ଭୁବନେଶ୍ବର: ବିଜେପି ଛାଡି ବିଜେଡିରେ ମିଶିଲେ ଶତାଧିକ ନେତା ଓ କର୍ମୀ। ଜଟଣୀ ନିର୍ବାଚନ ମଣ୍ଡଳୀ ମଳିପଡା ପଞ୍ଚାୟତ ସରପଞ୍ଚ ସୁନୀଲ ମୁଦୁଲି, ନାଏବ ସରପଞ୍ଚ ମମତା ବଡଜେନା ବିଜୁ ଜନତା ଦଳରେ ଯୋଗ ଦେଇଛନ୍ତି ।ସେମାନଙ୍କ ସହ ଓ୍ବାର୍ଡମେମ୍ବର ଶ୍ୟାମସୁନ୍ଦର ଦେହୁରୀ, ସୁରେନ୍ଦ୍ର ରାଉତରାୟ, ମନୋରଞ୍ଜନ ପ୍ରଧାନ, ନୃସିଂହ ଚରଣ ଜେନା, ଖୋକନ ମଙ୍ଗରାଜ ବିଜେଡିରେ ବିଧିବଦ୍ଧ ଭାବେ ଯୋଗ ଦେଇଛନ୍ତି । ସେହିଭଳି ନଖୁଟ ଗ୍ରାମପଞ୍ଚାୟତର ସରପଞ୍ଚ ସୂଚିତ୍ରା ପାତ୍ର, କମ୍ବୁପାଣି ପାତ୍ର, ବିଜେପି ଯୁବମୋର୍ଚ୍ଚା ଉପସଭାପତି ରାଜେଶ ପାତ୍ର, ଖୋର୍ଦ୍ଧା ଜିଲ୍ଲା ବିଜେପି ନେତା ପ୍ୟାରିମୋହନ ପରିଡା, ସୁଶୀଲ ପରିଡା, କୃପାସିନ୍ଧୁ ସାମନ୍ତରାୟ ଏବଂ ପ୍ରଦୀପ ପାଇକରାୟଙ୍କ ସମେତ ଶତାଧିକ ମହିଳା, ଯୁବକ ଏବଂ ବରିଷ୍ଠ ନାଗରିକ ମାନେ ବିଜେପି ଛାଡି ବିଜେଡିରେ ଯୋଗ ଦେଇଛନ୍ତି। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ବିକାଶ ଧାରା ରେ ଅନୁପ୍ରାଣିତ ହୋଇ ସେମାନେ ବିଜେଡିରେ ଯୋଗ ଦେଇଥିବା କହିଛନ୍ତି। ଖୋର୍ଦ୍ଧା ଜିଲ୍ଲା ବିଜେଡି ପର୍ଯ୍ୟବେକ୍ଷକ ତଥା ପୂର୍ବତନ ସାଂସଦ ରବୀନ୍ଦ୍ର ଜେନାଙ୍କ ନେତୃତ୍ୱରେ ଶଙ୍ଖ ଭବନ ପରିସରରେ ମିଶ୍ରଣ ପର୍ବ ଅନୁଷ୍ଠିତ ହୋଇଥିଲା।
ମାଳଦ୍ବୀପକୁ ଅନେକ ଫ୍ଲାଇଟ୍ ଏବଂ ହୋଟେଲ୍ ବୁକିଂ କ୍ୟାନସଲ୍
ନନ୍ଦିଘଷୋଷ ବ୍ୟୁରୋ: ମାଳଦ୍ବୀପ ମନ୍ତ୍ରୀଙ୍କ ବିବାଦୀୟ ବୟାନକୁ ନେଇ ଥମୁନି ଝଡ଼। ସୋସିଆଲ୍ ମିଡିଆରେ କମେଣ୍ଟ ପରେ ଭାରତରେ ତୀବ୍ର ପ୍ରତିକ୍ରିୟା । ମାଳଦ୍ବୀପକୁ ଅନେକ ଫ୍ଲାଇଟ୍ ଏବଂ ହୋଟେଲ୍ ବୁକିଂ କ୍ୟାନସଲ୍ । ୧୦,୫୦୦ରୁ ଅଧିକ ହୋଟେଲ୍ ବୁକିଂ କ୍ୟାନସଲ୍ କରିଛନ୍ତି ଭାରତୀୟ । ୫୫୦୦ରୁ ଅଧିକ ଫ୍ଲାଇଟ୍ ଟିକେଟ୍ ମଧ୍ୟ ବାତିଲ୍ ହୋଇଛି । ମାଳଦ୍ବୀପର ପ୍ରମୁଖ ଆୟ ପର୍ଯ୍ୟଟନରୁ ହିଁ ଆସିଥାଏ । ଏବେସୁଦ୍ଧା ଗତ ୩ ଦିନରେ ୧୦୦ କୋଟି ଟଙ୍କାର କ୍ଷତି ହେଲାଣି । ଏକାଧିକ ଟ୍ରାଭେଲ୍ କଂପାନୀ ସେମାନଙ୍କର ପ୍ୟାକେଜ୍ ବାତିଲ କରିଛନ୍ତି । ସୋସିଆଲ୍ ମିଡିଆରେ ଟ୍ରେଣ୍ଡ ହେଉଛି #BoycottMaldives । ମାଳଦ୍ବୀପ ହୋଟେଲ ଆସୋସିଏସନ୍ ପକ୍ଷରୁ ମେକ୍ ମାଇଁ ଟ୍ରିପକୁ ଲେଖାଯାଇଛି ଚିଠି ।
ସୂଚନା ଥାଉକି, ଭାରତ ବିରୋଧୀ ଟିପ୍ପଣୀ ପଡ଼ିଲା ମହଙ୍ଗା। ମାଳଦ୍ବୀପର ୩ ମନ୍ତ୍ରୀଙ୍କୁ ନିଲମ୍ବିତ କରିଛନ୍ତି ମାଳଦ୍ବୀପର ମୁଇଜୁ ସରକାର। ସୋସିଆଲ ମିଡିଆରେ ଭାରତ ବିରୋଧୀ ମନ୍ତବ୍ୟ ଦେଇଥିଲେ ମାଳଦ୍ବୀପର ୩ ମନ୍ତ୍ରୀ ମରିୟମ ଶିଉନା, ମାଲଶା ସରିଫ ଏବଂ ମହଜୁମ ମାଜିଦ । ଭାରତ ବିରୋଧରେ ଅଶାଳୀନ ଭାଷା ପ୍ରୟୋଗ କରିଥିବାରୁ ରାଷ୍ଟ୍ରପତି ମୁଇଜୁଙ୍କ ସରକାର ୩ ମନ୍ତ୍ରୀଙ୍କୁ ନିଲମ୍ବିତ କରିଛନ୍ତି।ମାଳଦ୍ବୀପର ୩ ମନ୍ତ୍ରୀ ଦେଇଥିବା ଅଶାଳୀନ ଟିପ୍ପଣୀ ତାଙ୍କର ବ୍ୟକ୍ତିଗତ ବୋଲି କହିଛି ମାଳଦ୍ବୀପ। ମାଳଦ୍ବୀପ ବୈଦେଶିକ ମନ୍ତ୍ରୀ ମୂଜା ଜମିର କହିଛନ୍ତି- ବିଦେଶୀ ନେତାଙ୍କ ସମ୍ପର୍କରେ କୌଣସି ଅଶୋଭନୀୟ ଟିପ୍ପଣୀ ଅଗ୍ରହଣୀୟ । ଏହି ମନ୍ତବ୍ୟ ଦ୍ବିପାକ୍ଷିକ ସମ୍ପର୍କକୁ ପ୍ରଭାବିତ କରିବ ନାହିଁ ।
ଭାରତ ପ୍ରଧାନମନ୍ତ୍ରୀ ଲାକ୍ଷାଦ୍ବୀପ ଗସ୍ତ ସମୟର ଅନୁଭବ ସୋସିଆଲ ମିଡିଆ ଏକ୍ସରେ ପ୍ରକାଶ କରିଥିଲେ। ଲାକ୍ଷାଦ୍ବୀପର ପର୍ଯ୍ୟଟନସ୍ଥଳୀର ଉଚ୍ଚ ପ୍ରଶଂସା କରିବା ସହ ସେଠାରେ ସ୍ମୋର୍କଲିଂ କରିଥିଲେ। ଏହି ପୋଷ୍ଟକୁ ନେଇ ଅନେକ ୟୁଜର୍ସ ଲକ୍ଷାଦ୍ବୀପକୁ ମାଳଦ୍ବୀପର ବିକଳ୍ପ ପର୍ଯ୍ୟଟନସ୍ଥଳୀ ଭାବେ ଦର୍ଶାଇଥିଲେ । ଏହାପରେ ମାଳଦ୍ବୀପ ସରକାରଙ୍କ ନେତାଙ୍କ ପକ୍ଷରୁ ଆପତ୍ତିଜନକ ଟିପ୍ପଣୀ ସୋସିଆଲ ମିଡିଆରେ ଦେଖିବାକୁ ମିଳିଥିଲା। ମାଳଦ୍ବୀପରେ ସରକାର ଗଠନ କରିଥିବା ପ୍ରୋଗ୍ରେସିଭ ପାର୍ଟି ଅଫ୍ ମାଳଦ୍ବୀପ ପିପିଏମ୍ ନେତାମାନେ ଆପତ୍ତିଜନକ ଟିପ୍ପଣୀ ଦେଇଥିଲେ । ଏହାପରେ ଭାରତ ପକ୍ଷରୁ ଟିପ୍ପଣୀକୁ ନେଇ କଡ଼ା ବିରୋଧ ପ୍ରକାଶ ପାଇଥିଲା। ଅନେକ ପର୍ଯ୍ୟଟକ ମାଳଦ୍ବୀପ ବୁଲି ଯିବାକୁ ଥିବା ହୋଟେଲ ଏବଂ ଫ୍ଲାଇଟ୍ ବୁକିଂ କ୍ୟାନସଲ କରିଥିଲେ ।
ଅନେକ ବଲିଉଡ ଅଭିନେତା ଏବଂ କ୍ରିକେଟର ଟୁଇଟ କରି ଏହି ବିବାଦୀୟ ବୟାନର ଘୋର ନିନ୍ଦା କରିଛନ୍ତି। ଅନ୍ୟପଟେ ପ୍ରସଙ୍ଗକୁ ନେଇ ମାଲଦ୍ବୀପର ରାଷ୍ଟ୍ରଦୂତଙ୍କୁ ସମନ କରିଛି ଭାରତୀୟ ବୈଦେଶିକ ବିଭାଗ। ଭାରତରେ ଅବସ୍ଥାପିତ ମାଳଦ୍ବୀପ ରାଷ୍ଟ୍ରଦୂତ ଇବ୍ରାହିମ ସରିଫଙ୍କୁ ସମନ କରିବା ସହ ଜବାବ ରଖିବାକୁ କହିଛି ଭାରତୀୟ ବୈଦଶିକ ବିଭାଗ। ତେଣେ ମାଳଦ୍ବୀପ ସହ ବ୍ୟାବସାୟିକ ସମ୍ପର୍କ ଛିନ୍ନ ଲାଗି ଆହ୍ବାନ ଜଣାଇଛି କନଫେଡେରେସନ ଅଫ ଅଲ ଇଣ୍ଡିଆ ଟ୍ରେଡର୍ସ । ସେହିପରି ମାଳଦ୍ବୀପକୁ ବର୍ଜନ କରିବା ଲାଗି ଇଣ୍ଡିଆନ ଚାମ୍ବର ଅଫ କମର୍ସର ବିମାନ ଚଳାଚଳ ଓ ପର୍ଯ୍ୟଟନ କମିଟି ଟ୍ରାଭେଲ ଏଜେନ୍ସିଗୁଡିକୁ ଆହ୍ବାନ ଦେଇଛି ।
ହ୍ବାଟ୍ସଆପ୍ ଆଣୁଛି ଅନେକ ଗୁଡିକ ନୂଆ ଫିଚର
ନନ୍ଦିଘୋଷ ବ୍ୟୁରୋ: ହ୍ବାଟ୍ସଆପ୍ ଆଣୁଛି ଅନେକ ଗୁଡିକ ନୂଆ ଫିଚର। ୟୁଜରମାନଙ୍କ ପାଇଁ ଏହି ଫିଚର ବେଶ୍ ସହାୟକ ହେବ। ଉଭୟ ଅଡିଓ ଓ ଭିଡିଓ କ୍ଷେତ୍ରରେ ନୂଆ ଫିଚର ଡେଭଲପ୍ କରାଯାଇଛି । ଭିଡିଓ କଲ୍ ସମୟରେ ସେୟାର କରିହେବ ମ୍ୟୁଜିକ୍ ଅଡିଓ । ଗ୍ରୁପ୍ ଏବଂ ଓ୍ବାନ୍ ଟୁ ଓ୍ବାନ୍ ଆଲୋଚନା ବେଳେ ହୋଇପାରିବ ସେୟାର। ଆପ୍ଲିକେସନର ଥିମ୍ କଲର ପରିବର୍ତ୍ତନ କରିପାରିବେ ୟୁଜର । ୟୁଜରମାନେ ଏକାଠି ଭିଡିଓ ଦେଖିପାରିବାର ଫିଚର ଆଣୁଛି ହ୍ବାଟ୍ସଆପ୍ । ବିଶ୍ବରେ ସର୍ବାଧିକ ବ୍ୟବହାର ହେଉଥିବା ଆପ୍ଲିକେସନ୍ ହେଉଛି ହ୍ବାଟ୍ସଆପ୍ । ୟୁଜରଙ୍କୁ ଅଧିକ ଏନଗେଜ୍ ରଖିବାକୁ ମେଟାର ଏଭଳି ପ୍ରୟାସ। ଆଣ୍ଡ୍ରଏଡ୍ ୟୁଜରମାନଙ୍କୁ କେଇ ସପ୍ତାହ ମଧ୍ୟରେ ଏ ସୁବିଧା ମିଳିପାରିବ।
ଦ୍ଵନ୍ଦ୍ବରେ କଂଗ୍ରେସର ଟିକେଟ୍ ତାଲିକା
ଭୁବନେଶ୍ବର: କଂଗ୍ରେସରେ ଟିକେଟ୍ ଦ୍ଵନ୍ଦ୍ବ । ୨୦୨୪ ନିର୍ବାଚନ ପାଇଁ କଂଗ୍ରେସ ୬୦ଟି ଟିକେଟ୍ ଫାଇନାଲ କରିସାରିଥିବା ଦଳର ବିଧାୟକ ତାରା ପ୍ରସାଦ ବାହିନୀପତି କହିଛନ୍ତି l କଂଗ୍ରେସ ଏକ୍ ହୋଇ ନିର୍ବାଚନ ଲଢ଼ିବ ବୋଲି କହିଛନ୍ତି ତାରା l ସେପଟେ ପିସିସି ସଭାପତି ଶରତ ପଟ୍ଟନାୟକ କହିଛନ୍ତି, ଜିଲ୍ଲାସ୍ତରରୁ ପ୍ରାର୍ଥୀ ତାଲିକା ସଂଗ୍ରହ କରାଯାଇଛି । ତାଲିକା ଚୂଡ଼ାନ୍ତ ହୋଇନାହିଁ । ଶୀଘ୍ର ଦିଲ୍ଲୀ ପଠାଯିବ ବୋଲି ପିସିସି ସଭାପତି କହିଛନ୍ତି l ଯାହାକୁ ନେଇ କଂଗ୍ରେସ ଶିବିରରେ ସୃଷ୍ଟି ହୋଇଛି ହଲଚଲ୍ ।
ଦ୍ଵନ୍ଦ୍ବରେ କଂଗ୍ରେସର ଟିକେଟ୍ ତାଲିକା । କଥାରେ ରହୁନାହିଁ ତାଳମେଳ । ତାରା କହିଲେ, ବଣ୍ଟା ସରିଛି ୬୦ ଟିକେଟ୍ । ଶରତ କହିଲେ, ଜିଲ୍ଲାସ୍ତରରୁ ମଗାଯାଇଛି ତାଲିକା । ୨୪ ପାଇଁ କଂଗ୍ରେସର ଟିକେଟ୍ ଚୂଡ଼ାନ୍ତ ବୋଲି ଦଳର ବିଧାୟକ ତାରାପ୍ରସାଦ ବାହିନୀପତି କହିଛନ୍ତି । ୬୦ଟି ଆସନ ପାଇଁ ଟିକେଟ୍ ଫାଇନାଲ କରିଛି ଦଳ । ପିସିସି ପ୍ରଭାରୀ ସଂଗଠନ ନେଇ ମାନସମନ୍ଥନ କରିବାର ୪୮ଘଣ୍ଟା ପରେ ବାହିନୀପତି ଏହି ସୂଚନା ଦେଇଛନ୍ତି । ତାରାଙ୍କ ଆଗୁଆ ଟିକେଟ୍ ସୂଚନା କଂଗ୍ରେସ ରାଜନୀତିକୁ ଉଷ୍ମ କରିଛି । ସେହିପରି କୋରାପୁଟ ସାଂସଦଙ୍କ ସହ ଆଉ ତାଙ୍କର କଳି ନାହିଁ ବୋଲି ତାରା କହିଛନ୍ତି ।
ସେପଟେ କଂଗ୍ରେସରୁ କିଏ ଟିକେଟ ପାଇବେ, ତାହା ଏଯାଏ ସ୍ଥିର ହୋଇନଥିବା ପିସିସି ସଭାପତି ଶରତ ପଟ୍ଟନାୟକ କହିଛନ୍ତି । ସବୁ ଜିଲ୍ଲାର କଂଗ୍ରେସ ସଭାପତି ୩ରୁ ୫ ଜଣଙ୍କ ନାଁ ଦେଇଛନ୍ତି । ୧୪୭ ନିର୍ବାଚନମଣ୍ଡଳୀରୁ ପ୍ରାର୍ଥୀ ତାଲିକା ଆସିଛି । ୨୧ଟି ସାଂସଦ ଆସନ ପାଇଁ ସର୍ଭେ ଚାଲିଛି । ଯଥାଶୀଘ୍ର ଦିଲ୍ଲୀକୁ ନାଁ ପଠାଯିବ ବୋଲି ପିସିସି ସଭାପତି ଶରତ ପଟ୍ଟନାୟକ କହିଛନ୍ତି । କଂଗ୍ରେସ ନେତାମାନେ ଟିକେଟ ବଣ୍ଟନ ନେଇ ବାରମ୍ବାର ବୟାନ ବାଜି ଜାରି ରଖିଛନ୍ତି । ଆଗୁଆ ଟିକେଟ ବଣ୍ଟନ ନେଇ ଦଳ କରୁଥିବା ଗେମ୍ ପ୍ଲାନ୍ କେତେ ସଫଳ ହେବ, ତା ଉପରେ ସମସ୍ତଙ୍କ ନଜର ରହିଛି।
ଫ୍ରାନ୍ସକୁ ମିଳିଲା ପ୍ରଥମ ସମଲିଙ୍ଗୀ ପ୍ରଧାନମନ୍ତ୍ରୀ
ନନ୍ଦିଘୋଷ ବ୍ୟୁରୋ: ଫ୍ରାନ୍ସକୁ ମିଳିଲା ପ୍ରଥମ ସମଲିଙ୍ଗୀ ପ୍ରଧାନମନ୍ତ୍ରୀ । ୩୪ ବର୍ଷୀୟ ଗାବ୍ରିଏଲ୍ ଅଟ୍ଟାଲଙ୍କୁ ଫ୍ରାନ୍ସର ନୂଆ ପ୍ରଧାନମନ୍ତ୍ରୀ ଭାବେ ରାଷ୍ଟ୍ରପତି ଇମାନୁଏଲ ମାକ୍ରୋନ ନିଯୁକ୍ତ କରିଛନ୍ତି । ଗାବ୍ରିଏଲ ଏବେ ଫ୍ରାନ୍ସର ଯୁବ ଓ ପ୍ରଥମ ସମଲିଙ୍ଗୀ ପ୍ରଧାନମନ୍ତ୍ରୀ ହୋଇଛନ୍ତି । ପୂର୍ବରୁ ସେ ଫ୍ରାନ୍ସର ଶିକ୍ଷା ମନ୍ତ୍ରୀ ଥିଲେ । ୬୨ ବର୍ଷୀୟ ପ୍ରଧାନମନ୍ତ୍ରୀ ଏଲିଜାବେଥ ବୋର୍ଣ୍ଣଙ୍କ ଇସ୍ତଫା ପରେ ଏହି ଯୁବ ମନ୍ତ୍ରୀ ଜଣକ ପ୍ରଧାନମନ୍ତ୍ରୀ ରେସରେ ଆଗରେ ଥିଲେ । ଏଥିସହ ରାଷ୍ଟ୍ରପତି ଇମାନୁଏଲ ମାକ୍ରୋନଙ୍କ ପ୍ରଥମ ପସନ୍ଦ ମଧ୍ୟ ଥିଲେ । ସୋମବାର ରାଷ୍ଟ୍ରପତି ଇମାନୁଏଲ୍ ପ୍ରଧାନମନ୍ତ୍ରୀ ବୋର୍ଣ୍ଣଙ୍କ ଇସ୍ତଫା ସ୍ୱୀକାର କରିଥିଲେ । ସେ ଏହି ପ୍ରଧାନମନ୍ତ୍ରୀ ପଦରେ ଦୁଇ ବର୍ଷରୁ ମଧ୍ୟ କମ ସମୟ ପାଇଁ ରହିଥିଲେ । ଏଲିଜାବେଥ ବୋର୍ଣ୍ଣ ଦେଶର ଦ୍ୱିତୀୟ ମହିଳା ପ୍ରଧାନମନ୍ତ୍ରୀ ଥିଲେ । ନିର୍ବାଚନକୁ ଆଉ କିଛି ମାସ ବାକିଥିବା ବେଳେ ରାଷ୍ଟ୍ରପତି ମାକ୍ରୋନ ତାଙ୍କ ଦଳରେ ବଡ଼ ଧରଣର ଅଦଳବଦଳ କରିବା ନେଇ ଅନୁମାନ କରାଯାଉଥିଲା । ଏହି ଆକଳନ ଚାଲିଥିବା ସମୟରେ ଏଲିଜାବେଥ ନିଜ ଇସ୍ତଫା ଦେଇଥିଲେ। ତାଙ୍କ କାର୍ଯ୍ୟକାଳ ଆହୁରି ତିନି ବର୍ଷ ବାକିଥିଲା। କିନ୍ତୁ ଅନେକ ବିବାଦୀୟ ନୀତି ଏବଂ ବିରୋଧ ଯୋଗୁଁ ମାକ୍ରୋନ୍ ତାଙ୍କ ସରକାରଙ୍କ ରାଜନୈତିକ ଭବିଷ୍ୟତକୁ ସୁରକ୍ଷିତ କରିବାକୁ ଚାହୁଁଥିଲେ। ତେଣୁ ତାଙ୍କୁ ଇସ୍ତଫା ଦେବାକୁ କୁହାଯାଇଥିଲା।
କ୍ୟାମ୍ପସ ହେବ ସମ୍ପୂର୍ଣ ନିଶାମୁକ୍ତ
ନନ୍ଦିଘୋଷ ବ୍ୟୁରୋ: କ୍ୟାମ୍ପସ ହେବ ସମ୍ପୂର୍ଣ ନିଶାମୁକ୍ତ। କେବଳ ଛାତ୍ରଛାତ୍ରୀ ନୁହେଁ ଅଧ୍ୟାପକ ମାନେ ବି ଏଣିକି ଦାଖଲ କରିବେ ଆଣ୍ଟି ଡ୍ରକ ଡିକ୍ଲାରେସନ । ନିଶା ମୁକ୍ତ ଅଭିଯାନ କ୍ୟାମ୍ପେନ୍କୁ ଅଧିକ ସଫଳ କରିବାକୁ ବିଧାନସଭାର ଷ୍ଟାଣ୍ଡିଂ କମିଟି ରାଜ୍ୟ ସରକାରଙ୍କୁ ଏପରି ସୁପାରିଶ କରିଛି। ରାଜ୍ୟର ସବୁ ଯୁକ୍ତ ଦୁଇ, ଯୁକ୍ତ ତିନି, ବିଶ୍ଵବିଦ୍ୟାଳୟ ଓ ଅଧ୍ୟାପକଙ୍କ ପାଇଁ ସୁପାରିସ କରିଛି କମିଟି। କମିଟିର ସୁପାରିସକୁ ଅଧ୍ୟାପକମାନେ ସ୍ବାଗତ କରିଛନ୍ତି।
ନିଶାମୁକ୍ତ ହେବ ଶିକ୍ଷାନୁଷ୍ଠାନ । ଛାତ୍ରଛାତ୍ରୀଙ୍କ ପରେ ଅଧ୍ୟାପକ ବି ଦେବେ ଆଣ୍ଟି ଡ୍ରଗ୍ ଡିକ୍ଲାରେସନ । ସରକାରଙ୍କୁ ସୁପାରିସ କଲା ବିଧାନସଭା ଷ୍ଟାଣ୍ଡିଂ କମିଟି । ରାଜ୍ୟର ସବୁ +2, +3 ଓ ବିଶ୍ଵବିଦ୍ୟାଳୟରେ ହେବ ଲାଗୁ । କ୍ୟାମ୍ପସ ହେବ ସମ୍ପୂର୍ଣ ନିଶା ମୁକ୍ତ। ଛାତ୍ରୀଛାତ୍ରୀଙ୍କୁ ନିଶା ବଳୟରୁ ଦୂରେଇ ରଖିବାକୁ ସାରା ଦେଶରେ ଓଡ଼ିଶା ହେବ ରୋଲ ମଡେଲ। ଆଡ଼ମିଶନ ସମୟରେ ଛାତ୍ରଛାତ୍ରୀ ତେବେ ଆଣ୍ଟିଡ୍ରଗ୍ ଡିକ୍ଲାରେସନ ।ଏ ନେଇ ରାଜ୍ୟ ସାମାଜିକ ସୁରକ୍ଷା ଓ ଭିନ୍ନ କ୍ଷମ ସଶକ୍ତିକରଣ ସଚିବଙ୍କ ଉଚ୍ଚଶିକ୍ଷା, ବୈଷୟିକ ଶିକ୍ଷା ଓ ଗଣଶିକ୍ଷା ବିଭାଗକୁ ଲେଖିଛି ଚିଠି ।କେବଳ ଛାତ୍ରଛାତ୍ରୀ ନୁହନ୍ତି, ଅଧ୍ୟାପକ ବି ଦାଖଲ କରିବେ ଆଣ୍ଡି ଡ୍ରଗ୍ ଡିକ୍ଲାରେସନ। ବିଧାନ ସଭା ଷ୍ଡାଡିଂ କମିଟି ରାଜ୍ୟ ସରକାରଙ୍କୁ ସୁପାରିସ କରିଛି। ଅଧ୍ୟାପକଙ୍କ ଆଣ୍ଟିଡ୍ରଗ୍ ଡିକ୍ଲାରେସନ ଶିକ୍ଷାନୁଷ୍ଠାନରେ ଛାତ୍ରଛାତୀଙ୍କ ପାଇଁ ଆଦର୍ଶ ହେବ ବୋଲି କମିଟି ଅଧ୍ୟକ୍ଷ ଭୁପିନ୍ଦର ସିଂହ କହିଛନ୍ତି। ରାଜ୍ୟର ସବୁ +2, +3 ଓ ବିଶ୍ଵବିଦ୍ୟାଳୟ ଓ ଅଧ୍ୟାପକଙ୍କ ପାଇଁ ଏପରି ସୁପାରିସ କରିଛି କମିଟି ।..
ସେପଟେ କ୍ୟାମ୍ପସକୁ ନିଶାମୁକ୍ତ କରିବାକୁ ସରକାରଙ୍କ ଉଦମ୍ୟକୁ ପ୍ରଶଂସା କରିଛି ୬୬୨ ବର୍ଗ କଲେଜ ଅଧ୍ୟାପକ ସଂଘ। ପୂର୍ବରୁ ଛାତ୍ରଛାତ୍ରୀଙ୍କ ପାଇଁ ଏହି ନିୟମ ଥିବାବେଳେ ଏବେ ଅଧ୍ୟାପକଙ୍କ ପାଇଁ ଲାଗୁହେବା ସ୍ବାଗତ ଯୋଗ୍ୟ। ଅଧ୍ୟାପକମାନେ ମାର୍ଜିତ ହେଲେ ଛାତ୍ରଛାତ୍ରୀଙ୍କ ଉପରେ ଏହାର ପ୍ରଭାବ ପଡିବ ।ଏଥିଲାଗି ବିଧାନସଭା ଷ୍ଟାଣ୍ଡିଂ କମିଟିକୁ ଧନ୍ୟବାଦ ଦେଇଛି ଅଧ୍ୟାପକ ସଂଘ।
ପ୍ରତିରକ୍ଷା କ୍ଷେତ୍ରରେ ଶକ୍ତିଶାଳୀ ହେଉଛି ଭାରତ
ନନ୍ଦିଘୋଷ ବ୍ୟୁରୋ: ପ୍ରତିରକ୍ଷା କ୍ଷେତ୍ରରେ ଶକ୍ତିଶାଳୀ ହେଉଛି ଭାରତ। ସୋମବାର DRDO ଲଞ୍ଚ କରିଛି ଉଗ୍ରମ ନାମକ ରାଇଫଲ୍ । 7.62 x 51 ମିଲିମିଟର କ୍ୟାଲେବରର ଅତ୍ୟାଧୁନିକ ରାଇଫଲ ଉଗ୍ରମ । ସ୍ୱଦେଶୀ ଜ୍ଞାନ କୌଶଳରେ ନିର୍ମିତ ଏହି ରାଇଫଲର ପରିସର ୫୦୦ ମିଟର ଏବଂ ଏହାର ଓଜନ ଚାରି କିଲୋଗ୍ରାମରୁ କମ୍ ଅଟେ । ଏଥିପାଇଁ ପାଇଁ ୬୦ କୋଟି ଟଙ୍କା ଖର୍ଚ୍ଚ କରିଛି DRDO ।
DRDOର ପୁଣେ-ଆଧାରିତ ଆର୍ମାମେଣ୍ଟ ରିସର୍ଚ ଆଣ୍ଡ ଡେଭଲପମେଣ୍ଟ ଏଷ୍ଟାବ୍ଲିସମେଣ୍ଟ (ARDE) ଏବଂ ହାଇଦ୍ରାବାଦ ସ୍ଥିତ ଏକ ଘରୋଇ ସଂସ୍ଥା ସହଯୋଗରେ ଏହାକୁ ବିକଶିତ କରାଯାଇଛି। ଏହାକୁ ସଶସ୍ତ୍ର ବାହିନୀ, ସାମରିକ ବାହିନୀ ଏବଂ ରାଜ୍ୟ ପୋଲିସ୍ ୟୁନିଟ୍ ବ୍ୟବହାର କରିବାକୁ ଡିଜାଇନ୍ କରାଯାଇଛି। ଏହା ସମସ୍ତ ବାହୀନର ଆବଶ୍ୟକତା ପୂରଣ କରିବାରେ ସକ୍ଷମ ହେବ। ଋଷ-ୟୁକ୍ରେନ ମଧ୍ୟରେ ଚାଲିଥିବା ଯୁଦ୍ଧ ଯୋଗୁଁ AK-203 ରାଇଫଲ ଆମଦାନୀ ପ୍ରଭାବିତ ହୋଇଛି । ରାଇଫଲ ଉଗ୍ରମ ଭାରତୀୟ ସେନାଙ୍କ ଆବଶ୍ୟକତା ପୂରଣ କରିବାରେ ସହାୟକ ହେବ।
ବୁଲା କୁକୁରଙ୍କର ହେବ ବନ୍ଧ୍ୟାକରଣ, ହାଇକୋର୍ଟରୁ ବିଏମସିକୁ ମିଳିଲା ଗ୍ରୀନ ସିଗନାଲ
ଭୁବନେଶ୍ବର: ବୁଲା କୁକୁରଙ୍କର ହେବ ବନ୍ଧ୍ୟାକରଣ । ଦୀର୍ଘ ୭ମାସରୁ ଉର୍ଦ୍ଦ ସମୟର ବ୍ୟବଧାନ ପରେ ରାଜଧାନୀରେ ଥିବା ବୁଲା କୁକୁରଙ୍କର ହେବ ବନ୍ଧ୍ୟାକରଣ। ଆସନ୍ତା ୨ ରୁ ୩ ଦିନ ମଧ୍ୟରେ ଏନେଇ ଆରମ୍ଭ ହେବ ପ୍ରକ୍ରିୟା। ହାଇକୋର୍ଟଙ୍କ ବନ୍ଧ୍ୟାକରଣକୁ ନେଇ ରହିତାଦେଶ ଉଠିବା ପରେ ବିଏମସି ଏବେ ବନ୍ଧ୍ୟାକରଣକୁ ନେଇ ତତ୍ପରତା ଦେଖାଇଛି ।
ବୁଲା କୁକୁର, ବିଏମସି ଓ ବନ୍ଧ୍ୟାକରଣ। ହାଇକୋର୍ଟରୁ ବିଏମସିକୁ ମିଳିଲା ଗ୍ରୀନ ସିଗନାଲ। ହାଇକୋର୍ଟଙ୍କ ରହିତା ଦେଶ ଉଠିବା ପରେ ପ୍ରସ୍ତୁତି ଆରମ୍ଭ କରିଛି ବିଏମସି । ଗଳି କନ୍ଦି ହେଉ କି ସହର, ଯେଉଁଠାରେ ବି ବୁଲା କୁକୁର ଦେଖିବ ଉଠାଇ ନେବ ବିଏମସି। କମିବ ବୁଲା କୁକୁରଙ୍କ ଦୌରାତ୍ମ୍ୟ । ସହରିଆଙ୍କୁ ମିଳିବ ଆଶ୍ୱସ୍ତି । ଗତ ଜୁଲାଇ ମାସରୁ କୁକୁର ବନ୍ଧ୍ୟାକରଣ ଉପରେ ହାଇକୋର୍ଟଙ୍କ ଥିବା ରହିତାଦେଶ ଗତକାଲି ଉଠିବା ପରେ ଏବେ ତତ୍ପର ବିଏମସି । ଆଜି ବିଏମସି କାର୍ଯ୍ୟାଳୟରେ ଏକ ବୈଠକ ଡକାଇ ସମସ୍ତଙ୍କୁ ପ୍ରସ୍ତୁତ ହେବାକୁ ନିର୍ଦ୍ଦେଶ ଦେଇଛନ୍ତି କମିଶନର। ମଞ୍ଚେଶ୍ୱରରେ ପ୍ରାୟ ଏକ କୋଟି ଟଙ୍କା ଖର୍ଚ୍ଚରେ ବିଏମସି ତିଆରି କରିଛି ଡଗ୍ କେନେଲ୍ ।ଏଠାରେ ପ୍ରତିଦିନ ୧୦୦ କୁକୁରଙ୍କ କରାଯିବ ବନ୍ଧ୍ୟାକରଣ । ସେଥିପାଇଁ ମୋଟ୍ ୧୦ଟି କେଭ୍ ସହ ଅପରେସନ୍ ଥିଏଟର୍ ଓ ଅନ୍ୟାନ୍ୟ ଯନ୍ତ୍ରାଶଂ କ୍ରୟ କରିଛି ବିଏମସି । ହୋଇକୋର୍ଟଙ୍କ ରହିତାଦେଶ ଉଠିବା ପରେ ଆସନ୍ତା ଦୁଇ ରୁ ତିନି ଦିନ ମଧ୍ୟରେ ବନ୍ଧ୍ୟାକରଣ ପକ୍ରିୟା ଯୋରଦାର ହେବ ବୋଲି କହିଛନ୍ତି କମିଶନର ।
କୁକୁର ବନ୍ଧ୍ୟାକରଣ ପାଇଁ ବିଏମସି ଭିତ୍ତିଭୂମି ଯୋଗାଇବା ସହ ଭେଟ୍ ଫର୍ ଆନିମଲ୍ସ ସଂସ୍ଥା କୁକୁର ଧରିବା, ବନ୍ଧ୍ୟାକରଣ ଓ ଟୀକା ଦେବା ପର୍ଯ୍ୟନ୍ତ ସମସ୍ତ ଦାୟିତ୍ୱ ବହନ କରିବ ପାଇଁ ଚୁକ୍ତି ନାମା ସ୍ବାକ୍ଷର କରିଛି । ଏନେଇ ପ୍ରତି କୁକୁର ପିଛା ବିଏମସି ସଂପୃକ୍ତ ସଂସ୍ଥାକୁ ୧,୬୫୦ଟଙ୍କା ଦେବ । ବର୍ତ୍ତମାନ ଭୁବନେଶ୍ବରରେ ପାଖାପାଖି ୬୦ହଜାର କୁକୁର ରହିଛନ୍ତି । ଆଉ ଏତେ ସଂଖ୍ୟକ କୁକୁର ବନ୍ଧ୍ୟାକରଣ ବିଏମସି ପାଇଁ ବଡ ଚ୍ୟାଲେଞ୍ଜ।
କାନ୍ଥରେ ଓଡିଶୀ, ଜଗନ୍ନାଥଙ୍କ ଚିତ୍ର, ନୂଆ ରୂପ ଦେଇଛନ୍ତି ଅଧ୍ୟାପିକା
ପଟାଙ୍ଗୀ: ଅଧ୍ୟାପିକାଙ୍କ ଅନନ୍ୟ କଳାକୃତ୍ତି। ପାଚେରୀରେ ଦେବା ଦେବୀ ସହ ଲୋକ କଳାର ଝଲକ। ଅବସର ସମୟ ମିଳିଲେ ତୂଳୀ ଧରି ବସିପଡନ୍ତି । ସେମିଲିଗୁଡା ମହାବିଦ୍ୟାଳୟର ଅଧ୍ୟାପିକା ଡକ୍ଟର ବିଦ୍ୟୁତପ୍ରଭା ରାଉତ କାନ୍ଥରେ ସୁନ୍ଦର ଚିତ୍ର ଆଙ୍କି ପ୍ରଶଂସା ସାଉଁଟିଛନ୍ତି। ତାଙ୍କର ପେନସିଲ ଆର୍ଟ, ଅଏଲ ପେଣ୍ଟିଂ, ମଡ଼ର୍ଣ୍ଣ ଆର୍ଟର ସୌନ୍ଦର୍ଯ୍ୟ ଲୋକଙ୍କୁ ଆଶ୍ଚର୍ଯ୍ୟ କରେ।
କାନ୍ଥରେ ଓଡିଶୀ, ଜଗନ୍ନାଥଙ୍କ ଚିତ୍ର । ଢୋଲ ସହ ମନ୍ଦିର ଚିତ୍ର ବି ହୋଇଛି । ଏଭଳି ଅନନ୍ୟ କଳାକୃତି ପ୍ରଦର୍ଶନ କରିଛନ୍ତି ଜଣେ ଅଧ୍ୟାପିକା । ସେମିଲିଗୁଡା ମହାବିଦ୍ୟାଳୟର ଅଧ୍ୟାପିକା ଡକ୍ଟର ବିଦ୍ୟୁତପ୍ରଭା ରାଉତ କାନ୍ଥରେ ସୁନ୍ଦର ଚିତ୍ର ଆଙ୍କି ପ୍ରଶଂସା ସାଉଁଟିଛନ୍ତି। ବିଦ୍ୟାର୍ଥୀଙ୍କୁ ଶିକ୍ଷାଦାନ କରିବା ପରେ ଟିକେ ଅବସର ସମୟ ମିଳିଲେ ତୂଳୀ ଧରି ବସିପଡନ୍ତି। ତାଙ୍କର ପେନସିଲ ଆର୍ଟ, ଅଏଲ ପେଣ୍ଟିଂ, ମଡ଼ର୍ଣ୍ଣ ଆର୍ଟର ସୌନ୍ଦର୍ଯ୍ୟ ଲୋକଙ୍କୁ ଆଶ୍ଚର୍ଯ୍ୟ କରେ। ଚିତ୍ରକଳାରେ ବିଧିବଦ୍ଧ ଭାବେ କୌଣସି ଡିଗ୍ରୀ ହାସଲ କରିନଥିଲେ ମଧ୍ୟ ସୁନ୍ଦର ଚିତ୍ର ଆଙ୍କିପାରନ୍ତି । ସେମିଳିଗୁଡ଼ା ମହାବିଦ୍ୟାଳୟର ପ୍ରାୟ ଦେଢ଼ ଶହ ମିଟର ଦୀର୍ଘ ପାଚେରୀକୁ ଏକୁଟିଆ ନିଜର ଚିତ୍ରକଳାରେ ସଜ୍ଜିତ କରିଛନ୍ତି ।
ପିଲାଟି ବେଳରୁ ଅଧ୍ୟାପିକା ଡକ୍ଟର ବିଦ୍ୟୁତପ୍ରଭା ରାଉତଙ୍କ ନିଶା ହେଉଛି ଚିତ୍ର ଆଙ୍କିବା । ଆଗରୁ ଘରେ ଚିତ୍ର ଆଙ୍କୁ ଥିଲେ । ରାଜ୍ୟ ସରକାର ଙ୍କ ନୂଆ ଓଡିଶା ଯୁବ ଓଡିଶା ନବୀନ ଓଡିଶା କାର୍ଯ୍ୟକ୍ରମରେ ଏବେ ନିଜ କଲେଜ କାନ୍ଥରେ ଚିତ୍ର ଆଙ୍କିବା ପାଇଁ ସୁଯୋଗ ପାଇଲେ । ନିଜେ କଲେଜ କାନ୍ଥରେ ଚିତ୍ର ଆଙ୍କିବା ସହିତ ଛାତ୍ର ଛାତ୍ରୀ ମାନଙ୍କୁ ଚିତ୍ର ଆଙ୍କିବା ପାଇଁ ଉତ୍ସାହିତ କରୁଛନ୍ତି । କଲେଜ କାନ୍ଥ ଗୁଡିକ ଏବେ ବିଭିନ୍ନ ଚିତ୍ର ରେ ପରିପୂର୍ଣ୍ଣ ।
ମା’ଙ୍କ ଅନନ୍ୟ ମହିମା, ଡାକିଲେ ଶୁଣନ୍ତି ମା’ ପିଙ୍ଗଳାକ୍ଷୀ
ନିମାପଡ଼ା: ନିମାପଡା ଡେଣୁଅଁ ଗାଁର ଅଧିଷ୍ଠାତ୍ରି ଦେବୀ “ମା ପିଙ୍ଗଳାକ୍ଷୀ” । ୬୦୦ ବର୍ଷର ପୁରାତନ ମନ୍ଦିର। ମନ୍ଦିର ବର୍ଣ୍ଣନା କରୁଛି ଅନେକ କାର୍ତ୍ତିରାଜି। ପୁରୀ ରାଜା ପ୍ରତାପରୁଦ୍ର ଦେବଙ୍କ ସମୟରୁ ସ୍ଥାପିତ ହୋଇଥିଲା ଏହି ମନ୍ଦିର। ପୂରାତନ ମନ୍ଦିର ଦର୍ଶନ ପାଇଁ ପହଞ୍ଚନ୍ତି ଭକ୍ତ।
ପ୍ରାଚୀନ ଐତିହ୍ୟର କିମ୍ବଦନ୍ତୀ । ପୁରୀ ନିମାପଡା ବ୍ଲକ ଅଧିନ ଡେଣୁଅଁ ଗାଁର ଅଧିଷ୍ଠାତ୍ରି ଦେବୀ “ମା ପିଙ୍ଗଳାକ୍ଷୀ” । ୬୦୦ ବର୍ଷର ପୁରାତନ ମନ୍ଦିର । ମନ୍ଦିର ବର୍ଣ୍ଣନା କରୁଛି ଅନେକ କାର୍ତ୍ତିରାଜି । ପୁରୀ ରାଜା ପ୍ରତାପରୁଦ୍ର ଦେବଙ୍କ ସମୟରୁ ସ୍ଥାପିତ ହୋଇଥିଲା ଏହି ମନ୍ଦିର । ମନ୍ଦିରର ଉଚ୍ଚତା ୪୨ ଫୁଟ ରହିଥିବା ବେଳେ ଏହାର ମୁଖସାଳାର ଉଚ୍ଚତା ୨୭ ଫୁଟ ରହିଛି । ମା’ ପିଙ୍ଗଳାକ୍ଷୀଙ୍କ ମନ୍ଦିରଟି ୧୫୦୬ ମସିହା ପୂର୍ବରୁ ନିର୍ମାଣ କାର୍ଯ୍ୟ ଆରମ୍ଭ ହୋଇଥିବା ପୋଥିରେ ଉଲ୍ଲେଖ ରହିଛି ।
ମାଆଙ୍କ ଅପାର ମହିମା। ଭକ୍ତ ଡାକିଲେ ମାଆ ଶୁଣନ୍ତି ବୋଲି ବିଶ୍ବାସ । ପୂର୍ବରୁ ମାଆଙ୍କର ନାମ ପିଙ୍ଗଳା ରହିଥିବା ନେଇ ସ୍ୱପ୍ନାଦେଶ ହୋଇଥିଲାରୁ ମା ପିଙ୍ଗଳାକ୍ଷୀ ନାମରେ ନାମିତ ବୋଲି ଅନୁମାନ କରାଯାଏ । ମାଆଙ୍କ ପାଖରେ ଦହିପଖାଳ ଭୋଗ କରାଯାଏ । ଅନ୍ୟନ୍ୟ ଦେବୀଙ୍କ ମନ୍ଦିରରେ ଆମିଷ ଭୋଗ ବ୍ୟବସ୍ତା ଥିଲେ ମଧ୍ୟ ଏଠାରେ ତାହାର ବିତିକ୍ରମ ଦେଖା ଯାଏ। ଏହି ସ୍ଥାନରେ ନିରାମିଷ ଭୋଗ ଲାଗି ହୁଏ।