ନନ୍ଦିଘୋଷ ବ୍ୟୁରୋ: ଭାରତ-ଆଫଗାନିସ୍ତାନ ଟି-୨୦ ମ୍ୟାଚ । ମ୍ୟାଚ ଡ୍ର ହେବା ପରେ ଦୁଇ ଥର ସୁପର ଓଭର । ଦ୍ବିତୀୟ ସୁପର ଓଭରର ଭାରତ ବିଜୟୀ । ଦ୍ବିତୀୟ ସୁପର ଓଭରରେ ଭାରତ କରିଥିଲା ୧୧ ରନ୍ । ୨ ଓ୍ବିକେଟ ହରାଇ ୧ ରନ କରିବାକୁ ସକ୍ଷମ ହେଲା ଆଫଗାନିସ୍ତାନ । ଏହା ସହି ସିରିଜକୁ କ୍ଲିନ ସୁଇପ କରିଛି ଭାରତ । ୩-୦ରେ ସିରିଜକୁ ଜିତିନେଇଛି ରୋହିତ ବାହିନୀ । ଆଜିର ମ୍ୟାଚରେ ଭାରତ ପ୍ରଥମେ ବ୍ୟାଟିଂ କରି ଭାରତ ୨୧୨ ରନ କରିଥିଲା । ତେବେ ଆଫଗାନିସ୍ତାନ ମଧ୍ୟ ଏହି ସ୍କୋର କରିଥିବାବେଳେ ମ୍ୟାଚ ଟାଇ ହୋଇଥିଲା । ପରେ ପ୍ରଥମ ସୁପର ଓଭର ମଧ୍ୟ ଟାଇ ହୋଇଥିଲା । ପ୍ରଥମ ସୁପର ଓଭରରେ ଆଫଗାନିସ୍ତାନ ୧୭ ରନ କରିଥିବାବେଳେ ଭାରତ ମଧ୍ୟ ୧୭ ରନ କରିଥିଲା । ପରେ ଦ୍ବିତୀୟ ସୁପର ଓଭରରେ ଭାରତ ବିଜୟୀ ହୋଇଛି ।
ନାବାଳିକା ଦୁଷ୍କର୍ମ ମାମଲାରେ ଅଭିଯୁକ୍ତକୁ ଆଜୀବନ କାରାଦଣ୍ଡ
ଯାଜପୁର: ନାବାଳିକା ଦୁଷ୍କର୍ମ ମାମଲାରେ ଅଭିଯୁକ୍ତକୁ ଆଜୀବନ କାରାଦଣ୍ଡ । କାରାଦଣ୍ଡ ଦେଲେ ଯାଜପୁର ସ୍ବତନ୍ତ୍ର ପୋକ୍ସୋ କୋର୍ଟ । ୨୦୨୧ ମସିହା ଯାଜପୁର ଜିଲ୍ଲା ବିଂଝାରପୁର ଥାନା ଅଞ୍ଚଳରେ ଘଟିଥିଲା ଘଟଣା । ଜଣେ ୧୭ ବର୍ଷିୟା ନାବାଳିକାକୁ ଦୁଷ୍କର୍ମ କରି ଗିରଫ ହୋଇଥିଲା ଅଭିଯୁକ୍ତ ବୈକୁଣ୍ଠ ନାଥ ମଲ୍ଲିକ ।ବୁଧବାର ଏହି ମାମଲାର ଶୁଣାଣି କରି ଯାଜପୁର ଅତିରିକ୍ତ ଦୌରା ଜଜ ତଥା ପୋକ୍ସୋ ସ୍ବତନ୍ତ୍ର ଅଦାଲତ ୧୮ଜଣଙ୍କ ସାକ୍ଷକୁ ଗ୍ରହଣ କରି ଅଭିଯୁକ୍ତଙ୍କୁ ଆଜୀବନ ସଶ୍ରମ କାରାଦଣ୍ଡାଦେଶ ସହ ଚାରି ଲକ୍ଷ ଟଙ୍କା ଜରିମାନା ଆଦେଶ ଦେଇଛନ୍ତି । ଜୋରିମାନା ଅନାଦୟ ୧୨ ମାସ ଅଧିକ କାରାଦଣ୍ଡାଦେଶ ରାୟ ଶୁଣାଇଛନ୍ତି । ଏହାସହ ପିଡିତାଙ୍କୁ ୭ଲକ୍ଷ ଟଙ୍କାର କ୍ଷତିପୂରଣ ପ୍ରଦାନ କରିବାକୁ ନିର୍ଦ୍ଦେଶ ଦେଇଛନ୍ତି । ମାମଲାକୁ ସରକାରୀ ଓକିଲ ରାଜୀବ ମହାନ୍ତି ପରିଚାଳନା କରିଥିଲେ ।
ଷ୍ଟାର୍ଟଅପ୍ କ୍ଷେତ୍ରରେ ଓଡ଼ିଶା ଦେଶର ଶ୍ରେଷ୍ଠ ପ୍ରଦର୍ଶନକାରୀ
ଭୁବନେଶ୍ବର: ଓଡ଼ିଶା ଷ୍ଟାର୍ଟଅପ ସୁପରହିଟ । ଷ୍ଟାର୍ଟଅପ କ୍ଷେତ୍ରରେ ଓଡ଼ିଶାକୁ ମିଳିଛି କେନ୍ଦ୍ରର ସାବାସୀ । ନୂଆ ଉଦ୍ୟୋଗୀଙ୍କ ଲାଗି ଅନୁକୂଳ ଷ୍ଟାର୍ଟଅପ୍ ପରିବେଶ ସୃଷ୍ଟି କରିବାରେ ଉଲ୍ଲେଖନୀୟ ସଫଳତା ହାସ କରିଛି ଓଡ଼ିଶା । କେନ୍ଦ୍ର ସରକାରଙ୍କ ରାଜ୍ୟ ଷ୍ଟାର୍ଟଅପ ତାଲିକାର ତାଜା ରିପୋର୍ଟରେ ଓଡିଶା ଟପ ପରଫର୍ମର ଭାବେ ଉଭା ହୋଇଛି । ବିଭିନ୍ନ ମାନଦଣ୍ଡ ଆଧାରରେ ଓଡ଼ିଶା ବଡ଼ ବଡ଼ ରାଜ୍ୟ ମାନଙ୍କ ଗ୍ରୁପରେ ସ୍ଥାନ ପାଇଛି । ଉଦ୍ୟୋଗୀଙ୍କ ସଂଖ୍ୟା ବଢ଼ାଇବା ସହ ଆଗକୁ ଷ୍ଟାର୍ଟଅପ କ୍ଷେତ୍ରରେ ନୂଆ ଅଧ୍ୟାୟ ସୃଷ୍ଟି କରିବା ନେଇ ରାଜ୍ୟ ସରକାର କାମ କରୁଛନ୍ତି ।
ଓଡ଼ିଶାକୁ ପୁଣି କେନ୍ଦ୍ରର ସାର୍ଟିଫିକେଟ। ଷ୍ଟାର୍ଟଅପ୍ କ୍ଷେତ୍ରରେ ଓଡ଼ିଶା ଦେଶର ଶ୍ରେଷ୍ଠ ପ୍ରଦର୍ଶନକାରୀ । ନୂଆ ଉଦ୍ୟୋଗୀଙ୍କ ପାଇଁ ଅନୁକୂଳ ପରିବେଶ ବଡ଼ କାରଣ । ନବୀନ ପରିକଳ୍ପନାରେ ବଡ଼ ରାଜ୍ୟଙ୍କ ଗ୍ରୁପରେ ଓଡ଼ିଶା । ମୁଖ୍ୟମନ୍ତ୍ରୀଙ୍କ ସ୍ବପ୍ନ ହୋଇଛି ସାକାର। ଷ୍ଟାର୍ଟଅପରେ ଓଡ଼ିଶା ଆଗଉଛି । ଟପ ଫରଫର୍ମର ଭାବେ ଦେଶରେ ଉଭା ହୋଇଛି ଓଡ଼ିଶା । ଯାହାକୁ ସ୍ବୀକୃତି ଦେଇଛନ୍ତି କେନ୍ଦ୍ର ସରକାର । ରାଜ୍ୟ ସରକାରଙ୍କ ବଳିଷ୍ଠ ନୀତି, ନୂଆ ଉଦ୍ୟୋଗ ପାଇଁ ମାସିକିଆ ପ୍ରୋତ୍ସାହନ, ପୁଞ୍ଜି ବିନିଯୋଗର ରାସ୍ତା ସାଙ୍ଗକୁ ମାର୍କେଟିଙ୍ଗ ପାଇଁ ସ୍ବତନ୍ତ୍ର ଖସଡ଼ା ଷ୍ଟାର୍ଟଅପ୍ ଓଡ଼ିଶାକୁ ସାରା ଦେଶରେ ଅଗ୍ରଣୀ କରିପାରିଛି । ୩୩ଟି ବିଭିନ୍ନ ମାନଦଣ୍ଡ ନେଇ ଡିପିଆଇଆଇଟି ରାଜ୍ୟ ଷ୍ଟାର୍ଟଅପ୍ ରାଙ୍କିଙ୍ଗ୍ ୨୦୨୨ରେ ଓଡ଼ିଶାର ଟପ୍ ପରଫର୍ମର ହୋଇଛି । ବିଶେଷକରି ନୂଆ ଉଦ୍ୟୋଗୀମାନଙ୍କ ଲାଗି ଅନୁକୂଳ ଷ୍ଟାର୍ଟଅପ୍ ପରିବେଶ ସୃଷ୍ଟି କରିବାରେ ଓଡ଼ିଶା ଶ୍ରେଷ୍ଠ ପ୍ରଦର୍ଶନକାରୀ ରାଜ୍ୟ ଭାବେ ଉଭା ହୋଇଛି। ଉଦ୍ୟୋଗୀ ସଂଖ୍ୟା ବଢ଼ାଇବା ଆମର ଲକ୍ଷ୍ୟ ବୋଲି ଷ୍ଟାର୍ଟଅପ୍ ଓଡ଼ିଶାର କାର୍ଯ୍ୟନିର୍ବାହୀ ଅଧ୍ୟକ୍ଷ ଡ. ଓମକାର ରାୟ କହିଛନ୍ତି ।
ଆଗକୁ ଷ୍ଟାର୍ଟଅପ ଉଦ୍ୟୋଗୀମାନଙ୍କ ଲାଗି ଏକ ଅନୁକୂଳ ପରିବେଶ ସୃଷ୍ଟି କରିବା ଲାଗି ଏକ ନୂଆ ଷ୍ଟାର୍ଟଅପ୍ ନୀତି ଆଣିବା ଉପରେ ବିଚାର କରାଯାଉଛି। ବିଶ୍ବସ୍ତରରେ ଗ୍ରହଣ କରାଯାଉଥିବା ବିଭିନ୍ନ ଅଭ୍ୟାସ, ଇଏସଜି ଏବଂ ମହିଳା ଉଦ୍ୟମିତାର ପ୍ରସାର ଉପରେ ସେଥିରେ ଫୋକସ କରାଯିବ । ଓଡ଼ିଶାରେ ଏଗ୍ରିଟେକ୍, ଆଇଟି, ଏଆଇ, ସ୍ବାସ୍ଥ୍ୟ ସେବା, ଫିନଟେକ୍ ଓ ବାୟୋଟେକ୍ନୋଲୋଜି ଭଳି କ୍ଷେତ୍ରରେ ୧୮୦୦ରୁ ଅଧିକ ଷ୍ଟାର୍ଟଅପ୍ ରହିଛି। ସେଥିରୁ ୪୨% ସଂସ୍ଥାର ନେତୃତ୍ବ ନେଉଛନ୍ତି ମହିଳା । ୨୦୨୫ ସୁଦ୍ଧା ରାଜ୍ୟ ସରକାର ୫୦୦୦ ଷ୍ଟାର୍ଟଅପ ସୃଷ୍ଟି କରିବାକୁ ଲକ୍ଷ୍ୟ ରଖିଛି ଓଡ଼ିଶା । ରାଜ୍ୟରେ ୨୭ ଇନକ୍ୟୁବେଟର ରହିଥିବା ବେଳେ ଚାରି ଲକ୍ଷ ବର୍ଗଫୁଟରେ ବ୍ୟାପିଥିବା ଓ-ହବ୍ ହେଉଛି ଦେଶର ଅନ୍ୟତମ ବୃହତ୍ତମ ଇନକ୍ୟୁବେଟର।
ନୂଆ ଷ୍ଟାର୍ଟଅପଙ୍କୁ ଉଦ୍ୟୋଗ ପ୍ରତିଷ୍ଠା କରିବା ପାଇଁ ଜମି ଓ ବ୍ୟାଙ୍କ ଋଣ ସହାୟତା ପ୍ରଦାନ ନେଇ ସରକାର ସବୁ ପ୍ରକାର ସହଯୋଗ ଯୋଗାଇ ଦେଉଛନ୍ତି। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ପରିକଳ୍ପନାରେ ପ୍ରସ୍ତୁତ ଓଡ଼ିଶା ଷ୍ଟାର୍ଟ୍ଅପ୍ ନୀତି ଓଡିଶାକୁ ଷ୍ଟାର୍ଟଅପ୍ କ୍ଷେତ୍ରରେ ଅଗ୍ରଣୀ ରାଜ୍ୟରେ ପରିଣତ କରିପାରିଛି। ଷ୍ଟାର୍ଟଅପରେ ଓଡ଼ିଶା ଟପ ଫରଫର୍ମର ଭାବେ ଦେଶରେ ଉଭା ପରେ 5T ଅଧ୍ୟକ୍ଷ ଖୁସିରେ ଏହାକୁ ସୋସିଆଲ ମିଡିଆରେ ସେୟାର କରିଛନ୍ତି।
କୂଅ ଭିତରୁ ଯାଆଁଳା ଶିଶୁଙ୍କ ମୃତଦେହ ଉଦ୍ଧାର
ଅନୁଗୁଳ: କୂଅ ଭିତରୁ ଯାଆଁଳା ଶିଶୁଙ୍କ ମୃତଦେହ ଉଦ୍ଧାର। ଅନୁଗୁଳ ଜିଲ୍ଲା ବସଲା ପଞ୍ଚାୟତ ମୁଣ୍ଡାଢିପ ସାହିରେ ଘଟିଛି ଅଭାବନୀୟ ଘଟଣା। ମୃତକ ୫ ମାସର ଭାଇଭଉଣୀ।ମୃତକ ସୁନୀଲ ସାହୁଙ୍କ ପୁଅ ସାଇ ଓ ଶ୍ରଦ୍ଧା । ଉଭୟଙ୍କୁ କେହି ହତ୍ୟା କରିଥିବା ଅଭିଯୋଗ ହୋଇଛି। ଅଭିଯୋଗ ଅନୁସାରେ ମାଆ ତପସ୍ବିନୀ ସାହୁ ଉଭୟ ଛୁଆଙ୍କୁ ଘରେ ଛାଡ଼ି କ୍ଷୀର ଆଣିବାକୁ ଯାଇଥିଲେ । ପରେ ଘରକୁ ଆସି ଛୁଆଙ୍କୁ ଦେଖିବାକୁ ପାଇନଥିଲେ । ଘରର ଲାଇଟ ବନ୍ଦ ଥିବାବେଳେ ବିଭିନ୍ନ ସ୍ଥାନ ଖୋଜାଖୋଜି କରିବା ପରେ ବି ପିଲାଙ୍କୁ ଦେଖିବାକୁ ପାଇନଥିଲେ । ପରେ ବାଡ଼ିପଟେ ଖୋଜାଖୋଜି କରିବା ପରେ କୂଅରେ ଏକ ଶିଶୁ ଭାସୁଥିବା ଦେଖିବାକୁ ପାଇଥିଲେ । କୂଅରୁ ଉଦ୍ଧାର କରି ଉଭୟଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଥିଲା । ସେଠାରେ ଡାକ୍ତର ମୃତ ଘୋଷଣା କରିଥିଲେ। ମାଆ କ୍ଷୀର ପାଇ ବାହାରକୁ ଯାଇଥିବାବେଳେ କେହି ବାଡ଼ିପଟୁ ଘରେ ପଶି ଶିଶୁଦୁଇଟିକୁ କୂଅରେ ପକାଇଦେଇଥିବା ଅଭିଯୋଗ ହୋଇଛି । ତେବେ ଛୁଆମାନେ ଘରୁ କୂଅ ନିକଟକୁ କେମିତି ଗଲେ। କିଏ ଏଭଳି ଜଘନ୍ୟକାଣ୍ଡ ଘଟାଇଛି ସେନେଇ କୌଣସି ସୂଚନା ମିଳିପାରିନି ।
ମନମୋହିଲା ସାବିତ୍ରୀଙ୍କ ନୃତ୍ୟ
ଜୟପୁର: ମନୋବଳ ଦୃଢ ଥିଲେ ସବୁକିଛି ସମ୍ଭବ। ଇଛାଶକ୍ତି ଆଗରେ ହାର ମାନେ ଅକ୍ଷମତା । ଏହାକୁ ପ୍ରମାଣ କରି ଦେଖାଇଛନ୍ତି ଜୟପୁର ବୋରିଗୁମ୍ମା ବ୍ଲକ ଢୁଟିଗୁଡ଼ା ଗାଁର ସାବିତ୍ରୀ ପୂଜାରୀ । ଏହି ୯ ବର୍ଷର କୁନି ଝିଅକୁ ନେଇ ଏବେ ସବୁଠି ଚର୍ଚ୍ଚା । ବୋରିଗୁମ୍ମା ଦିବ୍ୟାଙ୍ଗ ଉତ୍ସବରେ ଗୋଟିଏ ଗୋଡ଼ରେ ନୃତ୍ୟ ପରିବେଷଣ କରି ସମସ୍ତଙ୍କ ମନ ଜିଣିଛନ୍ତି ସାବିତ୍ରୀ ।
ସିଏ ନାଚ ହେଉ କି ଖେଳ । ସବୁଥିରେ ଆଗୁଆ । ମନୋବଳ ଓ ଇଛାଶକ୍ତି ଆଗରେ ହାର ମାନିଛି ଅକ୍ଷମତା । ଟିକେ ଭଲ କରି ଦେଖନ୍ତୁ ଏହି କୁନିଝିଅକୁ । ଏହି କୁନି ଝିଅ ଏବେ ସମସ୍ତଙ୍କ ପାଇଁ ସାଜିଛି ପ୍ରେରଣା । ବୋରିଗୁମ୍ମା ବ୍ଲକ ଢୁଟିଗୁଡ଼ା ଗାଁର ସାବିତ୍ରୀ ପୂଜାରୀ । ବୟସ ମାତ୍ର ୯ ବର୍ଷ । ଚାଷୀ ପରିବାରରେ ଜନ୍ମ । ଜନ୍ମ ବେଳୁ ଗୋଟିଏ ଗୋଡ଼ ନାହିଁ କି ହାତର ଆଙ୍ଗୁଠି ବି ନାହିଁ । ତଥାପି ପାଠ, ନାଚ, ଖେଳକୁଦରେ ଅନ୍ୟମାନଙ୍କ ତୁଳନାରେ କୌଣସି ଗୁଣରେ କମ ନୁହେଁ । ତାର ଦୃଢ ମନୋବଳ ଦେଖି ମାଆବାପା ଝିଅର ଅକ୍ଷମତାକୁ ପାସୋରି ଦେଇଥିବାବେଳେ ଝିଅ ମଧ୍ୟ ତାଙ୍କର ଟେକ ରଖିବାକୁ ଯଥାସାଧ୍ୟ ଉଦ୍ୟମ କରୁଛି।
ଗୋଟିଏ ଗୋଡ଼ରେ ଡେଇଁ ଡେଇଁ ସ୍କୁଲକୁ ଯାଏ ସାବିତ୍ରୀ । ରାଜ୍ୟ ସରକାରଙ୍କ ପକ୍ଷରୁ ଟ୍ରାଇ ସାଇକେଲ ସହ ଅନ୍ୟାନ୍ୟ ସୁବିଧା ଯୋଗାଇ ଦିଆଯାଇଛି । ସରକାରଙ୍କ ପ୍ରୋତ୍ସାହନ ଓ ଶିକ୍ଷକ ଶିକ୍ଷୟିତ୍ରୀଙ୍କ ସହାୟତାରେ ପାଠରେ ବି ବେଶ ଆଗରେ ସାବିତ୍ରୀ। ବୋରିଗୁମ୍ମା କ୍ରୀଡ଼ା ସାଂସ୍କୃତିକ କାର୍ଯ୍ୟକ୍ରମରେ ବିଭିନ୍ନ ପ୍ରାଥମିକ ବିଦ୍ୟାଳୟରେ ଦିବ୍ୟାଙ୍ଗ ଛାତ୍ରଛାତ୍ରୀ ଯୋଗ ଦେଇଥିଲେ। ଏଥିରେ ସାମିଲ ହୋଇ ସମସ୍ତଙ୍କ ମନ ଜିତିଛି ସାବିତ୍ରୀ । ତାର ନୃତ୍ୟ ଦେଖଣାହାରୀଙ୍କୁ ବେଶ ପସନ୍ଦ ଆସିଛି।
ବଦଳିଛି କଟକର ପୁରୁଣା ଛତ୍ରବଜାରର ଚେହେରା
କଟକ: ବଦଳିଛି କଟକର ପୁରୁଣା ଛତ୍ରବଜାରର ଚେହେରା । ରାଜ୍ୟ ସରକାରଙ୍କ ସହଯୋଗରେ ଦୀର୍ଘବର୍ଷ ଧରି ଖୋଲା ଆକାଶ ତଳେ ବସୁଥିବା ବ୍ୟବସାୟୀଙ୍କୁ ମିଳିଛି ସ୍ଥାୟୀ ପିଣ୍ଡି । ଆଉ ଖରା ବର୍ଷାରେ ନବସି ନିଜ ପିଣ୍ଡିରେ ବ୍ୟବସାୟ କରୁଛନ୍ତି ବେପାରୀ । ବ୍ୟବସାୟୀଙ୍କ ସମସ୍ତ ସୁବିଧା ଯୋଗାଇ ଦିଆଯାଇଛି । କିନ୍ତୁ କିଛି ବ୍ୟବସାୟୀ ପିଣ୍ଡି ଛାଡ଼ି ବାହାରେ ବ୍ୟବସାୟ କରୁଥିବା ଅଭିଯୋଗ ହୋଇଛି । ରାସ୍ତା କଡ଼ରେ ବସି ଆବର୍ଜନା ସୃଷ୍ଟି କଲେ ତଦନ୍ତ କରି କାର୍ଯ୍ୟାନୁଷ୍ଠାନ ନିଆଯିବ ବୋଲି କହିଛନ୍ତି ମେୟର ।
କଟକର ସର୍ବ ପୂରାତନ ମାର୍କେଟ ଛତ୍ରବଜାର । ଯେଉଁଠି ଖରାତରାରେ ବସି ବ୍ୟବସାୟୀ ସେମାନଙ୍କ ବେପାର କରୁଥିଲେ । ହେଲେ ଏବେ ସ୍ଥିତି ବଦଳିଛି । ରାଜ୍ୟ ସରକାରଙ୍କ ରୂପାନ୍ତରଣ ପ୍ରକ୍ରିୟାରେ ସାମିଲ ହୋଇ ନେଇଛି ଅର୍ବାନ ହାଟର ରୂପ । ଯେଉଁଠି ବ୍ୟବସାୟୀଙ୍କୁ ପିଣ୍ଡି ସହ ସମସ୍ତ ସୁବିଧା ଯୋଗାଇ ଦିଆଯାଇଛି । ସୁରକ୍ଷିତ ଭାବେ କିପରି ବ୍ୟବସାୟ କରିପାରିବେ ସେନେଇ ସିଏମସି ପକ୍ଷରୁ ମଧ୍ୟ ଯୋଗାଇ ଦିଆଯାଇଛି ସହାୟତା । ତେବେ କିଛି ବ୍ୟବସାୟୀ ପିଣ୍ଡି ଛାଡ଼ି ରାସ୍ତାକଡ଼ରେ ସେମାନଙ୍କ ପରିବା ଗଦା କରୁଥିବା ଅଭିଯୋଗ ହୋଇଛି । ଏହାଦ୍ବାରା ପରିବେଶ ନଷ୍ଟ ହେଉଥିବା ଲୋକେ ଅଭିଯୋଗ କରିଛନ୍ତି ।
ରାଜ୍ୟ ସରକାରଙ୍କ ପ୍ରଚେଷ୍ଟରେ ହୋଇଛି ରୂପାନ୍ତରଣ । ବସ୍ତି ବାସିନ୍ଦାଙ୍କୁ ଥଇଥାନ କରାଯାଇ କଟକ ଛତ୍ର ବଜାର ବ୍ୟବସାୟ କରୁଥିବା ଉଠା ଦୋକାନୀଙ୍କ ପାଇଁ ସୁନ୍ଦର ଅର୍ବାନ ହାଟ ନିର୍ମାଣ କରାଯାଇଛି । ତେବେ ପରିଚାଳନା ଦାୟିତ୍ବରେ ଥିବା ସଂସ୍ଥା କାମ ଠିକରୂପେ କରୁ ନଥିବା ଅଭିଯୋଗ କରିଛନ୍ତି ବ୍ୟବସାୟୀ । ସେପଟେ ଅଭିଯୋଗ ପରେ ଘଟଣାର ତଦନ୍ତ କରି ଉପଯୁକ୍ତ ପଦକ୍ଷେପ ନିଆଯିବ ବୋଲି କହିଛନ୍ତି ମେୟର ।
କଂଗ୍ରେସରେ ଯୋଗ ଦେଲେ ଗମାଙ୍ଗ ପରିବାର
ନୂଆଦିଲ୍ଲୀ : କଂଗ୍ରେସକୁ ଫେରିଲେ ପୂର୍ବତନ ମୁଖ୍ୟମନ୍ତ୍ରୀ ଗିରିଧର ଗମାଙ୍ଗ । ପତ୍ନୀ ହେମା ଗମାଙ୍ଗ ଏବଂ ପୁଅ ଶିଶିର ଗମାଙ୍ଗ ଓ ବରଗଡ଼ର ପୂର୍ବତନ ସାଂସଦ ସଞ୍ଜୟ ଭୋଇ ନୂଆଦିଲ୍ଲୀ ସ୍ଥିତ ଏଆଇସିସି କାର୍ଯ୍ୟାଳୟରେ କଂଗ୍ରେସରେ ସାମିଲ ହୋଇଛନ୍ତି । ଏଆଇସିସି କୋଷାଧ୍ୟକ୍ଷ ଅଜୟ ମାକେନ୍ ଏବଂ ଓଡିଶା ପ୍ରଭାରୀ ଡ. ଅଜୟ କୁମାରଙ୍କ ଉପସ୍ଥିତିରେ ବିଧିବଦ୍ଧ ଭାବେ କଂଗ୍ରେସ ଦଳରେ ସମସ୍ତେ ଯୋଗଦେଇଛନ୍ତି । କଂଗ୍ରେସ ପକ୍ଷରୁ ସେମାନଙ୍କୁ ସ୍ୱାଗତ କରାଯାଇଛି । ୨୦୧୫ରେ କଂଗ୍ରେସ ଛାଡ଼ି ବିଜେପିରେ ଯୋଗଦେଇଥିଲେ ପୂର୍ବତନ ମୁଖ୍ୟମନ୍ତ୍ରୀ ଗିରିଧର ଗମାଙ୍ଗ ଓ ତାଙ୍କ ପୁଅ ଶିଶିର ଗମାଙ୍ଗ । ୨୦୨୩ ମସିହାରେ ବାପ-ପୁଅ ବିଜେପି ଛାଡ଼ି ଭାରତ ରାଷ୍ଟ୍ର ସମିତିରେ ସାମିଲ ହୋଇଥିଲେ । ଆଗାମୀ ନିର୍ବାଚନରେ ଓଡ଼ିଶାରୁ ଭାରତ ରାଷ୍ଟ୍ର ସମିତିରୁ ଲଢ଼ିବେ ବୋଲି ସପନ ଦେଇଥିଲେ। ହେଲେ ସେମିତି କିଛି ଦେଖିବାକୁ ମିଳିଲା ନାହିଁ। ଏବେ ଗମାଙ୍ଗ ପରିବାର ପୁଣି ଥିରେ କଂଗ୍ରେସକୁ ଫେରିଛନ୍ତି।
ମାଛ ଚାଷରୁ ହେଉଛି ଭଲ ରୋଜଗାର
ବ୍ରହ୍ମପୁର: ମାଛ ଚାଷରୁ ହେଉଛି ଭଲ ରୋଜଗାର। ୟୁଟ୍ୟୁବ ଦେଖି ମାଛ ଚାଷ ଆରମ୍ଭ କରିଥିଲେ ଗଞ୍ଜାମ ଆସିକା କର୍ପୁର ନୁଆଁଗାଁର ମହିଳା କୁମାରୀ ଦଳାଇ । ବାୟୋଫ୍ଲକ ପ୍ରୋଜେକ୍ଟ ମାଧ୍ୟାମରେ ହେଉଛି ମାଛ ଚାଷ । ଜିଲ୍ଲା ପ୍ରଶାସନ ପକ୍ଷରୁ ମିଳିଛି ସହଯୋଗ। ମାଛ ଚାଷ କରି ମହିଳା ସ୍ବାବଲମ୍ବୀ । ୟୁଟ୍ୟୁବ ଦେଖି ମାଛ ଚାଷକୁ ଆପେଣଇଛନ୍ତି ମହିଳା। ନିଜେ ରୋଜଗାର କରିବା ସହ ଅନ୍ୟ ୫ ଜଣ ମହିଳାଙ୍କୁ ମାଛ ଚାଷରେ ନିୟୋଜିତ କରିଛନ୍ତି । ଗଞ୍ଜାମ ଜିଲ୍ଲା ଆସିକା ବ୍ଲକର କର୍ପୁର ନୁଆଁଗାଁର ମହିଳା କୁମାରୀ ଦଳାଇl ବାୟୋଫ୍ଲକ ପ୍ରୋଜେକ୍ଟ ମାଧ୍ୟାମରେ କରୁଛ୍ତି ମାଛ ଚାଷ । ମାଛ ଚାଷରେ ସାହାଯ୍ୟ କରୁଛନ୍ତି ପୁଅ ।
ୟୁଟ୍ୟୁବ ଦେଖି ମାଛ ଚାଷ ପାଇଁ ଆଗେଇଥିଲେ କୁମାରୀ । ଅଧ ଏକର ଜମିରେ ୫ଟି ବୟୋଫ୍ଲେକ ପ୍ରୋଜେକ୍ଟ କରି ବିଭିନ୍ନ ପ୍ରକାର ମାଛ ଚାଷ କରି ବେଶ ଦୁଇ ପଇସା ରୋଜଗାର କରି ପାରୁଛନ୍ତି । ମାଛ ଚାଷ କରିବା ପ୍ରଣାଳୀ ମଧ୍ୟ୍ୟ ଜିଲ୍ଲା ମତ୍ସ୍ୟ ବିଭାଗ ପକ୍ଷରୁ ପ୍ରଶିକ୍ଷଣ ଦିଆ ଯାଇଛି । ସେପଟେ ମାଛ ଚାଷ କରିବା ପାଇଁ ଜିଲ୍ଲା ପ୍ରଶାସନ ପକ୍ଷରୁ ସମ୍ପୂର୍ଣ୍ଣ ସହଯୋଗ କରାଯାଇଥିବା କହିଛନ୍ତି ଜିଲ୍ଲା ମତ୍ସ୍ୟ ଅଧିକାରୀ ।
ଜାଣନ୍ତୁ ୩ ଅର୍ଦ୍ଧଶତକ ପରେ ମଧ୍ୟ ବାବରଙ୍କୁ କାହିଁକି ଟ୍ରୋଲ କରୁଛନ୍ତି ୟୁଜର୍ସ
ନନ୍ଦିଘୋଷ ବ୍ୟୁରୋ: ପାକିସ୍ତାନ କ୍ରିକେଟ ଟିମର ନିର୍ଭରଯୋଗ୍ୟ ବ୍ୟାଟ୍ସମ୍ୟାନ କୁହାଯାଉଥିବା ବାବର ଆଜମଙ୍କୁ ସୋସିଆଲ ମିଡିଆରେ ଟ୍ରୋଲ କରୁଛନ୍ତି ୟୁଜର୍ସ । ବାବରଙ୍କ ବହୁ ମେମେସ ବନାଇ ସେୟାର କରାଯାଉଛି । ପାକିସ୍ତାନ ଏବଂ ନ୍ୟୁଜିଲାଣ୍ଡ ବିପକ୍ଷରେ ଟି-୨୦ ସିରିଜ ଖେଳୁଛି । ଯେଉଁଥିରେ ପାକିସ୍ତାନ ସିରିଜ ହାରିଛି । ତେବେ ଦଳ ପରାଜୟ ବରଣ କରିଥିଲେ ସୁଦ୍ଧା ୫ ମ୍ୟାଚ ବିଶିଷ୍ଟ ଏହି ଟି-୨୦ ସିରିଜରେ ବାବର କିନ୍ତୁ ୩ଟି ଅର୍ଦ୍ଧଶତକୀୟ ପାଳି ଖେଳିଛନ୍ତି । ପ୍ରଥମ ତିନୋଟିଯାକ ମ୍ୟାଚ ପାକିସ୍ତାନ ହାରଇଥିବାବେଳେ ସମ୍ମାନ ପାଇଁ ଶେଷ ଦୁଇ ମ୍ୟାଚ ଖେଳିବ । ତେବେ ବାବର ଲଗାତାର ତିନୋଟି ଅର୍ଦ୍ଧଶତକୀୟ ପାଳି ଖେଳିବା ସହ ଭଲ ପ୍ରଦର୍ଶନ କରିଥିଲେ । ତାଙ୍କ ଖେଳକୁ କ୍ରିକେଟପ୍ରେମୀମାନେ ପ୍ରଶଂସା କରିଥିବାବେଳେ କିଛି ୟୁଜର୍ସ ଏବେ ସୋସିଆଲ ମିଡିଆରେ ତାଙ୍କୁ ଟ୍ରୋଲ କରୁଛନ୍ତି । ୟୁଜର୍ସମାନେ କହିଛନ୍ତି କି, ସେ କେବଳ ନିଜର ସ୍କୋରକୁ ଦେଖୁଛନ୍ତି। ଟି-୨୦ରେ ଧିମା ଖେଳୁଥିବାରୁ ଦଳ ପରାଜୟର ବରଣ କରୁଥିବା ୟୁଜର୍ସମାନେ ଟ୍ରୋଲ କରୁଛନ୍ତି ।
୧୬ ମାସ ପରେ ସେୟାର ବଜାରରେ ଆତଙ୍କ,ଗୋଟିଏ ଦିନରେ ୧୬ଶହ ପଏଣ୍ଟ ହ୍ରାସ
ନନ୍ଦିଘୋଷ ବ୍ୟୁରୋ: ବୁଧବାର ଦିନ ଭାରତୀୟ ସେୟାର ବଜାରରେ ଆତଙ୍କ ସୃଷ୍ଟି ହୋଇଥିଲା । ବିଏସଇ ସେନସେକ୍ସ ଓ ନିଫ୍ଟିରେ ବ୍ୟାପକ ହ୍ରାସ ଯୋଗୁ ନିବେଶକ ବଡ଼ଧରଣର ପୁଂଜି ହରାଇଛନ୍ତି । ବିଏସଇ ସୂଚକାଙ୍କରେ ୧୬ ମାସର ସବୁଠାରୁ ବଡ଼ ଅବନତି ଦେଖିବାକୁ ମିଳିଛି । ବିଦେଶୀ ବଜାରର ନକାରାତ୍ମକ ସଙ୍କେତ ପ୍ରଭାବରେ BSE ସେନସେକ୍ସ ୧,୬୦୦ ପଏଣ୍ଟରୁ ଅଧିକ ହ୍ରାସ ପାଇଛି । ଯାହା ୧୬ ମାସରେ ଗୋଟିଏ ଦିନରେ ସର୍ବାଧିକ ହ୍ରାସ ।
ଆଜି ସେନସେକ୍ସ ୧୬୨୮ ପଏଣ୍ଟ ବା ୨.୨୩ ପ୍ରତିଶତ ହ୍ରାସ ସହିତ ୭୧,୫୦୦.୭୬ରେ ବନ୍ଦ ହୋଇଛି । ୧୬ ମାସ ମଧ୍ୟରେ ସେନସେକ୍ସରେ ଏହା ହେଉଛି ଗୋଟିଏ ଦିନରେ ସବୁଠାରୁ ବଡ ପତନ ।ଏହାପୂର୍ବରୁ ଜୁନ୍ ୧୩, ୨୦୨୨ ରେ ସେନ୍ସେକ୍ସ ୨.୬୮ ପ୍ରତିଶତ ହ୍ରାସ ପାଇଥିଲା। ନ୍ୟାସନାଲ ଷ୍ଟକ୍ ଏକ୍ସଚେଞ୍ଜ- ନିଫ୍ଟି ମଧ୍ୟ ୪୬୦ ପଏଣ୍ଟ ବା ୨.୦୯ ପ୍ରତିଶତ ହ୍ରାସ ସହିତ ୨୧,୫୭୧.୯୫ ପଏଣ୍ଟରେ ବନ୍ଦ ହୋଇଛି । ବିଏସଇ ଓ ନିଫ୍ଟିର ଏହି ପତନ ପଛରେ ବିଦେଶୀ ବଜାର ପ୍ରଭାବ ସହିତ ଏଚଡିଏଫସି ସେୟାର ମୂଲ୍ୟରେ ହ୍ରାସକୁ ମଧ୍ଯ ଦାୟୀ କରାଯାଉଛି । ଏଚଏଫଡିସି ବ୍ୟାଙ୍କର ତ୍ରୈୟମାସିକ ଫଳାଫଳ ଗତକାଲି ଆସିଥିଲା ।
ଫଳାଫଳ ଆଶାନୁପରକ ଥିବାରୁ ବଜାର ଏଭଳି ପ୍ରତିକ୍ରିୟା ଦେଖାଇଥିଲା । କାରଣ ବଜାର ଖୋଲିବା ସହିତ ଏଚଏଫଡିସି ସେୟାର ବିକ୍ରି ଜୋର ଧରିଥିଲା । HDFC ବ୍ୟାଙ୍କର ସେୟାରରେ ମୁଲ୍ୟରେ ୮.୫ ପ୍ରତିଶତ ହ୍ରାସ ପାଇଛି, ଯାହା ତିନି ବର୍ଷ ମଧ୍ୟରେ ଏହାର ଖରାପ ପ୍ରଦର୍ଶନ । ମାର୍ଚ୍ଚ ୨୦୨୨ ପରେ ଏହା ହେଉଛି ସବୁଠାରୁ ବଡ ହ୍ରାସ । କୋଟାକ୍ ମହିନ୍ଦ୍ରା ବ୍ୟାଙ୍କ, ଆଇସିଆଇସିଆଇ ବ୍ୟାଙ୍କ, ଆଇଡିଏଫସି ବ୍ୟାଙ୍କ, ଆକ୍ସିସ୍ ବ୍ୟାଙ୍କ, ଫେଡେରାଲ୍ ବ୍ୟାଙ୍କ ଏବଂ ଏୟୁ କ୍ଷୁଦ୍ର ଫାଇନାନ୍ସ ବ୍ୟାଙ୍କ ସେୟାର ମୂଲ୍ୟରେ ଦୁଇରୁ ଚାରି ପ୍ରତିଶତ ହ୍ରାସ ପରିଲକ୍ଷିତ ହୋଇଛି । ସେନ୍ସେକ୍ସରେ ହ୍ରାସ ହେତୁ ନିବେଶକମାନେ ପ୍ରାୟ ୪.୭ ଲକ୍ଷ କୋଟି ଟଙ୍କାର କ୍ଷତି ସହିଛନ୍ତି। ବିଏସଇରେ ତାଲିକାଭୁକ୍ତ କମ୍ପାନୀଗୁଡିକର ବଜାର କ୍ୟାପ୍ ୪.୬୯ ଲକ୍ଷ କୋଟି ହ୍ରାସ ପାଇ ୩୭୦.୨୫ ଲକ୍ଷ କୋଟିରେ ପହଞ୍ଚିଛି ଯାହା ପୂର୍ବ ଟ୍ରେଡିଂ ସେସନରେ ୩୭୪.୯୫ ଲକ୍ଷ କୋଟି ଥିଲା।