ଭୁବନେଶ୍ୱର: ରାଜ୍ୟରେ ସ୍ଥଗିତ ରହିଲା ଡ୍ରାଇଭର ଆନ୍ଦୋଳନ। ଆଜି ପରିବହନ କମିଶନରଙ୍କ ସହ ଡ୍ରାଇଭର ମହାସଂଘର ଆଲୋଚନା ପରେ ଆନ୍ଦୋଳନକୁ ସ୍ଥଗିତ ରଖିବାକୁ ନିଷ୍ପତ୍ତି ନେଇଛି ମହାସଂଘ। ଡ୍ରାଇଭରଙ୍କ ଦାବି ପୂରଣ ନେଇ ପରିବହନ କମିଶନର ପ୍ରତିଶ୍ରୁତି ଦେବା ପରେ ଆନ୍ଦୋଳନ ସ୍ଥଗିତ ରଖିବାକୁ ନିଷ୍ପତ୍ତି ନେଇଛି ଡ୍ରାଇଭର ମହାସଂଘ। ଫଳରେ ଖୁବଶୀଘ୍ର ପେଟ୍ରୋଲ ଡିଜେଲ ଓ ଏଲପିଜି ପରିବହନ ସ୍ବାଭାବିକ ହେବ। ଡ୍ରାଇଭରଙ୍କ ପାଇଁ ଗଠିତ ହୋଇଛି ୱେଲଫେୟାର ବୋର୍ଡ।
ଏଣିକି ବିନା ପ୍ରେସକ୍ରିପସନରେ ମିଳିବନି କୀଟନାଶକ
ଭୁବନେଶ୍ୱର: ବିନା ପ୍ରେସକ୍ରିପସନରେ ମିଳିବନି କୀଟନାଶକ। ପରିବେଶ, କୃଷି ଓ ଲୋକଙ୍କ ସୁରକ୍ଷାକୁ ନେଇ ଏହି ପଦକ୍ଷେପ ନେଇଛି ଓଡ଼ିଶା। କୃଷି ଓ କୃଷି ସହ ଅନୁବନ୍ଧିତ କ୍ଷେତ୍ର ସମେତ ବୈଜ୍ଞାନିକ, ଓୟୁଏଟି ପରି ଶାଖାରୁ ଏହି ପ୍ରେସକ୍ରିପସନ ଜାରି କରାଯାଇ ପାରିବ। ତେବେ କିଏ ଏହି ପ୍ରେସକ୍ରିପସନ ଦେଇପାରିବେ ଏ ନେଇ ଖୁବଶୀଘ୍ର ଗାଇଡଲାଇନ ଆସିବ।
ଲୋକଙ୍କୁ ସଚେତନ କରିବା ପରେ ଏହାର କାର୍ଯ୍ୟକାରିତା ଧୀରେ ଧୀରେ ବଢିବ। ସେହିପରି ପାରାକୁଏଟ ପରି ଏକ କୀଟନାଶକକୁ ରାଜ୍ୟରେ ସବୁଦିନ ପାଇଁ ବ୍ୟାନ୍ କରିବାକୁ ଚିନ୍ତା କରୁଛନ୍ତି ରାଜ୍ୟ ସରକାର। ପାରାକୁଏଟ୍ ଯଦି କେହି ଭୁଲ ସେ ବି ସେବନ କରିଦିଏ ତେବେ ମୃତ୍ୟୁ ନିଶ୍ଚିତ। ଏହି କୀଟନାଶକର ଆଣ୍ଟିଡଟ ନାହିଁ।
ଏହା କୃଷି କ୍ଷେତ୍ରରେ ବ୍ୟବହାର ହେଉଛି। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନିର୍ଦେଶରେ ଏହା ପ୍ରଥମେ ଦୁଇ ମାସ ଓ ପରେ ଅଧିକ ଏକ ମାସ ପାଇଁ ବ୍ୟାନ କରାଯାଇଥିଲା । ଏହାର ରିପୋର୍ଟ ଜିଲ୍ଲା ଓ ଅନ୍ୟ କ୍ଷେତ୍ରରୁ ଆସିଛି। ଏହାକୁ ସମ୍ପୂର୍ଣ୍ଣ ଭାବେ ଓଡ଼ିଶାରେ ବ୍ୟାନ କରିବାକୁ ମୁଖ୍ୟମନ୍ତ୍ରୀ ନିଷ୍ପତ୍ତି ନେଇଛନ୍ତି। ଏ ନେଇ କେନ୍ଦ୍ରକୁ ଚିଠି ଲେଖିଛି ରାଜ୍ୟ। ଦେଶରେ ଏଭଳି ନିୟମ ଜାରି କରିବାରେ ପ୍ରଥମ ରାଜ୍ୟ ହୋଇଛି ଓଡ଼ିଶା।
ଉଡାଣ ଭରିବାର ଅଳ୍ପ ସମୟ ମଧ୍ୟରେ ଉଡ଼ିଗଲା ଫ୍ଲାଇଟ୍ ଡୋର୍, ଅଳ୍ପକେ ବର୍ତ୍ତିଲେ ଯାତ୍ରୀ
ନୂଆଦିଲ୍ଲୀ: ମଝି ଆକାଶରେ ବଡ଼ ଅଘଟଣ। ଉଡାଣ ଭରିବାର ଅଳ୍ପ ସମୟ ମଧ୍ୟରେ ଉଡ଼ିଗଲା ଡୋର। ଏହି ଘଟଣା ପରେ ବିମାନ କରିଛି ଜରୁରୀ ଅବତରଣ। ଆଲାକ୍ସା ଏୟାରଲାଇସ ବୋଇଂ 737-9 MAXରେ ଘଟିଛି ଏହି ଅଘଟଣ। ତେବେ ବିମାନର ସମସ୍ତ ଯାତ୍ରୀ ସୁରକ୍ଷିତ ଥିବା ସୂଚନା ମିଳିଛି।
ପୋର୍ଟଲାଣ୍ଡରୁ କାଲିଫର୍ଣ୍ଣିଆର ଓଣ୍ଟାରିଓକୁ ଯାଉଥିବା ଏହି ବିମାନ ଉଡାଣ ଭରିବାର କିଛି ସମୟ ମଧ୍ୟରେ ଆକାଶ ମାର୍ଗରେ ଏହାର କ୍ୟାବିନ ନିକଟସ୍ଥ ଗେଟଟି ଉଡିଯାଇଥିଲା। ଏହି ଘଟଣା ପରେ ଯାତ୍ରୀଙ୍କ ମଧ୍ୟରେ ଆତଙ୍କ ଖେଳିଯାଇଥିଲା। ତୁରନ୍ତ ବିମାନକୁ ପୋର୍ଟଲାଣ୍ଡ ଇଣ୍ଟରନ୍ୟାସନାଲ ବିମାନ ବନ୍ଦରରେ ଅବତରଣ କରାଯାଇଥିଲା।
🚨#BREAKING: Alaska Airlines Forced to Make an Emergency Landing After Large Aircraft Window Blows Out Mid-Air ⁰⁰📌#Portland | #Oregon
⁰A Forced emergency landing was made of Alaska Airlines Flight 1282 at Portland International Airport on Friday night. The flight, traveling… pic.twitter.com/nt0FwmPALE— R A W S A L E R T S (@rawsalerts) January 6, 2024
ବିମାନ ସୁରକ୍ଷିତ ଥିବା ନେଇ ସୂଚନା ଦେଇଛି ଆମେରିକା ନ୍ୟାସନାଲ ଟ୍ରାନ୍ସପୋର୍ଟେସନ ସେଫ୍ଟି ବୋର୍ଡ। ଏହି ଦୁର୍ଘଟଣା ଘଟିବା ବେଳକୁ ବିମାନଟି ୧୬ ହଜାର ୩୨୫ ଫୁଟ ଉଚ୍ଚରେ ଉଡୁଥିଲା।
ବାଲେଶ୍ୱରରେ 5T ଅଧ୍ୟକ୍ଷ କାର୍ତ୍ତିକ ପାଣ୍ଡିଆନ; ବିକାଶ କାର୍ଯ୍ୟର କଲେ ସମୀକ୍ଷା
ବାଲେଶ୍ୱର: ଖୁବଶୀଘ୍ର ଆସିବ ଖୁସିଖବର। ବିଭିନ୍ନ ସ୍ତରରେ ମିଳୁଥିବା ଭତ୍ତା ବଢ଼ିବ। ଏନେଇ ସୂଚନା ଦେଇଛନ୍ତ 5T ଅଧ୍ୟକ୍ଷ କାର୍ତ୍ତିକ ପାଣ୍ଡିଆନ। ବାଲେଶ୍ବର ଜିଲ୍ଲା ଗସ୍ତ ଅବସରରେ 5T ଅଧ୍ୟକ୍ଷ କହିଛନ୍ତି-ବିଭିନ୍ନ ବିକାଶ କାର୍ଯ୍ୟ ଲାଗି ବାଲେଶ୍ବର ଜିଲ୍ଲା ଗତ ୬ ମାସ ମଧ୍ୟରେ ୧୦୩୮ କୋଟି ଟଙ୍କା ପାଇଛି।
ଗ୍ରାମାଞ୍ଚଳରେ କିଛି ଲୋକ ବିଏସକେଓ୍ବାଇ କାର୍ଡରୁ ବଞ୍ଚିତ ଅଛନ୍ତି । ଏହି କାର୍ଡ ଲାଗି ଆଜିଠୁ ରେଜିଷ୍ଟ୍ରେସନ ଆରମ୍ଭ ହେଉଛି । ୧୦ ଦିନ ମଧ୍ୟରେ ସମସ୍ତେ ପଞ୍ଜିକରଣ କରିବା ଲାଗି ଆହ୍ବାନ ଦେଇଛନ୍ତି 5T ଅଧ୍ୟକ୍ଷ। ସେ କହିଛନ୍ତି- ଏମପିଏଲରେ ମେଗା ପାଇପ ଜଳ ଯୋଗାଣ ଲାଗି ୨୩୫ କୋଟି ଟଙ୍କା ମଞ୍ଜୁର କରିଛନ୍ତି ମୁଖ୍ୟମନ୍ତ୍ରୀ। ବୁଢ଼ାବଳଙ୍ଗରେ ସେତୁ ଲାଗି ୧୧୩ କୋଟି ଟଙ୍କା ମଞ୍ଜୁର ହୋଇଛି।
ମାଛ ମାର୍କେଟ ଲାଗି ୩୦ କୋଟି ଟଙ୍କା, ସଲ୍ଟ ରାସ୍ତାର ଉନ୍ନତି ଲାଗି ୫୭ କୋଟି ୩୦ ଲକ୍ଷ ଟଙ୍କା, ବାହାନଗା-ତାଲପଡ଼ା ରାସ୍ତା ଲାଗି ୩୫ କୋଟି ଟଙ୍କା, କାଂଶବାଂଶ ସେତୁ ଲାଗି ୨୫ କୋଟି ଟଙ୍କା, ପଞ୍ଚଲିଙ୍ଗେଶ୍ବର ମନ୍ଦିର ଲାଗି ୧୫.୫୦ କୋଟି ଟଙ୍କା ମଞ୍ଜୁର କରିଛନ୍ତି ମୁଖ୍ୟମନ୍ତ୍ରୀ। ରେମୁଣାରେ ମଲ୍ଟିପରପୋସ କମ୍ୟୁନିଟି ସେଣ୍ଟର ଲାଗି ୮ କୋଟି ଟଙ୍କା, ସୋର-କୁପାରୀ ରାସ୍ତା ଲାଗି ୯ କୋଟି ଟଙ୍କା, ଦରଘା ମଇଦାନ ବାଲେଶ୍ବର ମ୍ୟୁନିସିପାଲଟି ଲାଗି୧ କୋଟି ୫୦ ଲକ୍ଷ, ସି ବିଚ୍ ବାଲିଆପାଳର ଲାଗି ୧ କୋଟି ୧୭ ଲକ୍ଷ, ନୀଳଗିରିର ଜଗନ୍ନାଥ ମନ୍ଦିର ଲାଗି ୧ କୋଟି ଟଙ୍କା ମଞ୍ଜୁର ହୋଇଛି। ଚାଷୀଙ୍କ ୧୫୦ ବର୍ଷର ସିକିମ ପଟ୍ଟା ସମସମ୍ୟାର ହେବ ସମାଧାନ।
ରାଜ୍ୟର ୨ ଲକ୍ଷ ୫୦ ହଜାର ଲୋକ ଏହି ସମସ୍ୟାରେ ଅଛନ୍ତି। ମୁଖ୍ୟମନ୍ତ୍ରୀ ଏହି ନିୟମକୁ ବଦଳାଇଛନ୍ତି। ଜିଲ୍ଲାର ୧୮ ହଜାର ପରିବାର ଉପକୃତ ହେବେ। ହିଞ୍ଜିଳିକାଟୁରେ ବୁଲିବାର ଅନୁଭୂତି ବାଲେଶ୍ବରରେ ପାଇଲି ବୋଲି କହିଛନ୍ତି ଅଧ୍ୟକ୍ଷ। ଫେବ୍ରୁଆରୀ ଶେଷ ସୁଦ୍ଧା ଜିଲ୍ଲାରେ ଲକ୍ଷ୍ମୀ ଯୋଜନା କାର୍ଯ୍ୟକାରୀ ହେବ ଏବଂ ଛାତ୍ରଛାତ୍ରୀ ଓ ମା’ମାନେ ବିଶେଷ ଉପକୃତ ହେବେ। ବାଲେଶ୍ବର ଜିଲ୍ଲାରେ ବିଜେଡି ବ୍ୟାପକ ସଫଳତା ପାଇବ। ବିଜେଡି ପ୍ରାର୍ଥୀ ଅଧିକ ଭୋଟରେ ବିଜୟୀ ହେବେ । ମେଡିକାଲ, ପାନୀୟ ଜଳ, ଜଳସେଚନ, ସେତୁ ସବୁ କାମକୁ ସମ୍ମାନ ଦିଆଯିବ ବୋଲି କହିଛନ୍ତି ଅଧ୍ୟକ୍ଷ।
ବିଏସକେଓ୍ବାଇ-ନବୀନ କାର୍ଡ; ଆଜିଠୁ ଗ୍ରାମାଞ୍ଚଳରେ ଅନଲାଇନ ପଞ୍ଜିକରଣ ଆରମ୍ଭ
ଭୁବନେଶ୍ୱର: ସହରାଞ୍ଚଳ, ସରକାରୀ କର୍ମଚାରୀ ବି ପାଇବେ ବିଏସକେଓ୍ବାଇ ନବୀନ କାର୍ଡ। ଏବେ ଗ୍ରାମାଞ୍ଚଳରେ ବାକି ଥିବା ଲୋକଙ୍କୁ ଯୋଜନାରେ ସାମିଲ କରାଯାଉଛି। ଆଜିଠୁ ଏଥିପାଇଁ ଅନଲାଇନରେ ପଞ୍ଜିକରଣ କରାଯିବ। ପରବର୍ତ୍ତୀ ପର୍ଯ୍ୟାୟରେ ସହରାଞ୍ଚଳ ଲୋକ ଓ ସରକାରୀ କର୍ମଚାରୀଙ୍କୁ ବିଏସକେଓ୍ବାଇ ନବୀନ କାର୍ଡ ମିଳିବ।
ଏବେ ଗ୍ରାମାଞ୍ଚଳରେ ସମସ୍ତଙ୍କୁ ବିଏସକେଓ୍ବାଇ ନବୀନ କାର୍ଡ ଦେବାକୁ ନିଷ୍ପତ୍ତି ନିଆଯାଇଛି। ପ୍ରତି ପଞ୍ଚାୟତରେ ବାକି ରହିଥିବା ଲୋକଙ୍କୁ ଯୋଜନାରେ ସାମିଲ କରିବାକୁ 5T ଅଧ୍ୟକ୍ଷ କାର୍ତ୍ତିକ ପାଣ୍ଡିଆନ ଆହ୍ବାନ ଦେଇଛନ୍ତି। ସମୟ ଉପଯୋଗୀ ଗୁଣାତ୍ମକ ସ୍ବାସ୍ଥ୍ୟସେବା ଲକ୍ଷ୍ୟରେ ପର୍ଯ୍ୟାୟକ୍ରମେ ବିଏସକେଓ୍ବାଇ ପରିସରକୁ ସଂପ୍ରସାରିତ କରାଯାଉଛି।
ପରବର୍ତ୍ତୀ ପର୍ଯ୍ୟାୟରେ ସହରାଞ୍ଚଳରେ ବାସ କରୁଥିବା ପରିବାର, ସରକାରୀ କର୍ମଚାରୀ, ପେନସନଭୋଗୀ, ଏବଂ ଅନ୍ୟାନ୍ୟ ସହାୟତା ଯୋଗ୍ୟ ବର୍ଗମାନଙ୍କୁ ସାମିଲ କରାଯିବ।
ଇତିହାସ ରଚିବ ଇସ୍ରୋ; ଗନ୍ତବ୍ୟସ୍ଥଳ ଅଭିମୁଖେ ଆଦିତ୍ୟ L1
ନୂଆଦିଲ୍ଲୀ: ଆଉ ଏକ ସଫଳତା ପଥରେ ଭାରତୀୟ ମହାକାଶ ଗବେଷଣା ପ୍ରତିଷ୍ଠାନ। ହାଲୋ ପଏଣ୍ଟରେ ଆଜି ପ୍ରବେଶ କରିବ ଆଦିତ୍ୟ ଏଲ-ଓ୍ବାନ୍। ପୃଥିବୀ ଠାରୁ ପ୍ରାୟ ୧୫ କିଲୋମିଟର ଦୂରରୁ ସୂର୍ଯ୍ୟଙ୍କୁ ବିନା ବାଧାରେ ଦେଖିହେବ। ଧାବନ ମହାକାଶ କେନ୍ଦ୍ରରୁ ଗତବର୍ଷ ଆଦିତ୍ୟ ଏଲ୍-୧କୁ ମହାକାଶକୁ ଉତ୍କ୍ଷେପଣ କରାଯାଇଥିଲା।
ସୂର୍ଯ୍ୟ ଉପରେ ଅଧିକ ଅଧ୍ୟୟନ କରିବା ସହ ବୈଜ୍ଞାନିକ ତଥ୍ୟ ପ୍ରେରଣ ଏହାର ମୂଳ ଲକ୍ଷ୍ୟ ରହିଛି। ଆଦିତ୍ୟ ଏଲ୍୧ ଯାତ୍ରାକୁ ଦୁଇଟି ପର୍ଯ୍ୟାୟରେ ବିଭକ୍ତ କରାଯାଇଛି। ପ୍ରଥମଟି ହେଲା ଲାଗ୍ରାଞ୍ଜ ପଏଣ୍ଟରେ ପହଞ୍ଚିବା ଏବଂ ପରେ ସେହି ସ୍ଥାନର କକ୍ଷପଥକୁ ବଜାୟ ରଖିବା। ଏଲ୍୧ ହେଉଛି ମହାକାଶର ଏଭଳି ଏକ ସ୍ଥାନ ଯେଉଁଠି ପୃଥିବୀ ଏବଂ ସୂର୍ଯ୍ୟର ଆକର୍ଷଣ ଶକ୍ତି ମଧ୍ୟରେ ସମତୁଲତା ରହିଥାଏ। ଏଠାରୁ ସୂର୍ଯ୍ୟଙ୍କୁ ନିରୀକ୍ଷଣ କରାଯାଇଥାଏ। ତେବେ ଉକ୍ତ ସ୍ଥାନରେ ଗବେଷଣା ପାଇଁ ଉଦ୍ଦିଷ୍ଟ ମହାକାଶ ଯାନ ପହଞ୍ଚାଇବା ଏକ ଜଟିଳ ବ୍ୟାପାର।
ଆଜିଠୁ ରାଜ୍ୟରେ ବୁଲିବ ଜଗନ୍ନାଥ ରଥ, ପରିକ୍ରମା ପ୍ରକଳ୍ପ ପାଇଁ ସଂଗ୍ରହ କରାଯିବ ଚାଉଳ ଓ ଗୁଆ
ପୁରୀ: ଆସନ୍ତା ୧୭ ତାରିଖରେ ଲୋକାର୍ପିତ ହେବ ପରିକ୍ରମା ପ୍ରକଳ୍ପ । ଏଥିପାଇଁ ୧୨ ତାରିଖରୁ ଯଜ୍ଞ କାର୍ଯ୍ୟ ଆରମ୍ଭ ହେବ । ଯାତ୍ରୀ ପରିକ୍ରମା ପ୍ରକଳ୍ପକୁ ଭବ୍ୟ ଓ ଆଧ୍ୟାତ୍ମିକ କରିବା ପାଇଁ ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶ କ୍ରମେ ପଞ୍ଚାୟତରାଜ ବିଭାଗ ପକ୍ଷରୁ ଆଜି ଠାରୁ ରାଜ୍ୟବ୍ୟାପୀ ଶ୍ରୀଜଗନ୍ନାଥ ରଥ ପରିକ୍ରମା କରିବ।
ଏହା ରାଜ୍ୟରେ ସମସ୍ତ ପଞ୍ଚାୟତ, ବିଜ୍ଞାପିତ ଅଞ୍ଚଳ ପରିଷଦ ଓ ଗାଁ ପରିକ୍ରମା କରିବା ସହ ଘରୁ ଘରୁ ଅରୁଆ ଚାଉଳ, ଗୁଆ ଓ ନଡ଼ିଆ ସଂଗ୍ରହ କରାଯିବ। ଆଜି ପୁରୀ ସଦର ବ୍ଲକ ୨୫ ନମ୍ବର ଜୋନ ଅନ୍ତର୍ଗତ ତଳଜଂଘ ଓ ମାଳତୀପାଟପୁର, ୨୬ ନମ୍ବର ଜୋନ ଅନ୍ତର୍ଗତ ଗୋପୀନାଥପୁର ଓ କାଶୀ ହରିପୁର ଏବଂ ୨୭ ନମ୍ବର ଜୋନ ଅନ୍ତର୍ଗତ ବାଲିପୁଟ ଓ ରାଏଗୋରଡା ପଞ୍ଚାୟତରେ ଏହି ରଥ ପରିକ୍ରମା କରିବ।
ପିଇଓ ଏବଂ ଜିଆରଏସ୍ ମାନେ ପଞ୍ଚାୟତରେ ନୋଡାଲ ଅଧିକାରୀ ଭାବେ ଏହି ଦାୟିତ୍ଵ ନିର୍ବାହ କରିବେ। ଉଲ୍ଲେଖଯୋଗ୍ୟ,କୋଟି କୋଟି ଓଡ଼ିଆଙ୍କ ଆରାଧ୍ଯ ଦେବତା ମହାପ୍ରଭୁ ଶ୍ରୀ ଜଗନ୍ନାଥଙ୍କୁ ସମର୍ପଣ ଉଦ୍ଦେଶ୍ଯରେ ଗାଁରୁ ସହର ପ୍ରତିଟି ଘରୁ ଚାଉଳ ଓ ଗୁଆ ସଂଗ୍ରହ ପାଇଁ ଜଗନ୍ନାଥ ରଥ ସାରା ରାଜ୍ୟ ପରିକ୍ରମା କରୁଛି।
ଜିଦରେ ଅଟଳ ଡ୍ରାଇଭର ମହାସଂଘ, ଆନ୍ଦୋଳନରେ ସାମିଲ ଅଟୋ କର୍ମଚାରୀ ସଂଘ
ଭୁବନେଶ୍ୱର: ଜିଦରେ ଅଟଳ ଡ୍ରାଇଭର ମହାସଂଘ। କେନ୍ଦ୍ର ସରକାର ଡ୍ରାଇଭରଙ୍କ ପାଇଁ କରିଥିବା କଳା ଆଇନ୍କୁ ପ୍ରତ୍ୟାହାର କରନ୍ତୁ । ନ ହେଲେ ଚକା ଜାମ୍ । ଡ୍ରାଇଭର ମହାସଂଘ ଆରମ୍ଭ କରିଥିବା ଷ୍ଟିୟରିଂ ଛାଡ଼ ଅଭିଯାନର ପ୍ରଭାବ ଏବେ ଚାରିଆଡ଼େ ଦେଖିବାକୁ ମିଳିଲାଣି । ଗତକାଲି ରାଉରକେଲାର ଟ୍ରକ୍ ଓ ଟିପର ମାଲିକ ସଂଘ ଡ୍ରାଇଭରଙ୍କ ଆନ୍ଦୋଳନକୁ ସମର୍ଥନ କରିଛି । ଅଭିଯାନରେ ସାମିଲ ହୋଇଛନ୍ତି ସୁନ୍ଦରଗଡ଼ ଅଟୋ କର୍ମଚାରୀ ସଂଘ।
ପଞ୍ଜାବରେ ହଜାର ହଜାର ଟ୍ରକ୍ ଡ୍ରାଇଭର ଏକାଠି ହୋଇ କେନ୍ଦ୍ର ବିରୋଧରେ ନିର୍ଣ୍ଣାୟକ ଲଢେଇ କରିବାକୁ ନିଷ୍ପତ୍ତି ନେବାର ସୂଚନା ମିଳିଛି। ଭାରତୀୟ ନ୍ୟାୟ ସଂହିତା ଧାରା ୧୦୪ ଉପଧାରା-୨କୁ ବିରୋଧ କରୁଛି ନିଖିଳ ଓଡ଼ିଶା ପରିବହନ କର୍ମଚାରୀ ଫେଡେରେସନ୍। ଅଭିଯୋଗ ହୋଇଛି ଯେ କେନ୍ଦ୍ର ସରକାରଙ୍କ ଏପରି ଆଇନ ପ୍ରମାଣିତ କରୁଛି, ଦେଶରେ ଡ୍ରାଇଭରମାନେ ଯେପରି ଦ୍ବିତୀୟ ଶ୍ରେଣୀ ନାଗରିକ।
ଡ୍ରାଇଭରଙ୍କୁ ଇପିଏଏଫ୍ ଓ ଇଏସ୍ଆଇରେ ଅନ୍ତର୍ଭୁକ୍ତ କରିବାକୁ ବହୁ ଦିନରୁ ଦାବି ହୋଇଆସୁଛି । ଏଥିରେ ସରକାରଙ୍କୁ ଟଙ୍କାଟିଏ ଦେବାକୁ ପଡ଼ିବନି । କେବଳ କେନ୍ଦ୍ର ସରକାର ଇପିଏଫ୍ ଓ ଇଏସ୍ଆଇ ଆଇନରେ ସଂଶୋଧନ କରିବା ଦରକାର । ଚକା ଜାମ୍ ହେଲେ ଅତ୍ୟାବଶ୍ୟକ ସାମଗ୍ରୀ ପେଟ୍ରୋଲ-ଡିଜେଲ ଉପଲବ୍ଧ ହେବ ନାହିଁ । ଏଥିରେ ଆମ୍ବୁଲାନ୍ସ ଠାରୁ ଆରମ୍ଭ କରି ପରିବହନ ବ୍ୟବସ୍ଥା ଦୁର୍ବିସହ ହୋଇପଡିବ।
ଆସନ୍ତାକାଲି ନିଖିଳ ଓଡ଼ିଶା ପରିବହନ କର୍ମଚାରୀ ଫେଡେରେସନ୍ ଓ ଡ୍ରାଇଭର ମହାସଂଘ ସହିତ ଆଲୋଚନା କରିବ । ପେଟ୍ରୋଲ ଓ ଡିଜେଲ ଟ୍ୟାଙ୍କର ଡ୍ରାଇଭର କେନ୍ଦ୍ର ସରକାରଙ୍କୁ ନିଷ୍ପତ୍ତି ନେବା ପାଇଁ ଆଉ ୭ରୁ ୧୦ ଦିନ ମହଲତ ଦେଇପାରନ୍ତି।
ହାଇଟେକ୍ ମେଡିକାଲରେ ବିସ୍ଫୋରଣ ଘଟଣା; ଆଉ ଜଣେ ଆହତଙ୍କ ମୃତ୍ୟୁ
ଭୁବନେଶ୍ୱର: ହାଇଟେକ୍ ମେଡିକାଲରେ ବିସ୍ଫୋରଣ ଘଟଣା। ଚାଲିଗଲା ଆଉ ଜଣଙ୍କ ଜୀବନ। ଗତକାଲି ବିଳମ୍ବିତ ରାତିରେ ଦିଲ୍ଲୀପ ସାମନ୍ତରାୟଙ୍କ ମୃତ୍ୟୁ ହୋଇଛି। ଏନେଇ ହସ୍ପିଟାଲ କର୍ତ୍ତୃପକ୍ଷଙ୍କ ପକ୍ଷରୁ ସୂଚନା ମିଳିଛି।
୨୯ ତାରିଖରେ ଅକ୍ସିଜେନ ସିଲିଣ୍ଡର ବିସ୍ଫୋରଣ ବେଳେ ଦିଲ୍ଲୀପ ସାମନ୍ତରାୟ, ସୀମାଞ୍ଚଳ ବିଶ୍ୱାଳ, ଶ୍ରୀତମ ସାହୁ, ଜ୍ୟୋତି ରଞ୍ଜନ ମଲ୍ଲିକ ଗୁରୁତର ହୋଇଥିଲେ। ପରେ ଦୁଇ ଜଣଙ୍କ ମୃତ୍ୟୁ ଘଟିଥିଲା । ମୃତକ ଦୁଇ ଜଣ ଦିଲ୍ଲୀପ ଓ ଶ୍ରୀତମ ବୋଲି ପ୍ରଥମେ ହସ୍ପିଟାଲ କର୍ତ୍ତୃପକ୍ଷ କହିଥିଲେ। ଦିଲ୍ଲୀପଙ୍କ ମୃତ୍ୟୁ ଖବର ଶୁଣି ତାଙ୍କ ପତ୍ନୀ ମଧ୍ୟ ଆତ୍ମହତ୍ୟା କରିଥିଲେ।
କିନ୍ତୁ ଚିକିତ୍ସିତ ହେଉଥିବା ଅନ୍ୟ ଦୁଇ ଜଣଙ୍କ ମଧ୍ୟରୁ ଜଣେ ଯୁବକ ନିଜକୁ ଦିଲ୍ଲୀପ ବୋଲି ପରିଚୟ ଦେଇଥିଲେ। ଏହା ପରେ ଆରମ୍ଭ ହୋଇଥିଲା ଦ୍ଵନ୍ଦ୍ବ । ଯାହାକୁ ନେଇ ପରିବାର ବର୍ଗ ମଧ୍ୟ ସାମ୍ନାସାମ୍ନି ହୋଇଥିଲେ। ତେବେ ପରିଶେଷରେ ନିଜକୁ ଦିଲ୍ଲୀପ ବୋଲି କହୁଥିବା ବ୍ୟକ୍ତିଙ୍କର ମଧ୍ୟ ମୃତ୍ୟୁ ହୋଇଛି।
ଉଲ୍ଲେଖଯୋଗ୍ୟ, ପୂର୍ବରୁ ଗତ ୩୦ ତାରିଖରେ ଦିଲ୍ଲୀପଙ୍କ ମୃତ୍ୟୁ ନେଇ ପରିବାର ଲୋକଙ୍କୁ ଖବର ଦିଆଯିବା ସହ ୩୧ ତାରିଖରେ ମୃତଦେହ ହସ୍ତାନ୍ତର ହୋଇଥିଲା । ପରିବାର ଲୋକ ଶବ ସତ୍କାର କରିଥିଲେ। ହେଲେ ସ୍ବାମୀଙ୍କ ମୃତ୍ୟୁ ଖବର ସହି ନ ପାରି ୧ ତାରିଖରେ ଦିଲ୍ଲୀପଙ୍କ ପତ୍ନୀ ଆତ୍ମହତ୍ୟା କରିଥିଲେ। ଏହାର ଭିତରେ ୪ ତାରିଖରେ ହସ୍ପିଟାଲ ପକ୍ଷରୁ ଦିଲ୍ଲୀପଙ୍କ ପରିବାରଙ୍କୁ ଯୋଗଯୋଗ କରି ସେ ବଞ୍ଚିଥିବା କଥା କୁହାଯାଇଥିଲା । ହେଲେ ଗତକାଲି ବିଳମ୍ବିତ ରାତିରେ ଦିଲ୍ଲୀପଙ୍କର ମୃତ୍ୟୁ ହୋଇଛି।
ଏହି ଘଟଣାରେ ଅତିରିକ୍ତ ଡିସିପି ପ୍ରକାଶ ପାଲଙ୍କ ନେତୃତ୍ୱରେ ସ୍ପେଶାଲ ଟିମ ତଦନ୍ତ ଆରମ୍ଭ କରିଛି। ୧୫ ଜଣ ପୋଲିସ ଅଫିସରଙ୍କୁ ନେଇ ଟିମ ଗଠନ ହୋଇଛି। ହସ୍ପିଟାଲ ପକ୍ଷରୁ ପୋଲିସକୁ ମେଡିକୋ ଲିଗାଲ କେସ ଦିଆଯାଇଛି । ଏବେ ଦିଲ୍ଲୀପ ଓ ଜ୍ୟୋତିଙ୍କ ଡିଏନଏ ଟେଷ୍ଟ କରାଯିବ। ଦରକାର ପଡ଼ିଲେ ମୃତ ଦେହ ପ୍ରିଜଭ କରି ରଖାଯିବ। ଜ୍ୟୋତିଙ୍କ ଶବ ଦାହ ହୋଇଥିବାରୁ ତାଙ୍କର ଭିସେରାରୁ ଡିଏନଏ ଟେଷ୍ଟ କରାଯିବ। ଅନ୍ୟ ପଟେ ଦିଲ୍ଲୀପଙ୍କ ପରିବାର ଲୋକଙ୍କ ଅଭିଯୋଗ କ୍ରମେ ଘଟଣାର ତଦନ୍ତ କରାଯିବ।
ଧୋନୀଙ୍କୁ ଠକିଦେଲେ ଘନିଷ୍ଠ ବନ୍ଧୁ, ୧୫ କୋଟିର କ୍ଷତି ପାଇଁ କଲେ ମାମଲା
ନୂଆଦିଲ୍ଲୀ: ଧୋନୀଙ୍କୁ ଠକିଦେଲେ ଘନିଷ୍ଠ ବନ୍ଧୁ, ୧୫ କୋଟିର କ୍ଷତି ପାଇଁ ମାମଲା ରୁଜୁ କଲେ। ଠକାମୀର ଶିକାର ହେଲେ ପୂର୍ବତନ ଭାରତୀୟ ଅଧିନାୟକ ମହେନ୍ଦ୍ର ସିଂ ଧୋନୀ। ନିଜର ଅତି ଘନିଷ୍ଠ ବନ୍ଧୁ ଧୋନୀଙ୍କୁ ଠକିଛନ୍ତି। ଯେଉଁଥିପାଇଁ ଆରକା ସ୍ପୋର୍ଟ୍ସ ଆଣ୍ଡ ମ୍ୟାନେଜମେଣ୍ଟ ଲିମିଟେଡର ମିହିର ଦିବାକର ଓ ସୌମ୍ୟା ବିଶ୍ୱାସଙ୍କ ନାଁରେ ରାଞ୍ଚି କୋର୍ଟରେ ଅପରାଧିକ ମାମଲା ରୁଜୁ କରିଛନ୍ତି ଧୋନୀ।
ଧୋନୀଙ୍କର ଅତି ଘନିଷ୍ଠ ବନ୍ଧୁ ଭାବେ ମିହିର ଦିବାକର ଜଣାଶୁଣା । ଏପରିକି ମିହିରି ହେଉଛନ୍ତି ଧୋନୀଙ୍କର ବ୍ୟବସାୟିକ ବନ୍ଧୁ । ମିହିର ଦିବାକର ବିଶ୍ୱର ବିଭିନ୍ନ ସ୍ଥାନରେ କ୍ରିକେଟ ଏକାଡେମୀ ଖୋଲିବାକୁ ୨୦୧୭ ମସିହାରେ ଧୋନୀଙ୍କ ସହ ଚୁକ୍ତି କରିଥିଲେ । କିନ୍ତୁ ଚୁକ୍ତିରେ ଥିବା ସର୍ତ୍ତକୁ ପରବର୍ତ୍ତୀ ସମୟରେ ପାଳନ କରିନଥିଲେ ମିହିର। ପରେ ୨୦୨୧ରେ ଧୋନୀ ନିଜର ଅଥରିଟି ଲେଟର ଆରକା ସ୍ପୋର୍ଟ୍ସ ଠାରୁ ଫେରସ୍ତ ନେଇଥିଲେ।
ଏହାପରେ ଚୁକ୍ତି ଖିଲାପ ପାଇଁ ମିହିରଙ୍କୁ ଅନେକ ନୋଟିସ ପଠାଇଥିଲେ ମଧ୍ୟ ଏହାର ଉତ୍ତର ଦେଇନଥିଲେ ମିହିର। ପରେ ଧୋନୀଙ୍କ ଓକିଲ ଦୟାନନ୍ଦ ସିଂ କହିଥିଲେ, ଆରକା ସ୍ପୋର୍ଟ୍ସ ଧୋନୀଙ୍କ ସହ ଠକାମୀ କରିଛି। ଯେଉଁଥିପାଇଁ ଧୋନୀଙ୍କର ୧୫ କୋଟି ଟଙ୍କାର କ୍ଷତି ହୋଇଛି। ଯାହାକୁ ନେଇ ମିହିରଙ୍କ ବିରୋଧରେ କୋର୍ଟରେ ପହଞ୍ଚିଛନ୍ତି ଧୋନୀ।