ନନ୍ଦିଘୋଷ ବ୍ୟୁରୋ: ମୁକେଶ ଅମ୍ବାନୀଙ୍କ ସାନ ପୁଅ ଅନନ୍ତ ଅମ୍ବାନିଙ୍କ ପ୍ରି ୱେଡିଂ । ଦେଶର ସବୁଠାରୁ ବଡ଼ ପ୍ରି ୱେଡିଂକୁ ନେଇ ଖୁବ୍ ଚର୍ଚ୍ଚା ଜୋର ଧରିଛି । ଗୁଜରାଟର ଜାମନଗରରେ ତିନି ଦିନି ଧରି ବଡ଼ କାର୍ଯ୍ୟକ୍ରମ । ଅନନ୍ତ ଅମ୍ବାନିଙ୍କ ପ୍ରି ୱେଡିଂ ଇଭେଣ୍ଟରେ ଯୋଗଦେଲେ ବହୁ ତାରକା । ପ୍ରି ୱେଡିଂରେ ଯୋଗଦେଲେ ଆମେରିକାର ପ୍ରସିଦ୍ଧ ଗାୟିକା ରିହାନା ।ରିହାନା ଏ କାର୍ଯ୍ୟକ୍ରମ ପାଇଁ ୭୦ କୋଟି ଟଙ୍କା ନେଇଥିବା ଚର୍ଚ୍ଚା । ବିଲ୍ ଗେଟ୍ସଙ୍କ ଠାରୁ ଇଭାଙ୍କା ଟ୍ରମ୍ପ ଯାଏଁ ସମସ୍ତେ ଯୋଗ ଦେଇଛନ୍ତି । ମାର୍ଚ୍ଚ ୧ ତାରିଖରୁ ଆରମ୍ଭ ହୋଇଥିଲା ପ୍ରି ୱେଡିଂ ପ୍ରୋଗ୍ରାମ୍ । ଜୁଲାଇ ୧୨ ତାରିଖରେ ରାଧିକା ମର୍ଚ୍ଚାଣ୍ଟଙ୍କୁ ବିବାହ କରିବେ ଅନନ୍ତ । ବଲିଉଡ କଳାକାରଙ୍କଠାରୁ ଆରମ୍ଭ କରି ବିଦେଶରୁ ବଡ଼ ବଡ଼ ସେଲିବ୍ରେଟୀ ଏବଂ ବିଜନେସମ୍ୟାନ ମଧ୍ୟ ଅମ୍ବାନୀଙ୍କ ପୁଅ ବାହାଘରରେ ଯୋଗଦେବାକୁ ପହଞ୍ଚିଛନ୍ତି ।
ମାର୍ଚ୍ଚ ମାସରେ ୧୪ ଦିନ ବନ୍ଦ ରହିବ ବ୍ୟାଙ୍କ
ନନ୍ଦିଘୋଷ ବ୍ୟୁରୋ: ବ୍ୟାଙ୍କରେ ଗୁରୁତ୍ବୁପୂର୍ଣ୍ଣ କାମ ଥିଲେ ତୁରନ୍ତ ସାରିଦେବାକୁ ପରାମର୍ଶ । ମାର୍ଚ୍ଚ ମାସରେ ୧୪ ଦିନ ବନ୍ଦ ରହିବ ବ୍ୟାଙ୍କ । ହୋଲି ଡେ, ସଟର ଡେ’କୁ ମିଶାଇ ୧୪ ଦିନଦ ଛୁଟି ରହୁଛି । ମାର୍ଚ୍ଚରେ ଶିବରାତ୍ରି ସହ ହୋଲି ଛୁଟି ମଧ୍ୟ ରହିଛି । ତେବେ ବିଭିନ୍ନ ରାଜ୍ୟରେ ମଧ୍ୟ ସ୍ଥାନୀୟ ଛୁଟି ରହିଛି । ତେବେ ଆସନ୍ତୁ ନଜର ପକାଇବା ଛୁଟିଗୁଡ଼ିକ ଉପରେ ।
ମାର୍ଚ୍ଚ ୧ରେ ମିଜୋରାମରେ ବ୍ୟାଙ୍କ ବନ୍ଦ ରହିଥିଲା
ମାର୍ଚ୍ଚ ୩ ରବିବାର
ମାର୍ଚ୍ଚ ୮ ମହାଶିବରାତ୍ରି ପାଇଁ ଛୁଟି
ମାର୍ଚ୍ଚ ୯ ଦ୍ବିତୀୟ ଶନିବାର
ମାର୍ଚ୍ଚ ୧୭ ରବିବାର
ମାର୍ଚ୍ଚ ୨୨ ବିହାରରେ ବ୍ୟାଙ୍କ ବନ୍ଦ
ମାର୍ଚ୍ଚ ୨୩ ଚତୁର୍ଥ ଶନିବାର
ମାର୍ଚ୍ଚ ୨୪ ରବିବାର
ମାର୍ଚ୍ଚ ୨୫ ହୋଲି ଛୁଟି
ମାର୍ଚ୍ଚ ୨୬ ଦୋଳ ପୂର୍ଣ୍ଣିମା
ମାର୍ଚ୍ଚ ୨୭ ବିହାରରେ ବ୍ୟାଙ୍କ ବନ୍ଦ
ମାର୍ଚ୍ଚ ୨୯ ଗୁଡ୍ ଫ୍ରାଇଡେ
ମାର୍ଚ୍ଚ ୩୧ ରବିବାର ବ୍ୟାଙ୍କ ଛୁଟି
ରାଜ୍ୟରେ ଆଗକୁ ଆହୁରି ବଢିବ ତାତି
ଭୁବନେଶ୍ବର: ରାଜ୍ୟରେ ହଟ୍ ଓ୍ବେଦର କଣ୍ଡିସନ୍ । ଆଗକୁ ଆହୁରି ବଢିବ ତାତି । ସ୍ବାଭାବିକ ଠାରୁ ୨ ରୁ ୩ ଡିଗ୍ରୀ ପର୍ଯ୍ୟନ୍ତ ଆହୁରି ତାତି ବୃଦ୍ଧି ପାଇବ ବୋଲି ପୂର୍ବାନୁମାନ କରିଛି ଆଞ୍ଚଳିକ ପାଣିପାଗ କେନ୍ଦ୍ର । ବିଶେଷ କରି ଉପକୂଳ ସମେତ ପଶ୍ଚିମ ଓଡ଼ିଶାରେ ଅସମ୍ଭାଳ ହେବ ତାତି । ଆଜି ବାଲେଶ୍ବର, ମୟୁରଭଞ୍ଜ, କେନ୍ଦୁଝର, ସୁନ୍ଦରଗଡ ଏବଂ ଝାରସୁଗୁଡା ଜିଲ୍ଲାର ଗୋଟିଏ ଦୁଇଟି ସ୍ଥାନରେ ହାଲୁକା ବର୍ଷା ଏବଂ କିଛି ସ୍ଥାନରେ ଘଡଘଡି ବିଜୁଳି ସହ ବର୍ଷା ହେବ ବୋଲି ସତର୍କ କରାଇଛି ପାଣିପାଗ କେନ୍ଦ୍ର । ୫ ତାରିଖ ପର୍ଯ୍ୟନ୍ତ ପଶ୍ଚିମା ଝଡ ପ୍ରଭାବରେ ଉତ୍ତର ଓଡ଼ିଶାରେ ହାଲୁକା ବର୍ଷା ନେଇ ଆକଳନ କରାଯାଇଥିବା ବେଳେ ଉପକୂଳ ଏବଂ ଆଭ୍ୟନ୍ତରୀଣ ଓଡ଼ିଶାରେ ତାତିରେ ବ୍ରେକ୍ ଲାଗିବ ନାହିଁ । ତେବେ ଦ୍ବିତୀୟ ସପ୍ତାହ ଶେଷ ବେଳକୁ ରାଜ୍ୟରେ ଗ୍ରୀଷ୍ମ ପ୍ରବାହ ହେବ ବୋଲି ଆକଳନ କରାଯାଇଛି । ଆଇଏମ୍ଡିର ସିଜିନାଲ ଫୋରକାଷ୍ଟ ଅନୁସାରେ ଚଳିତବର୍ଷ ମାର୍ଚ୍ଚ ମାସରୁ ଆରମ୍ଭ କରି ମେ ମାସ ପର୍ଯ୍ୟନ୍ତ ରାଜ୍ୟରେ ଅସମ୍ଭାଳ ତାତି ଅନୁଭୁତ ହେବ । ଏଲନିନୋ ପ୍ରଭାବ ଅଧିକ ରହୁଥିବାରୁ ଅଧିକ ତାତି ଅନୁଭୁତ ହେବ । ଏଥିପାଇଁ ସତର୍କ ରହିବାକୁ ପରାମର୍ଶ ଦିଆଯାଇଛି । ମାର୍ଚ୍ଚ ମାସରେ ପଶ୍ଚିମା ଝଡର ଅଧିକ ପ୍ରଭାବ ରହିଲେ ମଧ୍ୟ ଗ୍ରୀଷ୍ମ ପ୍ରବାହ ଜାରି ରହିବ । ଗତକାଲି ୩୬ ଡିଗ୍ରୀ ଅତିକ୍ରମ କରିଥିଲା ଭୁବନେଶ୍ବର ତାପମାତ୍ରା। ଭୁବନେଶ୍ବରରେ ୩୬.୮ ଡଗ୍ରୀ ତାମପ୍ରାତ୍ରା ରେକର୍ଡ ହୋଇଥିଲା ।
ଆଜି ପାକିସ୍ତାନ ପ୍ରଧାନମନ୍ତ୍ରୀ ନିର୍ବାଚନ
ନନ୍ଦିଘୋଷ ବ୍ୟୁରୋ: ଆଜି ପାକିସ୍ତାନ ପ୍ରଧାନମନ୍ତ୍ରୀ ନିର୍ବାଚନ । ଗତକାଲି ପ୍ରାର୍ଥୀପତ୍ର ଯାଞ୍ଚ ସରିବା ପରେ ଆଜି ହେବ ନିର୍ବାଚନ । ପ୍ରଧାନମନ୍ତ୍ରୀ ପଦବୀ ଲାଗି ପାକିସ୍ତାନ ମୁସଲିମ ଲିଗ-ନଓ୍ବାଜ ଦଳ ପକ୍ଷରୁ ଶେହବାଜ ସରିଫଙ୍କ ନାମ ଘୋଷଣା କରାଯାଇଛି । ୭୨ ବର୍ଷ ବୟସ୍କ ଶେହବାଜ ଜିତିବା ଏକରକମ ନିଶ୍ଚିତ ହୋଇଛି । ତେଣେ ପାକିସ୍ତାନ ତେହରିକ ଇ ଇନସାଫ ସମର୍ଥିତ ସୁନ୍ନି ଇତିହାଦ କାଉନସିଲ ପକ୍ଷରୁ ଓମର ଆୟୁବ ଖାଁଙ୍କ ବି ପ୍ରାର୍ଥୀ କରାଯାଇଛି । ପିଏମଏଲ-ଏନ ପ୍ରାର୍ଥୀଙ୍କୁ ସମର୍ଥନ କରୁଛି ପୂର୍ବତନ ବୈଦେଶିକ ମନ୍ତ୍ରୀ ବିଲାଓ୍ବାଲ ଭୁଟ୍ଟୋ ଜର୍ଦ୍ଦାରୀ ନେତୃତ୍ବାଧୀନ ପାକିସ୍ତାନ ପିପୁଲସ ପାର୍ଟି । ୨୬୫ ଆସନ ବିଶିଷ୍ଟ ନ୍ୟାସନାଲ ଆସେମ୍ବ୍ଲିରେ ମ୍ୟାଜିକ ନମ୍ବର ହେଉଛି ୧୩୩ । ପିଏମଏଲ-ଏନ ୭୫ ଓ ପିପିପି ୫୪ ଆସନ ହାସଲ କରିଛନ୍ତି । ପିଟିଆଇ 93 ଆସନ ଓ ମୁତାହିଦା କ୍ବାମି ମୁଭମେଣ୍ଟ ୧୭ ଆସନ ହାସଲ କରିଛନ୍ତି । ୨୦୨୨ରୁ ୨୦୨୩ ଯାଏ ଶେହବାଜ ସରିଫ ପ୍ରଧାନମନ୍ତ୍ରୀ ଥିବାବେଳେ ୨୦୦୮ରୁ ୨୦୧୩ ଯାଏ ଜର୍ଦ୍ଦାରୀ ଥିଲେ ରାଷ୍ଟ୍ରପତି ।
ଆଜି ଚାଷୀ ଘୋଷଣା କରିବେ ପରବର୍ତ୍ତୀ ଆନ୍ଦୋଳନ ପନ୍ଥା
ନନ୍ଦିଘୋଷ ବ୍ୟୁରୋ: ଦାବି ଶୁଣୁନାହାନ୍ତି କେନ୍ଦ୍ର ସରକାର । ଜିଦରେ ଅଟଳ ଅନ୍ନଦାତା ରବିବାର ଘୋଷଣା କରିବେ ପରବର୍ତ୍ତୀ ଆନ୍ଦୋଳନ ପନ୍ଥା । ଶମ୍ଭୁ ଓ ଖାନାଉରି ସୀମାରୁ ସେମାନେ ହଟିବେ ନାହିଁ ଏବଂ ଅଧିକ ଚାଷୀଙ୍କୁ ଆନ୍ଦୋଳନରେ ସାମିଲ କରିବାକୁ ଯୋଜନା ହୋଇଛି ବୋଲି ସୂଚନା ମିଳିଛି । ଦାବାଓ୍ବାଲିରେ ଚାଷୀମାନେ ବି ଧାରଣାରେ ବସିବେ । ପଞ୍ଜାବର ଭଟିଣ୍ଡାସ୍ଥିତ ବାଲୋ ଗ୍ରାମରେ ଆନ୍ଦୋଳନରେ ପ୍ରାଣ ହରାଇଥିବା ଶୁଭକରଣ ସିଂଙ୍କ ସ୍ମୃତିସଭା ପରେ ପରବର୍ତ୍ତୀ ପଦକ୍ଷେପ ସମ୍ପର୍କରେ ଘୋଷଣା କରାଯିବ ବୋଲି କହିଛନ୍ତି ଚାଷୀ ନେତା ମନଜିତ ସିଂ ରାୟ ଓ ଯଶବିନ୍ଦର ସିଂ ଲଙ୍ଗଓ୍ବାଲ । ଗତ ଫେବୃଆରୀ 21 ତାରିଖରେ ପଞ୍ଜାବ-ହରିଆଣା ସୀମା ଅନ୍ତର୍ଗତ ଖାନାଉରିରେ ଚାଷୀ-ପୋଲିସ ସଂଘର୍ଷରେ ଶୁଭକରଣଙ୍କ ମୃତ୍ଯୁ ଘଟିଥିବାବେଳେ 12 ପୋଲିସ ଆହତ ହୋଇଥିଲେ । ସେପଟେ ଦିଲ୍ଲୀ ଚଲୋ ସ୍ଲୋଗାନରୁ ଚାଷୀମାନେ ହଟିବେ ନାହିଁ ବୋଲି ନେତାମାନେ ସୂଚନା ଦେଇଛନ୍ତି । ଏମଏସପି ସମେତ ଅନ୍ଯାନ୍ୟ ଦାବିରେ ଚାଲିଛି କୃଷକ ଆନ୍ଦୋଳନ ।
ଠେଙ୍ଗାରେ ପିଟି ପିଟି ବାପାକୁ ହତ୍ୟା କଲା ପୁଅ
ଢ଼େଙ୍କାନାଳ: ବାପାକୁ ହତ୍ୟା କଲା ପୁଅ । ଠେଙ୍ଗାରେ ପିଟି ପିଟି ହତ୍ୟା କରିବା ପରେ ଚାଦରରେ ଘୋଡେ଼ଇ ଫେରାର । ହତ୍ୟାର ପ୍ରାୟ ୧୨ ଘଣ୍ଟା ପରେ ଖବର ପାଇ ପୋଲିସ ତଦନ୍ତ ଆରମ୍ଭ କରିଛି । ଏଭଳି ଘଟଣା ଘଟିଛି ଅନୁଗୋଳ ଜିଲ୍ଲା ବନ୍ତଳା ଥାନା ନୂଆଭୂଇଁ ଗାଁରେ । ନୂଆଁଭୁଇଁ ଗାଁର ବଳରାମ ଭୋଇ ଓ ତାଙ୍କ ବାପା ବିପ୍ରବର ଭୋଇ ରହୁଥିଲେ । ଅନେକ ସମୟରେ ଉଭୟଙ୍କ ମଧ୍ଯରେ ଗଣ୍ଡଗୋଳ ହେଉଥିଲା । ଗତକାଲି ସନ୍ଧ୍ୟାରେ ମଧ୍ୟ ବଳରାମ ତାଙ୍କ ବାପାଙ୍କ ସହିତ ଝଗଡ଼ା କରିବା ସହ ମାଡ଼ପିଟି କରିଥିଲେ । ତେବେ ସକାଳୁ ବଳରାମଙ୍କର ଦେଖା ନଥିବା ବେଳେ ବିପ୍ରବରଙ୍କ ମୃତଦେହ ଘର ଭିତରେ ପଡିଥିବା ଗାଁ ଲୋକ ଦେଖିବାକୁ ପାଇଥିଲେ । ପୋଲିସ ପହଞ୍ଚି ତଦନ୍ତ ଆରମ୍ଭ କରିଛି । ସେପଟେ ହତ୍ୟାକାରୀ ପୁଅ ବଳରାମ ଫେରାର ଥିବାରୁ ପୋଲିସ ତାକୁ ଧରିବାକୁ ପ୍ରୟାସ କରୁଛି ।
ପୂର୍ବ ଶତ୍ରୁତାକୁ କେନ୍ଦ୍ରକରି ଦୁଇ ଗୋଷ୍ଠୀ ମୁହାଁମୁହିଁ, ଜଣେ ମୃତ
ବାରିପଦା: ପୂର୍ବ ଶତ୍ରୁତାକୁ କେନ୍ଦ୍ରକରି ଦୁଇ ଗୋଷ୍ଠୀ ମୁହାଁମୁହିଁ । ଜଣେ ମୃତ ଜଣେ ଆହତ । ମୃତ ଯୁବକ ହେଲେ ରାମ ମୁଖୀ । ସାମାନ୍ୟ ବଚସାରୁ ଭୁଜାଲିରେ ହାଣି ଯୁବକକୁ ହତ୍ୟା । ବାରିପଦା ଥାନା ଶୁନଗଡିଆ ମହୁଲି ଭାଟିରେ ଘଟିଛି ହତ୍ୟାକାଣ୍ଡ । ମୃତ ଯୁବକଙ୍କ ପରିବାର ପୋଲିସକୁ ଦାୟୀ କରୁଥିବା ବେଳେ ପୋଲିସ ଘଟଣାସ୍ଥଳରେ ପହଞ୍ଚି ଗଣ୍ଡଗୋଳକୁ ନିୟନ୍ତ୍ରଣ କରିଥିଲା । ଆହତ ଦୀପୁ ମୁଖୀଙ୍କ ଡାକ୍ତରଖାନାରେ ଚାଲିଛି ଚିକିତ୍ସା। ଦୀପୁ ମୁଖୀ ହସ୍ପିଟାଲ ନିକଟରେ ଥିବା ନଦୀକୁ ଗାଧୋଇବାକୁ ଆସିଥିବା ବେଳେ ନିଜର ପର୍ସଟିକୁ ଛାଡି ପଳାଇଥିଲେ । ପର୍ସଟିକୁ ଅନ୍ୟ ଗୋଷ୍ଠୀର କେହି ପାଇଥିବାକୁ କେନ୍ଦ୍ର କରି ଦୁଇ ଗୋଷ୍ଠୀ ମଧ୍ୟରେ ମାରପିଟ୍ ହୋଇଥିଲା । ଏ ସମ୍ପର୍କରେ ଟାଉନଥାନା ରେ ଦୁଇଟି ମାମଲା ରୁଜୁ କରି ପୋଲିସ ଘଟଣାର ତଦନ୍ତ ଚଳାଇଛି । ସେଖ ସମସେଦକୁ ଟାଉନ ପୋଲିସ ଅଟକ ରଖି ତଦନ୍ତ କରୁଛି। ମୃତକ ସମ୍ପର୍କୀୟ ମାନେ ଥାନା ଭିତରକୁ ଧସେଇ ପଶିବାକୁ ଉଦ୍ୟମ କରୁଥିବାରୁ କିଛି ସମୟ ପାଇଁ ଟାଉନଥାନା ସମ୍ମୁଖରେ ଉତ୍ତେଜନା ପରିସ୍ଥିତି ସୃଷ୍ଟି ହୋଇଥିଲା ।
ଗୋଟିଏ ଦିନରେ ୩ ହଜାର ୩୭ କୋଟି ଟଙ୍କାରେ ୫୨ଟି ପ୍ରକଳ୍ପର ଶୁଭାରମ୍ଭ କଲେ ମୁଖ୍ୟମନ୍ତ୍ରୀ
ଭୁବନେଶ୍ବର: ଜଳସେଚନ କ୍ଷେତ୍ରରେ ସୁବର୍ଣ୍ଣ ଅଧ୍ୟାୟ । ଗୋଟିଏ ଦିନରେ ୩ ହଜାର ୩୭ କୋଟି ଟଙ୍କାରେ ୫୨ଟି ପ୍ରକଳ୍ପର ଶୁଭାରମ୍ଭ କରିଛନ୍ତି ମୁଖ୍ଯମନ୍ତ୍ରୀ ନବୀନ ପଟ୍ଟନାୟକ । ଏଥିରେ ୪ଟି ଜିଲ୍ଲାରେ ୧୩୧ କୋଟି ଟଙ୍କା ବ୍ୟୟରେ ୬ଟି ପ୍ରକଳ୍ପର ଉଦ୍ଘାଟନ ହୋଇଥିବା ବେଳେ ୧୫ଟି ଜିଲ୍ଲାରେ ୨୯୦୬ କୋଟି ଟଙ୍କାରେ ୪୬ଟି ପ୍ରକଳ୍ପର ଭିତ୍ତିପ୍ରସ୍ତର ସ୍ଥାପନ କରାଯାଇଛି । ଗୁରୁତ୍ୱପୂର୍ଣ୍ଣ ପ୍ରକଳ୍ପ ମଧ୍ୟରେ ନୟାଗଡର କୁସୁମି ବ୍ୟାରେଜ ଉଦ୍ଘାଟିତ ହୋଇଛି। ୭୦.୮୮ କୋଟି ଟଙ୍କା ବ୍ୟୟରେ ନିର୍ମିତ କୁସୁମୀ ବ୍ୟାରେଜରୁ ଜଳ ଯୋଗାଣ ନିମନ୍ତେ ୧୪୮.୧୭ କୋଟି ଟଙ୍କା ବ୍ୟୟରେ ଭୂତଳ ପାଇପ ଲାଇନ ବଣ୍ଟନ ବ୍ୟବସ୍ଥାର ଭିତ୍ତି ପ୍ରସ୍ତର ସ୍ଥାପନ କରାଯାଇଛି। ଏହା ଦ୍ୱାରା ୯୨୫୪ ଏକର ଜମିକୁ ଜଳସେଚନ ଯୋଗାଇ ଦିଆଯାଇ ପାରିବ ଏବଂ ୩ଟି ବ୍ଲକର ୪୯ଟି ଗ୍ରାମର ୧.୫ଲକ୍ଷ ଲୋକ ଉପକୃତ ହେବେ । ଏହା ସହିତ ୫ଟି କ୍ଷୁଦ୍ର ଜଳସେଚନ ପ୍ରକଳ୍ପର ଜଳକୁ ଭୂତଳ ପାଇପଲାଇନ ଦ୍ୱାରା ବଣ୍ଟନ ବ୍ୟବସ୍ଥାର ଲୋକାର୍ପଣ ମଧ୍ୟ କରାଯାଇଛି।
ହାଡୁଆ ଡ୍ୟାମ ଓ ତା’ର ଭୂତଳ ପାଇପ ଲାଇନ ବଣ୍ଟନ ବ୍ୟବସ୍ଥାର ମଧ୍ୟ ଭିତ୍ତି ପ୍ରସ୍ତର ସ୍ଥାପନ କରିଛନ୍ତି ମୁଖ୍ଯମନ୍ତ୍ରୀ । ଏହାଦ୍ବାରା କଟକ ଜିଲ୍ଲାର ୮୬ ଗ୍ରାମର ୮୯୯୭ ଏକର ଚାଷ ଜମିକୁ ଜଳସେଚନ ଯୋଗାଇବା ସହିତ ୨୯୩ ଗ୍ରାମକୁ ପାନୀୟ ଜଳ ଯୋଗାଣ ହେବ । ଏଥିରୁ ୧ ମେଗାୱାଟର ବିଦ୍ୟୁତ ଉତ୍ପାଦନର ଲକ୍ଷ୍ୟ ରଖାଯାଇଅଛି । ହାଡୁଆ ଡ୍ୟାମ ଓ ତା’ର ଭୂତଳ ପାଇପ ଲାଇନ ବଣ୍ଟନ ବ୍ୟବସ୍ଥାର ବ୍ୟୟ ଅଟକଳ ଯଥାକ୍ରମେ ୨୬୫.୨୪ କୋଟି ଓ ୧୯୫.୮୯ କୋଟି ଟଙ୍କା ରହିଛି । କଟକ ଡିମିରିଆ-ରାଉତପଡା ଅନ୍ତଃନଦୀ ଜଳାଶୟ ପ୍ରକଳ୍ପ, ବୈଦେଶ୍ୱର-ଗୋପିନାଥପୁର ଅନ୍ତଃନଦୀ ଜଳାଶୟ ପ୍ରକଳ୍ପ ଓ ନବରଙ୍ଗପୁର ଫଟକି ଅନ୍ତଃନଦୀ ଜଳାଶୟ ପ୍ରକଳ୍ପ । ଏହିପରି ୩ଟି ଅନ୍ତଃନଦୀ ଜଳାଶୟ ପ୍ରକଳ୍ପ ସହିତ ୩୯ଟି କ୍ଷୁଦ୍ର ଜଳସେଚନ ପ୍ରକଳ୍ପର ଭୂତଳ ପାଇପଲାଇନ ଓ ଅନାନ୍ୟ ପ୍ରକଳ୍ପର ଭିତ୍ତି ପ୍ରସ୍ତର ସ୍ଥାପନ କରାଯାଇଛି। ଚାଷୀର କଲ୍ୟାଣ ଓ କୃଷିର ବିକାଶ ପାଇଁ ସରକାର ସବୁବେଳେ ପ୍ରାଥମିକତା ଦେଇଆସୁଛନ୍ତି ।
ଚାଷୀଙ୍କ ପାଇଁ ବିଭିନ୍ନ କଲ୍ୟାଣମୂଳକ କାର୍ଯ୍ୟକ୍ରମ ଖୁବ୍ ଭଲ କାମ କରୁଛି ବୋଲି ସେ ଜାଣିପାରିଛନ୍ତି । ଗତ କିଛି ଦିନ ଧରି ଓଡିଶାର ବିଭିନ୍ନ ଅଞ୍ଚଳରେ ଛୋଟ ବଡ ଅନେକ ଜଳସେଚନ ପ୍ରକଳ୍ପ ଉଦ୍ଘାଟିତ ହୋଇ ଆସୁଛି। ଏହା ସହିତ ନୂଆ ପ୍ରକଳ୍ପ ପାଇଁ ଭିତ୍ତି ପ୍ରସ୍ତର ମଧ୍ୟ ରଖାଯାଉଛି। ଏହି ସବୁ ପ୍ରକଳ୍ପଗୁଡିକରେ 5T ଉପକ୍ରମ ଅଧିନରେ ଟେକ୍ନୋଲୋଜିର ପ୍ରୟୋଗ କରାଯାଇ ପ୍ରକଳ୍ପଗୁଡିକୁ ତ୍ୱରାନ୍ୱିତ କରାଯାଉଛି। ଭୂତଳ ପାଇପଲାଇନ ଜରିଆରେ ଜଳସେଚନ ଯୋଗୁଁ ବିସ୍ଥାପନ ସମସ୍ୟା ଦୂର ହୋଇଛି ବୋଲି ମୁଖ୍ୟମନ୍ତ୍ରୀ କହିଥିଲେ । ଚାଷୀ ଅର୍ଥନୀତିର ସାରଥି। ସେମାନଙ୍କୁ ସାଥିରେ ଧରି ସରକାର ସବୁବେଳେ ଚାଲିଛନ୍ତି । ସେମାନଙ୍କ ପାଇଁ ସରକାର କାମ କରୁଛନ୍ତି ଓ କରୁଥିବେ ବୋଲି କହିଛନ୍ତି ମୁଖ୍ଯମନ୍ତ୍ରୀ । ଏହି ଅବସରରେ ଉପସ୍ଥିତ ରହି 5T ଅଧ୍ଯକ୍ଷ କାର୍ତ୍ତିକ ପାଣ୍ଡିଆନ କହିଥିଲେ, ମୁଖ୍ୟମନ୍ତ୍ରୀ ଯାହା କହନ୍ତି, ତାହା କରିଥାନ୍ତି । ଜିଲ୍ଲା ଗସ୍ତ ସମୟରେ ଜଳସେଚନ ଉପରେ ଯେଉଁ ସବୁ ପ୍ରସ୍ତାବ ଆସିଥିଲା ସେଥିମଧ୍ୟରୁ ପ୍ରାୟ ୮୦ ପ୍ରତିଶତ ସମାଧାନ ହୋଇ ସାରିଛି ।
ବରମୁଣ୍ଡା ବସ୍ ଟର୍ମିନାଲ ଦେଖିବାକୁ ଲାଗୁଛି ଲୋକଙ୍କ ଭିଡ଼
ଭୁବନେଶ୍ବର: ବାସ୍ତବ ରୂପ ନେଇଛି ରାଜ୍ଯବାସୀଙ୍କ ସ୍ବପ୍ନ । ନବୀନ ଓଡିଶାର ନୂଆ ପ୍ରତୀକ ଭାବରେ ବରମୁଣ୍ଡା ବାବାସାହେବ ଭୀମ ରାଓ ଆମ୍ବେଦକର ଆନ୍ତାରାଜ୍ଯ ବସ ଟର୍ମିନାଲ ଉଦଘାଟନ କରିଛନ୍ତି ମୁଖ୍ଯମନ୍ତ୍ରୀ ନବୀନ ପଟ୍ଟନାୟକ । ରାଜ୍ଯ ତଥା ରାଜ୍ଯ ବାହାରକୁ ଗମାନଗମାନରେ ଏହା ଏକ ନୂତନ ମାଇଲଖୁଣ୍ଟ ହୋଇଛି । ଲୋକାର୍ପଣ ପରେ ବିଶ୍ବସ୍ତରୀୟ ବସ ଟର୍ମିନାଲକୁ ଦେଖିବାକୁ ଲାଗିଛି ଭିଡ଼ । ବୁଲି ଦେଖିବା ସହ ମୋବାଇଲରେ ଫଟୋ ଉଠାଉଛନ୍ତି ଲୋକେ ।
ବସ ଟର୍ମିନାଲ ଦେଉଛି ବିମାନବନ୍ଦରର ଭ୍ରମ । ଦେଖିବାକୁ ଲାଗିଛି ଭିଡ । ସକାଳ ହେଉକି ରାତି ବୁଲିବାର ଲ୍ଯାଣ୍ଡମାର୍କ ସାଜିଛି ବରମୁଣ୍ଡା । କିଏ ଭିଡିଓ କଲ କରି ଦେଖାଉଛି ତ ଆଉ କିଏ ମୋବାଇଲ ଫଟୋ ଉଠାଉଛି । ଇଏ ହେଉଛି ବାବାସାହେବ ଭୀମ ରାଓ ଆମ୍ବେଦକରଙ୍କ ଗ୍ଯାଲେରୀ । ଦେଶ ପାଇଁ ତାଙ୍କର ଅବଦାନକୁ ସମ୍ମାନ, ତାଙ୍କର ଜୀବନ ଓ ଆଦର୍ଶ ଆଧାରରେ ତିଆରି ହୋଇଛି ଗ୍ଯାଲେରୀ । ସେହିପରି ବସକୁ ଅପେକ୍ଷା କରିବା ସମୟରେ ଆପଣଙ୍କୁ ଆଉ ବୋର ହେବାକୁ ପଡିବ ନାହିଁ । ଟର୍ମିନାଲରେ କାହାଣୀ ଓ ଗଳ୍ପ ପଢିବା ପାଇଁ ରହିଛି ବୁକ ଷ୍ଟଲ୍ । ଛୋଟ ପିଲାଙ୍କ ପାଇଁ ଶିଶୁ କ୍ରୀଡାଙ୍ଗନା ଜୋନ । ଯେଉଁଠି ଖେଳୁଛନ୍ତି ପିଲାଏ । ଯେ କେହି ବି ବୁଲି ଦେଖିଲା ପରେ କହୁଛନ୍ତି, ସତରେ ବିମାନବନ୍ଦର ପରି ହୋଇଛି ବସ ଟର୍ମିନାଲ । ମୁଖ୍ଯମନ୍ତ୍ରୀ ନବୀନ ପଟ୍ଟନାୟକ ଓ 5T ଅଧ୍ଯକ୍ଷ କାର୍ତ୍ତିକ ପାଣ୍ଡିଆନଙ୍କୁ ପ୍ରଂଶାସ କରୁଛନ୍ତି ସଭିଏଁ ।
ରାଜ୍ୟର ବରମୁଣ୍ଡା ବସ ଟର୍ମିନାଲରେ ଆହାର ପ୍ଳସ କେନ୍ଦ୍ରରେ ବି ଲାଗିଛି ଭିଡ଼ । ଚକାଚକ୍ ଡାଇନିଂ ଟେବୁଲ ସାଙ୍ଗକୁ ଆଲୋକୀକରଣ । ଯିଏ ବି ବୁଲିବାକୁ ଆସୁଛନ୍ତି ଆହର କେନ୍ଦ୍ର ଦେଖି ତାଜୁବ ହେଉଛନ୍ତି । ୫ ଟଙ୍କା ପେଟ ପୁରା ଖାଇବା ସାଙ୍ଗକୁ ଷ୍ଟାର ହୋଟେଲର ଅନୁଭୂତି ମିଳୁଛି । ଯେଉଁଠି ଲାଗିଛି ଲମ୍ବା ଲାଇନ । ଯାତ୍ରୀମାନେ ପ୍ରଥମେ ଟିକେଟ୍ କାଉଣ୍ଟରରୁ ଟିକେଟ୍ କାଟିବା ପରେ ଶୀତତାପ ନିୟନ୍ତ୍ରିତ କୋଠରିରେ ବସି ଖାଉଛନ୍ତି । ୫ ଟଙ୍କାରେ ଭାତ, ଡାଲେମା ଓ ଆଚାର । ସୁଲଭ ମୂଲ୍ୟରେ ସୁସ୍ବାଦୁ ଖାଦ୍ୟ ଯୋଗାଇ ଦେବାକୁ ସରକାର ଆହାର ପ୍ଲସ୍ ପ୍ଲସ୍ କେନ୍ଦ୍ର ଖୋଲିଛନ୍ତି । ପ୍ରତ୍ୟେକ ଦିନ ସକାଳ ୧୧ ଟାରୁ ଅପରାହ୍ନ ୩ଟା ଏବଂ ରାତି ୭ଟାରୁ ୯ ପର୍ଯ୍ଯନ୍ତ ଏଠାରେ ମିଳିବ ଆହାର । ସେହିଭଳି ମିଶନ ଶକ୍ତି, ମିଲେଟ୍, ଓଟିଡିସି ଓ ଓରମାସ୍ କାଫେରେ ମଧ୍ଯ ଭିଡ଼ ଜମୁଛି । ବିଶେଷକରି ମାଣ୍ଡିଆ ଲଡୁ, ବିସ୍କୁଟ୍ ଓ ମାଣ୍ଡିଆରେ ପ୍ରସ୍ତୁତ ବିଭିନ୍ନ ଖାଦ୍ୟ ସାମଗ୍ରୀ କିଣୁଛନ୍ତି ଲୋକେ । ଏହାସହ ଓଟିଡିସି ଆଉଟଲେଟରେ କାକରା ପିଠା ଓ ବିଭିନ୍ନ ପ୍ରକାର ଗାଉଁଲି ଖାଦ୍ୟ ପାଇଁ ଭିଡ଼ ଜମିଥିଲା ।
ଆଉ ରକ୍ତ ପାଇଁ ଯାଉନି କାହାରି ଜୀବନ, ରାଜ୍ୟରୁ ଦୂର ହେଉଛି ରକ୍ତ ଅଭାବ ସମସ୍ୟା
କଟକ: ରାଜ୍ୟରୁ ଦୂର ହେଉଛି ରକ୍ତ ଅଭାବ ସମସ୍ୟା । ରାଜ୍ଯ ସରକାରଙ୍କ ଉଦ୍ଯମରୁ ଏବେ ରକ୍ତ ଭଣ୍ଡାରରେ ସହଜରେ ମିଳିଯାଉଛି ରକ୍ତ । ଆଉ ଆଗ ଭଳି ରକ୍ତ ଅଭାବ ପାଇଁ ଯାଉନି ଜୀବନ । ମୁଖ୍ୟମନ୍ତ୍ରୀଙ୍କ ଆହ୍ବାନ କ୍ରମେ ଜୀବନ ବିନ୍ଦୁ କାର୍ଯ୍ୟକ୍ରମ ମଧ୍ୟରେ ସବୁ ବର୍ଗର ଲୋକେ ସ୍ଵଚ୍ଛାକୃତ ଭାବେ ରକ୍ତ ଦେଇ ଅନ୍ୟର ଜୀବନ ବଞ୍ଚାଇବାକୁ ଆଗେଇ ଆସୁଛନ୍ତି । ଏଥିପାଇଁ ରାଜ୍ୟ ସରକାର ଓ ଓଡ଼ିଶା ମୋ ପାରିବାରର ସଦସ୍ୟଙ୍କୁ କୃତଜ୍ଞତା ଜଣାଉଛନ୍ତି ରୋଗୀ ଓ ତାଙ୍କ ସମ୍ପର୍କୀୟ ।
ଦୂର ହୋଇଛି ରାଜ୍ଯର ରକ୍ତ ସମସ୍ଯା । ଆଉ ରକ୍ତ ପାଇଁ ଯାଉନି କାହାରି ଜୀବନ । ରକ୍ତ ଭଣ୍ଡାରରେ ମହଜୁଦ ରହିଛି ରକ୍ତ । ବର୍ଷକୁ ପାଖାପାଖି କଟକ ସେଣ୍ଟ୍ରାଲ ରେଡକ୍ରସ ବ୍ଲଡ ବ୍ୟାଙ୍କ ପାଇଁ ଏକ ଲକ୍ଷରୁ ଅଧିକ ୟୁନିଟ୍ ରକ୍ତ ଆବଶ୍ୟକ ରହୁଛି । ଏହି ବ୍ଲଡ ବ୍ୟାଙ୍କ୍ ଉପରେ କଟକ ବଡ ମେଡିକାଲ୍, କ୍ୟାନ୍ସସର୍ ମେଡିକାଲ , ଶିଶୁ ଭବନ ସହ କଟକ ଭୁବନେଶ୍ବର ଢେଙ୍କାନାଳ, ଭଦ୍ରକ, ଯାଜପୁରର ବିଭିନ୍ନ ସରକାରୀ ଓ ଘରୋଇ ମେଡିକାଲ ନିର୍ଭର କରନ୍ତି । ରାଜ୍ୟର ସବୁ ଜିଲ୍ଲାରେ ଥିବା ଥାଲାସେମିଆ ରୋଗୀ ମଧ୍ଯ କଟକ ରେଡକ୍ରସ ବ୍ଲଡ ବ୍ୟାଙ୍କ ଉପରେ ନିର୍ଭର କରନ୍ତି । ୨ ହଜାରରୁ ଉର୍ଦ୍ଧ୍ବ ଥାଲାସେମିଆ ରୋଗୀ ଏଠାରେ ପଞ୍ଜୀକୃତ ଅଛନ୍ତି । ଦିନଥିଲା ରକ୍ତର ଅଭାବ ସମସ୍ତଙ୍କ ପାଇଁ ସମସ୍ଯା ସୃଷ୍ଟି କରିଥିଲା । ହେଲେ ଏବେ ମୁଖ୍ଯମନ୍ତ୍ରୀଙ୍କ ଆହ୍ବାନ କ୍ରମେ ସ୍ବଚ୍ଛାକୃତ ଭାବେ ରକ୍ତଦାନ କରୁଛନ୍ତି ଲୋକ । ୭୦ ପ୍ରତିଶତ ରୋଗୀ ବିନା ଡୋନରରେ ରକ୍ତ ପାଉଛନ୍ତି । ଏଥିପାଇଁ ରାଜ୍ଯ ସରକାର ଓ ଓଡ଼ିଶା ମୋ ପରିବାରକୁ ଧନ୍ଯବାଦ ଜଣାଉଛନ୍ତି ରୋଗୀ ଓ ତାଙ୍କ ସମ୍ପର୍କୀୟ ।
ପ୍ରତିଦିନ ଜୀବନ ବିନ୍ଦୁ କାର୍ଯ୍ୟକ୍ରମ ଜରିଆରେ ରକ୍ତ ସଂଗ୍ରହ ହେଉଛି । ଏଥିପାଇଁ ଓଡ଼ିଶା ମୋ ପାରିବାର ପ୍ରଥମ ସ୍ଥାନ ଅଧିକାର କରି ପୁରସ୍କୃତ ମଧ୍ଯ ହୋଇଛି । ଏବେ ଆମ ରାଜ୍ୟରୁ କୋଲକାତା, ଝାଡ଼ଖଣ୍ଡ, ବିହାରକୁ ରକ୍ତ ପଠାଯାଇ ପାରୁଛି । ଖାଲି ରକ୍ତ ନୁହେଁ ରକ୍ତ ପ୍ୟାଟିଲେଟ ମଧ୍ଯ ରୋଗୀଙ୍କୁ ଉପଲବଧ ହେଉଛି । ଏଥିପାଇଁ ବଞ୍ଚି ଯାଉଛି ଅନେକ ଅମୂଲ୍ଯ ଜୀବନ ।