ନନ୍ଦିଘୋଷ ବ୍ୟୁରୋ: ପାକିସ୍ତାନୀ ଏୟାର ହୋଷ୍ଟେସ କାନାଡାରେ ନିଖୋଜ। ପାକିସ୍ତାନ ଇଣ୍ଟରନ୍ୟାସନାଲ ଏୟାରଲାଇନ୍ସର ମରିୟମ ରଜା ନାମକ ଏୟାର ହଷ୍ଟେସ କାନାଡା ଟରୋଣ୍ଟୋ ଅବତରଣ ପରେ ନିଖୋଜ ହୋଇଯାଇଥିବା ଜଣାପଡିଛି। ସେ ଡ୍ୟୁଟିରେ ଥିବାବେଳେ ନିଖୋଜ ହୋଇ ଯାଇଛନ୍ତି। ସୋମବାର ଇସଲାମାବାଦରୁ ପାକିସ୍ତାନର ଏହି ବିମାନ ଉଡାଣ ଭରି ଟରୋଣ୍ଟୋରେ ଅବତରଣ କରିଥିଲା। ତେବେ କରାଚୀ ଅଭିମୁଖେ ବିମାନ ଯାତ୍ରା କରିବା ପୂର୍ବରୁ ଏୟାର ହଷ୍ଟେସ ମରିୟମ ରିପୋର୍ଟ କରିନଥିଲେ। ତାଙ୍କ ହୋଟେଲ ରୁମ ଖୋଲିବା ପରେ କର୍ତ୍ତୃପକ୍ଷ ତାଙ୍କ ୟୁନିଫର୍ମ ଆବିଷ୍କାର କରିଥିଲେ ଯେଉଁଥିରେ ଲେଖାଥିଲା ଧନ୍ୟବାଦ PIA।୧୫ ବର୍ଷ ଧରି ପାକିସ୍ତାନର ଏହି ବିମାନରେ ନିୟୋଜିତ ହୋଇଥିଲେ ମରିୟମ ରଜ୍ଜା।
ଏୟାରଲାଇନ୍ସ ମୁଖପାତ୍ରଙ୍କ ସୂଚନା ଅନୁସାରେ କାନାଡାରେ ପହଞ୍ଚିବା ପରେ ମରିୟମ ହୋଟେଲ ରୁମରୁ କେଉଁଆଡେ ଚାଲି ଯାଇଥିଲେ । ପାକିସ୍ତାନୀ ଇଣ୍ଟରନ୍ୟାସନାଲ ବିମାନର କ୍ରୁ ମେମ୍ବର ନିଖୋଜର ଏହା ଚଳିତ ବର୍ଷ ଦ୍ଵିତୀୟ ଘଟଣା। ଗତ ବର୍ଷ କାନାରେ ୭ ପାକିସ୍ତାନୀ କ୍ରୁ ମେମ୍ବର ନିଖୋଜ ହୋଇଯାଇଥିଲେ। ଅନେକ ସଦସ୍ୟ କାନାଡାରେ ସବୁଦିନ ପାଇଁ ଅବସ୍ଥାପିତ ହୋଇଯାଉଥିବା ଜଣାପଡିଛି। ଭବିଷ୍ୟତରେ ଏଭଳି ଘଟଣାକୁ ରୋକିବା ପାଇଁ PIA ପରିଚାଳନା କାନାଡା କର୍ତ୍ତୃପକ୍ଷଙ୍କ ସହ ସହଯୋଗ କରୁଛିନ୍ତି।
