ନନ୍ଦିଘୋଷ ବ୍ୟୁରୋ: ସିଜେପି ନେତା ଆଶୁତୋଷ ରାଙ୍କା ଏବଂ ସୌରଭ ଦାସଙ୍କ ନ୍ୟାୟିକ ହେପାଜତ ବୃଦ୍ଧିକୁ ନିନ୍ଦା କରିଛନ୍ତି ଟିଏମସି ମୁଖ୍ୟ ମମତା ବାନାର୍ଜୀ । ଏହାକୁ ସେ ରାଜ୍ୟ ପ୍ରାୟୋଜିତ ଆତଙ୍କବାଦ ଏବଂ ପୋଲିସ ପ୍ରାୟୋଜିତ ଅତ୍ୟାଚାର ବୋଲି କହିଛନ୍ତି । ଏହାସହ ସେ ଚେତାଇ ଦେଇଛନ୍ତି ଯେ, ଏହା ବେଶୀ ଦିନ ଚାଲିପାରିବ ନାହିଁ । ତାଙ୍କୁ ତୁରନ୍ତ ମୁକ୍ତ କରାଯିବା ଉଚିତ ।
ସୂଚନା ମୁତାବକ, ଅକ୍ଟୋବର ୧୩ ତାରିଖରେ ଆଶୁତୋଷ ରାଙ୍କା ଏବଂ ସୌରଭ ଦାସ ନୂଆଦିଲ୍ଲୀର ଜନ୍ତର ମନ୍ତରରେ ମୁଖ୍ୟ ନିର୍ବାଚନ କମିଶନରଙ୍କ ବିରୋଧରେ ପ୍ରତିବାଦ କରିଥିଲେ । ପରେ ପୋଲିସ ତାଙ୍କୁ ବ୍ୟକ୍ତିଗତ ସ୍ଥାନରେ ଅନଧିକୃତ ଭାବେ ପ୍ରବେଶ କରିବା ଏବଂ ଶାନ୍ତି ବଜାୟ ରଖିବାର ବଣ୍ଡ ଉଲ୍ଲଘଂନ କରିବା ଅଭିଯୋଗରେ ଗିରଫ କରିଥିଲା । ପରେ ଅକ୍ଟୋବର ୧୪ ତାରିଖରେ ଜଣେ ସ୍ବତନ୍ତ୍ର କାର୍ଯ୍ୟନିର୍ବାହୀ ମାଜିଷ୍ଟ୍ରେଟ୍ ଉଭୟଙ୍କୁ ପାଞ୍ଚ ଦିନିଆ ବିଚାର ବିଭାଗୀୟ ହାଜତକୁ ପଠାଇ ଦେଇଥିଲେ । ସୋମବାର ମନ୍ଦିର ମାର୍ଗ ପୋଲିସ ଷ୍ଟେସନରେ ନବନିଯୁକ୍ତ ସ୍ବତନ୍ତ୍ର କାର୍ଯ୍ୟନିର୍ବାହୀ ମାଜିଷ୍ଟ୍ରେଟ୍ ଙ୍କ ସମ୍ମୁଖରେ ସେମାନଙ୍କୁ ହାଜର କରାଯାଇଥିଲା । ଆଉ ମାଜିଷ୍ଟ୍ରେଟ୍ ଉଭୟଙ୍କୁ ଆଉ ଦୁଇ ଦିନ ପାଇଁ ବିଚାର ବିଭାଗୀୟ ହାଜତକୁ ପଠାଇ ଦେଇଥିଲେ । ଯାହାକୁ ନେଇ ସିଜେପି ସମର୍ଥକଙ୍କ ମଧ୍ୟରେ ବଢିବାରେ ଲାଗିଛି ଅସନ୍ତୋଷ । ମମତା ବାନାର୍ଜୀ ଏକ୍ସରେ ଲେଖିଛନ୍ତି, ଆଶୁତୋଷ ଏବଂ ସୌରଭଙ୍କ ଅଟକ ଅବଧି ବୃଦ୍ଧି ପଛରେ ଥିବା ହତାଶାକୁ ମୁଁ ବୁଝିପାରୁଛି । ଏହା ଗଣତନ୍ତ୍ର ଉପରେ ଆକ୍ରମଣ କରିବା ପାଇଁ ପ୍ରତିଦିନ ବ୍ୟବହାର କରାଯାଉଥିବା ଏକ ବିପଦଜନକ ଭାଇରସ୍ । ଜେନ୍-ଜି ର ଯୁବକ ଯୁବତୀଙ୍କୁ ନିର୍ଯ୍ୟାତନା ଦେବା ବନ୍ଦ କରନ୍ତୁ । ଯେଉଁମାନେ ଆଜି କ୍ଷମତାରେ ଅଛନ୍ତି ସେମାନେ କାଲି କ୍ଷମତାରେ ରହିବେ ନାହିଁ । ସେ ଆହୁରି କହିଥିଲେ ଯେ,ଯେତେବେଳେ ବିଶ୍ବାସୀ ଲୋକମାନେ ଭାରତ ଏବଂ ଗଣତନ୍ତ୍ରକୁ ରକ୍ଷା କରିବାକୁ ଦୃଢ ଭାବରେ ଠିଆ ହେବେ ସେତେବେଳେ ହିଁ ସରାକରରେ ଥିବା ଅହଂକାରୀ ଏବଂ ଆଖିରେ ପଟି ବାନ୍ଧିଥିବା ରାଜନେତାମାନେ ଆଖି ଖୋଲିବେ । ହେଲେ ସେତେବେଳକୁ ଜନତାଙ୍କର ଜିତ୍ ହୋଇସାରିଥିବ ଏବଂ ଗଣତନ୍ତ୍ରର ହତ୍ୟା କରିଥିବା ଲୋକଙ୍କର ରାଜନୈତିକ ଅନ୍ତ ହୋଇଯାଇଥିବ ।
