ରାଜଗାଙ୍ଗପୁର: ବିଜେପିରୁ ଇସ୍ତଫା ଦେଲେ ପୂର୍ବତନ ସୁନ୍ଦରଗଡ଼ ଜିଲ୍ଲା ସଭାପତି ଉପେନ୍ଦ୍ର ପ୍ରଧାନ । ବିଜେପିର ସକ୍ରିୟ ସଦସ୍ୟ ଭାବେ ଦୀର୍ଘ ୨୯ବର୍ଷ ଧରି କାମ କରୁଥିଲେ ଉପେନ୍ଦ୍ର । ସୁନ୍ଦରଗଡ ଜିଲ୍ଲା ସାଂଗଠନିକ ସଭାପତି ସହ ଆଦିବାସୀ ମୋର୍ଚ୍ଚାର ରାଜ୍ଯ ସଭାପତି ଭାବେ ସେ ଦାୟିତ୍ବ ତୁଲାଇଥିଲେ।
ରାଜଗାଙ୍ଗପୁର ବିଧାନସଭା ଆସନରୁ ଦୁଇଥର ବିଜେପି ବିଧାୟକ ପ୍ରାର୍ଥୀ ଥିଲେ । ମାତ୍ର ଦଳ ଉଚିତ ସମ୍ମାନ ନଦେବାରୁ ଅସନ୍ତୋଷ ଜାହିର କରି ରାଜ୍ୟ ସଭାପତିଙ୍କୁ ଇସ୍ତଫା ପତ୍ର ପ୍ରଦାନ କରିଛନ୍ତି ଉପେନ୍ଦ୍ର।
ବାଲେଶ୍ବର: ବାଜିଲାଣି ନିର୍ବାଚନ ବିଗୁଲ । ଅବାଧ ଓ ଶାନ୍ତିପୂର୍ଣ୍ଣ ନିର୍ବାଚନ ପାଇଁ ପ୍ରଶାସନିକ ସ୍ତରରେ କରାଯାଇଛି ଜୋରଦାର ପ୍ରସ୍ତୁତି । ରାଜନୈତିକ ଦଳଗୁଡ଼ିକ ମଧ୍ଯ ନିଜ ନିଜର ଗୋଟି ଚାଳନା ଆରମ୍ଭ କରିଦେଇଛନ୍ତି । ଭୋଟର କାହାକୁ ଦେବ ଭୋଟ ? କାହା ମୁଣ୍ଡରେ ଢଳାହେବ ସୁନାକଳସ ? ତାକୁ ନେଇ ଆରମ୍ଭ ହୋଇଯାଇଛି କଳ୍ପନାଜଳ୍ପନା । ବାଲେଶ୍ବର ନିର୍ବାଚନ କ୍ଷେତ୍ରରେ କିଏ ମାରିବ ବାଜି ? କ’ଣ ରହିଛି ସ୍ଥିତି, ତାକୁ ନେଇ ଏବେ ସବୁଠି ଚର୍ଚ୍ଚା ।
ଚାହା ଖଟି ଠାରୁ କଚେରୀ, ସବୁଠି ନିର୍ବାଚନୀ ଚର୍ଚ୍ଚା । ଏଥର ନିର୍ବାଚନ ଉପରେ ରହିଛି ସମସ୍ତଙ୍କ ଆଖି । ଭୌଗଳିକ ଦୃଷ୍ଟିରୁ ବାଲେଶ୍ବର ଜିଲ୍ଲାର ମଝିରେ ରହିଛି ସଦର ନିର୍ବାଚନ ମଣ୍ଡଳୀ । ଏଥିରେ ବାଲେଶ୍ବର ମ୍ୟୁନିସିପାଲିଟିର ୩୧ ଟି ଓ୍ବାର୍ଡ଼ ସହିତ ୨୬ଟି ପଞ୍ଚାୟତର ୩୫୧ ଓ୍ବାର୍ଡ଼ ରହିଛି । ମୋଟ ୧ ଲକ୍ଷ ୩୩ ହଜାର ୩୪୧ ଜଣ ଭୋଟର । ୨୬ଟି ପଞ୍ଚାୟତରେ ମହିଳା ଭୋଟରଙ୍କ ସଂଖ୍ୟା ୬୪ ହଜାର ୪୬ ଥିବାବେଳେ, ପୁରୁଷ ଭୋଟରଙ୍କ ସଂଖ୍ୟା ୬୯ ହଜାର ୨୮୭ ଓ ତୃତୀୟ ଲିଙ୍ଗ ଭୋଟର ଅଛନ୍ତି ୮ । ସେହିପରି ମ୍ୟୁନିସିପାଲିଟିର ୯୧ ହଜାର ୮୨୭ ଭୋଟର ଏଥର ଭୋଟ ଦେବେ । ୩୧ଟି ଓ୍ବାର୍ଡ଼ରେ ମହିଳା ଭୋଟରଙ୍କ ସଂଖ୍ୟା ୪୬ ହଜାର ୯୨୪, ପୁରୁଷ ଭୋଟରଙ୍କ ସଂଖ୍ୟା ୪୪ ହଜାର ୮୯୯ ଓ ତୃତୀୟ ଲିଙ୍ଗ ଭୋଟରଙ୍କ ସଂଖ୍ୟା ଅଛି ୪ । ୨୦୦୦ରୁ ୨୦୨୦ ଉପ-ନିର୍ବାଚନ ପର୍ଯ୍ୟନ୍ତ ଫଳାଫଳକୁ ଦେଖିଲେ ଏହି ନିର୍ବାଚନ ମଣ୍ଡଳୀରେ ରହିଛି ବିଜେଡ଼ିର ଦବଦବା । ଲୋକଙ୍କ କହିବା କଥା ବିକାଶ ଯେଉଁଠି, ସମର୍ଥନ ସେଇଠି ।
ସ୍ଥାନୀୟ ଅଞ୍ଚଳର ବିକାଶର ପ୍ରସଙ୍ଗ ବିଗତ ନିର୍ବାଚନଗୁଡ଼ିକର ଫଳାଫଳକୁ ପ୍ରଭାବିତ କରିବାରେ ସଫଳ ହୋଇଛି । ତେଣୁ ଆସନ୍ତା ନିର୍ବାଚନରେ ମଧ୍ୟ ଏହି ଅଞ୍ଚଳର ପ୍ରମୁଖ ପ୍ରସଙ୍ଗଗୁଡ଼ିକ ମୁଦ୍ଦା ଭାବେ ନେତାଙ୍କ ସାମ୍ନାକୁ ଆସିବ । କଂଗ୍ରେସ ଓ ବିଜେପି ଏଠାରେ ନିଜର ସ୍ଥିତି ଜାହିର କରିବାକୁ ଆରମ୍ଭ କରିଦେଇଥିବାବେଳେ ବିକାଶର ବାର୍ତ୍ତା ଦେଇ ଲୋକଙ୍କ ନିକଟରୁ ଯିବ ବିଜେଡ଼ି ।
୨୦୦୦ ରେ ଏହି ବିଧାନସଭା ଆସନରୁ ବିଜେପି ଦଳର ଜୀବନ ପ୍ରଦୀପ ଦାସ ବିଧାୟକ ଭାବେ ନିର୍ବାଚିତ ହୋଇଥିଲେ । ୨୦୦୪ରେ ଏହି ଆସନ ବିଜେପି ହାତରୁ ଖସି ଓଡ଼ିଶା ଗଣ ପରିଷଦର ପ୍ରାର୍ଥୀ ଅରୁଣ ଦେଙ୍କ ହାତକୁ ଯାଇଥିଲା । ୨୦୦୯ରେ ବିଜେଡ଼ି ନିଜ ଅକ୍ତିଆରକୁ ଆଣିଥିଲା ଏହି ଆସନ । ୨୦୦୯ ଓ ୨୦୧୪ ନିର୍ବାଚନରେ ଲଗାତର ଭାବେ ବିଜେଡିର ଜୀବନ ପ୍ରଦୀପ ଦାସ ଯଥାକ୍ରମେ ୫୫ ହଜାର ୭୧୦ ଓ ୪୭ ହଜାର ୬୧୫ ଖଣ୍ଡ ଭୋଟ ପାଇ ନିର୍ବାଚିତ ହୋଇଥିଲେ । ୨୦୧୯ ନିର୍ବାଚନରେ ମଦନ ମୋହନ ଦତ୍ତ ୭୪ ହଜାର ୮୧୫ ଖଣ୍ଡ ଭୋଟ ହାସଲ କରି ପୁଣି ବିଜେପି ଖାତାରେ ଏହି ଆସନକୁ ଯୋଡ଼ି ଦେଇଥିଲେ । ତାଙ୍କର ଦେହାନ୍ତ ପରେ ୨୦୨୦ରେ ସଦର ଆସନରେ ଉପ-ନିର୍ବାଚନ ହୋଇଥିଲା । ଏହି ନିର୍ବାଚନରେ ଭୋଟରମାନେ ପୁଣି ବିଜେଡ଼ିର ସ୍ବରୂପ ଦାସଙ୍କୁ ୮୪ ହଜାର ୯୭ ଖଣ୍ଡ ଭୋଟଦେଇ ବିଜୟ ମୁକୁଟ ପିନ୍ଧାଇଥିଲେ ।
ଭୁବନେଶ୍ବର: ଗଣତନ୍ତ୍ରର ମହାପର୍ବରେ ଭାଗ ନେବେ ଯୁବ ଭୋଟର । ପ୍ରଥମ ଥର ପାଇଁ ରାଜ୍ଯରେ ଇଭିଏମରେ ଭୋଟ ଦେବେ ୭ ଲକ୍ଷରୁ ଊର୍ଦ୍ଧ୍ବ ଯୁବାବର୍ଗ । ୧୦ ବର୍ଷ ଭିତରେ ଭୋଟରଙ୍କ ଧ୍ରୁବୀକରଣ ହୋଇଥିଲା । କିନ୍ତୁ ଏଥର ସ୍ଥିତି ସମ୍ପୂର୍ଣ୍ଣ ଭିନ୍ନ । ଯେଉଁ ପ୍ରାର୍ଥୀ ଯୁବକଙ୍କ ରୋଜଗାର, ରାଜ୍ୟ ଓ ଦେଶର ବିକାଶକୁ ପାଥେୟ କରିବ ତାକୁ ହିଁ ନିର୍ବାଚନରେ ଜନପ୍ରତିନିଧି ଭାବେ ବାଛିବେ ବୋଲି ମତ ପ୍ରକାଶ ପାଇଛି ।
ରାଜ୍ୟର ୭ ଲକ୍ଷରୁ ଅଧିକ ଯୁବକ, ଯୁବତୀ । ପ୍ରଥମ ଥର ପାଇଁ ୨୦୨୪ ନିର୍ବାଚନରେ ଦେବେ ଭୋଟ । ଇଭିଏମ୍ ବଟନ୍ ଚିପି ସାଉଁଟିବେ ନୂଆ ଅନୁଭୂତି । ଗଣତନ୍ତ୍ର ମହାପର୍ବରେ ନିଜ ସ୍ବାଧୀନ ମତାଧିକାର ସାବ୍ୟସ୍ତ କରିବାର ପାଇବେ ଅପୂର୍ବ ସୁଯୋଗ । କାହା ଦ୍ବାରା ପ୍ରଭାବିତ ନ ହୋଇ ନିଜ ବିବେକ ଅନୁସାରେ ଚୟନ କରିବେ ଜନପ୍ରତିନିଧି । ବିଶେଷକରି ଯିଏ ଯୁବକଙ୍କ ପାଇଁ ରୋଜଗାର ସୃଷ୍ଟି କରିପାରିବ । ନିର୍ବାଚନ ଲଢୁଥିବା ପ୍ରାର୍ଥୀର ଅପରାଧୀକ ରେକର୍ଡ ନଥିବ, ସେପରି ପ୍ରାର୍ଥୀକୁ ଜନପ୍ରତିନିଧି ଭାବେ ନିର୍ବାଚିତ କରିବାକୁ ପସନ୍ଦ କରୁଛନ୍ତି ୟଙ୍ଗ୍ ଭୋଟର । ଭୋଟର ତାଲିକା ଅନୁଯାୟୀ ଯୁବ ଭୋଟରଙ୍କ ସଂଖ୍ୟା ୭ ଲକ୍ଷ ୫୪ ହଜାର ୯୪୬ । ସେମାନଙ୍କ ଭିତରୁ ୧୮ରୁ ୧୯ ବର୍ଷ ଭିତରେ ଯୁବ ଭୋଟରଙ୍କ ସଂଖ୍ୟା ୪ ଲକ୍ଷ ୭୬ ହଜାର ୯୬୯ ।
୧୦ ବର୍ଷ ଭିତରେ ଭୋଟର ଧ୍ରୁବୀକରଣ ହୋଇଛି । ଏଥରକ ଉଭୟ କେନ୍ଦ୍ର ଓ ରାଜ୍ୟ ସ୍ତରରେ ଯୁବ ଭୋଟର ବହୁତ ସଚେତନ ଅଛନ୍ତି । ଶିକ୍ଷା ବ୍ୟବସ୍ଥା ମହଙ୍ଗା ନ ହୋଇ ଶସ୍ତା ହେବା ସମସ୍ତ ଚାହାଁନ୍ତି । ଏହାସହିତ ଯେଉଁ ସରକାର ରୋଜଗାର ସୃଷ୍ଟି କରିପାରିବ ତାକୁ ହିଁ ଯୁବ ଭୋଟର ପ୍ରଥମ ପସନ୍ଦ ଭାବେ ବାଛିବେ । ପ୍ରଥମ ଥର ପାଇଁ ମତଦାନ କରିବାକୁ ଯାଉଥିବା ଭୋଟର ଆରାମ ଜୀବନଶୈଳୀକୁ ବି ଛାଡ଼ିବେ ନାହିଁ । ଏବର ଯୁବ ଭୋଟର ବହୁତ ସଚେତନ । କେହି ତାଙ୍କୁ ପ୍ରଭାବିତ କରି ଭୋଟ ନେଇଯିବେ ଏପରି ସମ୍ଭାବନା ନାହିଁ ।
ଭୁବନେଶ୍ବର: ସାଧାରଣ ନିର୍ବାଚନ ତାରିଖ ଘୋଷଣା ପରେ ରାଜନୈତିକ ମାହୋଲ ହୋଇଛି ଉଷ୍ମ । ହୋଲିରେ ରଙ୍ଗ ଖେଳ ଭିତରେ ଚବିଶ ବିଜୟ ତିଳକ ପିନ୍ଧିବା ପାଇଁ ପ୍ରସ୍ତୁତି ହେଲେଣି ବିଜେଡି, ବିଜେପି ଓ କଂଗ୍ରେସ । ୨୪ ବର୍ଷ ଶାସନ କାଳରେ ସବୁ କ୍ଷେତ୍ରରେ ଓଡ଼ିଶାର ଶୀର୍ଷରେ ରହିବା ସହ ଦେଶ ପାଇଁ ନବୀନ ଶାସନ ଏବେ ରୋଲ ମଡ଼େଲ ସାଜିଛି । ଯାହା ବିଜେଡିକୁ ନିର୍ବାଚନରେ ଏକପାଖିଆ ବିଜୟ ମୁକୁଟ ପିନ୍ଧାଇବ ବୋଲି ଶାସକ ଦଳ ଯୁକ୍ତି ବାଢ଼ିଛି । ଅନ୍ୟପଟେ ବିରୋଧୀ ଏଯାଏଁ ରଣନୀତି ପ୍ରସ୍ତୁତିରେ ଲାଗିଛନ୍ତି ।
ଫଗୁଣରେ ଉଷ୍ମ ହେବାରେ ଲାଗିଛି ଓଡିଶାର ରାଜନୀତି । ହୋଲି ରଙ୍ଗ ଖେଳ ଭିତରେ ଚବିଶ ବିଜୟ ପାଇଁ ସମରସଜ୍ଜା ଆରମ୍ଭ କରିଛନ୍ତି ରାଜ୍ୟର ତିନି ପ୍ରମୁଖ ରାଜନୈତିକ ଦଳ । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଲୋକପ୍ରିୟତା ଓ ରାଜ୍ୟ ସରକାରଙ୍କ ବିଭିନ୍ନ ଲୋକାଭିମୁଖୀ ଯୋଜନାକୁ ମୁଖ୍ୟ ପୁଞ୍ଜି କରି ବିଜେଡି ୨୦୨୪ ନିର୍ବାଚନରେ ବଡ ବିଜୟ ପାଇଁ ଲମ୍ବା ରଣନୀତି ପ୍ରସ୍ତୁତ କରିଛି । ୧୨୮ ବିଧାନସଭା ଓ ୧୮ ଲୋକସଭା ଦଳ ହାତେଇବା ପାଇଁ ଦମ୍ଭୋକ୍ତି ପ୍ରକାଶ କରିଛି । ଏନେଇ ସଂସଦୀୟ କ୍ଷେତ୍ରୱାରୀ ରଣନୀତି ପ୍ରସ୍ତୁତ କରିବା ସହ ବରିଷ୍ଠ ନେତାଙ୍କୁ ବିଜୟ ମନ୍ତ୍ର ଦେଉଛନ୍ତି ନବୀନ । ତେଣୁ ହୋଲିର ରଙ୍ଗରେ ରଙ୍ଗୀନ ହୋଇ ଓଡିଶାବାସୀ ବିଜେଡିକୁ ବିଜୟର ନାଲି ଟିକା ପିନ୍ଧାଇବାକୁ ପ୍ରସ୍ତୁତ ଥିବା କହିଛି ବିଜେଡି ।
୨୦୨୪ରେ ନବୀନଙ୍କୁ ଷଷ୍ଠଥର ମୁଖ୍ୟମନ୍ତ୍ରୀ କରିବାକୁ ବିଜେଡି ଫୋକସ କରିଛି । ନବୀନ ନିବାସରେ ଘନ ଘନ ବୈଠକ କରି ବିଜେଡିର ଶୀର୍ଷ ନେତୃତ୍ଵ, ନେତା ଓ କର୍ମୀଙ୍କ ମନରେ ଜୋସ ଭରୁଛନ୍ତି । ଅନ୍ୟପଟେ ଏଥର ହୋଲି କଂଗ୍ରେସ୍ ପାଇଁ ନୂଆ ରଙ୍ଗ ଆଣିବ ବୋଲି ବରିଷ୍ଠ କଂଗ୍ରେସ୍ ବିଧାୟକ ସୁରେଶ ରାଉତରାୟ କହିଛନ୍ତି l କିନ୍ତୁ ଏଥର ନିର୍ବାଚନୀ ସମୟରେ ହୋଲି ସବୁ ଦଳ ପାଇଁ ଅଧିକ ରଙ୍ଗୀନ ହେବ ବୋଲି ରାଜନୈତିକ ସମୀକ୍ଷକ ଆକଳନ କରିଛନ୍ତି ।
ନିର୍ବାଚନ ପାଇଁ ସବୁ ଦଳ ନିଜ ନିଜ ପ୍ରସ୍ତୁତିରେ ଲାଗିପଡିଛନ୍ତି । ପ୍ରାର୍ଥୀ ମାନେ ବି ଗାଁ ମୁହାଁ ହୋଇଛନ୍ତି । ତେବେ ହୋଲିର ରଙ୍ଗ କାହାକୁ ନିର୍ବାଚନରେ ରଙ୍ଗୀନ କରୁଛି ତାହା ଦେଖିବାର ଅଛି ।
ଭୁବନେଶ୍ବର: ବିଜେପିରେ ପ୍ରାର୍ଥିତ୍ବକୁ ନେଇ ବିଦ୍ରୋହ । ବାଲେଶ୍ବରରୁ ସୂତ୍ରପାତ, ନବରଙ୍ଗପୁରରେ ବିକ୍ଷୋଭ, ଭୁବନେଶ୍ବରରେ ଅଭିଯୋଗ । ପୂର୍ବତନ ସାଂସଦ ତଥା ବାଲେଶ୍ବର ସଂସଦୀୟ କ୍ଷେତ୍ରର ଟିକେଟ ଆଶାୟୀ ଖାରବେଳ ସ୍ବାଇଁ ଦଳ ବିରୋଧରେ ଖୋଲାଖୋଲି ଅସନ୍ତୋଷ ଜାହିର କରିଛନ୍ତି । ଏପରିକି ଦଳୀୟ ପ୍ରାର୍ଥୀଙ୍କ ବିରୋଧରେ ସ୍ବାଧୀନ ଭାବେ ମଇଦାନକୁ ଓହ୍ଲାଇବେ ବୋଲି ଘୋଷଣା କରିଛନ୍ତି । ଏପଟେ ନବରଙ୍ଗପୁର ଆସନରୁ ଟିକେଟ ନମିଳିବା ପରେ ଖଡଗହସ୍ତ ପର୍ଶୁରାମ ମାଝୀ । ଭୁବନେଶ୍ବରରେ ଅପରାଜିତାଙ୍କ ପ୍ରାର୍ଥିତ୍ବକୁ ଖୋଦ୍ ଭୋଟରମାନେ ବିରୋଧ କରିଛନ୍ତି । ତେବେ ଆଗକୁ ବିଜେପିରେ ବଡ଼ ବିସ୍ଫୋରଣ ହେବା ଆଶଙ୍କା କରାଯାଉଛି ।
ରାଜ୍ୟ ବିଜେପିର ଟିକେଟ୍ ଘୋଷଣା ପରେ ତେଜିଲା ବିଦ୍ରୋହ । ଉପକୂଳରୁ ଦକ୍ଷିଣ, ସାଂସଦ ପ୍ରାର୍ଥିତ୍ବକୁ ନେଇ ଟେନସନରେ ଦଳ । ବିଜେପି ଲୋକସଭା ପ୍ରାର୍ଥୀ ଘୋଷଣାକୁ ୨୪ ଘଣ୍ଟା ନପୁରୁଣୁ ଦଳରେ ଦେଖାଦେଲାଣି ତୀବ୍ର ଅସନ୍ତୋଷ । ଖୋଲାଖୋଲି ବିଦ୍ରୋହ କରିଛନ୍ତି ଦଳର ଦୁଇ ପୁରୁଖା ନେତା । ବାଲେଶ୍ବରର ପୂର୍ବତନ ସାଂସଦ ଖାରବେଳ ସ୍ବାଇଁ ଦଳୀୟ ପ୍ରାର୍ଥୀ ପ୍ରତାପ ଷଡ଼ଙ୍ଗୀ ଓ ଦଳୀୟ ନିଷ୍ପତ୍ତି ବିରୋଧରେ ଦେଇଛନ୍ତି ଯୁଦ୍ଧଂଦେହୀ ଡାକରା । ସ୍ବାଧୀନ ପ୍ରାର୍ଥୀ ଭାବେ ମଇଦାନକୁ ଓହ୍ଲାଇବାକୁ ସିଧାସଳଖ ଦେଇଛନ୍ତି ଚେତାବନୀ । ଏପଟେ ନବରଙ୍ଗପୁର ଆସନରେ ପ୍ରାର୍ଥୀକୁ ନେଇ ଅନ୍ତକନ୍ଦଳ ଚରମ ଶିଖରରେ । ବଳଭଦ୍ର ମାଝୀଙ୍କୁ ଟିକେଟ୍ ମିଳିବା ପରେ ଦୁଇ ଦୁଇ ଥର ସାଂସଦ ହୋଇଥିବା ପର୍ଶୁରାମ ମାଝୀ ଖଡ଼ଗହସ୍ତ । ତାଙ୍କ ସମର୍ଥକ ବି ଦଳୀୟ ନିଷ୍ପତ୍ତି ବିରୋଧରେ ବିଦ୍ରୋହ କରିଛନ୍ତି । ଏପରିକି ରାଜ୍ୟ ସଭାପତି ମନମୋହନ ସାମଲଙ୍କୁ ଦେଇଛନ୍ତି ଅଲଟିମେଟମ୍ । ନିଷ୍ପତ୍ତି ନବଦଳାଇଲେ ଦଳୀୟ କର୍ମୀ ଚୁପଚାପ ଘରେ ଶୋଇପଡ଼ିବେ ବୋଲି ସଫାସଫା ଶୁଣାଇ ଦେଇଛନ୍ତି ।
ଖାଲି ବାଲେଶ୍ବର କି ନବରଙ୍ଗପୁର ନୁହେଁ ହାଇପ୍ରୋଫାଇଲ ଆସନ ଭୁବନେଶ୍ବରରେ ବି ପ୍ରାର୍ଥିତ୍ବକୁ ନେଇ ଟେନସନରେ ବିଜେପି । ଅପରାଜିତା ଷଡଙ୍ଗୀ ପୁଣି ପ୍ରାର୍ଥୀ ହେବା ପରେ ଅସନ୍ତୋଷ ପ୍ରକାଶ କରିଛନ୍ତି ଖୋଦ୍ ଭୋଟର । ଲିଙ୍ଗରାଜ ମହାପ୍ରଭୁଙ୍କ ଦର୍ଶନ ପାଇଁ ସପରିବାର ପହଞ୍ଚିଥିବା କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ପାଖରେ ଅପରାଜିତାଙ୍କ ବିରୋଧରେ ଫେରାଦ ହୋଇଛନ୍ତି ମନ୍ଦିର ସେବାୟତ । ସେବାୟତଙ୍କ ଅଭିଯୋଗ, ଦିନେ ହେଲେ ଲିଙ୍ଗରାଜ ମନ୍ଦିର କି ସେବାୟତଙ୍କ ଉନ୍ନତି ପାଇଁ ଅପରାଜିତା ଉଦ୍ଯମ କରିନାହାନ୍ତି । ଏପରିକି ଲିଙ୍ଗରାଜ ମନ୍ଦିର ପାଇଁ ପ୍ରସ୍ତାବିତ ସ୍ବତନ୍ତ୍ର ଆଇନକୁ ବିରୋଧ କରିଛନ୍ତି । ଏଣୁ ତାଙ୍କୁ କାହିଁକି ପୁଣି ପ୍ରାର୍ଥୀ କରାଗଲା ବୋଲି ପ୍ରଶ୍ନ କରିବା ସହ ଅସନ୍ତୋଷ ଜାହିର କରିଛନ୍ତି ।
୨୧ ଲୋକସଭା ଆସନରୁ ୧୮ଟି ଆସନରେ ପ୍ରାର୍ଥୀ ଘୋଷଣା କରିଛି ବିଜେପି । ଯାଜପୁର, କନ୍ଧମାଳ, କଟକ ଆସନ ପାଇଁ ଅଡ଼ୁଆ ତୁଟି ନଥିବାରୁ ପ୍ରାର୍ଥୀ ଘୋଷଣା ହୋଇନାହିଁ । ଆଗକୁ ବିଧାନସଭା ଆସନ ପାଇଁ ବି ଟିକେଟ ଚୂଡାନ୍ତି ହେବ । ଦଳରେ ଆରମ୍ଭରୁ ଏତେ ଅସନ୍ତୋଷ, ତେବେ ଆଗକୁ ବିସ୍ଫୋରଣ ହେବନି ତ ? ଏବେଠାରୁ ଦଳୀୟ ନିଷ୍ପତ୍ତି ଉପରେ ଆଶାୟୀଙ୍କ ଖୋଲାଖୋଲି ବିଦ୍ରୋହ ଦଳ ଉପରେ ପ୍ରଭାବ ପକାଇବା ନିଶ୍ଚିତ ।
ଭୁବନେଶ୍ବର: ନିର୍ବାଚନ ବିଗୁଲ ବାଜିବା ପରେ ସବୁ ରାଜନୈତିକ ଦଳ ଜୋରସୋରରେ ପ୍ରସ୍ତୁତି ଆରମ୍ଭ କରିଛନ୍ତି । ଓଡ଼ିଶାରେ ବିଜେଡି ନିର୍ବାଚନ ପ୍ରସ୍ତୁତିରେ ବିରୋଧୀଙ୍କଠାରୁ ଢେର ଆଗରେ ରହିଛି । ଦୁଇ ବିରୋଧୀ ଦଳ ବିଜେପି ଓ କଂଗ୍ରେସ ପ୍ରସ୍ତୁତିରେ ଘାଣ୍ଟି ହେଉଥିବା ବେଳେ ବିଜେଡି ଓଡ଼ିଶାବାସୀଙ୍କ ସେବା ପାଇଁ ଏଥର ନିର୍ବାଚନୀ ଇସ୍ତାହାରରେ କ’ଣ ଆଣିବ ଚିନ୍ତା କରୁଛନ୍ତି । ଯାହାକୁ ନେଇ ବିଜୁ ଛାତ୍ର ଜନତା ଦଳ ରାଜ୍ୟର ଛାତ୍ରଛାତ୍ରୀଙ୍କୁ ଖୁସି କରିଦେବା ଭଳି ସୂଚନା ଦେଇଛି । ଚଳିତ ନିର୍ବାଚନରେ ବିଜେଡି ଆଣିବାକୁ ଯାଉଥିବା ନିର୍ବାଚନୀ ଇସ୍ତାହାରରେ ଛାତ୍ରଛାତ୍ରୀଙ୍କ ପାଇଁ ରହିବ ଘୋଷଣା ପତ୍ର ।
ଏକ ସାମ୍ବାଦିକ ସମ୍ମିଳନୀରେ ଏନେଇ ବିଜୁ ଛାତ୍ର ଜନତା ଦଳ ପକ୍ଷରୁ କୁହାଯାଇଛି । ଛାତ୍ର ବିଜେଡି ପକ୍ଷରୁ କୁହାଯାଇଛି ବିଜେଡି ଇସ୍ତାହାରରେ ଛାତ୍ରଙ୍କ ଉଦ୍ଦେଶ୍ୟରେ ଏକ ଘୋଷଣାପତ୍ର ରହିବ । ଏହି ଘୋଷଣା ପତ୍ରରେ କ’ଣ ରହିବ ତାହା ସ୍ଥିର କରିବେ ରାଜ୍ୟର ଛାତ୍ରଛାତ୍ରୀ । ଏଥିପାଇଁ ଛାତ୍ରଛାତ୍ରୀଙ୍କ ପରାମର୍ଶ ନିଆଯିବ । ଆସନ୍ତା ୭ ଦିନ ରାଜ୍ୟର ସମସ୍ତ ଅଞ୍ଚଳର ଛାତ୍ରଛାତ୍ରୀ ଏଥିପାଇଁ ପରାମର୍ଶ ଦେବେ । ଏହାକୁ ବିଚାର କରି, ଦଳ ଇସ୍ତାହାରରେ ଛାତ୍ରଛାତ୍ରୀଙ୍କ ପାଇଁ ଘୋଷଣାପତ୍ର ଆଣିବ । ଯାହା, ନବୀନ ପଟ୍ଟନାୟକ ଷଷ୍ଠର ମୁଖ୍ୟମନ୍ତ୍ରୀ ହେବା ପରେ ପ୍ରଥମ କ୍ୟାବିନେଟ ବୈଠକରେ ମୋହର ବାଜିବ । ତେବେ ଛାତ୍ରଛାତ୍ରୀ ସେମାନଙ୍କ ବହୁମୂଲ୍ୟ ମତାମଦ ଦେବାକୁ ବିଜେଡି ପକ୍ଷରୁ ଦୁଇଟି ନମ୍ବର ଜାରି କରାଯାଇଛି । ଛାତ୍ରଛାତ୍ରୀ 9078404444 ନମ୍ବରରେ ଫୋନ କରି ନିଜ ମତାମତ ଦେଇ ପାରିବେ । ଏହାସହ [email protected] ଜରିଆରେ ମେଲ୍ କରି ମଧ୍ୟ ଛାତ୍ରଛାତ୍ରୀ ସେମାନଙ୍କ ମତାମତ ପଠାଇ ପାରିବେ ।
ଢେଙ୍କାନାଳ: ବିବିଧତାର ଦେଶ ଭାରତ । ଏଠି ଦେଖିବାକୁ ମିଳିଥାଏ ଭିନ୍ନ ଭିନ୍ନ ଜାତି, ଭାଷ ଓ ସେମାନଙ୍କ ପରମ୍ପରା । ଆଉ ଏସବୁ ପରମ୍ପରାର ରହିଛି ସ୍ବତନ୍ତ୍ରତା । ଏମିତି ଏକ ପରମ୍ପରା ଢେଙ୍କାନାଳ ଜିଲ୍ଲା ସୋରିଷିଆପଦା ଟଟିଘର ଗାଁରେ ଦେଖିବାକୁ ମିଳିଥାଏ । ଏହି ପରମ୍ପରାଟି ହଜାରେ ବର୍ଷରୁ ଅଧିକ ପୁରୁଣା । ତେବେ ଜାଣିଛନ୍ତି କି କ’ଣ ଏହି ପରମ୍ପରା । ଆଜ୍ଞା ହଁ ଏଠାରେ ହଜାରେ ବର୍ଷରୁ ଅଧିକ ହେବ ପାଳନ ହେଉଛି କୁକୁର ବାହାଘର । ବେଶ ଜାକଜମକରେ ଏଠାରେ ଏହି କୁକୁର ବାହାଘର ହୋଇଥାଏ । ତେବେ ଜାଣିଲେ ଆଶ୍ଚର୍ଯ୍ୟ ହେବେ ଏଠାରେ କନ୍ୟା ବେଶରେ କୁକୁର ସଜେଇ ହୋଇଥିବା ବେଳେ ବର ହୋଇଥାଏ ଏକ କୁନି ପୁଅ । ତେବେ ଆସନ୍ତୁ ଜାଣିବା ଢେଙ୍କାନାଳର ସୋରିଷିଆପଦା ଟଟିଘର ଗାଁର ଏହି କୁକୁର ବାହାଘର ସମ୍ପର୍କରେ ।
ଟଟିଘର ଗାଁ । ରାଜରାସ୍ତା ସାଜିଛି ବେଦୀ । କନିଆ ସାଜିଛି କୁକୁର ଓ ବର ସାଜିଛି କୁନିପୁଅ । ବାଜାର ତାଳେ ତାଳେ ଝୁମି ଝୁମି ଅଣ୍ଟାକୁ ଅଣ୍ଟା ଧରି ନାଚୁଛନ୍ତି ଲୋକ । ରାସ୍ତା ଉପରେ ଚାଲିଛି ବାହାଘର । କନ୍ୟା ବେଶରେ ସଜେଇ ହୋଇଛି କୁକୁର । ପାଦରେ ଲଗାଯାଇଛି ଅଳତା, ଗୋଡରେ ପିନ୍ଧିଛି ଘୁଙ୍ଗୁର ଓ ଚୁଡି, ମୁଣ୍ଡରେ ପକାଯାଇଛି ଓଢଣୀ । ଖାଲି ଏତିକି ନୁହେଁ ମନ୍ତ୍ରପାଠ ସହ ହୋଇଛି ବିବାହ । ଶେଷରେ ବରଯାତ୍ରୀଙ୍କୁ ଭୋଜିରେ ଦିଆଯାଇଥାଏ ତାଡି । ଯୌତୁକ ଟଙ୍କା ହିସାବରେ ଦିଆଯାଇଥିଲା ଛୋଟ ମାଟି ଖଣ୍ଡ ଏବଂ ବାଇକ ହିସାବରେ ଦିଆଯାଇଥିଲା ଗୋଟିଏ ଖେଳନା ।
ଏହି ନିଆରା ପରମ୍ପରାଟି କାହିଁ କେତେ କାଳରୁ ଚାଲିଆସିଛି । ଯଦି କୌଣସି କୁନି ପୁଅର ପାଟିର ଉପର ଭାଗରେ ଦାନ୍ତ ଉପରେ ଦାନ୍ତ ଉଠିଥାଏ ତା’ହାଲେ ଆଦିବାସୀମାନେ ଏହାକୁ ଭାବିଥାନ୍ତି ଅଶୁଭ । ତେଣୁ କୁକୁର ସହ ବାହାଘର କରିଦେଲେ ରିଷ୍ଟ ଖଣ୍ଡନ ହୁଏ ବୋଲି ସେମାନଙ୍କ ବିଶ୍ବାସ ରହିଛି । ପୁଅର ଏପରି ଦାନ୍ତ ଉଠିଥିଲେ ମାଇ କୁକୁରଙ୍କ ସହ ତାର ବାହାଘର କରାଯାଏ । ଆଉ ଝିଅର ଦାନ୍ତ ଉଠିଥିଲେ ପୁରୁଷ କୁକୁର ସହ ବାହାଘର କରାଯାଏ । ପିଲାର ୭ ବର୍ଷ ଭିତରେ କରାଯାଇଥାଏ ଏହି ବାହାଘର । ଜୁଆଙ୍ଗ, ମାଝୀ ପରି ବହୁ ସଂପ୍ରଦାୟ ଏହି ପ୍ରଥାକୁ ମାନିଥାନ୍ତି । ଯାହାର ନାମ ରହିଛି ମା ଦେଶାଉଲି ବାର୍ଷିକ ମାଗେ ପରବ ।
ସୋନପୁର: ବାପା ଦ୍ବିତୀୟ ବିବାହ କରିଥିଲେ । ତାହା ପୁଣି ଭିନ୍ନ ଜାତିରେ । ଏଥିପାଇଁ ବାପାଙ୍କ ମୃତ୍ୟୁ ପରେ ଶବଦାହ ପାଇଁ ଆଓୁନି ପୁଅ । ଏମିତି ଘଟଣା ଘଟିଛି ସୁବର୍ଣ୍ଣପୁର ଜିଲ୍ଲା ବୀରମହାରାଜପୁର ବ୍ଲକ ଚିଙ୍ଗିରିନାଲି ଗାଁରେ ।
ସୂଚନା ଅନୁସାରେ, ଚିଙ୍ଗିରିନାଲି ଗାଁର ବେଦ ପ୍ରଧାନଙ୍କର ଆଜି ସକାଳେ ପରଲୋକ ହୋଇଥିଲା । ତେବେ ତାଙ୍କ ମର ଶରୀରକୁ ଦାହ କରିବା ପାଇଁ କେହି ପାଖକୁ ଆସୁନାହାନ୍ତି । ତାଙ୍କ ପୂର୍ବ ସ୍ତ୍ରୀଙ୍କର ଦୁଇ ପୁଅ ଓ ଦୁଇ ଝିଅ ଅଛନ୍ତି । ହେଲେ ସେମାନେ ବାପାଙ୍କ ସତ୍କାର କରିବାକୁ ଅରାଜି । ଫଳରେ ଦୀର୍ଘ ସମୟ ଧରି ମୃତଦେହ ଘରେ ପଡ଼ି ରହିଛି । ଗ୍ରାମବାସୀ ବେଦଙ୍କ ପୁଅକୁ ଖବର ଦେଇଥିଲେ ମଧ୍ଯ କେହି ନ ଆସିବାରୁ ଏନେଇ ପୋଲିସକୁ ଖବର ଦେଇଛନ୍ତି ।
ରାଉରକେଲା: ଫେକ୍ ଡେଟିଂ ଆପ ଓ ଷ୍ଟକ ମାର୍କେଟରେ ଇନଭେଷ୍ଟର ଲୋଭ ଦେଖାଇ ଲୋକଙ୍କୁ ଠକିଥିବା ଦୁଇ ଠକଙ୍କୁ ବାନ୍ଧିଲା ରାଉରକେଲା ପୋଲିସ । ଗିରଫ ଅଭିଯୁକ୍ତ ଦ୍ବୟ ଆନ୍ଧ୍ରପ୍ରଦେଶର ଗୁଣ୍ଟୁରୁ ଅଞ୍ଚଳର ବୋଲି ଜଣାପଡିଛି । ବିଭିନ୍ନ ଡେଟିଙ୍ଗ ଫେକ ଆପ ଜରିଆରେ ଓ ଷ୍ଟକ ମାର୍କେଟରେ ଉନଭେଷ୍ଟ କରି ଅଧିକ ଲାଭ ଦେବାର ଲୋଭ ଦେଖାଇ ୫ କୋଟିରୁ ଅଧିକ ଟଙ୍କା ଠକିଥିବା ପୋଲିସ ତଦନ୍ତରୁ ଜଣାପଡିଛି ।
ଅଭିଯୁକ୍ତ ଦ୍ବୟ ଦେଶର ବିଭିନ୍ନ ସ୍ଥାନରୁ ୨ ହଜାରରୁ ଅଧିକ ଲୋକଙ୍କ ଠାରୁ ଟଙ୍କା ଠକେଇ କରିଥିବା ତଦନ୍ତରୁ ଜଣାପଡ଼ିଛି । ଏହି ଠକେଇର ରିଙ୍ଗ ଲିଡର ଚାଇନାର ହୋଇଥିବା ବେଳେ ଏଜେଣ୍ଟ ଭାରତ, ବାଂଲାଦେଶ, ପାକିସ୍ତାନ, ନେପାଳ, କାମ୍ବୋଡିଆରେ ଥିବା ପୋଲିସ ତଦନ୍ତରୁ ଜଣାପଡିଛି । ଭାରତର ୧୬ ଜଣ ଅଭିଯୁକ୍ତ କାମ୍ବୋଡିଆରେ ରହି ସାଇବର କ୍ରାଇମ କରି ଲୋକଙ୍କୁ ଠକୁଥିବା ପୋଲିସ ତଦନ୍ତରୁ ଜଣାପଡ଼ିଛି । ଠକେଇ ଘଟଣାରେ ସମୃକ୍ତ ଥିବା ଅନ୍ୟ ଅଭିଯୁକ୍ତଙ୍କୁ ତୁରନ୍ତ ଗିରଫ କରାଯିବ ବୋଲି ସାମ୍ବାଦିକ ସମ୍ମିଳନୀରେ ରାଉରକେଲା ଡିଆଇଜି ମିତ୍ରଭାନୁ ମହାପାତ୍ର ସୂଚନା ଦେଇଛନ୍ତି ।
ସମ୍ବଲପୁର: ବିଜେପି ବିଧାୟକ ଜୟନାରାୟଣ ମିଶ୍ରଙ୍କ ଆଦର୍ଶ ନିର୍ବାଚନ ଆଚରଣବିଧିକୁ ବେଖାତିର । ନଡ଼ିଆ ପିଟି କମ୍ୟୁନିଟି ସେଣ୍ଟ ନିର୍ମାଣର କରିଛନ୍ତି ଭୂମି ପୂଜନ । ସମ୍ବଲପୁରରୁ ଜୟନାରାୟଣ ମିଶ୍ରଙ୍କ ବିରୋଧରେ ଆସିଛି ଏମିତି ଅଭିଯୋଗ ।
ଅଭିଯୋଗ ଅନୁସାରେ, ସାଧାରଣ ନିର୍ବାଚନ ପାଇଁ ତାରିଖ ଘୋଷଣା ସହ ଦେଶରେ ଲାଗୁ ହୋଇଛି ଆଦର୍ଶ ନିର୍ବାଚନ ଆଚରଣବିଧି । ହେଲେ ସମ୍ବଲପୁର ବିଧାୟକ ଜୟନାରାୟଣଙ୍କ ଆଚରଣବିଧିକୁ ନାହିଁ ଖାତିର । ସମ୍ବଲପୁର ମହାନଗର ନିଗମ ବରେଇପାଲି ମଖନାପଡାରେ ଏକ କମ୍ୟୁନିଟି ସେଣ୍ଟର ନିର୍ମାଣ ପାଇଁ ନିଜ ସମର୍ଥକଙ୍କ ସହ ମିଶି ଭୂମିପୂଜା କରିଛନ୍ତି ।
ଜୟନାରାୟଣଙ୍କ ଭଳି ଜଣେ ବରିଷ୍ଠ ବିଜେପି ବିଧାୟକ ହୋଇଥିବା ବେଳେ ଆଦର୍ଶ ଆଚରଣ ବିଧି ନମାନିବାକୁ ନେଇ ସ୍ଥାନୀୟ ଅଞ୍ଚଳରେ ଚର୍ଚ୍ଚା ସୃଷ୍ଟି କରିଛି । ଆଦର୍ଶ ଆଚରଣବିଧି ଲାଗୁ ହୋଇଥିବାବେଳେ କିଭଳି ଜୟନାରାୟଣ ଭୂମି ପୂଜନ କଲେ ସେନେଇ ପ୍ରଶ୍ନ ଉଠିଛି ।
