ଅହମ୍ମଦାବାଦ: ଦେଶରେ ପିଛା ଛାଡୁନି ବୋରଓ୍ବେଲ ଟ୍ରାଜେଡି । ନୂଆ ବର୍ଷ ଆରମ୍ଭରୁ ବିପତ୍ତି । ଗୁଜରାଟର ଦେବଭୂମି ଦ୍ବାରକା ଜିଲ୍ଲାରେ ଏକ ଖୋଲା ନଳକୂଅରେ ଖସିପଡିଛି ଅଢ଼େଇ ବର୍ଷର ଶିଶୁକନ୍ୟା । ଦ୍ବାରକାର କଲ୍ୟାଣପୁର ତାଲୁକାର ରାନ ଗ୍ରାମରେ ଖେଳୁଥିବା ଅବସ୍ଥାରେ ଖୋଲା ନଳକୂଅରେ ଖସିପଡିଥିଲା ଆଞ୍ଜେଲ ସଖ୍ରା । ଖବର ପାଇବା ପରେ ଜିଲ୍ଲାପାଳ ଅଶୋକ ଶର୍ମା ଘଟଣାସ୍ଥଳକୁ ଯାଇ ସ୍ଥିତି ସମୀକ୍ଷା କରିଛନ୍ତି । ସେ କହିଛନ୍ତି ଶିଶୁଟି ୩୦ ଫୁଟ ଭିତରେ ଲାଖିଛି । ସେଠାରେ ସ୍ବାସ୍ଥ୍ୟ, ଅଗ୍ନିଶମ ଓ ଉଦ୍ଧାରକାରୀ ଟିମ୍ ଉପସ୍ଥିତ ଥାଇ ଉଦ୍ଧାର କାର୍ଯ୍ୟ ଜାରି ରଖିଛନ୍ତି । ରେସ୍କ୍ୟୁ ଅପରେସନରେ ସାମିଲ ହୋଇଛନ୍ତି ଇଣ୍ଡିଆନ ଆର୍ମିର ଏକ ଟିମ ।
ଗ୍ୟାଙ୍ଗଷ୍ଟାର ଗୋଲ୍ଡି ଆତଙ୍କବାଦୀ ଘୋଷିତ
ନନ୍ଦିଘୋଷ ବ୍ୟୁରୋ: ଗ୍ୟାଙ୍ଗଷ୍ଟାର ଗୋଲ୍ଡି ବ୍ରାର ଆତଙ୍କବାଦୀ ଘୋଷିତ । ବେଆଇନ କାର୍ଯ୍ୟକଳାପ ନିରାକରଣ ଆଇନ ବା UAPA ଅନୁସାରେ ଗୋଲ୍ଡିକୁ ଆତଙ୍କବାଦୀ ଘୋଷଣା କଲା କେନ୍ଦ୍ର ଗୃହ ମନ୍ତ୍ରାଳୟ । ପଞ୍ଜାବର ପ୍ରଖ୍ୟାତ ଗାୟକ ସିଦ୍ଧୁ ମୋସେଓ୍ବାଲା ହତ୍ୟା ଘଟଣାରେ ଜଡିତ ଥିଲା ଗୋଲ୍ଡି । ବେଆଇନ ଘୋଷିତ ଖଲିସ୍ତାନୀ ସଂଗଠନ ବାବର ଖଲସା ଇଣ୍ଟରନ୍ୟାସନାଲ ସହ ତାର ସମ୍ପର୍କ ଥିବା ନେଇ ହୋଇଥିଲା ଅଭିଯୋଗ । କେନ୍ଦ୍ର ଗୃହ ମନ୍ତ୍ରାଳୟ କହିଛି- ବିଭିନ୍ନ ହତ୍ୟାକାଣ୍ଡ, ବିଭିନ୍ନ ଜାତୀୟତାବାଦୀ ନେତାଙ୍କୁ ଧମକ, ବଟି ମାଗିବା ଆଦି ଘଟଣାରେ ସେ ଥିଲା ସମ୍ପୃକ୍ତ । ପୂର୍ବରୁ କାନାଡା ସରକାର ପକ୍ଷରୁ ଘୋଷିତ ୨୫ ଜଣ ଓ୍ବାଣ୍ଟେଡ କ୍ରିମିନାଲ ତାଲିକାରେ ଗୋଲ୍ଡିର ନାମ ଥିଲା । ୨୦୧୭ରେ ଛାତ୍ର ଭିସା ନେଇ କାନାଡା ଚାଲିଯାଇଥିଲା ଗୋଲ୍ଡି । ୨୦୨୨ ମେ ୨୯ରେ ଶୁଭଦୀପ ସିଂ ସିଦ୍ଧୁ ଓରଫ ସିଦ୍ଧୁ ମୋସେଓ୍ବାଲା ହତ୍ୟା ଘଟଣାରେ ନିଜକୁ ଦାୟୀ କରିଥିଲା ଗୋଲ୍ଡି ।
ନୂଆ ବର୍ଷରେ ପୁରୀ ଶୃଙ୍ଖଳିତ, ରାଜ୍ୟ ସରକାର ଓ ପୁରୀ ପୋଲିସ୍କୁ ପ୍ରଶଂସା କଲେ ଭକ୍ତ
ପୁରୀ: ଶ୍ରୀଜଗନ୍ନାଥ ଦର୍ଶନ ପାଇଁ ଅତ୍ୟନ୍ତ ଶୃଙ୍ଖଳିତ ବ୍ୟବସ୍ଥା କରିଥିବାରୁ ପୁରୀ ପୋଲିସ୍କୁ ସବୁଆଡୁ ପ୍ରଶଂସା ମିଳିବାରେ ଲାଗିଛି । ମହାପ୍ରଭୁଙ୍କ ଦର୍ଶନ ସାରି ଫେରୁଥିବା ଲୋକେ ରାଜ୍ୟ ସରକାର ଓ ପୁରୀ ପୋଲିସ୍କୁ ପ୍ରଶଂସାରେ ପୋତି ପକାଉଥିବାବେଳେ କେତେକ ଭକ୍ତ ପୋଲିସ୍ର ଏଭଳି ସୁବନ୍ଦୋବସ୍ତ ପାଇଁ ଶହେରୁ ଶହେ ନମ୍ବର ପାଇବାକୁ ହକ୍ଦାର ବୋଲି କହିବାକୁ ପଛାଉ ନାହାନ୍ତି ।
ନୂଆବର୍ଷରେ ଭକ୍ତମାନଙ୍କ ଭିଡକୁ ଦୃଷ୍ଟିରେ ରଖି ଏହାକୁ କିଭଳି ଶୃଙ୍ଖଳିତ କରାଯାଇ ପାରିବ ସେଥିପାଇଁ ପୋଲିସ୍ ପ୍ରଶାସନ ଅଣ୍ଟା ଭିଡିଥିଲା । କେନ୍ଦ୍ରାଞ୍ଚଳ ଆଇଜି ଡକ୍ଟର ଆଶିଷ ସିଂହଙ୍କ ପ୍ରତ୍ୟକ୍ଷ ତତ୍ୱାବଧାନରେ ପୋଲିସ୍ ଏସ୍ପି ବି.କେ.ସିଂହ ଏହାର ତଦାରଖ କରିଥିଲେ । ବଡଦାଣ୍ଡରୁ ଭକ୍ତଙ୍କ ଧାଡି ଲଗାଇବା ଠାରୁ ଆରମ୍ଭ କରି ମନ୍ଦିର ଭିତରେ ଯେଭଳି ସୁରୁଖୁରୁରେ ତିନି ଠାକୁରଙ୍କ ଦର୍ଶନ କରିପାରିବେ ସେଥିପାଇଁ ପଦକ୍ଷେପ ନିଆଯାଇଥିଲା ।
ତେବେ ରାଜ୍ୟ ସରକାର ଭକ୍ତଙ୍କ ପାଇଁ ନୂଆକରି ତିଆରି କରିଥିବା ଶୀତତାପ ନିୟନ୍ତ୍ରଣ ଟନେଲ ଏଥିରେ ବିଶେଷ ସହାୟକ ହୋଇଥିଲା । ଭକ୍ତମାନେ ଶୀତତାପ ନିୟନ୍ତ୍ରିତ ଟନେଲରେ ଧାଡିରେ ଛିଡା ହେବା ସହିତ ଆବଶ୍ୟକ ସ୍ଥଳେ ବସିବାର ସୁଯୋଗ ପାଉଥିଲେ । ନିକଟରେ ସେମାନଙ୍କ ପାଇଁ ଶୌଚାଳୟର ବ୍ୟବସ୍ଥା ହୋଇଥିଲା । ତେଣୁ ଭକ୍ତମାନେ ପୂର୍ବଭଳି ଆଉ କ୍ଲାନ୍ତି ଅନୁଭବ କରିନଥିଲେ । ପୁଲିସ୍ ପ୍ରଶାସନ ମଧ୍ୟ ଏହା ଉପରେ ସତର୍କ ନଜର ରଖିଥିଲା ।
ପ୍ରଶାସନର ପୂର୍ବ ଘୋଷଣା ଅନୁଯାୟୀ ୩୧ ତାରିଖ ରାତିରୁ ଦର୍ଶନ ବ୍ୟବସ୍ଥା ଜାରି ରହିଛି । ଆଜି ସଂଧ୍ୟା ସୁଦ୍ଧା ପ୍ରାୟ ୩.୭୫ ଲକ୍ଷ ଭକ୍ତ ମନ୍ଦିର ଭିତରେ ଦର୍ଶନ କରି ସାରିଲେଣି । ହେଲେ ପୁଲିସ୍ର ସତର୍କ ଦୃଷ୍ଟି ଯୋଗୁଁ କୌଣସି ଅଘଟଣ ସାମ୍ନାକୁ ଆସିନାହିଁ । ଦର୍ଶନ ସାରି ବଡଦାଣ୍ଡକୁ ଫେରୁଥିବା ପଶ୍ଚିମବଙ୍ଗର ଜଣେ ଶିକ୍ଷୟତ୍ରୀ ପାରମିତା ମୁଖାର୍ଜୀ ପୁଲିସ୍ ପ୍ରଶାସନର ବନ୍ଦୋବସ୍ତକୁ ଭୁରି ଭୁରି ପ୍ରଶଂସା କରିବା ସହିତ ଏଥିପାଇଁ ପୁଲିସ୍ ପ୍ରଶାସନ ଶହେରୁ ଶହେ ନମ୍ବର ପାଇବା ଉଚିତ୍ ବୋଲି କହିଥିଲେ । ସେହିଭଳି ଛତିଶଗଡରୁ ଆସିଥିବା ଶ୍ୱେତା, ପୁନେରୁ ପରିବାର ସହିତ ଆସିଥିବା ସୁରେଖା ରବିକାନ୍ତ, ଖୋରଧାରୁ ଆସିଥିବା କଳ୍ପନା ସେଠୀ, ପାଟନାରୁ ଆସିଥିବା ପୂର୍ଣ୍ଣିମା ଓ ଆଶୁତୋଷ ଏବଂ ଉତ୍ତରପ୍ରଦେଶ ଗୋଣ୍ଡାରୁ ଆସିଥିବା ଈଶ୍ୱର ଶ୍ରବଣ ମିଶ୍ର ରାଜ୍ୟ ସରକାର ଓ ପୁରୀ ପୁଲିସ୍ର ଦର୍ଶନ ବନ୍ଦୋବସ୍ତକୁ ପ୍ରଶଂସାରେ ପୋତି ପକାଇଛନ୍ତି ।
ନୂଆବର୍ଷରେ ନୂଆ ନିୟମ: ମନ୍ଦିର ଭିତରକୁ ପାନ, ଗୁଟଖା, ପଲିଥିନ ଓ ପ୍ଲାଷ୍ଟିକ ନିଷେଧ
ଭୁବନେଶ୍ବର: ନୂଆବର୍ଷରେ ଲିଙ୍ଗରାଜ ମନ୍ଦିରରେ ନୂଆ ନିୟମ । ଭକ୍ତ ହୁଅନ୍ତୁ ବା ସେବାୟତ । ମନ୍ଦିର ପରିସରରେ ଖାଇ ପାରିବେନି ପାନ, ଗୁଟଖା । ମନ୍ଦିର ଭିତରକୁ ପଲିଥିନ ଓ ପ୍ଲାଷ୍ଟିକ ଗ୍ଲାସ ନେବା ନିଷେଧ । ଏସବୁ ନିୟମକୁ କଡ଼ାକଡ଼ି ପାଳନ ପାଇଁ ନିର୍ଦ୍ଦେଶ ଦେଇଛି ଲିଙ୍ଗରାଜ ମନ୍ଦିର ପ୍ରଶାସନ । ସେହିଭଳି ଲିଙ୍ଗରାଜଙ୍କ କୋଠ ଭୋଗ କେବଳ ଓମଫେଡ ଘିଅରେ ପ୍ରସ୍ତୁତ ପାଇଁ ପ୍ରଶାସନ ନିଷ୍ପତ୍ତି ନେଇଛି । ନୂଆ ବର୍ଷ ଓ ସୋମବାର ଥିବାରୁ ମନ୍ଦିର ପ୍ରବଳ ଭିଡ ସତ୍ତ୍ୱେ ସାହାଣ ମେଲା ଦର୍ଶନ କରି ଶ୍ରଦ୍ଧାଳୁ ଖୁସି ଲାଭ କରିଥିଲେ । ସବୁଦିନ ଭଳି ସକାଳ ୫ ଟାରେ ଖୋଲିବା ସହ ହୋଇଥିଲା ବାବାଙ୍କ ନିତିକାନ୍ତି ।
ଲିଙ୍ଗରାଜ ପରେ ରାମ ମନ୍ଦିରରେ ନୂଆ ବର୍ଷରେ ଦର୍ଶନ କରିବା ପାଇଁ ଲାଗିଥିଲା ଭିଡ । ବର୍ଷର ପ୍ରଥମ ଦିନରେ ପ୍ରଭୁ ଶ୍ରୀରାମଙ୍କ ଦର୍ଶନ କଲେ ପୁରା ବର୍ଷ ସୁଖ ଓ ଶାନ୍ତିରେ କଟିବ ବୋଲି ଆଶା ରଖିଥିଲେ ଶ୍ରଦ୍ଧାଳୁ । ତେଣୁ କିଏ ପରିବାର ସାଙ୍ଗରେ ଆସିଥିଲା ତ ଆଉ କିଏ ମୁଖ୍ୟ ରାସ୍ତାରୁ ଦୁଇପଟରୁ ଲମ୍ବା ଲାଇନରେ ରହି ଦର୍ଶନ କରିଥିଲେ ।
ସୁରକ୍ଷା ଦୃଷ୍ଟିରୁ ମନ୍ଦିର ଗୁଡିକରେ ବାହାରେ ଓ ଭିତର ପାଖରେ ଭିଡ ନିୟନ୍ତ୍ରଣ ପାଇଁ ପୋଲିସ ମୁତୟନ ହୋଇଥିଲେ ।
ଜାନୁଆରୀ ୬ରୁ BSKY ନବୀନ କାର୍ଡ ପାଇଁ ଅନଲାଇନ ପଞ୍ଜିକରଣ
ଭୁବନେଶ୍ବର: ଜାନୁଆରୀ ୬ରୁ ବିଏସକେଓ୍ବାଇ ନବୀନ କାର୍ଡ ଲାଗି ଅନଲାଇନ ପଞ୍ଜୀକରଣ ଆରମ୍ଭ । ଜାନୁଆରୀ ୧୬ ତାରିଖ ଯାଏ ଖୋଲା ରହିବ ପୋର୍ଟାଲ । ଯେଉଁ ହିତାଧିକାରୀ ବିଏସକେଓ୍ବାଇ କାର୍ଡ ପାଇନାହାନ୍ତି ସେମାନେ ନାମ ପଞ୍ଜୀକରଣ କରିପାରିବେ । ସରକାରୀ କର୍ମଚାରୀ, ସରକାରୀ ପେନସନ ଉପଭୋକ୍ତା ଓ କରଦାତାମାନେ ଏଥିଲାଗି ଉପଯୁକ୍ତ ବିବେଚିତ ହେବେ ନାହିଁ । ଅନଲାଇନ ପଞ୍ଜୀକରଣ ଲାଗି ଲୋକଙ୍କ ମଧ୍ୟରେ ସଚେତନତା ସୃଷ୍ଟି ଲାଗି ଆହ୍ବାନ ଦିଆଯାଇଛି । ବର୍ତ୍ତମାନ ବିଏସକେଓ୍ବାଇ ଅନ୍ତର୍ଭୁକ୍ତ ହୋଇ ନଥିବା ବ୍ୟକ୍ତିମାନେ ବିଏସକେଓ୍ବାଇ ନବୀନ କାର୍ଡ ଲାଗି ଯୋଗ୍ୟ ବିବେଚିତ ହେବ । ହିତାଧିକାରୀମାନେ ତାଲିକାଭୁକ୍ତ ଘରୋଇ ହସ୍ପିଟାଲରେ ନିର୍ଦ୍ଧାରିତ ଗୁରୁତର ଅର୍ଥାତ କ୍ରିଟିକାଲ ରୋଗଗୁଡିକ ଲାଗି ଦେୟମୁକ୍ତ ଚିକିତ୍ସା ପାଇପାରିବେ । ବିଏସକେଓ୍ବାଇ ନବୀନ କାର୍ଡରେ ପ୍ତି ପରିବାର ପାଇଁ ବାର୍ଷିକ ୫ ଲକ୍ଷ ଟଙ୍କା ଏବଂ ମହିଳା ସଦସ୍ୟଙ୍କ ଲାଗି ୧୦ ଲକ୍ଷ ଟଙ୍କା ପର୍ଯ୍ୟନ୍ତ ଦେୟମୁକ୍ତ ଚିକିତ୍ସା ବ୍ୟବସ୍ଥା ରହିଛି । ହିତାଧିକାରୀମାନେ ଆସନ୍ତା ମେ ୧ ତାରିଖଠାରୁ ଏହି ସୁବିଧା ପାଇବେ । ହିତାଧିକାରୀମାନେ www.bskynabin.odisha.gov.in ପୋର୍ଟାଲରେ ଆବେଦନ କରିପାରିବେ ।
ଆଇଟି ହବ୍ ହେବ ରାଉରକେଲା, ରାଜ୍ୟ ସରକାରଙ୍କ ପକ୍ଷରୁ ଖର୍ଚ୍ଚ କରାଯିବ ୨୫୦ କୋଟି
ଭୁବନେଶ୍ବର: ସ୍ପୋର୍ଟସ ହବ ପରେ ଆଇଟି ହବ୍ ହେବ ରାଉରକେଲା । ବେଙ୍ଗାଳୁରୁ ପରେ ପ୍ରମୁଖ ଆଇଟି ହବ୍ ପାଲଟିବ ଓଡ଼ିଶା । ରାଜ୍ୟ ସରକାରଙ୍କ ପକ୍ଷରୁ ଖର୍ଚ୍ଚ କରାଯିବ ୨୫୦ କୋଟି ଟଙ୍କା । ରାଉରକେଲା ସହରର ପାନ୍ଥନିବାସ ନିକଟରେ ରାଜ୍ୟ ସରକାରଙ୍କ ପକ୍ଷରୁ ନିର୍ମାଣ ହେଵ ୧୧ ମହଲାର ଆଇଟି ଟାଓ୍ବାର । ରାଜ୍ୟ ସରକାର ଅର୍ଥ ମଞ୍ଜୁର କରିବା ସହ ଇଡକୋ ଜରିଆରେ ନିର୍ମାଣ କାର୍ଯ୍ୟ ଆରମ୍ଭ ହେବ । ଓଡ଼ିଶାର ଉଚ୍ଚ ଶିକ୍ଷିତ ଟେକ୍ନିକାଲ ଛାତ୍ରଛାତ୍ରୀଙ୍କୁ ମିଳିବ ନିଯୁକ୍ତି ସୁଯୋଗ । ଏଥିପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଧନ୍ୟବାଦ ଜଣାଇଛନ୍ତି ମନ୍ତ୍ରୀ ଓ ଜିଲ୍ଲାବାସୀ ।
ଆଇଟି ଟାୱାର ନିର୍ମାଣ ହେଵାପରେ ଜାତୀୟ ଓ ଆନ୍ତର୍ଜାତୀୟ ପ୍ରତିଷ୍ଠିତ କମ୍ପାନୀ ଜରିଆରେ ନିଯୁକ୍ତ ପାଇବେ ଛାତ୍ରଛାତ୍ରୀ । ପୂର୍ବରୁ ରାଜ୍ୟ ବାହାରକୁ ଯାଉଥିବା ଛାତ୍ରଛାତ୍ରୀଙ୍କ ପାଇଁ ରାଜ୍ୟରେ ମିଳିବ ସୁଯୋଗ। ଓଡିଶା କ୍ରୀଡା ହବ୍ ପରେ ଆଇଟି ହବ୍ ହେଵାକୁ ଯାଉଥିବାରୁ ହକି ଇଣ୍ଡିଆ ସଭାପତି ପଦ୍ମଶ୍ରୀ ଡକ୍ଟର ଦିଲ୍ଲୀପ ତିର୍କୀ ମୁଖ୍ୟମନ୍ତ୍ରୀଙ୍କୁ କୃତଜ୍ଞତା ଜଣାଇଛନ୍ତି ।
ରାଉରକେଲାରେ ଆଇଟି ଟାୱାର ନିର୍ମାଣର ଆବଶ୍ୟକ ପୂର୍ଣ୍ଣାଙ୍ଗ ବିବରଣୀ ରିପୋର୍ଟ ପ୍ରସ୍ତୁତ କରିବା ପାଇଁ ଇନ୍ଦୋରର ଏକ କସନଲଟାନ୍ସି କମ୍ପାନୀକୁ ନିୟୋଜିତ କରାଯାଇଛି ।
ଇଣ୍ଡିଆନ୍ ଆଇଡଲରେ ପିପିଲିର ଚଷାପୁଅ ଶ୍ରୀନିବାସ ସ୍ବାଇଁ
ପୁରୀ: ପେସା ଚାଷ, କିନ୍ତୁ ନିଶା ଗୀତ ଗାଇବା । ସୋନି ଚ୍ୟାନେଲରେ ପ୍ରସାରିତ ଇଣ୍ଡିଆନ ଆଇଡଲରେ ଗୀତ ଗାଇ ଚର୍ଚ୍ଚାରେ ଡେଲାଙ୍ଗ ବେରବୋଇ ଅଞ୍ଚଳର ଶ୍ରୀନିବାସ ସ୍ବାଇଁ । ବେକାରୀ ସମସ୍ୟା ଉପରେ ଗୀତ ଗାଇ ସମସ୍ତଙ୍କ ପ୍ରଶଂସା ସାଉଁଟିଛନ୍ତି ଶ୍ରୀନିବାସ । ନିପଟ ଗାଁ ରୁ ଯାଇ ଇଣ୍ଡିଆନ ଆଇଡଲ ଭଳି ମଞ୍ଚରେ ଗୀତ ଗାଇବାର ସୁଯୋଗ ପାଇଥିଲେ ବି ନିଜର କୌଳିକ ବୃତ୍ତି ଛାଡ଼ି ନାହାନ୍ତି । ପରିବାରର ଆର୍ଥିକ ସ୍ଥିତି ସେତେଟା ଭଲ ନଥିଲେ ବି ସଙ୍ଗୀତ ସହ ରହିଛି ତାଙ୍କର ଭଲପାଇବା । ବର୍ତ୍ତମାନ ସୁଦ୍ଧା ସୁଦ୍ଧା ଦେଢ଼ ଶହରୁ ଅଧିକ ଗୀତ ଗାଇ ନିଜ ଦକ୍ଷତା ପ୍ରତିପାଦନ କରି ପାରିଛନ୍ତି ସୋନୁ । ତେଣୁ ତାଙ୍କୁ ସହୟାତା ମିଳିଲେ ସେ ଆହୁରୁ ଆଗକୁ ବଢି ପାରନ୍ତେ ବୋଲି କହିଛନ୍ତି ସମ୍ପର୍କୀୟ ଓ ଗ୍ରାମବାସୀ ।
ନୂଆବର୍ଷରେ ରାଜଧାନୀରେ ଫୁଲ ଦୋକାନରେ ଭିଡ଼, ଡିମାଣ୍ଡରେ ଥିଲା ଲିଲିୟମ, ଅର୍ଚିଡ ଭଳି ଦାମୀ ଫୁଲତୋଡା
ଭୁବନେଶ୍ବର: ନୂଆ ବର୍ଷ, ନୂଆ ସକାଳ । ସମସ୍ତଙ୍କ ହାତରେ ରଙ୍ଗୀନ ଫୁଲ । ଫୁଲ ଶୁଭ୍ରତାର ପ୍ରତୀକ । ଏଥିପାଇଁ ରାଜଧାନୀରେ ଫୁଲ ଦୋକାନରେ ଜମିଥିଲା ଭିଡ଼ । ଫୁଲ ତୋଡାର ଦାମ ଥିଲା ୨୦ ଟଙ୍କାରୁ ୫ ହଜାର ଟଙ୍କା । କିଏ ନେତା ମନ୍ତ୍ରୀଙ୍କ ପାଇଁ ତ ଆଉ କିଏ ନିଜ ଅଫିସରଙ୍କୁ ଶୁଭେଚ୍ଛା ଜଣାଇବାକୁ କିଣି ନେଇଥିଲେ । ଭୁବନେଶ୍ବର ଏଜି, ୯ ତାଲା, ନାଲୋକ, ସିଆରପି ଭଳି ପ୍ରମୁଖ ଫୁଲ ଦୋକାନରେ ଲାଗିଥିଲା ଗ୍ରାହକଙ୍କ ଭିଡ଼ । କିଏ ବୁକେ ନେଉଥିଲେ ତ ଆଉ କିଏ ବଞ୍ଚ ଓ ବାସ୍କେଟ । ଡିମାଣ୍ଡରେ ଥିଲା ଲିଲିୟମ, ଅର୍ଚିଡ ଦାମୀ ଫୁଲତୋଡା ।
ବର୍ଷସାରା ଫୁଲର ଚାହିଦା ରହିଥିବା ବେଳେ ନୂଆବର୍ଷରେ ଏହାର ଚାହିଦା ବେଶ ଅଧିକ ରହିଥାଏ । ସେଥିପାଇଁ କଲିକତା, ବେଙ୍ଗାଳୁରୁ, ଥାଇଲାଣ୍ଡ ଓ ହଂକଙ୍କରୁ ଫୁଲ ଦୋକାନୀ ବରାଦ କରିଥିଲେ । ୧୫ ପ୍ରକାର ଗୋଲାପ ଆସିଥିବା ବେଳେ, ଲିଲିୟମ, ଷ୍ଟାର ଫୁଲ, ଅର୍ଚିଡ, ଗ୍ଲାଡ଼ଓଲି, ଡଚରୋଜଲା, ବାର୍ଡ ଅଫ ପାରାଡାଇଜ, ଆନ୍ଥୋରିୟମ, ସେବତୀ ଥିଲା ବେଶ ପସନ୍ଦ । ପ୍ରତି ଦୋକାନରେ ଫୁଲ ତୋଡା ତିଆରି କରିବା ପାଇଁ ୮ ରୁ ୯ ଜଣ କାରିଗର ଲାଗିଥିଲେ ।
ଚଳିତ ବର୍ଷ ଫୁଲ ଗୁଚ୍ଛ ପାଇଁ ପ୍ଲାଷ୍ଟିକ ବ୍ୟବହାର ବ୍ୟାନ କରିଥିଲା ବିଏମସି । ତେଣୁ କେଉଁଠାରେ କାଗଜରେ ତ ଆଉ କେଉଁଠାରେ ଜରିରେ ପ୍ରସ୍ତୁତ ହୋଇଥିଲା ପୁଷ୍ପ ଗୁଚ୍ଛ ।
ପଢ଼ନ୍ତୁ ମହନ୍ତଙ୍କ ଚମତ୍କାର କାହାଣୀ, ଏକଦା କୂଅ ପାଣିକୁ କରିଥିଲେ ଶୁଦ୍ଧ ଘିଅ
ନନ୍ଦିଘୋଷ ବ୍ୟୁରୋ: ଅନେକ କାହାଣୀ ରହିଛି ଯାହାକି ଶୁଣିଲେ ଆମକୁ ଚକିତ ଲାଗିଥାଏ । ଜେଜେମା ହୁଅନ୍ତୁ କିମ୍ବା ଆଇ କିମ୍ବା ହୁଅନ୍ତୁ ବୟସ୍କ ବ୍ୟକ୍ତି । ଏମାନଙ୍କ ପାଖରୁ ଅନେକ କାହାଣୀ ଶୁଣିଥିବେ ନିଶ୍ଚୟ । ତେବେ ଏମିତି ଜଣେ ମହନ୍ତ ଥିଲେ, ଯିଏକି କୂଅର ପାଣିକୁ ଶୁଦ୍ଧ ଘିଅରେ ପରିଣତ କରି ଦେଇଥିଲେ । ମଧ୍ୟପ୍ରଦେଶର ନିମଚ ଜିଲ୍ଲା ମୁଖ୍ୟାଳୟଠାରୁ ଦଶ କିଲୋମିଟର ଦୂରରେ ମହନ୍ତଙ୍କ ମଠ ରହିଛି । ତେବେ ପଣ୍ଡିତ ଦେବିଲାଲ ଶର୍ମା କହିଛନ୍ତି କି, ମହନ୍ତ ହରିଚନ୍ଦନ ମହାରାଜ ଅନେକ ଚମତ୍କାର କରିଛନ୍ତି । ୮୦ ବର୍ଷ ପୂର୍ବେ ଅନେକ କାହାଣୀ ମଧ୍ୟ ରହିଛି । ଏକଦା ଆଶ୍ରମରେ ଭୋଜନ ପ୍ରସ୍ତୁତ ହେଉଥିଲା । ଭକ୍ତମାନେ କହିଥିଲେ କି, ବାବା ଘିଅ ସରିଯାଇଛି । ଏହାପରେ ଭକ୍ତମାନଙ୍କୁ ବାବା କହିଥିଲେ କି, ତୁମେ କୂଅରୁ ପାଣି ଆଣ ।
ଭକ୍ତମାନେ ବାବାଙ୍କ କଥାରେ କୂଅରୁ ପାଣି ଆଣିଥିଲେ । ଆଉ ଦେଖିଲା ବେଳକୁ ପାଣି ଶୁଦ୍ଧ ଘିଅରେ ପରିଣତ ହୋଇ ଯାଇଥିଲା । ଏହି ଘିଅରେ ଭକ୍ତମାନେ ଅନେକ ଖାଦ୍ୟ ପଦାର୍ଥ ପ୍ରସ୍ତୁତ କରିଥିଲେ । ଦେବିଲାଲ ଶର୍ମା କହିଛନ୍ତି କି, ଗୁରୁ ପୂର୍ଣ୍ଣିମାରେ ମହନ୍ତଙ୍କ ସମାଧୀସ୍ଥଳରେ ଏକ ମେଳାର ଆୟୋଜନ କରାଯାଇଥିଲା । ତେବେ ଏହି ଅଞ୍ଚଳର ଲୋକେ ମହନ୍ତଙ୍କୁ ଅନେକ ବିଶ୍ବାସ ଏବଂ ଭକ୍ତି କରୁଥିଲେ । ଏଣୁ ପ୍ରତିବର୍ଷ ଏଠାରେ ଗୁରୁ ପୂର୍ଣ୍ଣିମାରେ ଭିଡ଼ ଜମାଇଥାନ୍ତି । ନଦୀ କୂଳରେ ବାବାଙ୍କ ଆଶ୍ରମ ରହିଥିବାବେଳେ ଏଠାରେ ବାବାଙ୍କ ପୁରୁଣା ସ୍ମୃତିସବୁ ରହିଛି । ସେ ବ୍ୟବହାର କରୁଥିବା ଶେଜ ଏବଂ କିଛି ସାମଗ୍ରୀ ଏଠାରେ ରହିଛି ।
ଜାପାନରେ ସୁନାମୀ ପରେ ପରମାଣୁ ପାଓ୍ବାର ପ୍ଲାଣ୍ଟରୁ ରେଡିଏସନ ବାହାରିବା ଭୟ
ଟୋକିଓ: ଭୂକମ୍ପ ଯୋଗୁ ଜାପାନରେ ହଡ଼କମ୍ପ। ଭୂକମ୍ପ ପରେ ଅଚାନକ ସୁନାମୀ ଏବଂ ଉଚ୍ଚ ଜୁଆର ଏତେ ଆସିଲା ଯେ, ସହର ଭିତରକୁ ପାଣି ପଶିଗଲା । ଏହି ଘଟଣା ପରଠାରୁ ଲୋକମାନେ ଭୟଭୀତ ହୋଇପଡିଛନ୍ତି। ଜୁଆରର ଉଚ୍ଚତା ଥିଲା ୧.୩ ଫୁଟ । ଆସନ୍ତା କିଛି ଘଣ୍ଟା ମଧ୍ୟରେ ଜୁଆର ଅଧିକ ହୋଇପାରେ ବୋଲି ଆଶଙ୍କା କରାଯାଉଛି | ଏହା ସହିତ ଜାପାନରେ ପରମାଣୁ ପାଓ୍ବାର ପ୍ଲାଣ୍ଟର ସୁରକ୍ଷାକୁ ନେଇ ଲୋକମାନେ ଭୟଭୀତ ହୋଇପଡ଼ିଛନ୍ତି। ୨୦୧୧ ର ଭୂକମ୍ପ ପରେ ଆଣବିକ କେନ୍ଦ୍ର କ୍ଷତି ସହିଥିଲା । ଏହା ପରେ ଚାରିଆଡେ ହୋଇଥିବା ରେଡିଏସନ ବିଷୟରେ ସମସ୍ତେ ଅବଗତ ଅଛନ୍ତି । ତେଣୁ ପୁଣି ଥରେ ଜାପାନରେ ସମାନ ପରିସ୍ଥିତି ଉପୁଜିପାରେ ବୋଲି କୁହାଯାଉଛି ।
ଟୋକିଓ ଇଲେକ୍ଟ୍ରିକ୍ ପାୱାର୍ କମ୍ପାନୀ (TEPCO) ଦ୍ବାରା କୁହାଯାଇଛି ଯେ, ନିଗାଟା ନିକଟରେ ୧.୩ ଫୁଟ ଉଚ୍ଚର ଜୁଆର ରେକର୍ଡ କରାଯାଇଛି। ତେବେ ବର୍ତ୍ତମାନ ଦାବି ହେଉଛି ଯେ କୌଣସି ପ୍ରକାର ଜରୁରୀକାଳୀନ ପରିସ୍ଥିତି ସୃଷ୍ଟି ହୋଇନାହିଁ।
ରିପୋର୍ଟ ଅନୁଯାୟୀ, ଜାପାନରେ ଏକ ସୁନାମୀ ବିଷୟରେ ସତର୍କ ସୂଚନା ଜାରି କରାଯାଇଛି। ଜାପାନର ପଶ୍ଚିମ ଉପକୂଳରେ ଅତି ଭୟଙ୍କର ସୁନାମି ଆସିପାରେ।
ଜାପାନର ସରକାରୀ ଚ୍ୟାନେଲ NHK ର ରିପୋର୍ଟ ଅନୁଯାୟୀ, ଭୂକମ୍ପ ପରେ ସମୁଦ୍ରରେ ଜୁଆର ପ୍ରାୟ ପାଞ୍ଚ ମିଟର ଉଚ୍ଚ ହୋଇପାରେ।
ତେଣୁ ଲୋକଙ୍କୁ ସମୁଦ୍ର କୂଳଠାରୁ ଦୂରରେ ରହିବାକୁ ଏବଂ ଯଥାଶୀଘ୍ର ସୁରକ୍ଷିତ ସ୍ଥାନରେ ପହଞ୍ଚିବାକୁ ପରାମର୍ଶ ଦିଆଯାଇଥିଲା। ଭୂକମ୍ପ ପ୍ରଭାବିତ ଅଞ୍ଚଳରେ ଅବସ୍ଥିତ ଟୋକିଓ ଇଲେକ୍ଟ୍ରିକ୍ ପାୱାର୍ କମ୍ପାନୀ ସରକାରୀ ମିଡିଆ ଚ୍ୟାନେଲକୁ କହିଛନ୍ତି ଯେ ସେମାନଙ୍କ ପ୍ଲାଣ୍ଟରେ ଏପର୍ଯ୍ୟନ୍ତ କୌଣସି ସମସ୍ୟା ନାହିଁ।