ନନ୍ଦିଘୋଷ ବ୍ୟୁରୋ: ଆସନ୍ତା ମାର୍ଚ୍ଚ ୩୧ ତାରିଖ ରବିବାର ଖୋଲା ରହିବ ଦେଶର ସମସ୍ତ ବ୍ଯାଙ୍କ। ରିଜର୍ଭ ବ୍ଯାଙ୍କ ଏହି ବଡ଼ ନିଷ୍ପତ୍ତି ନେଇଛନ୍ତି। ଚଳିତ ଆର୍ଥିକ ବର୍ଷର ଶେଷ ଦିନ ହୋଇଥିବାରୁ ସମସ୍ତ ବ୍ଯାଙ୍କ ଖୋଲା ରଖିବାକୁ ନିର୍ଦ୍ଦେଶ ଜାରି କରିଛି ଆରବିଆଇ। ସୋସିଆଲ ମିଡିଆ ଏକ୍ସରେ ଏହି ସୂଚନା ଦେଇଛନ୍ତି ଆରବିଆଇ କର୍ତ୍ତୃପକ୍ଷ। ୩୧ ମାର୍ଚ୍ଚ ରବିବାର ହୋଇଥିବା ସର୍ତ୍ତେ ଏହି ଦିନ ସମସ୍ତ ବ୍ଯାଙ୍କ ଖୋଲା ରହିବ ବୋଲି ସୂଚନା ଦେଇଛି ଆରବିଆଇ। ୩୧ ମାର୍ଚ୍ଚ ଚଳିତ ଆର୍ଥିକ ବର୍ଷର ବାର୍ଷିକ କ୍ଲୋଜିଂ ଦିବସ। ଏଥିଲାଗି ସମସ୍ତ ବ୍ଯାଙ୍କ ଖୋଲା ରହିବ। ଚଳିତ ଆର୍ଥିକ ବର୍ଷର ଶେଷ ଦିନ ସୁଦ୍ଧା ବର୍ଷତମାମ ହୋଇଥିବା ସମସ୍ତ କାରବାରର ସୂଚନା ଲିପିବଦ୍ଧ ହେବା ଆବଶ୍ୟକ। ଏଥିଲାଗି ସମସ୍ତ ବ୍ଯାଙ୍କକୁ କାମ କରିବାକୁ କୁହାଯାଇଛି। ୩୧ ମାର୍ଚ୍ଚ ରବିବାର ଦିନ ଅନ୍ୟ ଦିନ ଭଳି ନିୟମିତ କାର୍ଯ୍ୟ ସମୟରେ ଖୋଲିବ ସମସ୍ତ ବ୍ଯାଙ୍କର ଶାଖା।ଏହାସହ NEFT ଏବଂ RTGS କାରବାର ମଧ୍ୟ ରାତି ୧୨ଟା ପର୍ଯ୍ୟନ୍ତ ଜାରି ରହିବ। ଏହାବାଦ ସରକାରୀ ଚେକ୍ କ୍ଲିଅରାନ୍ସ ଲାଗି ମଧ୍ୟ ବିଶେଷ ବ୍ୟବସ୍ଥା କରାଯିବ। ଏହା ପୂର୍ବରୁ ଆୟକର ବିଭାଗ ମଧ୍ୟ ସମସ୍ତ ଅଫିସ ଖୋଲା ରଖିବାକୁ ନିଷ୍ପତ୍ତି ନେଇଥିଲା। ବିଭାଗ ପକ୍ଷରୁ ୨୯ ତାରିଖ ଦିନ ପଡୁଥିବା ଗୁଡ୍ ଫ୍ରାଇଡେ, ୩୦ ତାରିଖ ଶନିବାର ଏବଂ ୩୧ ତାରିଖ ରବିବାର ଛୁଟି ରଦ୍ଦ କରିଥିଲେ। ଆର୍ଥିକ ବର୍ଷର ଶେଷ ୩ ଦିନ ଛୁଟି ପଡୁଥିବାରୁ ଏହି ୩ ଦିନ ଛୁଟି ରଦ୍ଦ କରିଛି ଆୟକର ବିଭାଗ।
ଭାରତ ଦେଖିଲା ବିଶ୍ବ ସାହିତ୍ୟ ମହାକୁମ୍ଭ
ନନ୍ଦିଘୋଷ ବ୍ୟୁରୋ: ଖ୍ଯାତି ସାଉଁଟିଲା କେନ୍ଦ୍ର ସାହିତ୍ଯ ଏକାଡେମୀ। ବିଶ୍ବ ସାହିତ୍ଯ ମହାକୁମ୍ଭ ପରି ଏକ ବିଶାଳ କାର୍ଯ୍ୟକ୍ରମ ଆୟୋଜନ କରି ଏକାଦିକ୍ରମେ ୱାର୍ଲଡ ବୁକ୍ ଅଫ ରେକର୍ଡସ, ଲଣ୍ଡନ ଓ ଦୁବାଇର ଆଇନଷ୍ଟାଇନ ୱାର୍ଲଡ ରେକର୍ଡସ ସମ୍ମାନ ହାସଲ କରିଛି ଏକାଡେମୀ। ଭାରତର ସାଂସ୍କୃତିକ ଓ ସାହିତ୍ଯିକ ଐତିହ୍ୟ, ସୃଜନଶୀଳତାର ବିକାଶ ଦିଗରେ ନିରନ୍ତର କାର୍ଯ୍ୟ କରିଆସୁଛି ସଂସ୍ଥା।
ଭାରତ ଦେଖିଲା ବିଶ୍ବ ସାହିତ୍ୟ ମହାକୁମ୍ଭ। ଆଉ ଇତିହାସ ରଚିଲା କେନ୍ଦ୍ର ସାହିତ୍ଯ ଏକାଡେମୀ। ପ୍ରଥମ ଥର ଲାଗି ସାଉଁଟିଛି ଦୁଇ ଦୁଇଟି ବିଶ୍ବସ୍ତରୀୟ ସମ୍ମାନ। ଗତ ମାର୍ଚ୍ଚ ୧୧ରୁ ୧୬ ପର୍ଯ୍ୟନ୍ତ ନୂଆଦିଲ୍ଲୀ ରବୀନ୍ଦ୍ର ଭବନଠାରେ ଅନୁଷ୍ଠିତ ହୋଇଥିବା ଫେଷ୍ଟିଭାଲ ଅଫ୍ ଲେଟର୍ସରେ କୀର୍ତ୍ତମାନ ସ୍ଥାପନ କରିଛି ଏକାଡେମୀ। ୧୩ ତାରିଖରେ ୪୦ଟି ଭାଷାର ୯୦ ଜଣ ଲେଖକ ବିନା ବିରତିରେ ଧାରାବାହିକ ଭାବେ ପାଠ କରିଥିଲେ ନିଜ ନିଜର ସାହିତ୍ଯାକୃତି। ସାରା ଦୁନିଆରେ ପ୍ରଥମ ଥର ଲାଗି ଆୟୋଜିତ ଏକ କାର୍ଯ୍ୟକ୍ରମ ହାସଲ କରିଥିଲା ୱାର୍ଲଡ ବୁକ୍ ଅଫ ରେକର୍ଡସ, ଲଣ୍ଡନ ପକ୍ଷରୁ ସାର୍ଟିଫିକେଟ।
ସେହିପରି ଦୁନିଆର ସବୁଠାରୁ ବଡ ସାହିତ୍ଯ ଉତ୍ସବ ଆୟୋଜିତ କରିଥିବାରୁ ସାହିତ୍ଯ ଏକାଡେମୀକୁ ମିଳିଥିଲା ଦୁବାଇର ଆଇନଷ୍ଟାଇନ ୱାର୍ଲଡ ରେକର୍ଡସ ସମ୍ମାନ। କେବଳ ଏତିକି ନୁହେଁ ଏଲଜିବିଟିକ୍ଯୁଙ୍କୁ ନେଇ ସାହିତ୍ୟ ସମ୍ମିଳନୀ, ଭାରତର ସାଂସ୍କୃତିକ ଓ ସାହିତ୍ଯିକ ଐତିହ୍ୟ, ସୃଜନଶୀଳତାର ବିକାଶ ଆଦି ସମ୍ପର୍କରେ ମାନସ ମନ୍ଥନ ଭାରତୀୟ ସାହିତ୍ଯକୁ ଦେଇଥିଲା ନବଦିଗନ୍ତ। କେନ୍ଦ୍ର ସାହିତ୍ୟ ଏକାଡେମୀର ୭୦ ବର୍ଷର ଇତିହାସରେ ସମସ୍ତ ଭାରତୀୟ ଭାଷା ଲାଗି ଏକାଡେମୀ ନିରନ୍ତର ସେବା କରିଆସୁଛି। ଓଡ଼ିଶାର ବିଭିନ୍ନ ଭାଷାର ବିକାଶ ଲାଗି ବି କରାଯାଉଛି ଉଦ୍ଯମ। ପ୍ରାଚୀନ ସଉରା ଭାଷାର ଏକ ସମ୍ମିଳନୀ ୨୦୨୩ରେ ଭୁବନେଶ୍ବରରେ ହୋଇଥିଲା ବୋଲି କହିଛନ୍ତି ସମ୍ପାଦକ।
୧୭୫ଟି ଭାଷା, ୧୯୦ ଅଧିବେଶନ, ୧୧୦୦ ସାହିତ୍ୟିକଙ୍କ ଗହଣରେ ଛଅ ଦିନ ଧରି ଚାଲିଥିବା ସାହିତ୍ୟୋତ୍ସବରେ ୧୯୦ରୁ ଅଧିକ ଅଧିବେଶନ ଅନୁଷ୍ଠିତ ହୋଇଥିଲା। ଭାରତର ଭକ୍ତି ସାହିତ୍ୟ, ଶିଶୁ ସାହିତ୍ୟ, ଅନୁବାଦ ସାହିତ୍ୟ, ସାହିତ୍ୟ ଓ ମହିଳା ସଶକ୍ତିକରଣ ଆଦି କାର୍ଯ୍ୟକ୍ରମରେ ଭାଗ ନେଇଥିଲେ ସାହିତ୍ଯିକ। ଏହି ଅବସରରେ ବିଶିଷ୍ଟ ସାହିତ୍ୟିକ ଓ ଗୀତିକାର ଗୁଲଜାର ଦେଇଥିଲେ ଭାବପୂର୍ଣ୍ଣ ବକ୍ତବ୍ଯ। ୨୦୨୩ ବର୍ଷ ନିମନ୍ତେ ୨୪ଟି ଭାରତୀୟ ଭାଷାରେ ସାହିତ୍ୟ ଏକାଡେମୀ ପୁରସ୍କାର ପାଇଥିବା କୃତୀ ସ୍ରଷ୍ଟାଙ୍କୁ ପୁରସ୍କୃତ କରାଯାଇଥିଲା।
ବିପକ୍ଷ ଟିମକୁ କଡ଼ା ଟକ୍କର ଦେବ ସନରାଇଜର୍ସ ହାଇଦ୍ରାବାଦର ଏହି ଟିମ୍
ନନ୍ଦିଘୋଷ ବ୍ୟୁରୋ: ଆଇପିଏଲ ୨୦୨୪କୁ ଆଉ ମାତ୍ର ଦିନ କେଇଟା ବାକି ରହିଛି । ମାର୍ଚ୍ଚ ୨୨ ତାରିଖରୁ ଆରମ୍ଭ ହେବାକୁ ଯାଉଛି ଆଇପିଏଲ ୨୦୨୪ ସିଜିନ୍ । ଚେନ୍ନାଇ ସୁପରକିଙ୍ଗ୍ସ ଏବଂ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର ମଧ୍ୟରେ ଖେଳାଯିବ । ଏବେ ସମସ୍ତ ଟିମ ଅଭ୍ୟାସ ଜାରି ରଖିଛନ୍ତି । ଚାମ୍ପିଅନ ହେବା ପାଇଁ ସମସ୍ତ ଟିମ୍ ପ୍ରସ୍ତୁତି କରୁଥିବାବେଳେ ଫ୍ୟାନ୍ସମାନେ ନିଜ ନିଜର ଟିମ ପାଇଁ ଚିୟରଅପ କରିବା ଆରମ୍ଭ କରିଦେଲେଣି । ସେପଟେ କେଉଁ ଦଳରେ କାହାକୁ ସ୍ଥାନ ମିଳିବ ଏନେଇ ପ୍ରସ୍ତୁତି ଆରମ୍ଭ ହୋଇଥିବାବେଳେ ହାଇଦ୍ରାବର ଷ୍ଟ୍ରଙ୍ଗ ୧୧ ନଜରକୁ ଆସିଛି । ଯଦି ଏହି ଟିମ ଖେଳେ ତାହେଲେ ହାଇଦ୍ରାବାଦ ଏକ ଦୃଢ଼ ଦଳଭାବେ ଉଭା ହୋଇପାରିବ । ଅନ୍ୟ ଦଳମାନଙ୍କୁ ଟକ୍କର ଦେବାରେ ସମର୍ଥ ହୋଇପାରିବ ହାଇଦ୍ରାବାଦ ।
ସନରାଇଜର୍ସ ହାଇଦ୍ରାବାଦର ଓପନିଂ ଯୋଡ଼ି ରହିବେ ମୟଙ୍କ ଅଗ୍ରଓ୍ବାଲ ଏବଂ ଟ୍ରାଭିସ ହେଡ । ଏହି ଯୋଡ଼ି ପାଳି ଆରମ୍ଭ କରିବେ । ନିକଟରେ ଯାଇଥିବା ଦିନିକିଆ ବିଶ୍ବକପର ଫାଇନାଲରେ ଶତକୀୟ ପାଳି ଖେଳିଥିଲେ । ଏଣୁ ଆଇପିଏଲରେ ସେ ଦମଦାର ପ୍ରଦର୍ଶନ କରିବେ ବୋଲି ଆଶା କରାଯାଉଛି । ମଧ୍ୟକ୍ରମରେ ରାହୁଲ ତ୍ରିପାଠୀ, ଇଡେନ ମାକ୍ରମ ହେନ୍ରିଚ୍ କ୍ଲାସନ ବ୍ୟାଟିଂ ଭାର ସମ୍ଭାଳିବେ । ସେପଟେ ଅଲରାଉଣ୍ଡଭାବେ ଦଳରେ ଖେଳିବେ ଓ୍ବାଶିଂଟନ ସୁନ୍ଦର, ପାଟ କମିନ୍ସ, ଶେହେବାଜ ଅହମ୍ମଦ । ବୋଲରାଙ୍କ ମଧ୍ୟରେ ଭୁବନେଶ୍ବର କୁମାର, ଟି ନଟରାଜନ ଏବଂ ଉମ୍ରାନ ମଲ୍ଲିକ । ତାରକା ଖଚିତ ଏହି ଦଳ ଦମଦାର ପ୍ରଦର୍ଶନ କରିବ ବୋଲି ଆଶା କରାଯାଉଛି ।
୨୪ ଘଣ୍ଟାରେ ସ୍ବାଭାବିକ ଠାରୁ ୩ହଜାର ୮୯୬ ପ୍ରତିଶତ ଅଧିକ ବର୍ଷା
ଭୁବନେଶ୍ବର: ସାରା ରାଜ୍ୟରେ ଲାଗିରହିଛି ଅଦିନିଆ ବର୍ଷା। ଉପକୂଳରୁ ଆରମ୍ଭ କରି ଆଭ୍ୟନ୍ତରୀଣ ଓଡ଼ିଶାରେ ସବୁଆଡେ ଘଡଘଡି ବିଜୁଳି ସହ ପ୍ରବଳ ବର୍ଷା। ଆସନ୍ତା ୨୪ ଘଣ୍ଟା ପର୍ଯ୍ୟନ୍ତ ରାଜ୍ୟରେ ଏଭଳି ପାଗ ଜାରି ରହିବ ବୋଲି ପୂର୍ବାନୁମାନ କରିଛି ଆଞ୍ଚଳିକ ପାଣିପାଗ କେନ୍ଦ୍ର। ପ୍ରବଳ ବର୍ଷା ସହ ବିଜୁଳି ଘଡଘଡି ପାଇଁ ୬ ଜିଲ୍ଲାକୁ ଅରେଞ୍ଜ ଆଲର୍ଟ ଜାରି କରାଯାଇଛି। ୨୦ ଜିଲ୍ଲାକୁ ୟେଲୋ ଆଲର୍ଟ ଜାରି ହୋଇଛି। ୨୪ ଘଣ୍ଟା ମଧ୍ୟରେ ରାଜ୍ୟରେ ରେକର୍ଡ ବର୍ଷା ହୋଇଛି। ସ୍ବାଭାବିକ ଠାରୁ ୩ ହଜାର ୮୯୬ ପ୍ରତିଶତ ବର୍ଷା ରେକର୍ଡ ହୋଇଥିବା ବେଳେ ସ୍ବାଭାବିକ ଠାରୁ ୧୭ ଡିଗ୍ରୀ ପର୍ଯ୍ୟନ୍ତ ତାପମାତ୍ରା କମିଛି। ୨୨ ତାରିଖରୁ ରାଜ୍ୟରେ ପାଗ ପରିବର୍ତ୍ତନ ହେବା ସହ ତାପମାତ୍ରା ବୃଦ୍ଧି ହେବ।
ଗ୍ରୀଷ୍ମରେ ବର୍ଷାର ରେକର୍ଡ। ୨୪ ଘଣ୍ଟାରେ ସ୍ବାଭାବିକ ଠାରୁ ୩ହଜାର ୮୯୬ ପ୍ରତିଶତ ଅଧିକ ବର୍ଷିଲା। ବୌଦ୍ଧରେ ୨୪ ଘଣ୍ଟାରେ ସର୍ବାଧିକ ୪୭ ହଜାର ୭ଶହ ପ୍ରତିଶତ ଅଧିକ ବର୍ଷା ହୋଇଛି। ନୂଆପଡାରେ ସ୍ବାଭାବିକ ଠାରୁ ୨୧ ହଜାର ୭ଶହ ପ୍ରତିଶତ ବୃଷ୍ଟିପାତ ରେକର୍ଡ। ବିଗତ ୫ ବର୍ଷ ଧରି ମାର୍ଚ୍ଚ ୧୬ ରୁ ୨୦ ଭିତରେ ହେଉଛି ଏମିତି ବର୍ଷା। ବର୍ଷା ପାଗ ପାଇଁ ସ୍ବାଭାବିକ ଠାରୁ ୧୭ ଡିଗ୍ରୀ ଯାଏଁ କମିଛି ତାପମାତ୍ରା। କାଲିଯାଏଁ ଲାଗିରହିବ ଏଭଳି ପାଗ। ୨୨ ତାରିଖରୁ ପାଗ ବଦଳିବ। ନିମ୍ନ ଚାପରେଖା ସହ ଉପକୂଳ ଓଡ଼ିଶା ବଙ୍ଗୋପସାଗରରେ ସୃଷ୍ଟି ହୋଇଥିବା ଗୁରୁଚାପ ବଳୟ ଏବଂ ବାଂଲାଦେଶ ନିକଟରେ ସୃଷ୍ଟି ହୋଇଥିବା ଘୂର୍ଣ୍ଣିବଳୟ ପ୍ରଭାବରେ ରାଜ୍ୟରେ ଅଦିନିଆ ଲଗାଣ ବର୍ଷା ଜାରି ରହିଛି। ପ୍ରଭାବରେ ପ୍ରବଳ ବର୍ଷା ସାଙ୍ଗକୁ ବିଜୁଳି ଘଡଘଡି ଏବଂ କିଛି ସ୍ଥାନରେ କୁଆପଥର ବୃଷ୍ଟି ହୋଇଥିବା ସୂଚନା ଦେଇଛି ପାଣିପାଗ କେନ୍ଦ୍ର।
ଆସନ୍ତା ୨୪ ଘଣ୍ଟା ପର୍ଯ୍ୟନ୍ତ ରାଜ୍ୟରେ ଏଭଳି ପାଗ ଜାରି ରହିବ। ପ୍ରବଳ ବର୍ଷା ସହ ବିଜୁଳି ଘଡଘଡି ପାଇଁ ୬ଟି ଜିଲ୍ଲା କଟକ, ଜଗତସିଂହପୁର, ପୁରୀ, ଖୋର୍ଦ୍ଧା, ନୟାଗଡ ଏବଂ ଗଜପତି ଜିଲ୍ଲାକୁ ଅରେଞ୍ଜ ଆଲର୍ଟ ଜାରି କରାଯାଇଛି। ଏହି ସବୁ ଜିଲ୍ଲାରେ ୭୦ ରୁ ୧୧୦ ମିଲିମିଟର ପର୍ଯ୍ୟନ୍ତ ବର୍ଷା ସମ୍ଭାବନା ଥିବାବେଳେ ଘଣ୍ଟାପ୍ରତି ୪୦ ରୁ ୫୦ କିମି ବେଗରେ ବହିବ ପବନ। ସେହିଭଳି ୨୦ ଜିଲ୍ଲାକୁ ୟେଲୋ ଆଲର୍ଟ ଜାରି କରାଯାଇଛି।ଏଠାରେ ଘଣ୍ଟାପ୍ରତି ୩୦ ରୁ ୪୦ କିମି ବେଗରେ ପବନ ବହିବା ସମ୍ଭାବନା ରହିଛି। ୨୨ ତାରିଖରୁ ପୁଣି ବଢିବ ଖରା । ତାପମାତ୍ରା ୮ ରୁ ୧୦ ଡିଗ୍ରୀ ପର୍ଯ୍ୟନ୍ତ ବୃଦ୍ଧି ପାଇବ। ୨୪ ତାରିଖ ବେଳକୁ ଦିନର ତାପମାତ୍ରା ପୁଣି ୩୮ ଡିଗ୍ରୀ ଛୁଇଁବ ବୋଲି କହିଛି ଆଞ୍ଚଳିକ ପାଣିପାଗ ବିଜ୍ଞାନ କେନ୍ଦ୍ର। ଗତ ୫ ବର୍ଷ ହେବ ମାର୍ଚ୍ଚ ୧୬ ରୁ ୨୦ ତାରିଖ ଭିତରେ ଏଭଳି ବର୍ଷା ହୋଇଥିବା ରେକର୍ଡ କହୁଛି। ୨୦୧୯ ଠାରୁ ଏହି ସମୟରେ ପଶ୍ଚିମଝଡ ସକ୍ରିୟ ରହୁଥିବାରୁ ଏଭଳି ପରିସ୍ଥିତି ଉପୁଜିଥିଲା।
ପ୍ରଣବ ବଖାଣିଲେ ନବୀନଙ୍କ ଆକର୍ଷଣ ବ୍ୟକ୍ତିତ୍ବର ରହସ୍ୟ
ଭୁବନେଶ୍ବର: ବିକାଶର ନିରବ ସାଧକ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ଓଡ଼ିଶାକୁ ଦେଶର ଶ୍ରେଷ୍ଠ ରାଜ୍ୟରେ ପରିଣତ ନକରିବା ଯାଏ ନବୀନ ବିଶ୍ରାମ ନେବେ ନାହିଁ। ମୁଖ୍ୟମନ୍ତ୍ରୀଙ୍କ ନେତୃତ୍ବରେ ବିକଶିତ ଓଡ଼ିଶା ନିର୍ମାଣ ଚାଲିଛି । ଶଙ୍ଖ ଭବନରେ ନବୀନଙ୍କ ଆକର୍ଷଣ ବ୍ୟକ୍ତିତ୍ବର ରହସ୍ୟ ବଖାଣିଛନ୍ତି ବିଜେଡି ସାଂଗଠନିକ ସମ୍ପାଦକ ପ୍ରଣବ ପ୍ରକାଶ ଦାସ। ସବୁ ସର୍ଭେରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ସବୁବେଳେ ଲୋକପ୍ରିୟ ଓ ନମ୍ବର ଓ୍ବାନ ମୁଖ୍ୟମନ୍ତ୍ରୀ ହୋଇ ମଧ୍ୟ ଓଡ଼ିଶାକୁ ଏକ ନମ୍ବର ରାଜ୍ୟରେ ପରିଣତ କରିବା ତାଙ୍କ ଏକମାତ୍ର ଲକ୍ଷ୍ଯ ବୋଲି ପ୍ରଣବ କହିଛନ୍ତି।
ନିରବ ସାଧକ ନବୀନ। ପ୍ରଣବ ବଖାଣିଲେ ନବୀନଙ୍କ ଆକର୍ଷଣ ବ୍ୟକ୍ତିତ୍ବର ରହସ୍ୟ। ନମ୍ବର ଓ୍ବାନ ନେତାଙ୍କ ଲକ୍ଷ୍ୟ। ଓଡ଼ିଶାକୁ ଶ୍ରେଷ୍ଠ ରାଜ୍ୟରେ ପରିଣତ କରିବା। ଦିନରାତି ଏକ କରି ନିର୍ମାଣ କରିଚାଲିଛନ୍ତି ବିକଶିତ ଓଡ଼ିଶା। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ରାଜନୀତିର ନିରବ ସାଧକ । କଥା କମ , କାମ ଅଧିକ । ଦିନରାତି ଏକ କରି ଓଡ଼ିଶାକୁ ଶ୍ରେଷ୍ଠ ରାଜ୍ୟରେ ପରିଣତ କରିବାକୁ ପ୍ରୟାସ ଜାରି ରଖିଛନ୍ତି । ମୁଖ୍ୟମନ୍ତ୍ରୀଙ୍କ ଗୋଟିଏ ଲକ୍ଷ୍ୟ । ଓଡ଼ିଶାକୁ ଭାରତ ବର୍ଷର ଶ୍ରେଷ୍ଠ ରାଜ୍ୟରେ ପରିଣତ କରିବା ଓ ଓଡ଼ିଶାବାସୀଙ୍କୁ ସଶକ୍ତ କରିବା ।
ଶଙ୍ଖଭବନରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଆକର୍ଷଣୀୟ ବ୍ୟକ୍ତିତ୍ବକୁ ନେଇ ଏପରି କହିଛନ୍ତି ବିଜେଡି ସାଂଗଠନିକ ସମ୍ପାଦକ ପ୍ରଣବ ପ୍ରକାଶ ଦାସ । ପ୍ରଣବ କହିଛନ୍ତି ଜାତୀୟ ସ୍ତରରେ ବିଭିନ୍ନ ସଂସ୍ଥା ଓ ଗଣମାଧ୍ୟମ ଦ୍ବାରା କରାଯାଇଥିବା ସର୍ଭେ ରିପୋର୍ଟରେ ମୁଖ୍ୟମନ୍ତ୍ରୀ ସବୁବେଳେ ଲୋକପ୍ରିୟ ଓ ନମ୍ବର ଓ୍ବାନ ମୁଖ୍ୟମନ୍ତ୍ରୀ ହୋଇ ଆସୁଛନ୍ତି । ତାସତ୍ତ୍ବେ ବି ସେ କିନ୍ତୁ ନିଜର କର୍ତ୍ତବ୍ୟ ଜାରି ରଖିଛନ୍ତି । ଓଡ଼ିଶାକୁ କିପରି ନମ୍ବର ଓ୍ବାନ ରାଜ୍ୟରେ ପରିଣତ କରିବା ତାଙ୍କର ଏକମାତ୍ର ଲକ୍ଷ୍ଯ । ଆଉ ଏ ଲକ୍ଷ୍ୟ ପୂରଣ ନକରିବା ଯାଏ ସେ ବିଶ୍ରାମ ନେବ ନାହିଁ ବୋଲି ସଂକଳ୍ପ ନେଇଥିବା ପ୍ରଣବ କହିଛନ୍ତି।
ମୁଖ୍ୟମନ୍ତ୍ରୀଙ୍କ ନେତୃତ୍ବରେ ବିକାଶ ଆଜି ଓଡ଼ିଶାକୁ ନୂଆ ପରିଚୟ ଦେଇଛି । ୨୦୩୬କୁ ସ୍ବତନ୍ତ୍ର ଓଡ଼ିଶା ପ୍ରଦେଶ ଗଠନର ଶହେ ବର୍ଷ ପୂର୍ତ୍ତି ପାଳନ ହେବ। ସବୁ କ୍ଷେତ୍ରରେ ଓଡ଼ିଶାକୁ ଶ୍ରେଷ୍ଠ ରାଜ୍ୟରେ ପରିଶତ କରିବାକୁ ନବୀନ ଲକ୍ଷ୍ୟ ରଖିଛନ୍ତି । ଶିକ୍ଷା, ସ୍ବାସ୍ଥ୍ୟ, ଗମନାଗମନ, ଶିଳ୍ପ, ପର୍ଯ୍ୟଟନ ବିକାଶରେ ଓଡ଼ିଶାରେ ନୂଆ ଅଧ୍ୟାୟ ଆରମ୍ଭ ହୋଇଛି । ସେହିପରି ଆର୍ଥିକ ପରିଚାଳନାରେ ଓଡ଼ିଶା ଦେଶ ପାଇଁ ରୋଲ ମଡେଲ ସାଜିଥିବା ବେଳେ ଦ୍ରାରିଦ୍ର୍ଯ ହ୍ରାସ, ବେକାରୀ ହ୍ରାସ, ରାଜସ୍ବ ବୃଦ୍ଧି, ଖାଦ୍ୟ ବଳକା ରାଜ୍ୟରେ ଓଡ଼ିଶା ପରିଣତ ହୋଇ ମାଇଲଖୁଣ୍ଟ ଛୁଇଁଛି । ରାଜନୈତିକ ସମୀକ୍ଷକ ମଧ୍ୟ ମୁଖ୍ୟମନ୍ତ୍ରୀଙ୍କ ବ୍ୟକ୍ତିତ୍ବକୁ ନେଇ ବିଜେଡି ସାଂଗଠନିକ ସମ୍ପାଦକ ଯାହା କହିଛନ୍ତି ତାହା ଓଡ଼ିଶାର ଦ୍ରୁତ ବିକାଶରୁ ଜଳଜଳ କରି ଅନୁଭବ କରି ହେଉଛି ବୋଲି କହିଛନ୍ତି ।
୨୦୦୦ ମସିହାରୁ ନବୀନ ନିରବ ସାଧକ ଭାବେ ଓଡ଼ିଶାକୁ ବିକାଶକୁ ନୂଆ ପରିଚୟ ଦେଇଛନ୍ତି। ଯେଉଁଥିପାଇଁ ପ୍ରତ୍ୟେକ ନିର୍ବାଚନରେ ଓଡ଼ିଶାବାସୀ ନବୀନଙ୍କୁ ଆର୍ଶୀବାଦ କରି ବିଜୟ ତିଳକ ପିନ୍ଧାଉଛନ୍ତି । ନବୀନଙ୍କ ନିରବ ସାଧାନା ଯୋଗୁଁ ଉନ୍ନତି ପଥେ ଆଗେଇଚାଲିଛି ଓଡ଼ିଶା।
ଆଦିବାସୀ ବହୁଳ କୋରାପୁଟରେ ବଞ୍ଚି ରହିଛି ସଙ୍ଗାତ ପରମ୍ପରା
କୋରାପୁଟ: ଆଜିର ସ୍ବାର୍ଥବାଦୀ ଦୁନିଆରେ ଭାଇ ଭାଇ ମଧ୍ୟରେ ହେଉ କି ଭାଇ ଭଉଣୀ ମଧ୍ଯରେ କିମ୍ବା ବାପା ପୁଅ ମଧ୍ଯରେ ସଂପର୍କ ଭଲ ନଥାଏ । କିନ୍ତୁ ଆମେ ଆଜି ଏମିତି ଏକ ସଂପର୍କ ଦେଖାଇବାକୁ ଯାଉଛୁ ଯାହାକି ଆଜିର ସଭ୍ୟ ସମାଜକୁ ଏକ ବାର୍ତ୍ତା ଦେଉଛି । କୋରାପୁଟରେ ଏମିତି ଦୁଇଟି ଗାଁ ରହିଛି, ଯେଉଁ ଦୁଇ ଗାଁ ମଧ୍ଯରେ ବର୍ଷ ବର୍ଷ ଧରି ଚଳି ଆସିଛି ସଙ୍ଗାତ ପରମ୍ପରା ।
ସଙ୍ଗାତ । ଏହି ଡାକରେ ଯେତିକି ମଧୁରତା, ଭାବନାରେ ସେତିକି ଆତ୍ମୀୟତା । ସାଙ୍ଗଠାରୁ ଅଧିକ ନିଜର, ସ୍ବାର୍ଥ ବିହୀନ ସମ୍ପର୍କର ଆଧାର । ଭାବ ଓ ସୁଖ-ଦୁଃଖର ଆଦାନପ୍ରଦାନ । ବିଶ୍ବାସ ଓ ନିର୍ଭରଶୀଳ ପ୍ରତିଶ୍ରୁତିର ଅନ୍ଯ ଏକ ନାଁ । ହେଲେ ଆଜିର ଡିଜିଟାଲ ଯୁଗରେ ସୋସିଆଲ ମିଡିଆ ଏହି ସମ୍ପର୍କକୁ ବିଗାଡ଼ି ଦେଇଛି । କିନ୍ତୁ ଆଦିବାସୀ ବହୁଳ କୋରାପୁଟ ଜିଲ୍ଲାର ଅଧିବାସୀ ଯେତିକି ବିଶ୍ବାସୀ ସେତିକି ସରଳ । ସେମାନଙ୍କ ପରମ୍ପରାରେ ଏବେବି ବଞ୍ଚି ରହିଛି ଏହି ବିଶ୍ବାସର ରଜ୍ଜୁ । ଆମେ କହୁଛୁ ଗଡପଦର ଓ ଏକମ୍ବା ଗାଁର କଥା । ଏହି ଦୁଇ ଗାଁର ବନ୍ଧୁତା ସମସ୍ତଙ୍କ ପାଇଁ ଉଦାହରଣ ସାଜିଛି । ବାପ ଜେଜେ ଅମଳରୁ ସଙ୍ଗାତ ଗାଁ ଭାବେ ପରିଚିତ । ଯେଉଁଠି ସୁଖଦୁଃଖରେ ଖୋଜାପଡେ ସଙ୍ଗାତକୁ । ଆଉ ସଙ୍ଗାତ ଆସିଲେ ଖୁସି କହିଲେ ନସରେ । ଗୋଡ଼ ଧୋଇ, ପ୍ରଣାମ ଜଣାଇ ସ୍ବାଗତ କରନ୍ତି ପରିବାର ।
ପ୍ରତି ୫ ବର୍ଷରେ ଥରେ ଗଡପଦର ଗାଁରେ ବାଲିଯାତ୍ରା ହୁଏ । ଆଉ ଏହି ଯାତ୍ରାକୁ ସଂଗାତ ଗାଁକୁ ହୁଏ ନିମନ୍ତ୍ରଣ । ଗଡପଦର ଗ୍ରାମବାସୀ ନିମନ୍ତ୍ରଣ ନେଇ ଏକମ୍ବା ପହଞ୍ଚିଲେ ଗ୍ରାମର ଛୋଟ ଠାରୁ ବଡ ଯାଏଁ ଗୋଡ ଛୁଇଁ ପ୍ରଣାମ କରନ୍ତି । ଗୋଡ଼ ଧୋଇ ଦେଇ ନାଚଗୀତରେ ସ୍ବାଗତ କରନ୍ତି । ଆଉ ସଙ୍ଗାତଙ୍କ ନିମନ୍ତ୍ରଣ ପରେ ଯଥାସାଧ୍ୟ ତଥା ଚାଉଳ, ଡାଲି, ପୂଜା ଜିନିଷ ନେଇ ପହଞ୍ଚି ଯାଆନ୍ତି ସଙ୍ଗାତଙ୍କ ଘରେ । ଏପରି ସମ୍ପର୍କ ସତରେ ବିରଳ ।
ରାଜଧାନୀରେ ମାତିଥିଲେ ଫୋରଟ୍ବେଣ୍ଟି ବଣ୍ଟି, ବବଲୀ ଯୋଡ଼ି
ଭୁବନେଶ୍ବର: ରାଜଧାନୀରେ ମାତିଛନ୍ତି ଫୋରଟ୍ବେଣ୍ଟି ବଣ୍ଟି, ବବଲୀ ଯୋଡ଼ି। OLX ରେ କାର୍ ବିକିବାକୁ ବିଜ୍ଞାପନ ଦେଇ ଲୋକଙ୍କୁ ଲଗାଉଛନ୍ତି ଚୁନ । ଗୋଟିଏ ଗାଡିକୁ ବିକ୍ରି କରିବା ନାଁ ରେ ଏକାଧିକ ଲୋକଙ୍କ ଠାରୁ ନେଇଛନ୍ତି ଆଡ଼ଭାନ୍ସ । ଆଡ଼ଭାନ୍ସ ଟଙ୍କା ନେଇଯିବା ପରେ ଆଉ ଦେଉ ନାହାନ୍ତି ଧରାଛୁଆଁ । ଆଡ଼ଭାନ୍ସ ଟଙ୍କା ନେଇ ଅଏସ କରୁଥିଲେ ଏହି ଯୋଡ଼ି। ଠକେଇ ଟଙ୍କାରେ ଗାଡ଼ି ଧରି ବୁଲୁଥିଲେ, ପୁଣି ଖୋଜୁଥିଲେ ନୂଆ ଶିକାର। ଗାଡ଼ି ବିକ୍ରି କରିବେ ବୋଲି ପ୍ରଥମେ OLX ରେ ଗାଡ଼ି ଫଟୋ ସାଙ୍ଗକୁ କମ୍ ଟଙ୍କା ପ୍ରାଇସ ରଖି ବିଜ୍ଞାପନ ଦେଉଥିଲେ। ଗାଡ଼ି କିଣିବାକୁ ଇଚ୍ଛୁକ ଲୋକ ଦିଆ ଯାଇଥିବା ମୋବାଇଲ ନମ୍ବରରେ କଲ କରି ଯୋଗାଯୋଗ କରୁଥିଲେ। କଲ କରି କଥା ହେବା ପରେ ଗ୍ରାହକଙ୍କୁ ଗାଡ଼ି ମଧ୍ୟ ଦେଖାଉଥିଲେ। ଗ୍ରାହକଙ୍କୁ ଗାଡ଼ି ପସନ୍ଦ ହେବା ପରେ ଅଗ୍ରୀମ ଟଙ୍କା ନେଇଯାଉଥିଲେ ଓ ଫେରାର ହୋଇଯାଉଥିଲେ । ଫେରାର ହେବା ପରେ ପୁଣି ସେଇ ସମାନ ଗାଡିକୁ ବିକ୍ରି କରିବାର ବିଜ୍ଞାପନ ଦେଉଥିଲେ । ଠକାମୀର ଶିକାର ହେବା ପରେ ଏହି ଠକ ଯୋଡିକୁ ଧରିବା ପାଇଁ ଯୋଜନା କରିଥିଲେ ଲୋକ। ଠକ ଯୋଡିଙ୍କୁ କାବୁ କରି ବଡ଼ଗଡ଼ ପୋଲିସକୁ ଜିମା ଦେଲେ ଠକାମୀର ଶିକାର ଲୋକ।
କଂଗ୍ରେସରେ ସାମିଲ ହେଲେ ଦାନିଶ ଅଲ୍ଲୀ
ନନ୍ଦିଘୋଷ ବ୍ୟୁରୋ: ନିର୍ବାଚନ ତାରିଖ ଯେତିକି ପାଖଉଛି ନେତାଙ୍କ ଦଳ ବଦଳ ସେତିକି ଘନଉଛି । କିଏ କେଉଁ ଦଳ ଛାଡୁଛି ତ ଆଉ କିଏ କେଉଁ ଦଳରେ ସାମିଲ ହେଉଛି । ତେବେ ଏହି କ୍ରମରେ କଂଗ୍ରେସରେ ସାମିଲ ହୋଇଛନ୍ତି ଅମରୋହାର ଲୋକସଭା ସାଂସଦ ଦାନିଶ ଅଲ୍ଲୀ କଂଗ୍ରେସରେ ସାମିଲ ହୋଇଛନ୍ତି । ଦାନିଶଙ୍କୁ ଗତ ବର୍ଷ ବହୁଜନ ସମାଜ ପାର୍ଟି ଦଳରୁ ବହିସ୍କାର କରିଥିଲା । ତେବେ ସେ କଂଗ୍ରେସରେ ସାମିଲ ହେବେ ବୋଲି ପୂର୍ବରୁ ଅନୁମାନ କରାଯାଉଥିବାବେଳେ ଏବେ ସେ ଦଳରେ ସାମିଲ ହୋଇଛନ୍ତି ।
ଅଦିନିଆ ବର୍ଷାରେ ବେହାଲ ଚାଷୀକୂଳ
ବାଲେଶ୍ବର: ବର୍ଷା ଧୋଇନେଲା ଚାଷୀର ଖୁସି। ଲଘୁଚାପ ଜନିତ ୩ ଦିନ ଧରି ଲଗାଣ ବର୍ଷାରେ ଚାଷୀ କୂଳ ହତାଶ। ବାଲେଶ୍ଵର ଜିଲ୍ଲା ଔପଦା ବ୍ଲକ ତଳକିଆ ପଞ୍ଚାୟତ ମାଟିଗଡା ଓ ପ୍ରତାପପୁର ଗାଁରେ ୧୩ରୁ ଅଧିକ ଚାଷୀ ଚିନ୍ତାରେ। ଋଣ ଆଣି କରିଥିଲେ ଚାଷ। ସରକାରୀ ସହାୟତା ଲୋଡିଛନ୍ତି ଚାଷୀ।
ବର୍ଷା ଧୋଇନେଲା ଚାଷୀର ଖୁସି । ଅଦିନିଆ ବର୍ଷାରେ ବେହାଲ ଚାଷୀକୂଳ । ୩ ଦିନ ଧରି ଚାଲିଥିବା ଲଗାଣ ବର୍ଷାରେ ବ୍ଯାପକ ଫସଲ କ୍ଷୟକ୍ଷତି। ବାଲେଶ୍ଵର ଜିଲ୍ଲା ଔପଦା ବ୍ଲକ ତଳକିଆ ପଞ୍ଚାୟତ ମାଟିଗଡା ଓ ପ୍ରତାପପୁର ଗାଁର ୧୩ରୁ ଅଧିକ ଚାଷୀ ଚିନ୍ତାରେ। ଲଗାଣ ବର୍ଷାରେ ଉଜୁଡିଯାଇଛି କଲରା ,ଜହ୍ନି ,ମକା, କ୍ଯାପସିକମ, ପୋଟଳ ,ମକା ଓ ଟମାଟ ଭଳି ପନିପରିବା। ଋଣ ଆଣି କରିଥିଲେ ଚାଷ। ଏବେ ପରିବାର କିପରି ପ୍ରତିପୋଷଣ କରିବେ ଏବଂ ଋଣ କିପରି ସୁଝିବେ ସେ ନେଇ ଚିନ୍ତାରେ ଚାଷୀକୂଳ।
ଗାଁରେ ଚାଷୀମାନେ ପ୍ରତିବର୍ଷ ପରି କ୍ଷେତରେ ବିଭିନ୍ନ ପନିପରିବା ଚାଷ କରି ନିଜର ପରିବାର ପ୍ରତିପୋଷଣ କରିଥାନ୍ତି । ହେଲେ ଏବେ ଅଦିନିଆ ବର୍ଷାରେ ଫସଲ ଉଜୁଡିଯାଇଛି । ଲଗାଣ ବର୍ଷା ଯୋଗୁଁ କ୍ଷେତରେ ପାଣି ଜମି ରହିଥିବାରୁ ପନିପରିବା ପଚି ନଷ୍ଟ ହେବାକୁ ଲାଗିଛି । ପନିପରିବା ମଧ୍ଯ ବଜାରରେ ବିକ୍ରି ହେଇପାରୁନାହିଁ ।
ଢେଙ୍କାନାଳରେ ଆତଙ୍କ ଖେଳାଇଛି ରେଡ ବ୍ଯାଣ୍ଡ ପୋକ
ଢେଙ୍କାନାଳ: ଢେଙ୍କାନାଳରେ ଆତଙ୍କ ଖେଳାଇଛି ଅଷ୍ଟ୍ରେଲିଆନ ବା ରେଡ ବ୍ଯାଣ୍ଡ ପୋକ। ଚାଷୀଙ୍କ ମୁଣ୍ଡରେ ପଡିଛି ଚଡକ। ଶହ ଶହ ହେକ୍ଟରର ଆମ୍ବ ଚାଷ ନଷ୍ଟ ହେଉଛି। ଆମ୍ବ ଗଛ ଡାଳରୁ ମାଟି ତଳକୁ ଖସିପଡୁଛି। ଔଷଧ ସିଞ୍ଚନ ପରେ ବି ଚାଷୀଙ୍କୁ ମିଳୁନି ସୁଫଳ।
ପୁଣି ଚାଷୀ ମୁଣ୍ଡରେ ଚଡକ। ଆମ୍ବ ଚାଷୀଙ୍କୁ ଘାରିଛି ଅଷ୍ଟ୍ରେଲିଆନ ବା ରେଡ ବ୍ଯାଣ୍ଡ ପୋକ ଭୟ । ଢେଙ୍କାନାଳ ଜିଲ୍ଲାର ଚାଷୀ ହତାଷ। ଶହ ଶହ ହେକ୍ଟର ଆମ୍ବ ଚାଷ ନଷ୍ଟ । ଆରମ୍ଭରୁ ଆମ୍ବ ହେଉଛି ନଷ୍ଟ , ଭିତରୁ ପଚିଯାଉଛି । ନହେଲେ ଆମ୍ବ ଗଛ ଡାଳରୁ ମାଟି ତଳକୁ ଖସିପଡୁଛି ଅବା ହଳଦିଆ ପଡି ଶୁଖିଯାଉଛି । ଔଷଧ ସିଞ୍ଚନ ପରେ ବି ଚାଷୀଙ୍କୁ ମିଳୁନି ସୁଫଳ । ୨୦୨୨ ମସିହାରେ ଉତ୍ତରପ୍ରଦେଶ ଓ ବିହାରରେ ଏହି ପୋକର ସଂକ୍ରମଣ ଦେଖିବାକୁ ମିଳିଥିଲା। ଚଳିତ ବର୍ଷ ଢେଙ୍କାନାଳରେ ପୋକର ସଂକ୍ରମଣ ବ୍ଯାପିବାରେ ଲାଗିଛି । ଯାହାକୁ ଦେଖି ଚାଷୀ ଆତଙ୍କିତ।
ଢେଙ୍କାନାଳ ଜିଲ୍ଲା ଆମ୍ବର ବିଦେଶର ରହିଛି ସ୍ଵତନ୍ତ୍ର ଚାହିଦା । ୧୦ ହେକ୍ଟର ଜମିରେ ଉତ୍ପାଦିତ ହୋଇଥାଏ ୫୦ ମେଟ୍ରିକ ଟନ ଆମ୍ବ । ବିନା ସାର ଓ କୀଟନାଶକ ପ୍ରୟୋଗରେ ଉତ୍ପାଦିତ ଆମ୍ବର ରହିଥାଏ ବେଶ ଚାହିଦା । ଆମ୍ବ ଗୁଡିକୁ ସ୍ଵତନ୍ତ୍ର ପ୍ଯାକେଜ କରି ଦିଲ୍ଲୀ, ଛତିଶଗଡ, କଲିକତା, ବିହାର ,ଉତ୍ତର ପ୍ରଦେଶ ସମେତ ବାହାର ଦେଶ ଦୁବାଇ, ବାଂଲାଦେଶ, ଆମେରିକାକୁ ହୋଇଥାଏ ରପ୍ତାନୀ । ହେଲେ ରେଡ ବ୍ଯାଣ୍ଡ ପୋକ ଚାଷୀଙ୍କ ନିଦ ହଜେଇଦେଇଛି । ଜିଲ୍ଲାରେ ସଂକ୍ରମଣ ରୋକିବା ପାଇଁ ବୈଜ୍ଞାନିକ ମାନଙ୍କ ସହ ଆଲୋଚନା କରିଛନ୍ତି ଜିଲ୍ଲା ଉଦ୍ଯାନ କୃଷି ଉପ ନିର୍ଦ୍ଦେଶକ।