ମଧ୍ୟପ୍ରଦେଶ: ଜମୁଛି ମଧ୍ୟପ୍ରଦେଶ ନିର୍ବାଚନ ପ୍ରଚାର । ଆସନ୍ତା ୧୭ରେ ମଧ୍ୟପ୍ରଦେଶ ନିର୍ବାଚନ ହେବାକୁ ଯାଉଥିବାବେଳେ କଂଗ୍ରେସ ପକ୍ଷରୁ ହୋଇଛି ଜୋରଦାର ପ୍ରଚାର । ବିଭିନ୍ନ ଅଞ୍ଚଳକୁ ତୋଫାନି ଗସ୍ତ କରିଛନ୍ତି କଂଗ୍ରେସ ନେତା ରାହୁଲ ଗାନ୍ଧୀ । ଭୋପାଳରେ ଗ୍ରାଣ୍ଡ ରୋଡ ସୋ କରିଛନ୍ତି ରାହୁଲ । ସେ କହିଛନ୍ତି ଯେଉଁଠି ବିଜେପି ସରକାର କରିଥାଏ ସେଠାରେ ଦୁର୍ନୀତି ଘଟିଥାଏ । କୋଟିପତିଙ୍କ ସୁରକ୍ଷା କରିଥାଏ ଦଳ । ମଧ୍ୟପ୍ରଦେଶରେ ବିଜେପି ସରକାର ଅମଳରେ ପ୍ରଗତି ଘଟିନାହିଁ । ଜିଏସଟି ଜରିଆରେ କୃଷକଙ୍କୁ ଶୋଷଣ କରାଯାଉଛି । ବେରୋଜଗାରୀ ଶୀର୍ଷ ସ୍ଥାନରେ ପହଞ୍ଚିଛି । କର୍ଣ୍ଣାଟକରେ ବିଜେପିର ସ୍ବପ୍ନ ମଉଳି ଗଲା । ମଧ୍ୟପ୍ରଦେଶରେ କଂଗ୍ରେସ ୧୫୦ ଆସନ ପାଇବ ବୋଲି ଜୋର ଦେଇକହିଛନ୍ତି ରାହୁଲ । ଭ୍ରଷ୍ଟାଚାରରେ ମଧ୍ୟପ୍ରଦେଶ ସରକାର ସମସ୍ତ ରେକର୍ଡ ଭଙ୍ଗ କରିଛନ୍ତି ବୋଲି ସେ କହିଛନ୍ତି ।
ବିଜୟଧାରା ଜାରି ରଖିବ କି ଟିମ୍ ଇଣ୍ଡିଆ?
ମୁମ୍ବାଇ: ୱାଙ୍ଖଡେରେ ଜବରଦସ୍ତ ହେବ ଫାଇଟ୍। ମୁହାଁମୁହିଁ ହେବେ ବିଶ୍ବକପର ଦୁଇ ଶକ୍ତିଶାଳୀ ଟିମ୍ ଭାରତ ଓ ନ୍ୟୁଜିଲାଣ୍ଡ। ଖେଳାଯିବ ପ୍ରଥମ ସେମିଫାଇନାଲ। ଚଳିତ ବିଶ୍ବକପରେ ବିଜୟଧାରା ଜାରି ରଖିଛି ଭାରତ। ଲଗାତର ୯ଟି ଲିଗ୍ ବିଜୟ ସହ ଟିମ ଇଣ୍ଡିଆର ମନୋବଳ ଦୃଢ ରହିଛି । ସମସ୍ତ ପ୍ଲେୟାର ଫର୍ମରେ ଅଛନ୍ତି୍। ବୋଲିଂରେ ଚମକପ୍ରଦ ପ୍ରଦର୍ଶନ ଦଳର ଆତ୍ମବିଶ୍ବାସ ଆହୁରି ବଢାଇଛି । ବ୍ୟାଟ୍ସମ୍ୟାନ୍ ପୂର୍ବରୁ ଏହା ପ୍ରମାଣ କରି ସାରିଛନ୍ତି। ତେବେ ୨୦୧୯ର ଇତିହାସ ଦୋହରାଇବାକୁ ଚାହିଁବେନି ରୋହିତ ଆଣ୍ଡ କୋ। ଏଥର ସେମି ଜିତି ଫାଇନାଲ ହାତେଇବାକୁ ଲକ୍ଷ୍ୟ ରଖିଛି।
ମୁମ୍ବାଇର ୱାଙ୍ଖଡେରେ ଇଣ୍ଡିଆ ଓ ନ୍ୟୁଜିଲାଣ୍ଡ ମଧ୍ୟରେ ପ୍ରଥମ ସେମିଫାଇନାଲ। ବେଶ ଦମଦାର ହେବ ଏହି ମ୍ୟାଚ୍ । ଭାରତ ଏବଂ କିୱି ଦଳ ମଧ୍ୟରେ ଚାଲିବ ହାଇଭୋଲଟେଜ ଟକ୍କର। ମଝିରେ ଆଉ ଗୋଟିଏ ଦିନ । ସେମିରେ ବିଜୟ ନେଇ ଭାରତର ମନୋବଳ ଦୃଢ ରହିଛି । ବିଜୟଧାରା ବଜାୟ ରଖିବାକୁ ଲକ୍ଷ୍ୟ ରହିଛି ଟିମ ଇଣ୍ଡିଆ। ଭାରତ ସେମି ଜିତି ଫାଇନାଲକୁ କବଜା କରିବାକୁ ଲକ୍ଷ୍ୟ ରଖିଛି। ଲିଗ୍ ପର୍ୟ୍ୟାୟରେ ନ୍ୟୁଜିଲାଣ୍ଡକୁ ପରାସ୍ତ କରିଥିବାରୁ ରୋହିତ ବାହିନୀ ମଧ୍ୟରେ ବିଜୟ ନେଇ ଭରି ରହିଛି ଆତ୍ମବିଶ୍ବାସ । ଆଉ ଏହାକୁ ପଡିଆରେ କରି ଦେଖାଇବ ଟିମ ଇଣ୍ଡିଆ।
୨୦୧୯ ବିଶ୍ବକପ ସେମିରେ ନ୍ୟୁଜିଲାଣ୍ଡ ସହ ଭାରତର ସାମ୍ନାସାମ୍ନି ହୋଇଥିଲା । ମାଞ୍ଚେଷ୍ଟରରେ ଖେଳାଯାଇଥିବା ମ୍ୟାଚରେ ୧୮ ରନରେ ହାରିଥିଲା ଭାରତ । ବର୍ଷା ଯୋଗୁଁ ଦୁଇ ଦିନ ଧରି ଖେଳାଯାଇଥିଲା ଏହି ସେମିଫନାଲ। ସେଇ ଇତିହାସର ପୁନରାବୃତ୍ତି କରିବାକୁ ଚାହିଁବନି ଭାରତ। ଏଥର ଭାରତ ପାଖରେ ବଛାବଛା ଖେଳାଳି ରହିଛନ୍ତି । ସ୍ପେଶାଲିଷ୍ଟ ପେସର ଭାରତର ଦମ୍ଭ । ମହମ୍ମଦ ସାମି, ମହମ୍ମଦ ସିରାଜ, ଜସପ୍ରୀତ ବୁମରା ଭଳି ପେସର ବିଶ୍ବର ଯେକୌଣସି ବ୍ୟାଟସମ୍ୟାନର ୱିକେଟ ଦୋହଲାଇବାକୁ ସକ୍ଷମ। କୁଲଦୀପ ଯାଦବ ଏବଂ ରବୀନ୍ଦ୍ର ଜାଡେଜାଙ୍କ ସ୍ପିନ ନ୍ୟୁଜିଲାଣ୍ଡ ପାଇଁ ଘାତକ ସାବ୍ୟସ୍ତ ହୋଇପାରନ୍ତି । ଏହାସହ ଟିମ ଇଣ୍ଡିଆର ଶକ୍ତିଶାଳୀ ମିଡିଲ୍ ଅର୍ଡର ପ୍ରତିପକ୍ଷର ଟାର୍ଗେଟ୍ ପୂରଣ କରିବାକୁ ଦମ୍ଭ ରଖିଛନ୍ତି । କ୍ୟାପଟେନ ରୋହିତ ଶର୍ମାଙ୍କ ସହ ବିରାଟ କୋହଲି, କେ.ଏଲ ରାହୁଲ ଓ ଶ୍ରେୟାସ ଆୟର ଟପ୍ ଫର୍ମରେ ଅଛନ୍ତି ।
ନ୍ୟୁଜିଲାଣ୍ଡ ମଧ୍ୟ ଭଲ ଫର୍ମରେ ରହିଛି । ଦିନିକିଆ ରେକର୍ଡରେ ଭାରତ ଆଗରେ ଥିବାବେଳେ ବିଶ୍ବକପ ରେକର୍ଡରେ କିୱି ଦଳ ଆଗରେ ରହିଛି । ବ୍ୟାଟର ରଚିନ ରବୀନ୍ଦ୍ର ଟପ୍ ଫର୍ମରେ ଅଛନ୍ତି । ୱିଲିମସନ, କନୱେ ଚଳିତ ବିଶ୍ବକପରେ ଦମଦାର ଖେଳ ଦେଖାଇଛନ୍ତି । ସେହିପରି ଟିମ ସାଉଦି, ଲକି ଫର୍ଗୁସନ ଏବଂ ଟ୍ରେଣ୍ଟ ବୋଲ୍ଟ ଯେକୌମସି ସମୟରେ ବୋଲିଂରେ ପଟ୍ଟ ପରିବର୍ତ୍ତନ କରିବାର ଶକ୍ତି ରଖିଛନ୍ତି । କେବେ ବିଶ୍ବକପ ଜିତିନଥିବା ନ୍ୟୁଜିଲାଣ୍ଡ ମଧ୍ୟ ଏଥର ବିଶ୍ବକପ ହାତେଇବାକୁ ଟାର୍ଗେଟ କରିଛି ।
ପୁଣି ୧୦ ହଜାର ଟଙ୍କାର ତଣ୍ଡ ଗଣିବେ ବିଧାୟକ ମହମ୍ମଦ ମୋକିମ୍
କଟକ : ୧୦ ହଜାର ଟଙ୍କାର ତଣ୍ଡ ଦେବେ କଟକ-ବାରବାଟୀ ବିଧାୟକ ମହମ୍ମଦ ମୋକିମ୍ । ୨୦୧୯ ନିର୍ବାଚନୀ ଅନିୟମିତତା ମାମଲାର ଶୁଣାଣି ସମୟରେ ଏହି ନିର୍ଦ୍ଦେଶ ଦେଇଛନ୍ତି ହାଇକୋର୍ଟ । ମୋକିମ୍ ୨୦୧୯ ନିର୍ବାଚନରେ ଅନିୟମିତତା କରିଥିବା ନେଇ ଅଭିଯୋଗ କରି ହାଇକୋର୍ଟରେ ମାମଲା ରୁଜୁ କରିଥିଲେ ବିଜେଡି ପ୍ରାର୍ଥୀ ପୂର୍ବତନ ବିଧାୟକ ଦେବାଶିଷ ସାମନ୍ତରାୟ ।
ସେହି କ୍ରମରେ ଆଜି ମହମ୍ମଦ ମୋକିମଙ୍କ ପକ୍ଷରୁ ତାଙ୍କ ଓକିଲ ଯୁକ୍ତି ଉପସ୍ଥାପନା କରିବା ପାଇଁ ଧାର୍ଯ୍ୟ ହୋଇଥିଲା । ହେଲେ ସ୍ୱାସ୍ଥ୍ୟଗତ ସମସ୍ୟାରୁ ୧୫ଦିନ ସମୟ ମାଗିବାରୁ କୋର୍ଟ ମୋକିମଙ୍କ ଉପରେ ଏହି ଫାଇନ ଲଗାଇଛନ୍ତି । କୋର୍ଟ ତାଙ୍କୁ ୭ଦିନ ସମୟ ଦେବା ସହ ଆସନ୍ତା ୨୦କୁ ମାମଲାର ପରବର୍ତ୍ତୀ ଶୁଣାଣି ପାଇଁ ସମୟ ଧାର୍ଯ୍ୟ କରିଛନ୍ତି | ପୂର୍ବରୁ ମଧ୍ୟ ମହମ୍ମଦ ମୋକିମକୁ ଦୁଇ ଦୁଇଥର ଅର୍ଥ ଦଣ୍ଡରେ ଦଣ୍ଡିତ କରିଛନ୍ତି ହାଇକୋର୍ଟ ।
ଇସ୍ତଫା ଦେଲେ ପାକିସ୍ତାନ ବୋଲିଂ କୋଚ
ଇସଲାମବାଦ: ପାକିସ୍ତାନ ବୋଲିଂ କୋଚ ମର୍ଣ୍ଣି ମର୍କେଲ ଇସ୍ତଫା ଦେଇଛନ୍ତି । ମାତ୍ର ୫ ମାସ ମଧ୍ୟରେ ସେ ଇସ୍ତଫା ଦେଇଛନ୍ତି । ଗତ ଜୁନ ମାସରେ ମର୍କେଲ ବୋଲିଂ କୋଚଭାବେ ଦାୟିତ୍ବ ଗ୍ରହଣ କରିଥିବାବେଳେ ୬ ମାସ ପାଇଁ ଚକ୍ତି କରିଥିଲେ । ଚଳିତ ବିଶ୍ବକପରେ ପାକିସ୍ତାନର ନୈରାଶ୍ୟଜନକ ପ୍ରଦର୍ଶନକୁ ନେଇ ସମାଲୋଚନା କରାଯାଉଛି । କୁହାଯାଉଥିଲା କି, ବାବର ଅଧିନାୟକ ପଦ ଛାଡ଼ିବେ । ମାତ୍ର ଏହା ପୂର୍ବରୁ ବୋଲିଂ କୋଚ୍ ଇସ୍ତଫା ଦେଇଥିବା ପିସିବି ତଥା ପାକିସ୍ତାନ କ୍ରିକେଟ ବୋର୍ଡ ପକ୍ଷରୁ ସୂଚନା ଦିଆଯାଇଛି । ଏବେ ମର୍କେଲଙ୍କ ସ୍ଥାନରେ ପାକିସ୍ତାନର ପୂର୍ବତନ ବୋଲର ଉମର ଗୁଲଙ୍କୁ ବୋଲିଂ କୋଚଭାବେ ନିଯୁକ୍ତ କରାଯାଇଛି ।
ସୂଚନା ଥାଉକି, ଚଳିତ ବିଶ୍ବକପରେ ପାକିସ୍ତାନ ୪ ମ୍ୟାଚ ବିଜୟ ସହ ପଏଣ୍ଟ ଟେବୁଲର ପଞ୍ଚମ ସ୍ଥାନରେ ରହିଛି । ଦଳ ସେମି ରେସରୁ ବାଦ ପଡ଼ିବା ସହ ଲଗାତାରା ପରାଜୟ ଦଳକୁ ସମାଲୋଚନାର ଶିକାର ସଜାଇଥିଲା । ଆଫଗାନିସ୍ତାନ ବିପକ୍ଷ ମ୍ୟାଚରେ ଦଳର ପରାଜୟକୁ ବହୁ କ୍ରିକେଟପ୍ରେମୀ ସହି ପାରିନଥିଲେ । ସେପଟେ ଦକ୍ଷିଣ ଆଫ୍ରିକା ବିପକ୍ଷ ମ୍ୟାଚରେ ଏକ ସଂଘର୍ଷପୂର୍ଣ୍ଣ ମ୍ୟାଚରେ ମଧ୍ୟ ପରାଜୟ ବରଣ କରିବା ସହ ସେମି ରେସରୁ ବାଦ ପଡ଼ିଛି ପାକିସ୍ତାନ । ଦଳର ଖେଳାଳି ସାଙ୍ଗକୁ ଦିଗଜ କ୍ରିକେଟରମାନେ ନିଜର ପରାଜୟକୁ ସହଜରେ ଗ୍ରହଣ କରିପାରୁ ନଥିବାବେଳେ ଭାରତର ବିଜୟକୁ ମଧ୍ୟ ସହିପାରୁନାହାନ୍ତି ।
ହ୍ୱାଟ୍ସଆପ୍ ଚଲାଇବା ପାଇଁ ଦେବାକୁ ପଡିବ ଟଙ୍କା !
ନନ୍ଦିଘୋଷ ବ୍ୟୁରୋ : ଆଉ ମଗଣା ସେବା ଦେବ ନାହିଁ ହ୍ୱାଟ୍ସଆପ୍ । ଏଣିକି ହ୍ୱାଟ୍ସଆପ୍ ଚଲାଇବା ପାଇଁ ଦେବାକୁ ପଡିବ ଟଙ୍କା । ଗତ କିଛି ମାସ ପୂର୍ବରୁ ସୋସିଆଲ ମିଡିଆ ପ୍ଲାଟଫର୍ମରେ ଅନେକ ପ୍ରକାର ପରିବର୍ତ୍ତନ ଦେଖିବାକୁ ମିଳିଥିଲା । ଯେଉଁଥିରେ ପେଡ୍ ସବସ୍କ୍ରିପସନ୍ ମଧ୍ୟ ଅନ୍ତର୍ଭୁକ୍ତ । ଗୋଟିଏ ପଟେ ଏକ୍ସ( ଟ୍ବିଟର) ଏହାର ସେବା ପାଇଁ ଟଙ୍କା ଚାର୍ଜ କରିବାକ ଆରମ୍ଭ କରିଥିବା ବେଳେ ଇନଷ୍ଟାଗ୍ରାମ ବର୍ତ୍ତମାନ ବ୍ଲୁଟିକ୍ ପାଇଁ ଟଙ୍କା ଆଦାୟ କରୁଛି ।
ହେଲେ ୟୁଜର୍ସ ମାନେ ଭାବି ବି ନଥିବେ କି ଏବେ ସେମାନଙ୍କ ପାଇଁ ଆଉ ଏକ ଦୁଃଖଦ ଖବର ଆସିବାକୁ ଯାଉଛି । ବହୁଳ ବ୍ୟବହାର ହେଉଥିବା ଆପ୍ ବା ଚାର୍ଟିଂ ପ୍ଲାଟଫର୍ମ ‘ହ୍ୱାଟ୍ସଆପ୍’ ମଧ୍ୟ ଖୁବ୍ ଶୀଘ୍ର ଏହି ସମାନ ମାର୍ଗ ଆପଣାଇବାକୁ ଯାଉଛି । କୁହାଯାଉଛି କି , ଆଉ କିଛି ଦିନ ପରେ ହ୍ୱାଟ୍ସଆପରେ ସବସ୍କ୍ରିବସନ୍ ପ୍ଲାନ୍ ଆସିବାକୁ ଯାଉଛି, ଯେଉଁରେ ବ୍ୟବହାରକାରୀଙ୍କୁ ଏକ ନିର୍ଦ୍ଦିଷ୍ଟ ଦେୟ ଭରିବାକୁ ପଡିବ ।
ଆପଣଙ୍କୁ କହି ରଖୁଛୁ ଯେ, ନିକଟରେ ହ୍ୱାଟ୍ସଆପ୍ ତରଫରୁ ଏହା ନେଇ ଆଲୋଚନା କରାଯାଇଛି ଏପରି ନିଷ୍ପତି ନିଆଯାଇଛି ବୋଲି ଜଣାପଡିଛି । ଯାହା କି, କମ୍ପାନୀ ଆଉ ବେଶିଦିନ ଯାଏଁ ମାଗଣା ସେବା ଦେବ ନାହିଁ ବରଂ ୟୁଜର୍ସ ମାନଙ୍କ ଠାରୁ ଦେୟ ନେଇ ସେବା ଯୋଗାଇବ ବୋଲି କମ୍ପାନୀ ପକ୍ଷରୁ କୁହାଯାଇଛି । ଏହି କଥା ସବୁ ୟୁଜର୍ସଙ୍କୁ ଚିନ୍ତାରେ ପକାଇବ ଦେବ କାରଣ ଏପରି କେହି ବ୍ୟକ୍ତି ନଥିବେ ଯାହାଙ୍କ ସ୍ମାର୍ଟଫୋନରେ ହ୍ୱାଟ୍ସଆପ୍ ନଥିବ ।
ଯଦି ଏପରି ପ୍ଲାନ୍ ହ୍ୱାଟ୍ସଆପ୍ ପକ୍ଷରୁ ଆରମ୍ଭ ହେବ ତେବେ ମାସିକିଆ ବା ବର୍ଷିକିଆ ସବସ୍କ୍ରିବସନ୍ ପ୍ଲାନ୍ ରହିପାରେ ବୋଲି ଆଲୋଚନା କରାଯାଉଛି । ସୂଚନା ଅନୁଯାୟୀ, ଏହି ଦେୟ ଯୁକ୍ତ ପ୍ଲାନ୍ ଲାଗୁ ହେବା ପାଇଁ କିଛି ମାସ ଅବା ଆସନ୍ତା ବର୍ଷର ପ୍ରଥମ ମାସରୁ ଲାଗୁ ହୋଇପାରେ ।
ଆହୁରି କୁହାଯାଉଛି କି, ଯଦି ଆପଣଙ୍କୁ ହ୍ୱାଟ୍ସଆପରେ ବିଜ୍ଞାପନରୁ ମୁକ୍ତି ପାଇବା ପାଇଁ ଚାହୁଁଛନ୍ତି , ତେବେ ଆପଣଙ୍କୁ ଅଲଗା ଏକ ସବସ୍କ୍ରିବସନ୍ ପ୍ଲାନ୍ କିଣିବାକୁ ପଡିବ । କମ୍ପାନୀ ଅନ୍ୟ କୌଣସି ସେବା ପାଇଁ ଦେୟ ଚାର୍ଜ ନ କଲେ ବି ଆପଣଙ୍କୁ ବିଜ୍ଞାପନ ବିହୀନ ହ୍ୱାଟ୍ସଆପ୍ ଚଲାଇବାକୁ ହେଲେ ଏହି ପ୍ଲାନ୍ ପାଇଁ ଟଙ୍କା ଦେବାକୁ ପଡିପାରେ । ଏହି ପ୍ଲାନ୍ ପ୍ରଥମେ ଆମେରିକା ଏବଂ କାନାଡାରୁ ଆରମ୍ଭ ହେବ ବୋଲି ଅନୁମାନ କରାଯାଉଛି ।
ଏମ୍ସ ଭୁବନେଶ୍ୱର ପକ୍ଷରୁ ରାଜ୍ୟରେ ପ୍ରଥମ ଅଭିନବ “ଟ୍ରାଭେଲ୍ ହେଲଥ୍ କ୍ଲିନିକ୍”ର ଶୁଭାରମ୍ଭ
ଭୁବନେଶ୍ୱର: ନିରାପଦ ଏବଂ ସୁସ୍ଥ ଭ୍ରମଣ ସହିତ ଅର୍ଥନୈତିକ ଅଭିବୃଦ୍ଧିକୁ ସୁରକ୍ଷା ଦେବାରେ ଟ୍ରାଭେଲ ମେଡିସିନର ଭୂମିକା ସମୟର ବଡ଼ ଆହ୍ଵାନ। ତେଣୁ ବିଦେଶ ଯାତ୍ରା କରିଥିବା ସମସ୍ତ ଯାତ୍ରୀଙ୍କ ପାଇଁ ଗୋଟିଏ ସ୍ଥାନରେ ପୂର୍ଣ୍ଣାଙ୍ଗ ସୂଚନା ଉପଲବ୍ଧ ହେବା ନିହାତି ଜରୁରୀ। ଏହାକୁ ଦୃଷ୍ଟିରେ ରଖି ଆଜି ଏମ୍ସ ଭୁବନେଶ୍ୱର ପକ୍ଷରୁ ରାଜ୍ୟର ପ୍ରଥମ ଅଭିନବ “ଟ୍ରାଭେଲ୍ ହେଲଥ୍ କ୍ଲିନିକ୍”ର ଶୁଭାରମ୍ଭ ହୋଇଯାଇଛି। ବିଦେଶ ଯାତ୍ରୀଙ୍କ ପାଇଁ ସମସ୍ତ ସୂଚନା ସହିତ ପୂର୍ଣ୍ଣାଙ୍ଗ ସେବା ଯୋଗାଇବାରେ ଦେଶରେ ଅନନ୍ୟ ସ୍ବାସ୍ଥ୍ୟ ଅନୁଷ୍ଠାନ ପାଲଟିଥିବା ପ୍ରକାଶ କରିଛନ୍ତି ଏମ୍ସ ଭୁବନେଶ୍ଵର କାର୍ଯ୍ୟନିର୍ବାହୀ ନିର୍ଦ୍ଦେଶକ ଡ. ଆଶୁତୋଷ ବିଶ୍ଵାସ।
ଏମ୍ସ ଭୁବନେଶ୍ଵର କମ୍ୟୁନିଟି ମେଡିସିନ ଏବଂ ଫ୍ୟାମିଲି ମେଡିସିନ୍ ବିଭାଗ ପକ୍ଷରୁ ଆରମ୍ଭ ହୋଇଥିବା ଏହି ଟ୍ରାଭେଲ୍ ହେଲଥ୍ କ୍ଲିନିକ୍ ସପ୍ତାହର ପ୍ରତି ସୋମବାର ଏବଂ ଗୁରୁବାର ଅପରାହ୍ନ ଦୁଇରୁ ଚାରିଟା ପର୍ଯ୍ୟନ୍ତ କାମ କରିବ। ବାହାର ଦେଶରେ ଥିବା ବିଭିନ୍ନ ସଂକ୍ରାମକ ରୋଗ ସହିତ ଅନ୍ୟାନ୍ୟ ସମସ୍ତ ସ୍ବାସ୍ଥ୍ୟ ସମ୍ବନ୍ଧୀୟ ସୂଚନା ନିମନ୍ତେ ଏହି ବ୍ୟବସ୍ଥାର ସହଯୋଗ ନେବାକୁ ଡ. ବିଶ୍ଵାସ ସମସ୍ତଙ୍କୁ ପରାମର୍ଶ ଦେଇଛନ୍ତି। ବିଶେଷ କରି ଜୀବିକା ଅନ୍ୱେଷଣରେ ବାହାର ଦେଶକୁ ଯାଉଥିବା ବ୍ୟକ୍ତିଙ୍କ ପାଇଁ ଏହି କ୍ଲିନିକ୍ ବେଶ ସହାୟକ ହେବବୋଲି ଡ. ବିଶ୍ଵାସ ଆଶାବ୍ୟକ୍ତ କରିଛନ୍ତି।
ଆଜିର ଉଦ୍ଘାଟନୀ ସମାରୋହରେ ଏମ୍ସ ଭୁବନେଶ୍ଵର କାର୍ଯ୍ୟନିର୍ବାହୀ ନିର୍ଦ୍ଦେଶକ ତଥା ସିଇଓ ଡ. ଆଶୁତୋଷ ବିଶ୍ଵାସଙ୍କ ସମେତ ମେଡିକାଲ୍ ଅଧୀକ୍ଷକ ଡ. ଦିଲୀପ କୁମାର ପରିଡ଼ା, ରାଜ୍ୟ ପରିବାର କଲ୍ୟାଣ ନିର୍ଦ୍ଦେଶକ ଡ. ବିଜୟ କୁମାର ପାଣିଗ୍ରାହି, ଭାରତ ସରକାରଙ୍କ ବରିଷ୍ଠ ଆଞ୍ଚଳିକ ନିର୍ଦ୍ଦେଶିକା ଡ. ସୁଚିତ୍ରା ସାସମଲ୍, ରାଜ୍ୟ ଟୀକାକରଣ ଅଧିକାରୀ ଡ. ତାପସ ପାତ୍ର, ଭୁବନେଶ୍ଵର ବିମାନବନ୍ଦର ଜନସ୍ୱାସ୍ଥ୍ୟ ଅଧିକାରୀ ଡ. ବିଶ୍ୱରଂଜନ ଦାଶ, କମ୍ୟୁନିଟି ଏବଂ ଫ୍ୟାମିଲି ମେଡିସିନ୍ ବିଭାଗ ମୁଖ୍ୟ ଡ. ସୋନୁ ହାଙ୍ଗମା ସୁବା ପ୍ରମୁଖ ଉପସ୍ଥିତ ଥିଲେ।
ଏହି ସ୍ଵତନ୍ତ୍ର କ୍ଲିନିକ୍ ସପ୍ତାହରେ ଦୁଇଥର ଚାଲିବ ଏବଂ ଆସୁଥିବା ଯାତ୍ରୀମାନଙ୍କୁ ୟେଲୋ ଫିଭର ଟିକା ଭଳି କେତେକ ଦେଶ ଆବଶ୍ୟକ କରୁଥିବା ନିର୍ଦ୍ଦିଷ୍ଟ ଟିକା ସହିତ ଅତ୍ୟାବଶ୍ୟକ ଟୀକାକରଣ ସେବା, ଯାତ୍ରା ସମୟରେ ସୁସ୍ଥ ଆଚରଣ ବିଷୟରେ ପରାମର୍ଶ, ଜରୁରୀକାଳୀନ ପରିସ୍ଥିତିରେ ବ୍ୟବହାର ପାଇଁ କଷ୍ଟୋମାଇଜଡ୍ ମେଡିକାଲ୍ କିଟ୍ ଏବଂ ଅନ୍ୟାନ୍ୟ ପରାମର୍ଶ ଯୋଗାଇଦେବ। ଏମ୍ସ ସିଏମ୍ଏଫ୍ଏମ ବିଭାଗରେ ବାର୍ଷିକ ପ୍ରାୟ ୩୫୦୦ ହିତାଧିକାରୀ ହଳଦିଆ ଜ୍ୱର ଟିକା ନେଉଛନ୍ତି। ଅଜ୍ଞାତ ଯାତ୍ରୀଙ୍କ ମାଧ୍ୟମରେ ‘ବିଦେଶୀ’ ସଂକ୍ରାମକ ଏଜେଣ୍ଟଙ୍କ ପରିଚୟକୁ ରୋକିବା ପାଇଁ ଓଡ଼ିଶା ପ୍ରବେଶର ଦୁଇଟି ପଏଣ୍ଟ ଯଥା ବିଜୁ ପଟ୍ଟନାୟକ ଅନ୍ତର୍ଜାତୀୟ ବିମାନବନ୍ଦର, ଭୁବନେଶ୍ୱର ଏବଂ ପାରାଦୀପ ବନ୍ଦର ଉପରେ ନଜର ରଖିବାର ଗୁରୁତ୍ୱ ଉପରେ ଅତିଥିମାନେ ଗୁରୁତ୍ଵ ପ୍ରଦାନ କରିଥିଲେ।
ମିଶନ ଶକ୍ତି ଦେଇଛି ନୂଆ ପରିଚୟ, ବିଦେଶ ଯିବେ ମହିଳା
ଝାରସୁଗୁଡ଼ା: ମିଶନ ଶକ୍ତି ଦେଇଛି ମହିଳାଙ୍କୁ ନୂତନ ପରିଚୟ। ହାଣ୍ଡିଶାଳରୁ ଏବେ ମହିଳା ମାନେ ଯିବେ ବିଦେଶ । ସେଠାରେ ନିଜ ଦକ୍ଷତା, ଜ୍ଞାନ କୌଶଳକୁ ଅତ୍ୟାଧୁନିକ କରିବା ପରେ ଓଡିଶା ଆସି ନିଜର କରିବେ ବ୍ୟବହାର । ଆହୁରି ଅଧିକ ସଶକ୍ତ ହେବେ ମହିଳା ଆଗେଇବ ସମାଜ। ଏସଏଚଜି ମହିଳାମାନେ ଦ୍ବିତୀୟ ପର୍ଯ୍ୟାୟରେ ଭୁବନେଶ୍ୱରରୁ ଦୁବାଇ ଯିବାର କାର୍ଯ୍ୟକ୍ରମ ଥିବା ବେଳେ ଝାରସୁଗୁଡ଼ାରୁ ଦୁବାଇକୁ ଯିବା ପାଇଁ ମନୋନୀତ ହୋଇଛନ୍ତି କୋଲାବିରାର ବିନୋଦିନି ପଟେଲ। ଦୁବାଇ ଯାଇ ସେଠାରେ ଏସଏଚଜି ମହିଳା ମାନେ ଉତ୍ପାଦନ କରୁଥିବା ଉତ୍ପାଦିତ ଦ୍ରବ୍ୟର ବାବଦରେ ବୁଝାଇବା ସହ ପ୍ରସାର ପ୍ରଚାର କରିବେ ।
ଏପରିକି ଉତ୍ପାଦିତ ଦ୍ରବ୍ୟ ଏବଂ ଉଦ୍ୟୋଗ କୁ କିଭଳି ଆହୁରି ଅତ୍ୟାଧୁନିକ ତଥା ବିକଶିତ କରା ଯାଇପାରିବ ସେନେଇ ଜ୍ଞାନ ଆହରଣ କରିବେ ବୋଲି ବିନୋଦିନି ଜଣେଇଛନ୍ତି। ହାଣ୍ଡିଶାଳରେ ଜୀବନ ବିତାଉଥିବା ମହିଳାଙ୍କୁ ଏସଏଚଜି ମାଧ୍ୟମରେ ମିଶନ ଶକ୍ତି ନୂତନ ପରିଚୟ ଦେଇଥିବାରୁ ମୁଖ୍ୟମନ୍ତ୍ରୀ, 5ଟି ଅଧ୍ୟକ୍ଷ ଏବଂ ମିଶନ ଶକ୍ତି ସଚିବଙ୍କୁ ଧନ୍ୟବାଦ ଜଣାଇଛନ୍ତି ବିନୋଦିନି। ଆଜି ବିନୋଦିନି ଙ୍କୁ ଜିଲ୍ଲା ପ୍ରଶାସନ ତରଫରୁ ସମ୍ବର୍ଦ୍ଧନା ଦିଆ ଯାଇଥିଲା। ଦ୍ୱିତୀୟ ପର୍ଯ୍ୟାୟ ବିଦେଶ ଯାତ୍ରାରେ ସମଗ୍ର ରଜ୍ୟରୁ ୩୬ଜଣ ମହିଳାଙ୍କୁ ମନୋନୀତ କରାଯାଇଛି ।
ବୀର ଗୋବିନ୍ଦପୁର ମା’ ଦକ୍ଷିଣ କାଳୀଙ୍କ ପୀଠରେ ଦର୍ଶନ ପାଇଁ ଜମୁଛି ଭକ୍ତଙ୍କ ଭିଡ଼
ପୁରୀ: କାଳୀ ପୂଜା ପାଇଁ ଚଳ ଚଞ୍ଚଳ ମା ଦକ୍ଷିଣ କାଳୀଙ୍କ ପୀଠ। ରାଜରାଜେଶ୍ଵରୀ ବେଶରେ ଦର୍ଶନ ଦେଲେ ମା । ମାଙ୍କର ଦର୍ଶନ କରି କରୁଣା ଲାଭ କରିବା ପାଇଁ ବୀର ଗୋବିନ୍ଦପୁର ଗାଁରେ ହଜାର ହଜାର ଭକ୍ତଙ୍କର ଭିଡ ଜମିଛି। ରୀତିନୀତିରେ ମାଙ୍କ ଠାରେ ଦୁଇ ଗୋଟି ଛାଗ ବଳି ପଡିଥିବା ବେଳେ ମାଙ୍କର ଦର୍ଶନ ଲାଗି ରାଜ୍ୟ ତଥା ରାଜ୍ୟ ବାହାରୁ ଭକ୍ତଙ୍କର ସୁଅ ଛୁଟିଛି ।
ଧରାପୃଷ୍ଠରେ ଚାଲିଛି ମାଆ କାଳୀଙ୍କ ଆରାଧନା । ମନ୍ତ୍ରୋ ଉଚ୍ଚାରଣରେ ସୃଷ୍ଟି ହୋଇଛି ଆଧ୍ୟାତ୍ମିକ ପରିବେଶ । ରୀତିନୀତିରେ ଚାଲିଛି ମାଆଙ୍କ ନୀତିକାନ୍ତି । ପୂଜାର୍ଚ୍ଚନା ପାଇଁ ଚଳଚଞ୍ଚଳ ହୋଇ ଉଠିଛି ପୁରୀ ଜିଲ୍ଲା ବୀରଗୋବିନ୍ଦପୁର ମାଆ ଦକ୍ଷିଣକାଳୀଙ୍କ ପୀଠ। ବହୁ ପୁରାତନ କାଳରୁ ମାଆ ଏଠାରେ ପୂଜା ପାଇ ଆସୁଛନ୍ତି । ରବିବାର ରାତି ୧୧ ଟା ପରେ ମାଙ୍କର ଗୁପ୍ତ ପୂଜା ପାଇଁ ମାଙ୍କ ପୋଖରୀରୁ ଗୋଟି କଳସରେ ଜଳ ଅଣାଯିବାପରେ ମାଙ୍କୁ ସ୍ନାନ କରାଯାଇଥିଲା ।
ଏହାପରେ ପୂଜକ ଯନ୍ତ୍ର କାଟି ରୀତିନୀତିନୁସାରେ ପୂଜା କରିଥିଲେ। ସୋମବାର ସକାଳୁ ମାଆ ରାଜରାଜେଶ୍ଵରୀ ବେଶରେ ଶ୍ରଦ୍ଧାଳୁଙ୍କୁ ଦର୍ଶନ ଦେଉଛନ୍ତି । ସେପଟେ ରୀତିନୀତି ଅନୁସାରେ ମାଙ୍କ ପୂଜା କରାଯିବା ପରେ ରାତିରେ ମାଙ୍କୁ ବିସର୍ଜନ କରାଯିବ ବୋଲି ସେବାୟତ କହିଛନ୍ତି। ମାଙ୍କୁ ଦର୍ଶନ କରିବା ଲାଗି ଏଠାରେ ଶ୍ରଦ୍ଧାଳୁଙ୍କର ପ୍ରବଳ ଭିଡ ଜମିଛି । ମାନସିକ ବଳି ଉପରେ ରୋକ୍ ଲଗାଯାଇଥିଲେ ବି ମାଙ୍କ କରୁଣା ଲାଭ ପାଇଁ ଭକ୍ତ ମାନଙ୍କ ଭିଡ଼ ଜମିଛି ପୀଠରେ । ସେପଟେ ଜନସମାଗମକୁ ଦୁଷ୍ଟିରେ ରଖି ଜିଲ୍ଲା ପୋଲିସ ପକ୍ଷରୁ ବ୍ୟାପକ ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି ।
ଦୃଢ଼ ଇଛାଶକ୍ତି ସାଙ୍ଗକୁ ମିଶନଶକ୍ତିର ସହାୟତା ପାଇଁ ଦିନ ମଜୁରିଆରୁ ଏବେ ସଫଳ ବ୍ୟବସାୟୀ
ଗୁଣୁପୁର: ଦିନେ ପେଟ ପାଟଣା ପାଇଁ ପର ଘରେ ମୂଲ ଲାଗିବାକୁ ପଡୁଥିଲା। ବର୍ତମାନ କିନ୍ତୁ ସମୟ ସ୍ରୋତରେ ସବୁ କିଛି ବଦଳି ଯାଇଛି। ଯିଏ ବଂଚିବା ପାଇଁ କାମ ଖୋଜୁଥିଲା ଆଜି ସେହି ମହିଳାମାନେ ଛେଳି ଚାଷ କରି ବାର୍ଷିକ ଲକ୍ଷାଧିକ ଟଙ୍କା ରୋଜଗାର କରିପାରୁଛନ୍ତି । ଦୃଢ ଇଚ୍ଛା ଶକ୍ତି ଓ ମିଶନ ଶକ୍ତିର ସହାୟତାରେ ଆଜି ଏହି ମହିଳାମାନେ ସ୍ବାବଲମ୍ବି ହୋଇପାରିଛନ୍ତି ।
ଦିନେ ଦିନ ମଜୁରିଆ ଥିଲେ । ଆଜି ସଫଳ ବ୍ୟବସାୟୀ । ଦିନେ ପେଟପାଟଣ ପାଇଁ ଅନ୍ୟର ହାତକୁ ଚାହିଁ ବସୁଥିଲେ । ଆଜି ନିଜେ ସ୍ବାବଲମ୍ବୀ । ଉପାନ୍ତ ଇଲାକାର ମହିଳାଙ୍କ ପାଇଁ ଆଜି ସାହା ହୋଇଛି ମିଶନ ଶକ୍ତି । ରାୟଗଡା ଜିଲ୍ଲା ଗୁଣୁପୁର ବ୍ଲକ ମାନ୍ଦାଗୁଡା ଗାଁର ମହିଳାଙ୍କ ଜୀବନ ଧାରଣାରେ ଆସିଛି ସୁଧାର।ଦିନ ମଜୁରିଆ ଭାବେ ଜୀବନ ବିତାଉଥିବା ମହିଳାମାନେ ଏବେ ସ୍ବୟଂ ସହାୟକ ଗୋଷ୍ଠୀ ଗଠନ କରି ନୂଆଁ ନୂଆଁ ଚାଷକୁ ଆପଣାଇଛନ୍ତି ।
୨୦୧୮ ମସିହାରେ ଗାଁର ୨୦ ଜଣ ମହିଳା ଏକାଠି ହୋଇ ଆରମ୍ଭ କରିଛନ୍ତି “ ମା ସମଲେଶ୍ବରୀ ଓ ମହାମୟୀ “ ନାମକ ଦୁଇଟି ସ୍ବୟଂ ସହାୟକ ଗୋଷ୍ଠୀ” । ମିଶନ ଶକ୍ତି ମାଧ୍ୟମରେ ବ୍ୟାଙ୍କରୁ ୩ ଲକ୍ଷ ଟଙ୍କା ଲୋନ ଆଣି ଏସଏଚଜି ମହିଳା ମାନେ ଆରମ୍ଭ କରିଛନ୍ତି ଛେଳି ଚାଷ । ପ୍ରାଣୀ ସମ୍ପଦ ବିଭାଗ ଓ ମିଶନ ଶକ୍ତି ଆନୁକୂଲ୍ୟରେ ପ୍ରତି ଗୃପ ପିଛା ୩୨ ଗୋଟି ଛେଳି ପ୍ରଦାନ କରାଯାଇଛି। ବର୍ତମାନ ଉଭୟ ଗୋଷ୍ଠୀ ସଦସ୍ୟାଙ୍କ ନିକଟରେ 90ରୁ ଅଧିକ ଛେଳି ରହିଛି । ପ୍ରତିବର୍ଷ ଏହି ମହିଳାମାନେ ବାର୍ଷିକ ଲକ୍ଷାଧିକ ଟଙ୍କା ରୋଜଗାର କରିପାରୁଛନ୍ତି ।
ପୂର୍ବରୁ ଏହି ଉପାନ୍ତ ଅଂଚଳର ମହିଳା ମାନେ ଦିନ ମଜୁରିଆ ଭାବେ ନିଜର ଭରଣ ପୋଷଣ କରୁଥିଲେ। କିନ୍ତୁ ଗୃପ ଗଠନ ପରେ ଏଠାକାର ସ୍ଵୟଂ ସହାୟକ ଗୋଷ୍ଠୀର ମହିଳା ମାନେ ଛେଳି ଚାଷ କରି ସ୍ଵାବଲମ୍ବୀ ହୋଇପାରିଛନ୍ତି । ଆଗାମୀ ଦିନରେ ଏହି ଛେଳି ସବୁ ବିକ୍ରି ବଟା କରି ଲାଭବାନ ହେବାର ଲକ୍ଷ୍ୟ ରଖିଛନ୍ତି। ଏମାନଙ୍କୁ ମିଶନ ଶକ୍ତି ମାଧ୍ୟମରେ ସରକାରଙ୍କ ବିଭିନ୍ନ ଯୋଜନାରେ ସାମିଲ କରାଯାଇ ଆର୍ଥିକ ସ୍ଥିତିରେ ସୁଧାର ଅଣାଯାଇ ପାରୁଛି ।
ଉତ୍ତରକାଶୀରେ ଟନେଲରେ ଫସିଥିବା ଓଡ଼ିଆ ଶ୍ରମିକ ସୁରକ୍ଷିତ
ବ୍ୟୁରୋ ରିପୋର୍ଟ: ଉତ୍ତରକାଶୀରେ ଓଡ଼ିଆ ଶ୍ରମିକ ଟନେଲରେ ଫସିବା ଘଟଣାରେ ମିଳିଛି ଆଶ୍ବସ୍ତିକର ଖବର । ଟନେଲରେ ଫସିଥିବା ଶ୍ରମିକ ମାନଙ୍କୁ ଉଦ୍ଧାର କରାଯିବା ନେଇ ଦିନିରାତି ଏକ କରିଦେଇଛନ୍ତି NDRF,SDRF ଓ ଟନେଲ ବିଶେଷଜ୍ଞ ଟିମ୍ । ଏ ସଂପର୍କରେ ନନ୍ଦିଘୋଷ ଟିଭିକୁ ସୂଚନା ଦେଲେ ଉତ୍ତରକାଶୀ କଣ୍ଟ୍ରୋଲରୁମ ଅଧିକାରୀ । ଫସିଥିବା ସମସ୍ତ ଶ୍ରମିକ ସୁରକ୍ଷିତ ଅଛନ୍ତି । ଟନେଲ ଭିତରକୁ ଖାଦ୍ୟ ଓ ଅମ୍ଲଜାନ ଦିଆଯାଉଛି । ଫସିଥିବା ଶ୍ରମିକଙ୍କ ସ୍ବାସ୍ଥ୍ୟ ମଧ୍ୟ ଠିକ୍ ରହିଛି । ଉଦ୍ଧାର କାର୍ଯ୍ୟରେ ପ୍ରତିକୂଳ ପାଗ ବାଧା ସୃଷ୍ଟି କରୁଛି ଖୁବଶୀଘ୍ର ସମସ୍ତ ଶ୍ରମିକ ଉଦ୍ଧାର ହେବେ ବୋଲି ସେ କହିଛନ୍ତି । ଉତ୍ତରକାଶୀ ଅତିରିକ୍ତ ଜିଲ୍ଲାପାଳ ତିରଥପାଲ୍ ସିଂ ନନ୍ଦିଘୋଷ ଟିଭିକୁ ସୂଚନା ଦେଇ କହିଛନ୍ତି ଯେ, ଟନେଲ ଭିତରୁ ଉଦ୍ଧାର କାର୍ଯ୍ୟ ଜାରିରହିଛି । ଆଜି ରାତି କିମ୍ବା କାଲି ସୁଦ୍ଧା ଉଦ୍ଧାର ହୋଇପାରନ୍ତି ଫସିଥିବା ଶ୍ରମିକ । ସମସ୍ତ ୪୦ଶ୍ରମିକଙ୍କ ଅବସ୍ଥା ଭଲ ଅଛି । ଦୁର୍ଘଟଣା ସ୍ଥଳରୁ ମାଟି ଓ ଭଗ୍ନାବଶେଷ ଉଠାଯାଉଛି, ଯାହାକ ସନ୍ଧ୍ୟା ସୁଦ୍ଧା ଶେଷ ହେବ । ଏହାପରେ ଫସିଥିବା ୪୦ଶ୍ରମିକଙ୍କୁ ଉଦ୍ଧାର କରାଯିବ ବୋଲି ଏଡିଏମ କହିଛନ୍ତି।