ନୂଆଦିଲ୍ଲୀ: ଇଡିରେ ହାଜର ହେଲେନି ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲ । ଦିଲ୍ଲୀ ମଦନୀତି ମାମଲାରେ ଆଜି ହାଜର ହେବା ଲାଗି ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲଙ୍କୁ ପ୍ରବର୍ତ୍ତନ ନିର୍ଦ୍ଦେଶାଳୟ ନୋଟିସ ଦେଇଥିଲା । ଚତୁର୍ଥ ଥର ଲାଗି କେଜ୍ରିଓ୍ବାଲଙ୍କୁ ଜାରି ହୋଇଥିଲା ସମନ । ଗତ ଜାନୁଆରୀ ୩ରେ ହାଜର ହେବା ଲାଗି ତାଙ୍କୁ ସମନ ଜାରି ହୋଇଥିବା ସତ୍ତ୍ବେ ସେ ହାଜର ହୋଇ ନଥିଲେ । ଜାରି ହୋଇଥିବା ସମନ ବେଆଇନ ବୋଲି ଦର୍ଶାଇଥିଲେ କେଜ୍ରିଓ୍ବାଲ । ପୂର୍ବରୁ ତାଙ୍କୁ ନଭେମ୍ବର ୨, ଡିସେମ୍ବର ୨୧ରେ ମଧ୍ୟ ନୋଟିସ ଜାରି ହୋଇଥିଲା । ଏହି ବହୁଚର୍ଚ୍ଚିତ ମାମଲାରେ କେଜ୍ରିଓ୍ବାଲ ଅଭିଯୁକ୍ତ ହୋଇ ନଥିଲେ ବି ତାଙ୍କୁ ବାରମ୍ବାର ନୋଟିସ ଜାରି କରାଯାଉଛି । ଜେରା ପରେ କେଜ୍ରିଓ୍ବାଲଙ୍କୁ ଗିରଫ କରିବା ନେଇ ବାରମ୍ବାର ଆଶଙ୍କା ପ୍ରକାଶ ପାଇଆସୁଛି । ପୂର୍ବରୁ ମଦ ନୀତି ମାମଲାରେ ଗତବର୍ଷ ଫେବ୍ରୁଆରୀ ୨୬ରେ ଗିରଫ ହୋଇଥିଲେ ମନୀଷ ସିସୋଦିଆ । ସେହିପରି ଗତବର୍ଷ ଅକ୍ଟୋବର ୪ରେ ଆପ୍ ନେତା ସଞ୍ଜୟ ସିଂଙ୍କୁ ଗିରଫ କରିଥିଲା ଇଡି ।
ରାସ୍ତା ପାଲଟିଛି ମରଣଯନ୍ତା, କାମ ଅଧାରୁ ଠିକାଦାର ଛୁ
ସୁବର୍ଣ୍ଣପୁର: ଅସୁରକ୍ଷିତ ରାସ୍ତା। ସୁବର୍ଣ୍ଣପୁର କୋଟସମଲେଇ ଠାରୁ ହରିହର ଜୋର ଡ୍ୟାମକୁ ଥିବା ରାସ୍ତା ପାଲଟିଛି ମରଣଜନ୍ତା। କୋଟି କୋଟି ଟଙ୍କା ଖର୍ଚ୍ଚ କରି ରାସ୍ତା ନିର୍ମାଣ କରାଯାଉଥିବାବେଳେ ଅଧାରେ କାମ ଛାଡି ଛୁ ମାରୁଛି ଠିକାଦାର। ରାସ୍ତା ଦେଇ ଯିବା ସମୟରେ ଦୁର୍ଘଟଣାର ଶିକାର ହେଉଥିବାରୁ ଅସନ୍ତୋଷ ସ୍ଥାନୀୟ ବାସିନ୍ଦା ।
ରାସ୍ତା ପାଲଟିଛି ମରଣଯନ୍ତା। ନିମ୍ନମାନର କାମ ପାଇଁ ଯିବା ଆସିବାରେ ହେଉଛି ସମସ୍ୟା । ସୁବର୍ଣ୍ଣପୁର କୋଟସମଲେଇ ଠାରୁ ହରିହରଜୋର ଡ୍ୟାମକୁ ଥିବା ରାସ୍ତା । କୋଟି କୋଟି ଟଙ୍କା ଖର୍ଚ୍ଚ କରି ରାସ୍ତା ନିର୍ମାଣ କରାଯାଉଥିବାବେଳେ ଅଧାରେ କାମ ଅଛକି ରହିଛି । କାମ ଛାଡି ଠିକାଦାର ଛୁ ମାରିଥିବା ସ୍ଥାନୀୟ ଲୋକଙ୍କ ଅଭିଯୋଗ। ଏହି ରାସ୍ତା ଦେଇ ପର୍ଯ୍ୟଟକଙ୍କ ସହିତ ଜଙ୍ଗଲି ଅଂଚଳରେ ବାସ କରୁଥିବା ଲୋକେ ଯାତାୟାତ କରିଥାନ୍ତି।
ଜଗନ୍ନାଥଙ୍କ ଅନନ୍ୟ ଲିଳାକ୍ଷେତ୍ର ପାତାଳି ଶ୍ରୀକ୍ଷେତ୍ରରୁ ହରିହର ଯୋର ଡ୍ୟାମକୁ ଥିବା ଏହି ଏକ ମାତ୍ର ରାସ୍ତା ଜଙ୍ଗଲ ଭିତର ଦେଇ ଯାଇଛି। ଏହାର ଉନ୍ନତିକରଣ କରିବାକୁ ପୁର୍ତ୍ତ ବିଭାଗ ପକ୍ଷରୁ ୫ କିମି ରାସ୍ତା ପାଇଁ ୭ କୋଟି ଟଙ୍କା ବ୍ୟୟ ଅଟକଳ ସହ ଟେଣ୍ଡର କରାଯାଇଥିବା ବେଳେ କାମ ମଧ୍ୟ ଆରମ୍ଭ ହୋଇଥିଲା। ତେବେ କିଛି ଦୂର କାମ ହେଲା ପରେ ଅଧାରେ କାମ ବନ୍ଦ କରି ଠିକା ସଂସ୍ଥା ଫେରାର ମାରିବା ଅଭିଯୋଗ ହୋଇଛି। ଅପରପକ୍ଷରେ ଖୁବ ଶୀଘ୍ର ରାସ୍ତା କାମ ସରିଯିବ ବୋଲି କହିଛନ୍ତି ଜିଲ୍ଲାପାଳ।
ମନମୋହୁଛି ଅସ୍ତରଙ୍ଗ ମାଣ୍ଡୁକି ପଞ୍ଚାୟତର ଗ୍ରାମୀଣ ଉଦ୍ୟାନ
ଅସ୍ତରଙ୍ଗ: ଗାଁରେ ସହରର ମଜା । କର୍ମମୟ ଜୀବନ ସାଙ୍ଗକୁ ଧାଁ ଦୌଡରୁ ବାହାରି ନିଜର ସ୍ବାସ୍ଥ୍ୟର ଯତ୍ନ ନେଉଛନ୍ତି ଗ୍ରାମବାସୀ । ପୁରୀ ଅସ୍ତରଙ୍ଗ ମାଣ୍ଡୁକି ପଞ୍ଚାୟତ ଗ୍ରାମୀଣ ଉଦ୍ୟାନରେ ଲାଗୁଛି ଲୋକଙ୍କ ଭିଡ। ଗାଁରେ ସହରର ମଜା । ମନମୋହୁଛି ଗ୍ରାମୀଣ ଉଦ୍ୟାନ। ସକାଳ ଓ ସନ୍ଧ୍ୟାରେ ଜମୁଛି ଲୋକଙ୍କ ଭିଡ । ପୁରୀ ଅସ୍ତରଙ୍ଗ ମାଣ୍ଡୁକି ପଞ୍ଚାୟତ ଗ୍ରାମୀଣ ଉଦ୍ୟାନ। ବିଜୁ ଗ୍ରାମୀଣ ଉଦ୍ୟାନ ଯୋଜନା ଜରିଆରେ ସାକାର ହୋଇପାରିଛି ଗ୍ରାମାଞ୍ଚଳ ଲୋକଙ୍କର ସ୍ବପ୍ନ। ଉଦ୍ୟାନରେ ଶୋଭା ପାଉଛି ଭଳିକି ଭଳି ଫୁଲ ଗଛ ସାଙ୍ଗକୁ ଘାସ ଗାଲିଚା ,କୁନି ପିଲାଙ୍କୁ ଆକୃଷ୍ଠ କରୁଛି ପଶୁପକ୍ଷୀଙ୍କ ପ୍ରତିମୂର୍ତ୍ତି। ଉଦ୍ୟାନରେ କିଏ ସେଲଫି ନେଉଛି ତ ଆଉ କିଏ ବୁଲାବୁଲି କିର ପାର୍କର ମଜା ନେଉଛି। ପଞ୍ଚାୟତର ନୂତନ ସରପଞ୍ଚ ରୋଜିନା ଜେନା ନିଜ ପ୍ରଚେଷ୍ଟାରେ ପାର୍କଟି ନିର୍ମାଣ କରିଛନ୍ତି। ଏଠାରେ ଯୋଗ, ବ୍ୟାୟମ କୁନି ପିଲାଙ୍କ ପାଇଁ ବିଭିନ୍ନ ବ୍ୟବସ୍ଥା କରାଯାଇଛି। ଗାଁ ମାଟିରେ ସହରୀ ସୁବିଧା ପାଇଁ ଖୁସି ପ୍ରକାଶ କରିଛନ୍ତି ଅଞ୍ଚଳବାସୀ।
କାଳିଆ କାମରେ ଲାଗିବ ଅର୍ପଣ ଚାଉଳ, ଅଯଥା ବିବାଦ ପାଇଁ ଚେଷ୍ଟା କରୁଥିବା ବିରୋଧୀଙ୍କ ଚକ୍ରାନ୍ତ ଫେଲ୍
ପୁରୀ: ମହାପ୍ରଭୁଙ୍କ କାର୍ଯ୍ୟରେ ଲାଗିବ ଅର୍ପଣ ଗୁଆ ଚାଉଳ। ଅର୍ପଣ ରଥରେ ସଂଗୃହିତ ସମସ୍ତ ସାମଗ୍ରୀକୁ ସସମ୍ମାନେ ଗ୍ରହଣ କରିବ ଶ୍ରୀମନ୍ଦିର ସୁଆର ମହାସୁଆର ନିଯୋଗ । ଶ୍ରୀଜିଉଙ୍କ ପାଇଁ ଭକ୍ତ ଦେଇଥିବା ଚାଉଳ, ଗୁଆ, ଶ୍ରୀଫଳକୁ ତର୍ଜମା କରି ବ୍ୟବସ୍ଥା ଅନୁସାରେ ମହାପ୍ରଭୁଙ୍କ କାର୍ଯ୍ୟରେ ଲଗାଯିବ। ପରିକ୍ରମା ପ୍ରକଳ୍ପ ଉଦଘାଟନ ପୂର୍ବରୁ ରାଜ୍ୟର ଗାଁ ଗାଁରେ ଗଡ଼ିଥିଲା ଜୟ ଜଗନ୍ନାଥ ଅର୍ପଣ ରଥ । ଏହି ସମୟରେ ଭକ୍ତ ଓ ଶ୍ରଦ୍ଧାଳୁମାନେ ସ୍ବତଃସ୍ଫୂର୍ତ୍ତ ଭାବେ ମହାପ୍ରଭୁଙ୍କ ଉଦ୍ଦେଶ୍ୟରେ ଚାଉଳ, ଗୁଆ ଓ ନଡ଼ିଆ ପ୍ରଦାନ କରିଥିଲେ । ଯାହାକୁ ନେଇ ବିରୋଧୀ ଅଯଥାରେ ବିବାଦ ସୃଷ୍ଟି କରିଥିଲେ । ତେବେ ଆଜି ଏଭଳି ନିଷ୍ପତ୍ତି ନିଆଯିବା ପରେ ଅଯଥା ବିବାଦ ପାଇଁ ଚେଷ୍ଟା କରୁଥିବା ବିରୋଧୀଙ୍କ ଚକ୍ରାନ୍ତ ଫେଲ ମାରିଛି ।
ଅଣ୍ଡର ୧୯ ବିଶ୍ବକପରେ ଭାରତକୁ ଚାମ୍ପିୟନ କରିଥିବା ଅଧିନାୟକ
ନନ୍ଦିଘୋଷ ବ୍ୟୁରୋ: ଆସନ୍ତା ୧୯ ତାରିଖରୁ ଆରମ୍ଭ ହେବାକୁ ଯାଉଛି ଅଣ୍ଡର-୧୯ ବିଶ୍ବକପ । ଦକ୍ଷିଣ ଆଫ୍ରିକାରେ ଅନୁଷ୍ଠିତ ହେବାକୁ ଥିବା ଏହି ଟୁର୍ଣ୍ଣାମେଣ୍ଟ ଜିତିବା ପାଇଁ ଭାରତ ପ୍ରସ୍ତୁତ ରହିଥିବା କୁହାଯାଉଛି । ତେବେ ଭାରତ ଏଯାବତ ଅଣ୍ଡର-୧୯ ବିଶ୍ବକପ ୫ଥର ଜିତିଥିବା ଷଷ୍ଠଥର ଲକ୍ଷ୍ୟରେ ରହିଛି । ଯଦି ଆମେ କହିବା ତାହେଲେ ୫ଜଣ ଅଧିନାୟକ ବିଶ୍ବକପ ଜିତାଇଥିବାବେଳେ ସେମାନଙ୍କ ସମ୍ପର୍କରେ ଆସନ୍ତୁ ଜାଣିବା । ଭାରତ ପ୍ରଥମେ ମହମ୍ମଦ କୈଫଙ୍କ ଅଧିନାୟକତ୍ବରେ ଅଣ୍ଡର ୧୯ ବିଶ୍ବକପ ଜିତିଥିଲା । ୨୦୦୦ ମସିହାରେ ପ୍ରଥମ ଚାମ୍ପିୟନ ହୋଇଥିଲା । ଏହାପରେ ଦୀର୍ଘ ୮ ବର୍ଷ ପରେ ଟିମ ଇଣ୍ଡିଆର ଭରସାଯୋଗ୍ୟ ବ୍ୟାଟ୍ସମ୍ୟାନ ବିରାଟ କୋହଲିଙ୍କ ଅଧିନାୟକତ୍ବରେ ୨୦୦୮ ମସିହାରେ ଚାମ୍ପିୟନ ହୋଇଥିଲା । ଏହାପରେ ୨୦୧୨ ମସିହାରେ ଉନ୍ମୁକ୍ତ ଚାନ୍ଦଙ୍କ ଅଧିନାୟକତ୍ବରେ ଭାରତ ତୃତୀୟ ଅଣ୍ଡର ୧୯ ବିଶ୍ବକପ ଜିତିବାରେ ସଫଳ ହୋଇଛି । ପରେ ୨୦୧୮ ମସିହାରେ ପୃଥୀ ସ ଏବଂ ୨୦୨୨ରେ ୟସ ଧୁଲଙ୍କ ଅଧିନାୟକତ୍ବରେ ଦଳ ଚାମ୍ପିୟନ ହୋଇଛି । ୫ଥର ବିଜୟୀ ହୋଇଥିବା ଭାରତୀୟ ଦଳ ଷଷ୍ଠଥର ବିଜୟୀ ହେବା ଲକ୍ଷ୍ୟରେ ରହିଛି ।
ପ୍ରକୃତି କଣ୍ଠରେ ‘ପରିକ୍ରମା’ଭଜନ
ଭୁବନେଶ୍ବର: ସାକାର ହେଲା ଶତାବ୍ଦୀର ସ୍ବପ୍ନ। ଶ୍ରୀମନ୍ଦିର ସ୍ବର୍ଣ୍ଣିମ ଇତିହାସରେ ଯୋଡ଼ିହେଲା ନୂଆ ଅଧ୍ୟାୟ । ବିଶ୍ବନିଅନ୍ତାଙ୍କ ବିଜେସ୍ଥଳୀର ଭବ୍ୟ ରୂପ। ଝଟକୁଛି ଉତ୍କଳୀୟ କଳା, ଐତିହ୍ୟ, ସଂସ୍କୃତିର ଝଲକ। ବହୁପ୍ରତୀକ୍ଷିତ ଶ୍ରୀମନ୍ଦିର ପରିକ୍ରମା ପ୍ରକଳ୍ପ ଲୋକାର୍ପଣ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ଭକ୍ତ ଓ ଭଗବାନ ହେଲେ ଏକାଠି ସବୁଠି କାଳିଆର ନାମ ହେଉଛି ଗୁଞ୍ଜରିତ । ଏହାରି ଭିତରେ ଓଲିଉଡର ଲୋକପ୍ରିୟ କଳାକାର ପ୍ରକୃତି ମିଶ୍ର ଶ୍ରୀମନ୍ଦିର ପରିକ୍ରମା ପ୍ରକଳ୍ପ ନେଇ ଗୀତ ଗାଇଛନ୍ତି । ଗୀତକୁ ନେଇ ସୋସିଆଲ ମିଡିଆରେ ତାଙ୍କୁ ବେଶ୍ ଭଲ ପାଇବା ଏବଂ ପ୍ରଶଂସା ମିଳିଛି । ଅତି ଚମତ୍କାର ଢଙ୍ଗରେ ଗୀତ ଠିକୁ ଗାଇଛନ୍ତି ଅଭିନେତ୍ରୀ । ଗୀତକୁ ସଂଯୋଜନା କରିଛନ୍ତି ସଙ୍ଗୀତ ନିର୍ଦେଶକ ମନ୍ମଥ ମିଶ୍ର ।
ଆମେରିକା ଉପରାଷ୍ଟ୍ରପତି କମଲା ହାରିସଙ୍କ ଭୟ! କହିଲେ ଏମିତି କଥା
ନନ୍ଦିଘୋଷ ବ୍ୟୁରୋ: କୌଣସି ଯୁଦ୍ଧକୁ ଜିତିବାର ଦୁଇଟି ଉପାୟ ଅଛି ପ୍ରଥମତଃ ଆପଣଙ୍କର କୌଣସି ପ୍ରତିଦ୍ୱନ୍ଦ୍ୱୀ ନଥିବେ କିମ୍ବା ଆପଣ ଭବିଷ୍ୟତକୁ ନେଇ ଭୟ କରୁଥିବେ। ଭୟ ଆମକୁ ଶକ୍ତି ପ୍ରଦାନ କରେ ଯାହାକୁ ଆମେ ଆମର ଭବିଷ୍ୟତକୁ ନେଇ କଳ୍ପନା କରିଥାଉ ଏବଂ ତା’ପରେ ସେହି ଭବିଷ୍ୟତକୁ ପରିବର୍ତ୍ତନ କରିବାକୁ ଚେଷ୍ଟା କରିଥାଉ। ଆମେରିକାର ଉପରାଷ୍ଟ୍ରପତି କମଲା ହାରିସ ନିଜ ଭୟକୁ ନେଇ ଏହା କହିଛନ୍ତି।
ଚଳିତ ବର୍ଷ ଆମେରିକାରେ ସାଧାରଣ ନିର୍ବାଚନ ହେବାକୁ ଯାଉଛି ଏବଂ ଏ ସମ୍ପର୍କରେ ରାଜନୀତି ଅତ୍ୟନ୍ତ ଗରମ। ଖୁବ୍ ଶୀଘ୍ର ଆମେରିକୀୟ ଲୋକମାନେ ରାଷ୍ଟ୍ରପତି ପ୍ରାର୍ଥୀଙ୍କ ଭବିଷ୍ୟତ ସ୍ଥିର କରିବାକୁ ଯାଉଛନ୍ତି। ଆମେରିକାର ଉପରାଷ୍ଟ୍ରପତି କମଲା ହାରିସ୍ ନିର୍ବାଚନ ସମ୍ପର୍କରେ ଏକ ବିବୃତ୍ତି ଦେଇଛନ୍ତି, ଯାହା ବର୍ତ୍ତମାନ ସବୁ ସ୍ଥାନରେ ଆଲୋଚନା ହେଉଛି। ତାଙ୍କ ବିବୃତ୍ତିରେ ହ୍ୟାରିସ୍ କହିଛନ୍ତି ଯେ ସେ ବହୁତ ଡରି ଯାଇଛନ୍ତି। ତେବେ ଏଇଠି ମନକୁ ପ୍ରଶ୍ନ ଆସେ ସୁପରପାୱାର ଆମେରିକାର ଉପରାଷ୍ଟ୍ରପତିଙ୍କୁ କ’ଣ ଡରାଉଛି ? ଆସନ୍ତୁ ଜାଣିବା କମଲା ହାରିସଙ୍କର ଭୟର କାରଣ କ’ଣ?
କମଲା ହାରିସ୍ କାହିଁକି ଭୟଭୀତ?ହ୍ୱାଇଟ ହାଉସକୁ ଫେରିପାରନ୍ତି ଏହି ସମ୍ଭାବନା ତାଙ୍କୁ ଡରାଉଛି । ସେ ସ ଡେମୋକ୍ରାଟିକ୍ ପାର୍ଟିର ସମସ୍ତ ସଦସ୍ୟଙ୍କୁ ଏକାଠି ହେବାକୁ ଅପିଲ କରିଛନ୍ତି । କମଲା ହାରିସଙ୍କ ଏହି ବିବୃତ୍ତି ଆଇଓଆ କକସର ଫଳାଫଳ ଘୋଷଣା ହେବା ପରେ ଆସିଛି, ଯେଉଁଥିରେ ଡୋନାଲ୍ଡ ଟ୍ରମ୍ପ ଜିତିଛନ୍ତି। ତାଙ୍କ ବିବୃତ୍ତିରେ ସେ କହିଛନ୍ତି ଯେ ଯେପରି ଆମେ ଆମ ପିଲାମାନଙ୍କ ଭବିଷ୍ୟତ ବିଷୟରେ ଚିନ୍ତା କରି ଶଯ୍ୟା ଉପରେ ଗଡତଡ ହେଉ , ସେହିଭଳି ଦେଶର ଭବିଷ୍ୟତକୁ ନେଇ ମଧ୍ୟ ଆମ ମନରେ ଚିନ୍ତା ରହିବା ଆବଶ୍ୟକ । ମୁଁ ବହୁତ ଭୟଭୀତ ଯେ କାଳେ ଡୋନାଲ୍ଡ ଟ୍ରମ୍ପ ପୁଣିଥରେ ହ୍ୱାଇଟ୍ ହାଉସକୁ ଫେରିବେ । ଟ୍ରମ୍ପଙ୍କୁ ହ୍ୱାଇଟ୍ ହାଉସକୁ ପ୍ରତ୍ୟାବର୍ତ୍ତନ ଆମେରିକାର ଗଣତନ୍ତ୍ର ପାଇଁ ଏହା ଭଲ ହେବ ନାହିଁ। ଆମେ ସମସ୍ତେ ଭୟଭୀତ ହେବା ଉଚିତ୍, ସେଥିପାଇଁ ମୁଁ ଦେଶ ସାର ବୁଲିବୁଲି ପ୍ରଚାର କରୁଛି ।
ଓବାମା ମଧ୍ୟ ଭୟ ପ୍ରକଟ କରିଛନ୍ତି
ଉପରାଷ୍ଟ୍ରପତି କମଲା ହାରିସ୍ କେବଳ ଏହି କଥା କହିନାହାନ୍ତି। ଏହାପୂର୍ବରୁ ଆମେରିକାର ପୂର୍ବତନ ରାଷ୍ଟ୍ରପତି ବାରାକ ଓବାମା ଏବଂ ପୂର୍ବତନ ପ୍ରଥମ ଲେଡି ମିସେଲ ଓବାମା ମଧ୍ୟ ଡୋନାଲ୍ଡ ଟ୍ରମ୍ପ ପୁଣିଥରେ ଆମେରିକାର ରାଷ୍ଟ୍ରପତି ଭାବରେ ନିର୍ବାଚିତ ହେବାର ସମ୍ଭାବନାକୁ ଭୟାନକ ବୋଲି ବର୍ଣ୍ଣନା କରିଥିଲେ। ସେ କହିଛନ୍ତି ଯେ ଜଣେ ପୂର୍ବତନ ରାଷ୍ଟ୍ରପତି ଯାହାଙ୍କ ବିରୋଧରେ ଦୁଇଥର ମହାଭିଯୋଗ ଆସିଥିଲା ଓ ଯାହାଙ୍କ ବିରୋଧରେ ୯୧ଟି ଅପରାଧିକ ମାମଲା ବିଚାରାଧୀନ ଅଛି, ସେ ଆମେରିକାର ଗଣତନ୍ତ୍ର ପାଇଁ ବିପଦ।
ବରଗଡ଼ରେ ଚାଲିଛି କଂସଙ୍କ ରାଜୁତି, ଆଜି ପୁତନା ବଧ କରିବେ ଶ୍ରୀକୃଷ୍ଣ
ବରଗଡ଼: ବରଗଡ଼ର ବିଶ୍ୱ ପ୍ରସିଦ୍ଧ ମୁକ୍ତାକାଶ ରଙ୍ଗ ମଂଚର ତୃତୀୟ ଦିନରେ ନନ୍ଦରାଜା ଓ ନନ୍ଦରାଣୀ ଶ୍ରୀକୃଷ୍ଣଙ୍କୁ ପାଇ ଆତ୍ମବିଭୋର ହୋଇପଡିଛନ୍ତି ସେଥିପାଇଁ ଆୟୋଜନ କରିଛନ୍ତି ନନ୍ଦୋତ୍ସବ । ଏପଟେ ମହାରାଜା କଂସ ଦେବକୀଙ୍କ ଅଷ୍ଟମ ଗର୍ଭର ସନ୍ତାନକୁ ଦର୍ପଣଶୀଳାରେ ପ୍ରହାର କରିବାକୁ ଯିବାବେଳେ ଶୂନ୍ୟରେ ଆର୍ବିଭାବ ହୋଇ ବିଜୁଳି କନ୍ୟା ଦେଇଛନ୍ତି ଦୈବବାଣୀ । ଏହାପରେ ମହାରାଜ କଂସ ଅତ୍ୟନ୍ତ ବିବ୍ରତ ହୋଇପଡ଼ିଥିବା ବେଳେ କୃଷ୍ଣଙ୍କୁ ମାରିବା ପାଇଁ ଗୋପପୁରକୁ ପଠାଇଛନ୍ତି ଷଢ଼ ମଲ୍ଲ ସହ ପୁତୁନା ରାକ୍ଷସୀଙ୍କୁ।
କୃଷ୍ଣ ଜନ୍ମ ପରେ ସାରା ଗୋପପୁର ହୋଇପଡ଼ିଛି ଉତ୍ସବ ମୁଖର । ପୁତ୍ର ସନ୍ତାନ ଲାଭ କରି ନନ୍ଦରାଜା ଓ ରାଣୀ ଖୁସୀରେ ଆତ୍ମବିଭୋର ହୋଇପଡ଼ିଛନ୍ତି । ଏହା ସହ କୃଷ୍ଣଙ୍କ ଆଗମନରେ ସମସ୍ତ ଗୋପୀ ଓ ଗୋପାଳ ଉତ୍ସାହିତ ହୋଇ ଥିବା ବେଳେ ନନ୍ଦଭବନରେ ବଡ଼ ଧୁମଧାମରେ ଆୟୋଜନ କରାଯାଇଛି ନନ୍ଦୋତ୍ସବ। ନନ୍ଦରାଜାଙ୍କ ନିମନ୍ତ୍ରଣ ପାଇ ସମସ୍ତ ଗୋପ, ଗୋପାଳ ନନ୍ଦୋତ୍ସବରେ କୃଷ୍ଣଙ୍କ ଦୋଳିଝୁଲା ସହ ରାସନୃତ୍ୟରେ ମାତିଯାଇଛନ୍ତି । କୃଷ୍ଣଙ୍କୁ ଦର୍ଶନ କରି ଗୋପପୁରବାସୀ ଆତ୍ମବିଭୋର ହୋଇପଡ଼ିଥିବା ବେଳେ ଧୂପ, ଦୀପ ନୈବେଦ୍ୟ ଦେଇ କୃଷ୍ଣଙ୍କୁ ପୂଜାର୍ଚ୍ଚନା କରିବା ସହ ଘଣ୍ଟବାଦ୍ୟ, ସଙ୍କୀର୍ତ୍ତନରେ ଉଛୁଳି ପଡ଼ୁଛି ଗୋପପୁର ଏବଂ ନନ୍ଦରାଜାଙ୍କ କୋଳରେ ଶ୍ରୀକୃଷ୍ଣ। ଏହି ଅବସରରେ ଗୋପପୁରରେ ଥିବା ନନ୍ଦଦରବାର ଉଦ୍ ଘାଟନ କରିଥିଲେ ବରଗଡ ଆରକ୍ଷୀ ଅଧିକ୍ଷକ ।
ଏପଟେ ମଥୁରାରେ ମହାରାଜ କଂସଙ୍କ ରାଜୁତି ଜୋରସୋରରେ ଚାଲିଛି। ପ୍ରଥମେ ଶ୍ୟାମେଶ୍ୱର ମହାଦେବଙ୍କୁ ପୂଜାର୍ଚ୍ଚନା କରି ସାରିବା ପରେ ଦେବକୀଙ୍କ ଅଷ୍ଟମ ଗର୍ଭ ସନ୍ତାନ ଜନ୍ମ ନେଇଥିବା ସୂଚନା ମିଳିଛି ମହାରାଜ କଂସଙ୍କୁ। ଏହାପରେ ମହାରାଜ କଂସ କାରାଗୃହକୁ ଯାଇ ବିଜୁଳି କନ୍ୟାଙ୍କୁ ଛଡ଼ାଇଆଣିଛନ୍ତି ଦେବକୀଙ୍କ କୋଳରୁ । ଦେବକୀ ବାସୁଦେବ ଶୁଶୁ କନ୍ୟାକୁ ଛାଡ଼ିଦେବା ପାଇଁ ବହୁ କାକୁତି ମିନତୀ କରିଥିଲେ ମଧ୍ୟ ମାନି ନାହିଁ କଂସ । ଶେଷରେ ଶିଶୁକନ୍ୟାକୁ ପଥର ଶିଳାରେ କଚାଡ଼ିବା ବେଳେ କଂସର ହାତରୁ ଅର୍ନ୍ତଧ୍ୟାନ ହୋଇଛନ୍ତି ବିଜୁଳି କନ୍ୟା । ଏଥିରେ ବ୍ୟତିବସ୍ତ ହୋଇ ମହାରାଜ କଂସ ରାଜଦରବାରକୁ ଫେରିଆସି ମନ୍ତ୍ରୀ ପରିଷଦ ବର୍ଗଙ୍କ ସହ ମନ୍ତ୍ରଣା କରିଛନ୍ତି । ଏହି ସମୟରେ ନାରଦ ପହଂଚି କଂସ ମହାରାଜଙ୍କୁ ବିଜମନ୍ତ୍ର ପ୍ରଦାନ କରିଥିବା ବେଳେ କୃଷ୍ଣଙ୍କୁ ମାରିବା ପାଇଁ କଂସ ଆହ୍ୱାନ କରିଛନ୍ତି ଷଢ଼ମଲ୍ଲ ସହ ପୁତୁନା ରାକ୍ଷସୀଙ୍କୁ । ପୁତନା, ତୃଣା, ବକା ସକଟା, ଷଣ୍ଡା ଆଦି ରାକ୍ଷସ ରାକ୍ଷସୀ କଂସ ଙ୍କ ଆଦେଶରେ ବାହାରି ପଡ଼ିଛନ୍ତି ଗୋପପୁରକୁ । ଏହି ଅବସରରେ ମହାରାଜ କଂସ ଆୟୋଜନ କରିଛନ୍ତି ରାଜ୍ୟ ତଥା ରାଜ୍ୟବାହାରୁ ଆସିଥିବା କଳାକାରଙ୍କ ଦ୍ୱାରା ସାଂସ୍କୃତିକ କାର୍ଯ୍ୟକ୍ରମ ।
ପାକିସ୍ତାନ ଇରାନ ବିରୋଧରେ କରିଥିବା ଅପରେସନର ନାମ କାହିଁକି ‘ମାର୍ଗ ବାର୍ ସରମାଚର’ରଖିଛି ?
ଇରାନର ସର୍ଜିକାଲ ଷ୍ଟ୍ରାଇକର ଜବାବ ପାକିସ୍ତାନ ଦେଇଛି । ଇରାନୀ ସୀମା ଭିତରେ ଆତଙ୍କବାଦୀଙ୍କ ବିରୋଧରେ ପାକିସ୍ତାନ ବାୟୁସେନା ପାଲଟା ଆକ୍ରମଣ କରିଛି । ମଙ୍ଗଳବାର ପାକିସ୍ତାନ ସୀମା ଭିତରେ ଇରାନର ଆକ୍ରମଣ ପରେ ଏହି ପଦକ୍ଷେପ ନିଆଯାଇଛି। ଗୁରୁବାର ସକାଳେ ପାକିସ୍ତାନ ଏହି ଆକ୍ରମଣ କରିଥିଲା, ଯାହା ପରେ ଦୁଇ ଦେଶ ମଧ୍ୟରେ ତିକ୍ତତା ବୃଦ୍ଧି ପାଇଛି । ହାମାସ ଏବଂ ଇସ୍ରାଏଲ ମଧ୍ୟରେ ଯୁଦ୍ଧ ଯୋଗୁଁ ପଶ୍ଚିମ ଏସିଆର ପରିସ୍ଥିତି ପୂର୍ବରୁ ତିକ୍ତ ହୋଇପଡ଼ିଛି ଏବଂ ଏହି ଆକ୍ରମଣ ସୁରକ୍ଷା ଚିନ୍ତାକୁ ଆହୁରି ବଢାଇଦେଇଛି । ପାକିସ୍ତାନ ଦ୍ୱାରା ନିଆଯାଇଥିବା ଏହି ସାମରିକ କାର୍ଯ୍ୟାନୁଷ୍ଠାନର ନାମ ଅପରେସନ୍ ‘ମାର୍ଗ ବାର୍ ସରମାଚର’ରଖାଯାଇଥିଲା। ଏହି କୋଡେନାମ ସ୍ଥିର କରିବା ପଛରେ ଏକ ବିଶେଷ କାରଣ ରହିଛି । ଆସନ୍ତୁ ଜାଣିବା କଣ ପାଇଁ ପାକିସ୍ତାନ ଏହି ଅପରେସନର ନାମ ‘ମାର୍ଗ ବାର୍ ସରମାଚର’ରଖିଥିଲା ।
ମାର୍ଗ ବାର୍ ସରମାଚରର ଅର୍ଥ କ’ଣ?
ମାର୍ଗ ବାର୍ ସରମାଚରରେ ବାକ୍ୟରେ ‘ମାର୍ ବାର୍’ ଅର୍ଥ ହେଉଛି ‘ଯେପର୍ଯ୍ୟନ୍ତ କାହାକୁ ଶେଷ କରା ନଯାଇଛି ’ । ସରମାଚରର ଅର୍ଥ ସାହସୀ, ବିଦ୍ରୋହୀ, ଗରିଲା, ସ୍ୱାଧୀନତା ସଂଗ୍ରାମୀ। “ସରମାଚର” ଅର୍ଥ ବାଲୁଚ ଭାଷାରେ ହୋଉଛି ଯୋଦ୍ଧା ଏବଂ ପାକିସ୍ତାନ-ଇରାନ ସୀମାରେ ସକ୍ରୀୟ ଥିବା ସଶସ୍ତ୍ର ଗୋଷ୍ଠୀ ନିଜ ସଦସ୍ୟଙ୍କ ପାଇଁ ଏହି ଶବ୍ଦ ବ୍ୟବହାର କରିଥାନ୍ତି । ତେଣୁ ମାର୍ ବାର୍ ସରମାଚରର ଅର୍ଥ ହେଉଛି ସରମାଚରର ବିନାଶ ବା ଯୋଦ୍ଧାଙ୍କ ବିନାଶ ।
କେଉଁ ଦେଶରେ ଏହି ବାକ୍ୟାଂଶ ଅଧିକ ବ୍ୟବହୃତ ହୁଏ?
ତେବେ ଇରାନ, ଆଫଗାନିସ୍ତାନ, ଲେବାନନ୍, ୟେମେନ, ଇରାକ ଏବଂ ପାକିସ୍ଥାନରେ ‘ମାର୍ ବାର୍’ ବାକ୍ୟ ବହୁଳ ଭାବରେ ବ୍ୟବହୃତ ହୋଇଥାଏ। ଇସଲାମିକ୍ ରିପବ୍ଲିକ୍ ଅଫ୍ ଇରାନର ପ୍ରଥମ ସର୍ବୋଚ୍ଚ ନେତା ରୁହୁଲ୍ଲା ଖୋମେନି ଏହି ଶବ୍ଦକୁ ଲୋକପ୍ରିୟ କରିଥିଲେ।
ସରମାଚାରା ଉପରେ ପାକିସ୍ତାନ କ’ଣ କହିଲା?
ଏହି ସାମରିକ କାର୍ଯ୍ୟାନୁଷ୍ଠାନ ପରେ ପାକିସ୍ତାନର ବୈଦେଶିକ ମନ୍ତ୍ରଣାଳୟ ସମଗ୍ର ବିଶ୍ୱକୁ କହିଛି ଯେ ‘ଆଜି ସକାଳେ ପାକିସ୍ତାନ ଇରାନର ସିସ୍ତାନ-ଓ-ବାଲୁଚିସ୍ତାନ ପ୍ରଦେଶରେ ଆତଙ୍କବାଦୀ ଟାର୍ଗେଟ ଉପରେ ନିର୍ଦ୍ଦିଷ୍ଟ ଭାବରେ ସାମରିକ ଆକ୍ରମଣ ଆରମ୍ଭ କରିଛି। ଏହି ଗୁପ୍ତ ଅପରେସନ ସମୟରେ ଅନେକ ଆତଙ୍କବାଦୀ ନିହତ ହୋଇଛନ୍ତି । ଏହାର କୋଡ୍ ନାମ ଥିଲା ‘ମାର୍ଗ୍ ବାର୍ ସରମାଚର୍’ । ପାକିସ୍ତାନ ଆହୁରି ମଧ୍ୟ କହିଛି ଯେ ଗତ କିଛି ବର୍ଷ ଭିତରେ ଇରାନରେ ସକ୍ରୀୟ ଥିବା ବଲୁଚ ଆତଙ୍କବାଦୀ ବାବଦରେ ଆମେ ବାରମ୍ବାର ତେହେରାନକୁ ଅବଗତ କରାଇଛି । ଏନେଇ ଆମେ ଇରାନକୁ ବଳିଷ୍ଠ ପ୍ରମାଣ ସହିତ ଡୋଜେୟର ମଧ୍ଯ ଦେଇଥିଲୁ । କିନ୍ତୁ ଇରାନ ଏନେଇ କୌଣସି ବଳିଷ୍ଟ ପଦକ୍ଷେପ ନେଇ ନାହିଁ । ଏହି କାରଣରୁ ଆତଙ୍କବାଦୀମାନେ ନିର୍ଭୟରେ ପାକିସ୍ତାନରେ ହିଂସାକାଣ୍ଡ ଭିଆଉଛନ୍ତି । ଏହି ଆତଙ୍କବାଦୀଙ୍କ ଆଡ୍ଡା ବାବଦରେ ନିର୍ଦ୍ଧିଷ୍ଟ ଓ ନିର୍ଭରଯୋଗ୍ୟ ସୂଚନା ମିଳିବା ପରେ ପାକିସ୍ତାନୀ ସେନା କାର୍ଯ୍ୟାନୁଷ୍ଠାନ ଗ୍ରହଣ କରିଛି ବୋଲି ପାକିସ୍ତାନ କହିଛି ।
ଆକ୍ରମଣ ପରେ ମଧ୍ୟ ଇରାନ ସହିତ ସମ୍ପର୍କରେ ସନ୍ତୁଳନ ବଜାୟ ରଖିବାକୁ ପ୍ରୟାସ
ପାକିସ୍ତାନ କହିଛି ଯେ,ଇରାନର ସାର୍ବଭୋମତ୍ୱ ଓ ଅଖଣ୍ଡତାକୁ ଆମେ ପୂର୍ଣ୍ଣ ସମ୍ମାନ କରୁ । ଆଜି ହୋଇଥିବା ଏହି ଆକ୍ରମଣର ଏକମାତ୍ର ଉଦ୍ଦେଶ୍ୟ ହେଉଛି ପାକିସ୍ତାନର ନିଜର ସୁରକ୍ଷା ତଥା ଜାତୀୟ ସ୍ୱାର୍ଥର ରକ୍ଷା । ନିଜ ସ୍ୱାର୍ଥ ସହିତ ଆମେ ସାଲିସ କରିପାରିବୁ ନାହିଁ । ପାକିସ୍ତାନର ଲୋକମାନଙ୍କ ମନରେ ଇରାନବାସୀଙ୍କ ପ୍ରତି ବହୁତ ସମ୍ମାନ ଓ ସ୍ନେହ ରହିଛି । ଆତଙ୍କବାଦର ମୁକାବିଲା ପାଇଁ ଆମେ ପାରସ୍ପାରିକ ସହଯୋଗରେ ବିଶ୍ୱାସ କରୁ ।
ପୁରୀକୁ ଗଡ଼ିଲା ଜଗନ୍ନାଥ ଏକ୍ସପ୍ରେସ୍, ଶୁଭାରମ୍ଭ କଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ
ନନ୍ଦିଘୋଷ ବ୍ୟୁରୋ: ଜଗନ୍ନାଥ ଦର୍ଶନ ହେବ ଆହୁରି ସହଜ । ସୁଦୁର ସୁନ୍ଦରଗଡ଼ ହେଉ କି ସୀମାନ୍ତ ନୂଆପଡ଼ା, ଯାତ୍ରୀମାନେ ପୁରୀକୁ ଆରାମଦାୟକ ଯାତାୟତ କରିବାର ସୁବିଧା ପାଇବେ । ତାହା ପୁଣି ସୁଲଭ ମୂଲ୍ୟରେ । କାରଣ ଆଜିଠୁ ଶ୍ରୀକ୍ଷେତ୍ରକୁ ଗଡ଼ିଛି ଜଗନ୍ନାଥ ଏକ୍ସପ୍ରେସ୍ । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଜଗନ୍ନାଥ ଏକ୍ସପ୍ରେସକୁ ଫ୍ଲାଗଅଫ୍ କରି ଶୁଭାରମ୍ଭ କରିଛନ୍ତି । ଜିଲ୍ଲା ମୁଖ୍ୟାଳୟରୁ ଯାତ୍ରୀଙ୍କୁ ନେଇ ପୁରୀ ଶ୍ରୀମନ୍ଦିର ଅଭିମୁଖେ ବାହାରିଛି ବିଳାସପୂର୍ଣ୍ଣ ବସ୍ । ଲକ୍ଷ୍ମୀ ଯୋଜନାର ତୃତୀୟ ପର୍ଯ୍ୟାୟରେ ଜଗନ୍ନାଥ ଚେତନାକୁ ଆହୁରି ବ୍ୟାପକ କରିବାକୁ ଜିଲ୍ଲା ମୁଖ୍ୟାଳୟରୁ ପୁରୀ ଯାଏ ଜଗନ୍ନାଥ ଏକ୍ସପ୍ରେସ୍ ଗଡ଼ାଇବାକୁ ନିଷ୍ପତ୍ତି ହୋଇଛି ।
ବଲାଙ୍ଗୀର, ବରଗଡ଼, ଗଜପତି, ଗଞ୍ଜାମ, ଝାରସୁଗୁଡ଼ା, କୋରାପୁଟ, କଳାହାଣ୍ଡି, କେନ୍ଦୁଝର, ମାଲକାନଗିରି, ମୟୂରଭଞ୍ଜ, ନବରଙ୍ଗପୁର, ନୂଆପଡ଼ା, ରାୟଗଡ଼ା, ସମ୍ବଲପୁର ଓ ସୁନ୍ଦରଗଡ଼ ପରି ୧୨ଟି ଜିଲ୍ଲାର ଜଗନ୍ନାଥ ଶ୍ରଦ୍ଧାଳୁଙ୍କ ଉଦ୍ଦେଶ୍ୟରେ ଜଗନ୍ନାଥ ବସ୍ ଗଡ଼ାଇବାକୁ ଲକ୍ଷ୍ୟ ରଖିଛନ୍ତି ରାଜ୍ୟ ସରକାର । ରୁଟ୍ ଚାର୍ଟ ବି ସ୍ଥିର ହୋଇ ସାରିଛି । ବସ୍ ଯେଉଁ ଜିଲ୍ଲାରୁ ବି ଆସିଲେ, ଭୁବନେଶ୍ବରର ଦେଇ ପୁରୀ ଯିବ । ପୁରୀରେ ଶ୍ରୀମନ୍ଦିର ପରିକ୍ରମା ପ୍ରକଳ୍ପ ଲୋକାର୍ପିତ ହୋଇଥିବାବେଳେ ଏହାକୁ ଦେଖିବାକୁ ଶ୍ରଦ୍ଧାଳୁଙ୍କ ଆଗ୍ରହଣ ରହିଛି । ଯେଉଁଥିପାଇଁ ଜଗନ୍ନାଥ ଏକ୍ସପ୍ରେସ ସହାୟ ସାଜିବ । ଯାହାକୁ ନେଇ ସାରା ରାଜ୍ୟର ଜଗନ୍ନାଥ ଶ୍ରଦ୍ଧାଳୁଙ୍କ ଭିତରେ ଆନନ୍ଦର ଲହରି ଖେଳିଯାଇଛି ।