀ ମରାମତି କାର୍ଯ୍ୟ ଆରମ୍ଭ କରିଛନ୍ତି ।
ଆନ୍ଧ୍ର ପ୍ରଦେଶର ଏକାଧିକ ଜିଲ୍ଲାରେ ମିଗଜୋମର ତାଣ୍ଡବ, ଉପୁଡିଲା ଗଛ ଭାଙ୍ଗିଲା ଘର
ଅମରାବତୀ: ସାମୁଦ୍ରିକ ବାତ୍ୟା ମିଗଜୋମର ତାଣ୍ଡବ। ଆନ୍ଧ୍ର ପ୍ରଦେଶର ଏକାଧିକ ଜିଲ୍ଲାରେ ଦେଖିବାକୁ ମିଳିଛି ବାତ୍ୟାର ବିଭୀଷିକା । ଚାରିଆଡେ ଜଳ ପ୍ରଳୟ । ଉପୁଡିଲା ଗଛ, ଭାଂଗିଲା ଘର । ଆନ୍ଧ୍ରପ୍ରଦେଶର ବାପଟଲାରେ ଲ୍ୟାଣ୍ଡଫଲ କରିଛି ବାତ୍ୟା ମିଗଜୋମ । ଲ୍ୟାଣ୍ଡଫଲ ସମୟରେ ଘଣ୍ଟାପ୍ରତି ୯୦ରୁ ଶହେ କିଲୋମିଟର ବେଗରେ ବହିଥିଲା ପବନ ।୩ ଘଣ୍ଟା ଧରି ରଚିଲା ତାଣ୍ଡବ । ପବନ ଠୁ ବଳିଗଲା ପ୍ରବଳରୁ ଅତି ପ୍ରବଳ ବର୍ଷା । ଠପ୍ ହୋଇଗଲା ଜନଜୀବନ । ଆଇଏମ୍ଡି ପୂର୍ବାନୁମାନ ଲ୍ୟାଣ୍ଡଫଲର ଦୁଇ ଦିନ ଯାଏଁ ପ୍ରବଳ ବର୍ଷିବ । ବାତ୍ୟାକୁ ନେଇ ଆନ୍ଧ୍ରପ୍ରଦେଶର ୮ ଜିଲ୍ଲାରେ ଆଲର୍ଟ ଜାରି କରାଯାଇଛି । ତିରୁପତି, ନେଲୋର, ପ୍ରକାଶମ, ବାପଟଲା. କ୍ରିଷ୍ଣା, ୱେଷ୍ଟ ଗୋଦାବରୀ, କୋନାସିମା ଏବଂ କାକିନାଡା ଜିଲ୍ଲାରେ ସତର୍କତା ଜାରି କରାଯାଇଛି । ଉପକୂଳ ଅଂଚଳରେ ୧୪୪ ଧାରା ଜାରି କରାଯାଇଛି ।
ଆନ୍ଧ୍ରପ୍ରଦେଶରେ ସ୍ଥିତିର ସମୀକ୍ଷା କରିଛନ୍ତି ମୁଖ୍ୟମନ୍ତ୍ରୀ ଜଗନମୋହନ ରେଡି । ପୂର୍ବରୁ ବାତ୍ୟା ମାଡରେ ଚେନ୍ନାଇରେ ୮ ଜଣଙ୍କର ମୃତ୍ୟୁ ହୋଇଛି । ରେସ୍କ୍ୟୁ ଓ ରିଲିଫ୍ ପାଇଁ କେନ୍ଦ୍ରକୁ ୫ ହଜାର କୋଟି ମାଗିଛନ୍ତି ତାମିଲନାଡୁ ସରକାର । ଯୁଦ୍ଧକାଳୀନ ଭିତ୍ତିରେ ଚାଲିଛି ଉଦ୍ଧାର କାମ ।
ସେପଟେ ବାତ୍ୟା ମିଗଜୋମ୍ର ପ୍ରଭାବ ଓଡ଼ିଶାରେ ଦେଖିବାକୁ ମିଳିଛି । ଆଜି ରାୟଗଡା, କୋରାପୁଟ ଏବଂ ମାଲକାନଗିରି ଜିଲ୍ଲାକୁ ପ୍ରବଳରୁ ଅତି ପ୍ରବଳ ବର୍ଷା ନେଇ ଅରେଞ୍ଜ ଆଲର୍ଟ ଜାରି କରାଯାଇଛି । ପ୍ରବଳ ବର୍ଷା ନେଇ ଗଞ୍ଜାମ, ଗଜପତି, କନ୍ଧମାଳ, କଳାହାଣ୍ଡି ଏବଂ ନବରଙ୍ଗପୁରକୁ ୟେଲୋ ଆଲର୍ଟ ଜାରି କରାଯାଇଛି । କାଲି ଉପକୂଳ ଓଡ଼ିଶାର ପୁରୀ, ଖୋର୍ଦ୍ଧା, କଟକ, ଜଗତସିଂହପୁର ଏବଂ ନୟାଗଡରେ ହାଲୁକାରୁ ମଧ୍ୟମ ଧରଣର ବର୍ଷା ସମ୍ଭାବନା ରହିଛି । ବାତ୍ୟାଟି ଉତ୍ତର ଆନ୍ଧ୍ରପ୍ରଦେଶ ନିକଟତର ହେବା ପରେ ଓଡ଼ିଶାରେ ଅଧିକ ପ୍ରଭାବ ପଡିବ ବୋଲି ପାଣିପାଗ କେନ୍ଦ୍ର ପୂର୍ବାନୁମାନ କରିଛି । ଏଥିପାଇଁ ଚାଷି ମାନଙ୍କୁ ସତର୍କ ରହିବା ପାଇଁ ପରାମର୍ଶ ଦିଆଯାଇଛି । ସେପଟେ ବାତ୍ୟା ପରବର୍ତ୍ତୀ ପ୍ରଭାବ ଓଡ଼ିଶାରେ ଅଧିକ ରହିବା ନେଇ ପାଣିପାଗ କେନ୍ଦ୍ର ପୂର୍ବାନୁମାନ ପରେ ରାଜ୍ୟ ସରକାର ସଜାଗ ରହିଛନ୍ତି।
ବାତ୍ୟାକୁ ଦୃଷ୍ଟିରେ ରଖି ଗଜପତି ଜିଲ୍ଲାରେ ଆସନ୍ତାକାଲି ପର୍ଯ୍ୟନ୍ତ ସମସ୍ତ ସ୍କୁଲକୁ ଛୁଟି ଘୋଷଣା କରାଯାଇଛି । ସମୁଦ୍ର ଅଶାନ୍ତ ଥିବାରୁ ମତ୍ସ୍ୟଜୀବୀଙ୍କୁ ୬ତାରିଖ ଯାଏଁ ସମୁଦ୍ର ଯିବାକୁ ବାରଣ କରାଯାଇଛି ।
RJD ନେତା ଶିବାନନ୍ଦ ତିୱାରୀଙ୍କୁ ଏକ ବର୍ଷ ଜେଲ୍
ପାଟନା: ବରିଷ୍ଠ ଆରଜେଡି ନେତା ଶିବାନନ୍ଦ ତିୱାରୀଙ୍କୁ ସ୍ୱତନ୍ତ୍ର ବିଚାରପତି ଏକ ବର୍ଷ ଜେଲ ଦଣ୍ଡାଦେଶ ହୋଇଛି। ଏହା ବ୍ୟତୀତ କୋର୍ଟ ତାଙ୍କ ଉପରେ ଦଶ ହଜାର ଟଙ୍କା ଜରିମାନା ଦଣ୍ଡାଦେଶ ଦେଇଛନ୍ତି। ନୀତୀଶ ସରକାରଙ୍କ ମନ୍ତ୍ରୀ ସଞ୍ଜୟ ବନାମ ଶିବାନନ୍ଦ ତିୱାରୀଙ୍କ ମାମଲାରେ କୋର୍ଟ ଏହି ନିଷ୍ପତ୍ତି ଦେଇଛନ୍ତି। ଏହି ନିଷ୍ପତ୍ତିରେ କୁହାଯାଇଛି ଯେ ଶିବାନନ୍ଦ ତିୱାରୀ ସଞ୍ଜୟଙ୍କ ପ୍ରତିଷ୍ଠାକୁ କ୍ଷତି ପହଞ୍ଚାଇଛନ୍ତି ।
ସଞ୍ଜୟଙ୍କ ସପକ୍ଷରେ ରାୟ ଦେବାବେଳେ କୋର୍ଟ ଶିବାନନ୍ଦ ତିୱାରୀଙ୍କୁ ଏକ ବର୍ଷ କାରାଦଣ୍ଡରେ ଦଣ୍ଡିତ କରିଛନ୍ତି । ଆରଜେଡି ନେତା ତଥା ଲାଲୁ ଯାଦବଙ୍କ ସହଯୋଗୀ ଶିବାନନ୍ଦ ତିୱାରୀ ୨୦୧୮ରେ ସଞ୍ଜୟଙ୍କ ବିରୋଧରେ ବିବାଦୀୟ ବୟାନ ଦେଇଥିଲେ।
ଶିବାନନ୍ଦ ତିୱାରୀ କହିଥିଲେ ଯେ ଦରଭଙ୍ଗା ଯାତ୍ରା ସମୟରେ ନୀତୀଶ କୁମାର ଏକ ଗେଷ୍ଟ ହାଉସରେ ରହିବା ପରିବର୍ତ୍ତେ ସଞ୍ଜୟଙ୍କ ଘରେ କାହିଁକି ରହିଥିଲେ? ଏହି ଘଟଣା ପରେ ଜେଡିୟୁ ସାଧାରଣ ସମ୍ପାଦକ ସଞ୍ଜୟ କୁମାର ଭାରତୀୟ ଦଣ୍ଡବିଧି ଆଇନର ଧାରା ୪୯୯ ଏବଂ ୫୦୦ ଅନୁଯାୟୀ ପାଟଣାର ମୁଖ୍ୟ ଜୁଡିସିଆଲ ମାଜିଷ୍ଟ୍ରେଟଙ୍କ କୋର୍ଟରେ ଏକ ମାମଲା ଦାୟର କରିଥିଲେ। ସଞ୍ଜୟ ଶିବାନନ୍ଦ ତିୱାରୀଙ୍କ ସର୍ବସାଧାରଣ ବିବୃତ୍ତିକୁ ବଦନାମ ବୋଲି କହିଥିଲେ।
ନୀତୀଶ କୁମାରଙ୍କ ନେତୃତ୍ୱରେ ବିହାରରେ ମେଣ୍ଟ ସରକାର ଚାଲିଛି । ଶିବାନନ୍ଦ ତିୱାରୀ ଆରଜେଡିର ଜଣେ ବରିଷ୍ଠ ନେତା। ତାଙ୍କ ପୁଅ ରାହୁଲ ତିୱାରୀ ଶାହାପୁରର ବିଧାୟକ। ତେବେ ନୀତୀଶ କୁମାର ବିହାରରେ ବିଜେପି ସହିତ ସରକାର ଚଳାଉଥିବା ବେଳେ ଶିବାନନ୍ଦ ତିୱାରୀ ଏହି ବିବୃତ୍ତି ଦେଇଥିଲେ । କିନ୍ତୁ ବର୍ତ୍ତମାନ ବିହାରରେ ଏକ ଗ୍ରାଣ୍ଡ ଆଲାଇନ୍ସ ସରକାର ଥିବାରୁ ବରିଷ୍ଠ ଆରଜେଡି ନେତାଙ୍କ ଦଣ୍ଡାଦେଶ ପରେ ଏହାର କି ପ୍ରଭାବ ପଡ଼ିବ ତାହା ଦେଖିବାକୁ ବାକି ରହିଲା।
ବ୍ୟାଙ୍କ ଦେଉ ନାହାନ୍ତି ଋଣ, ସଂସଦରେ ପ୍ରଶ୍ନ କଲେ ସାଂସଦ ମାନସ ମଙ୍ଗରାଜ
ନୂଆଦିଲ୍ଲୀ: ଅର୍ଥନୀତି ଉପରେ ପରିବେଶ ପ୍ରଦୂଷଣର ପ୍ରଭାବ ଏବଂ ଗ୍ରାମାଞ୍ଚଳରେ ବ୍ୟାଙ୍କ ଗୁଡ଼ିକ ଋଣ ନ ଦେବାକୁ ନେଇ ଉଦବେଗ ପ୍ରକାଶ କରିଛନ୍ତି ସାଂସଦ ମାନସ ମଙ୍ଗରାଜ । ଅର୍ଥନୈତିକ ଅଭିବୃଦ୍ଧି ଉପରେ ପରିବେଶ ପ୍ରଦୂଷଣର ପ୍ରଭାବକୁ ନେଇ ୨୦୨୩ ଅର୍ଥନୈତିକ ସର୍ଭେରେ କି ରିପୋର୍ଟ ଆସିଛି ଏବଂ କେନ୍ଦ୍ର ସରକାର ସବୁଜ ଡିଜିପି ଓ ସବୁଜ ବଜେଟ ପ୍ରସ୍ତୁତ କରିବା ନେଇ କି ପଦକ୍ଷେପ ନେଉଛନ୍ତି । ଏନେଇ ଆଜି ସଂସଦରେ କେନ୍ଦ୍ର ଅର୍ଥ ରାଷ୍ଟ୍ରମନ୍ତ୍ରୀଙ୍କୁ ଲିଖିତ ପ୍ରଶ୍ନ କରିଛନ୍ତି ବିଜେଡି ସାଂସଦ ମାନସ ମଙ୍ଗରାଜ, ସୁଜିତ କୁମାର ଓ ମୁଜିବୁଲ୍ଲା ଖାନ ।
ଏହାର ଉତ୍ତରରେ କେନ୍ଦ୍ର ଅର୍ଥ ରାଷ୍ଟ୍ରମନ୍ତ୍ରୀ କହିଛନ୍ତି ଯେ, ଅର୍ଥନୈତିକ ସର୍ଭେ ରିପୋର୍ଟ ପ୍ରତିବର୍ଷ ଭାରତୀୟ ଅର୍ଥନୀତିର ବିଭିନ୍ନ ଦିଗକୁ ନେଇ ରିପୋର୍ଟ ଉପସ୍ଥାପନ କରିଥାଏ । ଅର୍ଥନୈତିକ ଅଭିବୃଦ୍ଧି ସହ ବିଭିନ୍ନ କ୍ଷେତ୍ର ବିଶେଷ କରି କୃଷି, ଶିଳ୍ପ ଉପରେ ଜଳବାୟୁ ପରିବର୍ତ୍ତନର ପ୍ରଭାବକୁ ନେଇ ମଧ୍ୟ ରିପୋର୍ଟ ଦେଇଥାଏ । ଜଳବାୟୁ ପରିବର୍ତ୍ତନ ଦ୍ବାରା ପଡୁଥିବା ପ୍ରଭାବର ମଧ୍ୟ ସମୀକ୍ଷା କରିଥାଏ ଅର୍ଥନୈତିକ ସର୍ଭେ ରିପୋର୍ଟ । କେନ୍ଦ୍ର ପରିସଂଖ୍ୟାନ ଓ କାର୍ଯ୍ୟକ୍ରମ ପ୍ରବର୍ତ୍ତନ ମନ୍ତ୍ରଣାଳୟ ୨୦୧୮ରେ ଏନଭିରନମେଣ୍ଟ ଇକୋନୋମିକ ଆକାଉଣ୍ଟିଂ ଫ୍ରେମୱାର୍କ ପ୍ରସ୍ତୁତ କରିଛନ୍ତି ବୋଲି କେନ୍ଦ୍ର ଅର୍ଥ ରାଷ୍ଟ୍ରମନ୍ତ୍ରୀ ସୂଚନା ଦେଇଛନ୍ତି ।
ଅନ୍ୟପଟେ ରାଜ୍ୟରେ ରାଷ୍ଟ୍ରାୟତ ବ୍ୟାଙ୍କ ଓ ଆଞ୍ଚଳିକ ଗ୍ରାମ୍ୟ ବ୍ୟାଙ୍କ ଗୁଡିକ ଆବଶ୍ୟକ ଋଣ ଦେଉନାହାଁନ୍ତି । ଏହାକୁ ନେଇ ସଂସଦରେ ଉଦବେଗ ପ୍ରକାଶ କରିଛନ୍ତି ବିଜେଡି ସାଂସଦ ମାନସ ମଙ୍ଗରାଜ ଓ ମୁଜ୍ଜିବୁଲ୍ଲା ଖାନ । ରାଷ୍ଟ୍ରାୟତ ବ୍ୟାଙ୍କଗୁଡିକର ଋଣ ପ୍ରଦାନ ହାର ବୃଦ୍ଧି ଦିଗରେ କେନ୍ଦ୍ର ସରକାର କି ପଦକ୍ଷେପ ନେଉଛନ୍ତି ସେନେଇ ବିଜେଡି ସାଂସଦ ସଂସଦରେ ଲିଖିତ ପ୍ରଶ୍ନ କରିଛନ୍ତି ।
ଏହାର ଉତ୍ତରରେ କେନ୍ଦ୍ର ଅର୍ଥ ରାଷ୍ଟ୍ରମନ୍ତ୍ରୀ ଭଗବତ କରଡ କହିଛନ୍ତି ଯେ, ରାଜ୍ୟ ସ୍ତରୀୟ ବ୍ୟାଙ୍କର୍ସ କମିଟି ବୈଠକରେ ଆଞ୍ଚଳିକ ଗ୍ରାମ୍ୟ ବ୍ୟାଙ୍କଗୁଡିକୁ ଋଣ ପ୍ରଦାନ ହାର ବଢାଇବାକୁ ନିର୍ଦ୍ଦେଶ ଦିଆଯାଇଛି । ୨୦୨୩ ସେପ୍ଟେମ୍ବର ସୁଦ୍ଧା ସେଣ୍ଟ୍ରାଲ ବ୍ୟାଙ୍କ ଅଫ ଇଣ୍ଡିଆ ୫୨.୨୬ ପ୍ରତିଶତ, ଓଡିଶା ଗ୍ରାମ୍ୟ ବ୍ୟାଙ୍କ ୫୪.୨୩ ପ୍ରତିଶତ ଏବଂ ଉତ୍କଳ ଗ୍ରାମୀଣ ବ୍ୟାଙ୍କ ୫୩.୫୩ ପ୍ରତିଶତ ଋଣ ପ୍ରଦାନ କରିଛନ୍ତି ।
ରାଷ୍ଟ୍ରାୟତ ବ୍ୟାଙ୍କଗୁଡିକର ମଧ୍ୟ ଋଣ ପ୍ରଦାନ ହାର ବିଶେଷ କରି ଫସଲ ଋଣ ହାର ବଢାଇବାକୁ କେନ୍ଦ୍ର ସରକାର ନିର୍ଦ୍ଦେଶ ଦେଇଛନ୍ତି । ଏବେ ସୁଦ୍ଧା ରାଷ୍ଟ୍ରାୟତ ବ୍ୟାଙ୍କଗୁଡିକ ୫୬.୩ ପ୍ରତିଶତ ଲକ୍ଷ୍ୟ ହାସଲ କରିଛନ୍ତି ବୋଲି କେନ୍ଦ୍ର ଅର୍ଥ ରାଷ୍ଟ୍ରମନ୍ତ୍ରୀ ସୂଚନା ଦେଇଛନ୍ତି ।
ଦାନ୍ତ ଘଷୁ ଘଷୁ ଟୁଥ୍ବ୍ରଶ୍ ଗିଳିଦେଲେ ମହିଳା, ମରୁ ମରୁ ବଞ୍ଚିଗଲେ
ନନ୍ଦିଘୋଷ ବ୍ୟୁରୋ: ସ୍ପେନର ଜଣେ ୨୧ ବର୍ଷୀୟା ମହିଳାଙ୍କ ସହ ଏକ ଆଶ୍ଚର୍ଯ୍ୟଜନକ ଘଟଣା ଘଟିଛି । ଏକ ଟୁଥ୍ ବ୍ରଶ୍ ତାଙ୍କ ଗଳାରେ ଫସି ଯାଇଥିଲା, ଯାହା ପରେ ତାଙ୍କ ଅବସ୍ଥା ଏତେ ଖରାପ ହୋଇଯାଇଥିଲା ଯେ ତାଙ୍କୁ ଡାକ୍ତରଖାନାରେ ଭର୍ତ୍ତି କରିବାକୁ ପଡିଥିଲା। ବହୁତ କଷ୍ଟରେ ବଞ୍ଚି ଯାଇଥିଲା ।
ଅନେକ ଥର ଏପରି କିଛି ଘଟଣା ସାମ୍ନାକୁ ଆସେ, ଯାହା ଲୋକଙ୍କୁ ଚିନ୍ତା କରିବାକୁ ବାଧ୍ୟ କରିଥାଏ । ଏହିପରି ଗୋଟିଏ ଘଟଣା ଆଜିକାଲି ବହୁ ଚର୍ଚ୍ଚିତ । ବାସ୍ତବରେ, ଜଣେ ସ୍ପେନୀୟ ମହିଳା ତାଙ୍କ ଟୁଥ୍ ବ୍ରଶକୁ ଗିଳି ଦେଇଥିଲେ ଯାହା ପରେ ତାଙ୍କ ଅବସ୍ଥା ବିଗିଡି ଯାଇଥିଲା ।
ଦାନ୍ତ ସଫା ରଖିବା ପାଇଁ ଆପଣ ପ୍ରତିଦିନ ଦାନ୍ତ ଘଷନ୍ତି । ଯଦି ସେହି ବ୍ରଶ୍ ଆପଣଙ୍କ ଗଳାରେ ଫସିଯାଏ ଏବଂ ତା’ପରେ ସିଧା ଆପଣଙ୍କ ପେଟକୁ ଯାଏ ତେବେ କଣ ହେବ? ଏହି ମହିଳାଙ୍କ ସହିତ ଏମିତି ସମାନ ଘଟଣା ଘଟିଛି । ତାଙ୍କ ପାଇଁ ଟୁଥ୍ ବ୍ରଶ୍ ସାଜିଛି ମୃତ୍ୟୁର ଟୁଥ୍ ବ୍ରଶ୍ ।
ମହିଳା ଜଣକ ସ୍ପେନର ଗାଲଡାକାଓର ବାସିନ୍ଦା । ତାଙ୍କର ପରିଚୟ ମିଳିପାରି ନାହିଁ। ନ୍ୟୁୟର୍କ ପୋଷ୍ଟ ରିପୋର୍ଟ ଅନୁଯାୟୀ, ଏହି ୨୧ ବର୍ଷ ବୟସ୍କା ଯୁବତୀ ତାଙ୍କ ଗଳାରେ ଲାଗିଥିବା ଖାଦ୍ୟ ଖଣ୍ଡକୁ ବାହାର କରିବାକୁ ଚେଷ୍ଟା କରୁଥିଲେ, କିନ୍ତୁ ଏହାରି ମଧ୍ୟରେ ସେ ପୁରା ଟୁଥ୍ ବ୍ରଶକୁ ଗିଳି ଦେଇଥିଲେ।
ରୋହିତଙ୍କ ପରେ କିଏ ହେବ ଟିମ ଇଣ୍ଡିଆ ଅଧିନାୟକ ? ଦୁଇ ଜଣଙ୍କ ନାଁକୁ ନେଇ ଚର୍ଚ୍ଚା
ନନ୍ଦିଘୋଷ ବ୍ୟୁରୋ: ODI ବିଶ୍ୱକପ ପରେ ରୋହିତ ଶର୍ମାଙ୍କ ଭବିଷ୍ୟତକୁ ନେଇ ଅନେକ ପ୍ରଶ୍ନ । କାରଣ ବୟସ ବଢିବା ସହିତ ସେ ତିନୋଟି ଫର୍ମାଟ ଖେଳିବାକୁ କେତେ ଦିନ ସକ୍ଷମ ତାହା ମଧ୍ୟ ଏକ ବଡ଼ ପ୍ରଶ୍ନ। ଏଭଳି ପରିସ୍ଥିତିରେ ପ୍ରଶ୍ନ ହେଉଛି ଯେ ଟିମ୍ ଇଣ୍ଡିଆର ନୂତନ ଟେଷ୍ଟ ଅଧିନାୟକ ରୋହିତ ଶର୍ମାଙ୍କ ପରେ ଯିଏ ଦୀର୍ଘ ଦିନ ଧରି ଦଳର ନେତୃତ୍ୱ ନେବେ।
ପୂର୍ବତନ ଟେଷ୍ଟ ଓପନର୍ ତଥା ସମୀକ୍ଷକ ଆକାଶ ଚୋପ୍ରା କହିଛନ୍ତି ଯେ ରୋହିତଙ୍କ ପରେ ଶୁଭମାନ ଗିଲ କିମ୍ବା ଋଷଭ ପନ୍ତ ଭାରତର ଟେଷ୍ଟ ଅଧିନାୟକ ହୋଇପାରିବେ, ଯିଏ ଦୀର୍ଘ ଦିନ ଧରି ଦଳର ନେତୃତ୍ୱ ନେଇ ପାରିବେ। ଆକାଶ ଚୋପ୍ରା ତାଙ୍କ ୟୁଟ୍ୟୁବ୍ ଚ୍ୟାନେଲରେ ଏହା କହିଛନ୍ତି।
ପୂର୍ବତନ କ୍ରିକେଟର କହିଛନ୍ତି ଯେ ଉଭୟ ଖେଳାଳି ଏପରି ଅଟନ୍ତି ଯେଉଁମାନେ ଟେଷ୍ଟରେ ଆପଣଙ୍କ ପାଇଁ ଖେଳ ପରିବର୍ତ୍ତନ କରିପାରିବେ। ବିଶେଷକରି ଋଷଭ ପନ୍ତଜଣେ ୱିକେଟ୍ କିପର ସହ ପରିବର୍ତ୍ତନକାରୀ ଖେଳାଳି । ତେଣୁ ସେ ଜଣେ ଭଲ ଅଧିନାୟକ ଭାବରେ ଉଭା ହୋଇପାରିବେ ।
ବିରାଟ କୋହଲି ଅଧିନାୟକତ୍ୱ ଛାଡିବା ପରେ ରୋହିତ ଶର୍ମା ଏହି ଦାୟିତ୍ବ ଗ୍ରହଣ କରିଥିଲେ, କିନ୍ତୁ ତାଙ୍କ ପରେ କିଏ ଏହି ଦାୟିତ୍ବ ନେବେ ତାହା ଏପର୍ଯ୍ୟନ୍ତ ସ୍ଥିର ହୋଇନାହିଁ। ଇତି ମଧ୍ୟରେ, କେ.ଏଲ୍ ରାହୁଲଙ୍କୁ ଟେଷ୍ଟ ଅଧିନାୟକ ଭାବରେ ଦାୟିତ୍ବ ଦିଆଯାଉଥିଲା । କିନ୍ତୁ ତାଙ୍କ ପ୍ରଦର୍ଶନ ତାଙ୍କ ସାଥ୍ ଦେଇନଥିଲା । ଜସପ୍ରୀତ ବୁମରାହଙ୍କୁ ମଧ୍ୟ ଗୋଟିଏ ଟେଷ୍ଟରେ ଅଧିନାୟକ କରାଯାଇଥିଲା, କିନ୍ତୁ ତାଙ୍କୁ ଆଉ ଚୟନ କରାଯାଇ ନଥିଲା।
ଏବେ ଆଶା କରାଯାଉଛି ଯେ, ଯଦି ଋଷଭ ପନ୍ତ ପୁଣି ଫେରି ଆସନ୍ତି ତେବେ ଏହି ଦାୟିତ୍ୱ ତାଙ୍କୁ ପୁଣି ଦିଆଯିବ । ସେପଟେ ଶୁଭମାନ ଗିଲଙ୍କୁ ଆଇପିଏଲରେ ଗୁଜୁରାଟ ଟାଇଟାନ୍ସର ଅଧିନାୟକ କରାଯାଇଛି, କିନ୍ତୁ ତାଙ୍କ ଅଧିନାୟକତ୍ୱ ଏପର୍ଯ୍ୟନ୍ତ ପରୀକ୍ଷା କରାଯାଇ ନାହିଁ।
ଏଭଳି ପରିସ୍ଥିତିରେ ଶୁଭମାନ ଗିଲଙ୍କୁ ନେଇ ଭବିଷ୍ୟବାଣୀ ଟିକେ କଷ୍ଟସାଧ୍ୟ ମନେହୁଏ । କିନ୍ତୁ ସେ ଭବିଷ୍ୟତ ପାଇଁ ପ୍ରସ୍ତୁତ ହୋଇପାରନ୍ତି।
ତେଲେଙ୍ଗାନାର ନୂଆ ମୁଖ୍ୟମନ୍ତ୍ରୀ ହେବେ କଂଗ୍ରେସ ପ୍ରଦେଶ ମୁଖ୍ୟ ରେବନ୍ତ ରେଡ୍ଡୀ
ହାଇଦ୍ରାବାଦ: ତେଲେଙ୍ଗାନାର ନୂଆ ମୁଖ୍ୟମନ୍ତ୍ରୀ ହେବେ କଂଗ୍ରେସ ପ୍ରଦେଶ ମୁଖ୍ୟ ରେବନ୍ତ ରେଡ୍ଡୀ । ଏଆଇସିସି ସଭାପତି ମଲ୍ଲିକାର୍ଜୁନ ଖଡଗେ ରେବନ୍ତଙ୍କ ନାଁରେ ମୋହର ମାରିଛନ୍ତି । ବରିଷ୍ଠ କଂଗ୍ରେସ ନେତା ରାହୁଲ ଗାନ୍ଧି, ଏଆଇସିସି ସଭାପତି ମଲ୍ଲିକାର୍ଜ୍ଜୁନ ଖଡ଼ଗେ ଏବଂ କଂଗ୍ରେସ ଜାତୀୟ ମହାସଚିବ କେ.ସି ଭେନୁଗୋପାଳଙ୍କ ସହ ଅନ୍ୟ ନେତାଙ୍କ ବୈଠକରେ ରେବନ୍ତଙ୍କ ନାଁରେ ବାଜିଛି ମୋହର । ହାଇଦ୍ରାବାଦରେ କଂଗ୍ରେସ ବିଧାୟକ ଦଳ ବୈଠକରେ ଆଲୋଚନା ପରେ ବିଧିବଦ୍ଧ ଭାବେ ରେବନ୍ତଙ୍କ ନାଁ ଘୋଷଣା କରାଯିବ । ଆସନ୍ତା ୭ ତାରିଖରେ ମୁଖ୍ୟମନ୍ତ୍ରୀ ଶପଥ ନେବେ ।
ରାଜ୍ୟରେ କଂଗ୍ରେସର ବିପୁଳ ନିର୍ବାଚନ ପରେ ସମସ୍ତ କ୍ରେଡିଟ ରେବନ୍ତଙ୍କୁ ମିଳିଥିଲା । ମୁଖ୍ୟମନ୍ତ୍ରୀ ରେସରେ ସେ ସବୁଠୁ ଆଗରେ ଥିଲେ। ରେବନ୍ତ ରେଡି ତେଲେଙ୍ଗାନା ରାଜନୀତିରେ ସ୍ବତନ୍ତ୍ର ପରିଚୟ ସୃଷ୍ଟି କରିଛନ୍ତି । ୨୦୧୭ରେ ସେ କଂଗ୍ରେସରେ ଯୋଗ ଦେଇଥିଲେ । ୨୦୨୧ରେ ତେଲଙ୍ଗାନା ପିସିସି ଭାବେ ଦାୟିତ୍ବ ନେଇଥିଲେ । ଏହା ପୁର୍ବରୁ ସେ ତେଲୁଗୁ ଦେଶମ ପାର୍ଟିରେ ଥିଲେ । ଦୁଇ ଦୁଇ ଧର ବିଧାୟକ ଭାବେ ନିର୍ବାଚିତ ହୋଇଛନ୍ତି୍ ରେବନ୍ତ । ନିଜର ଜବରଦସ୍ତ ପ୍ରଚାର ଲାଗି ସେ କଂଗ୍ରେସ ରାଜନୀତିରେ ବେଶ ପରିଚିତ । ସେହିପରି ରାଜସ୍ଥାନରେ ବିଜେପିର ମୁଖ୍ୟମନ୍ତ୍ରୀ ପଦ ପାଇଁ ରେସର ସବା ଆଗରେ ଅଛନ୍ତି ରାଜକୁମାରୀ ଦୀୟା କୁମାରୀ । ଏହା ପରେ ପୂର୍ବତନ ମୁଖ୍ୟମନ୍ତ୍ରୀ ବସୁନ୍ଧରା ରାଜେ ରହିଛନ୍ତି । ଉଭୟ ବସୁନ୍ଧରା ଓ ଦୀୟା ରାଜ ପରିବାରରୁ ଆସିଛନ୍ତି ।
୭୧ ହଜାରରୁ ଅଧିକ ବମ୍ପର ଭୋଟରେ ଦିୟା କୁମାରୀ ନିଜ ନିକଟତମ ପ୍ରତିନ୍ଦନ୍ଦୀଙ୍କୁ ପରାସ୍ତ କରିଛନ୍ତି । ଜୟପୁର ରାଜ ପରିବାର ସଦସ୍ୟ ଦୀୟା କୁମାରୀ । ରାଜା ମାନ ସିଂ ଦ୍ବିତୀୟଙ୍କର ନାତୁଣୀ ହେଉଛନ୍ତି ଦୀୟା । ଜୟପୁରର ରାଜତନ୍ତ୍ରର ଶେଷ ସମ୍ରାଟ ଥିଲେ ରାଜା ମାନ ସିଂହ ଦ୍ବିତୀୟ । ତେବେ ବିଜେପିର ସଂସଦୀୟ ଟିମ୍ ମୁଖ୍ୟମନ୍ତ୍ରୀ କିଏ ହେବ ତା ଉପରେ ମୋହର ମାରିବେ । ତେବେ ଛତିଶଗଡ଼ରେ ମଧ୍ୟ ଏଥର ନୂଆ ଚେହେରା ମୁଖ୍ୟମନ୍ତ୍ରୀ ହେବେ ବୋଲି ଚର୍ଚ୍ଚା ହେଉଛି । ମଧ୍ୟପ୍ରଦେଶରେ ମଧ୍ୟ ଶିବରାଜ ସିଂହ ବିଜେପିର ପ୍ରଥମ ପସନ୍ଦ ନୁହେଁ ବୋଲି ଚର୍ଚ୍ଚା ହେଉଛି । କୈଳାଶ ବିଜୟ ବର୍ଗିୟ ଏବଂ ଜ୍ୟୋତିରାଦିତ୍ୟ ସିନ୍ଧିଆ ମଧ୍ୟ ମୁଖ୍ୟମନ୍ତ୍ରୀ ରେସରେ ଅଛନ୍ତି ବୋଲି ଜାତୀୟ ଗଣମାଧ୍ୟମରେ ଚର୍ଚ୍ଚା ହେଉଛି ।
ଗୋପାଳପୁରରେ ଶିଳ୍ପ କରିଡର, ୧୦ ପ୍ରସ୍ତାବରେ ମୋହର ମାରିଲା ରାଜ୍ୟ କ୍ୟାବିନେଟ
ଭୁବନେଶ୍ବର: ଗୋପାଳପୁରରେ ହେବ ଶିଳ୍ପ କରିଡର। ଜଟଣୀ ଓ ଭୁବନେଶ୍ବର ତହସିଲ ଅଧିନରେ ଲିଜ୍ ସୂତ୍ରରେ ଜମି ନେଇଥିବା ଭୂମିହୀନଙ୍କୁ ସ୍ଥାୟୀ ପଟ୍ଟା ପ୍ରଦାନ କରାଯିବ। ରାଜସ୍ୱ ଓ ବିପର୍ଯ୍ୟୟ ପରିଚାଳନା ବିଭାଗର ଏହି ପ୍ରସ୍ତାବକୁ ରାଜ୍ୟ କ୍ୟାବିନେଟ୍ ମଂଜୁରୀ ମିଳିଛି। ଭୁବନେଶ୍ବର, ଜଟଣୀ ତହସିଲରେ ଥିବା ଭୂମିହୀନଙ୍କୁ ସ୍ଥାୟୀ ପଟ୍ଟା ପ୍ରଦାନ କରିବା ନେଇ ଦୀର୍ଘ ଦିନରୁ ଦାବି ହୋଇ ଆସୁଥିଲା।
ପୂର୍ବ ବ୍ୟବସ୍ଥା ଅନୁଯାୟୀ ଏସବୁ ଭୂମିହୀନ ପୁରୀ ପୌରସଂସ୍ଥା ଅଧୀନରେ ଲିଜ୍ ସୂତ୍ରରେ ଜମି ପାଇଥିଲେ । ସେହିପରି ଚୌଦ୍ୱାର ଓ ସମ୍ବଲପୁରରେ ୱେଲ୍ସସ୍ପୁନ ପ୍ରକଳ୍ପ ପାଇଁ ସ୍ୱତନ୍ତ୍ର ପ୍ୟାକେଜ ଦିଆଯିବ। ସରକାରୀ ସ୍କୁଲର ମାନ୍ୟତା ପାଇବ କଟକ ମାଧ୍ୟମିକ ବୋର୍ଡ ହାଇସ୍କୁଲ। ଓଡ଼ିଶା ସାମାଜିକ ସୁରକ୍ଷା ସେବା କ୍ୟାଡରର ହେବ ସଂଶୋଧନ । ଏଥିସହ MSME ନୀତି -୨୦୨୨ ଓ ଖାଦ୍ୟ ପ୍ରକ୍ରିୟାକରଣ ନୀତି-୨୦୨୨ରେ ହେବ ସଂଶୋଧନ। ମୋଟର ଯାନ ବକେୟା ଟିକସ ଓ ଜରିମାନାର ହେବ ଏକକାଳୀନ ପରିଷୋଧ କରାଯିବ। ପରିବହନ ବିଭାଗ ଏହି ପ୍ରସ୍ତାବକୁ କ୍ୟାବିନେଟ ମଂଜୁରୀ ମିଳିଛି ।
ଓଡ଼ିଶା ଜିଲ୍ଲା ଦେଓ୍ବାନି ଅଦାଲତ କିରାଣୀ ନିଯୁକ୍ତି ସର୍ତ୍ତାବଳୀ ଅଧିନିୟମ-୨୦୦୮ରେ ସଂଶୋଧନ ହେବ। ମୋଟ୍ ୧୦ଟି ପ୍ରସ୍ତାବକୁ ରାଜ୍ୟ କ୍ୟାବିନେଟର ମଂଜୁରୀ ମିଳିଛି ।
ଏହି ଧନୀ ଦେଶରେ ୫ ଲକ୍ଷ ଲୋକ ବେରୋଜଗାର, ଚାକିରି ଅଭାବ ନୁହେଁ କାରଣ
ନନ୍ଦିଘୋଷ ବ୍ୟୁରୋ: ଏମିତି ଏକ ଦେଶ ଅଛି ଯାହା ଧନୀ ଦେଶ ମଧ୍ୟରେ ଗଣାଯାଏ ।ଏଠାରେ ଚାକିରିର ଅଭାବ ନାହିଁ କିନ୍ତୁ ଏଠାରେ ୫ ଲକ୍ଷ ଲୋକ ବେକାର ଅଛନ୍ତି । ଏହି ବେରୋଜଗାରର କାରଣ ଚାକିରିର ଅଭାବ ନୁହେଁ ବରଂ ସେମାନଙ୍କର ଖରାପ ସ୍ୱାସ୍ଥ୍ୟ । ଖରାପ ଖାଇବା ଏବଂ ପିଇବା ଅଭ୍ୟାସ ଯୋଗୁ ସେମାନେ ଗୁରୁତର ରୋଗର ଶିକାର ହୋଇଛନ୍ତି ଏବଂ ଏହି କାରଣରୁ ସେମାନେ କାମ କରିବାରେ ଅସମର୍ଥ । ରିପୋର୍ଟରେ କୁହାଯାଇଛି ଯେ ଏହି ଲୋକଙ୍କ ରୋଗ ଯୋଗୁ ବ୍ରିଟିଶ ଅର୍ଥନୀତି ପ୍ରତିବର୍ଷ ୩୧ ବିଲିୟନ ପାଉଣ୍ଡ କ୍ଷତି ସହିଥାଏ।
ତିନୋଟି ଖରାପ ଅଭ୍ୟାସ ମୁଖ୍ୟତଃ ଦାୟୀ
ଧୂମପାନ, ଅତ୍ୟଧିକ ଜଙ୍କ୍ ଫୁଡ୍ ଖାଇବା ଏବଂ ଅତ୍ୟଧିକ ମଦ୍ୟପାନ ଯୋଗୁଁ ୪.୫୯ ଲକ୍ଷ ବ୍ରିଟିଶ ଲୋକ ବେକାର ଅଛନ୍ତି। ଏହି ଲୋକମାନଙ୍କର ଅପରିଷ୍କାର ଅଭ୍ୟାସ ହେତୁ ବ୍ରିଟେନ ଅର୍ଥନୀତିକୁ ପ୍ରତିବର୍ଷ ୩୧ ବିଲିୟନ ପାଉଣ୍ଡ କ୍ଷତି ସହିବାକୁ ପଡିବ । ରସର୍ଚ୍ଚରୁ ଜଣାପଡ଼ିଛି ଯେ, ମଦ୍ୟପାନ, ସିଗାରେଟ୍ ଏବଂ ଜଙ୍କ ଫୁଡ୍ ଭଳି ତିନୋଟି କାରଣ ଏହି ବେରୋଜଗାର ପଛରେ ଦାୟୀ । ଏହି କାରଣରୁ, ଲୋକ ମାନଙ୍କର ସ୍ୱାସ୍ଥ୍ୟ ଖରାପ ହୋଇଯାଏ ଏବଂ ସେମାନେ ଅକାଳରେ ମୃତ୍ୟୁ ମୁଖରେ ପଡ଼ିଥାନ୍ତି ।
ଅଧ୍ୟୟନରୁ ଜଣାପଡିଛି ଯେ, ସ୍ୱାସ୍ଥ୍ୟ ଉପରେ ଧୂମପାନର ଖରାପ ପ୍ରଭାବ ହେତୁ ୨.୮୯ ଲକ୍ଷ ଲୋକ ଚାକିରି ହରାଇଥିବାବେଳେ ୯୯ ହଜାର ଲୋକ ମଦ୍ୟପାନ ଜନିତ ରୋଗ ହେତୁ ଚାକିରି କରିବାରେ ଅସମର୍ଥ ଅଟନ୍ତି। ଅନ୍ୟପକ୍ଷରେ, ୭୦ ହଜାର ଲୋକ ଅଧିକ ଓଜନ ହେତୁ ଚାକିରି ପାଇବାକୁ ଅସମର୍ଥ। ଏହି ମେଦବହୁଳତାର ସବୁଠାରୁ ବଡ କାରଣ ହେଉଛି ଅତ୍ୟଧିକ ଜଙ୍କ ଫୁଡ୍ ଖାଇବା ।
ଅଧ୍ୟୟନରୁ ଏହା ମଧ୍ୟ ଜଣାପଡିଛି ଯେ ଧୂମପାନ କରୁଥିବା ଲୋକଙ୍କର ମଧ୍ୟ ଅତ୍ୟଧିକ ଜଙ୍କ ଫୁଡ୍ ଏବଂ ଅତ୍ୟଧିକ ମଦ୍ୟପାନ କରିବାର ପ୍ରବୃତ୍ତି ରହିଛି। ଏହି ତିନୋଟି ଖରାପ ଅଭ୍ୟାସ କାରଣରୁ ଅଧିକାଂଶ ଲୋକଙ୍କର କର୍କଟ ରୋଗ ହେବାର ଆଶଙ୍କା ବହୁଗୁଣିତ ହୁଏ ।
ରିପୋର୍ଟ ଅନୁଯାୟୀ, ବେକାର ଥିବା ୫ ଲକ୍ଷ ଲୋକଙ୍କ ବୟସ ୨୦ ବର୍ଷରୁ ୬୯ ବର୍ଷ ମଧ୍ୟରେ। ଯଦି ଏହି ଲୋକମାନେ ତିନୋଟି ଖରାପ ଅଭ୍ୟାସ ଗ୍ରହଣ ନକରନ୍ତି ତେବେ ଏହି ଲୋକମାନେ ଚାକିରିରେ ରହିବେ । ସେହିଭଳି ଧୂମପାନ ହେତୁ ୩୩ ପ୍ରତିଶତ ଲୋକ ବେକାର ଅଛନ୍ତି।
ସୈଫ ଅଲୀ ଖାନଙ୍କ ପଟୌଦି ହାଉସରେ ହୋଇଛି ‘ଆନିମଲ୍’ ଫିଲ୍ମ ସୁଟିଂ
ମୁମ୍ବାଇ: ଆଜିକାଲି ସୈଫ ଅଲି ଖାନଙ୍କ ପଟୌଦି ପ୍ୟାଲେସ ହେଡଲାଇନରେ ଅଛି। ଏହା ୧୯୩୦ ଦଶକର ପୌଟଦି ବଂଶର ଶେଷ ଶାସକ ତଥା ସୈଫଙ୍କ ଦାଦା ନବାବ ଇଫ୍ଟିଖର ଅଲି ଖାନଙ୍କ ଦ୍ୱାରା ନିର୍ମିତ ହୋଇଥିଲା। ଆପଣ ଜାଣନ୍ତି କି ଗୁରୁଗ୍ରାମରେ ଅବସ୍ଥିତ ଏହି ଘର ଏବେ ରଣବୀରଙ୍କ ଆନିମଲ ଫିଲ୍ମ ଦେଖାଯାଇଛି | ହଁ, ଫିଲ୍ମରେ ରଣବୀରଙ୍କ ଘର ବାସ୍ତବରେ ସୈଫଙ୍କ ପଟୌଦି ପ୍ୟାଲେସ୍ ।
ଦିଲ୍ଲୀ ନିକଟ ଗୁରୁଗ୍ରାମରେ ଏହି ବିଳାସପୂର୍ଣ୍ଣ ପ୍ରାସାଦ ରହିଛି । ଏହି ବିଳାସପୂର୍ଣ୍ଣ ପ୍ରାସାଦର ମୂଲ୍ୟ ଶହ ଶହ କୋଟି ଟଙ୍କା । ଯାହାକୁ ଲୋକେ ଦେଖିବାକୁ ଇଚ୍ଛା କରନ୍ତି ।ପଟୌଦି ପ୍ୟାଲେସ୍ ୧୯୩୦ ମସିହାରେ ଶେଷ ଶାସକ ନବାବ ଇଫ୍ଟିଖର ଅଲି ଖାନଙ୍କ ଦ୍ୱାରା ନିର୍ମିତ ହୋଇଥିଲା । ନବାବ ଇଫତିଖର ଥିଲେ ସୈଫ ଅଲି ଖାନଙ୍କ ଜେଜେବାପା। କେବଳ ପଟୌଦି ପରିବାର ଏହି ପ୍ରାସାଦରେ ରହୁଥିଲେ । ବର୍ତ୍ତମାନ ଏହି ପରିବାର ମୁମ୍ବାଇକୁ ସ୍ଥାନାନ୍ତରଣ ହୋଇ ଯାଇଛନ୍ତି ତ ହେଲେ ସୈଫଙ୍କ ପରିବାର ମଝିରେ ମଝିରେ ପୈତୃକ ଘରେ ଛୁଟି କାଟିବାକୁ ଭଲ ପାଆନ୍ତି ।
ସୈଫ ଅଲି ଖାନ ନିଜ ପରିବାର ସହିତ ପ୍ରାୟତଃ ଏଠାକୁ ଆସନ୍ତି । ସ୍ତ୍ରୀ କରୀନା, ଭଉଣୀ ସୋହା ଅଲି ଖାନ ଓ ସବା ଅଲି ଖାନଙ୍କ ସହ ସୈଫଙ୍କ ସହ ଏହି ମହଲରେ ଛୁଟି କଟାଇବାକୁ ଆସନ୍ତି ।