ଆନନ୍ଦପୁର: ହଦଗଡ଼ ହସ୍ତୀ ଅଭୟାରଣ୍ୟରୁ ହାତୀ ଛୁଆର ମୃତଦେହ ଉଦ୍ଧାର । ହାତୀ-ହାତୀଙ୍କ ମଧ୍ୟରେ ସଂଘର୍ଷରୁ ଛୁଆ ହାତୀଟିର ମୃତ୍ୟୁ ଘଟିଥିବା ବନ ବିଭାଗ ଅଧିକାରୀଙ୍କ ସୂଚନା । ମୃତ ହାତୀ ଛୁଆର ବୟସ ୫ରୁ ୬ ବର୍ଷ ହେବା । ଘଟଣା ସ୍ଥଳରେ ଏକାଧିକ ହାତୀ ଅନେକ ସମୟ ଧରି ରହିଥିଲେ । ତେବେ ମୃତ୍ୟୁର କାରଣ ନେଇ ତଦନ୍ତ ଜାରି ରହିଛି ।
ଇବ ନଦୀରୁ ମିଳିଲା ତୃତୀୟ ମୃତଦେହ
ସୁନ୍ଦରଗଡ଼: ଇବ ନଦୀରେ ଗୋଟାଏ ପରିବାରର ତିନି ଜଣ ବୁଡି ନିଖୋଜ ଘଟଣା । ମିଳିଲା ତୃତୀୟ ମୃତଦେହ । ପୂର୍ବରୁ ଦୁଇ ଜଣଙ୍କ ମୃତଦେହ ଉଦ୍ଧାର କରାଯାଇଥିଲା । ମୃତକମାନେ ହେଲେ ମହମ୍ମଦ ରିଜୱାନ, ମହମ୍ମଦ ଫରହାନ ଏବଂ ମହମ୍ମଦ ସାହିଦ ।
ଗତକାଲି ଇବ୍ ନଦୀକୁ ଗାଧୋଇବାକୁ ଯାଇଥିବା ବେଳେ ୩ ଜଣ ବୁଡ଼ି ଯାଇଥିଲେ । ତିନି ଜଣଙ୍କୁ ଉଦ୍ଧାର କରିବାକୁ ସମ୍ବଲପୁର, ଝାରସୁଗୁଡା ଓ ସୁନ୍ଦରଗଡ଼ ଅଗ୍ନିଶମ ବାହିନୀର ଟିମ୍ ସାମିଲ ହୋଇଥିଲେ । ଏହି ଘଟଣାକୁ ନେଇ ସୁନ୍ଦରଗଡରେ ଶୋକାକୁଳ ପରିବେଶ ସୃଷ୍ଟି ହୋଇଛି ।
ଅଣ ଅନୁଦାନପ୍ରାପ୍ତ ବେସରକାରୀ ଶିକ୍ଷାନୁଷ୍ଠାନର ବ୍ଲକ ଗ୍ରାଣ୍ଟ କର୍ମଚାରୀଙ୍କ ସାମୟିକ ଛୁଟି ୧୫ ଦିନ ବଢ଼ିଲା
ଭୁବନେଶ୍ବର: ଅନୁଦାନପ୍ରାପ୍ତ ଶିକ୍ଷାନୁଷ୍ଠାନ କର୍ମଚାରୀଙ୍କ ପରେ ଅଣ ଅନୁଦାନପ୍ରାପ୍ତ ବେସରକାରୀ ଶିକ୍ଷାନୁଷ୍ଠାନର ବ୍ଲକ ଗ୍ରାଣ୍ଟ କର୍ମଚାରୀଙ୍କ ସାମୟିକ ଛୁଟି ୧୫ ଦିନ ବଢ଼ାଇଛନ୍ତି ରାଜ୍ୟ ସରକାର । ଏନେଇ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କରିଛନ୍ତି ଘୋଷଣା । ମହିଳା କର୍ମଚାରୀଙ୍କ ପାଇଁ ୧୮୦ ଦିନର ମାତୃତ୍ୱ ଛୁଟି ବ୍ୟବସ୍ଥା କରାଯାଇଛି । ୧୬ ବର୍ଷ ପରେ ଉଚ୍ଚତର ବେତନ ହାର ସ୍ତରରେ ମିଳିବ ପ୍ଲେସମେଣ୍ଟ ସ୍କେଲ ସୁବିଧା । ସେହିପରି ଅନୁକମ୍ପାମୂଳକ ସହାୟତା ରାଶିରେ ବୃଦ୍ଧି କରିଛନ୍ତି ମୁଖ୍ୟମନ୍ତ୍ରୀ । ଏହାଦ୍ବାରା ୧୭ ହଜାର ୫ ଶହ କର୍ମାଚରୀ ଉପକୃତ ହେବେ । 5T ଅଧ୍ୟକ୍ଷ କାର୍ତ୍ତିକ ପାଣ୍ଡିଆନଙ୍କ ଜିଲ୍ଲା ଗସ୍ତ ସମୟରେ ମିଳିଥିଲା ପ୍ରସ୍ତାବ ।
ସେହିପରି ମୁଖ୍ୟମନ୍ତ୍ରୀ ବିଭିନ୍ନ ବ୍ଲକ ଗ୍ରାଣ୍ଟ ଅନୁଦାନ ପରିସରଭୁକ୍ତ ବ୍ଲକ ଗ୍ରାଣ୍ଟ କର୍ମଚାରୀଙ୍କ ପାଇଁ ସେବା ସମୟରେ ମୃତ୍ୟୁବରଣ କିମ୍ବା ସ୍ଥାୟୀ ଅକ୍ଷମତା କ୍ଷେତ୍ରରେ ଅନୁକମ୍ପାମୂଳକ ସହାୟତା (Ex-Gratia) ରାଶି ଯଥାକ୍ରମେ ୨ ଲକ୍ଷରୁ ୫ ଲକ୍ଷ ଟଙ୍କାକୁ ଓ ୧.୫୦ ଲକ୍ଷରୁ ୩.୫୦ ଲକ୍ଷ ଟଙ୍କାକୁ ବୃଦ୍ଧି କରିଛନ୍ତି ।
ଇତି ମଧ୍ଯରେ କ୍ଯାବିନେଟ, ବେସରକାରୀ ଅନୁଦାନପ୍ରାପ୍ତ ଉଚ୍ଚତର ଶିକ୍ଷା ଅନୁଷ୍ଠାନରେ କାର୍ଯ୍ୟ କରୁଥିବା ବ୍ଲକ ଗ୍ରାଣ୍ଟ କର୍ମଚାରୀଙ୍କୁ ଷାଠିଏ ବର୍ଷ ବୟସରେ ସେବା ନିବୃତ୍ତି ସମୟରେ ଏକକାଳୀନ ରାଶି ଭାବରେ ଶିକ୍ଷକ ଓ ଅଣଶିକ୍ଷକ କର୍ମଚାରୀଙ୍କ ଯଥାକ୍ରମେ ୧୯ ଲଧ ଓ ୫ ଲକ୍ଷ ପ୍ରଦାନ ପାଇଁ ନିଷ୍ପତ୍ତି ହୋଇଛି ।
5T ତଥା ନବୀନ ଓଡିଶା ଅଧ୍ୟକ୍ଷ କାର୍ତ୍ତିକ ପାଣ୍ଡିଆନଙ୍କ ଜିଲ୍ଲାଗସ୍ତ ସମୟରେ ବିଭିନ୍ନ ଅଞ୍ଚଳରେ ବ୍ଲକ ଗ୍ରାଣ୍ଟ କର୍ମଚାରୀ ଓ ସେମାନଙ୍କ ସଂଘ ପକ୍ଷରୁ ଏ ବିଷୟରେ ପ୍ରସ୍ତାବ ଆସିଥିଲା । ଏ ବିଷୟରେ ଆଲୋଚନା ପରେ ମୁଖ୍ୟମନ୍ତ୍ରୀ ସେମାନଙ୍କ ଏହି ପ୍ରସ୍ତାବ ବିଷୟରେ ନିଷ୍ପତ୍ତି ନେଇଛନ୍ତି । ମୁଖ୍ୟମନ୍ତ୍ରୀଙ୍କ ଏହି ନିଷ୍ପତ୍ତି ଅନୁଯାୟୀ ପ୍ରାୟ ୧୭ ହଜାର ୫୦୦ କର୍ମଚାରୀ ଉପକୃତ ହେବେ ।
୧୫ ଦିନ ବଢ଼ିଲା ଅନୁଦାନପ୍ରାପ୍ତ ଶିକ୍ଷାନୁଷ୍ଠାନ କର୍ମଚାରୀଙ୍କ ସାମୟିକ ଛୁଟି
ଭୁବନେଶ୍ବର: ଅନୁଦାନପ୍ରାପ୍ତ ଶିକ୍ଷାନୁଷ୍ଠାନ କର୍ମଚାରୀଙ୍କ ପାଇଁ ଖୁସି ଖବର । ୧୫ ଦିନ ସାମୟିକ ଛୁଟି ବଢ଼ାଇଲେ ରାଜ୍ୟ ସରକାର । ମହିଳା କର୍ମଚାରୀଙ୍କ ପାଇଁ ସବୈତନିକ ପ୍ରସୂତିକାଳୀନ ଛୁଟି ବଢ଼ିଲା । ଉପକୃତ ହେବେ ୩୩ ହଜାର ୪୨୦ କର୍ମଚାରୀ । 5T ଅଧ୍ୟକ୍ଷଙ୍କ ଜିଲ୍ଲା ଗସ୍ତ ସମୟରେ ମିଳିଥିଲା ପ୍ରସ୍ତାବ ।
ରାଜ୍ୟର ସମସ୍ତ ନୂତନ ଅନୁଦାନ ପ୍ରାପ୍ତ ଶିକ୍ଷାନୁଷ୍ଠାନର କର୍ମଚାରୀଙ୍କ ପାଇଁ ବର୍ଷକୁ ୧୫ ଦିନ ସାମୟିକ ଛୁଟି ଓ ମହିଳା କର୍ମଚାରୀଙ୍କ ପାଇଁ ସବୈତନିକ ପ୍ରସୂତିକାଳୀନ ଛୁଟି ଘୋଷଣା କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ।
5T ତଥା ନବୀନ ଓଡିଶା ଅଧ୍ୟକ୍ଷ କାର୍ତ୍ତିକ ପାଣ୍ଡିଆନଙ୍କ ଜିଲ୍ଲା ଗସ୍ତ ସମୟରେ ବିଭିନ୍ନ ଅଞ୍ଚଳରେ ଅନୁଦାନପ୍ରାପ୍ତ ଶିକ୍ଷାନୁଷ୍ଠାନର କର୍ମଚାରୀ ଓ ସେମାନଙ୍କ ସଂଘ ପକ୍ଷରୁ ଏ ନେଇ ପ୍ରସ୍ତାବ ଦିଆଯାଇଥିଲା । ମୁଖ୍ୟମନ୍ତ୍ରୀଙ୍କୁ ଏନେଇ ଅବଗତ କରାଯିବା ପରେ ଏହାକୁ ସେ ମଞ୍ଜୁରୀ ଦେଇଛନ୍ତି ।
ବଢୁଛି ପାରଦ, ଆଜିଠୁ ପ୍ରବଳ ତାତି
ଭୁବନେଶ୍ବର: ରାଜ୍ୟରେ ତାତି ବଢ଼ିବାରେ ଲାଗିଛି । ଆଜିଠୁ ହେବ ପ୍ରବଳ ଖରା । ସ୍ବାଭାବିକ ଠାରୁ ୪ରୁ ୬ ଡିଗ୍ରୀ ବଢିବ ତାପମାତ୍ରା । ତିନି ଦିନ ଲାଗି ରହିବ ହଟ୍ ଓ୍ବେଦର କଣ୍ଡିସନ୍ । ୪୦ ଡିଗ୍ରୀ ଛୁଇଁପାରେ ତାପମାତ୍ରା । ଉପକୂଳ ଅପେକ୍ଷା ଆଭ୍ୟନ୍ତରୀଣ ଓଡ଼ିଶାରେ ଅସମ୍ଭାଳ ହେବ ସ୍ଥିତି ।
ପାଣିପାଗ କେନ୍ଦ୍ରର ପୂର୍ବାନୁମାନ ଅନୁସାରେ ୧୧, ୧୨ ଓ ୧୩ ତାରିଖରେ ସବୁଠୁ ଅଧିକ ଖରା ହେବ । କଟକ, ଭୁବନେଶ୍ବର ସମେତ ସୁନ୍ଦରଗଡ, ଝାରସୁଗୁଡା, ସମ୍ବଲପୁର, ପାରଳାଖେମୁଣ୍ଡି, ଟିଟିଲାଗଡ, ଭବାନୀପାଟଣା, ମାଲକାନଗିରି ଓ ନୟାଗଡ ଭଳି ସହରରେ ତାପମାତ୍ରା ୪୦ ଡିଗ୍ରୀ କିମ୍ବା ତା’ଠାରୁ ଅଧିକ ରହିପାରେ ବୋଲି ଆକଳନ କରାଯାଇଛି । ରାଜ୍ୟରେ ପଶ୍ଚିମା ଝଡ ପ୍ରଭାବରେ ଲାଗି ରହିଥିବା ମେଘୁଆ ପାଗ ଧିରେ ଧିରେ ବଦଳିଛି । ଦକ୍ଷିଣ ଓଡ଼ିଶା ଓ ଏହାର ଆଖପାଖରେ ସୃଷ୍ଟି ହୋଇଥିବା ଘୂର୍ଣ୍ଣିବଳୟ ବି ଦୁର୍ବଳ ହୋଇଛି । ପ୍ରଭାବରେ ରାଜ୍ୟର ଅଧିକାଂଶ ଜିଲ୍ଲାରେ ପାଗ ମୁଖ୍ୟତଃ ଶୁଖିଲା ରହିବା ସହ ତାତି ବଢିବ ବୋଲି ପୂର୍ବାନୁମାନ କରିଛି ଆଞ୍ଚଳିକ ପାଣିପାଗ କେନ୍ଦ୍ର ।
୧୪ ତାରିଖରେ ରାଜ୍ୟରେ ପୁଣି ସକ୍ରିୟ ହେବ ପଶ୍ଚିମା ଝଡ । ପ୍ରଭାବରେ ୧୬ ତାରିଖ ପର୍ଯ୍ୟନ୍ତ ଉତ୍ତର ଆଭ୍ୟନ୍ତରୀଣ ଓଡ଼ିଶାର ବାଲେଶ୍ବର, ଭଦ୍ରକ, କେନ୍ଦୁଝର, ମୟୂରଭଞ୍ଜ, ସୁନ୍ଦରଗଡ, ଝାରସୁଗୁଡା, ଢେଙ୍କାନାଳ ଓ ଯାଜପୁରରେ ହାଲୁକା ବର୍ଷା ହେବାର ସମ୍ଭାବନା ରହିଛି । ବାକି ଜିଲ୍ଲାରେ ପାଗ ଶୁଖିଲା ରହିବ ।
ଆଜି ଚାଷୀ କରିବେ ଦେଶବ୍ୟାପୀ ରେଳରୋକ ଆନ୍ଦୋଳନ
ନୂଆଦିଲ୍ଲୀ: ନ୍ଯାଯ୍ୟ ଦାବିରେ ଆଜି ଚାଷୀ କରିବେ ଦେଶବ୍ଯାପୀ ରେଳରୋକ ଆନ୍ଦୋଳନ । ଦେଶର ବିଭିନ୍ନ ଭାଗରେ ଶତାଧିକ କୃଷକ ସଂଗଠନ କରିବେ ପ୍ରତିବାଦ । ଦିନ ୧୨ଟାରୁ ଅପରାହ୍ଣ ୪ଟା ଯାଏଁ ରେଳରୋକ କରାଯିବ । ଉତ୍ପାଦିତ ଫସଲର ସର୍ବନିମ୍ନ ସହାୟକ ମୂଲ୍ଯ ଲାଗି ଆଇନଗତ ଗ୍ଯାରେଣ୍ଟି, ସ୍ବାମୀନାଥନ କମିଶନ ସୁପାରିସ କାର୍ଯ୍ୟକାରୀ, ବିଦ୍ୟୁତ ଦେୟ ନ ବଢାଇବା, ୬୦ ବର୍ଷରୁ ଅଧିକ ଚାଷୀ ଓ କୃଷି ଶ୍ରମିକଙ୍କୁ ମାସିକ ୧୦ ହଜାର ଟଙ୍କାର ପେନସନ, ଚାଷୀଙ୍କ ଉପରୁ ଋଣ ଛାଡ଼, ୨୦୨୦-୨୧ରେ ଲଖିମପୁର ଖେରି ହିଂସା ଘଟଣାରେ ପୀଡିତଙ୍କୁ ନ୍ୟାୟ ଆଦି ଦାବି ନେଇ ଚାଲିଛି ଆନ୍ଦୋଳନ ।
ଆସନ୍ତା ୧୪ ତାରିଖରେ ମହାପଞ୍ଚାୟତ ଡାକରା ଦେଇଛି ସଂଯୁକ୍ତ କିଶାନ ମୋର୍ଚ୍ଚା । ଗତ ଫେବୃଆରୀ ୧୩ ତାରିଖରୁ ସଂଯୁକ୍ତ କୃଷକ ମୋର୍ଚ୍ଚାର ଆହ୍ବାନରେ ଚାଷୀ ଆନ୍ଦୋଳନ କରୁଛନ୍ତି । ବିବାଦର ସମାଧାନ ନେଇ କେନ୍ଦ୍ର ସରକାର ବାରମ୍ବାର ଆଲୋଚନା ପରେ ମଧ୍ଯ ସମାଧାନର ବାଟ ବାହାରି ପାରିନାହିଁ ।
ପୂର୍ବ ଶତ୍ରୁତାରୁ ଯୁବକଙ୍କୁ ହତ୍ୟା
ବୋଲଗଡ଼: ଖୋର୍ଦ୍ଧା ଜିଲ୍ଲା ବୋଲଗଡ଼ ଥାନା ନୟାପଲ୍ଲୀ ଗାଁରେ ହତ୍ୟାକାଣ୍ଡ । ପୂର୍ବ ଶତ୍ରୁତାରୁ ଜଣେ ଯୁବକଙ୍କୁ ହତ୍ୟା କରାଯାଇଥିବା ଅଭିଯୋଗ । ମୃତକ ଜଣଙ୍କ ହେଲେ ଶିବ ନାୟକ । ସେ ଜଣେ କବାଡିଆ ବେପାରୀ । ଖବର ପାଇ ଘଟଣାସ୍ଥଳରେ ପୋଲିସ ପହଞ୍ଚି ମୃତଦେହ ଜବତ କରି ଅଭିଯୁକ୍ତକୁ ଅଟକ ରଖିଛି ।
ଘଟଣା ସ୍ଥଳରେ ବୋଲଗଡ଼ ପୋଲିସ ପହଞ୍ଚି ତଦନ୍ତ ଆରମ୍ଭ କରାଯାଇଛି । ଖୋର୍ଦ୍ଧା ଏସପି ଓ ଏସଡିପିଓ ଘଟଣା ସ୍ଥଳକୁ ଯାଉଛନ୍ତି । ପରିବାର ଲୋକେ ଏପର୍ଯ୍ୟନ୍ତ ଘଟଣାକୁ ନେଇ ଏତଲା ଦେଇନାହାନ୍ତି ।
୪୦ ଫୁଟ୍ ଗଭୀର ବୋରଓ୍ବେଲରେ ଫସିଛି ଶିଶୁ, ଉଦ୍ଧାର କାର୍ଯ୍ୟ ଜାରି
ନୂଆଦିଲ୍ଲୀ: ପୁଣି ବୋରଓ୍ବେଲ ଟ୍ରାଜେଡି । ଦିଲ୍ଲୀରେ ଏକ ବୋରଓ୍ବେଲରେ ଫସିଛି ଜଣେ ଶିଶୁ । ୪୦ ଫୁଟ ଭିତରେ ଚାଲିଛି ଜୀବନ ମରଣର ସଂଗ୍ରାମ । କେଶୋପୁର ମଣ୍ଡି ନିକଟ ଜଳବୋର୍ଡ ପ୍ଲାଣ୍ଟ ନିକଟରେ ଘଟିଛି ଅଘଟଣ । ପୀଡ଼ିତଙ୍କୁ ସୁରକ୍ଷିତ ଭାବେ ଉଦ୍ଧାର ପାଇଁ ଉଦ୍ୟମ ଜାରି ରହିଛି । ରେସକ୍ୟୁ ଅପରେସନରେ ଲାଗିଛନ୍ତି ଅଗ୍ନିଶମ ବାହିନୀ, ଏନଡିଆରଏଫ ଓ ପୋଲିସ । ବୋରଓ୍ବେଲରେ ପଡ଼ିଥିବା ପୀଡ଼ିତ ଶିଶୁ ବୋଲି କୁହା ଯାଉଥିବା ବେଳେ କିଛି ଲୋକ ଜଣେ ବ୍ୟକ୍ତି ବୋଲି କହୁଛନ୍ତି । ତେବେ ବୋରଓ୍ବେଲରେ ଶିଶୁ ନା ବଡ଼ ଲୋକ ପଡ଼ିଛନ୍ତି ତାହା ବର୍ତ୍ତମାନ ସୁଦ୍ଧ ସ୍ପଷ୍ଟ ହୋଇପାରିନି ।
ଦିଲ୍ଲୀ ପୋଲିସ ଅନୁସାରେ ରବିବାର ରାତି ପ୍ରାୟ ଗୋଟାଏ ୧୫ରେ ପିସିଆର କଲ୍ ଆସିଥିଲା । ଜଳବୋର୍ଡ କର୍ମଚାରୀ କହିଥିଲେ, କେହି ଜଣେ ଚୋରି କରିବାକୁ ଆସି ବୋରଓ୍ବେଲରେ ପଡି ଯାଇଛନ୍ତି । ବୋରଓ୍ବେଲରେ ପଡିଥିବା ବ୍ୟକ୍ତି କିଏ ସେ ସମ୍ପର୍କରେ ଜାଣିବାକୁ ଚେଷ୍ଟା କରାଯାଉଥିବା ପୋଲିସ କହିଛି ।
ଘଟଣାରେ ଜଳବୋର୍ଡର ଅବହେଳା ସାମ୍ନାକୁ ଆସିଛି । ପ୍ରଥମେ ପାଇପ୍ ଦ୍ବାରା ବ୍ୟକ୍ତି ଜଣଙ୍କୁ ଉଦ୍ଧାର କରିବାକୁ ଚେଷ୍ଟା କରାଯାଇଥିଲା, ଯାହା ସଫଳ ହୋଇ ନଥିଲା । ଏବେ ବୋରଓ୍ବେଲ ପାଖରେ ଆଉ ଏକ ଗାତ ଖୋଳାଯାଉଛି । ଯେଉଁଥିରେ ପଡ଼ିଥିବା ଲୋକକୁ ଉଦ୍ଧାର କରାଯାଇପାରିବ ।
ନିର୍ବାଚନ କମିଶନର ଅରୁଣ ଗୋଏଲଙ୍କ ଇସ୍ତଫା, କଂଗ୍ରେସ ପଚାରିଲା ନିର୍ବାଚନ ଲଢ଼ିବ କି ?
ନୂଆଦିଲ୍ଲୀ: ଲୋକସଭା ନିର୍ବାଚନ ତାରିଖ ଘୋଷଣା ପୂର୍ବରୁ ଇସ୍ତଫା ଦେଇଛନ୍ତି ନିର୍ବାଚନ କମିଶନର ଅରୁଣ ଗୋଏଲ । ୪୫ ମାସ ପୂର୍ବରୁ ଗୋଏଲ ଇସ୍ତଫା ଦେଇଛନ୍ତି ଗୋଏଲ । ୨୦୨୭ ଡିସେମ୍ବର ୫ରେ ତାଙ୍କ କାର୍ଯ୍ୟକାଳ ସରୁଥିଲା । ଆସନ୍ତା ବର୍ଷ ସେ ମୁଖ୍ୟ ନିର୍ବାଚନ କମିାନର ହୋଇଥାନ୍ତେ । ଗତ ଫେବୃଆରୀରେ ଅନୁପ ଚନ୍ଦ୍ର ପାଣ୍ଡେ ଅବସର ନେଇଥିବା ବେଳେ ଏବେ ଅରୁଣ ଇସ୍ତଫା ଦେଇଛନ୍ତି । ତିନି ଜଣିଆ ନିର୍ବାଚନ ଆୟୋଗରେ ଏବେ ମାତ୍ର ଜଣେ ମୁଖ୍ୟ ନିର୍ବାଚନ କମିଶନର ରାଜୀବ କୁମାର ଅଛନ୍ତି ।
ତେବେ ଗୋଏଲଙ୍କ ଇସ୍ତଫାକୁ ନେଇ ପ୍ରଶ୍ନ ଉଠାଇଛି କଂଗ୍ରେସ । ବରିଷ୍ଠ କଂଗ୍ରେସ ନେତା ଜୟରାମ ରମେଶ କହିଛନ୍ତି ନିର୍ବାଚନ କମିଶନର ପଦରୁ ଅରୁଣ ଗୋଏଲଙ୍କ ଇସ୍ତଫା ୩ଟି ପ୍ରଶ୍ନ ଛିଡ଼ା କରୁଛି ।
ଜୟରାମ ପଚାରିଛନ୍ତି, କ’ଣ ମୁଖ୍ୟ ନିର୍ବାଚନ କମିଶନର ନା ମୋଦି ସରକାର ସହ ମତଭେଦ କାରଣରୁ ଇସ୍ତଫା ଦେଇଛନ୍ତି ? କ’ଣ ସେ ନିଜସ୍ବ କାମ ପାଇଁ ଇସ୍ତଫା ଦେଇଛନ୍ତି ? କ’ଣ ସେ କୋଲକାତା ହାଇକୋର୍ଟ ବିଚାରପତିଙ୍କ ପରି ବିଜେପି ଟିକେଟରୁ ନିର୍ବାଚନ ଲଢ଼ିବାକୁ ଇସ୍ତଫା ଦେଇଛନ୍ତି ?
ସେହିପରି କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖଡଗେ ସୋସିଆଲ ମିଡିଆ ଏକ୍ସରେ ପୋଷ୍ଟ କରି ଲେଖିଛନ୍ତି, ନିର୍ବାଚନ ଆୟୋଗ ନା ନିର୍ବାଚନ ଭୁଲ ? କିଛି ଦିନ ପରେ ସାଧାରଣ ନିର୍ବାଚନ ପାଇଁ ତାରିଖ ଘୋଷଣା ହେବାକୁ ଥିବା ବେଳେ ଏବେ ଭାରତରେ ଜଣେ ନିର୍ବାଚନ କମିଶନର ଅଛନ୍ତି । ଯଦି ସ୍ବତନ୍ତ୍ର ସଂସ୍ଥାରେ ବ୍ୟବସ୍ଥିତ ବିନାଶ ବନ୍ଦ କରାନଯାଏ ତେବେ ଏକଛତ୍ରବାଦ ଲୋକତନ୍ତ୍ରକୁ ନିଜ ଅକ୍ତିଆରକୁ ନେଇଯିବ ।
ବାରହା ଆକ୍ରମଣରେ ବୃଦ୍ଧ ଗୁରୁତର, ମେଡିକାଲରେ ଭର୍ତ୍ତି
ଦାରିଙ୍ଗବାଡି: ବାରହା ଆକ୍ରମଣରେ କନ୍ଧମାଳ ଜିଲ୍ଲା ଦାରିଙ୍ଗବାଡି ବ୍ଲକ ସରୁଲାଇ ଗାଁର ଜଣେ ବୃଦ୍ଧ ଗୁରୁତର । ଆହତ ବ୍ୟକ୍ତି ହେଲେ ଗାଟିସା ପ୍ରଧାନ ।ତାଙ୍କୁ ବାଲିଗୁଡ଼ା ଉପଖଣ୍ଡ ଚିକିତ୍ସାଳୟରେ ଭର୍ତ୍ତି କରାଯାଇଛି ।
ଖରା ଦିନିଆ ଧାନ ଚାଷ ପାଇଁ ପ୍ରତିଦିନ ଭଳି ଗତକାଲି ବିଲକୁ କାମ କରିବାକୁ ଯାଇଥିଲେ ଗାଟିସା । ହେଲେ ସେଠାରେ ଏକ ବାରହା ହଠାତ୍ ତାଙ୍କୁ ଆକ୍ରମଣ କରିଥିଲା । ଗାଟିସା ଚିତ୍କାର କରିବାରୁ ଆଖପାଖରେ ଥିବା ଲୋକେ ଧାଇଁ ଆସିବାରୁ ବାରହାଟି ପଳାଇଥିଲା । ଗାଟିସାଙ୍କ ଦୁଇ ଗୋଡ଼, ଜଙ୍ଘ ଓ ବାମ ହାତରେ କ୍ଷତ ହୋଇଥିବା ଜଣାପଡ଼ିଛି ।