ଅଯୋଧ୍ୟା: ଅଯୋଧ୍ୟାରେ ଦାନ କରି ରେକର୍ଡ କଲେ ଶ୍ରଦ୍ଧାଳୁ । ପ୍ରଥମ ଦିନରେ ଦର୍ଶନ କରିଛନ୍ତି ୫ ଲକ୍ଷରୁ ଅଧିକ ରାମଭକ୍ତ । ୩ କୋଟିରୁ ଅଧିକ ଟଙ୍କା କଲେ ଦାନ । ଅଯୋଧ୍ୟାରେ ରାମ ଲଲ୍ଲାଙ୍କ ପ୍ରାଣ ପ୍ରତିଷ୍ଠା ହୋଇଛି । ରାମ ଲଲ୍ଲାଙ୍କ ଦର୍ଶନ ଲାଗି ବହୁ ଶ୍ରଦ୍ଧାଳୁଙ୍କ ଆଗମନ ହୋଇଥିଲା । ଭିଡକୁ ନିୟନ୍ତ୍ରଣ କରିବାରେ ପୋଲିସ ମଧ୍ୟ ନାକେଦମ ହୋଇ ଯାଇଥିଲେ । ମୁଖ୍ୟମନ୍ତ୍ରୀ ଯୋଗୀ ଅଦିତ୍ୟନାଥ ଅଯୋଧ୍ୟାରେ ପହଞ୍ଚି ଅଧିକାରୀଙ୍କ ସହ ଏକ ବୈଠକ କରି ସୁରକ୍ଷା କଡା ନିର୍ଦ୍ଦେଶ ଦେଇଥିଲେ। ୨୨ ତାରିଖ ଦିନ ରାମ ଭକ୍ତମାନେ ୩ କୋଟି ୧୭ ଲକ୍ଷ ଟଙ୍କା ଦାନ କରି ରେକର୍ଡ ସୃଷ୍ଟି କରିଛନ୍ତି ।
ରାମ ଜନମଭୂମି ଟ୍ରଷ୍ଟର ଟ୍ରଷ୍ଟି ଡକ୍ଟର ଅନିଲ ମିଶ୍ର କହିଛନ୍ତି, ପ୍ରାଣ ପ୍ରତିଷ୍ଠା ଦିନ ୧୦ଟି ଦାନ ହୁଣ୍ଡି ଖୋଲାଯାଇଛି । ଏହା ବ୍ୟତୀତ ଦେଶ ତଥା ବିଦେଶର ବହୁ ରାମ ଭକ୍ତ ଭଗବାନ ଶ୍ରୀରାମଙ୍କୁ ଅନଲାଇନରେ ମଧ୍ୟ ଦାନ କରିଛନ୍ତି । ଅନିଲ ମିଶ୍ରଙ୍କ କହିବାନୁଯାୟୀ, ୫ଲକ୍ଷରୁ ଅଧିକ ରାମ ଭକ୍ତ ରାମଲଲ୍ଲାଙ୍କ ଦର୍ଶନ ପାଇଁ ଆସିଥିଲେ । ଭକ୍ତଙ୍କ ସୁବିଧା ଦୃଷ୍ଟିରୁ ପ୍ରଶାସନ ସହିତ ପରାମର୍ଶ କରି ବ୍ୟବସ୍ଥା କରାଯାଇଥିବା କଥା ମଧ୍ୟ ସେ କହିଛନ୍ତି ।
ଅନ୍ୟପକ୍ଷରେ, ରାଷ୍ଟ୍ରିୟ ସ୍ବୟଂସେବକ ସଂଗଠନର ସର ସରକାର୍ଯ୍ୟବାହ ଦତ୍ତାତ୍ରେୟ ହୋସାବୋଲେ ଟ୍ରଷ୍ଟର ସମସ୍ତ ଅଧିକାରୀଙ୍କ ସହ ଏକ ବୈଠକ କରି ଏକ ନୂଆ ରଣନୀତି ପ୍ରସ୍ତୁତ କରିଛନ୍ତି। ସେ ଅଯୋଧ୍ୟା ଚାରିପାଖରେ ଥିବା ସଂଗଠକମାନଙ୍କୁ ମନ୍ଦିରରେ ପରିଷ୍କାର ପରିଚ୍ଛନ୍ନତାର ଦାୟିତ୍ବ ଗ୍ରହଣ କରିବାକୁ ଏବଂ ଦର୍ଶନର ସୁବ୍ୟବସ୍ଥା କରିବାରେ ସହଯୋଗ କରିବାକୁ ନିର୍ଦ୍ଦେଶ ଦେଇଛନ୍ତି।

ଜୟପୁର: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ଫ୍ରାନ୍ସର ରାଷ୍ଟ୍ରପତି ଇମାନୁଏଲ ମାକ୍ରୋନଙ୍କ ଜୟପୁର ଗସ୍ତର ଦୁଇ ଦିନ ପୂର୍ବରୁ ମିଳିଲା ୩୫୦ ଫୁଟ ଲମ୍ବର ଟନେଲ । ଏହି ଟନେଲ୍ ପ୍ରାୟ ୬ ଫୁଟ ଚଉଡା ଏବଂ ୧୦ ଫୁଟ ଉଚ୍ଚା। ମଙ୍ଗଳବାର ଦିନ ଏହି ଟନେଲ ବିଷୟରେ ଜଣାପଡ଼ିବା ପରେ ପୋଲିସ ପ୍ରଶାସନ ଭିତରେ ଆତଙ୍କ ଖେଳିଯାଇଛି। ଏହି ଖବର ମିଳିବା ପରେ ଘଟଣାସ୍ଥଳକୁ ଦୌଡ଼ିଥିଲେ ପୋଲିସ୍ କର୍ମଚାରୀ । ପ୍ରାଥମିକ ତଦନ୍ତରୁ ଜଣାପଡିଛି ଯେ, ଏହି ଟନେଲ ଦୁଇଟି ବ୍ୟାଙ୍କ ଏବଂ ଏକ ଅଳଙ୍କାର ଶୋ’ ରୁମ ଭାଙ୍ଗିବା ପାଇଁ ଖୋଳାଯାଉଥିଲା। କିନ୍ତୁ ମଙ୍ଗଳବାର ଦିନ ଏକ ଆଳୁ ଭର୍ତ୍ତି ଗାଡି ଏହି ଟନେଲ ଦେଇ ଗଲାବେଳେ ରାସ୍ତାଟି ଦବିଯାଇଥିଲା । ଏହା ପରେ ଟନେଲ ଥିବା କଥା ସମସ୍ତେ ଜାଣିବାକୁ ପାଇଲେ ।

ପୋଲିସର ସୂଚନାନୁସାରେ, ରାଜଧାନୀ ଜୟପୁରର ବିଦ୍ୟାଧର ନଗର ପୋଲିସ ଷ୍ଟେସନ ଅଞ୍ଚଳରେ ଏହି ଟନେଲ ଦେଖିବାକୁ ମିଳିଛି। ଅମ୍ବାବାଡ଼ି ପରିବା ବଜାର ନିକଟ ଏକ ଦୋକାନରୁ ଏହି ଟନେଲ ଖୋଳାଯାଇଛି। ଏହି ସମଗ୍ର ଷଡଯନ୍ତ୍ରରେ ଉତ୍ତରପ୍ରଦେଶର ବରେଲିରୁ ଆସିଥିବା ଏକ ଗ୍ୟାଙ୍ଗର ନାମ ସାମ୍ନାକୁ ଆସିଛି। ଚାରିରୁ ପାଞ୍ଚ ଜଣ ଦୁର୍ବୃତ୍ତ ଗତ ୬ ମାସ ଧରି ଏହି ଟନେଲ ଖୋଳୁଥିଲେ। ଛଅ ମାସରେ ସେ ୩୫୦ ଫୁଟରୁ ଅଧିକ ଲମ୍ବ ଏକ ଟନେଲ ଖୋଳିଥିଲେ । ସେଣ୍ଟ୍ରାଲ ବ୍ୟାଙ୍କ ଅଫ୍ ଇଣ୍ଡିଆ ଏବଂ ସେଠାରେ ଅବସ୍ଥିତ ଏସବିଆଇ ସମେତ ଅମ୍ବିକା ଜୁଏଲର୍ସକୁ ଭାଙ୍ଗିବା ପାଇଁ ଏହି ଟନେଲ ଖୋଳାଯାଇଥିଲା।

ପ୍ରାଥମିକ ଅନୁସନ୍ଧାନରୁ ଜଣାପଡିଛି ଯେ, ଦୁର୍ବୃତ୍ତମାନେ ଏକ ଦୋକାନ ଭଡା ନେଇ ଏହି ଟନେଲ ଖୋଳିବା ଆରମ୍ଭ କରିଥିଲେ। କିନ୍ତୁ ମଙ୍ଗଳବାର ଦିନ ଯେତେବେଳେ ଏକ ଗାଡି ଏହା ଉପର ଦେଇ ଯାଇଥିଲା, ସେତେବେଳେ ରାସ୍ତାଟି ଦବି ଯାଇଥିଲା। ବଡ଼ ଗର୍ତ୍ତ ଦେଖିବା ପରେ ପୋଲିସକୁ ଏ ନେଇ ସୂଚନା ଦିଆଯାଇଥିଲା । ଏହାପରେ ବରିଷ୍ଠ ଅଧିକାରୀମାନେ ଘଟଣାସ୍ଥଳରେ ପହଞ୍ଚିଥିଲେ।