ଦିନେ ଲୋକଙ୍କ ସମସ୍ୟା ବୁଝୁଥିବା ପୂର୍ବତନ ସରପଞ୍ଚ ବଞ୍ଚିବା ପାଇଁ ଚରାଉଛନ୍ତି ଛେଳି

ନନ୍ଦିଘୋଷ ବ୍ୟୁରୋ: ଲୋକଙ୍କ ସେବାରେ ସରିଗଲା ଜୀବନ । ଏବେ ବଞ୍ଚିବାକୁ ଛେଳି, ମେଣ୍ଢା ଚରାଉଛନ୍ତି ପୂର୍ବତନ ସରପଞ୍ଚ । ବଞ୍ଚିବା ପାଇଁ କରୁଛନ୍ତି ସଂଘର୍ଷ । ଅର୍ଥ ଉପାର୍ଜନ ସମୟରେ ସେବାକୁ ବ୍ରତ କରି ଆଜି ଅର୍ଥହୀନ । ଜନସେବା କରି ନିଜର ସର୍ବସ୍ବ ହରାଇ ଆଜି ବାର୍ଦ୍ଧକ୍ୟରେ ଅତି ଦୟନୀୟ ଅବସ୍ଥାରେ ଦିନ କାଟୁଛନ୍ତି ଦାନଗଦୀ ବ୍ଲକ ପଙ୍କପାଳ ପଞ୍ଚାୟତ ଜଟରାପାଳ ଗାଁର ବାହାଦୂର ମୁଣ୍ଡା । ବୟସ ୭୬ ବର୍ଷ । ପେଟର ଜ୍ବାଳା ମେଣ୍ଟାଇବା ପାଇଁ ପରିଣତ ବୟସରେ ଛେଳି ଓ ମେଣ୍ଢା ପଲ ଧରି ଦିନ ତମାମ ଚରାଇବାକୁ ହେଉଛନ୍ତି ବାଧ୍ୟ ।

ବାହାଦୂର ୨୦୦୨ରୁ ୨୦୦୭ ମସିହା ପର୍ଯ୍ୟନ୍ତ ପଙ୍କପାଳ ପଞ୍ଚାୟତର ସରପଞ୍ଚ ଭାବେ ନିର୍ବାଚିତ ହୋଇଥିଲେ । ସେ ୫ ବର୍ଷ ଅତ୍ୟନ୍ତ ନିଷ୍ଠାର ସହ ଦାୟିତ୍ୱ ତୁଲାଇଥିଲେ । ଦିନେ ଯେଉଁ ଜନପ୍ରତିନିଧି ସମଗ୍ର ପଞ୍ଚାୟତର ବିକାଶର ମଙ୍ଗ ଧରିଥିଲେ । ଆଜି ପ୍ରଶାସନିକ ଅବହେଳା ଓ ଦାରିଦ୍ର୍ୟର ଚରମସୀମାରେ ତାଙ୍କ ଜୀବନ କାହାଣୀ ଅତି ଶୋଚନୀୟ ହୋଇପଡ଼ିଛି ।

ଦିନଥିଲା ସେ ଲୋକଙ୍କ ସମସ୍ୟା ବୁଝୁଥିଲେ, ହେଲେ ଆଜି ନିଜେ ସମସ୍ୟାରେ । ଭଙ୍ଗା ଦଦରା ନୂଆଁଣିଆ ଚାଳ ଘରେ ବିତୁଛି ଜୀବନ । ବାର୍ଦ୍ଧକ୍ୟ ସମୟରେ ପ୍ରଶାସନ ଆଜି ତାଙ୍କୁ ସମ୍ପୂର୍ଣ୍ଣ ଭୁଲିଯାଇଛି । ଗତ ପ୍ରାୟ ୪୦ ବର୍ଷ ପୂର୍ବେ କଂଗ୍ରେସ ସରକାର ଅମଳରେ ତାଙ୍କୁ ଏକ ସରକାରୀ ଆବାସ ଗୃହ ମିଳିଥିଲା । ବର୍ତ୍ତମାନ ସେହି ଘରଟି ସମ୍ପୂର୍ଣ୍ଣ ଜରାଜୀର୍ଣ୍ଣ ଅବସ୍ଥାରେ । ତେଣୁ ବାଧ୍ୟ ହୋଇ ଏହି ଚାଳ ଛପର ଘରେ ଅତି ଦୟନୀୟ ଅବସ୍ଥାରେ ରହୁଛନ୍ତି । ତୁରନ୍ତ ବାହାଦୂରଙ୍କୁ ସରକାରୀ ସହାୟତା ଯୋଗାଇ ଦେବାକୁ ସ୍ଥାନୀୟ ଲୋକେ ଦାବି କରିଛନ୍ତି ।

ନଦୀରେ କୁମ୍ଭୀର: ଜୀବନକୁ ବାଜି ଲଗାଇ ଲୋକେ କରୁଛନ୍ତି ଜଳଯାତ୍ରା

ନନ୍ଦିଘୋଷ ବ୍ୟୁରୋ: ଯାଜପୁର ଜିଲ୍ଲା ବରୀ-ବିଞ୍ଝାରପୁରକୁ ସଂଯୋଗ କରୁଥିବା ବାଳୁଙ୍ଗାପାଟିଆ ନଦୀରେ ଜୀବନକୁ ପାଣି ଛଡ଼ାଇ ଜଳଯାତ୍ରା କରୁଛନ୍ତି ଲୋକେ । ନା ଅଛି ଲାଇଫ୍ ଜ୍ୟାକେଟ, ନା ଅଛନ୍ତି ଲାଇଫ ବୟ । ଡଙ୍ଗାରେ କୌଣସି ସୁରକ୍ଷା ଉପକରଣ ନାହିଁ । ଓଭର ଲୋଡିଂ କଟକଣା ଏଠି କାଗଜକଲମରେ ଚାଲିଛି । ଆଉ ନଦୀର ଶାନ୍ତ ପାଣି ତଳେ, ମୃତ୍ୟୁର ଦୂତ ସାଜି ଅନାଇ ବସିଛନ୍ତି କୁମ୍ଭୀର । ଏମିତି ସ୍ଥିତିରେ କୌଣସି ଅଘଟଣ ଘଟିଲେ, ଯାତ୍ରୀଙ୍କ କ’ଣ ହେବ ଆପଣ ନିଜେ ଚିନ୍ତା କରନ୍ତୁ ।

କୁମ୍ଭୀର ଥିବା ନଦୀରେ ପ୍ରତିଦିନ ହଜାର ହଜାର ଲୋକେ ଜୀବନକୁ ବାଜି ଲଗାଇ ହୁଲି ଡଙ୍ଗାରେ ହେଉଛନ୍ତି ନଦୀ ପାର । କେବଳ ଯାତ୍ରୀ ନୁହଁନ୍ତି ଦୂର ଦୂରାନ୍ତକୁ ଯିବା ପାଇଁ ଗାଡି ମଟର ମଧ୍ୟ ପାର କରାଯାଉଛି । ନଦୀ ଉପରେ ବ୍ରିଜଟିଏ ନାହିଁ । ନଦୀ ଅପର ପାର୍ଶ୍ୱରେ ବିଦ୍ୟାଳୟ ରହିଥିବାରୁ ଛାତ୍ରୀଛାତ୍ର ବାଧ୍ୟ ହୋଇ ଏହି ଡଙ୍ଗାରେ ନଦୀ ପାରହୋଇ ବିପଦସଙ୍କୁଳ ଅବସ୍ଥାରେ ଯାତାୟାତ କରୁଛନ୍ତି ।

ପୂର୍ବ ସରକାର ସମୟରେ ବରୀରୁ ବିଂଝାରପୁରକୁ ସୁବିଧାରେ ଯିବା ପାଇଁ ବରୀ-ବିଂଝାରପୁର ରୋଡର ପରି କଳ୍ପନା କରାଯାଇଥିଲା । ଏହାକୁ ଫଳପ୍ରଦ କରିବା ପାଇଁ ସରକାରଙ୍କ ପକ୍ଷରୁ ଏହି ନଦୀ ଉପରେ ଏକ ଢଳାଇ ପୋଲର ନିର୍ମାଣ କାର୍ଯ୍ୟ ମଧ୍ୟ ଆରମ୍ଭ ହୋଇଥିଲା । ହେଲେ ସରକାର ବଦଳିବା ପରେ ପୋଲ କାମ ଅଧାରେ ବନ୍ଦ ହୋଇଯାଇଛି । ରାଜନୈତିକ ଇଚ୍ଛାଶକ୍ତି ଅଭାବ ଯୋଗୁଁ ପୋଲ ନିର୍ମାଣ ହୋଇପାରୁ ନଥିବା ସ୍ଥାନୀୟ ଲୋକେ ଅଭିଯୋଗ କରିଛନ୍ତି । ଖରାଦିନେ ଗ୍ରାମବାସୀ ନଦୀ ଉପରେ ଏକ ବାଉଁଶରେ ବାଡ଼ା ନିର୍ମାଣ କରି ଯାତୟାତ କରୁଥିବାବେଳେ ବର୍ଷା ଦିନେ ହୁଲି ଡଙ୍ଗା ଏକମାତ୍ର ଭରସା ।

ଏଠି ପ୍ରଶ୍ନ ଉଠୁଛି, ଡଙ୍ଗା ଚାଳକଙ୍କ ଲାଇସେନ୍ସ ଅଛି କି ନାହିଁ ? ବଡ଼ ଅଘଟଣ ଘଟିଲେ ଦାୟୀ ରହିବ କିଏ ? ଜିଲ୍ଲା ପ୍ରଶାସନ ଓ ସରକାର ତୁରନ୍ତ ଦୃଷ୍ଟି ଦେଇ ପୋଲ ନିର୍ମାଣ କରିବାକୁ ଦାବି ହୋଇଛି ।