ନନ୍ଦିଘୋଷ ବ୍ୟୁରୋ : ଦେଶରେ ଏପରି ଅନେକ ରାଜନୈତିକ ଘଟଣା ଘଟିଛି,  ଯାହା ଲୋକଙ୍କ ହୃଦୟରେ ଏକ ଅବିସ୍ମରଣୀୟ ହୋଇ ରହିଛି । ଆଜି ଆମେ ଆପଣଙ୍କୁ ଏପରି ଏକ କାହାଣୀ କହିବୁ ଯେତେବେଳେ ୧୩ ମାସର ଅଟଳ ବିହାରୀ ବାଜପେୟୀଙ୍କ ସରକାର କେବଳ ଗୋଟିଏ ଭୋଟ୍ ଯୋଗୁଁ ବିଫଳ ହୋଇଥିଲେ ଲୋକସଭାରେ। ସେତେବେଳେ ଅଟଳ ବିହାରୀ ବାଜପେୟୀ ଦେଶର ଦଶମ ପ୍ରଧାନମନ୍ତ୍ରୀ ଭାବରେ ଦାୟିତ୍ୱ ଗ୍ରହଣ କରିଥିଲେ। ଜଣେ ସାଂସଦଙ୍କ ଭୋଟ୍ ହେତୁ ଏହି ସବୁ ଘଟିଛି, ତେଣୁ ଆସନ୍ତୁ ଜାଣିବା ସେହି ସାଂସଦ କିଏ, ଯାହାଙ୍କର ଏକକ ଭୋଟ୍ ସହିତ ୧୯୯୯ ମସିହାରେ ଅଟଳ ବିହାରୀ ସରକାର ଖସି ଆସିଥିଲେ। ୧୯୯୮ ମସିହାରେ ଦ୍ୱିତୀୟ ଥର ପାଇଁ ଅଟଳ ବିହାରୀ ବାଜପେୟୀ ଭାରତର ପ୍ରଧାନମନ୍ତ୍ରୀ ଭାବରେ କାର୍ଯ୍ୟ କରିଥିଲେ। ୧୩ ମାସ ପରେ, ୧୭ ଏପ୍ରିଲ ୧୯୯୯ ରେ ସରକାର କେବଳ ଗୋଟିଏ ଭୋଟରେ ଲୋକସଭାରେ ଆସ୍ଥା ଭୋଟ୍ ଜିତିବାରେ ବିଫଳ ହୋଇଥିଲେ। ସେତେବେଳେ ରାଜନୈତିକ ପରିଧିରେ ଅନେକ ନାମ ଉପରେ ଆଲୋଚନା କରାଯାଇଥିଲା । ଯେଉଁଥିପାଇଁ ବାଜପେୟୀ ସରକାର ୧୩ ମାସର ସ୍ୱଳ୍ପ କାର୍ଯ୍ୟକାଳ ପରେ ହଠାତ୍ ଗୋଟିଏ ଭୋଟ୍ ଦ୍ୱାରା ଆସ୍ଥା ମୋସନ ହରାଇଲେ।

ଭାରତର ପୂର୍ବତନ ପ୍ରଧାନମନ୍ତ୍ରୀ ଅଟଳ ବିହାରୀ ବାଜପେୟୀ ସରକାରରେ ପ୍ରଧାନମନ୍ତ୍ରୀଙ୍କ ବ୍ୟକ୍ତିଗତ ସଚିବ ଥିବା ଶକ୍ତି ସିହ୍ନା ତାଙ୍କ ପୁସ୍ତକ ‘ଦି ଇୟର୍ସ ଦ୍ୟାଟ୍ ଚେଞ୍ଜ ଇଣ୍ଡିଆ’ରେ ସେହି ସମୟ ସହ ଜଡିତ ଅନେକ କାହାଣୀ ଲେଖିଛନ୍ତି। ତାଙ୍କ ପୁସ୍ତକରେ ସେ ଅନେକ ନେତାଙ୍କ ବିଷୟରେ ଉଲ୍ଲେଖ କରିଛନ୍ତି, ଯାହାର ସମର୍ଥନ ପରେ ଅଟଳ ସରକାର ଗୋଟିଏ ଭୋଟରେ ଖସିଆସିଥିଲେ । ସେଥିମଧ୍ୟରୁ ଗୋଟିଏ ନା ସାମ୍ନାକୁ ଆସେ ଅଲ ଇଣ୍ଡିଆର ଆନ୍ନା ଦ୍ରାବିଡା ମୁନ୍ନେଟ୍ରା କାଜଗାମ ପାର୍ଟିର ଜେ ଜୟଲଳିତା। କୁହାଯାଉଛି ଯେ ତାଙ୍କ ସମର୍ଥନ ପ୍ରତ୍ୟାହାର କରିବା ପରେ ଅଟଳ ବିହାରୀ ବାଜପେୟୀଙ୍କ ସରକାର ସଂଖ୍ୟାଲଘୁ ହୋଇ ଯାଇଥିଲେ ଏବଂ ପରେ ଲୋକସଭାରେ ଆସ୍ଥା ଭୋଟ୍ ହରାଇଥିଲେ। ଆଲୋଚନାରେ ଏହା ମଧ୍ୟ ଉଲ୍ଲେଖ କରାଯାଇଛି ଯେ ତତ୍କାଳୀନ କଂଗ୍ରେସ ସାଂସଦ ଗିରିଧର ଗମାଙ୍ଗ ଏବଂ ଜାତୀୟ ସମ୍ମିଳନୀର ସୈଫୁଦ୍ଦିନ ସୋଜ ବାଜପେୟୀ ସରକାରକୁ ହଟାଇବା ପାଇଁ ସେହି ଗୋଟିଏ ଭୋଟ୍ ପାଇଁ ଦାୟୀ ଥିଲେ। ପରଦିନ ଅଟଳ ସରକାରଙ୍କ ପତନ ପରେ ଫାରୁକ୍ ଅବଦୁଲ୍ଲା ସୋଜଙ୍କୁ ଦଳରୁ ବହିଷ୍କାର କରିଥିଲେ।

୧୭ ଏପ୍ରିଲ ୧୯୯୯ରେ ଅଟଳ ବିହାରୀ ବାଜପେୟୀ ସରକାରଙ୍କୁ ଲୋକସଭାରେ ସଂଖ୍ୟାଗରିଷ୍ଠତା ପ୍ରମାଣ କରିବାକୁ ପଡିଥିଲା, କିନ୍ତୁ ସେହି ଦିନ ଅଟଳ ବିହାରୀ ବାଜପେୟୀ ସରକାର ୨୬୯ ଭୋଟ୍ ପାଇଥିଲେ। ଏଥିସହ ବିରୋଧୀ ଦଳରେ ୨୭୦ ଭୋଟ୍ ଦିଆଯାଇଥିଲା। ୧୩ ମାସର ସ୍ୱଳ୍ପ କାର୍ଯ୍ୟକାଳ ମଧ୍ୟରେ ଆସ୍ଥା ଭୋଟ୍ ହରାଇବା ପରେ ବିଜେପିର ବାଜପେୟୀ ସରକାର ଇସ୍ତଫା ଦେଇଥିଲେ ।