ପୁରୀ: ଶ୍ରୀମନ୍ଦିର ପରିକ୍ରମା ପ୍ରକଳ୍ପ ଲୋକାର୍ପଣ ଉତ୍ସବକୁ ଶଙ୍କରାଚାର୍ଯ୍ୟ ନିଶ୍ଚଳାନନ୍ଦ ସରସ୍ୱତୀଙ୍କୁ ନିମନ୍ତ୍ରଣ କରାଯାଇଛି । ଶଙ୍କରାଚାର୍ଯ୍ୟଙ୍କୁ ଛତିଶଗଡ଼ ରାୟପୁରରେ ନିମନ୍ତ୍ରଣ କରିଛନ୍ତି ଗଜପତି ମହାରାଜ । ଲୋକାର୍ପଣ ଉତ୍ସବରେ ଯୋଗଦେବାକୁ ଆମନ୍ତ୍ରଣ ଜଣାଇଛନ୍ତି ପୁରୀ ଗଜପତି । ଆସନ୍ତା ୧୭ ତାରିଖରେ ପୁରୀ ପରିକ୍ରମା ପ୍ରକଳ୍ପର ଲୋକାର୍ପଣ ଉତ୍ସବର ଭବ୍ୟ ଆୟୋଜନ ହେଉଛି । ଏଥିରେ ରାଜ୍ୟ ତଥା ରାଜ୍ୟ ବାହାର ଶହ ଶହ ସାଧୁସନ୍ଥଙ୍କୁ ନିମନ୍ତ୍ରଣ କରାଯିବା ସହିତ ପ୍ରମୁଖ ଧାର୍ମିକସ୍ଥଳୀର ଦେବଦେବୀ ଓ ଶ୍ରୀଜଗନ୍ନାଥ ମନ୍ଦିରକୁ ନିମନ୍ତ୍ରଣ କରାଯାଇଛି । ଆଜି ରାୟପୁରରେ ଶଙ୍କରାଚାର୍ଯ୍ୟଙ୍କୁ ଭେଟି ଲୋକାର୍ପଣ ଉତ୍ସବକୁ ନିମନ୍ତ୍ରଣ କରିଛନ୍ତି ପୁରୀ ଗଜପତି ମହାରାଜ ।
ଯୁବ ଓଡ଼ିଶା ନବୀନ ଓଡ଼ିଶା କାର୍ଯ୍ୟକ୍ରମ ମାଧ୍ୟମରେ ଉତ୍ସାହିତ ଯୁବଗୋଷ୍ଠୀ
ଗଜପତି: ଯୁବ ଓଡ଼ିଶା ନବୀନ ଓଡ଼ିଶା କାର୍ଯ୍ୟକ୍ରମ ମାଧ୍ୟମରେ ଉତ୍ସାହିତ ଯୁବଗୋଷ୍ଠୀ। ନିଜ ଦକ୍ଷତା ପ୍ରତିପାଦନ କରିବାକୁ ପାଇଛନ୍ତି ସୁଯୋଗ। ପାରଳାଖେମୁଣ୍ଡି ପୌର ପରିଷଦ ପକ୍ଷରୁ ଆୟୋଜିତ ହୋଇଛି ବିଭିନ୍ନ କ୍ରୀଡ଼ା ପ୍ରତିଯୋଗିତା। ଯାହାକୁ ନେଇ ଖୁସି ବ୍ୟକ୍ତ କରିବା ସହ ରାଜ୍ୟ ସରକାର ତଥା ମୁଖ୍ୟମନ୍ତ୍ରୀଙ୍କୁ ଧନ୍ୟବାଦ ଜଣାଇଛନ୍ତି ଯୁବଗୋଷ୍ଠୀ।
ଯୁବ ଗୋଷ୍ଠୀଙ୍କୁ ଆଗକୁ ବଢାଇ ଏକ ନୂତନ ଓଡ଼ିଶା ଗଠନର ପରିକଳ୍ପନା କରିଛନ୍ତି ରାଜ୍ୟ ସରକାର। ଯୁବ ସମାଜ ମଧ୍ୟରେ ପ୍ରତିଭା ସନ୍ଧାନ ପୂର୍ବକ, ଯୁବ ଓଡ଼ିଶା ନବୀନ ଓଡ଼ିଶା କାର୍ଯ୍ୟକ୍ରମ ଆୟୋଜିତ ହେଉଛି। ପାରଳାଖେମୁଣ୍ଡି ପୌର ପରିଷଦ ପକ୍ଷରୁ ଏନେଇ ଆୟୋଜିତ ହୋଇଛି ବିଭିନ୍ନ କ୍ରିଡା ପ୍ରତିଯୋଗିତା। ସ୍ଥାନୀୟ ଷ୍ଟାଡିୟମ ଓ କଲେଜ ପଡ଼ିଆରେ ବ୍ୟାପକ ପ୍ରସ୍ତୁତି କରାଯାଇଛି। ଏଥିରେ ଭାଗ ନେଇଥିଲେ ଶତାଧିକ ଯୁବକ। କ୍ରିକେଟ, ଖୋଖୋ, ଫୁଟବଲ, ଭଲିବଲ, ଆଦି ପ୍ରତିଯୋଗିତାରେ ଭାଗନେଇ ନିଜର ଦକ୍ଷତା ପ୍ରଦର୍ଶନ କରିଛନ୍ତି।
ଯୁବ ଓଡ଼ିଶା ନବୀନ ଓଡ଼ିଶା କାର୍ଯ୍ୟକ୍ରମ ମାଧ୍ୟମରେ ଯୁବବର୍ଗଙ୍କୁ ମିଳିଛି ଉପଯୁକ୍ତ ମଞ୍ଚ। ଏହା ମାଧ୍ୟମରେ ପ୍ରତିଭାବାନ ଯୁବକଙ୍କୁ ଆଗକୁ ବଢ଼ିବାର ସୁଯୋଗ ମିଳିଛି। କ୍ରୀଡ଼ାର ବିକାଶ ହେବା ସଙ୍ଗେ ସଙ୍ଗେ ଉତ୍ସାହିତ ହୋଇଛନ୍ତି ଯୁବ ବର୍ଗ। ଏଥିପାଇଁ ପ୍ରଶାସନ ପକ୍ଷରୁ ସମସ୍ତ ଆନୁଷଙ୍ଗିକ ପଦକ୍ଷେପ ନିଆଯାଇଛି। ଦକ୍ଷ ତଥା ପ୍ରତିଭାବାନ ଯୁବକଙ୍କୁ ଉତ୍ସାହିତ କରିବା ପାଇଁ ଅର୍ଥରାଶି ତଥା ଅନ୍ୟାନ୍ୟ ପ୍ରୋତ୍ସାହନ ପ୍ରଦାନ କରାଯାଉଛି। ଏଭଳି ଏକ ସୁଯୋଗ ପାଇ ରାଜ୍ୟ ସରକାରଙ୍କୁ ଧନ୍ୟବାଦ ଜଣାଇଛନ୍ତି ଯୁବଗୋଷ୍ଠୀ।
ଦର୍ଶକଙ୍କୁ ଟିଭି ଦେଖିବା ହେବ ମହଙ୍ଗା
ନନ୍ଦିଘୋଷ ବ୍ୟୁରୋ: ଦର୍ଶକଙ୍କୁ ଟିଭି ଦେଖିବା ହେବ ମହଙ୍ଗା । ବିଭିନ୍ନ ବ୍ରୋଡକାଷ୍ଟର ସେମାନଙ୍କର ମାସିକ ଦରରେ ବୃଦ୍ଧି କରିଛନ୍ତି । ବିଭିନ୍ନ ଚ୍ୟାନେଲ ଦରରେ ବୃଦ୍ଧି ପରିଲକ୍ଷିତ ହୋଇଛି । ଜୀ ଏଣ୍ଟରଟେନମେଣ୍ଟ, ସୋନି ପିକଚର୍ସ, ଭାୟକମ୧୮ ଦର ବଢ଼ାଇଛନ୍ତି । ବିଭିନ୍ନ ବିଷୟ ପ୍ରସ୍ତୁତିରେ ଅଧିକ ଖର୍ଚ୍ଚ ହେଉଥିବାରୁ ବଢ଼ିଲା ଦର । ନଭେମ୍ବର ୨୦୨୨ରେ NTO 3.0 ଲାଗୁ କରିଥିଲା TRAI । ଭାୟକମ୧୮ ମାସିକ ପ୍ୟାକରେ ୨୦ରୁ ୨୫ ପ୍ରତିଶତ ବୃଦ୍ଧି । ଜୀ ଏଣ୍ଟରଟେନମେଣ୍ଟ ନିଜର ମାସିକ ଦରରେ ୯ରୁ ୧୦% ବୃଦ୍ଧି । ସୋନି ପିକଚର୍ସ ମଧ୍ୟ ମାସିକ ଦରରେ ୧୦ ପ୍ରତିଶତ ବୃଦ୍ଧି କରିଛନ୍ତି । ଏଣିକି ପୂର୍ବ ଅପେକ୍ଷା ଗ୍ରାହକଙ୍କୁ ଅଧିକ ରିଚାର୍ଜ କରିବାକୁ ପଡ଼ିବ ।
କ’ଣ ଏହି ମାର୍କୋର୍ସ? କେଉଁଠି କରନ୍ତି କାମ? କିପରି ହୁଏ ନିଯୁକ୍ତି?
ନୂଆଦିଲ୍ଲୀ: ସୋମାଲିଆ ପାଖରେ ଏକ ଯାହାଜ ଅପହରଣ କରାଯାଇଥିଲା । ଯାହାଜରେ ଥିବା ଭାରତୀୟଙ୍କୁ ସୁରକ୍ଷିତ ଉଦ୍ଧାର କରାଯାଇଛି । ସେଠାରୁ ଭାରତୀୟଙ୍କୁ ଉଦ୍ଧାର କରିଛନ୍ତି ନୌସେନାର କମାଣ୍ଡୋ ମାର୍କୋର୍ସ । ଗୁରୁବାର ସନ୍ଧ୍ୟାରେ ଏହି ‘ଏମଭି ଲୀଲା ନର୍ଫାଲ୍କ’ ନାମକ ଏହି ଜାହାଜ ଅପହରଣ ଖବର ଆସି ପହଞ୍ଚିଥିଲା । ଲାଇବେରିଆର ପତାକା ଲାଗିଥିବା ଏହି ଜାହାଜ ଉପରେ ନୌସେନାର କମାଣ୍ଡୋ ମାର୍କୋର୍ସ କଡ଼ା ନଜର ରଖିଥିଲେ । ସୁଯୋଗ ମିଳିବା ମାତ୍ରେ କମାଣ୍ଡୋମାନେ ଅପରେସନ୍ ପୂରା କରିଥିଲେ । ଏହି ଜାହାଜରେ ଥିବା ୧୫ ଭାରତୀୟଙ୍କ ସହ ମୋଟ ୨୧ କ୍ରୁଙ୍କୁ ସୁରକ୍ଷିତ ଉଦ୍ଧାର କରାଯାଇଛି ।
ସମୁଦ୍ର ଲୁଟେରାମାନେ ଜାହାଜକୁ ଅପହରଣ କରିବାକୁ ଚେଷ୍ଟା କରିଥିଲେ । ଭାରତୀୟ ନୌସେନା ସେମାନଙ୍କୁ ସେଠୁ ପଳାଇଯିବାକୁ କଡ଼ା ଚେତାବନୀ ଦେବା ପରେ ସେମାନେ ଜାହାଜକୁ ଛାଡ଼ି ଦେଇଥିଲେ ।
ତେବେ ଏହି ପୂରା ଅପରେସନରେ ମାର୍କୋର୍ସ କମାଣ୍ଡମାନେ ସବୁ ଦାୟୀତ୍ବ ନେଇଥିଲେ । ସେମାନେ ନଥିଲେ ହୁଏତ ଅପସେସନ ସଫଳ ହୋଇପାରିନଥାନ୍ତା । ବୀରତ୍ବର ପ୍ରମାଣ ଦେଇଥିବା ଏହି ମାର୍କୋର୍ସ କମାଣ୍ଡ କ’ଣ ? ଏମାନେ କେଉଁ ସବୁ କାମ କରନ୍ତି? ଏହା କେବେଠୁ କାମ କରୁଛି? ଜାଣନ୍ତୁ ଏହି ମାର୍କୋର୍ସ କମାଣ୍ଡୋଙ୍କ ବିଷୟରେ ପୂରା ତଥ୍ୟ ।
ଭାରତୀୟ ସେନାର ସାମୁଦ୍ରିକ ୟୁନିଟକୁ MARCOS ବୋଲି କୁହାଯାଏ । ଯାହାର ସରକାରୀ ନାମ ହେଉଛି ମେରାଇନ୍ କମାଣ୍ଡୋ ଫୋର୍ସ (MCF) | ଏହା ଭାରତୀୟ ନୌସେନାର ଏକ ସ୍ୱତନ୍ତ୍ର ୟୁନିଟ୍ | ପୂର୍ବରୁ ଏହାକୁ ଇଣ୍ଡିଆନ୍ ମେରାଇନ୍ ସ୍ପେଶାଲ୍ ଫୋର୍ସ କୁହାଯାଉଥିଲା | ପରେ ଏହାର ନାମ ‘ମାର୍କୋସ୍’ ରଖାଯାଇଥିଲା |
୧୯୮୭ ମସିହା ଫେବୃଆରୀରେ ଏହାକୁ ପ୍ରତିଷ୍ଠା କରାଯାଇଥିଲା । ମାର୍କୋସ୍ ସବୁ ପ୍ରକାର ପରିବେଶରେ କାମ କରିବାକୁ ସକ୍ଷମ | ଏମାନେ ସବୁ ସ୍ଥାନରେ ଶତ୍ରୁଙ୍କ ପାଇଁ ଘାତକ ପ୍ରମାଣିତ ହୋଇଛନ୍ତି । ଏହି ସେନା ନିଜର କାର୍ଯ୍ୟଶୖଳୀ ପାଇଁ ଆନ୍ତର୍ଜାତୀୟ ଖ୍ୟାତି ମଧ୍ୟ ଅର୍ଜନ କରିଛି | ସେନା ଜେଲମ୍ ନଦୀ ଏବଂ ବୁଲର୍ ହ୍ରଦରେ କାମ କରନ୍ତି | ଏହି ହ୍ରଦ ୬୫ ବର୍ଗ କିଲୋମିଟର ଯାଏ ବ୍ୟାପିଛି | ଏଠାରେ ମଧୁର ଜଳ ଥିବାରୁ ମାର୍କୋସ ଜାମ୍ମୁ କାଶ୍ମୀରରେ ଆତଙ୍କବାଦ ବିରୋଧରେ ମଧ୍ୟ ଅଭିଯାନ ଚଳାନ୍ତି ।
ମାର୍କୋର୍ସର ଇତିହାସ
1986 ଏପ୍ରିଲରେ ଆମେରିକାର ନୈାସେନା ସହିତ ଭାରତୀୟ ନୈାସେନା ମିଶି ଏକ ସ୍ବତନ୍ତ୍ର ବାହିନୀ ଗଠନ ପାଇଁ ଯୋଜନା ଆରମ୍ଭ କରିଥିଲା । ସମୁଦ୍ରରେ ଆକ୍ରମଣ ଏବଂ ଅନୁସନ୍ଧାନ ତଥା ଆତଙ୍କବାଦ ବିରୋଧୀ କାର୍ଯ୍ୟ ରୋକିବା ପାଇଁ ତିଆରି ହୋଇଥିଲା। ୧୯୫୫ରେ ଗଠିତ ଏକ ଡାଇଭିଂ ୟୁନିଟରୁ ତିନିଜଣ ସ୍ୱେଚ୍ଛାସେବୀ ଅଧିକାରୀଙ୍କୁ ମନୋନୀତ କରାଯାଇଥିଲା ଏବଂ କରୋନାଡୋରେ ଯୁକ୍ତରାଷ୍ଟ୍ରର ନୈାସେନା ସିଲ୍ ସହିତ ତାଲିମ ଦିଆଯାଇଥିଲା | ଭାରତୀୟ ସାମୁଦ୍ରିକ ସ୍ପେଶାଲ ଫୋର୍ସ (IMSF) ଆନୁଷ୍ଠାନିକ ଭାବରେ ଫେବୃଆରୀ ୧୯୮୭ ରେ ସୃଷ୍ଟି ହୋଇଥିଲା ଏବଂ ତିନିଜଣ ଅଧିକାରୀ ଏହାର ପ୍ରଥମ ସଦସ୍ୟ ଥିଲେ। ୧୯୯୧ରେ, IMSF ର ନାମ ‘ମେରାଇନ୍ କମାଣ୍ଡୋ ଫୋର୍ସ’ (MCF) ରଖାଗଲା |
କେମିତି ହୁଏ ଚୟନ?
୨୦ ବର୍ଷ ବୟସ ଯୁବକଙ୍କୁ ଏଥିପାଇଁ ଚୟନ କରାଯାଏ । ସେମାନଙ୍କୁ ଅତି କଷ୍ଟ ଚୟନ ପ୍ରକ୍ରିୟା ଏବଂ ତାଲିମ ଦେଇ ଗତି କରିବାକୁ ପଡେ | ଆମେରିକୀୟ ଏବଂ ବ୍ରିଟିଶର ସ୍ୱତନ୍ତ୍ର ବାହିନୀ ମାର୍କୋସଙ୍କ ତାଲିମ ଦେବାରେ ବହୁ ସାହାଯ୍ୟ କରିଥିଲେ । ଏଥିରେ ୮ ମାସର ପାଠ୍ୟକ୍ରମ ବି ରହିଛି । ଏହି ତାଲିମ ବ୍ୟବସ୍ଥାରେ ବାୟୁସେନା ଅପରେସନ୍, ଯୁଦ୍ଧ ଡାଇଭିଂ, ଆତଙ୍କବାଦ, ଅପହରଣ, ଡକାୟତି ବିରୋଧୀ ଅପରେସନ୍, ଯୁଦ୍ଧ ଇତ୍ୟାଦି ଅନ୍ତର୍ଭୁକ୍ତ। ଏହାର ଅଧିକାଂଶ ପ୍ରଶିକ୍ଷଣ INS ଅଭିମନ୍ୟୁରେ କରାଯାଏ ।
କେଉଁ ଯାଗାରେ ହୁଏ ମାର୍କୋର୍ସଙ୍କ ଟ୍ରେନିଂ?
ମାର୍କୋସ୍ ଭାରତୀୟ ସେନା ସ୍ପେଶାଲ୍ ଫୋର୍ସ ଅଧିକାରୀଙ୍କ ସହ ଭାରତୀୟ ସ୍ପେଶାଲ୍ ଫୋର୍ସ ଟ୍ରେନିଂ ସ୍କୁଲ୍, ଏବଂ ଅନ୍ୟାନ୍ୟ ସେନା ବିଦ୍ୟାଳୟରେ ଅଭ୍ୟାସଗତ ଯୁଦ୍ଧରେ ଟ୍ରେନିଂ ନିଅନ୍ତି | କର୍ଣ୍ଣାଟକର ବେଲଗାମରେ ଜୁନିୟର ଲିଡର୍ସ କମାଣ୍ଡୋ ଟ୍ରେନିଂ କ୍ୟାମ୍ପ, ଅରୁଣାଚଳ ପ୍ରଦେଶର ତାୱାଙ୍ଗରେ ପାର୍ବତ ଘାଟକ୍ ବିଦ୍ୟାଳୟ, ରାଜସ୍ଥାନ , କାଶ୍ମୀରରେ ମଧ୍ୟ ଟ୍ରେନିଂ ନିଅନ୍ତି ।
ଏହି କମାଣ୍ଡୋ ମାନଙ୍କର ଶାରିରୀକ ଫିଟନେସ ପରୀକ୍ଷା କରାଯାଏ । ହେଲ୍ସ ଓ୍ବିକ୍ ବୋଲି ଏକ ପ୍ରକ୍ରିୟା ରହିଛି ଯେଉଁ ପରୀକ୍ଷା ଦେଇ କମାଣ୍ଡୋ ମାନେ ଯିବାକୁ ବାଧ୍ୟ । ଶହେ ପ୍ରତିଶତ ମଧ୍ୟରୁ ୮୦ ରୁ ୮୫ ଭାଗ କମାଣ୍ଡୋ ଫେଲ୍ ହୁଅନ୍ତି ବାକି ପାସ ହୋଇଥିବା କମାଣ୍ଡୋ ହିଁ ଅପରେସନରେ ଭାଗ ନିଅନ୍ତି ।
ସଲମାନ ଖାନଙ୍କ ଫାର୍ମ ହାଉସରେ ପ୍ରବେଶ ଉଦ୍ୟମ କରି ଦୁଇ ବ୍ୟକ୍ତି ଗିରଫ
ମୁମ୍ବାଇ: ଅଭିନେତା ସଲମାନ ଖାନଙ୍କ ଫାର୍ମ ହାଉସରେ ପ୍ରବେଶ ଉଦ୍ୟମ କରି ଦୁଇ ବ୍ୟକ୍ତି ଗିରଫ । ମୁମ୍ବାଇ ଅନ୍ତର୍ଗତ ପନବେଲସ୍ଥିତ ଫାର୍ମ ହାଉସରେ ଗତ ୪ ତାରିଖରେ ୨ ଜଣ ବ୍ୟକ୍ତି ପ୍ରବେଶ ଉଦ୍ୟମ କରିଥିଲେ । ଗିରଫ ୨ ଅଭିଯୁକ୍ତ ହେଲେ ଅଜେଶ କୁମାର ଓମପ୍ରକାଶ ଗିଲ୍ ଓ ଗୁରୁସେବକ ସିଂ ତେଜସିଂ ଶିଖ୍ । ସୁପରଷ୍ଟାରଙ୍କୁ ଦେଖିବା ଲାଗି ସେମାନେ ଅର୍ପିତା ଫାର୍ମହାଉସରେ ପ୍ରବେଶ ଉଦ୍ୟମ କରିବା ସହ ସିକ୍ୟୁରିଟି ଗାର୍ଡଙ୍କୁ ଭୁଲ ସୂଚନା ଦେଇଥିଲେ । ସେମାନେ ସଲମାନଙ୍କ ଫ୍ୟାନ ହୋଇଥିବାରୁ ତାଙ୍କୁ ଭେଟିବାର ସୁଯୋଗ ଦେବା ଲାଗି ସେମାନେ ସିକ୍ୟୁରିଟି ଗାର୍ଡଙ୍କୁ ଅନୁରୋଧ କରିଥିଲେ । ଅଭିଯୁକ୍ତ ୨ ଜଣ ପାଚେରୀ ଡେଇଁବା ସହ ତାର କାଟି ଭିତରକୁ ପ୍ରବେଶ ଉଦ୍ୟମ କରିଥିଲେ । ସେମାନଙ୍କ ନିକଟରୁ ପୋଲିସ ଆଧାର କାର୍ଡ ଜବତ କରିଛି । ଲରେନ୍ସ ବିଷ୍ଣୋଇ ଗ୍ୟାଙ୍ଗଠାରୁ ଧମକ ପରେ ଗତବର୍ଷଠାରୁ ସଲମାନଙ୍କୁ ଦିଆଯାଇଛି ଓ୍ବାଇ ପ୍ଲସ ସିକ୍ୟୁରିଟି ।
ଗୁଣି ଗାରେଡି ସନ୍ଦେହରେ ଆକ୍ରମଣ
ଭୁବନେଶ୍ବର: ରାଜଧାନୀ ଭୁବନେଶ୍ବର ସହିଦ ନଗର ତାରିଣୀ ବସ୍ତିରେ ଗୁଣି ଗାରେଡି ସନ୍ଦେହରେ ପରିବାରକୁ ଆକ୍ରମଣ । ୩୦ ରୁ ୪୦ ଜଣ ଲୋକ ସଂଘବଦ୍ଧ ଭାବେ ପୁରା ପରିବାରକୁ ଆକ୍ରମଣ କରିଥିବା ନେଇ ଅଭିଯୋଗ ହୋଇଛି। ମାଡ଼ମାରି ମୁହଁ ଫଟାଇବା ସହ ପରିବାରର ଝିଅକୁ ଦୁର୍ବ୍ୟବହାର ନେଇ ଶହୀଦନଗର ଥାନାରେ ଏତଲା ହୋଇଛି । ସହିଦ ନଗର ଥାନାରେ ଏତଲା ଦେଇଛନ୍ତି ଆକ୍ରମଣର ଶିକାର ପରିବାର ଲୋକେ । ତେବେ ଘଟଣାପଛରେ ଆଉ କିଛି କାରଣ ରହିଥିବା ପୋଲିସର ସନ୍ଦେହ କରୁଛି। ପୂର୍ବ ଶତ୍ରୁତାରୁ ଆକ୍ରମଣ ହୋଇଥିବା ପୋଲିସର ସୂଚନା ଦେଇଛି। ଏତଲା ପରେ ଉଭୟ ପକ୍ଷକୁ ଥାନାରେ ଡକାଇ ପଚରାଉଚରା କରୁଛି ପୋଲିସ।
ବିଲକିସ ବାନୋଙ୍କୁ ନ୍ୟାୟ ଦେବାରେ ସାହାଯ୍ୟ କରିଥିବା ଆଇନଜୀବୀ ବୃନ୍ଦା କିଏ?
ନୂଆଦିଲ୍ଲୀ: ବିଲକିସ୍ ବାନୋ ଗଣଦୁଷ୍କର୍ମ ମାମଲାରେ ସୁପ୍ରିମକୋର୍ଟ ଏକ ବଡ଼ ରାୟ ଦେଇଛନ୍ତି। ଏହି ଘଟଣାରେ ସପୃକ୍ତ ଥିବା ସମସ୍ତ ୧୧ ଦୋଷୀଙ୍କୁ କ୍ଷମା କରିଥିବା ଗୁଜରାଟ ସରକାରଙ୍କ ନିଷ୍ପତ୍ତିକୁ ସୁପ୍ରିମକୋର୍ଟ ରଦ୍ଦ କରିଛନ୍ତି। ସମସ୍ତ ଦୋଷୀଙ୍କୁ ଦୁଇ ସପ୍ତାହ ମଧ୍ୟରେ ଜେଲ କର୍ତ୍ତୃପକ୍ଷଙ୍କୁ ରିପୋର୍ଟ କରିବାକୁ ସୁପ୍ରିମକୋର୍ଟ ନିର୍ଦ୍ଦେଶ ଦେଇଛନ୍ତି।
ବିଲକିସ୍ ବାନୋ ମାମଲାରେ ଆବେଦନକାରୀଙ୍କ ପକ୍ଷରୁ ଯୁକ୍ତି ଦର୍ଶାଇଥିବା ବରିଷ୍ଠ ଓକିଲ ବୃନ୍ଦା ଗ୍ରୋଭର ଏହି ନିଷ୍ପତ୍ତିକୁ ସ୍ୱାଗତ କରିଛନ୍ତି। ସେ କହିଛନ୍ତି ଗୁଜୁରାଟ ସରକାରଙ୍କ ନିଷ୍ପତ୍ତି ବେଆଇନ, ଯାହାକୁ ସୁପ୍ରିମକୋର୍ଟ ରଦ୍ଦ କରିଛନ୍ତି। ଆରମ୍ଭରୁ ଏହି ପ୍ରସଙ୍ଗରେ ବୃନ୍ଦା ଗ୍ରୋଭର ସ୍ୱର ଉତ୍ତୋଳନ କରିଥିଲେ। ତେବେ ବୃନ୍ଦା ଗ୍ରୋଭର କିଏ? ଯିଏ ବିଲକିସଙ୍କୁ ପାଇଁ ନ୍ୟାୟ ଦେଇଛନ୍ତି । ଜାଣନ୍ତୁ ତାଙ୍କ ବିଷୟରେ ।
ବୃନ୍ଦା ଗ୍ରୋଭର ଜଣେ ମାନବାଧିକାର ଆଇନଜୀବୀ। ସେ ଦିଲ୍ଲୀ ବିଶ୍ୱବିଦ୍ୟାଳୟରୁ ଆଇନ ଡିଗ୍ରୀ ଲାଭ କରିଛନ୍ତି। ଏହା ବ୍ୟତୀତ ସେ ନ୍ୟୁୟର୍କ ବିଶ୍ୱବିଦ୍ୟାଳୟରୁ ଆଇନରେ ସ୍ନାତକୋତ୍ତର କରିଛନ୍ତି। ବହୁ ମାନବାଧିକାର ସମ୍ବନ୍ଧୀୟ ଆନ୍ଦୋଳନରେ ବୃନ୍ଦା ସକ୍ରିୟ ମଧ୍ୟ ଅଛନ୍ତି। ମହିଳା ଏବଂ ଶିଶୁମାନଙ୍କ ପ୍ରତି ଘରୋଇ ହିଂସା ଏବଂ ଯୌନ ହିଂସା ଇତ୍ୟାଦିରୁ ରକ୍ଷା କରିବା ପାଇଁ ପ୍ରଣୟନ ହୋଇଥିବା ଆଇନର ଚିଠା ତିଆରି କରିବାରେ ସେ ସହଯୋଗ କରିଛନ୍ତି। ଅତ୍ୟାଚାର, ସାମ୍ପ୍ରଦାୟିକ ତଥା ଟାର୍ଗେଟ ହିଂସା ବିରୋଧରେ ଆଇନ ପ୍ରଣୟନ ସପକ୍ଷରେ ସେ ଓକିଲାତି କରିଥାନ୍ତି । ଏସବୁ ପ୍ରସଙ୍ଗରେ ଆଇନ ଆଣିବାକୁ ନେଇ ସେ ମୁଖର ।
ବୃନ୍ଦା ଦେଶର ଜଣେ ବରିଷ୍ଠ ଓକିଲ ଭାବରେ ଜଣାଶୁଣା। ସେ ୧୯୮୯ ମସିହାରୁ ସୁପ୍ରିମକୋର୍ଟ, ହାଇକୋର୍ଟ ଏବଂ ଅନ୍ୟାନ୍ୟ ଟ୍ରାଏଲ କୋର୍ଟରେ ଓକିଲାତି କରୁଛନ୍ତି । ସେ ଅପରାଧିକ ଆଇନ, ମହିଳାଙ୍କ ଅଧିକାର ଏବଂ ମାନବିକ ଅଧିକାର ସହ ଜଡିତ। ୨୦୧୩ରେ ଟାଇମ୍ ମାଗାଜିନ୍ ତାଙ୍କୁ ଦୁନିଆର ଶହେ ପ୍ରଭାବଶାଳୀ ବ୍ୟକ୍ତିଙ୍କ ତାଲିକାରେ ଅନ୍ତର୍ଭୁକ୍ତ କରିଥିଲା |
ବିଲକିସ୍ ବାନୋ ମାମଲାରେ ଦୋଷୀଙ୍କ ଦଣ୍ଡ କମାଇବା ପାଇଁ ଯେଉଁ ଆବେଦନ ହୋଇଥିଲା ତା ବିରୋଧରେ ସେ ଯୁକ୍ତି ଉପସ୍ଥାପନ କରିଥିଲେ । ସମସ୍ତ ୧୧ ଦୋଷୀଙ୍କୁ ଦୁଇ ସପ୍ତାହ ମଧ୍ୟରେ ଜେଲ କର୍ତ୍ତୃପକ୍ଷଙ୍କୁ ରିପୋର୍ଟ କରିବାକୁ ସୁପ୍ରିମକୋର୍ଟ ନିର୍ଦ୍ଦେଶ ଦେଇଛନ୍ତି।
ସୁପ୍ରିମକୋର୍ଟଙ୍କ ନିଷ୍ପତ୍ତି ସମ୍ପର୍କରେ ଆଇନଜୀବୀ ବୃନ୍ଦା କହିଛନ୍ତି ଯେ,ମାମଲାର ନିରପେକ୍ଷ ବିଚାର ପାଇଁ ଗୁଜୁରାଟ ସରକାର ଏହି କେସକୁ ମହାରାଷ୍ଟ୍ରକୁ ପଠାଇଥିଲେ ଯାହା ଦ୍ବାରା ଠିକ୍ ନ୍ୟାୟ ହୋଇପାରିବ । କିନ୍ତୁ ଗୁଜୁରାଟ ସରକାର ବିନା କୌଣସି ଅଧିକାରରେ ଅପରାଧୀଙ୍କୁ କ୍ଷମାଦାନ କରିଥିଲେ । ସରକାରଙ୍କ କ୍ଷମାଦାନ ନିଷ୍ପତ୍ତି ଆଇନ ବିରୁ୍ଦ୍ଧରେ ଥିଲା। ଅପରାଧୀମାନେ ପୂର୍ବରୁ ବହୁତ ଆଶ୍ୱସ୍ତି ପାଇଛନ୍ତି ,ଏବେ ସେମାନଙ୍କୁ ଦୁଇ ସପ୍ତାହ ମଧ୍ୟରେ ଜେଲରେ ରିପୋର୍ଟ କରିବାକୁ ପଡିବ।
ବାଲି ଚୋରା ଚାଲାଣ ଉପରେ ଲାଗିବ ଅଙ୍କୁଶ, ଖଣି ବିଭାଗ ପକ୍ଷରୁ ବିସ୍ତୃତ ମାର୍ଗଦର୍ଶିକା ଜାରି
ଭୁବନେଶ୍ୱର : ବାଲି ଚୋରା ଚାଲାଣ ଉପରେ ଅଙ୍କୁଶ ଲଗାଇବାକୁ ଅଣ୍ଟା ଭିଡ଼ିଲା ରାଜ୍ୟ ଖଣି ବିଭାଗ। ଏଥିପାଇଁ ଓରସାକ୍ ଦେବ ବୈଷୟିକ ସହାୟତା। ସବୁ ଖଣିର ହେବ ଡିଜିପିଏସ୍ ସର୍ଭେ। ବାଲି ଚୋରା ଚାଲାଣ ଯୋଗୁଁ ବିପୁଳ ରାଜସ୍ୱ ହାନି ହେଉଛି। ଏହା ରୋକିବା ପାଇଁ ରାଜ୍ୟ ଖଣି ବିଭାଗ ପକ୍ଷରୁ ବିସ୍ତୃତ ମାର୍ଗଦର୍ଶିକା ଜାରି କରାଯାଇଛି। ଜିଲ୍ଲାପାଳଙ୍କ ଅଧ୍ୟକ୍ଷତାରେ ପ୍ରତ୍ୟେକ ଜିଲ୍ଲାରେ ଜିଲ୍ଲାସ୍ତରୀୟ ଟାସ୍କଫୋର୍ସ ଗଠନ ହେବ। ଜିଲ୍ଲା ସ୍ତରରେ ବାଲିର ଆବଶ୍ୟକତା ଓ ଉପଲବ୍ଧତା ସମ୍ପର୍କରେ ରିପୋର୍ଟ ପ୍ରସ୍ତୁତ କରିବା ଦାୟିତ୍ୱ ଜିଲ୍ଲାପାଳଙ୍କ ଅଧ୍ୟକ୍ଷତାରେ ଗଠିତ କମିଟି ଉପରେ ରହିବ।
ଖଣି ଅଧିକାରୀଙ୍କ ନେତୃତ୍ୱରେ ଜଳସମ୍ପଦ, ପ୍ରଦୂଷଣ ନିୟନ୍ତ୍ରଣ ବୋର୍ଡ, ବନ ବିଭାଗ, ଇସ୍ପାତ ଓ ଖଣି ବିଭାଗ, ଡିସେମ୍ବର-ଜାନୁଆରୀ ମଧ୍ୟରେ ଜିଲ୍ଲାରେ ଥିବା ବାଲି ଉତ୍ସ ଚିହ୍ନଟ କରିବେ। ପ୍ରଥମେ ୫ ହେକ୍ଟରରୁ ଅଧିକ ଅଞ୍ଚଳରେ ଥିବା ନଦୀପଠାରୁ ବାଲି ଉତ୍ତୋଳନ ପାଇଁ ଅଗ୍ରାଧିକାର ଦିଆଯିବ। ଜନବସତି ଅଞ୍ଚଳରେ ବାଲି ଗାଡ଼ିର ପ୍ରବେଶକୁ ରୋକିବା ଲାଗି ରୁଟ୍ ଏବଂ ବାଲି ପରିବହନ କ୍ଷମତା ନିର୍ଦ୍ଧାରଣ କରାଯିବ। ବାଲି ଗାଡ଼ି ପାଇଁ ବାର୍ କୋଡ୍ ଥିବା ଇ-ପାସ୍ ଜାରି କରାଯିବ। ଏନଫୋର୍ସମେଣ୍ଟ ସ୍କ୍ୱାଡ୍ ମୋବାଇଲ୍ ଆପ୍ ମାଧ୍ୟମରେ ପାସ୍ ବୈଧତା ଯାଞ୍ଚ କରିବେ। ରାଜ୍ୟରେ ବାଲି ଉଠାଣ ଉପରେ ନଜର ରଖିବା ପାଇଁ ଖଣି ନିର୍ଦ୍ଦେଶାଳୟରେ ଏକ ପ୍ରୋଜେକ୍ଟ ମନିଟରିଂ ୟୁନିଟ୍ ସ୍ଥାପନ କରାଯିବ। ପ୍ରତି ମାସରେ ଖଣି ବିଭାଗକୁ ଜିଲ୍ଲାସ୍ତରୀୟ ରିପୋର୍ଟ ପ୍ରଦାନ କରାଯିବ ବୋଲି ବିଭାଗ ମାର୍ଗଦର୍ଶିକା ଜାରି କରିଛି ।
ତାମିଲନାଡୁରେ ପୁଣି ବର୍ଷା ତାଣ୍ଡବ, ସମସ୍ତ ସ୍କୁଲ ଓ କଲେଜ ଛୁଟି ଘୋଷଣା
ଚେନ୍ନାଇ : ତାମିଲନାଡୁରେ ପୁଣି ବର୍ଷାର ତାଣ୍ଡବ। ଲଗାଣ ବର୍ଷାରେ ବେହାଲ ତାମିଲନାଡୁ। ଗତକାଲି ଭୀଷଣ ବର୍ଷାରେ ଜଳମଗ୍ନ ହୋଇ ପଡିଛି ତାମିଲନାଡୁର ଏକାଧିକ ଜିଲ୍ଲା। ମୁଖ୍ୟତଃ ରାଜଧାନୀ ଚେନ୍ନାଇରେ ପ୍ରବଳ ବର୍ଷା ରେକର୍ଡ ହୋଇଛି। ପ୍ରବଳ ବର୍ଷାରୁ ରାସ୍ତାଘାଟ ଗହଳି ରହିବା ସାଙ୍ଗକୁ ଲୋକମାନେ ନାନା ଅସୁବିଧାର ସମ୍ମୁଖୀନ ହୋଇଛନ୍ତି।
ରାଜ୍ୟର ଅନେକ ଜିଲ୍ଲାରେ ସ୍ଥାନୀୟ ପ୍ରଶାସନ ପକ୍ଷରୁ ସ୍କୁଲ ଓ କଲେଜ ଛୁଟି ଘୋଷଣା କରାଯାଇଛି । ନାଗାପାଟ୍ଟିନମ୍, କିଲଭେଲୁର ତାଲୁକ, ଭିଲୁପୁରମ ଏବଂ କୁଡାଲୋର ଜିଲ୍ଲାରେ ପ୍ରବଳ ବର୍ଷା ରେକର୍ଡ ହୋଇଛି। କେନ୍ଦ୍ରଶାସିତ ଅଞ୍ଚଳ ପୁଡୁଚେରୀରେ ମଧ୍ୟ ପ୍ରବଳ ବର୍ଷା ରେକର୍ଡ ହୋଇଛି। ଏହି ସବୁ ଅଞ୍ଚଳରେ ସମସ୍ତ ସ୍କୁଲ ଓ କଲେଜ ଛୁଟି ଘୋଷଣା କରାଯାଇଛି । କାଲାକୁରୁଚି, ରାନିପେଟ, ଭେଲୋର ଏବଂ ତିରୁନାମଲାଇରେ ମଧ୍ୟ ପ୍ରବଳ ଭର୍ଷା ରେକର୍ଡ ହୋଇଛି । ଆସନ୍ତା ସାତ ଦିନ ପର୍ଯ୍ୟନ୍ତ ତାମିଲନାଡୁର ବିଭିନ୍ନ ସ୍ଥାନରେ ପ୍ରବଳରୁ ଅତି ପ୍ରବଳ ବର୍ଷା ନେଇ ପୂର୍ବାନୁମାନ କରିଛି ଆଇଏମଡି।
ମୃତ ଡ୍ରାଇଭରଙ୍କ ପରିବାରକୁ ମିଳିଲା ଅନୁକମ୍ପା ରାଶି
ଭୁବନେଶ୍ୱର : ତିନି ସ୍ବାଭାବିକ ଭାବେ ମୃତ ଡ୍ରାଇଭରଙ୍କ ପରିବାରକୁ ମିଳିଲା ଅନୁକମ୍ପା ରାଶି । ଏକ ସ୍ବତନ୍ତ୍ର କାର୍ଯ୍ୟକ୍ରମରେ ପରିବହନ ମନ୍ତ୍ରୀ ଟୁକୁନି ସାହୁ ତିନି ପରିବାରକୁ ୨ଲକ୍ଷ ଲେଖାଏଁ ଟଙ୍କାର ଚେକ୍ ପ୍ରଦାନ କରିଛନ୍ତି। ଓଡ଼ିଶା ମୋଟର ପରିବହନ ଚାଳକ କର୍ମଚାରୀ କଲ୍ୟାଣ ବୋର୍ଡ ପକ୍ଷରୁ ଏହି ଅନୁକମ୍ପା ରାଶି ପ୍ରଦାନ କରାଯାଇଛି। ୩ ମୃତ ଡ୍ରାଇଭରମାନେ ହେଲେ ନେତ୍ରାନନ୍ଦ ମହାରଣା, କୁଶ କୁମାର ସାହୁ ଓ ପଙ୍କଜ କୁମାର ପାତ୍ର। ଏମାନଙ୍କର ସ୍ବାଭାବିକ ମୃତ୍ୟୁ ହୋଇଥିବାବେଳେ ସରକାରୀ ଘୋଷଣା ଅନୁଯାୟୀ ଦୁଇ ଲକ୍ଷ ଲେଖାଏଁ ଟଙ୍କାର ଚେକ ପ୍ରଦାନ କରାଯାଇଛି।
ସୂଚନାଯୋଗ୍ୟ ଯେ, ସ୍ବାଭାବିକ ମୃତ୍ୟୁରେ ଡ୍ରାଇଭରଙ୍କ ପରିବାରକୁ ଦୁଇ ଲକ୍ଷ ଟଙ୍କାର ଅନୁକମ୍ପା ରାଶି ଦିଆଯିବା ନେଇ ନିୟମ କରିଛନ୍ତି ରାଜ୍ୟ ସରକାର। ସେହିପରି ଦୁର୍ଘଟଣାରେ ମୃତ ଡ୍ରାଇଭରଙ୍କ ପରିବାରକୁ ୪ଲକ୍ଷ ଟଙ୍କା ଦେବାକୁ ନିୟମ ରହିଛି। ଗତ ଶନିବାର ପରିବହନ କମିଶନରଙ୍କ ସହ ଆଲୋଚନାବେଳେ ସରକାର ପକ୍ଷରୁ ଏନେଇ ପ୍ରତିଶ୍ରୁତି ଦିଆଯାଇଥିଲା। ଡ୍ରାଇଭର ମହାସଂଘ ହିଟ୍ ଆଣ୍ଡ ରନ ଆଇନକୁ ବିରୋଧ କରି ଆନ୍ଦୋଳନ କରିବା ପରେ ସରକାର ଆଲୋଚନା କରିଥିଲେ । ଆଲୋଚନା ପରେ ଆନ୍ଦୋଳନ ସ୍ଥଗିତ ରଖିବାକୁ ନିଷ୍ପତ୍ତି ନେଇଥିଲା ମହାସଂଘ।