ଭୁବନେଶ୍ବର: ମହିଳାଙ୍କ ବିରୋଧରେ ହିଂସା ପ୍ରସଙ୍ଗରେ କେନ୍ଦ୍ର ମନ୍ତ୍ରୀଙ୍କୁ ଟାର୍ଗେଟ୍ କଲା ବିଜେଡି । ଏନସିଆରବି ରିପୋର୍ଟ ସର୍ବସାଧରଣରେ ଅଛି। କିଛି ମନ୍ତବ୍ୟ ରଖିବା ଆଗରୁ କେନ୍ଦ୍ର ମନ୍ତ୍ରୀ ତଥ୍ୟ ପରଖିବାର ଥିଲା । ମହିଳାଙ୍କ ବିରୋଧରେ ସର୍ବାଧିକ ହିଂସା ଉତ୍ତରପ୍ରଦେଶରେ ହେଉଛି । ବିଜେପି ଶାସିତ ରାଜ୍ୟରେ ମହିଳାଙ୍କ ବିରୋଧରେ ହିଁସା ଅଧିକ। ବିଜେପି ଶାସିତ ରାଜ୍ୟ କ’ଣ ଅପାରଗ କି ପ୍ରଶ୍ନ କଲେ ବିଜେଡି ମୁଖପାତ୍ର ଲେନିନ୍ ମହାନ୍ତି। ଓଡ଼ିଶାକୁ ଅପମାନିତ କରୁଛି ବିଜେପି । ଏଭଳିଭାବେ ଶାଣିତ ସ୍ବରରେ କେନ୍ଦ୍ରମନ୍ତ୍ରୀଙ୍କୁ ଟାର୍ଗେଟ କରିଛନ୍ତି ବିଜେଡି ମୁଖପାତ୍ର ଲେନିନ ମହାନ୍ତି ।
ବାହାବେଦୀରେ ହାଇଡ୍ରାମା, ଦ୍ବିତୀୟ ବିବାହ ବେଳେ ପହଞ୍ଚିଲେ ପ୍ରଥମ ସ୍ତ୍ରୀଙ୍କ ସହ ଦୁଇ ଝିଅ
ଭୁବନେଶ୍ବର: ବାହାବେଦୀରେ ହାଇଡ୍ରାମା । ଦ୍ବିତୀୟ ବିବାହ ବେଳେ ବେଦୀରେ ପହଞ୍ଚିଲେ ପ୍ରଥମ ସ୍ତ୍ରୀଙ୍କ ସହ ଦୁଇ ଝିଅ । ସ୍ବାମୀକୁ ବେଦୀରେ ମାଡ଼ ମାରିବା ସହ ପୋଲିସର ଜିମାଦେଲେ ପ୍ରଥମ ସ୍ତ୍ରୀ । ଭୁବନେଶ୍ବର ଉପକଣ୍ଠ ବାଳକାଟି ଦୁଲ୍ଲା ଦେବୀ ମନ୍ଦିର ପରିସରରେ ଘଟିଛି ଏଭଳି ଘଟଣା । ଜଙ୍କିଆ ଥାନା ଚନ୍ଦ୍ରମା ପାଟପୁର ଗାଁର ଯୋଗେଶ ହାତୀ ୨୦୧୦ ମସିହାରେ ପ୍ରଥମ ବିବାହ କରିଥିଲେ । ଏରସମା ଥାନା ଗଣେଶ୍ବରପୁରର ଅହଲ୍ୟା ହାତୀଙ୍କୁ ପ୍ରଥମେ ପ୍ରେମ ବିବାହ କରିଥିଲେ ଯୋଗେଶ ।
ଉଭୟଙ୍କର ୨ଜଣ ଝିଅ ମଧ୍ୟ ରହିଛନ୍ତି । ତେବେ ଏହାରି ଭିତରେ ଅନ୍ୟଜଣଙ୍କ ସହିତ ଯୋଗେଶଙ୍କର ପ୍ରେମ ସମ୍ପର୍କ ଗଢିଉଠିଥିଲା । ଏଥିପାଇଁ ପରିବାରରେ ବିବାଦ ମଧ୍ୟ ହୋଇଥିଲା । ଆଜି ଯୋଗେଶ ଅନ୍ୟ ଜଣେ ଯୁବତୀଙ୍କୁ ବିବାହ କରିବା ସମୟରେ ପ୍ରଥମ ସ୍ତ୍ରୀ ଦୁଇ ଝିଅଙ୍କ ସହ ଘଟଣାସ୍ଥଳରେ ପହଞ୍ଚିଥିଲେ । ବେଦୀ ଉପରେ ହିଁ ସ୍ବାମୀଙ୍କୁ ଉତ୍ତମମଧ୍ୟମ ଦେଇଥିଲେ ସ୍ତ୍ରୀ । ବିବାହ କରୁଥିବା ଅନ୍ୟ ଯୁବତୀ ଘଟଣାସ୍ଥଳରୁ ପଳାଇଥିବାବେଳେ ଯୋଗେଶକୁ ପୋଲିସର ଜିମା ଦେଇଥିଲେ ଲୋକ । ଯୋଗେଶଙ୍କୁ ଅଟକ ରଖି ପୋଲିସ ତଦନ୍ତ କରୁଛି ।
ଦକ୍ଷିଣ ଆଫ୍ରିକା ବିପକ୍ଷରେ ଦମଦାର ପ୍ରଦର୍ଶନ କରିଥିବା ଭାରତୀୟ ବ୍ୟାଟ୍ସମ୍ୟାନ୍, ଆଜିର ମ୍ୟାଚରେ ଏମାନଙ୍କ ଉପରେ ରହିବ ନଜର
ନନ୍ଦିଘୋଷ ବ୍ୟୁରୋ: ରବିବାର ଦକ୍ଷିଣ ଆଫ୍ରିକା ବିପକ୍ଷରେ ନିଜର ପ୍ରଥମ ଟି-୨୦ ଖେଳିବ ଭାରତ । ଭାରତ ନିକଟରେ ଶକ୍ତିଶାଳି ଅଷ୍ଟ୍ରେଲିଆକୁ ଟି-୨୦ ସିରିଜରେ ହରାଇବା ପରେ ଏବେ ଘରୋଇ ମାଟିରେ ଦକ୍ଷିଣ ଆଫ୍ରିକାକୁ ପରାସ୍ତ କରି ସିରିଜ ହାତେଇବା ଲକ୍ଷ୍ୟରେ ମେ ଇନ ବ୍ଲୁ । ତେବେ ଦକ୍ଷିଣ ଆଫ୍ରିକା ବିପକ୍ଷରେ ଟି-୨୦ରେ ସର୍ବାଧିକ ସ୍କୋର କରିଥିବା ଖେଳାଳିଙ୍କ ଉପରେ ଯଦି ନଜର ପକାଇବା ତାହେଲେ ଆଗରେ ରହିଛନ୍ତି ହିଟମ୍ୟାନ ରୋହିତ ଶର୍ମା । ସେ ୧୭ ମ୍ୟାଚରେ ୨୪୦ ରନ କରିଛନ୍ତି । ଏଥିରେ ଗୋଟିଏ ଶତକୀୟ ପାଳି ମଧ୍ୟ ରହିଛି । ସେପଟେ ଦ୍ବିତୀୟ ସ୍ଥାନରେ ରହିଛନ୍ତି ସୁରେଶ ରାଇନା । ସେ ୧୨ ମ୍ୟାଚରୁ ୩୩୯ ରନ ସଂଗ୍ରହ କରିଛନ୍ତି । ସେପଟେ ତୃତୀୟ ସ୍ଥାନରେ ବିରାଟ କୋହଲି ରହିଥିବାବେବଳେ ଚତୁର୍ଥ ସ୍ଥାନରେ ଶିଖର ଧାଓ୍ବନ ଏବଂ ପଞ୍ଚମ ସ୍ଥାନରେ ରହିଛନ୍ତି ଦିନେଶ କାର୍ତ୍ତିକ।
ସେପଟେ ଆଜିର ମ୍ୟାଚରେ ଯୁବ ଖେଳାଳିମାନେ ମଇଦାନୁ ଓହ୍ଲାଇବାକୁ ଯାଉଥିବାବେଳେ ଗିଲ ଏବଂ ଜୟସ୍ବାଲ ପ୍ରାରମ୍ଭିକ ପାଳି ଖିଭଳି ଆରମ୍ଭ କରୁଛନ୍ତି ତାହା ସମସ୍ତଙ୍କ ନଜର ରହିଛି । ସେପଟେ ରିଙ୍କୁ ସିଂହ ଏବଂ ଶ୍ରେୟସ ଆୟାର ମିଡିଲ ଅର୍ଡର ସମ୍ଭାଳିବା ସହ ଦଳ ବିଜୟର ଅଭିଯାନ ଆରମ୍ଭ କରିବାର ଲକ୍ଷ୍ୟ ରଖିଛି । ସେପଟେ ବୋଲିଂରେ ମଧ୍ୟ ଦଳ ଉଚ୍ଚ କୋଟିର ଖେଳ ପ୍ରଦର୍ଶନ କରିବାକୁ ଲକ୍ଷ୍ୟ ରଖିଛି । ସବୁଠାରୁ ଗୁରୁତ୍ବପୂର୍ଣ୍ଣ କଥା ହେଉଛି କି, ଏବେ ଦଳର ବହୁ ଖେଳାଳି ଫର୍ମରେ ରହିଥିବାବେଳେ କାହାକୁ ସ୍ଥାନ ମିଳୁଛି ତାହା ଦେଖିବାକୁ ବାକି ରହିଛି । ୨୦୨୪ରେ ଟି-୨୦ ବିଶ୍ବକପ ରହିଥିବାବେଳେ ଏହି ସିରିଜ ମଧ୍ୟ ଗୁରୁତ୍ବ ବହନ କରୁଛି ।
ନା OTP ସେୟାର କରିଛନ୍ତି ନା ବ୍ୟାଙ୍କ ତଥ୍ୟ ଦେଇଛନ୍ତି ତଥାପି ଗାଏବ ହେଇଗଲା ୫ ଲକ୍ଷ
ଚଣ୍ଡିଗଡ଼: ପ୍ରତିଦିନ ସାଇବର୍ ଠକେଇର ନୂଆ ନୂଆ ମାମଲା ସାମ୍ନାକୁ ଆସୁଛି । ଲୋକଙ୍କୁ ଠକିବା ପାଇଁ ସ୍କାମରମାନେ ବିଭିନ୍ନ ପ୍ରକାର ତରିକା ଆପଣାଉଛନ୍ତି । ବହୁ ଚତୁରତାର ସହ ସେମାନେ ବ୍ୟାଙ୍କ ଡିଟେଲ୍ସ ଏବଂ OTP ର ଆକ୍ସେସ ନେଇଯାଉଛନ୍ତି । ଏବେ ଏପରି ଏକ ସାଇବର୍ ଠକେଇ ହୋଇଛି ଯାହା ସମସ୍ତଙ୍କୁ ଚକିତ କରିଦେଇଛି । ଠକାମୀର ଶିକାର ହେଇଥିବା ମହିଳା ନା ଓଟିପି ସେୟାର କରିଛନ୍ତି ନାଁ ବ୍ୟାଙ୍କର ସବୁ ତଥ୍ୟ ତଥାପି ତାଙ୍କ ଆକାଉଣ୍ଟରୁ ଟଙ୍କା କଟି ଯାଇଛି ।
ଚଣ୍ଡିଗଡ଼ରୁ ଏପରି ମାମଲା ସାମ୍ନାକୁ ଆସିଛି । ମହିଳାଙ୍କ HDFC ବ୍ୟାଙ୍କ କ୍ରେଡିଟ କାର୍ଡରୁ ୫ ଲକ୍ଷ ଟଙ୍କା ଠକି ନେଇଛନ୍ତି ଠକ । ମହିଳାଙ୍କ କ୍ରେଡିଟ୍ କାର୍ଡରୁ ୩୧ ଅକ୍ଟୋବରରେ ୩ ଥର ଟ୍ରାଜାକ୍ସନ ହୋଇଥିଲା ।
ଏ ନେଇ ପୋଲିସ୍ କହିଛି ଯେ, ସାଇବର୍ ଠକ ଟ୍ରାଭେଲ ପୋର୍ଟାଲକୁ ଏହି ପେମେଣ୍ଟ କରିଛି । ସବୁଠୁ ଆଶ୍ଚର୍ଯ୍ୟକର କଥା ହେଲା ମହିଳା ନାଁ କୌଣସି ଓଟିପି ସେୟାର କରିଛନ୍ତି ନାଁ କୌଣସି ତଥ୍ୟ ଦେଇଛନ୍ତି । କାହାକୁ କିଛି ନ ଦେଇ ବି କିପରି ସାଇବର ଠକେଇର ଶିକାର ହେଲେ ତାହା ଏବେ ତଦନ୍ତର ବିଷୟ ପାଲଟିଛି ।
ବିଷ୍ଣୁଦେବ ସାଏ ଛତିଶଗଡ଼ ମୁଖ୍ୟମନ୍ତ୍ରୀ
ନନ୍ଦିଘୋଷ ବ୍ୟୁରୋ: ସରିଲା ଛତିଶଗଡ଼ ସସପେନସ । କଳ୍ପନାଜଳ୍ପନାର ଅବସାନ ଘଟାଇ ବିଷ୍ଣୁଦେବ ସାଏ ହୋଇଛନ୍ତି ଛତିଶଗଡ଼ ମୁଖ୍ୟମନ୍ତ୍ରୀ । ବିଧାୟକ ଦଳ ବୈଠକରେ ତାଙ୍କ ନାମ ଉପରେ ବାଜିଛି ମୋହର । ବିଜେପିର ରାଜ୍ୟ ସଭାପତି ଥିଲେ ବିଷ୍ଣୁଦେବ । ୧୯୯୦ରୁ ୧୯୯୮ ଥିଲେ ମଧ୍ୟପ୍ରଦେଶ ବିଧାୟକ । ୧୯୯୯ରେ ତ୍ରୟୋଦଶ ଲୋକସଭାକୁ ହୋଇଥିଲେ ନିର୍ବାଚିତ । ସରପଞ୍ଚରୁ ରାଜନୈତିକ କ୍ୟାରିୟର ଆରମ୍ଭ କରିଥିଲେ ବିଷ୍ଣୁଦେବ । ୧୯୯୦ରୁ ୧୯୯୮ ଥିଲେ ମଧ୍ୟପ୍ରଦେଶ ବିଧାୟକ । ୧୯୯୯ରେ ତ୍ରୟୋଦଶ ଲୋକସଭାକୁ ହୋଇଥିଲେ ନିର୍ବାଚିତ ହୋଇଥିଲେ । ୨୦୦୪ରେ ଚତୁର୍ଦ୍ଦଶ ଲୋକସଭାରୁ ଏବଂ ୨୦୦୯ ଓ ୨୦୧୪ରେ ପଞ୍ଚଦଶ ଲୋକସଭାକୁ ନିର୍ବାଚିତ ହୋଇଥିଲେ । ବର୍ତ୍ତମାନ ସେ କୁନକୁରୀ ବିଧାନସଭାରୁ ପ୍ରତିନିଧିତ୍ବ କରୁଛନ୍ତି ।୧୯୬୪ ଫେବ୍ରୁଆରୀ ୨୧ରେ ଯାସପୁର ଜିଲ୍ଲାର ଏକ ଆଦିବାସୀ ପରିବାରରେ ଜନ୍ମ ହୋଇଥିଲେ ବିଷ୍ଣୁଦେବ ।
କରନି ସେନା ମୁଖ୍ୟ ସୁଖଦେବ ସିଂ ଗୋଗାମେଡି ହତ୍ୟା ଘଟଣା, ୨ ସୁଟର ଓ ଜଣେ ସହଯୋଗୀ ଗିରଫ
ନନ୍ଦିଘୋଷ ବ୍ୟୁରୋ: କରନି ସେନା ମୁଖ୍ୟ ସୁଖଦେବ ସିଂ ଗୋଗାମେଡି ହତ୍ୟା ଘଟଣା । ୨ ସୁଟର ଓ ଜଣେ ସହଯୋଗୀ ହୋଇଛନ୍ତି ଗିରଫ । ଚଣ୍ଡୀଗଡ଼ରୁ ସେମାନଙ୍କୁ କରାଯଇଛି ଗିରଫ । ଦିଲ୍ଲୀ କ୍ରାଇମବ୍ରାଞ୍ଚ ଓ ରାଜସ୍ଥାନ ପୋଲିସର ମିଳିତ ଅପରେସନ କ୍ରମେ ସେମାନଙ୍କୁ ଗିରଫ କରାଯାଇଛି । ଗିରଫ ଦୁଇ ସୁଟର ହେଲେ ରୋହିତ ରାଠୋର ଓ ନୀତିନ ଫୌଜି । ଗିରଫ ଅନ୍ୟ ବ୍ୟକ୍ତି ହେଲେ ଉଦ୍ଧାମ । ସେମାନଙ୍କ ଲାଗି ପୋଲିସ ୪ ଲକ୍ଷ ଟଙ୍କାର ପୁରସ୍କାର ଘୋଷଣା କରିଥିଲା । ପୋଲିସର ସୂଚନା ମୁତାବକ ହତ୍ୟା ପରେ ଅଭିଯୁକ୍ତମାନେ ହରିଆଣାର ହିସାରକୁ ଚାଲିଯାଇଥିଲେ ।
ପରେ ସେମାନେ ହିମାଚଳ ପ୍ରଦେଶର ମାନାଲି ଯାଇ ସେଠାରୁ ଚଣ୍ଡୀଗଡ ଯାଇଥିଲେ । ସେମାନଙ୍କ ମୋବାଇଲ ଫୋନକୁ ଆଧାର କରି ପୋଲିସ ଗିରଫ କରିଥିଲା । ଗତ ନଭେମ୍ବର ୫ ତାରିଖରେ ରାଜସ୍ଥାନ ଜୟପୁରରେ ନିଜ ଘରେ ଥିବାବେଳେ ୫ ଜଣ ଅଭିଯୁକ୍ତ ଗୋଗମେଡିଙ୍କୁ ଅତି ନିକଟରୁ ଗୁଳି କରିଥିଲେ । ହତ୍ୟାକାଣ୍ଡ ପରେ ଏଥିଲାଗି ଲରେନ୍ସ ବିଷ୍ଣୋଇ ଗ୍ୟାଙ୍ଗ ସହ ସମ୍ପୃକ୍ତ ରୋହିତ ଗୋଡାରା ନିଜକୁ ଦାୟୀ କରିଥିଲା । ଏହି ହତ୍ୟାଘଟଣାର ଲୋମହର୍ଷକ ଦୃଶ୍ୟ ସିସିଟିଭିରେ କଏଦ ହୋଇଥିଲା ।
ବହୁଜନ ସମାଜ ପାର୍ଟିର ଉତ୍ତରାଧିକାରୀ ନାଁ ଘୋଷଣା, ପୁତୁରା ଆକାଶ ଆନନ୍ଦଙ୍କ ନାଁ ଘୋଷଣା କଲେ ସୁପ୍ରିମୋ ମାୟାବତୀ
ତାମିଲନାଡ଼ୁ: ବିଏସପି ସୁପ୍ରିମୋ ମାୟାବତୀଙ୍କ ରାଜନୈତିକ ଉତ୍ତରାଧିକାରୀ ଘୋଷଣା। ପୁତୁରା ଆକାଶ ଆନନ୍ଦଙ୍କୁ ଉତ୍ତରାଧିକାରୀ ଘୋଷଣା କଲେ ବିଏସପି ମୁଖ୍ୟ ତଥା ଉତ୍ତରପ୍ରଦେଶର ପୂର୍ବତନ ମୁଖ୍ୟମନ୍ତ୍ରୀ ମାୟାବତୀ। ଆଜି ବସିଥିବା ଦଳୀୟ ବୈଠକରେ ଉତ୍ତରାଧିକାରୀ ଚୟନ କରିଛନ୍ତି ବିଏସପି ସୁପ୍ରିମୋ ମାୟାବତୀ। ଉତ୍ତରପ୍ରଦେଶ ଲକ୍ଷ୍ନୌରେ ବସିଥିଲା ବହୁଜନ ସମାଜବାଦୀ ପାର୍ଟି ବୈଠକ। ବିଏସପିରେ ଦ୍ବିତୀୟ କ୍ଷମତା କେନ୍ଦ୍ର ମାୟାବତୀଙ୍କ ସାନଭାଇ ଆନନ୍ଦ କୁମାରଙ୍କ ପାଖରେ ରହିଛି। ମାୟାବତୀଙ୍କ ଛୋଟ ଭାଇ ଆନନ୍ଦକୁମାରଙ୍କ ପୁଅ ହେଉଛନ୍ତି ଆକାଶ ଆନନ୍ଦ ।
୨୦୧୬ରେ ମାୟାବତୀଙ୍କ ପୁତୁରୁା ଆକାଶ ଆନନ୍ଦ ବିଏସପିରେ ଯୋଗ ଦେଇଥିଲେ । ୨୦୧୯ ସାଧାରଣ ନିର୍ବାଚନରେ ବିଏସପିର ଷ୍ଟାର କ୍ୟାମ୍ପେନର ଥିଲେ ଆକାଶ । ମଧ୍ୟପ୍ରଦେଶ, ରାଜସ୍ଥାନ ବିଧାନସଭା ନିର୍ବାଚନରେ ବିଏସପି ପକ୍ଷରୁ ଜୋରଦାର ପ୍ରଚାର କରିଥିଲେ । ଶେଷ ହୋଇଥିବା ରାଜସ୍ଥାନ ବିଧାନସଭା ନିର୍ବାଚନରେ ବିଏସପି ୨ଟି ସିଟରେ ବିଜୟ ହୋଇଛି୍। ୨୦୨୨ରେ ରାଜସ୍ଥାନର ଅଲୱରରେ ପଦଯାତ୍ରା କରି ଚର୍ଚ୍ଚାର ଘେରକୁ ଆସିଥିଲେ ଆକାଶ ଆନନ୍ଦ।
ଆଗକୁ ୨୦୧୪ ନିର୍ବାଚନ ଥିବାବେଳେ ଦଳକୁ ସୁଦୃଢ କରିବାକୁ ଆକାଶଙ୍କ ଉପରେ ଦାୟିତ୍ବ ଦେଇଛନ୍ତି ମାୟାବତୀ । କିଛି ଦିନ ପୂର୍ବରୁ ସମ୍ବିଧାନ ପ୍ରଣେତା ଡକ୍ଟର ବି. ଆର. ଆମ୍ବେଦକରଙ୍କ ଜୟନ୍ତୀରେ ୧୩ କିଲୋମିଟର ସ୍ବାଭିମାନ ସଂକଳ୍ପ ଯାତ୍ରା କରି ଚର୍ଚ୍ଚାକୁ ଆସିଥିଲେ ଆକାଶ। ୨୦୧୮ ନିର୍ବାଚନରେ ପ୍ରଚାର କରି ସେ ପ୍ରଥମେ ଲୋକଲୋଚନକୁ ଆସିଥିଲେ । ସେତେବେଳେ ବିଏସପି ରାଜସ୍ଥାନରେ ୬ଟି ଆସନ ଜିତିଥିଲା ।
ଦୁର୍ଭାଗ୍ୟକୁ କରନ୍ତୁ ସୌଭାଗ୍ୟର ସିଡ଼ି, ଆପଣାନ୍ତୁ ଏହି ନିୟମ
ନନ୍ଦିଘୋଷ ବ୍ୟୁରୋ: ଆପଣ ଜୀବନରେ ଅନେକ ସମସ୍ୟାର ସମ୍ମୁଖୀନ ହେଉଥିବେ । ଏହାକୁ ପ୍ରାୟ ସବୁ ଲୋକ ଦୁର୍ଭାଗ୍ୟ ବୋଲି କହିଥାନ୍ତି । କିନ୍ତୁ ଏହାକୁ ନେଇ ଆପଣ ଚିନ୍ତା କରିବାର ଆବଶ୍ୟକତା ନାହିଁ । ଜୀବନରେ ସଫଳତା ପାଇବା ପାଇଁ ଆମେ ଆପଣଙ୍କୁ କିଛି ମୂଲ୍ୟବାନ ଚିନ୍ତାଧାରା ବିଷୟରେ କହିବାକୁ ଯାଉଛୁ, ଯାହା ଆପଣଙ୍କର ଦୁର୍ଭାଗ୍ୟକୁ ସୌଭାଗ୍ୟରେ ପରିବର୍ତ୍ତନ କରିପାରିବ । କିନ୍ତୁ ଏଥିପାଇଁ ଆପଣଙ୍କୁ କିଛି ଗୁରୁତ୍ୱପୂର୍ଣ୍ଣ ନିୟମ ମାନିବାକୁ ପଡିବ । ତାହାଲେ ଜାଣନ୍ତୁ ଏହି ସବୁ ନିୟମ ବିଷୟରେ ।
ଜୀବନରେ କର୍ମ ଅନୁସାରେ ଆପଣ ଫଳ ପାଆନ୍ତି ନାହିଁ ବୋଲି ଭାବିଥାନ୍ତି । ଯେତେବେଳେ ଆମେ ବହୁ ଅସୁବିଧାରେ ରହିଥାଉ ସେତେବେଳେ ସଫଳ ହେବା ପାଇଁ ବହୁ ପରିଶ୍ରମ କରିବାକୁ ପଡ଼ିଥାଏ । ଅନେକ କୁହନ୍ତି ଖରାପ ସମୟ ଚାଲିଛି ବୋଲି କିଛି ଭଲ ହେଉନି । ଏହାକୁ ଲୋକେ ଦୁର୍ଭାଗ୍ୟ ବୋଲି କହିଥାନ୍ତି ଏବଂ ଭାଗ୍ୟକୁ ଦୋଷ ଦେଇଥାନ୍ତି ।
ଏ ନେଇ ପଣ୍ଡିତ ରାଜେନ୍ଦ୍ର ତିୱାରୀ କହିଛନ୍ତି ଯେ, ଯଦି ଆପଣ ଜୀବନରେ ଅନେକ ସମସ୍ୟାର ସମ୍ମୁଖୀନ ହେଉଛନ୍ତି ଏବଂ ଅନୁଭବ କରୁଛ ଯେ ଦୁର୍ଭାଗ୍ୟ ଆପଣଙ୍କୁ ଛାଡୁନାହିଁ, ତେବେ କିଛି ସହଜ ପଦକ୍ଷେପ ଅନୁସରଣ କରି ଆପଣ ଏହି ସମସ୍ୟାରୁ ମୁକ୍ତି ପାଇପାରିବେ ।
ବାସ୍ତୁ ଶାସ୍ତ୍ର ଅନୁଯାୟୀ, ଲୋକମାନେ ନିଜ ଛାତ ଉପରେ ଏକ ମାଟି ପାତ୍ରରେ ପକ୍ଷୀମାନଙ୍କ ପାଇଁ ଶସ୍ୟ ବ୍ୟବସ୍ଥା କରିବା ଉଚିତ୍। ଏମିତି କଲେ ଜୀବନର ସମସ୍ୟାଗୁଡ଼ିକ ଧୀରେ ଧୀରେ ସମାପ୍ତ ହେବା ଆରମ୍ଭ କରିବ ଏବଂ ଆପଣଙ୍କ ଦୁର୍ଭାଗ୍ୟ ସୌଭାଗ୍ୟରେ ପରିବର୍ତ୍ତନ ହେବା ଆରମ୍ଭ କରିବ । ଆପଣ ସମସ୍ୟାରୁ ସବୁଦିନ ପାଇଁ ମୁକ୍ତି ପାଇବା ପାଇଁ ମଙ୍ଗଳବାର ଏବଂ ଶନିବାର ଦିନ ବଜରଙ୍ଗବାଲିଙ୍କୁ ପାନ ପତ୍ର ଏବଂ ଲଡୁ ଦିଅନ୍ତୁ ।
ଏହା ଛଡ଼ା ଯେତେବେଳେ ଆପଣ ଭାବୁଛନ୍ତି ଆପଣଙ୍କର ସମୟ ଖରାପ ଚାଲିଛି ସେତେବେଳେ ପରିଷ୍କାର ପୋଷାକ ପିନ୍ଧିବାକୁ ଚେଷ୍ଟା କରନ୍ତୁ | ଯଦି ଆପଣ କୌଣସି ମହିଳାଙ୍କୁ ଅସଦାଚରଣ କରିଛନ୍ତି, ତେବେ ତାଙ୍କୁ ହାତ ଯୋଡ଼ି କ୍ଷମା ମାଗନ୍ତୁ । ପିତାମାତାଙ୍କ ସହିତ ଅସଦାଚରଣ ଆପଣଙ୍କୁ ସାରା ଜୀବନ ସମସ୍ୟାରେ ପକାଇପାରେ । ସକାଳେ ନିୟମିତ ଭାବରେ ସୂର୍ଯ୍ୟଙ୍କୁ ଜଳ ଦାନ କରନ୍ତୁ । ଏପରି କଲେ ଘରେ ନକରାତ୍ମକ ଶକ୍ତି ଆସିବ ନାହିଁ ।
ଆୟକର ବିଭାଗ ହାତରେ ନାଲି ଫାଇଲ, ରହିଛି ଚାନ୍ଦା ନେଉଥିବାଙ୍କ ନାଁ
ବଲାଙ୍ଗୀର : ସୁଦପଡା ଦେଶୀ ମଦଭାଟି ଚଢ଼ାଉ ୫ମ ଦିନରେ ଚାଲିଥିବା ବେଳେ ବଲାଙ୍ଗୀର ଆୟକର ବିଭାଗ ହାତରେ ଲାଗିଛି ଏକ ନାଲି ଫାଇଲି । ଏହି ଟିପା ଖାତାରେ ରହିଛି ମଦ ଭାଟିରୁ ଚାନ୍ଦା ନେଉଥିବା ଏକାଧିକ ଲୋକଙ୍କ ନାଁ । ଦୀର୍ଘ ବର୍ଷ ଧରି ଏହି ଫାଇଲ ପରିଚାଳନା କରୁଥିଲେ ମୁଖ୍ୟ ମ୍ୟାନେଜର ରାଜେଶ ସାହୁ ଓ ଫାଇନାନସିଆଲ ମ୍ୟାନେଜର ବଣ୍ଟି ସାହୁ I
ଅନେକ ବଡ଼ବଡ଼ିଆଙ୍କ ସମେତ ଗୁଣ୍ଡା ଶ୍ରେଣୀର ଲୋକ, ବିଭିନ୍ନ ପୂଜା ମଣ୍ଡପ, ମିଡିଲ ମ୍ୟାନ ଓ ଅନେକ ବ୍ୟକ୍ତିଙ୍କ ନାଁ ଏହି ଟିପା ଖାତାରେ ରହିଛି । ଏହି ଲାଲ ଫାଇଲକୁ ଜବତ କରି ତଦନ୍ତ ଆରମ୍ଭ କରିଛି ଆୟକର ବିଭାଗ I ଫାଇଲରେ ବିଭିନ୍ନ ବ୍ୟକ୍ତିଙ୍କୁ ହଜାରେ ଟଙ୍କାରୁ ଲକ୍ଷାଧିକ ଟଙ୍କା ପର୍ଯ୍ୟନ୍ତ ଚାନ୍ଦା ଦିଆଯାଉଥିବା ଉଲ୍ଲେଖ ରହିଛି I ରେଡ୍ ପରେ ଏହି ଫାଇଲ ନେଇ ତଦନ୍ତ ଆରମ୍ଭ କରିବ ଆୟକର ବିଭାଗ I ଲକ୍ଷାଧିକ ଟଙ୍କା ବଟି ନେଉଥିବା ଲୋକଙ୍କୁ ଡାକି ପଚରାଉଚରା କରିବ ଆୟକର ବିଭାଗ । ଟିପା ଖାତା ମିଳିବା ପରେ ଏବେ ଏହାକୁ ନେଇ ବଲାଙ୍ଗୀରରେ ଚର୍ଚ୍ଚା ଜୋର ଧରିଛି ।
ସେପଟେ ଆୟକର ବିଭାଗର ଚଢାଉ ୫ମ ଦିନରେ ପହଞ୍ଚି ଥିବା ବେଳେ ଜବତ ଟଙ୍କା ଗଣତି ବି ଜାରି ରହିଛି । ରେଡ୍ ପରଠୁ ଏପର୍ଯ୍ୟନ୍ତ ମିଳିଲାଣି ୧୬୪ କୋଟି ଟଙ୍କା । ଗତକାଲି ବିଳମ୍ବିତ ରାତି ପର୍ଯ୍ୟନ୍ତ ଚାଲିଥିଲା ଟଙ୍କା ଗଣତି । ୧୦୫ଟି ବସ୍ତା ଓ ଦୁଇଟି ବଡ଼ ପେଟିରୁ ଟଙ୍କା ଗଣତି ଶେଷ ହୋଇଛି । ଏଥିରୁ ପାଖାପାଖି ୧୬୦ କୋଟି ଟଙ୍କା ମିଳିଥିବା ଜଣାପଡିଛି । ଆଜି ପୁଣି ଆଉ ୭୧ଟି ବ୍ୟାଗରେ ଥିବା ଟଙ୍କା ଗଣତି ଚାଲିଛି । ଟଙ୍କା ଗଣତିରେ ଲାଗିଛନ୍ତି ୫୦ ଜଣ ବ୍ୟାଙ୍କ କର୍ମଚାରୀ ଓ ୨୫ଟି କାଉଣ୍ଟିଂ ମେସିନ୍ । କଡା ସୁରକ୍ଷା ବ୍ୟବସ୍ଥା ମଧ୍ୟରେ ବଲାଙ୍ଗୀର ଏସବିଆଇର ମୁଖ୍ୟ ଶାଖାରେ ଏହି ଟଙ୍କାକୁ ଗଣାଯାଉଛି ।
ନୋବେଲ ଶାନ୍ତି ବିଜେତା ନର୍ଗିସ ମହମ୍ମଦିଙ୍କ ଅନଶନ
ନୂଆଦିଲ୍ଲୀ: ଇରାନର କାରାଗାରରେ ବନ୍ଦୀ ଥିବା ନୋବେଲ ଶାନ୍ତି ବିଜେତା ନର୍ଗିସ ମହମ୍ମଦିଙ୍କ ଅନଶନ । ଓସଲୋରେ ନୋବେଲ ପୁରସ୍କାର ପ୍ରଦାନ ଉତ୍ସବ କାର୍ଯ୍ୟକ୍ରମ ଥିବାବେଳେ ସେ ଯୋଗଦେଇପାରିବେ ନାହିଁ । ଇରାନରେ ହିଜାବ ଓ ମୃତ୍ୟୁଦଣ୍ଡାଦେଶ ବିରୋଧରେ ସଂଗ୍ରାମ କରି ଶାସକଙ୍କ ରୋଷର ଶିକାର ହୋଇ ବନ୍ଦୀ ରହିଛନ୍ତି ମହମ୍ମଦି ।
ଇରାନରେ ବାହାଇ ସମ୍ପ୍ରଦାୟକୁ ଟାର୍ଗେଟ କରାଯାଉଛି ଓ ବିଭିନ୍ନ ସ୍ଥାନରେ ଏହି ଧର୍ମାବଲମ୍ବୀଙ୍କ ବିରୋଧରେ ପାତରଅନ୍ତର ନୀତି ପ୍ରଦର୍ଶନ କରାଯାଉଛି । ତାଙ୍କ ମୁହଁକୁ ନ ଘୋଡାଇ ଜେଲରୁ ଏକ ହସ୍ପିଟାଲକୁ ସ୍ଥାନାନ୍ତରିତ କରିବା ଦାବିରେ ସେ ଗତ ନଭେମ୍ବରରୁ ଅନଶନ କରିଆସୁଥିଲେ । ତେଣେ ନୋବେଲ ପୁରସ୍କାର ପ୍ରଦାନ ଉତ୍ସବ ଦିନରେ ସେ ପୁଣି ଥରେ ଅନଶନ ଆରମ୍ଭ କରିଛନ୍ତି ।
ଇରାନରେ ମହିଳାଙ୍କ ସାର୍ବଭୌମତ୍ବ, ସୁରକ୍ଷା ଦାବି ସହ ସେମାନଙ୍କ ଉପରେ ହେଉଥିବା ନିର୍ଯାତନା ବିରୋଧରେ ଦୀର୍ଘଦିନ ଧରି ସଂଗ୍ରାମ କରିଆସୁଥିବା ମହମ୍ମଦିଙ୍କୁ ଗତ ଅକ୍ଟୋବରରେ ନୋବେଲ ଶାନ୍ତି ପୁରସ୍କାର ଦେବାକୁ ଘୋଷଣା କରାଯାଇଥିଲା । ବର୍ତ୍ତମାନ ସୁଦ୍ଧା ମହମ୍ମଦି ୧୩ ଥର ଗିରଫ ହୋଇଥିବାବେଳେ ୫ଥର ଜେଲ ଦଣ୍ଡାଦେଶ କ୍ରମେ ୩୧ ବର୍ଷ ଜେଲଦଣ୍ଡର ସମ୍ମୁଖୀନ ହୋଇଛନ୍ତି । ଏହାସହ ତାଙ୍କୁ ୧୫୪ ଥର ଚାବୁକ ମାଡ଼ କରାଯାଇଛି । ମହିଳା, ଜୀବନ ଓ ସ୍ବାଧୀନତାର ବାର୍ତ୍ତା ନେଇ ସେ ସଂଗ୍ରାମ ଜାରି ରଖିଛନ୍ତି ।