ନନ୍ଦିଘୋଷ ବ୍ୟୁରୋ: ସୌରଭ ଓ ଆଶୁତୋଷଙ୍କ ସପକ୍ଷରେ ବାହାରିଲେ ନବୀନ । ଉଭୟଙ୍କୁ ତୁରନ୍ତ ଛାଡିବାକୁ ଦାବି କଲେ । କକ୍ରୋଚ ଜନତା ପାର୍ଟିର ସୌରଭ ଦାସ ଓ ଆଶୁତୋଷ ରାଙ୍କାଙ୍କୁ ତୁରନ୍ତ ଛଡ଼ାଯାଉ ବୋଲି କହିଛନ୍ତି ବିରୋଧୀ ଦଳ ନେତା ତଥା ବିଜେଡି ସଭାପତି ନବୀନ ପଟ୍ଟନାୟକ। ସୋସିଆଲ ମିଡିଆରେ ପୋଷ୍ଟ କରି ସେ ଲେଖିଛନ୍ତି, କଟକଣା ଲାଗିଥିବା ସ୍ଥାନରେ ବି ଜାତୀୟ ପତାକା ଉଡ଼ାଇଲେ ଏତେ ଦିନ ଧରି ଅଟକ ରଖାଯିବା ଉଚିତ ନୁହେଁ। ସୌରଭ ଓ ଆଶୁତୋଷଙ୍କ ନ୍ୟାୟିକ ହେପାଜତର ସମୀକ୍ଷା କରାଯାଉ। ଦେଶର ଆଇନ କାନୁନ ଓ ସାମ୍ବିଧାନିକ ଅଧିକାର ଉପରୁ ଯୁବ ବର୍ଗଙ୍କ ଭରସା ଯେମିତି ତୁଟି ନ ଯାଏ, ସେଥିପାଇଁ ବିଚାର ବିଭାଗ ଓ ପ୍ରଶାସନ ପଦକ୍ଷେପ ନେବା ଉଚିତ ବୋଲି ଉଲ୍ଲେଖ କରିଛନ୍ତି ନବୀନ ପଟ୍ଟନାୟକ। ଅକ୍ଟୋବର ୧୪ ତାରିଖରେ ଦିଲ୍ଲୀର ଜନ୍ତର ମନ୍ତରରେ ପ୍ରବେଶ ଅଭିଯୋଗରେ ସୌରଭ ଦାସ ଓ ଆଶୁତୋଷ ରାଙ୍କାକୁ ଜେଲ ପଠାଯାଇଛି। କଟକଣା ସତ୍ତ୍ଵେ ସେଠାରେ ଜାତୀୟ ପତାକା ଉଡ଼ାଇବାକୁ ଚେଷ୍ଟା କରିଥିଲେ ଦୁଇ ନେତା। ସେମାନେ ଏବେ ବିଚାର ବିଭାଗୀୟ ହାଜତରେ ଅଛନ୍ତି। ଏଯାଏ ବେଲ୍ ମିଳିନି। ପ୍ରଥମେ ୧୯ ତାରିଖ ଯାଏ ପରେ ଆଉ ଦୁଇ ଦିନ ଅର୍ଥାତ ଆସନ୍ତାକାଲି ଯାଏ ସେମାନଙ୍କର ହାଜତ ମିଆଦ ବୃଦ୍ଧି କରିଛନ୍ତି କୋର୍ଟ।
କୋଟିଆ ସୁରକ୍ଷା: ସରକାରଙ୍କ ଉପରେ ବର୍ଷିଲା ବିଜେଡି
ନନ୍ଦିଘୋଷ ବ୍ୟୁରୋ: କମିଟିରେ କୋଟିଆ ସୁରକ୍ଷା । ନବୀନଙ୍କ ଚିଠି ପରେ ବର୍ଷିଲା ବିଜେଡି। ସରକାରଙ୍କ ନିରବତାକୁ ନେଇ ଉଠିଲା ପ୍ରଶ୍ନ । କଂଗ୍ରେସ କହିଲା କ୍ଷମତା ପାଇଁ ମାଟି ବଳି ।…କୋଟିଆକୁ ନେଇ ଗତକାଲି ବିରୋଧୀ ଦଳ ନେତା ନବୀନ ପଟ୍ଟନାୟକ ମୁଖ୍ୟମନ୍ତ୍ରୀ ମୋହନ ମାଝୀଙ୍କୁ ଚିଠି ଲେଖିବା ପରେ ରାଜ୍ୟ ସରକାରଙ୍କୁ ଟାର୍ଗେଟ କରିଛି ବିଜେଡି । କୋଟିଆକୁ ନେଇ ରାଜସ୍ବମନ୍ତ୍ରୀଙ୍କ ନେତୃତ୍ୱରେ ଗଠିତ କମିଟିର ରିପୋର୍ଟ କୁଆଡ଼େ ଗଲା ବୋଲି ବିଜେଡି ବିଧାୟକ ଅରୁଣ ସାହୁ ପ୍ରଶ୍ନ କରିଛନ୍ତି । ଆନ୍ଧ୍ରପ୍ରଦେଶ ସରକାର କୋଟିଆରେ ପଞ୍ଚାୟତ ନିର୍ବାଚନ ପ୍ରସଙ୍ଗ ଉଠାଉଥିବା ବେଳେ ଓଡ଼ିଶା ସରକାରଙ୍କ ନିରବତାକୁ ନେଇ ପ୍ରଶ୍ନ ଉଠିଛି । ବିଜେଡି କହିଛି କେନ୍ଦ୍ରରେ ବିଜେପି, ଓଡ଼ିଶାରେ ବିଜେପି ଏବଂ ଆନ୍ଧ୍ରରେ ଟିଡିପି ସହ ବିଜେପିର ମେଣ୍ଟ । ଟିଡିପି ଓହରିଗଲେ ସଙ୍କଟରେ ପଡ଼ିବ ବିଜେପି ସରକାର। ତିନି ରାଜ୍ୟରେ ଅନୁକୂଳ ରାଜନୈତିକ ସମୀକରଣ ସତ୍ତ୍ୱେ କୋଟିଆ ସମସ୍ୟାର ସମାଧାନ ହେଉନି କାହିଁକି ବୋଲି ପ୍ରଶ୍ନ କରିଛନ୍ତି ବିଧାୟକ ଅରୁଣ ସାହୁ । ଓଡ଼ିଆ ଅସ୍ମିତା ବଡ଼ ନା ଦଳୀୟ ସ୍ୱାର୍ଥ ? ଏହି ପ୍ରଶ୍ନ ଉଠାଇ ରାଜ୍ୟ ସରକାରଙ୍କୁ ଘେରିଛି ବିଜେଡି। କୋଟିଆର ସୁରକ୍ଷା ପାଇଁ ସରକାର କେବେ ଠୋସ୍ ପଦକ୍ଷେପ ନେବେ, ତାହା ସ୍ପଷ୍ଟ କରନ୍ତୁ । କେନ୍ଦ୍ରରେ ସରକାର ବଞ୍ଚାଇବା ପାଇଁ ଆନ୍ଧ୍ର ପାଖରେ ଆତ୍ମସମର୍ପଣ କରିଛି ଓଡିଶା ସରକାର ବୋଲି ବିଜେଡି ଅଭିଯୋଗ କରିଛି । କୋଟିଆ ହେଉଛି ଓଡ଼ିଆ ଅସ୍ମିତାର ଗୋଟିଏ ଉଦାହରଣ । ଅଢେଇ ବର୍ଷରେ ଓଡ଼ିଆ ଅସ୍ମିତାକୁ କେତେ ବିଜେପି ସରକାର ବଞ୍ଚାଇଛନ୍ତି ତାହା କୋଟିଆ ପ୍ରସଙ୍ଗରେ ସ୍ପଷ୍ଟ ବୋଲି ବିଜେଡି କହିଛି ।
କୋଟିଆରେ ଆନ୍ଧ୍ର ନିର୍ବାଚନ କରୁଥିବା ବେଳେ ଓଡିଶା ସରକାର ନିରବଦଷ୍ଟା ସାଜିବାକୁ ନେଇ ବର୍ଷିଛନ୍ତି ପିସିସି ସଭାପତି ଭକ୍ତ ଚରଣ ଦାସ । କ୍ଷମତା ପାଇଁ ବିଜେପି ମାଟିକୁ ବିକ୍ରି କରିଦେଲା ବୋଲି କଂଗ୍ରେସ କହିଛି । ଯେଉଁ ସରକାର ନିଜ ମାଟିକୁ ବଞ୍ଚାଇପାରୁନାହିଁ ସେ ଓଡିଶାବାସୀଙ୍କ ପାଇଁ କଣ କରିବ । ବିଜେପି ସରକାର ରାଜ୍ୟରେ ରବର ଷ୍ଟାମ୍ପ ହୋଇ ଚାଲିଛି ବୋଲି କଂଗ୍ରେସ କହିଛି । ରାଜସ୍ବ ମନ୍ତ୍ରୀ ଓ ଆଇନ ମନ୍ତ୍ରୀ କାହିଁକି ତୁରନ୍ତ କୋଟିଆ ଯାଉନାହାନ୍ତି। ନବୀନ ପଟ୍ଟନାୟକ ଯାହା କହିଛନ୍ତି ଠିକ କହିଛନ୍ତି । ଟିଡିପି ଯଦି ବିଜେପି ଠାରୁ ସମର୍ଥନ କାଢିନେବ ତେବେ ବିଜେପି ସରକାର କେନ୍ଦ୍ରରେ ଭାଙ୍ଗିଯିବ ବୋଲି କହିଛନ୍ତି କଂଗ୍ରେସ । ସେପଟେ ଦୁଇ ବିରୋଧୀ ବିଜେଡି ଓ କଂଗ୍ରେସର ଅଭିଯୋଗ ଉପରେ ଜବାବ ରଖିଛି ଶାସକ ଦଳ ।
କୋଟିଆରେ ଥିବା ଖଣି ସମ୍ପଦ ଉପରେ ଆନ୍ଧ୍ର ସରକାର ଆଖି ପଡିଛି । ଆନ୍ଧ୍ର ଓଡ଼ିଶାରେ ଅନୁପ୍ରବେଶ କରୁଛି । ଓଡିଶା ସରକାରଙ୍କ ଅସମ୍ଭବ ନିରବତା ନେଇ ପୂରା ଓଡିଶାରେ ଉଠିଛି ପ୍ରତିବାଦର ସ୍ବର। ବିଜେପିକୁ ବିରୋଧୀଙ୍କ ପ୍ରଶ୍ନ, ଓଡ଼ିଆ ଅସ୍ମିତା କଣ ନିଜ ମାଟି ଅନ୍ୟ ରାଜ୍ୟକୁ ଟେକିଦେବା ।
ରିଲାଏନ୍ସର ତେଲରେ ଆମେରିକାର ଲୋଭ !
ନନ୍ଦିଘୋଷ ବ୍ୟୁରୋ: ଭାରତ ଓ ଆମେରିକା ମଧ୍ୟରେ ହୋଇପାରେ ବଡ଼ ଶକ୍ତି ସହଯୋଗ। ଯଦିଓ ସରକାର – ସରକାର ମଧ୍ୟରେ ଆଲୋଚନା ହୋଇନି, ଏହା ସିଧା ଆମେରିକା ଓ ରିଲାଏନ୍ସ କମ୍ପାନି ମଧ୍ୟରେ ଆଲୋଚନା ହେବାର ଅଛି। ଆଜି ଭାରତରେ ପହଞ୍ଚିଛନ୍ତି ଆମେରିକାର ବୈଦେଶିକ ସଚିବ ମାର୍କୋ ରୁବିଓ। ଆସନ୍ତାକାଲି ସେ ଗୁଜରାଟ ଜାମନଗର ଯିବେ। ରିଲାଏନ୍ସର ତେଲ ବିଶୋଧନାଗାର ପରିଦର୍ଶନ କରିବେ। ଏହି ସମୟରେ ଶକ୍ତି ସୁରକ୍ଷା ନେଇ ଆଲୋଚନା ହେବ ବୋଲି ସେ ସଂକେତ ଦେଇଛନ୍ତି। ଭେନଜୁଏଲାର ତେଲକୁ ଜାମନଗରରେ ବିଶୋଧନ କରିବାର ପ୍ରସ୍ତାବ ମିଳିପାରେ। ଆମେରିକାରେ ମଧ୍ୟ ଏକ ବଡ଼ ବିଶୋଧନାଗାର ପ୍ରତିଷ୍ଠା କରିବାରେ ନିବେଶ କରୁଛି ରିଲାଏନ୍ସ। ଜାମନଗର ଯିବା ପୂର୍ବରୁ ଆଜି ମୁମ୍ଵାଇରେ ବୈଦେଶିକ ମନ୍ତ୍ରୀ ଏସ୍ ଜୟଶଙ୍କରଙ୍କୁ ଭେଟିଛନ୍ତି ମାର୍କୋ ରୁବିଓ। ରୁଷିଆର ତେଲ କିଣିବା ନେଇ ବି ଭାରତ ପ୍ରତି କୋହଳ ମନୋଭାବ ଦେଖାଇଛନ୍ତି ମାର୍କୋ। ରୁବିଓଙ୍କ ଏହି ଗସ୍ତ ସମୟରେ ପ୍ରସ୍ତାବିତ ଭାରତ-ଆମେରିକା ବାଣିଜ୍ୟ ଚୁକ୍ତି, ଶକ୍ତି ସମ୍ପର୍କ ଏବଂ ପ୍ରତିରକ୍ଷା ସହଯୋଗ ଏଜେଣ୍ଡାର ପ୍ରମୁଖ ରହିବ ବୋଲି ଆଶା କରାଯାଉଛି ।
ଏହି ବୈଠକ ଏପରି ଏକ ସମୟରେ ହେଉଛି ଯେତେବେଳେ ଆମେରିକା ଶୁଳ୍କ ଏବଂ ଭାରତ ଦ୍ବାରା ଋଷୀୟ ତୈଳ କ୍ରୟକୁ ନେଇ ନୂଆଦିଲ୍ଲୀ ଏବଂ ଓ୍ବାଶିଂଟନ୍ ମଧ୍ୟରେ ସମ୍ପର୍କ କିଛି ବାଧାପ୍ରାପ୍ତ ହୋଇଛି । ତେଣୁ ଉଭୟ ପକ୍ଷ ଏହି ପାର୍ଥକ୍ୟକୁ ଅତିକ୍ରମ କରି ସେମାନଙ୍କର ସହଭାଗୀତାକୁ ସୁଦୃଢ କରିବା ପାଇଁ ଆଲୋଚନା କରିବେ ବୋଲି ଆଶା କରାଯାଉଛି । ଏହି ବାଣିଜ୍ୟ ଚୁକ୍ତି ଏକ ପ୍ରମୁଖ କେନ୍ଦ୍ରବିନ୍ଦୁ ହେବାର ସମ୍ଭାବନା ରହିଛି , ଯାହା ସମ୍ପ୍ରତି ଆମେରିକୀୟ ଅଧିକାରୀମାନେ ସଙ୍କେତ ଦେଇଛନ୍ତି ଯେ, ଦୁଇ ଦେଶ ଏକ ଚୁକ୍ତିନାମାରେ ପହଁଚିବାର ନିକଟର । ତେବେ ଗୁରୁତ୍ବପୂର୍ଣ୍ଣ ପ୍ରଯୁକ୍ତିବିଦ୍ୟାରେ ସହଯୋଗ ସହିତ ଶକ୍ତି ସହଯୋଗ ଏବଂ ପ୍ରତିରକ୍ଷା ସମ୍ପର୍କ ମଧ୍ୟ ଆଲୋଚନାରେ ସ୍ଥାନ ପାଇବା ନେଇ ଆଶା କରାଯାଉଛି ।
ମୁକୁଳି ପାରିଲେନି ସୌରଭ-ଆଶୁତୋଷ: ରାତିରେ ଗଲେ ହାଇକୋର୍ଟ !
ନନ୍ଦିଘୋଷ ବ୍ୟୁରୋ: ଦିଲ୍ଲୀ ହାଇକୋର୍ଟକୁ ଗଲେ ସିଜେପି ନେତା ସୌରଭ ଦାସ ଓ ଆଶୁତୋଷ ରାଙ୍କା। ହାଜତ ବୃଦ୍ଧି ଆଦେଶକୁ ଚ୍ୟାଲେଞ୍ଜ କରି ସେମାନେ ଦିଲ୍ଲୀ ହାଇକୋର୍ଟକୁ ଯାଇଛନ୍ତି। ରାତିରେ ଶୁଣାଣି ପାଇଁ ବି ଅନୁରୋଧ କରିଛନ୍ତି। ଜଣେ ସ୍ୱତନ୍ତ୍ର କାର୍ଯ୍ୟନିର୍ବାହୀ ମାଜିଷ୍ଟ୍ରେଟ ଜାମିନଦାରଙ୍କୁ ଅଗ୍ରାହ୍ୟ କରିବା ସହିତ ନ୍ୟାୟିକ ହାଜତକୁ ଅକ୍ଟୋବର ୨୧ ଯାଏ ବୃଦ୍ଧି କରିଥିଲେ।
CJPର ଆଇନ ବିଭାଗ ମୁଖ୍ୟ ରତ୍ନା ସିଂହ କହିଛନ୍ତି ଯେ ଅଦାଲତର ଛୁଟି ସମୟରେ ରାତିରେ ଜରୁରୀ ଶୁଣାଣି ପାଇଁ ଟିମ୍ ଅନୁରୋଧ କରିଛି। ଏନେଇ ହାଇକୋର୍ଟର ରେଜିଷ୍ଟ୍ରି ପକ୍ଷରୁ ଉତ୍ତରକୁ ଅପେକ୍ଷା କରାଯାଇଛି। ସୌରଭ ଓ ଆଶୁତୋଷ ଗୋଟିଏ ମିନିଟ୍ ପାଇଁ ମଧ୍ୟ ଜେଲ୍ରେ ରହିବା ଉଚିତ ନୁହେଁ। ରାଜନୈତିକ ଖେଳ ଯୋଗୁଁ ସେମାନଙ୍କ ସ୍ୱାଧୀନତାକୁ ସଂକୁଚିତ କରାଯାଉଛି। ଦକ୍ଷିଣ-ପଶ୍ଚିମ ଜିଲ୍ଲାର ସ୍ୱତନ୍ତ୍ର କାର୍ଯ୍ୟନିର୍ବାହୀ ମାଜିଷ୍ଟ୍ରେଟ୍ (SEM) ହେପାଜତ ଅବଧି ବୃଦ୍ଧି ସମୟରେ ପୁଣି ଥରେ ଶାନ୍ତିଭଙ୍ଗ ହେବାର ଆଶଙ୍କା ରହିଥିବା ଦର୍ଶାଇଥିଲେ। ସୌରଭ ଓ ଆଶୁତୋଷ ଅକ୍ଟୋବର ୧୧ ର ସର୍ତ୍ତକୁ ଜାଣିଶୁଣି ଉଲ୍ଲଂଘନ କରିଥିଲେ, ଶାନ୍ତିଭଙ୍ଗ କରିଥିଲେ। ଶାନ୍ତିଭଙ୍ଗ ଓ ସାର୍ବଜନୀନ ଶାନ୍ତି ବ୍ୟାହତ ହେବାର ଆଶଙ୍କା ସୃଷ୍ଟି କରୁଛି। ତେଣୁ ପ୍ରତିଷେଧମୂଳକ ପଦକ୍ଷେପ ଜାରି ରଖିବା ଆବଶ୍ୟକ ବୋଲି ମାଜିଷ୍ଟ୍ରେଟ କହିଥିଲେ।
ଗତ ୧୪ ତାରିଖରେ ଜନ୍ତର ମନ୍ତରକୁ ପ୍ରବେଶ ଉଦ୍ୟମ କରିବାରୁ ସୌରଭ ଓ ଆଶୁତୋଷଙ୍କୁ ଗିରଫ କରାଯାଇଥିଲା। ଜନ୍ତର ମନ୍ତରରେ ଆଉ କେହି ଆନ୍ଦୋଳନ କରିପାରିବେ ନାହିଁ ବୋଲି କେନ୍ଦ୍ର ସରକାର ଘୋଷଣା କରିଛନ୍ତି। ଏହା ସତ୍ତ୍ଵେ ସେଠାରେ ତ୍ରିରଙ୍ଗା ଯାତ୍ରା କରିବାକୁ ଯାଇଥିଲେ ଉଭୟ ନେତା। କୋର୍ଟ ଉଭୟଙ୍କୁ ୫ ଦିନିଆ ବିଚାର ବିଭାଗୀୟ ହାଜତକୁ ପଠାଇଥିଲେ। ଗତକାଲି ସେହି ମିଆଦ ପୂରୁଥିଲା। କୋର୍ଟରେ ସେମାନଙ୍କୁ ହାଜର କରାଯାଇଥିଲା। କିନ୍ତୁ ସୌରଭ ଓ ଆଶୁତୋଷଙ୍କୁ ମୁକ୍ତି ଦେବା ବଦଳରେ କୋର୍ଟ ଆଉ ଦୁଇ ଦିନ ହାଜତ ମିଆଦ ବୃଦ୍ଧି କରିଥିଲେ। ଆସନ୍ତାକାଲି ଏହାର ପରବର୍ତ୍ତୀ ଶୁଣାଣି ହେବ।
୪ ବର୍ଷ ପରେ ପରୀକ୍ଷା ସୁଯୋଗ: ସହଜ ହେଲା ଡାକ୍ତର ହେବା !
ନନ୍ଦିଘୋଷ ବ୍ୟୁରୋ: ଏମବିବିଏସ୍ ଛାତ୍ରଛାତ୍ରୀଙ୍କ ପାଇଁ ବଡ଼ ଆଶ୍ବସ୍ତି । ପରୀକ୍ଷା ପାଇଁ ମିଳିବ ଅତିରିକ୍ତ ସୁବିଧା । ୨୦୧୯-୨୦ ଓ ୨୦୨୦-୨୧ ଶିକ୍ଷାବର୍ଷର ଏମ୍ବିବିଏସ୍ ଛାତ୍ରଛାତ୍ରୀଙ୍କ ପାଇଁ ବଡ଼ ସୁଯୋଗ । କୋଭିଡ୍ ସମୟରେ ଅସୁବିଧା ବା ଅସୁସ୍ଥତା ପାଇଁ ଯେଉଁ ଛାତ୍ରଛାତ୍ରୀ ଉତ୍ତୀର୍ଣ୍ଣ ହୋଇପାରି ନାହାନ୍ତି, ସେମାନଙ୍କ ପାଇଁ ପ୍ରଥମ ପ୍ରଫେସନନାଲ୍ ଏମବିବିଏସ୍ ପରୀକ୍ଷା ପାସ୍ କରିବା ଲାଗି ଗୋଟିଏ ଅତିରିକ୍ତ ସୁବିଧା ମିଳିବ । ଏନେଇ ନ୍ୟାସନାଲ ମେଡିକାଲ କମିଶନ-ଏନ୍ଏମ୍ସି ଏକ ଅସ୍ଥାୟୀ କୋହଳ ବ୍ୟବସ୍ଥା ଆଣିଛନ୍ତି । ଛାତ୍ରଛାତ୍ରୀଙ୍କ ଏହି ସମସ୍ୟା ଏନ୍ଏମ୍ସି ପାଖରେ ବିଚାରାଧୀନ ଥିଲା । ତାହାକୁ ବିଚାର କରି ଏନଏମ୍ସି ଏହି ନିଷ୍ପତ୍ତି ନେଇଛନ୍ତି । ଏଥିପାଇଁ ଏନ୍ଏମ୍ସିର ଯୋଗ୍ୟ ଛାତ୍ରଛାତ୍ରୀଙ୍କ ପାଇଁ କିଛି ସର୍ତ୍ତ ରଖାଯାଇଛି । ଛାତ୍ରଛାତ୍ରୀଙ୍କୁ ପ୍ରଥମ ପ୍ରଫେସନାଲ୍ ଏମ୍ବିବିଏସ୍ ପରୀକ୍ଷା ପାସ୍ କରିବା ପାଇଁ ନିର୍ଦ୍ଧାରିତ ୪ଟି ସୁଯୋଗ ବ୍ୟତୀତ ଗୋଟିଏ ଅତିରିକ୍ତ ସୁଯୋଗ ବା ସର୍ବମୋଟ ୫ଟି ସୁଯୋଗ ପାଇଁ ଅନୁମତି ଦିଆଯିବ। ପ୍ରଥମ ପ୍ରଫେସନାଲ୍ ଏମ୍ବିବିଏସ୍ ପାଠ୍ୟକ୍ରମ ସମ୍ପୂର୍ଣ୍ଣ କରିବା ପାଇଁ ଛାତ୍ରଛାତ୍ରୀ ନିର୍ଦ୍ଧାରିତ ଚାରି ବର୍ଷ ଅବଧି ଅତିକ୍ରମ କରି ସାରିଥିଲେ ସୁଦ୍ଧା ଏହି ଅତିରିକ୍ତ ସୁଯୋଗ ଉପଲବ୍ଧ ହେବ । ସେଥିରେ ଛାତ୍ରଛାତ୍ରୀଙ୍କ ନାମଲେଖା ବୈଧ ରହିଥିବା ଆବଶ୍ୟକ । ବାଧ୍ୟତାମୂଳକ ରୋଟେଟିଂ ମେଡିକାଲ୍ ଇଣ୍ଟର୍ଣ୍ଣସିପ୍ର ପ୍ରଯୁଜ୍ୟ ଅବଧି ସହ ଏମବିବିଏସ୍ ପାଠ୍ୟକ୍ରମ ସମ୍ପୂର୍ଣ୍ଣ କରିବାର ମୋଟ ଅବଧି ନାମଲେଖା ତାରିଖରୁ ଦଶ ବର୍ଷରୁ ଅଧି୍କ ହେବ ନାହିଁ । ତେବେ ଏହା କେବଳ କୋଭିଡ ପ୍ରଥମ ଓ ଦ୍ବିତୀୟ ଲହରରେ ପରୀକ୍ଷା ଦେଇ ପାରିନଥିବା ଛାତ୍ରଛାତ୍ରୀଙ୍କ ପାଇଁ ଲାଗୁ ହେବ । ଏନଏମସିଙ୍କ ଏହି ନିଷ୍ପତ୍ତି ଓ ସର୍ତ୍ତାବଳୀକୁ ପାଳନ କରିବାକୁ ସରକାରୀ ସ୍ତରରେ ପ୍ରସ୍ତୁତି ଆରମ୍ଭ ହୋଇ ସାରିଛି । ଓଡ଼ିଶାରେ ମଧ୍ୟ କୋଭିଡର ଭୟାବହତା ଥିଲା । ସେ ସମୟରେ ଓଡ଼ିଶାରେ ଡିଏମଇଟି ଦ୍ବାୟିତ୍ବରେ ଥିବା ନିର୍ଦ୍ଦେଶକ ବି ଛାତ୍ରଛାତ୍ରୀଙ୍କ ଭବିଷ୍ୟତର ସୁରକ୍ଷାକୁ ଦୃଷ୍ଟିରେ ରଖି ପୁନଃ ସୁଯୋଗର ଗୁରୁତ୍ବକୁ ଅନୁଭବ କରିଥିଲେ ।
କୋଭିଡ ସମୟରେ ୟୁପିଏସସିରୁ ଆରମ୍ଭ କରି ବାୟୁସେନା ପରୀକ୍ଷା ସ୍ଥଗିତ ରଖାଯାଇଥିଲା । ଅନେକ ରାଜ୍ୟରେ ପୋଲିସ ଓ ନର୍ସିଂ ପରୀକ୍ଷା ବି ବାତିଲ ହୋଇଥିଲା । ସେ ସମୟରେ କୋଭିଡ ଯୋଗୁଁ ଖରାପ ସ୍ବାସ୍ଥ୍ୟ ସହ ଛାତ୍ରଛାତ୍ରୀ ପରୀକ୍ଷା ସ୍ଥଗିତର ମାନସିକ ଦୁଶ୍ଚିନ୍ତାରେ ଦିନ ଗଡ଼ାଉଥିଲେ । ଖାସ୍ କରି ଡାକ୍ତରୀ ଛାତ୍ରଛାତ୍ରୀ, ସେମାନେ ରୋଗୀ ସେବା କରିବେ ନା ପୁଣି ଥରେ କେମିତି ପରୀକ୍ଷା ଦେବେ, ସେ ଚିନ୍ତାରେ ଦିନ କାଟୁଥିଲେ । ଯେଉଁଥି ପାଇଁ ସେମାନେ ନ୍ୟାସନାଲ ମେଡିକାଲ କମିଶନ ପାଖରେ ପୁନଃ ପରୀକ୍ଷା ପାଇଁ ଆବେଦନ କରିଥିଲେ । ଆଜି ୨୦୧୯-୨୦ ଓ ୨୦୨୦-୨୧ ଶିକ୍ଷାବର୍ଷର ଏମ୍ବିବିଏସ୍ ଛାତ୍ରଛାତ୍ରୀଙ୍କ ପାଇଁ ଯେପରି ସୁଯୋଗ ଆସିଛି, ସେପରି ଅନେକ ବୃତ୍ତି ଓ ପ୍ରବେଶିକା ପରୀକ୍ଷାରୁ ବଞ୍ଚିତ ଛାତ୍ରଛାତ୍ରୀଙ୍କ ପାଇଁ ବି ସୁଯୋଗ ମିଳିବା ନେଇ ଦାବି କରିଛନ୍ତି ଆଶାୟୀ ଛାତ୍ରଛାତ୍ରୀ ।
ଏନଏମସି ଏହି ନିଷ୍ପତ୍ତିକୁ ଏହି ଥରକ ପାଇଁ ବ୍ୟତିକ୍ରମିକ ପରିବର୍ତ୍ତନମୂଳକ ପଦକ୍ଷେପ ଭାବରେ ବର୍ଣ୍ଣନା କରିଛି । ଯାହା ଯୋଗ୍ୟ ବିଚାରାଧୀନ ମାମଲାଗୁଡ଼ିକରେ ଆଶ୍ବସ୍ତି ପ୍ରଦାନ କରିବା ପାଇଁ ଉଦ୍ଦିଷ୍ଟ। ଏହା ପରୀକ୍ଷା ପ୍ରୟାସର ଅନୁମୋଦିତ ସଂଖ୍ୟାକୁ ନିୟନ୍ତ୍ରଣ କରୁଥିବା ସଂଶୋଧିତ ନିୟମାବଳୀର ପୂର୍ବବର୍ତ୍ତୀ ପ୍ରୟୋଗ ନୁହେଁ । ଏହି ନିଷ୍ପତ୍ତି ପରବର୍ତ୍ତୀ ଶିକ୍ଷାଗତ ବ୍ୟାଚ୍ ପାଇଁ ସଂଶୋଧକ ନିୟମାବଳୀ ଭାବେ ବିବେଚନା କରାଯାଇ ପାରିବ ନାହିଁ ।
ନନ୍ଦନକାନନରେ ପ୍ରାଣ ହରାଇଲା…
ଭୁବନେଶ୍ବର: ନନ୍ଦନକାନନରେ ଥମୁନି ପ୍ରାଣୀ ମୃତ୍ୟୁ । ପ୍ରାଣୀ ଉଦ୍ୟାନରେ ଆଜି ପୁଣି ଗୋଟିଏ ପକ୍ଷୀର ମୃତ୍ୟୁ ହୋଇଛି । ଏଥର ଉଦ୍ଭିଦ ଉଦ୍ୟାନରେ ଥିବା ଶାଗୁଣା ପ୍ରଜନନ କେନ୍ଦ୍ରରେ ଗୋଟିଏ ମାଈ ଶାଗୁଣାର ମୃତ୍ୟୁ ହୋଇଛି । ପରସ୍ପର ମଧ୍ୟରେ ଲଢ଼େଇ ପରେ କାନ୍ଥରେ ମୁଣ୍ଡ ପିଟି ହୋଇ ଆହତ ହେବାରୁ ଏହାର ମୃତ୍ୟୁ ଘଟିଥିବା କର୍ତ୍ତୃପକ୍ଷ ସୂଚନା ଦେଇଛନ୍ତି । ମୃତ ମାଈ ଶାଗୁଣାଟି କ୍ୱାରେଣ୍ଟାଇନରେ ରଖାଯାଇଥିଲା । ବର୍ତ୍ତମାନ ଏହି ପ୍ରଜନନ କେନ୍ଦ୍ରର ପୁନରୁଦ୍ଧାର କାର୍ଯ୍ୟ ଜାରି ରହିଥିବା ବେଳେ ଏଭଳି ମୃତ୍ୟୁକୁ ନେଇ ଶାଗୁଣା ସଂରକ୍ଷଣ ପ୍ରୟାସ ଉପରେ ପ୍ରଶ୍ନ ଉଠୁଛି । ଭାରତରେ ଶାଗୁଣା ବଂଶ ଅତ୍ୟନ୍ତ ସଙ୍କଟାପନ୍ନ । ୯୦ ଦଶକ ପରଠାରୁ ଦେଶରେ ଧଳା ପିଠିଆ ଶାଗୁଣା ,ଲମ୍ବା ଥୋଟିଆ ଶାଗୁଣା ଓ ଲାଲ୍ ମୁଣ୍ଡିଆ ଶାଗୁଣା ପ୍ରଜାତିର ସଂଖ୍ୟା ୯୦ ପ୍ରତିଶତରୁ ଅଧିକ ପଯ୍ୟନ୍ତ ହ୍ରାସ ପାଇଥିବା ବିଶେଷଜ୍ଞମାନେ କୁହନ୍ତି । ଏହାକୁ ଦୃଷ୍ଟିରେ ରଖି ନନ୍ଦନକାନନରେ ଶାଗୁଣା ପ୍ରଜନନ କେନ୍ଦ୍ର ସ୍ଥାପନ କରାଯାଇଥିଲା । ଏଭଳି ସ୍ଥିତିରେ ଗୋଟିଏ ପ୍ରଜନନକ୍ଷମ ମାଈ ଶାଗୁଣାର ମୃତ୍ୟୁ ସଂରକ୍ଷଣ ପ୍ରୟାସକୁ ବଡ଼ ଝଟକା ବୋଲି ପଶୁପ୍ରେମୀ କହିଛନ୍ତି । ଗତ କିଛିଦିନ ମଧ୍ୟରେ କୁମ୍ଭୀର ଛୁଆ, ଲଭ୍ ବାର୍ଡ ଏବଂ ଏବେ ଶାଗୁଣାର ମୃତ୍ୟୁ ନନ୍ଦନକାନନ ପରିଚାଳନା ଉପରେ ପ୍ରଶ୍ନବାଚୀ ସୃଷ୍ଟି କରିଛି । ତେବେ ଏ ନେଇ କର୍ତ୍ତୃପକ୍ଷଙ୍କ ପ୍ରତିକ୍ରିୟା ମିଳିପାରି ନାହିଁ ।
ମାଙ୍କୁ ଲାଗି ହେଲା ମାଛ ଭୋଗ..
ନନ୍ଦିଘୋଷ ବ୍ୟୁରୋ: ମହାମାୟାଙ୍କ ମହାନବମୀ । ମଣ୍ଡପରେ ଖଚାଖଚ ଭିଡ଼ । ମାଆଙ୍କୁ ଦର୍ଶନ କରି ଆଶିଷ ନେଉଛନ୍ତି ଶ୍ରଦ୍ଧାଳୁ । ଭିଡ଼ ନିୟନ୍ତ୍ରଣ ଓ ଟ୍ରାଫିକ ପରିଚାଳନା ପାଇଁ ପୋଲିସର ବ୍ୟାପକ ବ୍ୟବସ୍ଥା । ଭୁବନେଶ୍ବରର ବିଭିନ୍ନ ପୂଜା ମଣ୍ଡପରେ ଲାଗିଛି ଲୋକଙ୍କ ଗହଳି । ନବମୀ ପୁଜା ପାଇଁ ଶ୍ରଦ୍ଧାଳୁ ମାଆ ଦୁର୍ଗାଙ୍କ ନିକଟରେ ପୂଜା କରିବା ସହ ଆଶିଷ ନେଉଛନ୍ତି । ଭୁବନେଶ୍ବର ପୁରୁଣା ଷ୍ଟେସନ ବଜାର ପୂଜା ମଣ୍ଡପରେ ଦେଖିବାକୁ ମିଳିଛି ପ୍ରବଳ ଭିଡ଼ । ଶୈବପୀଠ ସହ ଭିତରେ ସର୍କସ ଥିମ ଥିବା ତୋରଣରେ ପୂଜା ପାଉଛନ୍ତି ମାଆ । ରସୁଲଗଡ଼ ପୂଜା ମଣ୍ଡପରେ ଭିଡ଼କୁ ଦୃଷ୍ଟିରେ ରଖି ବ୍ୟାପକ ବ୍ୟବସ୍ଥା କରାଯାଇଛି । ଚଳିତବର୍ଷ ରସୁଲଗଡ଼ ପୂଜା ମଣ୍ଡପ ୩୪ ବର୍ଷରେ ପଦାର୍ପଣ କରିଛି । ଏଥର ବିଶ୍ୱପ୍ରସିଦ୍ଧ ଭାଟିକାନ୍ ସିଟିର ସ୍ଥାପତ୍ୟ ଶୈଳୀକୁ ଆଧାର କରି ଏଠାରେ ତିଆରି ହୋଇଛି ବିଶାଳ ତୋରଣ । ସେପଟେ ଶାସ୍ତ୍ରୀ ନଗର ମହାବୀର ପୂଜା କମିଟି ଚଳିତବର୍ଷ ଷଷ୍ଠ ବର୍ଷରେ ପାଦ ଦେଇଥିବାରୁ ଏଠାରେ ପୂଜା ପାଉଛନ୍ତି ପଞ୍ଚମୁଖୀ ମହାବୀର ହନୁମାନ । ପଣ୍ଡିତଙ୍କ ହନୁମାନ ଚାଳିଶା ପାଠରେ ପ୍ରକମ୍ପିତ ହେଉଛି ପରିବେଶ ।
କଟକ ଦୁର୍ଗାପୂଜା ନବମୀର ଅନ୍ୟତମ ଆକର୍ଷଣ ହେଉଛି ମାଛ ଭୋଗ । ପ୍ରତିବର୍ଷ ମାଆଙ୍କ ପାଖରେ ଚାନ୍ଦିନୀଚୌକ ପୂଜା ମଣ୍ଡପ ପକ୍ଷରୁ ୧୦ ହଜାର ଲୋକଙ୍କ ପାଇଁ ଏହି ମାଛ ଭୋଗ ହୋଇଥାଏ । ୧୦ କ୍ବିଣ୍ଟାଲ ମାଛ, ୧୦ କ୍ବିଣ୍ଟାଲ ପରିବା, ପାଣି କଖାରୁରେ କାନିକା, ମାଛ ତରକାରୀ ଓ ମିଠା ପାଣି କଖାରୁ ଖଟା ହୋଇ ମାଆଙ୍କ ପାଖରେ ଭୋଗ ଲାଗେ । ସେପଟେ କଟକ ହରିପୁର ଦୋଳମୁଣ୍ଡାଇ ସହରର ବିଭିନ୍ନ ପୂଜା ମଣ୍ଡପରେ ଆଜି ଦେବୀ ଦୁର୍ଗାଙ୍କ ନବମୀ ପୂଜାରେ କୁମାରୀ ପୂଜନ ଅନୁଷ୍ଠିତ ହୋଇଛି । ନବମୀ ଅବସରରେ କିଛି ପୂଜା ମଣ୍ଡପରେ ଆଜି ଦହି ପଖାଳ ଭୋଗ ଲାଗି ହେଉଛି । କଟକ ନୟାସଡ଼କ ସ୍ଥିତ ମାରୱାଡ଼ି ସମାଜର ପୂଜା ମଣ୍ଡପ ଶୋଭା ପାଉଛି ନେପାଳର ପ୍ରସିଦ୍ଧ ପଶୁପତିନାଥ ଶିବ । ମଣ୍ଡପରେ ମହାଦେବଙ୍କ ଦର୍ଶନ କରିବାର ସୁଯୋଗ ପାଇଛନ୍ତି ଶ୍ରଦ୍ଧାଳୁ ।
ଦୁର୍ଗାପୂଜା ମଣ୍ଡପରେ ନାରୀ ସୁରକ୍ଷା ଓ ନାରୀ ନିର୍ଯାତନା ବିରୋଧରେ ସଚେତନତାର ବାର୍ତ୍ତା ଦେଇଛି ବଲାଙ୍ଗୀର ସାଗରପଡ଼ା ଏସ୍ସିଏ କ୍ଲବ I ଆକର୍ଷଣୀୟ ତୋରଣ ଓ ଚିତ୍ରକଳା ମାଧ୍ୟମରେ ସମାଜକୁ ଦେଖାଇଛି ବାସ୍ତବତାର ଚିତ୍ର । ଟେରାକୋଟା କଳା, ଚିତ୍ରକଳା ଓ ଆକର୍ଷଣୀୟ ସାଜସଜ୍ଜା ମାଧ୍ୟମରେ କନ୍ୟାଭ୍ରୂଣ ହତ୍ୟା, ଏପରିକି କାର୍ଯ୍ୟକ୍ଷେତ୍ରରେ ମହିଳାଙ୍କ ପ୍ରତି ହେଉଥିବା ନିର୍ଯାତନାକୁ ଚିତ୍ରକଳା ମାଧ୍ୟମରେ ଏଭଳି ସାମାଜିକ ସମସ୍ୟାକୁ ଲୋକଙ୍କ ସାମ୍ନାକୁ ଅଣାଯାଇଛି ।ଆସନ୍ତାକାଲି ମଣ୍ଡପରେ ବିଜୟା ଦଶମୀ ଥିବାବେଳେ ଆଜି ମଣ୍ଡପରେ ନବରାତ୍ରି ପୂଜା ସରିବା ପରେ ବିଶ୍ରାମ ରହିଛି ।
ନିଆରା ମହାବଳି ଯାତ୍ରା… ଦେଖିଲେ ଶିହରି ଉଠିବ ଶରୀର !
ନନ୍ଦିଘୋଷ ବ୍ୟୁରୋ: ତନ୍ତ୍ର, ମନ୍ତ୍ର ଓ ଯନ୍ତ୍ରର ପୀଠ ସୁବର୍ଣ୍ଣପୁର । ରାଜା ରାଜୁଡା ଅମଳରୁ ଶାକ୍ତ ପରମ୍ପରାରେ ପାଳିତ ହୋଇଆସୁଛି ବଳି ଯାତ୍ରା । ନଅ ପ୍ରକାର ବଳି ପାଳନ କରାଯାଇ ପୂର୍ଣ୍ଣମୀ ତିଥିରେ ଶେଷ ହୋଇଥାଏ ଏହି ନିଆରା ଯାତ୍ରା । ଆଶ୍ବିନ ଅମାବାସ୍ୟାରୁ ପୂର୍ଣ୍ଣମୀ ଯାଏଁ ତନ୍ତ୍ର ପଦ୍ଧତିରେ ଯନ୍ତ୍ର ଓ ମନ୍ତ୍ରକୁ ଆଧାର କରି ଏହି ବଳି ପର୍ବ ପାଳନ ହୋଇଥାଏ। ଆଉ ବଳି ଭିତରେ ମହାବଳି ପର୍ବର ଏକ ଗୁରୁତ୍ୱପୂର୍ଣ୍ଣ ଭୂମିକା ରହିଛି । ୩୬ ପାଟକ ବା ସମ୍ପ୍ରଦାୟର ଲୋକେ ନିୟୋଜିତ ହୋଇଥାନ୍ତି ମହାବଳିଙ୍କ ସେବାରେ । ଏଠାରେ ବଳି କହିଲେ ସମର୍ପଣ ବା ଉତ୍ସର୍ଗକୁ ବୁଝାଇଥାଏ । ସ୍ଥାନୀୟ ଖମ୍ବେଶ୍ବରୀ ମନ୍ଦିରରେ ଧୁମ ଧାମରେ ପାଳିତ ହୋଇଛି ବଳି ଯାତ୍ରା । ଏହି ଯାତ୍ରା ଦେଖିବା ପାଇଁ ଲକ୍ଷାଧିକ ଶ୍ରଦ୍ଧାଳୁଙ୍କ ସମାଗମ ହୋଇଥିଲା।
ବରୁଆକୁ ଅରୁଆ ଚାଉଳରେ ତିଆରି ଯନ୍ତ୍ରରେ ଯନ୍ତ୍ରାରୁଢ କରି ମନ୍ତ୍ରପୂତ କରିବା ପରେ ଦୈବୀଶକ୍ତି ପ୍ରକଟିତ ହୁଏ । ଖଉଳ ଗାତର ମାଟି ବରୁଆର ନାଭି ମଣ୍ଡଳରେ ଦେଇ ପୁରୋହିତ ମହାବଳୀ କାର୍ଯ୍ୟ ଆରମ୍ଭ କରିଥାନ୍ତି । ବାଦ୍ୟର ତାଳେ ତାଳେ ମହାବଳୀ ନୃତ୍ୟ କରି ଭକ୍ତ ମାନଙ୍କୁ ଦର୍ଶନ ଦେଇଥାନ୍ତି । ହାତରେ କଳା ଧଳା ଛତ୍ର ଧରି ଚେପଟା ଢୋଲରେ ଛିଡା ହୋଇ ଦହି ଦହନାରେ ମହମହ ବାସୁଥିବା ବରୁଆର ଚୁଳବନ୍ଧା କାର୍ଯ୍ୟରେ ସମାପିତ ହୋଇଥାଏ ମହାନବମୀ ବଳୀ ।
କାହିଁ କେଉଁ ଆବାହମାନ କାଳରୁ ଏଠାରେ ପାଳିତ ହୋଇଆସୁଛି ମହାବଳୀ ଯାତ୍ରା । ହଜାର ହଜାର ବର୍ଷର ଏହି ପରମ୍ପରାକୁ ଆଜି ବି ବଞ୍ଚାଇ ରଖିଛନ୍ତି ସୁବର୍ଣ୍ଣପୁରବାସୀ ।
ମା’ ବିରଜାଙ୍କ ରଥ ଟାଣି କାନ୍ଦି ପକାଇଲେ ଶ୍ରଦ୍ଧାଳୁ !
ଯାଜପୁର: ସରିଲା କ୍ଷେତ୍ରେଶ୍ୱରୀ ମାଆ ବିରଜାଙ୍କର ପୀଠରେ ନବଦିନାତ୍ମକ ରଥଯାତ୍ରା । ମା ବିରଜାଙ୍କ ରଥ ଟାଣିଲେ ହଜାର ହଜାର ସଂଖ୍ୟକ ଶ୍ରଦ୍ଧାଳୁ। ଆଜି ମାଙ୍କ ପୀଠରେ ବିଜୟା ଦଶମୀ ପାଳିତ ହୋଇଛି ।ଗତକାଲି ଅପରାହ୍ନରେ ରଥଟଣା ଶେଷ ହେବା ପରେ ନିଶାର୍ଦ୍ଧରେ ଲାଖବିନ୍ଧା ପର୍ବ ଅନୁଷ୍ଠିତ ହୋଇଥିଲା । ଘଣ୍ଟଘଣ୍ଟା ସଂକୀର୍ତ୍ତନ ସହ ଏକ ବିରାଟ ପଟୁଆରେ ମାଆଙ୍କ ବିଜେପ୍ରତିମାକୁ ଲାଖବିନ୍ଧା ପଡିଆକୁ ନିଆଯାଇଥିଲା। ସେଠାରେ ମୁଖ୍ୟ ପୁରୋଧାଙ୍କ ତତ୍ତ୍ଵାବଧାନରେ ଯଥା ରୀତିନୀତି ଅନୁସାରେ ପୂଜାର୍ଚ୍ଚନା ହୋଇଥିଲା। ପରମ୍ପରା ଅନୁସାରେ ସମାଜରୁ ପାପ ନାଶ ଉଦ୍ଦେଶ୍ୟରେ ଚତୁର୍ଦିଗକୁ ଶର କ୍ଷେପଣ କରାଯାଇଥିଲା। ପରେ ନଅରପଦା ଦେଇ ମାଙ୍କ ବିଜେପ୍ରତିମାକୁ ଶୋଭାଯାତ୍ରାରେ ଅଣାଯାଇଥିଲା। ଶ୍ରଦ୍ଧାଳୁ ମାନେ ମାଙ୍କ ବିଜେପ୍ରତିମାକୁ ଧୂପ ଦୀପ ଦେଇ ବନ୍ଦାପନା କରି ସ୍ବାଗତ କରିଥିଲେ । । ମାଙ୍କୁ ସ୍ବାଗତ କରିବା ପାଇଁ ପ୍ରତି ଘର ଆଗରେ କଳସ ସ୍ଥାପନ କରି ଧୂପଦୀପରେ ବନ୍ଦାପନା କରି ମାଙ୍କୁ ସ୍ବାଗତ କରିଥିଲେ ଶ୍ରଦ୍ଧାଳୁ।
ଗ୍ରାମ ପରିକ୍ରମା ପରେ ମନ୍ଦିରକୁ ପ୍ରବେଶ କରିଥିଲା ମା’ଙ୍କ ବିଜେପ୍ରତିମା । ମାଙ୍କ ଲାଖବିନ୍ଧା ପର୍ବକୁ ଶାନ୍ତିଶୃଙ୍ଖଳାର ସହ ଶେଷ କରିବା ପାଇଁ ମନ୍ଦିର ଓ ପୋଲିସ ପ୍ରଶାସନ ପକ୍ଷରୁ ବ୍ୟାପକ ବନ୍ଦୋବସ୍ତ କରାଯାଇଥିଲା । ଏହି ପର୍ବରେ ଶତାଧିକ ଶ୍ରଦ୍ଧାଳୁ ସାମିଲ ହୋଇଥିଲେ । ସମଗ୍ର ଅଞ୍ଚଳରେ ଆଧ୍ୟାତ୍ମିକ ପରିବେଶ ସୃଷ୍ଟି ହୋଇଥିଲା। ଏବେ ସମସ୍ତଙ୍କର ଅପେକ୍ଷା ଆର ବର୍ଷକୁ।
କାଳ ସାଜିଲା ନଦୀ ଗାଧୁଆ: ୩ ମୁଣ୍ଡ ନେଲା ଚୋରାବାଲି !
ନନ୍ଦିଘୋଷ ବ୍ୟୁରୋ: କାଳ ସାଜିଲା ନଦୀ ଗାଧୁଆ। ଲୁଣା ନଦୀକୁ ଗାଧୋଇବାକୁ ଯାଇ ୩ ନାବାଳକ ବୁଡ଼ି ମୃତ। କେନ୍ଦ୍ରାପଡ଼ା ସଦର ଥାନା ଗହଗା ଗାଁରେ ଘଟିଛି ହୃଦୟ ବିଦାରକ ଘଟଣା। ମୃତ ୩ ନାବାଳକ ସ୍ଥାନୀୟ ଗହଗା ଗାଁର ହିମାଂଶୁ ଶେଖର ସତପଥି, ଚିରଞ୍ଜୀବ ପରିଡା, ସବ୍ୟସାଚୀ ସ୍ୱାଇଁ ବୋଲି ଜଣାପଡିଛି।
ମିଳିଥିବା ସୂଚନା ମୁତାବକ,ଆଜି ଦିନ ୧୧ ଟା ସମୟରେ ଗହଗା ଗାଁର ୩ ଜଣ ନାବାଳକ ସ୍ଥାନୀୟ ଲୁଣା ନଦୀର ଗହଗା ଘାଟକୁ ଗାଧୋଇବାକୁ ଯାଇଥିଲେ। ଗାଧୋଉଥିବା ସମୟରେ ଅସାବଧାନତାବଶତଃ ଗଭୀର ପାଣିକୁ ଚାଲିଯିବାରୁ ଚୋରା ବାଲିରେ ପାଦ ଖସି ଯାଇଥିଲା । ଫଳରେ ସେମାନେ ନଦୀର ସ୍ରୋତରେ ଭାସି ଯାଇ ବୁଡ଼ି ଯାଇଥିଲେ। ଅନେକ ସମୟ ପର୍ଯ୍ୟନ୍ତ ନାବାଳକମାନେ ଘରକୁ ନଫେରିବାରୁ ଏବଂ ନଦୀଘାଟରେ ସେମାନଙ୍କ ପୋଷାକ ଓ ଅନ୍ୟାନ୍ୟ ଜିନିଷ ଦେଖି ସ୍ଥାନୀୟ ଲୋକଙ୍କ ସନ୍ଦେହ ହୋଇଥିଲା।ଏହାପରେ ପରିବାର ଲୋକ ଓ ଗ୍ରାମବାସୀ ପ୍ରଥମେ ନିଜସ୍ୱ ଉଦ୍ୟମରେ ଖୋଜାଖୋଜି ଆରମ୍ଭ କରିଥିଲେ। ଖବର ପାଇ କେନ୍ଦ୍ରାପଡ଼ା ଅଗ୍ନିଶମ ବିଭାଗର ଟିମ୍ ତୁରନ୍ତ ଘଟଣାସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟ ଆରମ୍ଭ କରିଥିଲେ ।ନିଖୋଜ ନାବାଳକମାନଙ୍କୁ ଉଦ୍ଧାର କରିବା ପାଇଁ ଅଗ୍ନିଶମ ବାହିନୀ ପକ୍ଷରୁ ଦୁଇଟି ବୋଟ୍ ମୁତୟନ କରାଯାଇ ନଦୀରେ ବ୍ୟାପକ ସର୍ଚ୍ଚ ଅପରେସନ୍ କରାଯାଇଥିଲା । ଆଉ କିଛି ଘଣ୍ଟାର ପରିଶ୍ରମ ପରେ ଶେଷରେ ୩ ଜଣଙ୍କ ମୃତଦହେ ଉଦ୍ଧାର କରାଯାଇଛି । ଅଗ୍ନିଶ୍ରମ ଟିମ୍ ସେମାନଙ୍କ ମୃତଦେହ ଉଦ୍ଧାର କରିଛି । ଏ ନେଇ ସ୍ଥାନୀୟ ଅଞ୍ଚଳରେ ଗଭୀର ଶୋକର ଛାୟା ଖେଳିଯାଇଛି।ନିଖୋଜ ନାବାଳକଙ୍କ ପରିବାର ଲୋକଙ୍କ କାନ୍ଦ ବୋବାଳିରେ ଗହଗା ଗାଁର ପରିବେଶ ଅତ୍ୟନ୍ତ ସମ୍ବେଦନଶୀଳ ହୋଇପଡ଼ିଛି । ସ୍ଥାନୀୟ ସଦର ପୋଲିସ ମଧ୍ୟ ଘଟଣାସ୍ଥଳରେ ପହଞ୍ଚି ସ୍ଥିତି ଅନୁଧ୍ୟାନ କରୁଛି।