ମୟୂରଭଞ୍ଜ: କ୍ରିକେଟ ଖେଳ ବେଳେ ଚାଲିଗଲା ଜୀବନ । ମୟୂରଭଞ୍ଜ ଜିଲ୍ଲା ବୈଶିଙ୍ଗା ଥାନା ମାଣତ୍ରି ମିନି ଷ୍ଟାଡିୟମରେ ଅଘଟଣ । ଖେଳୁଥିବାବେଳେ ଖେଳାଳିଙ୍କର ମୃତ୍ୟୁ ହୋଇଛି । ମୃତକ ହେଲେ ମାଣତ୍ରି ଗାଁର ବିକାଶ କର । ସାଙ୍ଗମାନଙ୍କ ସହ କ୍ରିକେଟ ଖେଳୁଥିବାବେଳେ ହଠାତ ବିକାଶ ତଳେ ପଡ଼ିଯାଇଥିଲେ । ତାଙ୍କୁ ଗୁରୁତର ଅବସ୍ଥାରେ ତୁରନ୍ତ ଡାକ୍ତରଖାନାରେ ଭର୍ତ୍ତି କରାଯାଇଥିଲା । ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ବିକାଶର ଅସ୍ବାଭାବିକ ମୃତ୍ୟୁକୁ ନେଇ ସ୍ଥାନୀୟ ଅଞ୍ଚଳରେ ଶୋକାକୂଳ ପରିବେଶ ସୃଷ୍ଟି ହୋଇଛି । ଅପମୃତ୍ୟୁ ମାମଲା ରୁଜୁ କରି ମୃତଦେହକୁ ବ୍ୟବଚ୍ଛେଦ ପାଇଁ ପଠାଇଛି ପୋଲିସ ।
ଆସନ୍ତା ୧୭ ତାରିଖରୁ ରାଜ୍ୟରେ ବର୍ଷା ସମ୍ଭାବନା
ଭୁବନେଶ୍ବର: ରାଜ୍ୟରେ ବଦଳିବ ପାଗ। ଆସନ୍ତା ୧୭ ତାରିଖରୁ ବର୍ଷା ସମ୍ଭାବନା ରହିଛି । ଉତ୍ତର ଓଡ଼ିଶା ସମେତ ଆଭ୍ୟନ୍ତରୀଣ ଓଡ଼ିଶାର କିଛି ଜିଲ୍ଲାରେ ହାଲୁକାରୁ ମଧ୍ୟମ ଧରଣର ବର୍ଷା ହେବ ବୋଲି ପୂର୍ବାନୁମାନ କରିଛି ଆଞ୍ଚଳିକ ପାଣିପାଗ କେନ୍ଦ୍ର । ୧୭ ତାରିଖରେ ଝାରସୁଗୁଡା, କେନ୍ଦୁଝର, ମୟୁରଭଞ୍ଜ ଏବଂ ସୁନ୍ଦରଗଡରେ ବର୍ଷା ହେବାର ସମ୍ଭାବନା ରହିଛି । ୧୮ ତାରିଖରେ ଅଧିକାଂଶ ସ୍ଥାନରେ ପାଗ କୋହଲା ରହିବା ସହ ଝାରସୁଗୁଡା, ସମ୍ବଲପୁର, ବରଗଡ, ଦେବଗଡ, ଅନୁଗୁଳ, ଢେଙ୍କାନାଳ, ଭଦ୍ରକ, ବାଲେଶ୍ବର, କେନ୍ଦୁଝର, ମୟୁରଭଞ୍ଜ ଏବଂ ସୁନ୍ଦରଗଡରେ ହାଲୁକାରୁ ମଧ୍ୟମ ଧରଣର ବର୍ଷା ନେଇ ଆକଳନ କରାଯାଇଛି । ଆସନ୍ତା ୧୬ ତାରିଖ ପର୍ଯ୍ୟନ୍ତ ରାଜ୍ୟରେ ପାଗ ମୁଖ୍ୟତଃ ଶୁଖିଲା ରହିବା ସହ କିଛି ଅଞ୍ଚଳରେ ଶୀତ ଅନୁଭୂତ ହେବ । ୧୭ ତାରିଖ ବେଳକୁ ରାଜ୍ୟରେ ପଶ୍ଚିମା ଝଡ ସକ୍ରିୟ ହେବାର ସମ୍ଭାବନା ଥିବାରୁ ବର୍ଷା ହେବ ବୋଲି ପାଣିପାଗ କେନ୍ଦ୍ର କହିଛି ।
ସେପଟେ ଆସନ୍ତା ଦୁଇ ଦିନ ପର୍ଯ୍ୟନ୍ତ ରାଜ୍ୟରେ ହାଲୁକା ଶୀତ ସହ ଘନ କୁହୁଡିର ଆସ୍ତରଣ ଅସ୍ତବ୍ୟସ୍ତ କରିବ । ମେଘମୁକ୍ତ ଆକାଶ ସହ ବାୟୁମଣ୍ଡଳରେ ଜଳୀୟବାଷ୍ପର ପରିମାଣ ଅଧିକ ପରିମାଣର ରହୁଥିବାରୁ ଏଭଳି ପରିସ୍ଥିତି ସୃଷ୍ଟି ହୋଇଛି । ଆସନ୍ତା କାଲି ସକାଳ ପର୍ଯ୍ୟନ୍ତ ଘନ କୁହୁଡି ପାଇଁ ସୁନ୍ଦରଗଡ, କେନ୍ଦୁଝର, ମୟୁରଭଞ୍ଜ, କଟକ, ଖୋର୍ଦ୍ଧା, ପୁରୀ, ନୟାଗଡ, ଗଞ୍ଜାମ, କନ୍ଧମାଳ, କଳହାଣ୍ଡି ଏବଂ କୋରାପୁଟ ଜିଲ୍ଲାକୁ ୟେଲୋ ଆଲର୍ଟ ଜାରି କରାଯାଇଛି । ଏହି ସବୁ ଜିଲ୍ଲାରେ ୫୦ ମିଟରରୁ ୨୦୦ ମିଟର ପର୍ଯ୍ୟନ୍ତ ଦୃଶ୍ୟମାନ ଦୂରତା ରହିବ । ଗତ ୨୪ ଘଣ୍ଟା ମଧ୍ୟରେ କିରେଇରେ ସର୍ବନିମ୍ନ ୭.୩ ଡିଗ୍ରୀ ତାପମାତ୍ରା ରେକର୍ଡ ହୋଇଛି । ସେହିଭଳି ଗୋପାଳପୁର ଏବଂ ଫୁଲବାଣୀରେ ଘନ କୁହୁଡି ଦୃଶ୍ୟମାନ ହୋଇଥିବା ବେଳେ ବାରିପଦା ଏବଂ ଭବାନୀପାଟଣାରେ ହାଲୁକାରୁ ମଧ୍ୟମ ଧରଣର କୁହୁଡି ଅନୁଭୁତ ହୋଇଛି।
ଭାରତ ବନାମ ଆଫଗାନିସ୍ତାନ ଦ୍ବିତୀୟ ଟି-୨୦, ଏହି ରେକର୍ଡ କରିବେ ରୋହିତ
ନନ୍ଦିଘୋଷ ବ୍ୟୁରୋ: ରବିବାର ଆଫଗାନିସ୍ତାନ ବିପକ୍ଷରେ ଦ୍ବିତୀୟ ଟି-୨୦ ଖେଳିବ ଭାରତ । ତେବେ ଏହି ମ୍ୟାଚରେ ନୂଆ ରେକର୍ଡ କରିବାକୁ ଯାଉଛନ୍ତି ଟିମ ଇଣ୍ଡିଆର ଅଧିନାୟକ ରୋହିତ ଶର୍ମା । ବିଶ୍ବର ପ୍ରଥମ ଖେଳାଳିଭାବେ ୧୫୦ ଟି-୨୦ ମ୍ୟାଚ ଖେଳିବେ ହିଟମ୍ୟାନ୍ । ୨୦୦୭ ମସିହାରୁ ନିଜର ଟି-୨୦ କ୍ୟାରିୟର ଆରମ୍ଭ କରିଥିବା ରୋହିତ ଆଜି ନିଜର ୧୫୦ତମ ଟି-୨୦ ମ୍ୟାଚ ଖେଳିବାକୁ ଯାଉଛନ୍ତି । ସେପଟେ ପ୍ରଥମ ଟି-୨୦ ଭାରତ ଜିତିଥିବାବେଳେ ରୋହିତ ହେଉଛନ୍ତି ପ୍ରଥମ ଖେଳାଳି ଯିଏକି, ୧୦୦ ଟି-୨୦ରେ ୧୦୦ ମ୍ୟାଚ ଜିତିବା ଦଳର ଆଂଶ ହୋଇଛନ୍ତି । ପ୍ରଥମ ଟି-୨୦ରେ ରୋହିତ ରନ ଆଉଟ ହୋଇଥିଲେ । ମାତ୍ର ଆଜିର ମ୍ୟାଚରେ ସେ ଦମଦାର ପ୍ରଦର୍ଶନ କରିବେ ବୋଲି କ୍ରିକେଟ ପ୍ରେମୀମାନେ ଆଶା ରଖିଛନ୍ତି ।
ଆନ୍ତର୍ଜାତୀୟ ଟି-୨୦ ମ୍ୟାଚରେ ସର୍ବାଧିକ ସ୍କୋର କରିଥିବା ବ୍ୟାଟ୍ସମ୍ୟାନଙ୍କ ମଧ୍ୟରେ ରୋହିତ ଦ୍ବିତୀୟ ସ୍ଥାନରେ ରହିଛନ୍ତି । ରୋହିତ ୧୮୨ ଛକା ମାରିଥିବାବେଳେ ଚୌକା ମାମଲାରେ ଚତୁର୍ଥ ସ୍ଥାନରେ ରହିଛନ୍ତି । ଟି-୨୦ରେ ରୋହିତ ୪ଟି ଶତକ ମାରିଥିବାବେଳେ ୨୯ଟି ଅର୍ଦ୍ଧଶତକ ହାସଲ କରିଛନ୍ତି ।
ଏହି ଟେନିସ ଖେଳାଳିଙ୍କ ମେସେଜର ରିପ୍ଲାଏ ଦେଇନଥିଲେ ବିରାଟ, କହିଲେ ଡରରେ..
ନନ୍ଦିଘୋଷ ବ୍ୟୁରୋ: ଟିମ ଇଣ୍ଡିଆର ନିର୍ଭରଯୋଗ୍ୟ ବ୍ୟାଟ୍ସମ୍ୟାନ ବିରାଟ କୋହଲିଙ୍କ ଫ୍ୟାନ, ଫଲୋର୍ସ ଭଲ ରହିଛି । କେହାଲିଙ୍କୁ ବିଶ୍ବର ଅନେକ ସେଲିବ୍ରେଟି ମଧ୍ୟ ପସନ୍ଦ କରନ୍ତି । ତେବେ ପ୍ରସିଦ୍ଧ ଟେନିସ ଖେଳାଳି ୨୪ଥର ଗ୍ରାଣ୍ଡ ସ୍ଲାମ ବିଜେତା ନୋବାକ ଜୋକବିଚଙ୍କ ମେସେଜର ରିପ୍ଲାଏ ଦେବାରେ ବିଳମ୍ବ କରିଥିଲେ ବିରାଟ । ଦୀର୍ଘଦିନ ପରେ ଟି-୨୦ ଦଳରେ ସାମିଲ ହୋଇଥିବା କୋହଲି ପ୍ରେସମିଟରେ ଏଭଳି ନୋବାକ ଜୋକବିଚଙ୍କ ସମ୍ପର୍କରେ କହିଛନ୍ତି । ସେମାନଙ୍କ ବନ୍ଧୁତ୍ବ ସମ୍ପର୍କରେ କହିଥିଲେ କୋହଲି । ପ୍ରଥମେ ସେମାନଙ୍କ ବନ୍ଧୁତ୍ବ ଇନଷ୍ଟାଗ୍ରାମରୁ ଆରମ୍ଭ ହୋଇଛି । ପ୍ରଥମେ କୋହଲି ଟେନିସ ତାରକାରଙ୍କ ପ୍ରୋଫାଇଲ ଚେକ୍ କରୁଥିଲେ । ମାତ୍ର ଦେଖିବା ବେଳକୁ ସେ ତାଙ୍କୁ ମେସେଜ କରିଥିବା ବିରାଟ ଦେଖିବାକୁ ପାଇଥିଲେ । ପ୍ରଥମେ ବିରାଟ ଏହାକୁ ବିଶ୍ବାସ କରିନଥିଲେ । ଭାବିଥିଲେ କି, ଏହା ଫେକ୍ ଆଇଡି ହୋଇପାରେ । ମାତ୍ର ପଛରେ ଜାଣିଥିଲେ କି, ଏହା ଜୋକବିଚଙ୍କ ଆକାଉଣ୍ଟ । ଏହାପରେ ଉଭୟଙ୍କ ମଧ୍ୟରେ ବନ୍ଧୁତା ହେବା ସହ ବାର୍ତ୍ତାଳାପ ଆରମ୍ଭ ହୋଇଥିଲା । ବିରାଟ ଏଭଳି କହିଥିବା ଭିଡିଓକୁ ବିସିସିଆଇ ପକ୍ଷରୁ ପୋଷ୍ଟ କରାଯାଇଛି ।
ସୂଚନା ଥାଉକି, ବିରାଟ କୋହଲି ଦୀର୍ଘଦିନ ହେବ ଟି-୨୦ ଖେଳିନଥିଲେ । ମାତ୍ର ଆଗକୁ ଟି-୨୦ ବିଶ୍ବକପ ଆସୁଥିବାବେଳେ କୋହଲି ରବିବାର ଖେଳାଯିବାକୁ ଥିବା ଆଫଗାନିସ୍ତାନ ବିପକ୍ଷ ଦ୍ବିତୀୟ ଟି-୨୦ ଖେଳିବେ । ଏଣୁ ଏଥିରୁ ସ୍ପଷ୍ଟଭାବେ ଜଣାପଡ଼ୁଛି କି, ଟି-୨୦ ବିଶ୍ବକପ ଦଳରେ ସାମିଲ ହୋଇପାରନ୍ତି କୋହଲି ।
ଦଳ ଛାଡ଼ିଲେ କଂଗ୍ରେସ ନେତା ମିଲିନ୍ଦ ଦେଓରା
ନନ୍ଦିଘୋଷ ବ୍ୟୁରୋ: ଦଳ ଛାଡ଼ିଲେ କଂଗ୍ରେସ ନେତା ମିଲିନ୍ଦ ଦେଓରା । କଂଗ୍ରେସ ସହ ଦୀର୍ଘ ଦିନର ସମ୍ପର୍କ ଛିନ୍ନ କରିଛନ୍ତି ପୂର୍ବତନ କେନ୍ଦ୍ରମନ୍ତ୍ରୀ ମୁରଲୀ ଦେଓରାଙ୍କ ପୁଅ । ସେ କହିଛନ୍ତି ଆଜିଠାରୁ କଂଗ୍ରେସ ସହ ତାଙ୍କ ପରିବାରର ଥିବା ୫୫ ବର୍ଷର ସମ୍ପର୍କକୁ ସେ ଛିନ୍ନ କରିବା ସହ ଦଳର ପ୍ରାଥମିକ ସଦସ୍ୟ ପଦରୁ ଇସ୍ତଫା ଦେଉଛନ୍ତି । ମୁମ୍ବାଇ ସାଉଥ ଲୋକସଭା ନିର୍ବାଚନ ମଣ୍ଡଳୀରେ ଲଢିବା ଲାଗି ଆଶାୟୀ ଥିଲେ ମିଲିନ୍ଦ । ତେବେ ଏହି ଆସନ ଶିବସେନା ଉଦ୍ଧବ ଠାକରେ ଗୋଷ୍ଠୀ ଛାଡିବାକୁ ପ୍ରସ୍ତୁତ ନଥିବାରୁ ସେ ଅସନ୍ତୁଷ୍ଟ ଥିଲେ । ସେ ୨୦୦୪ରୁ ୨୦୦୯ ଏବଂ ୨୦୦୯ରୁ ୨୦୧୪ ଯାଏ ମୁମ୍ବାଇ ସାଉଥ ଆସନରୁ ସାଂସଦ ଥିବା ସହ କେନ୍ଦ୍ରମନ୍ତ୍ରୀ ଥିଲେ ।
ଝାଡ଼ଖଣ୍ଡ ମୁଖ୍ୟମନ୍ତ୍ରୀ ହେମନ୍ତ ସୋରେନଙ୍କୁ ଅଷ୍ଟମଥର ଲାଗି ଇଡିର ସମନ
ନନ୍ଦିଘୋଷ ବ୍ୟୁରୋ: ଝାଡ଼ଖଣ୍ଡ ମୁଖ୍ୟମନ୍ତ୍ରୀ ହେମନ୍ତ ସୋରେନଙ୍କ ପିଛା ଛାଡୁନି ପ୍ରବର୍ତ୍ତନ ନିର୍ଦ୍ଦେଶାଳୟ । ଅଷ୍ଟମ ଥର ଲାଗି ଜାରି ହୋଇଛି ସମନ । ଆସନ୍ତା ଜାନୁଆରୀ ୧୬ରୁ ୨୦ ମଧ୍ୟରେ ହାଜର ହେବା ଲାଗି ସମନ ଜାରି କରିଛି ପ୍ରବର୍ତ୍ତନ ନିର୍ଦ୍ଦେଶାଳୟ । ଜାନୁଆରୀ ୧୬ରେ ତଦନ୍ତ ପ୍ରକ୍ରିୟାରେ ସାମିଲ ହେବା ଲାଗି ହେମନ୍ତଙ୍କ ପ୍ରେସ ପରାମର୍ଶଦାତା ଅଭିଷେକ ପ୍ରସାଦଙ୍କୁ ନିର୍ଦ୍ଦେଶ ଦେଇଥିଲା ପ୍ରବର୍ତ୍ତନ ନିର୍ଦ୍ଦେଶାଳୟ । ବେଆଇନ ଅର୍ଥଚାଲାଣ ଓ ବେଆଇନ ଖଣି ମାମଲାରେ ହେମନ୍ତକୁ ବାରମ୍ବାର ସମନ ଜାରି କରିଆସୁଛି ଇଡି । ପୂର୍ବରୁ ଅଭିଷେକଙ୍କ ଘରେ ପ୍ରବର୍ତ୍ତନ ନିର୍ଦ୍ଦେଶାଳୟ ଦିବସବ୍ୟାପୀ ସର୍ଚ୍ଚ ଅପରେସନ କରିଥିଲା । ଦୁର୍ନୀତି ମାମଲାରେ ଅଭିଷେକ ପ୍ରସାଦ ଓ ସାହେବଗଞ୍ଜ ଡେପୁଟି କମିଶନର ରାମ ନିବାସ ଯାଦବଙ୍କ ଘର ସମେତ ୧୨ଟି ସ୍ଥାନରେ ସର୍ଚ୍ଚ ଅପରେସନ କରିଥିଲା ପ୍ରବର୍ତ୍ତନ ନିର୍ଦ୍ଦେଶାଳୟ । ରାମ ନିବାସଙ୍କ ଘରୁ ୭ ଲକ୍ଷରୁ ଅଧିକ ଟଙ୍କା ଓ ୨୧ଟି କାଟ୍ରିଜ ଜବତ କରିଥିଲା ଇଡି । ପୂର୍ବରୁ ଗତ ୨୦୨୩ ଅଗଷ୍ଟ ୧୪, ଅଗଷ୍ଟ ୨୪, ସେପ୍ଟେମ୍ବର ୯, ସେପ୍ଟେମ୍ବର ୨୩, ଅକ୍ଟୋବର ୪, ଡିସେମ୍ବର ୧୨, ଡିସେମ୍ବର ୩୦ରେ ହାଜର ହେବା ଲାଗି ସମନ ଜାରି କରିଥିଲା ଇଡି ।
ପୁତ୍ରହତ୍ୟା ଅଭିଯୋଗ ମାମଲା, ଥାନାରେ ସୂଚନା ସେଠ ଓ ସ୍ବାମୀ ଭେଙ୍କଟରମଣଙ୍କ କଥାକଟାକଟି
ନନ୍ଦିଘୋଷ ବ୍ୟୁରୋ: ପୁତ୍ରହତ୍ୟା ଅଭିଯୋଗ ମାମଲା । ଥାନାରେ ସୂଚନା ସେଠ ଓ ସ୍ବାମୀ ଭେଙ୍କଟରମଣଙ୍କ କଥାକଟାକଟି । ଏହି ଘଟଣା ଲାଗି ସ୍ବାମୀ ଭେଙ୍କଟରମଣ ହିଁ ଦାୟୀ ବୋଲି କହିଛନ୍ତି ଅଭିଯୁକ୍ତା ସୂଚନା । ପୁତ୍ରକୁ ସୂଚନା ହିଁ ହତ୍ୟା କରିଛନ୍ତି ବୋଲି ସ୍ବାମୀ ଭେଙ୍କଟରମଣ କହିଥିବାବେଳେ ଏହାକୁ ଅଗ୍ରାହ୍ୟ କରିଛନ୍ତି ସୂଚନା । ତେଣେ ଯଦି ପୁତ୍ରକୁ ହତ୍ୟା କରାଯାଇନାହିଁ ତେବେ ପୁଅର କିପରି ମୃତ୍ୟୁହେଲା ବୋଲି ପ୍ରଶ୍ନ କରିଛନ୍ତି ଭେଙ୍କଟରମଣ। ଗୋଆର କାଲନଗୁଟ ପୋଲିସ ଷ୍ଟେସନରେ ଉଭୟଙ୍କୁ ଜେରା ବେଳେ ଦୁହେଁ ମୁହାଁମୁହିଁ ହୋଇଛନ୍ତି । ଭେଙ୍କଟରମଣଙ୍କ ୫ ପୃଷ୍ଠାର ବୟାନକୁ ପୋଲିସ ରେକର୍ଡ କରିଛି । ନିଜ ବୟାନରେ ଭେଙ୍କଟରମଣ କହିଛନ୍ତି ତାଙ୍କୁ ସର୍ବଦା ଜଣେ ହିଂସ୍ର ବ୍ୟକ୍ତିଭାବେ ସୂଚନା ବିବେଚନା କରିଥାନ୍ତି । ସେ ପୁଅକୁ ନିଜ ପାଖରେ ରଖିବାକୁ ଚାହୁଁଥିଲେ । ମାତ୍ର ପୁଅକୁ ସାଥୀରେ ନେଇ ସୂଚନା ଘର ଛାଡିଥିଲେ ଏବଂ ଗତବର୍ଷ ବେଙ୍ଗାଳୁରରେ ଛାଡପତ୍ର ଲାଗି ଆବେଦନ କରିଥିଲେ। ଗତ ଜାନୁଆରୀ ୭ରେ ପୁଅକୁ ଦେଖିବା ଲାଗି ଭେଙ୍କଟରମଣ ବେଙ୍ଗାଳୁରୁ ଆସିଥିଲେ । ମାତ୍ର ସେ ପହଞ୍ଚିବାବେଳେ ପୁଅ ସହ ସୂଚନା ଗୋଆ ଚାଲିଯାଇଥିଲେ।
ଭିଜିଲାନ୍ସ ଏସପି ପରିଚୟ ଦେଇ ଠକୁଥିବା ଅଧ୍ୟାପକଙ୍କୁ ବାନ୍ଧିଲା ପୋଲିସ
ଭୁବନେଶ୍ବର: ପୋଲିସ ଜାଲରେ ଠକ ଅଧ୍ୟାପକ । ନିଜକୁ ଭିଜିଲାନ୍ସ ଏସପି ପରିଚୟ ଦେଇ ଠିକାଦାରଙ୍କୁ ଲଗାଇଥିଲେ ୭ ଲକ୍ଷ ୬୦ ହଜାର ଟଙ୍କା ଚୂନ । ପେଶା ଶିକ୍ଷାଦାନ ହୋଇଥିବା ବେଳେ ଅଧ୍ୟାପକଙ୍କ କାମ ଥିଲା ଅନ୍ୟଙ୍କୁ ଚୂନ ଲଗାଇ ସେମାନଙ୍କ ପାଖରୁ ଟଙ୍କା ଲୁଟିବା ।
ଅଭିଯୋଗ ଅନୁସାରେ, ଗତବର୍ଷ ମେ’ ୩୧ ତାରିଖରେ ରାୟଗଡା ଅଞ୍ଚଳର ମନୋଜ କୁମାର ଚୌଧୁରୀ ନାମକ ଜଣେ ଠିକାଦାର ଏହି ଠକେଇ ନେଇ ଅଭିଯୋଗ କରିଥିଲେ । ଏତଲା ଆଧାରରେ ଅଭିଯୁକ୍ତ ମନୋଜ କୁମାର ମାଝୀଙ୍କୁ ଗିରଫ କରିଛି ପୋଲିସ । ଏତଲାକାରୀଙ୍କୁ ଠକ ଭିଜିଲାନ୍ସ ଏସପି ଭାବେ ପରିଚୟ ଦେଇ ଭିଜିଲାନ୍ସ କାର୍ଯ୍ୟାଳୟର କନଷ୍ଟ୍ରକସନ କାମ ହେବ ବୋଲି କହିଥିଲେ । ଠିକାଦାରଙ୍କୁ କାମ ଦେବା ପାଇଁ ୧୦ ଲକ୍ଷ ଟଙ୍କା ମାଗିଥିଲା ଠକ । ଏପରିକି ବିଶ୍ବାସ ଜନ୍ମାଇବା ପାଇଁ କିଛି କାଗଜପତ୍ର ଦେଇଥିଲା ଠକ । ଏହାପରେ ମନୋଜକୁ ପ୍ରଥମେ ଅନଲାଇନରେ ୫ ଲକ୍ଷ ଓ ପରେ ୨ ଲକ୍ଷ ୬୦ ହଜାର ଟଙ୍କା ଦେଇଥିଲେ ଅଭିଯୋଗକାରୀ । ଟଙ୍କା ନେବା ପରେ ଆଉ ଧରାଛୁଆଁ ଦେଇ ନଥିଲା ଅଭିଯୁକ୍ତ । ତଦନ୍ତ ପରେ କେସ ନମ୍ବର ୫୦ ଦଫା ୪୧୯, ୪୨୦, ୪୬୭, ୪୬୮ ଓ ଆଇଟି ଆକ୍ଟରେ ଅଭିଯୁକ୍ତକୁ କୋର୍ଟଚାଲାଣ କରାଯାଇଛି ।
ଅଭିଯୁକ୍ତ ଜଣକ ମୟୂରଭଞ୍ଜ ଉଦଳା ଝାଡେଶ୍ୱରୀ କଲେଜରେ ମନସ୍ତତ୍ତ୍ୱ ବିଭାଗର ଅଧ୍ୟାପକ । ଅଭିଯୁକ୍ତ ନାଁରେ ଟଙ୍କା ଠକେଇ ନେଇ କ୍ରାଇମବ୍ରାଞ୍ଚର ଅର୍ଥନୈତିକ ଅପରାଧ ଶାଖାରେ ୫ଟି ମାମଲା ସହ ଗଞ୍ଜାମ, ପୁରୀ, ମୟୂରଭଞ୍ଜ ଜିଲ୍ଲାର ବିଭିନ୍ନ ଥାନାରେ ମାମଲା ରହିଛି । ମନୋଜ ମାଝୀଠାରୁ ୨ ଲକ୍ଷ ୬୦ ହଜାର ନଗଦ ଟଙ୍କା, ଗୋଟିଏ ମୋବାଇଲ, ୬ଟି ଏଟିଏମ କାର୍ଡ ଜବତ ହୋଇଛି ।
ନିର୍ବାଚନ ପ୍ରସ୍ତୁତି: ଦିବ୍ୟାଙ୍ଗଙ୍କ ପାଇଁ ଅଧିକ ହ୍ବିଲଚେୟାର ମଗାଇଲେ ରାଜ୍ୟ ସରକାର
ଭୁବନେଶ୍ବର: ଜାତୀୟ ନିର୍ବାଚନ କମିଶନଙ୍କ ନିର୍ଦ୍ଦେଶ ଅନୁସାରେ, ଦିବ୍ୟାଙ୍ଗଙ୍କ ପାଇଁ ମଗାଯାଇଛି ଅଧିକ ହ୍ବିଲଚେୟାର । ଯେଉଁଠି ଅଧିକ ଆବଶ୍ୟକ ଅଛି, ସେଠାରେ ଅଧିକ ହ୍ବିଲଚେୟାର ଦିଆଯିବ । ନିର୍ବାଚନ ପାଇଁ ପାଖପାଖି ୩ ଲକ୍ଷରୁ ଅଧିକ ହ୍ବିଲ ଚେୟାର ବ୍ୟବସ୍ଥା କରାଯାଇଛି । ପୂର୍ବରୁ ବୁଥ ପିଛା ଗୋଟେ ହ୍ବିଲଚେୟାର ବ୍ୟବସ୍ଥା କରାଯାଉଥିଲା । ଏବେ ବୁଥ ପିଛା ଦୁଇଟି ହ୍ବିଲଚେୟାର ଯୋଗାଇ ଦିଆଯିବ ବୋଲି କହିଛନ୍ତି ସାମାଜିକ ସୁରକ୍ଷା ଓ ଭିନ୍ନକ୍ଷମ ସଶକ୍ତିକରଣ ମନ୍ତ୍ରୀ ଅଶୋକ ଚନ୍ଦ୍ର ପଣ୍ଡା ।
ଜନଗଣନା ଅନୁସାରେ ଯେଉଁ ଅଞ୍ଚଳରେ ଅଧିକ ଦିବ୍ୟାଙ୍ଗ ଥିବେ, ସେଠାରେ ବୁଥ ପିଛା ୫ଟି ହ୍ବିଲଚେୟାରର ବ୍ୟବସ୍ଥା କରାଯିବ । ଯେହେତୁ ଓଡ଼ିଶାରେ ହ୍ବିଲଚେୟାର ନିର୍ମାଣ କମ୍ପାନୀ ନାହିଁ, ସେଥିପାଇଁ କାନପୁରରେ ଥିବା କେନ୍ଦ୍ର ସରକାରଙ୍କ ଏକ ମାତ୍ର ସ୍ୱୀକୃତି ପ୍ରାପ୍ତ ନିର୍ମାଣକାରୀ ସଂସ୍ଥା ALIMCOକୁ ଆବଶ୍ୟକତା ଅନୁସାରେ ବରାଦ ଦିଆଯାଇଛି । ହ୍ବିଲଚେୟାର ଆବଶ୍ୟକତା ଯେମିତି କମ ନହେବ ସେଥିପାଇଁ ଅତିରିକ୍ତ ୫ ପ୍ରତିଶତ ହ୍ବିଲଚେୟାର ବରାଦ ଦିଆଯାଇଥିବା ମନ୍ତ୍ରୀ କହିଛନ୍ତି ।
ଶିଶୁର ମୁଣ୍ଡ ଧରି ବୁଲୁଥିଲା କୁକୁର, ଜବତ କଲା ପୋଲିସ
ଯାଜପୁର: ଗାଁ ଦାଣ୍ଡରେ ଏକ ଶିଶୁର ମୁଣ୍ଡ ଧରି ବୁଲୁଥିଲା କୁକୁର । ଗାଁ ଲୋକ ଦେଖିବା ପରେ ପଡ଼ିଗଲା ହଇଚଇ । ଘଟଣା ଘଟିଛି ଯାଜପୁର ରୋଡ ଥାନା ଶଙ୍ଖଚିଲା ରାଧାନଗର ଗାଁରେ ।
ଗାଁର ଜଣେ ବ୍ୟକ୍ତିଙ୍କ ଖଳାରୁ ଉଦ୍ଧାର ହେଲା ଶିଶୁର କଟାମୁଣ୍ଡ । କଟା ମୁଣ୍ଡକୁ କୁକୁର ଖାଉଥିବା ଦେଖି ପୋଲିସକୁ ଖବର ଦେଇଥିଲେ ଗ୍ରାମବାସୀ । ଘଟଣାସ୍ଥଳରେ ପୋଲିସ ପହଞ୍ଚି କଟାମୁଣ୍ଡକୁ ଜବତ କରିଛି । ମୃତ ଶିଶୁର ପରିଚୟ ମିଳିନାହିଁ । ପୋଲିସ ଘଟଣାର ତଦନ୍ତ କରୁଛି ।