ଆଜି ହେଉଛି NEET UG 2026 ପରୀକ୍ଷା। NTA ଦ୍ଵାରା ଭାରତର ୫୫୨ଟି ସହର ଓ ବିଦେଶର ୧୪ଟି ସହରରେ ଏହି ପରୀକ୍ଷା ହେଉଛି। ସାରା ଦେଶରେ ପ୍ରାୟ ୨୨ ଲକ୍ଷ ୮୦ ହଜାର ପିଲା ପରୀକ୍ଷା ଦେଉଛନ୍ତି। ଅପରାହ୍ନ ୨ଟାରୁ ସନ୍ଧ୍ୟା ୫ଟା ପର୍ଯ୍ୟନ୍ତ ପରୀକ୍ଷା ହେବ। ଗାଇଡଲାଇନ ଅନୁସାରେ ପ୍ରାର୍ଥୀମାନଙ୍କୁ ଅପରାହ୍ନ ୧ ଟା ପରେ ପରୀକ୍ଷା କେନ୍ଦ୍ରରେ ପ୍ରବେଶ କରିବାକୁ ଅନୁମତି ଦିଆଯିବ ନାହିଁ। ସେମାନେ ୧୧ଟାରୁ ୧୨ଟା ୩୦ ଭିତରେ ପହଞ୍ଚିବା ଦରକାର ବୋଲି କୁହାଯାଇଛି। ଏହି ସମୟରେ ପହଞ୍ଚିଲେ ସବୁପ୍ରକାର ଚେକିଙ୍ଗ କରାଯାଇ ପରୀକ୍ଷା କେନ୍ଦ୍ର ମଧ୍ୟକୁ ଯାଇପାରିବେ। ସାଢ଼େ ଗୋଟାଏ ପରେ ପରୀକ୍ଷା ହଲକୁ ଅନୁମତି ନାହିଁ। NEET UG 2026 ଆବେଦନକାରୀମାନେ ପରୀକ୍ଷା କେନ୍ଦ୍ରକୁ କୌଣସି ପ୍ରତିବନ୍ଧିତ ଜିନିଷ ଆଣିବା ଉପରେ କଟକଣା ଜାରି କରାଯାଇଛି। ଯେକୌଣସି ଅନିୟମିତତାକୁ ରୋକିବା ଏବଂ ପରୀକ୍ଷାର ନିରପେକ୍ଷ ପରିଚାଳନା ସୁନିଶ୍ଚିତ କରିବା ପାଇଁ ନିର୍ଦ୍ଦେଶ ଜାରି କରାଯାଇଛି।

ଭୁବନେଶ୍ଵର ଶିଖରଚଣ୍ଡୀ ଅଞ୍ଚଳର ଏକ ଘରୋଇ ଇଞ୍ଜନିୟରିଂ କଲେଜ ହଷ୍ଟେଲରୁ ଛାତ୍ରଙ୍କ ମୃତଦେହ ଠାବ। ସେ ଆତ୍ମହତ୍ଯା କରିଥିବାର ଅଭିଯୋଗ ହୋଇଛି। ମୃତ ଛାତ୍ର ହେଲେ ମୟୂରଭଞ୍ଜ ଜିଲ୍ଲାର ବିଶ୍ୱାସ ସ୍ୱାଇଁ। ଛାତ୍ରଙ୍କ ମୃତ୍ୟୁକୁ ନେଇ କ୍ୟାମ୍ପସ ଅଶାନ୍ତ। ପିଲାମାନେ ହଙ୍ଗାମା କରିବା ସହିତ ଭଙ୍ଗାରୁଜା କରିଥିବା ବି ଜଣାପଡ଼ିଛି। ଅଭିଯୋଗ ହୋଇଛି ସେହି ଛାତ୍ରଙ୍କୁ ରାଗିଂ କରାଯାଇଥିଲା। ତେଣୁ ସେ ଆତ୍ମହତ୍ଯା କରିଛନ୍ତି। ଏହାକୁ କ୍ୟାମ୍ପସରେ ଦେଖା ଦେଇଥିଲା ଉତ୍ତେଜନା। ଭୁବନେଶ୍ୱର ଡିସିପି ଘଟଣାସ୍ଥଳରେ ପହଞ୍ଚି ଉତ୍ୟକ୍ତ ଛାତ୍ରଙ୍କୁ ବୁଝାସୁଝା କରିଛନ୍ତି। ଇନ୍ଫୋସିଟି ଥାନା ପୋଲିସ ମୃତଦେହକୁ ବ୍ୟବଚ୍ଛେଦ ପାଇଁ ପଠାଇଛି । ଏକ ଅପମୃତ୍ୟୁ ମାମଲା ରୁଜୁ କରିଛି। ସହପାଠୀଙ୍କ ବୟାନ ରେକର୍ଡ କରିଛି । ଯାହାର ବି ଦୋଷ ତ୍ରୁଟି ଥିବ, ତାକୁ ତଦନ୍ତ ପରିସରଭୁକ୍ତ କରାଯିବ ବୋଲି ସୂଚନା ଦେଇଛନ୍ତି ଭୁବନେଶ୍ୱର ଡିସିପି।
ସେପଟେ ପରିବାର ଲୋକେ ପହଞ୍ଚିବା ପରେ କଲେଜ କର୍ତ୍ତୃପକ୍ଷଙ୍କ ବିରୋଧରେ ଆଣିଛନ୍ତି ସଙ୍ଗିନ ଅଭିଯୋଗ । ପୁଅକୁ ରାଗିଂ କରାଯାଉଥିଲା । ଏ ସଂପର୍କରେ ସେ ପରିବାରକୁ ଜଣାଇଥିଲା। ସିନିୟରଙ୍କ ଭୟରେ ସେ କ୍ୟାଣ୍ଟିନକୁ ବି ଆସୁନଥିଲା। ରାତିରେ ଛତୁଆ ପିଇ ରହୁଥିଲା ବୋଲି କାନ୍ଦି କାନ୍ଦି କହିଛନ୍ତି ମୃତ ଛାତ୍ରଙ୍କ ବାପା ଓ ମା’ । ତେବେ ରାଗିଂ ଅଭିଯୋଗ ର ସତ୍ୟତା ନଥିବା କହିଛନ୍ତି କଲେଜ କର୍ତ୍ତୃପକ୍ଷ ।

ଓମଫେଡ୍ କ୍ଷୀର ରେଟ୍ ବଢ଼ିଲା । ଲିଟର ପିଛା ୪ ଟଙ୍କା ବୃଦ୍ଧି । ଓମଫେଡ୍ ପକ୍ଷରୁ ଏହି ସୂଚନା ଦିଆଯାଇଛି। ଟୋନଡ କ୍ଷୀର ଦାମ ଏବେ ଲିଟର ପିଛା ୫୪ ଟଙ୍କା ହୋଇଛି। ସେହିପରି ପ୍ରିମିୟମ କ୍ଷୀର ଲିଟର ପିଛା ୫୮ ଟଙ୍କା ହୋଇଥିବା ବେଳେ ଗୋଲ୍ଡ ପ୍ରିମିୟମ ପ୍ଲସ୍ କ୍ଷୀର ୬୪ ଟଙ୍କା ହୋଇଛି। ସେହିପରି ଗୋଲ୍ଡ ପ୍ରିମିୟମ କ୍ଷୀର ଲିଟର ପିଛା ୬୦ ଟଙ୍କା ହୋଇଛି। ସେପଟେ ଓଡି଼ଶା ଦୁଗ୍ଧ ଚାଷୀ ମହାସଂଘର ଅଧ୍ୟକ୍ଷ ରବି ବେହେରା କହିଛନ୍ତି, ଏହି ୪ ଟଙ୍କା ମଧ୍ୟରୁ ୨ ଟଙ୍କା ଦୁଗ୍ଧ ଚାଷୀଙ୍କୁ ମିଳିବା ଉଚିତ। କାରଣ ଗୋ -ଖାଦ୍ୟ, ଔଷଧ, ଇଞ୍ଜେକ୍ସନ ଦର ହୁ ହୁ ହୋଇ ବଢୁଛି। ଗୋଖାଦ୍ୟ ଦର ସରକାର ନିୟନ୍ତ୍ରଣ କରିବା ଦରକାର ଓ ଗାଈଗୋରୁଙ୍କ ଚିକିତ୍ସା ପାଇଁ ଆୟୁଷ୍ମାନ ଭାରତ ଭଳି ଏକ ସ୍ବାସ୍ଥ୍ୟ ବୀମା ଲାଗୁ କରିବାକୁ ଓଡିଶା ଦୁଗ୍ଧ ଚାଷୀ ମହାସଂଘ ଦାବି କରୁଛି।

ରାଜ୍ୟରେ ଆସନ୍ତା ୯ ତାରିଖ ଯାଏଁ ରହିବ କାଳବୈଶାଖୀର ପ୍ରଭାବ । କାଳବୈଶାଖୀ ଯୋଗୁ ଆସନ୍ତା ଦୁଇ ଦିନ ମଧ୍ୟରେ ୨ ରୁ ୩ ଡିଗ୍ରୀ ତାପମାତ୍ରା ହ୍ରାସ ହେବାର ସମ୍ଭାବନା ରହିଛି । ରାଜ୍ୟରେ ଆଜି ମଧ୍ୟ କାଳବୈଶାଖୀ ନେଇ ସତର୍କତା ଜାରି ହୋଇଛି । ରାଜ୍ୟରେ ଅଧିକାଂଶ ଜିଲ୍ଲାରେ ବିଜୁଳି ଘଡଘଡି ସହ ବର୍ଷା ହେବାକୁ ଥିବାବେଳେ ପବନର ବେଗ ୪୦ ରୁ ୫୦ କିଲୋମିଟର ଯାଏଁ ରହିପାରେ। ଆସନ୍ତା ୨୪ ଘଣ୍ଟା ପାଇଁ ୨୭ ଜିଲ୍ଲାକୁ ଜାରି ହୋଇଛି ୟେଲୋ ଆଲର୍ଟ । ମୟୂରଭଂଜ, କେନ୍ଦୁଝର, ବାଲେଶ୍ୱର, ସୁନ୍ଦରଗଡ଼, କଟକ, ଖୋର୍ଦ୍ଧା, ପୁରୀ, ଗଞ୍ଜାମ,ଗଜପତି, ରାୟଗଡ଼ା, କୋରାପୁଟ, ମାଲକାନଗିରି,କଳାହାଣ୍ଡି,କନ୍ଧମାଳ ଜିଲ୍ଲାରେ ବିଜୁଳି ଘଡଘଡି ସହ ପବନ ୪୦ ରୁ ୫୦ କିମି ବେଗରେ ବହିବାର ସମ୍ଭାବନା ରହିଥିବାରୁ ଏହି ସବୁ ଜିଲ୍ଲା ଗୁଡ଼ିକୁ ୟେଲୋ ଆଲର୍ଟ ଜାରି କରିଛି ପାଣିପାଗ କେନ୍ଦ୍ର। ଲୋକମାନଙ୍କୁ ସତର୍କ ରହିବାକୁ ଓ ବର୍ଷା ସମୟରେ ସୁରକ୍ଷିତ ସ୍ଥାନକୁ ଯିବାକୁ ପାଣିପାଗ ବିଭାଗ ପରାମର୍ଶ ଦେଇଛି ପାଣିପାଗ କେନ୍ଦ୍ର ।

ମାଲକାନଗିରି ଚିତ୍ରକୋଣ୍ଡା ଅଞ୍ଚଳରୁ ୧୦୦ କୋଟି ଟଙ୍କାର ଗଂଜେଇ ତେଲ ସାମଗ୍ରୀ ଜବତ। ୮୦୦ ଲିଟର ଗଂଜେଇ ତେଲ ତିଆରି ସାମଗ୍ରୀ ଜବତ ହୋଇଛି। ଏହା ସହିତ ୫୦ କେଜି ଗଂଜେଇ ବି ଜବତ ହୋଇଛି। ପୋଲିସ କହିଛି, ଏସବୁର ମୂଲ୍ୟ ୧୦୦ କୋଟି ଟଙ୍କା ହେବ। ପୋଲିସକୁ କିଛି ଦିନ ତଳେ ଖବର ମିଳିଥିଲା ଯେ, ଏହି ଅଞ୍ଚଳରେ ଗଂଜେଇ ତେଲ ପ୍ରସ୍ତୁତ କରାଯାଉଛି। ବହୁ ସ୍ଥାନରେ ଚଢ଼ାଉ ପରେ ବି ପୋଲିସ କିଛି ଧରିପାରିନଥିଲା। କାରଣ ଏହା ଥିଲା ମୋବାଇଲ ୟୁନିଟ। ଏକ ଗାଡ଼ିରେ ଏହି ୟୁନିଟ ଥିଲା। ଆଜି ସକାଳେ ଚିତ୍ରକୋଣ୍ଡା SDPO ପ୍ରଦୋଷ ପ୍ରଧାନଙ୍କ ନେତୃତ୍ୱରେ ଏକ ବିଶେଷ ଟିମ୍ ଏସାର୍ ଛକ ନିକଟରେ ଏକ ସନ୍ଦେହଜନକ ଗାଡ଼ିକୁ ଅଟକାଇ ତଲାସି କରିବା ବେଳେ ଗଂଜେଇ ତେଲ ପ୍ରସ୍ତୁତ କରୁଥିବା ମୋବାଇଲ୍ ମାନୁଫାକ୍ଚରିଂ ୟୁନିଟ୍ ଜବତ ହୋଇଛି। ତେବେ ଡ୍ରାଇଭର ଫେରାର ହୋଇଯାଇଛି।