ନନ୍ଦିଘୋଷ ବ୍ୟୁରୋ : ଜ୍ଞାନବାପି ମସଜିଦ ମାମଲାରେ ଆଜି ଆସିବ ରାୟ। ମାମଲାର ଶୁଣାଣି କରିବେ ଆହ୍ଲାବାଦ ହାଇକୋର୍ଟ। ଜ୍ଞାନବାପି ମସଜିଦ ଭିତରେ ହିନ୍ଦୁମାନଙ୍କୁ ପ୍ରାର୍ଥନା କରିବା ଲାଗି ବାରାଣସୀ କୋର୍ଟ ଯେଉଁ ଅନୁମତି ଦେଇଥିଲେ ତାହା ଉପରେ ରହିତାଦେଶ ଦେବାକୁ ଅଗ୍ରାହ୍ଯ କରିଦେଇଥିଲେ ହାଇକୋର୍ଟ। ବାରାଣସୀ କୋର୍ଟର ରାୟ ବିରୋଧରେ ଆହ୍ଲାବାଦ ହାଇକୋର୍ଟଙ୍କ ଦ୍ବାରସ୍ଥ ହୋଇଥିଲା ଅଞ୍ଜୁମାନ ଇନ୍ତଜାମିଆ ମସଜିଦ କମିଟି।
ଏହି ମାମଲାର ଶୁଣାଣି କରିବାକୁ ପୂର୍ବରୁ ସୁପ୍ରିମକୋର୍ଟ ଅଗ୍ରାହ୍ଯ କରିଦେଇଥିଲେ। ଗତ ୨୦୨୩ ଜାନୁଆରୀ ୩୧ରେ ଜ୍ଞାନବାପି ମସଜିଦରେ ଜଣେ ପୂଜକଙ୍କୁ ପୂଜା କରିବା ଲାଗି ଅନୁମତି ଦେଇଥିଲେ କୋର୍ଟ।
ରାଉରକେଲା : ଆଜି ଓଡ଼ିଶା ପ୍ରବେଶ କରିବ କଂଗ୍ରେସର ଭାରତ ଯୋଡ଼ ନ୍ୟାୟଯାତ୍ରା। ଝାଡ଼ଖଣ୍ଡର ବାସଜୋଲ ପରେ ସୁନ୍ଦରଗଡ଼ ବୀରମିତ୍ରପୁରରେ ଏହି ଅଭିଯାନ ପହଞ୍ଚିବ। ବୀରମିତ୍ରପୁରର ବିଜାବାହାଲରେ ଅଭିଯାତ୍ରୀ କରିବେ ରାତ୍ରୀଯାପନ। ଆସନ୍ତାକାଲି ସକାଳେ ରାଉରକେଲା ଉଦିତ ନଗରରୁ ଆରମ୍ଭ ହେବ ପଦଯାତ୍ରା। ସକାଳ ୧୦ଟାରେ ପାନପୋଷରେ ସାଧାରଣ ସଭା ହେବ। ଅପରାହ୍ଣ ୨ଟାରେ ରାଜଗାଙ୍ଗପୁର ରାଣୀବନ୍ଧରେ ସାଧାରଣ ସଭା ହେବା ପରେ କୁତ୍ରା ଓ ବରଗାଁ ଯିବ। ଅପରାହ୍ଣ ସାଢେ ୪ଟାରେ ବସଷ୍ଟାଣ୍ଡ ଛକରୁ ପଦଯାତ୍ରା ଆରମ୍ଭ ହୋଇ ଷ୍ଟେଟବ୍ଯାଙ୍କ ଛକ ଯିବ। ସେଠାରେ ସାଧାରଣ ସଭା କାର୍ଯ୍ଯକ୍ରମ ରହିଛି। ଆସନ୍ତା ୮ ତାରିଖରେ ଝାରସୁଗୁଡାରେ ସାଧାରଣ ସଭା କାର୍ଯ୍ୟକ୍ରମ ରହିଛି।
ଗତ ଜାନୁଆରୀ ୧୪ ତାରିଖରେ ମଣିପୁରର ଥୋବୁଲ ଜିଲ୍ଲା ଖୋନଗଜୋମରୁ ଆରମ୍ଭ ହୋଇଥିବା ଯାତ୍ରା ମାର୍ଚ୍ଚ ୨୦ରେ ମୁମ୍ବାଇରେ ଶେଷ ହେବ । ଯାତ୍ରା ଚାଲିବ ୬୬ ଦିନ । ୧୫ ରାଜ୍ୟର ୧୧୦ ଜିଲ୍ଲା, ୧୦୦ ଲୋକସଭା ଓ ୩୩୭ ବିଧାନ ସଭା କ୍ଷେତ୍ର ଦେଇ ପ୍ରାୟ ୬ ହଜାର ୭୦୦ କିଲୋମିଟର ଅତିକ୍ରମ କରିବ ।
ଉତ୍ତରାଖଣ୍ଡ : ଆଜି ଉତ୍ତରାଖଣ୍ଡ ବିଧାନସଭାରେ ଆଗତ ହେବ ଏକକ ନାଗରିକ ସଂହିତା ବା ୟୁସିସି ବିଲ୍ । ଗତ ରବିବାର ୟୁସିସି ରିପୋର୍ଟକୁ ରାଜ୍ୟ କ୍ୟାବିନେଟ ମଞ୍ଜୁରୀ ଦେଇଥିଲା । ଅବସରପ୍ରାପ୍ତ ସୁପ୍ରିମକୋର୍ଟ ବିଚାରପତି ରଞ୍ଜନା ପ୍ରକାଶ ଦେଶାଇଙ୍କ ନେତୃତ୍ବରେ ଗଠିତ ପାଞ୍ଚ ଜଣିଆ ୟୁସିସି ଡ୍ରାଫ୍ଟିଂ କମିଟି ପକ୍ଷରୁ ଏହି ଚିଠା ମୁଖ୍ୟମନ୍ତ୍ରୀ ପୁଷ୍କର ସିଂ ଧାମିଙ୍କ ନିକଟରେ ଦାଖଲ କରାଯାଇଥିଲା । ରାଜ୍ୟରେ ଗୋଟିଏ ପ୍ରକାର ସିଭିଲ ଆଇନ କାର୍ଯ୍ୟକାରୀ କରିବା ଲାଗି ୟୁସିସି କମିଟି ରିପୋର୍ଟରେ ଦର୍ଶାଇଛି । ଯଦି ବିଧାନସଭାରେ ଏହା ଗୃହୀତ ହୁଏ ତେବେ ୟୁସିସି କାର୍ଯ୍ୟକାରୀ କରିବା କ୍ଷେତ୍ରରେ ଉତ୍ତରାଖଣ୍ଡ ହେବ ଦେଶର ପ୍ରଥମ ରାଜ୍ୟ । ଏନେଇ ମୁଖ୍ୟମନ୍ତ୍ରୀ ଧାମି କହିଛନ୍ତି- ଏକ ଭାରତ ଶ୍ରେଷ୍ଠ ଭାରତ ଆହ୍ବାନକୁ ଏହି ପଦକ୍ଷେପ ସଫଳ କରାଇବ । ୟୁସିସି କମିଟିରେ ଅନ୍ୟ ଯେଉଁମାନେ ସଦସ୍ୟ ରହିଛନ୍ତି ସେମାନେ ହେଲେ ଅବସରପ୍ରାପ୍ତ ବିଚାରପତି ପ୍ରମୋଦ କୋହଲି, ସାମାଜିକ କର୍ମୀ ମନୁ ଗୌର, ପୂର୍ବତନ ମୁଖ୍ୟ ଶାସନ ସଚିବ ଶତ୍ରୁଘ୍ନ ସିଂ, କୁଳପତି ସୁରେଖା ଦଣ୍ଡଓ୍ବାଲ ।
ଧର୍ମନିର୍ବିଶେଷରେ ବିବାହ, ଛାଡପତ୍ର, ଜମିଜମା, ସମ୍ପତ୍ତି, ଉତ୍ତରାଧିକାରୀତ୍ବ କ୍ଷେତ୍ରରେ ରାଜ୍ୟର ସମସ୍ତ ନାଗରିକଙ୍କ ଲାଗି ୟୁସିସି ଲାଗୁ କରିବାକୁ ସରକାର ଚାହିଁଛନ୍ତି । ୟୁସିସି କାର୍ଯ୍ୟକାରୀ କରିବାକୁ ଗତ 2022 ବିଧାନସଭା ନିର୍ବାଚନରେ ପ୍ରତିଶ୍ରୁତି ଦେଇଥିଲା ବିଜେପି । 740 ପୃଷ୍ଠା ସମ୍ବଳିତ ଚିଠା ରିପୋର୍ଟ ଚାରି ଖଣ୍ଡରେ ବିଭକ୍ତ ଏବଂ 2 ଲକ୍ଷ 33 ହଜାର ଲୋକଙ୍କ ପରାମର୍ଶକୁ ଆଧାର କରି ଏହି ରିପୋର୍ଟ ପ୍ରସ୍ତୁତ କରାଯାଇଛି ।
ଭୁବନେଶ୍ୱର : ଆଜି ବିଧାନସଭା ବଜେଟ ଅଧିବେଶନର ଦ୍ବିତୀୟ ଦିନ । ଅଧିବେଶନର ଦ୍ବିତୀୟ ଦିନ ବେଶ୍ ସରଗରମ ରହିବା ଆଶା କରାଯାଉଛି । ଆଜି ଗୃହରେ ବିଭିନ୍ନ ବିଭାଗର ପ୍ରଶ୍ନକାଳ ରହିଛି । ପଞ୍ଚାୟତିରାଜ ଓ ପାନୀୟ ଜଳ, ଗ୍ରାମ୍ୟ ଉନ୍ନୟନ, ପର୍ଯ୍ୟଟନ, ଗୃହ ନିର୍ମାଣ ଓ ପୌର ଉନ୍ନୟନ, ଜଙ୍ଗଲ ପରିବେଶ ଓ ଜଳବାୟୁ ପରିବର୍ତ୍ତନ, ଅବକାରୀ, ଦକ୍ଷତା ବିକାଶ ଓ ବୈଷୟିକ ଶିକ୍ଷା, ସୂଚନା ଓ ଲୋକସମ୍ପର୍କ, ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗର ପ୍ରଶ୍ନକାଳ ରହିଛି । ବିଧାୟକ ଚାହିଁଲେ ଭିନ୍ନ ପ୍ରଶ୍ନ ପଚାରିପାରିବେ । ସେହିପରି ଶୂନ୍ୟକାଳରେ ବହୁ ଗୁରୁତ୍ବପୂର୍ଣ୍ଣ ପ୍ରସଙ୍ଗ ଉଠିପାରେ । କଂଗ୍ରେସ ପକ୍ଷରୁ ମୁଲତବୀ ପ୍ରସ୍ତାବ ଆସିପାରେ ।
ଏହାସହ ରାଜ୍ୟପାଳଙ୍କ ଅଭିଭାଷଣ ଉପରେ ଧନ୍ୟବାଦ ପ୍ରସ୍ତାବ ଗୃହରେ ଆଲୋଚନା ହେବ । ସ୍ବଳ୍ପ ଅଧିବେଶନରେ ମୁଖ୍ୟ ବିରୋଧୀ ବିଜେପି ଓ କଂଗ୍ରେସ ଶାସକ ଦଳକୁ ଗୃହରେ ଘେରିବା ପାଇଁ ରଣନୀତି କରିଛନ୍ତି । ଅନ୍ଯପଟେ ବିଜେଡି ବିଧାୟକ ଦଳ ବୈଠକରେ ମୁଖ୍ଯମନ୍ତ୍ରୀ ନବୀନ ପଟ୍ଟନାୟକ ଓଡ଼ିଶା ବିକାଶ, ବିଶ୍ବ ଓଡ଼ିଆ ସମ୍ମିଳନୀକୁ ଦୃଷ୍ଟିରେ ରଖି ବିଭିନ୍ନ ପ୍ରସଙ୍ଗରେ ଭାଗନେବା ସହ ବିରୋଧୀଙ୍କ ପ୍ରଶ୍ନର ସଠିକ ମୁକାବିଲା କରିବାପାଇଁ ବିଧାୟକମାନଙ୍କୁ ଗୁରୁମନ୍ତ୍ର ଦେଇଛନ୍ତି ।
ନନ୍ଦିଘୋଷ ବ୍ୟୁରୋ: ଭୟଙ୍କର ବନାଗ୍ନିରେ ଜଳୁଛି ଦକ୍ଷିଣ ଆମେରିକୀୟ ଦେଶ ଚିଲି । ଏବେ ଜନବସତିରେ ଆସି ନିଆଁ ପହଞ୍ଚିଲାଣି । ଏଥିପାଇଁ ଚିଲି ସରକାରଙ୍କର ଚିନ୍ତା ବଢିବାରେ ଲାଗିଛି । ନିଆଁ ଅଣାୟତ୍ତ ହେଉଥିବା ବେଳେ ଏଯାଏ ୧୧୨ ଜଣଙ୍କର ମୃତ୍ୟୁ ଘଟିବା ସହ ଶତାଧିକ ନିଖୋଜ ଅଛନ୍ତି । ଏଥିସହ ୧୧୦୦ରୁ ଅଧିକ ଘର ଜଳି ପୋଡ଼ି ପାଉଁଶ ହୋଇଯାଇଛି । ଭିନାଡେଲମାର ସମେତ ପଡୋଶୀ ସହର ଗୁଡିକରେ କର୍ଫ୍ୟୁ ଜାରି କରାଯାଇଛି । ପାଖାପାଖି ୧୬୧ ବର୍ଗ କିଲୋମିଟର ଅଞ୍ଚଳରେ ବ୍ୟାପିଛି ନିଆଁ । ଦେଶର ୩ ଲକ୍ଷ ଜନସଂଖ୍ୟା ବିଶିଷ୍ଟ ଭିନାଡେଲମାର ସହର ଅଧିକ କ୍ଷତିଗ୍ରସ୍ତ ହୋଇଥିବା ସୂଚନା । ଧୂଆଁ ଓ ନିଆଁ ଯୋଗୁଁ ଜନଜୀବନ ଅସ୍ତବ୍ୟସ୍ତ ହୋଇଯାଇଛି । ଲୋକମାନଙ୍କୁ ଘରୁ ନ ବାହାରିବାକୁ ଅପିଲ କରାଯାଇଛି । ଦେଶରେ ଉଦ୍ଧାର କାର୍ଯ୍ୟ ଓ ନିଆଁଲିଭା କାର୍ଯ୍ୟ ଜାରି ରହିଛି । ଫାୟାରଫାଇଟର୍ସ ହେଲିକପ୍ଟର ଓ ଟ୍ରକ୍ ମାଧ୍ୟମରେ ନିଆଁ ଲିଭାଇବାକୁ ଉଦ୍ୟମ କରୁଛନ୍ତି । ହଜାର ହଜାର ଲୋକଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯାଇଛି । ଲୋକମାନଙ୍କୁ ସୁରକ୍ଷିତ ସ୍ଥାନକୁ ଯିବାକୁ ଅପିଲ କରାଯାଇଛି । ବନାଗ୍ନି ଯୋଗୁ ଦେଶର ପାଣିପାଗରେ ପରିବର୍ତ୍ତନ ଦେଖିବାକୁ ମିଳିଛି । ତାପମାତ୍ରା ଅସାଧାରଣ ଭାବେ ବୃଦ୍ଧି ପାଇବାରେ ଲାଗିଛି ।
କଟକ: ଜଳିଗଲା ସୁନା ଦୋକାନ । କଟକ ନିମଚଉଡ଼ି ଅଞ୍ଚଳରେ ଥିବା ଓମ ଅଳଙ୍କାର ଦୋକାନରେ ଅଗ୍ନିକାଣ୍ଡ ଘଟିଛି । ସନ୍ଧ୍ୟାରେ ହଠାତ ଦୋକାନରୁ ପ୍ରବଳ ଧୂଆଁ ବାହାରୁଥିବା ଦେଖି ଅଗ୍ନିଶମ ବିଭାଗକୁ ଖବର ଦିଆଯାଇଥିଲା। ସହକାରୀ ଅଗ୍ନିଶମ ଅଧିକାରୀ ସଂଜୀବ ବେହେରାଙ୍କ ସମେତ 2ଟି ଦମକଳ ଗାଡି ପହଂଚି ନିଆଁକୁ ଆୟତ୍ତ କରିଥିଲେ । ନିଆଁ କିପରି ଲାଗିଲା ଓ କ୍ଷୟକ୍ଷତିର ପରିମାଣ ଏ ପର୍ଯ୍ୟନ୍ତ ଅସ୍ପଷ୍ଟ ରହିଛି । ଇଲେକଟ୍ରିକ ସର୍ଟ ସର୍କିଟରୁ ଏପରି ହୋଇଥିବା ଅନୁମାନ କରାଯାଉଛି।
ଭୁବନେଶ୍ବର: ମଙ୍ଗଳବାର ଓଡ଼ିଶା ପ୍ରବେଶ କରିବ କଂଗ୍ରେସର ଭାରତ ଯୋଡ଼ ଯାତ୍ରା। ଝାଡ଼ଖଣ୍ଡର ବାସଜୋଲ ପରେ ସୁନ୍ଦରଗଡ଼ ବୀରମିତ୍ରପୁରରେ ଏହି ଅଭିଯାନ ପହଞ୍ଚିବ। ବୀରମିତ୍ରପୁରର ବିଜାବାହାଲରେ ଅଭିଯାତ୍ରୀ କରିବେ ରାତ୍ରୀଯାପନ। ୭ ତାରିଖ ସକାଳେ ରାଉରକେଲା ଉଦିତ ନଗରରୁ ଆରମ୍ଭ ହେବ ପଦଯାତ୍ରା। ସକାଳ ୧୦ଟାରେ ପାନପୋଷରେ ସାଧାରଣ ସଭା ହେବ। ଅପରାହ୍ଣ ୨ଟାରେ ରାଜଗାଙ୍ଗପୁର ରାଣୀବନ୍ଧରେ ସାଧାରଣ ସଭା ହେବା ପରେ କୁତ୍ରା ଓ ବରଗାଁ ଯିବ। ଅପରାହ୍ଣ ସାଢେ ୪ଟାରେ ବସଷ୍ଟାଣ୍ଡ ଛକରୁ ପଦଯାତ୍ରା ଆରମ୍ଭ ହୋଇ ଷ୍ଟେଟବ୍ଯାଙ୍କ ଛକ ଯିବ। ସେଠାରେ ସାଧାରଣ ସଭା କାର୍ଯ୍ଯକ୍ରମ ରହିଛି। ଆସନ୍ତା ୮ ତାରିଖରେ ଝାରସୁଗୁଡାରେ ସାଧାରଣ ସଭା କାର୍ଯ୍ୟକ୍ରମ ରହିଛି। ଗତ ଜାନୁଆରୀ ୧୪ ତାରିଖରେ ମଣିପୁରର ଥୋବୁଲ ଜିଲ୍ଲା ଖୋନଗଜୋମରୁ ଆରମ୍ଭ ହୋଇଥିବା ଯାତ୍ରା ମାର୍ଚ୍ଚ ୨୦ରେ ମୁମ୍ବାଇରେ ଶେଷ ହେବ । ଯାତ୍ରା ଚାଲିବ ୬୬ ଦିନ । ୧୫ ରାଜ୍ୟର ୧୧୦ ଜିଲ୍ଲା, ୧୦୦ ଲୋକସଭା ଓ ୩୩୭ ବିଧାନ ସଭା କ୍ଷେତ୍ର ଦେଇ ପ୍ରାୟ ୬ ହଜାର ୭୦୦ କିଲୋମିଟର ଅତିକ୍ରମ କରିବ।
ପୁରୀ: ଶ୍ରୀମନ୍ଦିରରେ ସୁନ୍ଦର ଦର୍ଶନ ବ୍ୟବସ୍ଥା ସାଙ୍ଗକୁ ପରିକ୍ରମା ପ୍ରକଳ୍ପର ମନମୁଗ୍ଧକର ପରିବେଶ ଶ୍ରଦ୍ଧାଳୁଙ୍କ ଶ୍ରୀକ୍ଷେତ୍ର ଆଗମନ ପାଇଁ ଆକର୍ଷିତ କରିଛି । ରାଜ୍ୟ ସରକାରଙ୍କ ପକ୍ଷରୁ ପ୍ରତ୍ୟହ ଦଶ ହଜାର ଭକ୍ତଙ୍କ ଦର୍ଶନ ଓ ଖାଇବା ପିଇବାର ବ୍ୟବସ୍ଥା କରିଛନ୍ତି । ଶ୍ରୀସେତୁ, ଶ୍ରୀମାର୍ଗ ତଥା ଜଗନ୍ନାଥ ବଲ୍ଲଭରେ ଥିବା ପାର୍କିଙ୍ଗ ସେଣ୍ଟର ଓ ପ୍ରଦର୍ଶନୀ ଭକ୍ତ ଓ ଶ୍ରଦ୍ଧାଳୁଙ୍କୁ ନୂତନ ଅନୁଭୂତି ଆଣିଛି । ସମସ୍ତଙ୍କ ମୁହଁରେ ରାଜ୍ଯ ସରକାରଙ୍କୁ ପ୍ରଶଂସା ।
ମନ ଟାଣୁଛି ଶ୍ରୀକ୍ଷେତ୍ରର ସୌନ୍ଦର୍ଯ୍ଯ । ବ୍ଯବସ୍ଥା ଓ ପରିବେଶ ଦେଉଛି ଦିବ୍ଯ ଅନୁଭୂତି । ପ୍ରତିଦିନ ଭିଭିନ୍ନ ଜିଲ୍ଲାର ୧୦ ହଜାର ଭକ୍ତ ଓ ଶ୍ରଦ୍ଧାଳୁଙ୍କୁ ସରକାରଙ୍କ ପକ୍ଷରୁ କାଳିଆ ଦର୍ଶନ ପାଇଁ ବ୍ୟବସ୍ଥା କରାଯାଇଛି । ପୁରୀ ସମଙ୍ଗ ଠାରେ ସ୍ୱତନ୍ତ୍ର ପାର୍କିଙ୍ଗ ସ୍ଥଳରେ ପହଞ୍ଚିବା ପରେ ପ୍ରଶାସନ ପକ୍ଷରୁ ସମସ୍ତ ବ୍ଯବସ୍ଥା କରାଯାଉଛି। ସେଠାରୁ ସ୍ୱତନ୍ତ୍ର ଫିଡର ଗାଡି ଯୋଗେ ଶ୍ରୀସେତୁ ହୋଇ ଜଗନ୍ନାଥ ବଲ୍ଲଭ ପିଲିଗ୍ରୀମ ସେଣ୍ଟର ଓ ପରେ ଶ୍ରୀମାର୍ଗ ହୋଇ ଶ୍ରୀମନ୍ଦିରରେ ଦର୍ଶନ ପାଇଁ ପହଞ୍ଚୁଛନ୍ତି ଭକ୍ତ । ସ୍ୱତନ୍ତ୍ର ସ୍ବେଛାସେବୀଙ୍କ ସହାୟତାରେ ଦର୍ଶନ ସହ ପରିକ୍ରମା ପ୍ରକଳ୍ପ ସମେତ ପ୍ରଦର୍ଶନୀ ମଧ୍ୟ ବୁଲିବା ନେଇ ପଦକ୍ଷେପ ନିଆଯାଇଛି ।
ପୁରୀର ରୂପାନ୍ତରଣ ସମସ୍ତଙ୍କୁ ଅବିଭୂତ କରୁଛି। ଏହାସହ ପ୍ରଶାସନର ବ୍ଯବସ୍ଥା ପାଇଁ ମହାପ୍ରଭୁଙ୍କୁ ସୁନ୍ଦର ଭାବରେ ଦର୍ଶନ କରି ପ୍ରକଳ୍ପ ବୁଲି ଦେଖୁଛନ୍ତି ଶ୍ରଦ୍ଧାଳୁ। ରାଜ୍ଯ ସରକାରଙ୍କ ପୁରୀ ବିକାଶ କ୍ଷେତ୍ରରେ କରିଥିବା ଅଭିନବ ପ୍ରୟାସକୁ ସାଧୁବାଦ ଜଣାଉଛନ୍ତି । ପରିକ୍ରମା ପ୍ରକଳ୍ପ ଓ ଅନ୍ୟାନ୍ୟ ପ୍ରକଳ୍ପ ଦ୍ବାରା ଭକ୍ତଙ୍କ ପାଇଁ ସୁବିଧା ବୃଦ୍ଧି ପାଇଥିବା ବେଳେ ଶ୍ରୀକ୍ଷେତ୍ରର ଗାରିମାକୁ ବିଶ୍ୱ ଦରବାରରେ ମଧ୍ୟ ବୃଦ୍ଧି କରିଛି ।
କଟକ: ପ୍ରଥମ ବିଶ୍ବ ଓଡିଆ ଭାଷା ସମ୍ମିଳନୀ ଭୁବନେଶ୍ଵରରେ ଅତି ବର୍ଣ୍ଣାଢ୍ଯ ଢଙ୍ଗରେ ଆୟୋଜିତ ହୋଇଥିବା ବେଳେ ଏହାର ଅଂଶ ଭାବେ କଟକ ରେଭେନ୍ସା ବିଶ୍ୱବିଦ୍ୟାଳୟରେ ଆୟୋଜିତ ହୋଇଛି ଓଡିଆ ନାଟକ ଓ ଚଳଚିତ୍ର ମହୋତ୍ସବ । କାର୍ଯ୍ୟକ୍ରମରେ ଆମ ଓଡିଆ ଚଳଚ୍ଚିତ୍ରର ଇତିହାସ ଓ ଗାରିମାକୁ ନେଇ ନାଚ, ଗୀତ, ଆଲୋଚନାଚକ୍ର ଆୟୋଜିତ ହୋଇଛି । ଏଥିରେ ଓଡିଆ ଚଳଚିତ୍ରକୁ ଜୀବନବ୍ୟାପୀ ସେବା ଯୋଗାଇଥିବା ବରିଷ୍ଠ ପ୍ରଯୋଜକ, ନିର୍ଦ୍ଦେଶକ ଓ କଳାକାରଙ୍କୁ ସମ୍ବର୍ଦ୍ଧିତ କରାଯାଇଛି ।
କଟକରେ ବିଶ୍ବ ଓଡିଆ ଭାଷା ସମ୍ମିଳନୀର ଝଲକ। ଓଡ଼ିଆ ଚଳଚ୍ଚିତ୍ର ଓ ନାଟକର ଗାରିମା ବୃଦ୍ଧି ପାଇଁ ଉଦ୍ଯମ। ରେଭେନ୍ସା ବିଶ୍ୱବିଦ୍ୟାଳୟ ସେଭେନ୍ ପିଲାର୍ ରେ ପରିବେଷିତ ହୋଇଛି ସୁନ୍ଦର ସୁନ୍ଦର ପୁରୁଣା ଓଡିଆ ଚଳଚିତ୍ରର ଗୀତ ଓ ଏହାରି ଉପରେ ଆଧାରିତ ନୃତ୍ୟ । ଦୁଇ ଦିନିଆ ଓଡିଆ ନାଟକ ଓ ଚଳଚ୍ଚିତ୍ର ମହୋତ୍ସବର ଦ୍ବିତୀୟ ଦିନରେ କଳାକାର ମାନେ 1936 ମସିହାରୁ 1975 ମଧ୍ଯରେ ହୋଇଥିବା ସୁପରହିଟ ଓଡିଆ ଫିଲ୍ମର ଲୋକପ୍ରିୟ ଗୀତଗୁଡିକୁ ବାଛି ନୃତ୍ୟଗୀତ ମାଧ୍ୟମରେ ପରିବେଷଣ କରିଥିଲେ । ଚଳଚ୍ଚିତ୍ରରେ ଓଡ଼ିଶା ଭାଷା, ଚଳଣୀ ଓ ସଂସ୍କୃତର ଝଲକକୁ ଅତି ନିଖୁଣଭାବେ ଦେଖାଇବାକୁ ଚେଷ୍ଟା କରିଥିଲେ ଶିଳ୍ପୀ।
କେବଳ ନୃତ୍ୟ ନୁହେଁ ବରଂ ଜଣାଶୁଣା କଣ୍ଠଶିଳ୍ପୀଙ୍କୁ ନେଇ ପରିବେଷଣ କରାଯାଇଥିଲା ସୁନ୍ଦର ସୁନ୍ଦର ଗୀତ । ଯାଯାବର ହେଉ ବା ଅପରାଜିତା, ଅଭିମାନ ହେଉ ବା ଅମଡାବାଟ, ମାଆ ହେଉ ବା ରକ୍ତ ଗୋଲାପ, ସବୁକୁ ଏକାଠି କରି ଓଡିଆ ଫିଲ୍ମର ରୁଦ୍ଧିମନ୍ତ ଇତିହାସକୁ ରୋମନ୍ଥନ କରିଥିଲେ ଗାୟକଗାୟିକା । ଏହାସହ ରୂପେଲି ପରଦାରେ ପରିବେଷଣ ହୋଇଥିଲା ପୁରୁଣା ଓଡିଆ ଚଳଚିତ୍ର ।
ଭୁବନେଶ୍ବର: ଉଦଯାପିତ ହେଲା ପ୍ରଥମ ବିଶ୍ବ ଓଡ଼ିଆ ଭାଷା ସମ୍ମିଳନୀ । ଉଦଯାପନୀ ଦିବସରେ ଉଦବୋଧନ ରଖିଛନ୍ତି ମୁଖ୍ଯମନ୍ତ୍ରୀ ନବୀନ ପଟ୍ଟନାୟକ । ମୁଖ୍ଯମନ୍ତ୍ରୀ କହିଛନ୍ତି, ଏହି ସମ୍ମିଳନୀ ଏକ ଇତିହାସ । ସମ୍ମିଳନୀରେ ଛାତ୍ରଛାତ୍ରୀ, ଯୁବ ସମାଜ, ଲେଖକ, ଗବେଷକ ପ୍ରମୁଖ ସାମିଲ ହୋଇଥିଲେ । ଏଥିପାଇଁ ସମସ୍ତଙ୍କୁ ହୃଦୟରୁ କୃତଜ୍ଞତା ଜଣାଇଛନ୍ତି ମୁଖ୍ଯମନ୍ତ୍ରୀ । ଆମ ଭାଷା ଇତିହାସରେ ଏହି ସମ୍ମିଳନୀ ସବୁଦିନ ପାଇଁ ଏକ ଲ୍ଯାଣ୍ଡମାର୍କ ହୋଇ ରହିବ । ପ୍ରତି ୫ ବର୍ଷରେ ଥରେ ଭାଷା ସମ୍ମିଳନୀର ଆୟୋଜନ କରାଯିବ । ଭାଷା ପାଇଁ ଆମେ ସମସ୍ତେ ପୁଣି ଏକାଠି ହେବା । ଏହି ତିନିଦିନ ମଧ୍ଯରେ ଭାଷାର ବିଭିନ୍ନ ଦିଗ ଉପରେ ଆଲୋଚନା କରାଯାଇଛି । ଏଥିରେ ଖୁବ ଭଲଭଲ ପ୍ରସ୍ତାବ ମଧ୍ଯ ଆସିଛି । ବର୍ତ୍ତମାନ ବିଧାନସଭା ଚାଲିଛି । ଭାଷା ସମ୍ପର୍କରେ ନିଷ୍ପତ୍ତି ବିଧାନସଭାରେ ଘୋଷଣା ହେବ ବୋଲି ମୁଖ୍ଯମନ୍ତ୍ରୀ କହିଛନ୍ତି । ଯୁଗଯୁଗ ଧରି ଓଡ଼ିଆ ଭାଷା ଓଡ଼ିଶା ଜାତିର ପରିଚୟକୁ ଆଗକୁ ନେଇଛି । ସମସ୍ତେ ଓଡ଼ିଆରେ ନୂଆ ନୂଆ ସମ୍ବନ୍ଧ ସୃଷ୍ଟି କରିବା ସହ ଆମ ଶବ୍ଦ ଭଣ୍ଡାରକୁ ସମୃଦ୍ଧ କରିବାକୁ ମୁଖ୍ଯମନ୍ତ୍ରୀ ଆହ୍ବାନ ଦେଇଛନ୍ତି । ନବୀନ କହିଛନ୍ତି, ଓଡ଼ିଆ ଭାଷା ଆମ ଯୁବପିଢିର ଭାଷା ହେବ । ଆମ ଭାଷାର ଗୌରବଙ୍କୁ ଅନୁଭବ କଲେ ଏହା ନିଶ୍ଚୟ ଆଗକୁ ଯିବ । ସମ୍ମିଳନୀ ଅବସରରେ ଆୟୋଜିତ ମ୍ଯୁଜିୟମ ସମସ୍ତଙ୍କ ମନକୁ ଛୁଇଁଛି । ଏଣୁ ଏହାର ଅବଧିକୁ ଆହୁରି ତିନିଦିନ ବୃଦ୍ଧି କରାଗଲା ବୋଲି ମୁଖ୍ଯମନ୍ତ୍ରୀ ଘୋଷଣା କରିଛନ୍ତି । ୫ ତାରିଖ ବଦଳରେ ୮ ତାରିଖ ପର୍ଯ୍ୟନ୍ତ ଏହାକୁ ପରିଦର୍ଶନ କରିବାର ସୁଯୋଗ ମିଳିବ ।
