ଭୁବନେଶ୍ବର: ବିଧାନସଭାରେ ଆଜି ବି ହଟ୍ଟଗୋଳ । ଗୃହ ଆରମ୍ଭରୁ ରାଜ୍ୟପାଳଙ୍କ ପୁଅ ଆଇନକୁ ହାତକୁ ନେଇଥିବା ପ୍ରସଙ୍ଗ ଉଠାଇଲେ ବିରୋଧୀ ଦଳ ଉପନେତା ପ୍ରସନ୍ନ ଆଚାର୍ଯ୍ୟ । ନିଜ ଆସନରେ ଠିଆ ହୋଇ ବିଜେଡି ବିଧାୟକ ପ୍ରତିବାଦ କରିଥିଲେ । ପ୍ରସଙ୍ଗକୁ ନେଇ କକ୍ଷ ତ୍ଯାଗ କରିଛି ବିଜେଡି।
ସେପଟେ ଗୃହ ମଧ୍ୟ ଭାଗରେ କେନ୍ଦ୍ର ଅବହେଳା ପ୍ରସଙ୍ଗ ଉଠାଇ କଂଗ୍ରେସ ହଟ୍ଟଗୋଳ କରିଛି । ଡବଲ ଇଞ୍ଜିନ ସରକାର ଓଡ଼ିଶା ପ୍ରତି ପକ୍ଷପାତିତା କରିଥିବା ଅଭିଯୋଗ ଆଣିଛି କଂଗ୍ରେସ । ଏହା ଓଡ଼ିଶା ଜନତାଙ୍କ ପ୍ରତି ଅପମାନ ବୋଲି କଂଗ୍ରେସ କରିଛି । ହଙ୍ଗାମା ପରେ ଗୃହକୁ ସାଢ଼େ ୧୧ଟା ଯାଏ ମୁଲତବୀ କରିଛନ୍ତି ବାଚସ୍ପତି ।
ନୂଆଦିଲ୍ଲୀ: ମଙ୍ଗଳବାର ଅର୍ଥମନ୍ତ୍ରୀ ନିର୍ମଳା ସୀତାରମଣ ବଜେଟ୍ ଉପସ୍ଥାପନ କରିଛନ୍ତି। ବଜେଟରେ ସେ ତିନୋଟି କ୍ୟାନସର ଔଷଧ ଉପରେ କଷ୍ଟମ ଡ୍ୟୁଟି ହଟାଇବାକୁ ଘୋଷଣା କରିଛନ୍ତି। ଅର୍ଥମନ୍ତ୍ରୀ କହିଛନ୍ତି ଯେ ଏହି ଔଷଧରେ କଷ୍ଟମ ଡ୍ୟୁଟି ଛାଡ କର୍କଟ ରୋଗରେ ପୀଡିତ ରୋଗୀଙ୍କ ପାଇଁ ସଞ୍ଜିବନୀ ସଦୃଶ ହେବ । ବଜାରରେ ମିଳୁଥିବା କ୍ୟାନସର ଔଷଧରେ କେତେ ରିହାତି ମିଳିବ? କେଉଁ କର୍କଟ ରୋଗରେ ଏହି ଔଷଧର ବ୍ୟବହାର ହେବ ଓ ଏହା କେତେ ଶସ୍ତା ହେବ ଏସବୁ ଜାଣନ୍ତୁ ।
ତିନୋଟି କ୍ୟାନସର ଔଷଧ ଉପରେ କଷ୍ଟମ ଡ୍ୟୁଟି ଛାଡ କରାଯାଇଛି। ସେମାନଙ୍କ ମଧ୍ୟରେ ପ୍ରଥମ ଔଷଧ ହେଉଛି ଟ୍ରେଷ୍ଟୁଜୁମାବ ଡେରକ୍ସଟେକନ୍ । ଏହା ଏକ ଆଣ୍ଟିବଡି ଔଷଧ ଯାହା HER2- ପଜିଟିଭ ସ୍ତନ କର୍କଟ ଚିକିତ୍ସାରେ ବ୍ୟବହୃତ ହୁଏ । ସ୍ତନ କର୍କଟ ଶରୀରର ଅନ୍ୟ ଅଙ୍ଗକୁ ବ୍ୟାପିଗଲେ ଏହା ବ୍ୟବହୃତ ହୁଏ । ଏହି ଔଷଧ ଗ୍ୟାଷ୍ଟ୍ରିକ୍ କର୍କଟରେ ମଧ୍ୟ ବ୍ୟବହୃତ ହେଉଛି ।
ଦ୍ୱିତୀୟ ଔଷଧର ନାମ ହେଉଛି Osimertinib । ଫୁସଫୁସ କର୍କଟ (NSCLC) ର ଚିକିତ୍ସା ପାଇଁ ଏହା ଏକ ଥେରାପି । ତୃତୀୟ ଔଷଧର ନାମ ହେଉଛି ଡ୍ୟୁରୱେଲୁମୈବ । ଏହା ଏକ ଇମ୍ୟୁନୋଥେରାପି ଔଷଧ ଯାହାକି PD-L1 ପ୍ରୋଟିନକୁ ଅବରୋଧ କରି କାର୍ଯ୍ୟ କରିଥାଏ, ଯାହା ପ୍ରତିରକ୍ଷା ପ୍ରଣାଳୀ କର୍କଟ କୋଷ ଉପରେ ଆକ୍ରମଣ କରିବାରେ ସାହାଯ୍ୟ କରିଥାଏ । ଏହାର ବ୍ୟବହାର ଛୋଟ ଛୋଟ କୋଷ ଫୁସଫୁସ କର୍କଟ (NSCLC) ରେ ବ୍ୟବହୃତ ହୁଏ ।
ସି.କେ ବିର୍ଲା ହସ୍ପିଟାଲର ସର୍ଜିକାଲ୍ ଅଙ୍କୋଲୋଜି ବିଭାଗର ନିର୍ଦ୍ଦେଶକ କହିଛନ୍ତି ଯେ କଷ୍ଟମ୍ ଡ୍ୟୁଟିରେ ଛାଡ ହେତୁ ଏହି ଔଷଧ ୧୦ ରୁ ୨୦ ପ୍ରତିଶତ ଶସ୍ତା ହୋଇପାରେ। ଉଦାହରଣ ସ୍ୱରୂପ, ଯଦି ଜଣେ ବ୍ୟକ୍ତି ଟ୍ରେଷ୍ଟୁଜୁମାବ ଡେରକ୍ସଟେକନ୍ର ଏକ ଡୋଜ ୨ ଲକ୍ଷ ଟଙ୍କାରେ କିଣୁଥିଲେ, ତେବେ କଷ୍ଟମ ଡ୍ୟୁଟି ହଟାଇବା ପରେ ଏହାର ମୂଲ୍ୟ ୧ ଲକ୍ଷ ୬୦ ହଜାର ଟଙ୍କା ପର୍ଯ୍ୟନ୍ତ ପଡିବ । ଅନ୍ୟାନ୍ୟ ସମାନ ଔଷଧର ମୂଲ୍ୟ ମଧ୍ୟ ହ୍ରାସ ପାଇବ । ଯଦିଓ ପ୍ରକୃତ ମୂଲ୍ୟ ହ୍ରାସ ପ୍ରଚଳିତ କଷ୍ଟମ୍ ଡ୍ୟୁଟି ହାର ଏବଂ ଆମଦାନୀ କର ପରି ଅନ୍ୟାନ୍ୟ ଆନୁସଙ୍ଗିକ ଖର୍ଚ୍ଚ ଉପରେ ନିର୍ଭର କରିବ । କିନ୍ତୁ କଷ୍ଟମ୍ ଡ୍ୟୁଟି ହଟାଇବା ପରେ କର୍କଟ ରୋଗୀଙ୍କ ଉପରେ ଆର୍ଥିକ ବୋଝ ହ୍ରାସ ପାଇବ।
ଯାଜପୁର : ଯାଜପୁରରେ ଶୌଚ ହେବାକୁ ଯାଇ କେନାଲ ଭାସିଗଲେ ନାବାଳକ । ନିଖୋଜ ନାବାଳକ ହେଲେ ଖଇରାବାଦ୍ ଗାଁର ରମେଶ ଚନ୍ଦ୍ର ସାହୁଙ୍କ ୮ ବର୍ଷର ପୁଅ ବିଶ୍ଵରଞ୍ଜନ ସାହୁ । ଦୀର୍ଘ୍ ସମୟ ପରେ ବିଶ୍ଵରଞ୍ଜନଙ୍କୁ ଉଦ୍ଧାର କରିଥିଲେ ଅଗ୍ନିଶମ ବିଭାଗ ଓ ସ୍ଥାନୀୟ ଲୋକେ । ଯାଜପୁର ସଦର ଥାନା ଅନ୍ତର୍ଗତ ଖଇରାବାଦ୍ ପଞ୍ଚାୟତ କଳିନ୍ଦ୍ରା ବାଦ୍ ଗାଁର ବିଶ୍ଵରଞ୍ଜନ ନିକଟରେ ଥିବା କେନାଲକୁ ଶୌଚ ହେବାକୁ ଯାଇଥିଲେ । ସେହି ସଭୟରେ ପାଣି ଭିତରେ ବିଶ୍ଵରଞ୍ଜନଙ୍କ ଗୋଡ ଖସି ଯାଇଥିଲା । ବିଶ୍ଵ ଗଭୀର ସ୍ରୋତକୁ ଭାସି ଯାଇଥିଲେ । ସ୍ଥାନୀୟ ଲୋକେ ଖୋଜା ଖୋଜି କରିବା ସହ ଅଗ୍ନିଶମ ବିଭାଗକୁ ଖବର ଦେଇଥିଲେ ଅଗ୍ନିଶମ ବିଭାଗ ଘଟଣା ସ୍ଥଳରେ ପହଞ୍ଚି ନାବାଳକକୁ ଉଦ୍ଧାର କରିଥିଲେ । ଯାଜପୁର ଜିଲ୍ଲା ମୁଖ୍ୟ ଚିକିତ୍ସାଳୟରେ ଡାକ୍ତର ତାଙ୍କୁ ମୃତ ଘୋଷଣା କରିଛନ୍ତି
ସମ୍ବଲପୁର : ସମ୍ବଲପୁର ପୋଲିସକୁ ବଡ଼ ସଫଳତା । ଧରାପଡ଼ିଲେ ଆନ୍ତଃରାଜ୍ୟ ଡକାୟତି ଗ୍ୟାଙ୍ଗ। ୧୦ ଡକାୟତଙ୍କ ସହ ଲକ୍ଷାଧିକ ଟଙ୍କା, ଗାଡି ଓ ସୁନାକୁ ଜବତ କରିଛି ପୋଲିସ । ଏହି ଆନ୍ତଃରାଜ୍ୟ ଲୁଟେରା ଗ୍ୟାଙ୍ଗ କିଛିଦିନ ଧରି ସମ୍ବଲପୁର ରାଇସ ମିଲରେ ଡକାୟତି କରୁଥିଲେ । ବାରମ୍ବାର ଲୁଟପାତରେ ମିଲ ମାଲିକଙ୍କ ସହ କର୍ମଚାରୀ ଓ ସ୍ଥାନୀୟ ବାସିନ୍ଦା ଭୟଭୀତ ରହୁଥିଲେ । ଗତକାଲି ବିଳମ୍ବିତ ରାତିରେ ସେମାନଙ୍କୁ ଗିରଫ କରିବାରେ ସଫଳ ହୋଇଛି ସମ୍ବଲପୁର ପୋଲିସ । ମୋଟ ୧୦ ଜଣ ଡକାୟତ ଗିରଫ ହୋଇଥିବା ବେଳେ ୪୮୦ ଗ୍ରାମର ସୁନା ଅଳଙ୍କାର, ୫ ଲକ୍ଷ ଟଙ୍କା, ୧୪ଟି ମୋବାଇଲ, ୫ଟି ବାଇକ୍ ସହ ୨ଟି ବୋଲେରୋ ଓ ଗୋଟିଏ ଟ୍ରାକ୍ଟରକୁ ଜବତ କରିଛି ପୋଲିସ । ଏନେଇ ଅଧିକ ସୂଚନା ଦେଇଛନ୍ତି ସମ୍ବଲପୁର ଏସପି ।
ବରଗଡ଼ : ବରଗଡ଼ ସିଏସି ନିକଟରୁ ୪୮୦ ବୋତଲ କଫ୍ ସିରପ ଜବତ । ଘଟଣାରେ ଜଣେ ଯୁବତୀ ଗିରଫ । ବରଗଡ଼ ଟାଉନ ଥାନା ପୋଲିସ ଦ୍ବାରା ଜବତ କରାଯାଇଛି କଫ୍ ସିରପ। ଗିରଫ ଅଭିଯୁକ୍ତ ଯୁବତୀ ଜଣକ ସମ୍ୱଲପୁର ସହରର ଏନ୍ ଗୁଆ ଗଲି ହୋଇଥିବା ବେଳେ ବରଗଡ଼ ନଦୀପଡ଼ା ଡାଙ୍ଗ ଅଞ୍ଚଳରେ ସେ ରହୁଛନ୍ତି। ତେବେ ଗିରଫ ଅଭିଯୁକ୍ତଙ୍କ କଫ୍ ସିରପ ସିହ ଦୁଇଟି ସ୍କୁଟି, ୧୦ ଷ୍ଟ୍ରିପ ନାଇଟ୍ରୋଜେନ୍ ବଟିକା ଓ ନଗଦ ଏକ ଲକ୍ଷ ୪ ହଜାର ପାଞ୍ଚଶହ ଟଙ୍କା ଜବତ କରାଯାଇଥିବା ଟାଉନ ଥାନା ପୋଲିସ ପକ୍ଷରୁ ସୁଚନା ଦିଆଯାଇଛି।
ଭୁବନେଶ୍ବର : ଆଜି ରାଜ୍ଯ କ୍ଯାବିନେଟ ବୈଠକ ବସିବାର ଅଛି । ସଂଧ୍ଯାରେ ଏହି କ୍ଯାବିନେଟ ବୈଠକ ବସିବାର ଅଛି। ମୁଖ୍ଯମନ୍ତ୍ରୀ ମୋହନ ମାଝୀଙ୍କ ଅଧ୍ଯକ୍ଷତାରେ ହେଉଥିବା ଏହି ବୈଠକରେ କିଛି ଗୁରୁତ୍ବପୂର୍ଣ୍ଣ ନିଷ୍ପତ୍ତି ନେଇପାରନ୍ତି ସରକାର। ଅନେକ ପ୍ରସ୍ତାବ ଉପରେ ବାଜିପାରେ କ୍ଯାବିନେଟର ମୋହର।
ବାଲେଶ୍ବର: ବାଲେଶ୍ବର ଚାନ୍ଦିପୁର କ୍ଷେପଣାସ୍ତ୍ର ଘାଟିରୁ ଆଜି ଏକ କ୍ଷେପଣାସ୍ତ୍ର ପରୀକ୍ଷଣ ହେବାର ଅଛି। ୩ ନମ୍ବର ଲଞ୍ଚପ୍ୟାଡରୁ ଏହି ପରୀକ୍ଷଣ ହେବ। ଏହାର ଲକ୍ଷ୍ଯକ୍ଷେଦ କ୍ଷମତା ଅଛି ୨୩୦ କିଲୋମିଟର। ସକାଳ ୧୦ଟାରେ ପରୀକ୍ଷଣ ହେବାର ଥିବାରୁ ସୁରକ୍ଷା ଯୋଗୁଁ ଲୋକଙ୍କୁ ସ୍ଥାନାନ୍ତର କରାଯାଉଛି। ଲଞ୍ଚପ୍ୟାଡର ୩ କିଲୋମିଟର ଦୂରତା ମଧ୍ୟରେ ଥିବା ଜୟଦେବକସବା, ଭୀମପୁର, ସାହାଜନଗର, କୁସୁମୁଳୀ, ଖଡୁପାହି, ତୁଣ୍ଡୁରା, ଛଚିନା, ଦୋମୁହାଁପାଟଣା, କଣ୍ଡର୍ଦ୍ଦା ଓ ବର୍ଦ୍ଧନପୁର ଗାଁର ୧୦ ହଜାର ଲୋକଙ୍କୁ ଅସ୍ଥାୟୀ କ୍ୟାମ୍ପକୁ ସ୍ଥାନାନ୍ତର କରାଯାଇଛି। ସେମାନଙ୍କୁ କ୍ଷତିପୂରଣ ମଧ୍ୟ ଦିଆଯିବ। ମିସାଇଲ ପରୀକ୍ଷଣ ପରେ ଲୋକେ ପୁଣି ନିଜ ନିଜ ଘରକୁ ଫେରିବେ।
ନନ୍ଦିଘୋଷ ବ୍ୟୁରୋ: ଟିମ୍ ଇଣ୍ଡିଆକୁ ୨ଟି ବିଶ୍ୱକପ୍ ଜିତାଇଥିବା ଯୁବରାଜ ସିଂ ବର୍ତ୍ତମାନ ଆଇପିଏଲରେ ପ୍ରତ୍ୟାବର୍ତ୍ତନ କରିବାକୁ ଯାଉଛନ୍ତି । ଯଦି ଗଣମାଧ୍ୟମର ରିପୋର୍ଟକୁ ବିଶ୍ୱାସ କରାଯାଏ, ତେବେ ଯୁବରାଜ ସିଂ ଗୁଜରାଟ ଟାଇଟନ୍ସର ମୁଖ୍ୟ କୋଚ୍ ହୋଇପାରିବେ । କୁହାଯାଉଛି ଯେ, ଗୁଜୁରାଟ ଟାଇଟାନ୍ସର କୋଚ୍ ଆଶିଷ ନେହେରା ଏବଂ ନିର୍ଦ୍ଦେଶକ ବିକ୍ରମ ସୋଲାଙ୍କି ଦଳ ଛାଡିପାରନ୍ତି। ଏହି ବଡ ଫଇସଲା ଆଇପିଏଲ୍ ୨୦୨୫ ମେଗା ନିଲାମ ପୂର୍ବରୁ ହୋଇପାରେ । ସୁଚନା ଅନୁଯାୟୀ, ବର୍ତ୍ତମାନ ଗୁଜୁରାଟ ଟାଇଟନ୍ସ ମ୍ୟାନେଜମେଣ୍ଟ ଯୁବରାଜ ସିଂଙ୍କ ସହ ଯୋଗାଯୋଗ କରିଛି।
ସମ୍ପ୍ରତି ଯୁବରାଜ ସିଂ ସମଗ୍ର ବିଶ୍ୱରେ ଅବସରପ୍ରାପ୍ତ ଖେଳାଳିଙ୍କ ଲିଗରେ ଭାଗ ନେଉଛନ୍ତି। କିନ୍ତୁ ବର୍ତ୍ତମାନ ବିଶ୍ୱାସ କରାଯାଉଛି ଯେ ତାଙ୍କୁ ଜଣେ ପ୍ରଶିକ୍ଷକ ଭୂମିକାରେ ଦେଖିବାକୁ ମିଳିବ। ତେବେ ଆଇପିଏଲରେ ଯୁବରାଜ ସିଂଙ୍କର ମଧ୍ୟ ଭଲ ଅଭିଜ୍ଞତା ରହିଛି। ୟୁଭି ୧୩୨ ଆଇପିଏଲ୍ ମ୍ୟାଚରେ ୨୭୫୦ ରନ୍ ସଂଗ୍ରହ କରିଛନ୍ତି । ଏହାରି ଭିତରେ ୟୁଭିଙ୍କ ବ୍ୟାଟରୁ ୧୩ ଅର୍ଦ୍ଧ ଶତକ ମଧ୍ୟ ଆସିଥିଲା । ଯୁବରାଜ ପଞ୍ଜାବ, ହାଇଦ୍ରାବାଦ, ପୁଣେ ୱାରିୟର୍ସ, ଆରସିବି, ମୁମ୍ବାଇ ଇଣ୍ଡିଆନ୍ସ ଭଳି ଦଳ ପାଇଁ ମଧ୍ୟ ଖେଳିଛନ୍ତି ।
Ashish Nehra & Vikram Solanki likely to leave Gujarat Titans ahead of IPL 2025. [Sahil Malhotra from News18]
– Yuvraj Singh in consideration for the role in Gujarat Titans…!!!! pic.twitter.com/sK8NBkhRjo
— Johns. (@CricCrazyJohns) July 23, 2024
ଯଦି ଯୁବରାଜ ସିଂ ଗୁଜୁରାଟ ଟାଇଟନ୍ସର ମୁଖ୍ୟ କୋଚ୍ ହୁଅନ୍ତି, ତେବେ ସେ ବିପୁଳ ପରିମାଣର ଅର୍ଥ ପାଇବେ। ଯଦି ଏକ ରିପୋର୍ଟକୁ ବିଶ୍ବାସ କରାଯାଏ, ତେବେ ଗୁଜୁରାଟ ଟାଇଟନ୍ସ ଆଶିଷ ନେହେରାଙ୍କୁ ପ୍ରତି ସିଜନରେ ୩.୫କୋଟି ଟଙ୍କା ଦେଉଥିଲା। ଯୁବରାଜଙ୍କ ପାଇଁ ଏହି ପରିମାଣ ବୃଦ୍ଧି ହୋଇପାରେ ।
ଭୁବନେଶ୍ବର : ଫିଟନେସ ନଥିଲେ ଅଟକିବ ଗାଡ଼ି। ଜରିମାନା ସହ ଗାଡ଼ିକୁ ଅଟକ ରଖିବେ ପରିବହନ ବିଭାଗ କର୍ତ୍ତୃପକ୍ଷ। ଏ ନେଇ କଡ଼ା ନିର୍ଦ୍ଦେଶ ଜାରି କରିଛନ୍ତି ବାଣିଜ୍ୟ ଓ ପରିବହନ ମନ୍ତ୍ରୀ। ସଡକ ଦୁର୍ଘଟଣା ହ୍ରାସ ଓ ଯାତ୍ରୀ ସୁରକ୍ଷାକୁ ନେଇ କଡାକଡି ନିୟମ ପାଳନ କରିବାକୁ ବାଣିଜ୍ୟ ଓ ପରିବହନ ମନ୍ତ୍ରୀ ଏହି ନିର୍ଦ୍ଦେଶ ଜାରି କରିଛନ୍ତି।ଏଣିକି ବିନା ଫିଟନେସ ଓ ପଞ୍ଜିକରଣରେ ଚାଲୁଥିବା ଗାଡି ବିରୋଧରେ କଠୋର କାର୍ଯ୍ୟାନୁଷ୍ଠାନ ହେବ। ଜରିମାନା ସହ ଆଇନ ଅନୁଯାୟୀ ଗାଡିକୁ ଜବତ କରି ମାମଲା ରୁଜୁ କରିବା ସହ ବେଆଇନ ଗାଡିକୁ ଅଟକ ରଖିବାକୁ ନିର୍ଦ୍ଦେଶ ଦେଇଛନ୍ତି। ଫିଟନେସ ଓ ପଞ୍ଜିକରଣ ବୈଧତା ସରିଥିବା ଗାଡିର ତାଲିକା ପ୍ରସ୍ତୁତ କରିବେ ଏମଭିଆଇ। ଏହି ନିର୍ଦ୍ଦେଶ କ୍ରମେ ରାଜ୍ୟ ପରିବହନ କମିଶନର ଗୁରୁତ୍ବପୂର୍ଣ୍ଣ ନିର୍ଦ୍ଦେଶାବଳୀ ଜାରି କରିଛନ୍ତି। ଶିକ୍ଷାନୁଷ୍ଠାନ କ୍ଷେତ୍ରରେ ଏହି ସବୁ ନିୟମକୁ କଡାକଡି ଭାବେ ଗ୍ରହଣ କରାଯିବ। ସାରା ରାଜ୍ୟରେ ଫିଟନେସ ଓ ରେଜିଷ୍ଟ୍ରସନ ସାର୍ଟିଫିକେଟ ଯାଞ୍ଚ କରିବାକୁ ସମସ୍ତ ଉପ ପରିବହନ ଆୟୁକ୍ତ ଓ ଆଞ୍ଚଳିକ ପରିବହନ ଅଧିକାରୀଙ୍କୁ ନିର୍ଦ୍ଦେଶ ଦେଇଛନ୍ତି। କେନ୍ଦ୍ରୀୟ ମୋଟର ଯାନ ଆଇନ ୧୯୮୮ ଅନୁଯାୟୀ ବାଣିଜ୍ୟ ଗାଡି ଗୁଡିକ ନିମନ୍ତେ ବୈଧ ପଞ୍ଜୀକରଣ ଓ ଫିଟନେସ ସାର୍ଟିଫିକେଟ ବାଧ୍ୟତା ମୂଳକ ରହିଛି। ଏହା ନଥିଲେ ଗାଡି ରାସ୍ତାରେ ଚାଲିବାକୁ ଅନୁମତି ମିଳିବନି। ଏ ସଂକ୍ରାନ୍ତରେ ରାଜ୍ୟ ପରିବହନ ପ୍ରାଧିକରଣ ପକ୍ଷରୁ ଗୁରୁତ୍ଵପୂର୍ଣ୍ଣ ନିର୍ଦ୍ଦେଶ ଜାରି କରାଯାଇଛି।
ନନ୍ଦିଘୋଷ ବ୍ୟୁରୋ : ଚାଷୀ ଆନ୍ଦୋଳନ ପାଇଁ ବନ୍ଦ ଥିବା ଶମ୍ଭୁ ବର୍ଡର ଖୋଲିବା ପ୍ରସଙ୍ଗରେ ଆଜି ସୁପ୍ରିମକୋର୍ଟରେ ହେବ ଶୁଣାଣି। ଗତକାଲି ଏହି ପ୍ରସଙ୍ଗରେ ଶୁଣାଣି ହେବାର ଥିଲା। ଆଜି ଶୁଣାଣି କରିବାକୁ ତାରିଖ ଧାର୍ଯ୍ୟ କରିଥିଲେ ସର୍ବୋଚ୍ଚ ନ୍ୟାୟାଳୟ। ମାମଲାରେ ତୁରନ୍ତ ଶୁଣାଣି କରିବାକୁ ଦାବି କରିଥିଲେ ହରିଆଣା ସରକାର। ଯାହାକୁ ନେଇ ଶୁଣାଣି କରିବାକୁ ନିଷ୍ପତ୍ତି ନେଇଛନ୍ତି ସୁପ୍ରିମକୋର୍ଟ। ଶମ୍ଭୁ ବର୍ଡର ଖୋଲିବାକୁ ପଞ୍ଜାବ ଓ ହରିଆଣା ହାଇକୋର୍ଟ ନିର୍ଦ୍ଦେଶ ଦେଇଥିଲେ। ଏହି ନିଷ୍ପତ୍ତିକୁ ଚ୍ଯାଲେଞ୍ଜ କରି ସୁପ୍ରିମକୋର୍ଟଙ୍କ ଦ୍ଵାରସ୍ଥ ହୋଇଥିଲା ହରିଆଣା। ନିଟ୍ ମାମଲା ଶୁଣାଣି ପ୍ରସଙ୍ଗ ନେଇ ସଲିସିଟର ଜେନେରାଲ ବ୍ୟସ୍ତ ରହିଥିବା ଯୋଗୁଁ ଏହି ମାମଲାରେ ଆଜି ଶୁଣାଣି ହେବ। ଆଇନ ବ୍ୟବସ୍ଥା ବିପର୍ଯ୍ୟସ୍ତ ହେବା ଆଶଙ୍କା କରି ହାଇକୋର୍ଟଙ୍କ ରାୟ ବିରୋଧରେ ସର୍ବୋଚ୍ଚ ନ୍ଯାୟାଳୟରେ ଚ୍ଯାଲେଞ୍ଜ କରିଛି ହରିଆଣା। ରାଜ୍ୟରେ ଆଇନ ବ୍ୟବସ୍ଥା ବିପର୍ଯ୍ୟସ୍ତ ହୋଇପଡିବା ଅଭିଯୋଗ କରି ହାଇକୋର୍ଟଙ୍କ ରାୟ ଉପରେ ରୋକ ଲଗାଇବାକୁ ଦାବି କରିଛି ହରିଆଣା। ହାଇକୋର୍ଟଙ୍କ ଅନ୍ତରୀଣ ରାୟ ଉପରେ ରୋକ ଲଗାଇବାକୁ ଦାବି କରିଛି ହରିଆଣା। ଏହି ରାୟନେଇ ହରିଆଣାରେ ଆଇନ ଶୃଙ୍ଖଳା ବ୍ୟବସ୍ଥା ନେଇ ଗମ୍ଭୀର ପ୍ରତିକୂଳ ପ୍ରଭାବ ପଡିପାରେ। ଶମ୍ଭୁ ସୀମାନ୍ତ ସହ ଏହାର ଆଖପାଖରେ ବସବାସ କରୁଥିବା ନାଗରିକଙ୍କ ପ୍ରତି ବିପଦ ଥିବା ଆଶଙ୍କା କରିଥିଲେ। ସମ୍ବିଧାନର ବିଧି ବ୍ୟବସ୍ଥା ମଧ୍ୟରେ ରାଜ୍ୟ ସରକାର ନାଗରିକଙ୍କ ସୁରକ୍ଷା ନେଇ ପ୍ରତିଶ୍ରୁତିବଦ୍ଧ। ଏହି ସମସ୍ତ କାରଣ ଦର୍ଶାଇ ମାମଲାରେ ଶୁଣାଣି କରିବାକୁ ଦାବି କରିଥିଲା ହରିଆଣା ସରକାର। ଏହି ମାମଲାରେ ଗତ ୨୨ ତାରିଖରେ ଶୁଣାଣି କରିବାକୁ ସମୟ ଧାର୍ଯ୍ୟ କରିଥିଲେ ଜଷ୍ଟିସ ସୂର୍ଯ୍ୟକାନ୍ତଙ୍କୁ ନେଇ ଗଠିତ ବେଞ୍ଚ। ଆଜି ଏହି ମାମଲାରେ ସର୍ବୋଚ୍ଚ ନ୍ୟାୟାଳୟରେ ଶୁଣାଣି ହେବ।
